رواية الابواب الخمس الفصل الرابع والعشرون بقلم ريام الهادي
طيحوني"
انه الربحان .
وحطوهه بذنكم هاي ترجيه .
مو كلشي اليطيح انهان .
الفصل لو طاح يكبر صيت راعية
ام فوزي : انتم جايين هداده وتحجون على ابني شتردون منه من سمع اخته انكتلت واذا تردون تحاسبون حاسبو اختكم الاجت وهيجت ابني على ابنكم وضيعته وهدمت عائلته وخلته مثل المخبل وحلف يمين متعبر اربعين المرحومه اله وصمد جوه التراب هاااي كله من وراها
واشرت على خوله
عمشه : يمه خوله سلمتي اخيج ليهم گليلي تجذب ومالج يد بكتلت اخيج
عبيد : بعدج يمه تردين تحجي وتكذب مبينه
خوله : كمت ابلع ريكي ماانكر خوفي لان اعرفهم قاسين ومراح يرحموني بعدني اريد احجي سحبني جوحي من ايدي حيل
جوحي : تعاي وياي للبيت
خوله : عوفني شتريد مني
جوحي : حسابج هناك
ام فوزي : بتي ماتت وابنكم مات واليربطنا بيكم راح ماعدكم شى يمنا واذا على فوزي اخذ دم اخته وهو رجال ودمه حامي ومتحمل يعرف اخته هيج صار بيها ومياخذ حقها انت اجيتي هسه دافنه ابنج وهو راكبه الغلط وكاتل روح ومحترك دمج عليه وجايه تتعاركين اويلي عليه اني البنتي مالها ذنب وماتت مظلومه وكلكم تدرون شكد هيه طيبه ومالها اذيه اذا على الحق فأحنه نحقكم من السما للكاع واذا على الدم صار دم بدم وانتهى واذا على النسوان الدخلن وصارن سبب موتت ذكرى وباوعت على صالحه الواكفه على صفحه
ذني مااكول غير حسبي الله ونعم الوكيل كون يربن ويكبرن ويتعبن ويضوكن لوعت فكد الضنه كون النار الاحسه هسه تصير بيهن بحق السميع العليم
عمشه : چا وتردين دم وليدي يروح واروحن لداري واركد ولا چني دافنه زلمه شطوله شعرضه وانسى حك الربى والتعب وانطيته كله للتراب لا وحك الحسين چا مثل مادم بتكم اخذتوه انه اخذ دم ابني
ابو فوزي : منين تاخذي مني لو من هاي الضاعو ولدها اذا على فوزي ذاك بلسجن روحي بيج زود اخذي منه
عمشه : مايضل فوزي لو اعرفن اگتله بيدي وانه ماتنازل عن حك ولدي
ابو فوزي : شسوين روحي سوي ايدج الج
يله ام فوزي دخليني تعبت حيل
بديعه : طفرت وره جوحي وخوله وهو يسحل بيها دفر الباب برجله ودخلها حيل للهول
خوله : شتريد مني
جوحي : لهاي الدرجه وصلت بيج تسلمين اخوج الهم لج الساقطه متسوي سوايتج
خوله : ماسلمت احد حجيت الحق
ساهره : نزلت من فوك تركض خير شصار
جوحي : هاي الگلبه هي الكالت لفوزي على صمد وخلته يكتله
ساهره : صخام الصخمج يمعزايه اي عيني كلشي يطلع منها هاي وحده عينها كويه ومالها رداد نسيت شسوت بأخويه ومن اخذت فلوسك كتلك هي اخذتهن ماصدكت
جوحي : اليوم ادفنج بصف صمد على سوايتج يخوله
خوله : شحدك والله اعيط واكلب الدنيا على روسكم واطلع بلشارع افضحكم ركضت للشارع انفتحت الباب وطبت امي وعبيد والباقين لزمتني امي من شعري
عمشه : وين موليه چا هاي حك تعبي عليج هيچ تسلمين اخيچ لجتاله
خوله : عوفيني يوم ماسويت شى
عمشه : انه گلشي اكولن تكدر عليه خوله عبنج گلبج ميت لجن ماتوگعت تكتلين اخيج بدم بارد
خوله : ماكتلته ولا الي ذنب بشى الذنب ذنبج انتي من سحلتي البنيه بسحورتج بلبدايه زوجتيها وافتهمنا وشفتي ابنج ميخاف الله ولاعب طوبه بيها حتى تزوج وجاب الها ضره على الفگر العايشته و
هجت وراحت لبيت اهلها شكو بعد رجعتيها
عمشه : انه مارجعتهه هي ردت لحالهه
خوله : يمه لا تجذبين اني بأذني سمعتج انتي وصالحه تكولين الها اخاف البت تتأذه وذيج الحقيره تكولج مالج دخل عمه هي ترجع لبيت رجلها معززه قابل على شنو نأذيها
موتت ذكرى وحتى صمد خطيتها برگبتج انتي جايه تردين تمشين الناس على كيفج لعد والله المن موجود اذا انتي تمشين كلشي بلسحوره وعلى هواج نسيتي شكد متسعين بأذيه الناس مردوها عليج لان ربج مايرضى بلظلم انطاج مهله مره ومرتين ومفاد وهسه من حصدتي الزرعتي جايه تذبيها براسي
عبيد : تعيطين وتهوسين وتذبين الصوج بأمي لا عبالج بصوتج ننسى سوايتج اليوم سلمتي صمد باجر تحركينا واحنا نايمين
خوله : على سوالفكم تستاهلون كلشي يصير بيكم
جوحي : واني اليوم راح ارجع اربيج من جديد ياخوله اذا مازوعتج دم مااطلع جوحي اله انعنع ضلوعج
خوله : جرني من شعري حييل وعبيد ركض جاب العوده مال الماسحه ودك كتل هو وجوحي تكول عدهم سباق منو يضربني اقوى جنت اصرخ لله من كميه الالم الاحسه
يمه الحكيني ابوس ايدج راح يموتوني
عمشه : عساج واروحن ادفنج يم اخيج واخلص من شرج
بديعه : كمت ابجي واضرب على خدودي تكول ذيابه جوعانه وجيتو على لحمه استلموها دك كتل وجوحي كملها من جاب من السكراب واير طويل وطبكه وين ميوجعها صراخها جان مسمع الدنيا كلها جيتت عليها من حلات روحي واتوسل بيها
سحبني فلاح وصالحه
فلاح : عوفيهن خلي يطيحون حظها تستاهل
بديعه : والنبي حرام عليكم هاي اختكم كعد يتكطع لحمها كدام عينكم وانت ساكت تتفرج
فلاح : السوته تستاهل الذبح عليه هاي وحده جاحده ناكره للخوه ومتستاهل واحد يدافع الها
خوله : اااااخ جلاب عوفوني ولكم لو ميتين كلكم ويه صمد عارات فوك ماباطلين تذبون الصوج بيه لج ييييييمه
عمشه : وغمه والغسل اريدن افوخ گلبي وناره بيج وحيدتي وتفصم ظهري وتساوم بيه وتحط يدها بيد جتال اخوهه لا وروح اخيج الترابه تارسه راسي وهدومي ياخوله اله اخليج تبوسين الرجول عبن تموتين وماانوله الج
عبيد : هااي متضل بلبيت لو اذبحها لو نلزمها الشارع هاي وحده بايعه ومخلصه بعد جم يوم واحنا نايمين تسوي شى بينا وبجهالنا هاي مخبله جانت صالحه تكول مو عاقله شاخطه ماصدكت هاي كتلت رجلها ماصدكت واليوم بعيني اشوفها سلمت اخوها وتردون تضل بلبيت ابد والله
خوله : ولكم وليه مخانيث انتم لو بيكم خير مجان تستكوون عليه اااااااااااخ الحكوني
جان يضربها جوحي على حلكها حيل كسر سنها وبقى يضرب بوجهه وهي تحاول تصدهم
دفعتهم ورجعت جيتت عليها اجتني ضربه على جتفي من جوحي ديضربها واجت بيه شاغت روحي للسما يعينها الله شون متحمله كل هذا الضرب سحلوني من يمها ولزمتني صالحه وساهره
ولكم الله ياخذكم راح تموت عمه ابوس رجلج هاي خوله احبيبتج شوفي شوو بحالها
عمشه : يطبها حريشي ايدكم الكم هاي البت موش بتي ومااريدنهه عسى ما تذبحوها ماتضل بداري
صالحه : تستاهل شون تسلم اخوها لوما هيه مجان مات صمد الشغله خليناها صنطه المن بعد راحت وحجت هي حاقده صارلها سنين وبدت بصمد وراح تكملها بأخوتها يوميه واحده يموت من وراها
ساهره : كطعها جوحي هاي اخذت تعبك وفلوسك وزعتهم واجت تتباهى وفرحانه وهددتني اذا احجي راح اطلعني كذابه صدكت هسه اني مااخذت فلس منك جوحي : هيج تسووين بينا واحد تبوكي والثاني تسكطي واخر شى صمد تسلمي حتى ينگتل
ساهره : التنطي باخوها وتسلمه للموت ماكو اسهل تبوكك واليوم سوت هيج باجر حتى شرفها تنطي
خوله : كثرت الضرب على الراس وعلى الجسم خلتني اتذكر ضرب السيد ومعاملته اليه خلتني بلحظه ارجع للطريق الاظلم الجنت بيه وبديت افقد
بديعه : جانت تصرخ وتحاول ادافع عن نفسها بس ميفيد اثنينهم اقوى منها واحد كسرها للعوده عليها والثاني واير طابكه ويشرح بحلمها اخر شى سحلها جوحي وعبيد مابطل ضرب وركع راسها بلحايط خلو دمها بكل مكان واني اعيط على ضربها وماكو احد يدافع الها وصالحه تعيط وتكول
صالحه : اي بعد ايدي عاشت ايدكم ادبسسز وعرمه زوهرتنا بعيشتنا كل بلوه والثانيه ومتحملين وساكتين تالي كل عين صلفه تسلمين اخوج هلمره راحت ويانه للدفنه وتباوع على كبره يمااااااي شون كحابيه والله لو منكم ادفنها هسه واخلص من شرها خلت شعيط ومعيط هسه يحجي بينا
بديعه : طركاعه البين يلشيطان اسكتي تهيجين بيهم ولكم هاي اختكم ضالين بيد النسوان تسمعون كلامهم وين ترحون من الله عوفوها راح تموت
عمشه : فلاح اخذ مريتك وصعدها لااكضها وامدهه بصفها انه اعرفن هاي الجلبه تعرف بسوالف خوله عبن گلشي تسولف الها
بديعه : بروح صمد عمه خلي يعوفوها البنيه حتى صوتها راح ولكم بس الدم يجري منها وكمت ادك على راسي حسيت هاي الثانيه هم راح تروح وره ذكرى جريت شعر صالحه حيل ودفعت ساهره وجيتت على خوله وكفو اخوتها ضرب بيها بعد ما وكعت وماضل بس الون طالع منها الوجهه كله دم والجسمي مزورك حتى ملابسها شكوها شعرها بكل مكان مكطع حطيتها بحضني حتى مااكدر اضربها على كيف بوجهه حتى اصحيها لان وجهه كله دم
ركضت جبت مي وحطيته بيدي وخليته على عيونها وابجي فدوة اكعدي خوله تسمعيني
تعاالو شيلو ويايه
صالحه : مالي دخل يطبها طوب
ساهره : مااوصخ ايدي بيها ويله عيني عمه ورانه عزه هسه النسوان تجي تعزيج وانتم روحو انصبو الجادر وراكم فاتحه اخوكم الناس هسه كلها تسأل ليش متنصبون الجادر و هاي سليمه التكرفها عوفوها بدعه تحير بيها
جوحي : اسمعي بدعه تاخذيها فوك وتبقى بغرفه صمد مثل الجلبه صوت مااسمع الها لحد منكمل الفاتحه وبعدها الي صرفه وياها
بديعه : شسون بعد بيها ولكم مالها حس راح تموووووت
عبيد : بعد احسن حتى نخلص منها
بديعه : عفتهم ورجعت عيوني على خوله الجانت بحضني اروحلج فدوة اكعدي اتسمعيني ابجي واشهك واحجي وياها جبت مي بعد وغسلت وجهه على كيفي بدت تون
طلعو جوحي وعبيد وفلاح وعمتي فاتت من يمنا ضربت خوله برجلها حيل وسدت باب غرفتها وذني يضحكن ودخلن للمطبخ
بديعه : تسمعيني هزي راسج اذا تسمعين هزت خفيف اي ياالله يمه بااان وينج اجت تنزل رفعت راسي لكيت الجهال كلها واكفه مصطره تباوع
تعاي يمه عينيني وردت ارفعها اجه مهند يركض ومرتضى يساعدوني مدت راسها صالحه من المطبخ وعاطت
صالحه : ولكم عوفوها
مهند : يمه عمتي راح تموت
صالحه : وموتت الجلاب مالك دخل وروح اصعد لو تروح ويه ابوك بره
مرتضى : جبان لتطلع
مهند : خلي تحجي مالك دخل يله عمه نساعدج
بديعه : ساعدوني وكدرنا نمشيها اخذتها للمغسله وركض مرتضى جاب تيشيرت
هاج عمه امسحي وجهه على كيفج اخاف تتأذه
بديعه : كعدت امسح وجهه وهي كوه واكفه
مهند : راح توكع ثكيله منكدر هيج عمه خلي ناخذها فوك ونجيبلج طاسه مال مي وغسلي الها
بديعه : اروح فدوة للحنان يله يمه ساعدوني وصعدناها كوه ودخلناها للغرفه مددتها على الجربايه اجه يونس يبجي
يونس : هم راح تموت مثل ماما
بديعه : لا حبيبي مابيها شى روح مهند جيبلي طاسه مي
ركض هو ومرتضى واني اعدل بشعر خوله وناي واكفه وتبجي وشرهب تباوع بلوجوه
اجوي واخذت منهم المي وكعدت امسح وجهه وايدها ورجلها وكل ماالزمها تعيط وتون
ناي : عمه اواه ختيه (خطيه)
بديعه : اي والله يابنتي خطيه الله لايوفقهم
جبت دشداشه مني ديرو وجهكم كلكم يله
ودارو وجهم واجت بان تساعدني بدلت الها ملابسها وهي تعيط
رجعت نومتها شويه وسمعت عياط ولطم كلت اكيد اجو الجيران يلاكون ويأدون واجب وانگلب البيت ولا نزلت
وخليت الجهال يمي اكثر من ساعتين ونص خوله بس تون وماواعيه
خوله : بديت افك عيوني بس كوه وجسمي يحركني حرك كل عظمه احسها مكسوره وحتى صدري اجر النفس بيه بلشافعات ركزت لكيت روحي بغرفه ذكرى والجهال داير مدايري وبدعه تكمط شرهب الحجايه اجرها جر من الالم
ااااخ جسمي
بديعه : ياالله صحيتي احبيبه
خوله : متأذيه بدعه كطعوني
بديعه : انكسرت ايدهم وركبتهم كلها جم يوم واطيبين
خوله : اريد مي
مرتضى : هاااج عمه
رفع راسي على كيفه وشربني
خوله : بيك محنه احسن من امك الجلبه
بديعه : يمعوده اسكتي هستوج جنتي تحت رحمتهم
خوله : خلي يولون ذوله العفطيه شنو اضل تحت رحمتهم
بديعه : الله اعلم شراح يسوون هلكم يوم راح يلتهون بلفاتحه وراها شيصير ماادري
ماطول صحيتي اجيبلج لكمه تاكلين وهم الجهال طكهم الجوع
خوله : حلكي يوجعني مااكدر افكه اااااخ
ناي : عمه ثنج ماتو (سنج ماكو)
بديعه : لتمدين ايدج على حلكج
خوله : يأذيني حييل واكو فراغ حاسته
بديعه : من الضربه سنج انكسر
خوله : نزلت دمعتي وبحسره وقهر كلت هو گلبي مكسور بقه على سني الالم هسه مدااتحمله بدعه كل جسمي يحركني اااااااااااااااااخ
بديعه : اشش ليسمعوج عفيه ويجون يأذوج بعد راح انزل جوه اشوف مسكن شى واجيب اكل واجي ابقو يم عمتكم لتتحركون مهند وين راح
مرتضى : ابوه صاحه
بديعه : لطلعون ابقو هنا
نزلت لكيت البيت مليان نسوان ويلطمن ويلاچن وعمتي مكطعه روحها من اللطم
دخلت للمطبخ لكيت ساهره وصالحه شادات حيلهن ويطبخن وخابصات روحهن خبص وياهن بنات اثنين جوارينا
فتحت الثلاجه ادور على مسكن لكيت وطلعت الخبز فتحت الجدوره لكيت تمن صبيت بصينيه صغيره فتحت جدر ثاني محطوط على صفحه بيه لحم صبيت منه مااعرف منو جابه لو ذني طبخنه بعد فاتحه اكيد يسون لحم وماعون فارغ صغير وصعدت شافتني عمتي درت وجهي منها وكملت مشيتي
دخلت للغرفه شربت خوله العلاج طبك اثنين انطيتها وكعدت بلكاع لميت الجهال حتى ياكلون فلست اللحم الهم واوكل ناي لان تخربط متعرف حيل مثل الباقين هيه وبلال حطيت بلماعون اكل لخوله وكعدت يمها هااج حالج حال الجهال اوكلج
خوله : مجوعانه متأذيه جسمي كله يحركني ويأذيني
بديعه : لازم تاكلين الدوا يراده علاج اذا تبقين هيج تموتين
خوله : عساني واخلص من ذوله الجلاب
بديعه : اكلي لخاطري وكلتها شويه ومكدرت تكمل سنونها كلها تون عليها وحلكها متكدر تفتحه وتصرخ من الم جسمها
اكلو وكملو ونزلت كلشي جان البيت هوسه
وكلها العيون علينا واكو نسوان تتقصد تسأل عن خوله اكيد كلها عرفت بسالفه خوله لان ام فوزي من حجت جانو هواي ناس واكفه
الوضع متوتر والكل اعصاب التزمت الغرفه ويه خوله طيله ايام الفاتحه انزل على كد الحمام وعلى كد اغسل لشرهب وبلال
وكت الاكل اجيب اكل الهم
ورمت خوله وشكلها يخوف صار من الضرب يعني سگطوها اله شويه متكدر تتحرك وكوه تالي الليل انزلها للحمام حتى لحد يشوفها من اخوتها وارد اصعدها
رغم محطيت ايدي بلفاتحه واشتغلت بس جنت اتعب تعب خيالي منا خوله اداري بيها وابجي مرات على حالها وشون تون من الالم وتشهك ومتنام الليل من الوجع ومنا الجهال الكطعو نفسي اركض على هذا وهذا
كملت ٣ ايام الفاتحه نزلت على عشا الثالث لكيتهم ينكلون اكل ومخبوصين مثل كل مره اصب الي وللجهال اقلها ياكلون لحم ويشبعون خلف الله على الفاتحه خلتهم ٣ ايام ياكلون لحم اله احنه اللحم كل وين وين انجيبه وشويه ومنحصل اللكمه مرات
صبيت بصينيه وخليت هوايه حتى ياكلون
شفت جاسم ينگل وياهم لا هله عود هو حنين امده الوعث اي والله
صالحه : هاي المن اللحم هذا
بديعه : شلج دخل وخري مني
صالحه :صار جم يوم وكعت ايدنا من الشغل والتركيب وحضرت جنابج تزوهرين وتاكلين ومتمدين ايدج وهسه تارسه الصينيه لحم
بديعه : من يكون الاكل من جدج وچد رجلج وتعبه بذاك الوكت عود احجي شوو وخري دفعتها وصعدت
كعدت لميت الجهال اوكلهم وخوله اكلت شويه مكدرت تكمل
وره ساعه نومت شرهب وناي وبلال
وباقي مرتضى وبان ويونس يلعبون وخوله صافنه كوه الالم هود عدها اندكت الباب
طفر يونس فتحه دخل جاسم
جاسم : السلام عليكم
بديعه : لا هله ولا مرحبه شعندك صاعد فوك مو الزلم كلها جوه
جاسم : عندي حجايه ويه خوله اطلعي بره
بديعه : مو هيه بكيفك اطلع
جاسم : شغله ضروريه دقايق ورجعي
بديعه : كتلك مااطلع وانت انزل جوه لا اعيط واصيح الولد عليك
خوله : اباوع عليه صافنه وكتله عوف بديعه يم الجهال وانت تعاال تقرب شتريد
جاسم : يعني احجي عادي كدامها
خوله : احجي وانتي بدعه اكعدي هناك خلي افهم شيريد
تقرب جاسم وكعد على طرف الجربايه جنت متمدده مااكدر اتحرك من الالم
احجي اسمعك
جاسم : كل السويتي قبل طلع عليج هسه اخاف الصار من سنين فلتي مني هلمره السويتي قبل جم يوم لو تموتين متفلتين واخوتج حادين سنونهم عليج وراح تبقين هنا مكفخه الهم ولخواتي وخاصه بعد ماامج اتبرت منج وكالت شسون بيها سوو يعني هسه مالج اي ظهر تسندين عليه
تسمعيني لو لا
خوله : اسمع كمل
جاسم : شوفي حالج صايره خرابه من الخرابات لامج ادور بيها مزابل وسكراب
اني شكلت استر عليج واتزوجج وهذا كرم مني الرضيت وحده مثلج اتزوجها كلت لعبيد وكال خلي تفض الفاتحه واخذها اعقد عليها وبيدك كبل للبصره منريد نشوفها بعد وامج وافقت
بديعه : صخام الصخمكم شنو بكيفهم
جاسم : اي بكيفهم ارضي خوله واياج تعاندين تره هنا نار جهنم العيشه راح تصيرلج بعد اخذج واتزوجج وارضي بنصيبج
خوله : امشي اطلع بره
جاسم : والج عين تحجين
خوله : اني الحشره الادوسها برجلي ماارجع ادنج الها ادفرها گبل للمجره
جاسم : بطلي غرور شحاسبه نفسج كومي شوفي حالج تلعبين النفس جنج ميت معفن حالج حال الجلب البيه جرب اني راح اتزوجج وغصب عنج واسحلج سحول واخذج بعد الجانت واكفه وياج هيه بيدها سلمتج اليه العلمج كالت اخذها يمه وخلصني من شرهه
خوله : اذا تعرف كلي شر المن مجلب بيه
جاسم : من زمان شايله خشمج عليه وتحسين نفسج احسن مني راح اخذج حتى اشوفج شون تحطين راسج براسي واشوفج منو جاسم وشيكدر يسوي
خوله : ابن غنيه اطلع وسد الباب وراك وبليه لغوه زايده
جاسم : هههههه ضلي هيج خلي اشوف عكب باجر من تجين بيتي هم تحجين هيج اله اخليج تبوسين نعالي حتى بس ارضى عليج
خوله : بدعه كومي طلعي هذا المحسوب كوه على الزلم احسبوني ولا تنسوني
بديعه : يله عيني شوفنا طولك الحلو
جاسم : داوي نفسج وراج زواج
عافنا وطلع
بديعه : هذا من كل عقله
خوله : صوج ذوله الجوه همه شمروني عليه
بديعه : وشراح تسوين
خوله : لو يذبحوني مااتزوجه
بديعه : حتى ضربه مابيج صار ٣ ايام ومورمه وماكو مكان صاحي حتى المشي كوه تمشين شون بيج
خوله : اريد مي
بديعه : رايحه اجيبلج
نزلت وجانت اكثر الناس رايحه وذني ينظفن ويشتغلن ومثل فاتحة ذكرى الله يرحمها شايلاتها شيل
جبت مي واجه فلاح درت وجهي منه صار كم يوم مااحجي وياه لان طبك وياهم
صعدت وبقيت يم خوله وحايره بسالفه جاسم
ثاني يوم الصبح نزلت اسوي ريوك ولكيتهم كلهم كاعدين وجاسم وياهم حطيت ايدي على گلبي ياستار رجعت ليفوك صعدت كعدت خوله
خوله : كوه نمت شبيج بدعه
بديعه : ذوله جامعتهم امج والله اعلم شناويه
خوله : شسوي خلي تسوي
سمعت صوت يصيحني بدعه بدعه هاي صوت عمتي بس مطبك من العياط واللطم نزلت عليها هااا عمه
عمشه : تاخذين الجهال لغرفتج كلهم وتعيفين خوله وحيدها ومالها اچل (اكل) ولا ماي
بديعه : ليش عمه شكو
عمشه : انه هيج كيفي مالج دخل
بديعه : عمه اتقي الله مو انتي تصلين وهاي بتج ميصير هيج تسوين بيها
عمشه : چلمه ثانيه اشمرج بره هذا البيت بطرك ثوبج واحرمج من بتج وعود بذاك الوكت يلفوج اهلج
بديعه : وليش تسوين هيج نسيتي معزتنا عندج شغيرج عمه الموت يكسر مو يصير البشر طاغي وميخاف الله
عمشه : مالجن معزه ضيعتن وليداتي واحد سكن الكبور والثاني هااج بأرض الله وكله منجن وتالي هاي جملتها سلمت خيها للموت انه مااريد لا صحبه ولا محنه منجن هنا تشتغلن وتخدمن رجولتجن چلمه منج لو منجن يبنات غنيه وحك العزاز ماتضلون ساعه هنا استرن على ارواحتجن
ساهره : شعلينا عمه هاج كدامج شتردين نسوي
صالحه : ميكون خاطرج اله طيب
عمشه : وانتي يبدعه تركدين وتكضين لسانج وتبلعي لو تكضين ثوبج وتردين الهلج بطرك رويحتج
بديعه : هذا هو عمه مالي دخل خفت بهاي عصبيتها تطردني وماعندي احد وين اروح وهي تدري هذا الشى واستغلته ضدي
والجهال منو الهم وجهال ذكرى يصيرون ملطشه لهاي وذيج كعدت وسكتت
صعدت ليفوك حجيت كلشي لخوله
خوله : اسمعي الحجي ولتجادلين لتأذيج وذوله منو الهم مااريد ذني الحيايه يستغلن الوضع
بديعه : وانتي
خوله : ماعليه شى كلها جم يوم ويملون
بديعه : بستها واخذت الجهال وغراضهم ورحت لغرفتي اجه فلاح
فلاح : شبيج وجهج ثكيل
بديعه : عفيه لتحجي ويايه تره واصله لخشمي ومالي خلك للثوب اللابسته سوايتك عيبه بحقي وبحق اختك
فلاح : وسوايتها مو عيبه زين ولهسه تتنفس المفروض ندفنها ويه صمد
بديعه : اي لان حجت الحق ومرضت مظلومه تنام بكبرها بدون ميرجع حقها انتم كلكم نفس الذبه باطلين ولا واحد بيكم حقاني جان يضربني راشدي وهاي اول مره يضربني
فلاح :جنتي شكد فقيره وهاديه صايره مخبله ولسانج طولان انطيتج مجال هوايه
بديعه : انتم بهذا البيت اليحجي تكتلوه هاي صالحه وساهره كدر واحد منكم يحاسبهن على سوالفهن وجاي هيه تضربني لان حجيت الحق مثل خوله
فلاح : اني رايح للحله عندي بناء هناك وماارجع اسبوعين اياج يابديعه تسوين مشاكل تجنين على نفسج ارجعي خانسه وداري خبزتج وبيتج
اخذ ملابس وهويته وعاف فلوس وطلع كعدت ابجي شسوي اسكت يكتلني القهر احجي اضيع جهالي شسوي ياربي
ناي تبوس بيه وبان حاضنتني وهاي الصغيره تبجي اذا عفت البيت ذني منو الهن ربي اني عبدتك الضعيفه كلها صارت ضدي وماعندي معين غيرك عيني على بلوتي وقويني
سلمت امري الك وماعندي غيرك سند ياالله
رجعت اسكت ومااجادل وبس اشتغل واباوع يومين لا اكل ولا شرب لخوله واني روحي تفرفح عليها واخاف اوصل لغرفتها ساهره مراقبتني اجاني يونس
يونس : عمه جوعان
بديعه : اي عمه هسه سويتله لفه جبن وطماطه اخذها وكال
يونس : اريد مي
بديعه : هاك هاي السرايحه
يونس : ثكيله عمه ذبي منها مااكدر اشيلها
بديعه : وين رايح اكعد هنا اكل
يونس : اريد اكل فوك يم ناي
بديعه : اذا جاعت اختك تعال اخذه الها لفه
يونس : اي
اخذهن يونس وصعد يمشي على كيفه
خوله : تعبانه وجسمي يوم بعد يوم يتعب اكثر لا دوا لا اكل ولا شرب بديت احس داموت موت بطئ انفتحت الباب وطب يونس درت وجهي عليه مستغربه
يونس : هاج عمه اكلي واشربي
خوله : منو دزك
يونس : محد اكلي عفيه قبل ميجون ويضربوني
خوله : نزلت دمعتي وسحبته وبسته
يونس : اكلي بسرعه عمه واشربي مي حتى اطيبين
خوله : تريدني اطيب
يونس : اي حتى لتموتين مثل ماما وتعوفينا
خوله : حضنته حييل واشهك حنين على امك جيبهم خلي اكل حتى اطيب
وكعدت اكل جنت جوعانه بشكل مو طبيعي وعطشانه حيل يمكن يوم لاخ يوكف گلبي شربت المي كله
تقرب باسني وكال
يونس : بليل هم اجيبلج وركض طلع وسد الباب
تعالي يذكرى شوفي ابنج بعده صغير وحنين طالع عليج الْحٍمَدٍ للـّہ مو على صمد جنت حيل خايفه لا يطلع عليه لان كطعي
بديعه : وره يوم صعدت وشفت يونس يعيط ركضت عليه لكيت ساهره لازمته من اذنه
ساهره : ولك بكد القندره وتلعب علينا من تكبر شسوي
بديعه : عوفي شتردين منه
ساهره : هذا بكد الفصمه يودي اكل ومي لخوله
بديعه : سحبته منها وحضنته شلج دخل بيه عوفي
ساهره : لا اكلب البيت عليج هذا تعلومج ادري
يونس : عمه معليها اني اودي
ساهره : هاج استلمي
بديعه : شرايده منه طفل وشاف عمته جوعانه عوفي
ساهره : خوش من هسه عصيهم على عمامهم وخلي ليسمعون كلام
عمشه : شنهي حسجن ليغاد دهر الصابجن
ساهره : تعالي عمه الله جابج شوفي بدعه تعلم الجهال يعاندون عمامهم
بديعه : والله ممسويه شى
ساهره : هذا يونس يودي اكل ومي لخوله واكول لهسه ما ماتت
عمشه : اخيج وينه
ساهره : جاسم
عمشه : چا جم اخ عندج
ساهره : نايم بغرفه صالحه
عمشه : انشدي عليه وگليله يجيب السيد ويعقد عليها وياخذها ويولي اليوم
ساهره : خلي اكله وهم ابلغ جوحي وعبيد
عمشه : انه كتلهم قبل لايطلعون من الفجر
يله انشدي
خوله : سمعت كلام امي متحملت شلت نفسي واسحل بروحي سحل فتحت الباب وكتلها مااتزوجه لو تموتون
عمشه : حسچ بين چا يلكرطه تعاندين
خوله : اذبحيني ومااتزوجه تسمعووووووون
مااتزوجه
عمشه : ماتزوجين جاسم ماتضلين بيتي انه ماالفي جتالين
خوله : وين اروح اطردين بنتج
عمشه : ولو بيدي اذبحج الحين واخلص منج انه بتي ماتت ومالها ذگر برويحتي وانتي غريبه وانه ماالفي غربه وعكارب
خوله : لا لفيتي ذني بنات غنيه وتعرفيهن شكد حقيرات
عمشه : مالج دخل بيتي وانه حره بيه ياتزوجين جاسم يابطرك ثوبج الحين تولين ومااريدن اشوفن ركعت وجهج انه متبريه منج ليوم الدين البت التمشي بجتل اخوها ماتضل بتي وماتوكف على جنازتي
هاا شگلتي
خوله : وين اروح تعرفين بيه مااعرف احد هنا
عمشه : انه ماعندي چلمه ثانيه لا تزوجين جاسم ياامشي اطلعي
خوله : مااطلع ولا اتزوج جاسم
اجت صعدت امي وسحبتني حيل من ايدي وجنت مااكدر حتى ادافع عن نفسي لان جسمي كله يأذيني وبعدني مريضة ومتأذيه واي طاقه مابيه كادتني من ايدي لحد الباب واني اسحل بروحي واسمع صوت بدعه تبجي وتتوسل بأمي
عمشه : ماعاجبج اطلعي وياها
بديعه : بروح ابنج لتسوين هيج
عمشه : امشي ولي وياها
خوله : وين تروح ابقي واني طالعه
جان تدفعني حييل بلطرمه وفتحت باب الشارع وجرتني من شعري ودفعتني
ولي مالج مچان هنا تفوووو عليچ وعلى البطن النگلتج ريتج مجان صمد اكولن ماتت واحزن العمر كله عليج ولا سوايتج السوده نعله الله عليج بزره خايسه
وسدت الباب
بديعه : ركضت جبت عبايه ولزمتني عمتي
دنكت بستها بس تلبس شفتي حالها اذا تمشي العالم تخزيها فدوة انطيها العبايه واطب
ركضت فتحت الباب لكيتها واكفه تباوع وبعيونها دموع شمرت نفسي بحضنها وابوس بيها وغطيتها بلعبايه
خوله : ادخلي يمعوده مابينا حيل يطردوج مثلي
بديعه : وين راح ترحين
خوله : اروح لبيت امل هسه لحد ماشوفلي جاره
بديعه : اجي اوصلج
خوله : لا لا ذني راح يحركن امي عليج ضلي بلبيت
بديعه : العصر امرلج
خوله : جيبيلي وياج ملابس مو تنسين
بديعه : من عيووني
خوله : يله ادخلي
لبست العبايه عدل ومشيت عيوني تتنقل بين البيبان مال الجيران اخاف اشوف احد امشي على كيف مابيه اي حيل وصلت قريب بيت اكرم جان تطلع امه ومرته درت وجهي حتى لتشوفني وبطئت مشيتي اكثر
صارن كدامي يمشن اباوع على مرته حاطه ايدها على ظهرها وتمشي مبين بشهرها جان هسه اني بمكانها شوف حالي بليه اهل ولا بيت ولا رجال ولا كلشي والي ظلموني كلشي الهم ليش الله ينطي للظالم كلشي والمظلوم ماله شى غير القهر والظلم والاذيه باوعت للسما ودموعي تتسابق على خدي على شنو ابجي ضياع شبابي لو احلامي لو حبي لو بيتي لو اهلي هسه اني انسانه مشرده بدون كلشي والله اعلم وين حالي راح يصفى رجعت اكمل دربي وامسح بطرف العبايه وجهي الممبين من كثر الضرب
وصلت لبيت امل من شافتني تخبلت دخلتني لبيتهم جانت سامعه الصار لان المنطقه كلها تدري
مرايده بس جم يوم ابقى لحد متفرج
امل : يا اشيلج على راسي
بديعه : اخذت ملابس وفلوس وطلعت من الباب جان تلزمني صالحه
صالحه : ماكو طلعه عبالج ترحين الها
بديعه : عوفيني ولتدخلين
صالحه : بس اطلعين ابلغ عمتي والولد واخليج ترحين وراها ولي لجهالج وكافي مشاكل ابعدي عن خوله تره اليمشي وراها تاليته يبات بلشارع وانتي بعد بكيفج تردين ترحين لترجعين لان راح اخلي الكل يلعبون بحالج وحسره عليج جهالج
بديعه : يابه ياصالحه يوم التوكعين والله يجازيج على كل اذيه سويتيها نذر عليه لا اطش واهليه بلشارع وكل هلهوله تسمع لسابع جار
صالحه : امشي لج واكلي تبن وطبي
بديعه : طبيت مخنوكه وخايفه منهن ذني كلشي يسون وكعدت وحطيت ايدي على خدي وحايره بخوله منو الها
بقيت ٣ ايام يمهم كوه اكل وميته خجل همه بيتهم صغير وعيشتهم على كدهم سمعت امها تكول
ام امل : راح تضل هاي هنا
امل : لعد وين تروح يايمه
ام امل : اهلها طردوها احنا شلنا دخل كوه مدبرين عيشتنا تالي يجي حمل فوك حملنا
امل : يمه جم يوم وتروح صديقتي وعشرت عمر عيب اطردها
ام امل : غير من ايدها الصار انجب واسكت اكو وحده تسوي سوايتها وتسلم اخوها لاهل مرته حتى يكتلوه تستاهل الطرده
امل : كافي يمه لتسمعج عيب
ام امل : سكتنا وانتي هم افتهمي منها شكد ناويه تبقى تره مااتحملها بعد
امل : صار صار بس اسكتي هسه
خوله : حضنت نفسي رغم كل وجع جسمي بس مثل وجع روحي ماكو وين اروح منو اليه ارجع واتزوج جاسم اعرف راح انذل ويأذوني اطلع من بيت امل واضل بلشوارع وبعدين منو اليه منين اعيش شسوي
كمت ابجي بحركة حطيت راسي على المخده ودموعي ترستها غطيت راسي واشهك شفتي يذكرى الموت مرات ارحم من العيشه اني حجت الحق وهاي تاليها محد نصفني وكلها تبرت مني من باجر لازم اطلع اخاف منا هم انطرد
بقيت ابجي واعرف امل تسمع بجيتي بس متقربت مني تعبت ونمت شكد نمت ماادري بس نايمه وغاطه بلنوم مثل الواحد يهرب من الدنيا بلنوم حسيت ايد توخر شعري من وجهي
فتحت عيوني بتعب لكيته دنك وباس راسي
نجم : يله اكعدي اجيت اخذج
