 |
رواية الابواب الخمس الفصل الواحد والعشرون بقلم ريام الهادي
ولج بسج يا دنيا شلون اني ويـاج ..
يعني نضل حرب ما بيهــة هدنـــة ..
دواره سمعــت عنـــــج يكــولــــون..
شمالج ع الفرح ما درتــي يمنـــة..
بقينة اعلى الحزن وخاوينة الفراك..
وما اظن للوفة باقي اي معنــــه..
ناس بلا سبب تجــــرح بالكلــوب..
وانتي وية الظلم تمشين ضدنــة....
(هديه من احدى المتابعات)
ذكرى : صايمه وروحي بهتانه وافكر بسهاد اخاف تسوي شى اكنس بلبساط وعيني على باب غرفتهم كل شويه اكول هسه تطلع من الغرفه وتسويلي هوسه وانحطت ايد على جتفي جفلت
بديعه : اسم الله شبيج فزيتي وين بالج
ذكرى : كعد انظف
بديعه : ياتنظيف فدوة لعينج كل شويه راجعه لنفس المكان تكنسين وين بالج
ذكرى : خايفه من سهاد
بديعه : هاي بعدج تفكرين بيها
ذكرى : شسوي مشفتيها الفجر شسوت
بديعه : لو تريد تسوي شى جان هسه البيت كايم مكاعد من هوستها ماطول ساكته أمني
ذكرى : والله جنت اسوي سحور وهو اجه
بديعه : يابه خلي اطير ليش شاغله بالج يمها ويبقى حماج شنو حرام توكفين وياه
ذكرى : مو شفتي الرجف مالتها
بديعه : عوفيها وكملي البيدج واطلعي على الطرمه عمتي شالت السكراب والخشب من الصبح وضل المكان كله زنجار وصخ واني راح اسوي الغدا واخبز
ذكرى : اخاف اتعبين
بديعه : لا متعبانه وهسه اكعد خوله تخبز ويايه وتساعدني
ذكرى : وذنيج وينهن
بديعه : مكبورات بغرفهن بس سمعت ساهره كالت راح اغسل السطح وتمسح البيتونه والدرج الفوك
وصالحه
بديعه : مالها حس اليوم
ذكرى : خلي اكمل وبديت اكنس وانفض الفراش وعيوني تتنقل هنا وهناك طلعت للطرمه انظفها
لازمه الصونده وبيدي المكناسه وانظف وشفت رجل وكفت كبالي رفعت راسي عرفتها سهاد
سهاد :اخاف عبالج الصار الفجر اعبره تحلمين
ذكرى : ذبيت المكناسه والصونده وكمت وكفت وصرت بوجهه متكوليلي اني شسويت وانتي هيج متخبله عليه واذا وكفت ويه نجم قابل كفرت غير حماي ومثل اخويه واجه يحجي ويايه وخلف الله عليه رايح لاخويه فوزي حتى يرضى اصالحه وكعد اتناقش وياه شلج بعد بهاي الهوسه وتحجين ويايه من وره خشمج
سهاد : لان اعرف سالفتج وياه مو خاليه واعرف رجلي نظرته الج مو نظره مرت اخ والله اعلم شكو بينكم
ذكرى : كمت ارجف وكتلها عيب وحرام عليج هيج تذبين تهمه ماشفت من نجم بس الخير وعمره ماطلعت العيبه منه ولا النظره اعتبره حاله حال فوزي وحتى حمويني الباقين بلعكس هو يمكن اقل واحد احجي وياه شجاج سهاد عيب والله عيب
سهاد : بعدي عن رجلي ذكرى تره والقران اشهرج شهيره لهسه ساكته وبالعه كلشي اشوفه بعيني
ذكرى : اشايفه بله احجي ليش تباعين بوجهي شفتني اغوي رجلج احجي اشايفه صاير شى كدامج وخلاج هيج تفكرين
سهاد : كتلج بعد اذا شفتكم سوه مره ثانيه متلومين اله نفسج
ذكرى : مو طبيعيه انتي والله مااكول بس الله يسامحج
سهاد : هاي سوالف الايمان والتقوى عوفيهن على جهه ميمشن عندي ولا اشتريهن بدينار اخاف ماكله حلاوه بعقل هاي المره الجبيره وتقشمرين عليها ومخلصتها قال الله وقال الرسول اني مااتقشمر عيني
ذكرى : شحجي وياج بعد هذا هو عيني اذا رجلج اجه من اليمنى اروح يسره صار
سهاد : اي هيج استري على نفسج وجهالج ومو كل مره اعبرها الج حتى سلام بينكم ماكو
ذكرى : استغفر الله ادخلي سهاد رجلج مالي دخل بيه اطمني
دفعت الصونده برجلها وطبت
بديعه : نفضت العجين من ايدي وشغلت التنور لكيت ذكرى واكفه والمي يجري
اليوم معاجبتني هسه شجاج الماي ترس الفرع
ذكرى : هاي سهاد
بديعه : شبيهه الخنوسيه
ذكرى : وحجت كلشي لبدعه
هذا هو بعد لتحجين ويه نجم اعتبري مات
ذكرى : لا اسم الله
بديعه : يااا باع الوعد
ذكرى : ولج غير شاب ومثل اخويه ليش هو الموت هين اعتبره مو ويانه بلبيت بس مستحيه اذا اجه وهو يحجي ويايه شون اصده
بديعه : تردين اني احجي ويااه
ذكرى : اي والله مستحيه حيل فوك ماراح لفوزي وديسوي خير هلمره اقاطعه
بديعه : مااشي اني احجي ويااه كملي مو هسه تجي عمتي بس تلكه الشارع كله مي تگلب البيت علينا
ذكرى : راح اكمل
كملت شغلي وصعدت لكيت ناي كاعده وتغني لشوشه وتريد تشيلها ركضت عليها لا ماما حبيبتي توكع ويصير بيها اوى
ناي : اليد نونيه مااودعها (مااوكعها)
ذكرى : يصير بيها اوى وتبجي حبيبتي راح اخليها بحضني وانتي هم تعالي بحضني والعبكم سوه شوو تعااي يمه فدوة للبنات الطولانات وكبرانات
ناي : الوح للمدسه ويه يويو(يونس)
ذكرى : اي هسه تكبرين وترحين للمدرسه ويااه وتاخذين نونايتج
راح ابقي اختج هنا الزمي الها الممه مالتها حتى تشبع وانتي راح اجيب الريوك مالتج اوكلج لتسوين وكاحه
ناي : لا وتهز براسها
ذكرى : سويت حليب وسلكت بيضه الها وصعدت شافتني صالحه
صالحه : هاا جنه البيت العزيزه شونج
ذكرى : صبحنا بعدنا بسم الله
صالحه : شگلنا قابل جذب شو ياهو الرايح والجاي وصاح ذكرى جيبيلي هيج ذكرى سويلي هيج
ذكرى : وهذا الشى عود زين تره هذا كراب وتعب هذا شغلج وشغل اختج المفروض انتن تسونه واني لوما استحي من حمويني اردهم واكول نسوانكم موجوده شنو اتصخروني لتسوين نفسج ضايجه من هذا الشى اعتقد يفرحج لان كاعدات اميرات انتي واختج وحاطات رجل على رجل واني وذيج المكروده نكرب ونرجع ليوره
ساهره : صباح الخير
ذكرى : وين الخير واختج من الصبح حاميه عليه
ساهره : شبيج صالحه
صالحه : مابيه بس كلت اشوف الجنه الحنينه شونها
ساهره : ليش متصير حنينه هااج مو عمتي راح تسجل البيت بأسمها
ذكرى : انتم صدكتو تره والله المره تتشاقه ومبين شقه حتى الجاهل يميزه لتسون نفسجن مصدكات عمتي لبتها متأمن تجي تسجل بأسمي من كل عقلجن
ساهره : يجوز من هاي الشغلات هليام نشوفج تسويها وحلكج الي ميبطل حركه وتبسبس بينج وبين نفسج ذاك اليوم حتى وانتي اطبخين تبسبسين
ذكرى : الصبر ياصاحب الصبر عيني من تشوفيني هيج اسوي كاعد اقرا ايات اسبح بأسماء الله الحسنى وتسبيحات سبحان الله اتعبد الله مو اسوي شى موزين وحتى من اسوي الاكل هذا الشى يزيد البركه من ينذكر اسم الله عليه
صالحه : ومنو يكول
ذكرى : صدكتي او لا متهميني واعرف الي قالقج لان اذكر الله بكل مكان المسه تعرفين بيه مو درب شعوذه وسحوره وهذا الشى متعبجن اسم الله من ينذكر اتعبن وحتى انتي ساهره نفس وضع اختج اسم الله يتعبجن حييل لهذا مركزات عليه عفيه اني بحالي تشوفون حتى مااشكي من الشغل رغم التعب عوفوني بحالي واذا متردون اطبخ بعد احسن ارجعن طبخن يوميه على وحده واني اسوي اكلي واكل جهالي وحد حتى ترتاحون
ساهره : خوش هاي حتى تذبين الشغل براسنا
ذكرى : اروح اوكل بنتي الحجي وياجن يتعب ويهد الحيل اكثر حتى من شغل البيت
عفتهن ودخلت للغرفه لكيت ناي تبوس بأختها كعدت يمها اوكلها فتحت كماط شرهب ونظفتها وشلتها ونزلت غسلت الها ورجعت لفيتها ردت اصعد شفت ساهره وصالحه كاعدات بلهول يتريكن
صالحه : تكول بتها وحاطها على گلبها
ذكرى : اي بتي ليش هي الام التجيب لو التربي
ساهره : والله قابليه هاي لو اني بمكانج وجاب جوحي بنيه وكال هاي بت ضرتج ربيها اله اخنها كدامه وادفنها
جان تنفتح الباب وطلعت خوله وعيونها مورمه من النوم وتعدل بشعرها المكفوش وجان تكول ميصير هذا الشى جوحي ميتزوج عليج لان هو عليج ميصرف يجيب مره ثانيه ويصرف عليها
حطي بطنج بطيخه صيفي على كولت المصريين اخر واحد بلدنيا يتزوج على مرته هو جوحي هو لوبيده يطلكج حتى يخلص من مصاريفج
ساهره : لا هله كعدتي
خوله : اكعد انام انتي شكوو
ساهره : اني داحجي ويه ذكرى انتي شدخلج
صالحه : غير المحامي مالتها لازم تنبص
خوله : مبين الاخوات الشريرات اليوم كل الحيل بيجن مستلمات هاي الفاهيه من الصبح
صالحه : ياصبح عيني راح تصير ١١ ونص
خوله : متكولين لروحج المن كاعد تتريكين ليسمعج احد ويكول ياعيني كاعده من الخمسه الفجر تخبز
ذكرى : خلي اصعد البنيه بردت
خوله : جيبيها ابوسها شالتها خوله وتبوس بيها ولج شنو هذا الحسن والله وتحسن نسلك يصمد الاجلح
صالحه : غير امها جليله حليوه
خوله : هاي سوالف مال احجي وياج يابنتي واسمعج ياجنتي بطلنها ذكرى امها واسم جليله لتذكرنه ابد ليش تكب عركه مرتبه وادفع عموشه عليجن وتطردجن وتالي امجن تجي تتوسل احفظن مي وجهجن شون بله يوميه تنطردن
صالحه : انجبي واحترمي نفسج منو يكدر يطردنا
خوله : عمشه امي خالتجن تلزمجن الباب ولتغلطين تره لساني اذا انفك ماينسد
ذكرى : جيبي البنيه خلي اصعد راح تگب بينجن ومااريدها تفز وتبجي
ساهره : شوف هاي الثانيه مصدكه بتها وتخاف عليها
خوله : لان عدها رحمه صدك ام مو مثل غير ناس شمرت لحمها وبزرتها بلشارع انتي وجليله من طينه وحده
وياجن صلوحه حبيبتي اجت بدعه تصيح بصوت عالي
بديعه : منو تريد خبز حاار
خوله : بدعدع كلاص جاي بداعت جهالج وياه كرصه من ايدج اريد اكل بغرفتي اكو شكول مااريد اشوفها
بديعه : انتي بس دخلي للغرفه حتى اني اوكلچ بيدي وانتي ذكرى صعدي وغمزت الها مردت تگب عركه حجيهن للطرمه واصل اخبز واسمع سوالفهن
طبت خوله وذكرى صعدت باوعت على ساهره وصالحه وكتلهن تردن خبز
صالحه : منريد
بديعه : عفتهن ورجعت اكمل وبالي يم ذني من اجن اخر مره من اهلهن وهنه موطبيعيات وحيل يتحارشن بذكرى
مرت الايام واجه رمضان جان هذا اول رمضان اني وذكرى وعمتي وفلاح ونجم وسهاد صايمين زاد عدد صيام هذا البيت جنت قبل بس اني ومرات فلاح يصوم ويايه ومن اجت ذكرى كمنا نصوم سوه بس هاي السنه العدد زاد
سهاد تصلي وتصوم بس تكطع يعني من ذوله عبده رمضان تلتزم برمضان ومن يخلص ترجع تكطع صلاتها
اول يوم ومنتظرين صوت الاذان وذكرى سوت جو يخبل بلبيت فتحت التلفزيون وعلت القران على عبد الباسط قناه العراق القناة الاولى الجو بره بارد بشباط و مغيم وبدا الغروب يهل بس داخل البيت دافي الصوبه علاء الدين مشتغله وعليها جدر الدولمه وريحه الاكل معبيه المكان
وبلمطبخ كل وحده تسوي شى الي طبخت الشوربه والي تطرك لبن والي تسوي حلاوه واني جنت مسويه برياني ويه الدولمه بيومها جانت عمشه مكيفه لان صايمه واتسوكت زين بكل وارد الشغل كالت اريد فطور زين لان اول يوم وكلهم يكعدون حتى المصايم وراها اطيح حظجن اي شى اطبخن ضحكنا وكيفنا وكمنا نبدع بلفطور خوش فرصه
بقى ٥ دقايق على الاذان لكيت ذكرى واكفه ومبتسمه
هااي خيه خيرج
ذكرى : شوفي عمتي شون واكفه گبال القران وتسمع اله والسبحه بيدها والله شكلها حلوو
بديعه : الفضل الج واله منو يتوقع عمشه تصلي وتصوم
ذكرى : الهدايه من الله اني مجرد سبب
بديعه : الله يجعلها صدقه لعمرج وجهالج
ذكرى : امين
اندارت علينا وشافتنا نباوع عليها ونسولف جاان تعيط
عمشه : من خفت لهلوجوه چا طكنا الجوع وانتن صافنات عليه
ذكرى : كملنا كلشي عمه ننتضر المدفع والاذان ونصب
عمشه : صبن خايبات انه يصيح الله اكبر اذب رويحتي ذب بالاچل عبن جيعانه وريگي ناشف مثل وجوهجن المنشفه
ذكرى : غير تصلين ياعمه هيج تثكلين ومتكدرين تصلين
عمشه : چا انتي بمجاني شلج دخل لاتفطريني بيج يذكيره واعدن عليج وماينحسب صيامي والزمنج واكضي التوبه بيج عبن اليوم خلصته وانه جبدي وكف من الجوع والعطش
ذكرى : هذا هو عمه اكلي وكملي وصلي براحتج
عمشه : أگلجن سويتن مدكوكه
بديعه : اي عمه سويت ولفيتها مثل متردين مدورات وكومه راشي بيها وحطيت سمسم الهن
عمشه : لجن انتي يبدعه بيدج لو بيد سهاد
بديعه : والله بيدي سويتها ليش واذا سهاد سوتها
عمشه : غدي چا غير تلعب بخشيمها وتشتغل
بديعه : اييييع ولج سهاااااااد تعاي يمعزايه
سهاد : هاا هاا شكوو
بديعه : صدك تلعبين بخشمج وتشتغلين ولج اللبن ذبي
سهاد : هااي شبيج بدعه
بديعه : عمتي تكول والله
عمشه : بيدها السبحه وتباوع سبحان الله والحمدلله چاكون بنار جهنم تحرك افادج
انه گلت يچوز
ذكرى : ههههه لا عمه مو انتي صايمه ميصير تكذبين
سهاد : يابه وصيامي حكيت خشمي وغسلت وهي شافتني
عمشه : يايمه سهيده جويده ومعدله ترد الروح منها الشغيله مالج دخل يمه بذني المكموعات گله البله منهن
ذكرى : هههههه امشي نكمل گلبت علينا
يله بدعه نصب
حطينا الجرايد وصبينا الاكل وكلنا نتساعد كلت لسهاد تصيح لساهره وصالحه ورجولتهن لان عمتي رادت الكل
اجه الكل كعد بلكاع وصمد بصفي ويونس بحضنه وشرهب ورايه الممه بحلكها اخاف اعوفها وحدها فوك وحطيت ناي بحضني
الكل كاعد واجت خوله اخر وحده
خوله : ماشاء الله شكلكم يفتح النفس القوم المؤمنين على اليمنى والقوم الكافرين على اليسرى
عمشه : من دهر الدهرج كضي لسانج واكعدي جاري وجرتها عمشه من ايدها وكعدتها
عمشه : ولج ذكيره شكول من افطر انه نسيت
ذكرى : عمه كولي اللهم لك صمت وعلى رزقك أفطرت وبك آمنت وعليك توكلت وإليك أنبت ذهب الظمأ وابتلت العروق وثبت الأجر إن شاء الله
عمشه : والغسل چا راكض وراج بغل وتلبكين لبك انه حفظت اللهم والباقي گله بلشط مااعرفنه مالحكت عليج
خوله : اني اكوله الج يمه وعيدي ورايه وبديت احجي لامي وهي تعيد ورايه يله اكلي هسه بلعافيه
ذكرى : اذا هيج انتي تعرفين ليش متصلين وتصومين ويانه
خوله : شون مااعرف نسيتي اني خريجه معهد وهاي الامور ماخذتها بالاسلاميه
ذكرى : الله يهديج وتصلين وتصومين
خوله : ادعيلي يجوز يجي يوم واسمع كلامج
بدينا ناكل وعمشه تباوع على ولدها ومكيفه بيهم وبخلفتهم
نجم : من رخصتج ام يونس من يمج اللبن
ذكرى : انطيته وعيوني على سهاد الجانت تباوع من جوه ليجوه
انطيته ورجعت كملت اكل
ناي : ماما اريد من هاي
ذكرى : هاج ماما
ناي : هاي هاي مال عمو
ذكرى : اشرت على لحمايه يم نجم هو شافها سحب ايدها وعضها
نجم : فدوة لهاي الايد هاااج اگلي
جيبيها بحضني اني اوكلها
ذكرى : لا لا عوفها واكل اخذ راحتك جان ردي بنتره وهو استغرب كملنا الاكل وبدينا انلم المواعين وناس تنظف وناس تغسل وصالحه تسوي الجاي شفت ايدها مدري شتحط بلقوري وتسده بدون محد منتبهه عليها رفعت عيوني علبه الجاي بعدها بمكانها
جريت القوري سريع وذبيته بلسنك
صالحه : هاااي ليش
ذكرى : عبالي قديم اسوي جديد
صالحه : هو هذا جديد مشفتيتي من ترست المي من البوري
ذكرى : لا مشفتج جنت امسح الكاع يله هو مي مصار شى راح احط غيره واسوي
صالحه : روحي اني اسوي
ذكرى : ميحتاج روحي ارتاحي
صالحه : كتلج اني اسوي
ذكرى : مااشي
عفتها وبديت اشطف المواعين ويه بدعه غمزت الها
بديعه : هاا
ذكرى : تقربت من اذنها مدري شتريد تسوي صالحه قبل شويه دارت شى بلقوري لتشربين منه
بديعه : مايجوزن الحقيرات
ذكرى : مااريد عمتي تشرب
بديعه : سهله عوفيها عليه بس جم دوب هم يجي يوم وتشرب
ذكرى : اني عود الزم عمتي واكول الها متشرب بعد من ايدها
بديعه : مااشي
كملنا الغسل وصبت الجاي صالحه وطفرت اني شفت عمتي اخذت الاستكان مال الجاي هي بيها طبيعه متشربه تنتظر شويه يدفه يله تشربه حطته بصفها بلكاع وكاعده تسولف ويه الولد فلاح اخذ الجاي سحبته من ايده
فلاح : خلي اشرب شبيج
بديعه : يأذيك كومه شربت ماي ولبن
فلاح : يمعوده بس الجاي يعدل راسي
بديعه : خلي احطلك شكر زايد لان اكيد مر اخذته وركض بلسنك ذبيته وسحبت القوري هااج اغسلي بسرعه نسوي جديد
سهاد : شبيجن
ذكرى : ماكو شى الجاي احترك ونسوي غيره
بديعه : رحت لعمتي عود الملم طخيت الاستكان برجلي وكع الجاي على الفراش
عمشه : يامن ثول الثولج شبيج هبشه تكمزين هنا وهنا متركدين
بديعه : مشفته عمه
ساهره : هسه اسويلج غيره عمه
خوله : باوعت على بدعه واشر وهي تغمز مبين اكو شى كمت للمطبخ
شبيهه مرت حماج تكمز
ذكرى : بدعه
خوله : اكو غيرها
ذكرى : شفت صالحه مدري شدارت بلجاي
خوله : ايا بت الگلب اليوم احرك ابوها بكبره
ذكرى : لزمتها فدوة لتسوين مشكله هستونا فطرنا واخوتج كلها هنا تكبر بينهم فدوة لتخليني احلف مااحجي شى الج
خوله : ذني شوف شسون ملعوبه جديده
ذكرى : اترجاج بليه مشاكل طبت صالحه تقربت الها خوله واني بنصهن
خوله : سوالف الرش بلجدوره والقواري بطلن منها لا ورب هذا رمضان مثل مارجعتجن لهذا البيت اطلعجن منه وبفضيحه لا عبالج ساكته وهاديه ومامندكه بيج وبأختج ونسيت سوايتجن بيه لا عيني بس گلت منتظره الوكت الزين واشعوط گلبجن
صالحه :زقنبوت احد واصل يمج اخاف انتي ولج ذكرى حسيت سالفه ذب المي مال قبل شويه مو خاليه
خوله : مالج دخل بيها احجي ويايه
صالحه : اذا تصدكين بيها شحجي بعد
خوله : لتحجين اي شى
بديعه : دخلت اركض بساع ذكرى وين الجاي اريد اثنين استكاين لعمتي ولفلاح
خوله : والي وياجن
طلعت صالحه من المطبخ ولزمتها
بديعه : هاي نضل هيج داخلين انذار من وراهن
خوله : مو دومهن بنصنا شتغير هسه
بديعه : تغير تأذينا حيل منهن وتعبنا لحد ما التزمنا وخاصه عمتي ويوم ما الج تلتزمين
خوله : طول ماذني موجودات اي خير منشوف اني اكدر اطلعهن من البيت بس مستفادينا شى راح يلعبن من بعيد والصوج بأخوتي طليان بيدهن
ذكرى : خلي نكمل شغل تره لهسه ممصليه
بديعه : اني والله هم
ليالي رمضان تمشي ويوم بعد يوم يكون احلى وخاصه من كمنا نفطر وحدنا وذني ميكعدن لان يتغدن متأخر وبس الصيام نكعد سوه و خوله على الواهس حتى صمد يتغدا ويطلع يجي تالي الليل يلف راسه وينام اي شى بينا ماكو وبين يوم ويوم ينطيني مصرف مااصرفهن كلهن اضم منهن اكول بلكت الله الم منا للعيد واشتري ملابس للجهال كل عيد مااكدر اشتري اريد افرحهم وخاصه شرهب هذا اول عيد هيه ويانه
بديعه : ليش هيج تحبين شرهب
ذكرى : احسها بتي والله گلبي يرف عليها بدعه من تكعد تبجي احسها تصيحني منتظره يوم يوم تصيحلي ماما
بديعه : مو عندج ناي ويونس
ذكرى : اي بس هاي غير شكل مدري لان احسها انظلمت بأول يوم بعمرها واريد اعوضها
بديعه : مبقى شى العيد ٤ ايام
ذكرى : واريد اطلع اشتريلها ملابس هيه واخوتها
بديعه : شكد صار عمرها
ذكرى : ٥ اشهر كبرت وتناغي وتضحك
بديعه : الله يحفظها وتشوفيها عروس
ذكرى : لج عيني ويه روحي اموت عليها بديعه : انيالها عدها ام مثلج حنينه
ذكرى : وانيال بلال عليج
بديعه : اوووف گلبي نار على هذا الولد سألت جيرانه بت اخوها هم مثل بلال كالت عادي حالته يتأخر بلمشى والحجي كتلها صار عمره ٣ سنوات تكول عادي اكو لل٦ سنوات والحجه ماكو
ذكرى : الْحٍمَدٍ للـّہ يمشي
بديعه : بس كلامه ما مفهوم كوه ماما وبابا تطلع من حلكه
ذكرى : تبقين هيج حابسته بلغرفه
بديعه : والله اخاف عليه وهاي ساهره اخاف
تضوجه او الجهال يأذوه بره اذا طلعته
ذكرى : اوكفي ويااه خطيه لازم يشوف جهال مثله باقي على اخته وجهالنا هيج يكوم يخاف
بديعه : احاول انزله ويايه واشوفه كلشي
ذكرى : حملج ثكيل بدعه شدي حيلج وراه تعب
بديعه : ميخالف فدوة اله متشوفيه شون يدخل الگلب وياهو الي يشوفه يحضنه
ذكرى : بس اجيج يجي ركض عليه شكد ينحب ياربي شون هاي الحقيره تشوفه وميرف گلبها عليه
بديعه : بعد حقيره شتترجين منها
ذكرى : اريد اروح لاهلي بلعيد بلكت اصالحهم
بديعه : اي خوش فرصه
ذكرى : حجيتي ويه نجم
بديعه : لا والله نسيت متشوفي ميلفي بلبيت وهاي الفتره يفطر ويروح يلعب محيبس وطاولي ويه الولد للسحور يله يطب
ذكرى : اني هم اتهزم منه
بديعه : ابقي هيج هاي سهاد حقيره تفتر وراج بس يدخل نجم عيونها متفاركج
ذكرى : ادري والله حاسه بيها مرات اعذرها واكول رجلها حقها
بديعه : مالها عذر قابل اكو شى بينكم لا سامح الله عوفيها ولتفكرين بيها ابد
ذكرى : خلي نروح للسوك باجر حبابه لان وراها نلتهي بلتنظيف والگليجه
بديعه : اشوف فلاح بلكت ينطيني
ذكرى : اني عندي نشتري لكل واحد من جهالي وجهالج قطعه جديده وناخذ قماش بازه للبجايم وانتي خيطيهن
بديعه : اني اخذ من فلاح بس يجي وانزل على عمتهم اكمز فوك راسها واخذ منها اكيد عمشه انطتها جم فلس صار مده ما ماخذين منها
ذكرى : هههههه والله زين متحملتج خوله
بديعه : هي لا تطلع ولا تشتري اقلها اخذ منها للجهال هي دوم تكول للجهال اخذي الج ولذكرى ماكو واني راضيه اهم شى الجهال يلبسون
ذكرى : خوش نروح باجر حتى تلحكين تخيطين البجايم
رحنا للسوك بعد مااخذت من خوله وفلاح واتسوكنا جان كتل الناس تشتري وتتسوك للعيد اخذت قماش للجهال كلهم حتى جهال صالحه وساهره حتى اخيط بجايم ودشاديش يلبسوها للعيد
ورجعنا اني وذكرى
ذكرى : اني صاعده تعبت وهم اخذ الجهال من خوله اوكلهم وبلكت ينامون وميتعبوني لان ظهري موتني واجي اكمل الفطور مضل وكت
بديعه : افترنا السوك كله
ذكرى : غير اندور الحاجه الرخيصه حتى تكفي فلوسنا
بديعه : اصعدي ارتاحي واني رايحه لذني الشعنونات اخذ منهن فلوس القماش خوما مني ادفع
ذكرى : كون ينطنج
ذكرى : ينطن شحدهن وابدل واجي اساعدج هسه الولد هم على جيه
بديعه : دخلت ذكرى لغرفه خوله علمود الجهال واني صعدت لصالحه باوعت ماكو احد بغرفتها هاي وينها اخاف يم اختها رحت للغرفه الثانيه حطيت اذني على الباب اريد اسمع بلكت الكف شى واسمعهن يكولن
سهاد : يمعوده شكعد تسوون اني مالي دخل بيجن
صالحه : اذا مصرتي ويانه معناها علينا وقسماً بالله اذا حجيتي شى لااندمج على اليوم الي انولدتي بيه
سهاد : والله حرام عليكم هاي روح لهاي الدرجه الكتل حلال عدجن ومو بهاي الطريقة البشعه
صالحه : احجي انتي الثانيه شو ساكته
ساهره : شحجي اني وياج شسوين اسوي المهم نخلص من ذيج لعبت روحي منها حتى رجولتنا تحبها تكول بس هي الطيبه احنه الموخوش اوادم تكول عبالك بس هي جنة هذا البيت واحنا مزهريات مالنا داعي
سهاد : والله انتن شياطين مالي دخل
صالحه : تنجبين وتسكتين لتخليني احطج براسي واخليج تلحكيها وتونسيها بكبرها
سهاد : اسكت والله بس لتأذوني
صالحه : سدي الباب واكعدي نتفاهم اليوم ننهي حياتها
سهاد : مسدود مو كدامج
صالحه : هسه شكلتن
ساهره : هاي سوالف الكلتيها قبل شويه متصير راح يلكفونا
صالحه : صار ساعه اخربط وحدي وانتن بس صافنات انطن رأيجن لا سم ترضن لا سحر تكولن تصلي
سهاد : انتن تردن تموتنها مو لان زينه وحبابه وتخافون لتاخذ البيت من عمتي وتطردنا كلنا
ساهره : لعد من شنو ياعبقريه
سهاد : لان بدت تحاربجن بسوالفجن وخاصه من عمتي كامت تصلي وذكرى تحومي على خوله تريدها تصلي تخافن كلشي سويتنه وتعب السنين يروح والبيت كله يگلب عليجن وينظف من سحورتجن
صالحه : مبين رايده تلحكين ذكرى
سهاد : هااي شبيج صالحه كل شويه تهدديني غير اريد افهم ليش هيج متردوها وكعد نتناقش
صالحه : على اساس انتي تحبيها وميته عليها بطلي هاي سوالف الزعاطيط
سهاد : اكو شى اريد اكوله
صالحه : احجي بله بلكت نستفاد منج
سهاد : نجم يحب ذكرى
ساهره : عزه كولي غيرها
صالحه : اوكفي اوكفي شنو يحبها ليرعنه تحجين صدك لو قصدج نتبلى عليها
سهاد : احجي الصدك قبل كم شهر جنت ارتب بغراضه القديمه واكو شغلات ذبيتهن وكتب مال دراسته القديمه وضليت اگلب ولكيت صوره صغيره لذكرى والكتاب مالته بيه گلوب وكله حرفه وحرف ذكرى تخبلت كلت شجاب صورتها يمه ومن واجهته تعارك ويايه وكال لكيتها قبل جم سنه وشمرتها ويه الكتب وضاعت والف حجه طلع مصدكته وبديت اراقب حركاته دوم عيونه عليها واربط سوالف صارت بلبيت من اول متزوجنا شون من يجي طاريها من دونجن كلجن يرجف ومن صارت سالفتها ويه صمد اول واحد يركض يريدها تطلك ومن رجعت تخبل وهواي شغلات كلت ثبت عيد رجلي يحبها
صالحه : وهيه
سهاد : ماشفت شى منها ليش اكذب بس مبين السالفه جبيره لان قبل مده واجهتها وكتلها رجلي نظرته الج مو نظره مرت اخ والله اعلم شكو بينكم ضلت ترجف وشفتهم بليل بلمطبخ وحدهم وطلعت عذر مبين تدري وبعد تفكير كلمتها ماانساها رنت بأذني بيوم عركتها ويه صمد من كالت لنجم كله من وراك يعني سالفتها مو خاليه
بديعه : فتحت الباب وكمت اعيط بكل علو صوتي متحملت كلامهن ابقى اسمع
الله لا ينطيجن برابيك امهات السحوره تردن تموتنها
صالحه : تخبلتي نصي صوتج لا اطيح حظج
هسه
بديعه : لا والله اليوم اخلي الكل يعرف انتن شنو ولجن ماكفنجن سحورتجن مدمغات سنين بينه شتردن هاا شتردن هذا المهجوم كاعدات تخططن شون تگتلنها بكل عين صلفه متخافن الله بعد ساعه يأذن الناس بهذا الشهر تتعبد الله وانت تكتلون عباده
سهاد : لتاخذينا بصوتج فوك سوايه صاحبتج جايه تذبين التهمه براسنا
بديعه : ياتهمه خيه تردين تلبسيني الغلط واطمطم الجن لو تموتن
خوله : صعدنا نركض اني وذكرى شكوو
بديعه : الله واكبر لجن ذني شياطين لا والله الشيطان يتعلم منهن
ذكرى : صوتج يمعوده الولد اجوي جوه لتصير مشكله
بديعه : اني اريدها تصير خلي يحطون حد لذني الكحاب ويطلعوهن منا منريدهن
عبيد : نصي صوتج اجينا نركض عبالنا وحده بيجن احتركت
بديعه : يااريت جان اهون تعال شوف مرتك الساقطه شتريد تسوي
ذكرى : كاافي بدعه گلبج من العياط راح يوكف
صمد : شكوو شكوو
خوله : مندري لهسه بدعه تعيط وذني خانسات
صالحه : على شنو خانسات عيني خلي نحجي ماطول رجلها اجه
ذكرى : رجلي اني
بديعه : خليني احجي ذني يردن يسمنج ويموتنج كاعدات ويخططن شون يخلصن منج
صالحه :شوف شون مره حياله ليش متكولين سمعت شون ذكرى تحب نجم وعدها علاقه بيه
ذكرى : شنووووو
صمد : حطي نعال بحلكج واسكتي لا اشمرج منا وانعل ابوج لاابو ابوج بت الگلب مرتي اشرف منج
ساهره : لتسب ولتعيط وتاخذنا بلغلط
عبيد : كاافي ساهره وانتي صالحه مو عيب هذا الحجي
صالحه : لا مو عيب خلي تحجي خلي يعرفون البيت شون مكلوب مكوده وناس اطمطم لناس احجي سهاد
بديعه : اي غير مسمومه مثلجن وتردن تفرنها على ذكرى
سهاد : اي تحبه ويحبها واكو علاقه بينهم واني شفت صورتها بكتابه وحتى ذيج المره لكفتهم بلمطبخ الفجر وحدهم خلي تنكر اذا جذب
ذكرى : والنبي جذابه فدوة صمد هاي تجذب لتصدكها جنت ويه نجم لان يحجيلي عن اخويه فوزي وشون يقنعه حتى يرضى
جفل صمد وعيونه براسه
صمد : تجذبين مو
بديعه : اي جذابه لتصدكها ذني يردن يكتلن مرتك
صالحه : مو جذابه كلنا شاهدين واني وساهره اكثر من مره نشوفهم وحدهم وهسه جانت سهاد تشكيلنا من نجم ميتقرب منها ونافرها من وره مرتك وحتى يفكر يطلكها حارت شسوت حتى يحس بيها وهو ولا يمها واكيد انت هم متريدك شتسوي بيك عيني وحبيب الگلب موجود
عبيد : لج صالحه كاافي وانجبي وسدي الموضوع
ساهره : وليش ينسد خلي الرجال يفتح عيونه ويشوف شون المي تجري من جواه ويمكن حتى عمتي هم تدري روح اسألها
باوع على ذكرى ونزل يركض ودخلت امه
عمشه : هااا ولجن تكافشتن ونسيتن الفطور
صمد : يمه نجم عنده شى ويه ذكرى
عمشه : دهر الدهرك منهي گال
صمد : عاط بصوت عالي احجي يمه اكو شى بينهم سهاد مرته تكول وساهره وصالحه يأكدن كلامها
عمشه : جذابات يمه چا غير اخيك هو وحسبت اخوها
بديعه : ذكرى وكعت بلكاع وتلطم والله ماعندي شى والله
خوله : كوومي وانتن بعيني وين تولن مني بس خلي تفض
صالحه : مو بعيد انتي هم تدرين ومطمطمه الشغله
عبيد : يمعوده كافي منو يكول وانتي سهاد عيب عليج هيج توكعين بين الاخوه ولجن راح يصير دم من وراجن الله ياخذجن
صالحه : يااا وداعت جهالي نجم وذكرى واحد يحب الثاني ويجوز شغلات بينهم بلحرام واحنا مندري وانت متريد يصير دم
بديعه : عاطت سهاد بعلو صوتها تعاال اخذ مرتك وابعدها من رجلي تره شغلتهم فاحت ريحتها ليش تخلوني افضحكم
ذكرى : الله ينتقم منج ومنهن ولجن بستري طعنتني لو ذابحاتني ولا مسويات هيج
صالحه : عياره عود هي فقيره ومسكينه ياستر ام ستر وانتي تحبين حماج
وجان يطب نجم لزمه صمد من رگبته لك انت عندك شى ويه مرتي
نجم : يامرتك ولك هذا شبيهه
عمشه : يمه بروح ابيك عيف اخيك ماكو شى هذني حيايه وحركن بيتي وراح يوكعن بينكم
نجم : شصاير عوفني ويدفع بيه
صمد : شعندك ويه ذكرى
نجم : ماعندي والله شسامع المطي هذا لك عوفني عاار
صمد : اي عار لان ماحسيت بيكم واكول ليش بارده ويايه وطافره مني اثاري اخويه مكفيها
نجم : انت كمت تخربط وصار فتره تعوج ويايه محد كاسر راسك عبالك كل الناس مثلك كواويد ودفعه نجم حيل لصمد على الحايط ويضرب بيه وناس ضربت ناس
ركض عبيد وخوله وعمشه يردون يفكوهم
بديعه : لحظات مثل الاعصار اخوه يتضاربون واحد مطلع دم الثاني وذكرى واكفه على راس الدرج فوك وتلطم وتعيط وذني يهوسن كله دقايق مو هوايه هم فكو صمد بلكوه من ايد نجم وعاط نجم اي ردتها ومصارت الي انت الاخذتها مني مو اني
هو سمع هيج صمد لو تخبل بلزايد جيت على نجم بس لزمه عبيد وامه وعمشه تعيط وتبجي حتى فوطتها وكعت
دفع صمد عبيد وصعد يركض سوه الدرج شبختين من اعصابه ولزم ذكرى من ايدها
صمد : هااك ياها اخذها
جلبت ذكرى بلدرج وتعيط ابوس رجلك عوفني جهالي يبجون والله ماعندي شى والقران وصيامي
جيتت على صمد دفعني حييل وجان يلزم ذكرى من جسمها ودفعها بكل قوته من الدرج
منشوف ذكرى غير واكعه من فوك ليجوه وعلى راسها وسابحه بدمها
هدأ العصار والكل واحد صافن بوجهه الثاني موعينا غير على عياط نجم وهو يركض عليها
نزلت اركض والطم على راسي وكلها ركضت عليها
نگلبها يسره يمنه مالها اي نفس
