رواية أرض الخناجر الفصل السابع والعشرون بقلم ايلول
لو جَرح واحِد سَهل عَثرة ونرد نگوم
بس انَه گلبي وطَن مِن كُل كُتر مَلچوم .
══━━━━✥◈✥━━━━══
ريـــمه :: عيوني يغوشن ودگة گـــلبي مو منتظمة اتلفت "اني وين رايحه" واتذكر كل حچي اهلي وكل الصار شي وره شي اتذكر حچاية سلطان من گال ودوا حاصوده بس علمود گاع طــروادة وباجر الصبح لازم يحصدها، وين رايحه رفضت احرگها ليش هسه ماشيتلها ودبة النفط بأيدي،.
عثرت ما اشوفن من الدموع، ومعدتي تگلب كعدت سانده روحـــي على النخلة واتقيئ مختنگه واگح روحـــي احسها جاي تطلع، وراسي حيل يوجعني، واحس صوت ابوي بأذني جاي اسمعه وهوه يگلي "يله گومي وين وديتج كملي"
كمت على حيلي امشي وأتعثر وامسح دموعي بردني گـــلبي نار اتذكر عيون كهلان من حرگت الگاع اول مره وكضاني اتذكر بچي رنـــه وهي تضربني وزعلها مني عتب عــفراء. شهكت ابجي ما اگدر ما اگدر.
كعدت يم نخله سانده ظهري عليها ولازمه راسي بأثنين اديه ابجي، عقلي مشوش وكل اللي اردده لااا ما احرگها، ما اگدر.
تعبـــت من عداوتهم تعبـــت وانه اتخيل ابوي يزعل عليَّ ومايحاجيني، تعبـــت من كلشي اعيشه .
صفنت بالفراغ ودموعي تچوي خدي صوت نفسي مسموع ودگة گـــلبي توجع روحـــي احس يتسلل صوت لنص عقلي
"بيدج الحل ارتاحي"
دنگت عيني لدبة النفط اللي بصفي وفتحت ايدي اعاين للجداحة غمضت زفرت نفس وانه اتخيل ارش النفط على روحـــي واحترك مره بدل ما كل يوم محترگه بعداوة ابوي وطرواده!
وبأيد ترجف فريت قبق الدبة وكل ما افره اكثر حتى افتحه تزيد دگات گـــلبي ، فريته للنهايه وشلته زادت ريحة النفط من فتحت الدبة عفّت الجداحة بصفي وانه كاعده رجلي يرجفن مابيه اگوم كضيت الدبة من اليده وأيدي الثانية جواها وبسبب اديه اللي يرجفن اول ما كضيتها نطش النفط على رجليَّه كضيتها عدل اديه ورجليه صارن كلهنّ نفط، عفتها بصفي ومديت ايدي للگاع اتلمس أدوّر الجداحة.
توني اكضها وشهگت رافعه راسي ليفوگ من سمعت صوت البومه وراها بثانية صوت طــروادة وصيهد يضحكون گمت ارجف سديت الدبه وشلتها هيه والجداحة ختلت وره النخلة اعاين ما اشوفنهم بس اسمع صوتهم وصوت البومه كل ساع يصير بمچان بس ما اسمعها من تطير، تغير مچانها من نخلة النخلة وما تطلع صوت ابد.
گـــلبي يدك حيل واتلفت صوتهم ابتعد بس بعدني اسمعه اسمع من صــيهد گال الطرواده
-خلّ آطلع هسه تبرالي وين ما اوصل تگابلني.
-مثل ابوي.
-هوه العلمني.
وبدأ صوتهم يختفي وصوت البومه هم ابتعد حيل، ضليت وره النخله وشلت راسي للسما الگمر ضواه يتسلل من بين اوراق سعف النخل والنجوم داير ما دايره ، لو رايحه الگيعان طــروادة لازم امشي ببستان النخل مسافة وراها امشي بصف الزرع اليمنه وبعدين اعبر شارعين وشط يله اوصل لگيعانه الوداني ابــوي احرگها.
-ريـــمه.
شهكت بفزه ملتفته ليوره وبس شفته گدامي حسيت گـــلبي وگف اعاينله وعاصره ظهري على جذع النخله حيل، نص ملامحه مبينه من ضوه الگمر ونص مغطيها ظل السعف، عاين الدبة النفط البأيدي وسمعت حسرته وراها ضحك مستهزئ
طــروادة :: ليش ؟
دنكت عيني ساكته واتنفس بقوة روحـــي رايحه صفّك بهدوء وتقدم وهوه يدوس على السعف اليابس وگف كدامي افتريت ما اريداگابله رديت للمكان الجنت كاعده بيه كعدت نفس الگعده شارده من عيونه وهوه افتر وگف گدامي
طــروادة :: سوايتج العدو ما يسويها، كاتل اهلج ميتمج؟ وتردين مرتين تحرگين تعبي؟
نزلت عيني بس دموعي تجري ووشه تصير بأذني عقلي يودي ويجيب وهوه اعصاب يرجف
-انتِ حارگه گلبي شتردين تحرگين اكثر؟
مسحت دموعي بأيدي التهتز اهز راسي لا واردد بصوت مخنوگ
-ما حرگتها ما حرگتها.
طــروادة :: لااا رايحة تسگينها!
حجاها وافتر گدامي بعصبيّة وانه اعصر الجداحة بأيدي وعيني عليها أحرّك أصبعي الابهام واتخيل هيه "جدحة وحده جدحة واخلص"، شلّت راسي لطــروادة اعاينله وعيوني احسها منفخة من البجي، وأكف گدامي ونظراته تتسلل بين جذوع النخل شعره عالي وبيه رده تحركه نسمات الهوه الخفيفه اللي بدت تعلى شويه شويه احس هالهوه يمر بين جذوع النخل مثل النفس التعبان، يحرك السعف بهدوء يخنگ يولد أصوات وشوشة تتخلل ثنايا الظلام مثل ما ضوه الگمر يتسلل من بين السعف وينزل للأرض.
دار عينه الي نزلت عيني تقدم خطوتين وگف گدامي شلت راسي اعاينله وهوه منزل عينه الي هز راسه يحجي
- لو اغسلج بماي زمزم گلبج ما ينظف.
دنكت اهز راسي اي وكل ما تنزل دموعي امسحهن، شلت راسي اريد احاجيه وبساع رجعت دنكت بخوف احس ما شفته طــروادة شفت وجهه بلا ملامح مغوشات عيوني
غمضت عيني خايفه أمسح عيوني حيل ورديت شلت راسي اعاينله شفته هوّه ويحجي وانه اسمعه مرگزه بوجهه وفززني صوته من صاح.
طــروادة :: احاچيچ، انتِ يجبرونج تحرگين بروحي مودينج عليَّ حاچيني؟
وانه ما شلت عيني من وجهه واهز راسي اي بلا وعي اخافن ارمش وارد اشوف شكله بلا ملامح همست صوتي مخنوك
-خااايفه انه خايفه.
سكت عيني بعينه وبس رمشت طاحن دموعي وضل شكله مثل ماهوه همس
-منين؟
سكتت اعاينله بخوف وحسيت بروحي أردد اية من القرآن گعد گدامي ورغم حرگت گلبه وعصبيته سأل بتوتر.
-بيج شي؟ ياهو وداج؟ابوچ جبرج؟
سكتت اكض براسي وامسح بوجهي ما مستوعبة شجاي يصير وياي عبالك مو انه رديت ليوره اكثر سانده ظهري على النخله وهوه يعاينلي بأستغراب هزيت راسي لا ضحك وهز راسه اي
طــروادة :: چا ليش ؟ اطيني سبب واحد سبب واحد يطيج الحگ بحرگ گيعاني.
رفعت عيني لعينه مضيك عيونه بحيث اشوفهن بس سواد وحجيت ابجي
-ما حرگتهن، ما حرگت رادوني احرگهن وما رضيت والله ما رضيت.
شهكت ابجي بصوت وأمسح بعيوني روحـــي مفرفحه حجه بهدوء
-ياهو وداج امج لو ابوج؟
سكتت عيني بعينه گال
-سولفي ريـــمه؟
-اسولف حتى تعاركهم؟
هز راسه لا دنكت أمسح بعيوني كعد بصفي بيني وبينه مسافة شبرين
-انتِ مو بريئة دام اجيتي ونويتي تحركين، واذا نسيتلج الاولى مستحيل انسالج هاي وروح أمي اچوي گلبج بنار ما تنطفي لأعلمج حرگت الگلب شلون تصير.
اسمعله ساكته درت وجهي عليه ضوه الگمر صار بس على عيونه يعاينلي ساكت
-انتَ عايف جدي وعايف عمي وليد وتركض على ابوي تعاديه ما تحترمه تغلط عليه گدام الوادم بمثابة ابوووك هوه شلون تطگه.
-يخسي يوصل ابوي، ادوس على راسه بالقندره.
شلت ايدي بساع اريد اطگه كضاها حييل غلطت ابجي
-حيوووان والله إلسانك اگصه
دفع أيدي حيل وگام وگف يهز راسه متحلف، صيحت
-يريت رحت وحرگتها يا ريت ما ترددت تستاهل انتَ تستاهل كل يوم ينحرگ گلبك .
هز راسه خوش وطلع تلفونه من جيبه
طــروادة :: خل سلطان يجي لا اصب هالنفط على راسج واحرگج .
وكفت بساع خايفه
-لااا لا تخابره .
وركضت عليه اريد اجر التلفون منه ابتعد يصيح
-وخررري.
وانه روحـــي مفرفحه بس اريدن الوح التلفون واجره منه دفعني من ايدي صيحت ابجي
-لاااا تخابرره.
حط ايده على حلگه بغضب
-اششش.
بجيت ماخايفه على روحـــي خايفه يتعاركون ويَ ابوي من يدرون، سلطان مارد نزل التلفون يريد يرد يخابر ركضت خمشته من ايده اريد اشرد سحك عباتي وجبحني على وجهي حسيت سلاية نخل طبّت بأيدي وهوه صاح
-الله.
-ياخذك الله بجاه الحسين.
مشه باتجاه التلفون شاله من الگاع يعاين علي
-منگعه نفط انتِ وخري عني لا احرگج.
حجاها بغضب ورد خابر على سلطان وعبالك اطاني حبل نجاة من گالي هيج ركضت للدبة شلت الجداحة من يمها بأيدي صيحت وانه ابجي
-والله احرك روووحي
نزل التلفون من ايده
-عوفي الجداحة.
-ما اعوفنهاااا شتررريد انتَ شترريد گاعك وموجوده تحجي الاخواني ليششش تريدهم يتعاركون وي ابوووي ليششش؟
اجه بأتجاهي يحجي
-هاي هيه جيبي الجداحة ما اخابرهم وامشي اردج للبيت.
هزيت راسي لا مخنوگه
-انه انه اصلاً من ابوي وداني احرگ الگيعان ما چنت..
ماكملت حچي من سمعت صوت سلطان من التلفون نزلت عيني الايد طــروادة الكاض بيها التلفون واسمع صوت سلطان
-الوو، الووو.
بس عاينت للتلفون طــروادة بساع خمش الجداحة من أيدي وجر عبايتي وياها دفعني من جتفي تنفست بقوة فاتحة عيني على وسعها وهوه يسب بأهلي وشال التلفون على أذنه يحجي
-تعال للــبستان بساااع من يم الجرف تعال.
سد التلفون يعاينلي بغضب وعبايتي بأيده لامها وكاضها من النص كلها نفط
-اطيني عبااايتيي.
-اسكتيييي.
ومشه بساع شال دبة النفط أذني تصفر مسحت وجهي أعاين بين النخل وارجع ادير عيوني احس كلساع اشوفن ابوي بين نخلة ونخلة من گد ما خفت اخواني يتعاركون وي آبوي گمت اتخيله واكف ويعاينلي بعتب شلت راسي لطروادة يحجي. عليَّ وداير وجهه مني.
-اطيني عبايتي اطيني.
-سددي حلكج أم البساتين، تحرك روحها هيه سهله سهله.
حجاها وشعل ضوه تلفونه متاني سلطان يجيه گمت بساع اريد اشرد امشي بغير درب ما اخلي سلطان يشوفني اجذب اگلهم نايمه حتى لو هوه سولفلهم اگلهم جذاب جذاب. وكف گدامبي
-اكعدددي.
-وووخر.
-لو روحج تطلع ما اخليج تمشين لاا تجبريني اكضج لعبانه روحـــي منج اكعدددي كتلجج.
مشيت من يمه دفعني حيل رديت ليوره. اصيح بحرگه
-ووووخر وووخر مالك شغل بيه.
-ميخالف خل يجي سلطان اكعدي.
شهگت بحرگه احلف
-والله اذا گتلهم احرگ گلبك والله العظيم اندمك وشنو يگلي ابوي عليك أسويه والله اذا حجيت السلطان اخليك تعض اصابعك ندم وما احرگ گيعانك هالمره احرگگ انتَ احرگ گلبك وروحك.
ضحك مستهزئ ويهز راسه أي ميخالف
-خلليني اروح انه ماحرگت گيعانك ما سوويت شي خليني اروحن وانسى انسى وآنه انسى.
هز راسه لا مسحت دموعي أتنفس بقوة صوت الهوه صار عالي وصوت سعف النخل شوش هدوء الليل، عاينت لطرواده وهوه داير وجهه مني حجيت بتهديد
-اذا حجيت شي السلطان انتَ التخسر، لان بعد لو يگلولي اذبحي طــروادة اذبحنك عاين والله والله وروح عمي شامل، احط خنجر آبوي برگبتك عووووفني اروح.
دار وجهه عليَّ ينتر بغضب
-الللج عين تحجين؟ منين وارثة هاي الصلافة انتِ؟
-عووووفني ارروحن
سلطان :: رررريمه.
درت عليه بفزه ارجف وهوه يلهث مگطوع نفسه لان جاي ركض يعانيلي بصدمة ودار عينه الطرواده وهوه تقدم يمه وعبايتي ودبة النفط والجداحة بأيده مداهن السلطان وگاله.
-ابوك مايواجهني يودي ريـــمه تحرك گيعاني، وانا ما اسكت مرّتين سلطان.
وسلطان مصدوم مايدري شيحجي مسحت دموعي وسلطان شمر الدبه والجداحة وفتح العبايه يريد يجي يغطيني بيها كضاه طــروادة
طــروادة:: لاااا، بيها نفط عبايتها بيها نفط.
سلطان:: ابوي موديها؟
ريـــمه :: لااااا لااا سلطان انه اجيت.
طــروادة :: أبوك موديها، اذا أحجي أقهرك واذا أسكتت اقهر بروحي،خليني ساكت احسن هاي اختك وهذاك أبوك كل الاريدنه يميلون عن دربي ما يمهم انا لا يعيلون بيه وعيونك البعز روحـــي مو كهلان اليسكت عن حگه مرتين!
ريـــمه:: فتحت عيني بصدمة وانه اشوف ســليم وره نخله واگف ويسمعلهم وي حجاية طــروادة اجه يمشي بسرعه باتجاهي وگفت امسح بعيوني، انتبهله طــروادة واجه يركض صار بيني وبين سليم كاضه وسليم مثل النار يحرگ اي شي يمه صيح ودفع طــروادة حييل وطرواده ما يهده
ســليم :: ووووخر خرررب اهلك وخرررر.
طــروادة :: ما تطگهااااا والله ما تطگهاااا.
وسلطان واكف هادئ لاول مره احسه مايريد يدافعلي، ســليم دفع طــروادة حيل واحس بنفس الثانية ايده نزلت على وجهي مثل الجمر عيني حسيتها غوشت من الراشدي، ورد طــروادة دفعه عني يصييح
-لا تطگهاااا گتلك لا تطگهاا.
وسليم من الغضب ما يشوف احد گدامه كل همه يوصلني جر عبايتي من أيد سلطان وطرواده يجر بيها ويصيح
-بيهااا نفط لا تلوحها جدحة نار وتحترررك.
دفعه حيل يصيح
ســليم :: خل تحترررك مالك شغل وخرر.
وحط العبايه على راسي بغضب غمضت عيني بوجع من كض ايدي من زنديّ حييل يجر بيه للبيت ويحجي من بين اسنانه
ســليم:: اذا ما موووتج.
وانه ماخايفه لا من الضرب ولا من تهديده كل همي مايعاركون ابوي درت عيني الطرواده يتعارك وي سلطان ويصيح عليه
طــروادة :: خااابرتك انا خاابرتك ليش جبت سللليم
سلطان:: وخر طــروادة هاي هيه كضيتها وماخليتها تحرگ گيعانك وخابرتنه انعم الله عليك بعد انتَ اطلع منها احنا مو خوش زلم ماعرفنه نربي خلنه نرد نربي من جديد.
يحجون وسليم يسحل بيه للبيت بغضب اجه سلطان ورانه وطرواده جرااه يصيح عاينت لدربي اتعثر كاضه ايد سليم احاول اخفف ضغطه على ايدي گد ما ضاغط عليها حيل احس العظم راح يطگ بأيده، دموعي مغرگه خدي وچن شفت الصياح وهوستهم وي ابوي گبل لا تصير، ما ادري ليمت طببني للحوش وابوي وأكفّ گدامنا وسليم ما مهتم يجر بيه للبيت بس طبينه دفعني لغرفة امي وبأثنين ادية طگاني حييل وبغضب يحير بيا طريقة يطگني غطيت وجهي حاميته وهوه يصيح
ســليم:: ووولج ما تتوبين.
طبوا ابوي وامي يردون يجرونه من عدي ومايگدروله دار على أبوي يصيح
ســليم:: انتَ شني من أبو شگالتلك روحك من وديتهاااا، ززززلمه تريد تسووويها زززلمه امووووتها وروح الحسين امووووتها وهناااه ادفنها هنااااه.
ورد يطگني بحرگه وامي وابوي يغلطون عليه طب سلطان جرراه من عدي زحفت للزاويه مال الغرفة لامه رجليَّه الصدري وگوه اتنفس احس بالدم يجري من خشمي وابوي يصيح
-انتم مو ززلم مابيكم خيررر هيه أحسن منكم.
ســليم :: لااان تمشي ويااك على باطل لان ما تگلك لااااا، ريـــمه عاااايني ريـــمه وحگ روح عمي شامل اذبحنج .
وابوي شال ايده يطگه يغلط وهوه وجهه صار احمررر من العصبية. ويرجف عصب ايده تشنج وسلطان گوه كاضه
ســليم :: وروووح الحسين يا ريـــمه لو سويتيلج سااالفة بعد اذا ما دفنتجج بمچانچ اطم روووحي.
شاكر:: انچب انچب يا خايس فنكم الوصلتوها.
هو حجه وسلطان تسودن عبالك چان يكتم ومتحمل صيح بغضب ويكسر يرجف وينتر
سلطان:: شتررررريد انتَ شترريد موتتنا شتريد بشر مو يمك موووو يمك تفتر ورااه ليش شعليك بطرواده بمااايك بزاددددك الله أكبرررر.
وابوي تسودن شال ايده يطگهم اثنينهم وهمه يحجون بغضب ويصيحون بس مايردون ايد ابوي ولايمنعنونه يطگهم دفعهم يريدهم يطلعون من الغرفة ســليم يعاينلي وعيونه دم شال ايده يحذر
ســليم:: باب البيت لو وصلتيه اكسر رجليج.
دفعهم ابوي وسد باب الغرفة وهمه يصيحون عليه
-خزززيتنا ريتك مو ابونا.
وهوه يهز راسه اي بقهر متحسف وعاينلي دنكت ابجي جسمي كله يوجعني كعد گدامي وطلع من جيب الدشداشة چفيه صغيرة ومد ايده يمسح الدم من خشمي صاحت امي
ميلاد:: ثوله بت ثوله كل خير مابيج ولج ساااعتين صارلج وولج المثلج هسه حارگ سلف انتِ گيعان ما دبرتيها.
دار ابوي عليها يغلط
شاكر:: اسكتي غبررره اسكتي ما اريدن اسمع صوتج.
غمضت عينيّ دايخة ورديت فتحت اشوفهم گدامي مثل الضباب وما احس بروحي ما ادري ليمت اخذوني من غرفتهم الغرفتي وما ادري شلون نمت وبيا وجع غفت عيني.
""""
رنـــه :: اغفى وأفز خايفه على عفراء لان گضت الليل تلوب وماترضى تروح للمستشفى هسه كل ما انامن واسمع صوتها اگومن اخر مره مالگيتها يمي گمت طلعن للحوش لگيتها أيدها على ظهرها وتفتر بالحوش مورمه كلها.
-ها عفره.
عاينتلي موجوعه گالت
-ناامي ولج ليش كلساع گاعده
مشيت يمها احس روحـــي من يمي موجوعه
-خل نخابر طــروادة يجي ياخذج للمستشفى خاف لازم هسه تجيبين؟
وهيه تتمشى وانه وياها گالت
-لا، بلكن للصبح النوب بس لا تصير ولادتي وي الحصاد، هوه الصبح يحصد مو؟
-اي ، هستوه عبود جاب نايلون وأجروا دركتل وعربانه.
عــفراء :: سوده عليه والله تعب وانشل حاله نوم مانايم
ضليت يمها نص ساعة ومشيت لفراشي هم نمت شوية وفزيت عاينت لفراشها بعدها ماجايه گمت للمطبخ غسلت وجهي حتى اصحى واضلن كاعده وياها بعد، سمعتها تسولف درت عيني اشوفنها من شباج المطبخ، كاعدين هيه وطرواده على گن الدجاج يسولفون مدنك يتحسر شال راسه يگلها
طــروادة:: السكتت يزيدون بسوالفهم والحجيت اصيرن مو خوش ادمي وأخرب حتى وي الولد.
عــفراء :: والله لو واصلين وحارگينها لحرك القريه هيه والبيها شيردون من عدنا ولكم حتى مو بنفس الحاصوده بالينه بلووووه.
وهوه يهز راسه اي ويگلها
-ريـــمه شيطان، شگد حاولتي تبرريلها وتدافعيلها بس انا اليوم شفتها شيطاان تصدكين اذا اگلج احجي وياها وعلى غفلة شفت ملامحها ملامح شيطان؟
شهگت عفراء وخلّت ايدها على صدرها وهي تردد بصوت مرتبك
-أعوذ بالله من الشيطآن الرجيم.
- چم مره گتلج گتلج ريـــمه مو بريئة ريـــمه متروسه حقد وغل من امها وأبوها.
رنـــه ::اعاين الايدي جسمي قشعر من حجيهم وعفراء مدري ليش بچت وتهز راسها لاا كضت ادين طــروادة تحاجيه وصوتها مخنوگ.
عــفراء:: طــروادة انتَ محصن وعندك بصيره مثل أبويه، تتذكر گبل سنة من السنين امي نسحرت ابوي گام يشوفها شيطان، هو ماشاف امي شاف أثر السحر بيها وانتَ نفسه، ماشفت ريـــمه شفت أثر السحر بيها ريـــمه مسحوره والله مسحوره.
جر ايده منها يحجي بقهر
طــروادة:: شتحجييين انتِ؟ محصنين؟ لو محصنين چا ما سنة من السنين امي سحرتها ميلاد
-تحصنه وراها وطابت امي، انتَ ليش بعدك مخلي براسك امي ماتت من وره السحر، ابوي مو گالك لاا؟
دار وجهه بقهر وانه احس دموعي جرت على خدي شي افهم وشي ما افهم جرت ايده الها تحاجيه
عــفراء:: طــروادة ريـــمه تتصرف مو بأرداتها ريـــمه مسيره، لو هيه مثل ما تگول جا ما وصونه اهلنه بيها.
-وصوووج ما وصوني انا لو بأيدي احرگها.
يحجي بغضب وعفره تبجي مخنوگه وتكض بأديه گالتله
عــفراء:: وامي؟ امي گالت عينكم على ريـــمه ااامي على فراش الموت وتوصي بريمه طــروادة.
دار عليها مخنوگ گوه يحجي
طــروادة :: ليششش انا هذا الاريد افهمه شمعنى وصت بريمه؟
دنكت عفراء ساكته وتمسح بعيونها مد ايده رفع وجهاا يعاينلها بشك گالها بهدوء
طــروادة :: انتِ شضامه بگلبج؟ شتعرفين؟
ميلت راسها ودموعها تجري على خدها صوتها مبحوح گالتله
عــفراء:: اعرف كلشي.
-احجيلي!
هزت راسها لا
عــفراء:: خلي وجع الاعرفه بس بگلبي انه تعلمت اصبر واتحمل انتَ ما تگدر.
طــروادة:: تدرين بيه ماراح اعوفنج الا تحجين عفره سولفي شتعارفين؟
-وروح امي ما احجي لا تتعب روحك.
سكت يعاينلها صاح
طــروادة :: مثل امي انتِ فد تشلعن الگلب.
عــفراء:: عدي ولاده لا تحرگ گلبي النوب اموتن وتتندم.
طــروادة :: لا حول ولا قوة إلا بالله، انتِ مسودنه بعقلج شي حچايه هاي؟
ضحكت هيه تمسح بدموعها جراها الصدره يحجي وياها
طــروادة :: تقهريني من تحلفين بروح امي.
-هههه لان تدري بيه بعد لو اتگطع وصل ما احجي.
يمسح على زندها ورأسها على صدره مبتسمه گالها
-آمّ شموسه.
-ههههه هنيالها الشموسه عدها هيج خال.
ضحك هوه هم باسها براسها ووخرت من عده مسحت عيوني وطلعت عاينولي اثنينهم وبس شاف وجهي نزل من گن الدجاج عباله بيه شي
-هاااه؟
هزيت راسي ماكو شي ومشيت يمهم كعدت بمچانه وهمه واحد يعاين بوجهه الثاني ساكتين گال
-من ليمت گاعده.
-توني كعدت.
عاينلي ما مصدكني بس سكت گال
-نامن راح اطلع هناه وره سياج الحوش افرش النايلون لان اظن للاربعة ونص احصد.
عــفراء:: يا الله.
رنـــه :: اجي وياك دنيا ليل محد يشوفي.
-هاي ولج هناه بصف السياج
-ميخالف.
-تعاي
شلت شالي من جتفي حطيته على شعري ومشيت وياه افترينا بصف سياج الحوش من بره مدينه نايلون بالگاع مساحة چبيرة بگد حوشنه مرتين هاي حتى من يحصدون يجيبون البذور يفرغونها هناه، حطينه طابوك على اطراف النايلون نثبته وشلنه شكو شي بالاطراف حتى مايطير على الشلب درت عيني الطرواده گتله
-من تجيبون الشلب اريد جيس الي
-شسوين بيه؟
-ابيعنه .
ضحك يعاينلي وأشر تعاي يمي مشيت حط ايده على جتفي ومشينه نرجع للبيت
-الج طن، تجيبن بيهن تراجي.
-ترى صارن وعودك هواي كثرن مو تنساهن
-شنهنه بله ذكريني.
-گتلي تلفون وگتلي تراجي.
-سهلات ما انساهن.
طبينه للبيت عفره بعدها تفتر وبس من يطب طــروادة تسوي روحها مبتسمه وما موجوعه، وطرواده بس شرب ماي وسويتله لفة اخذها وراح للگيعان ما نام، طبت عفراء يمي للغرفة سألتها
-چم يوم تضل عدنا الحاصوده؟
تفتر گدامي بوجع وتحجي وياي
-لو اسبوع لو عشرة ايام يله تكمل حصاد
-زين اكلج شتگولين گاعنه هالمره زينه ؟
-اي احسن گاع بالسلف ماتشوفين بيت جدي يردون ينجلطون چيه گاع طــروادة زينه ومابيها بور صلوات كلها خضرت ان شاءالله يحصد على خير يوفي دينه يهم بالدين هوه.
هزيت راسي اي احجي وياها لمن غفيت وفزيت على عبود يحاجيني گمت وياه مترب وحاله حال. طبيت للمطبخ متسوك يريد اسوي ريوگ الاهل الحاصوده واجت ت يمنه عفراء تسأله
-بشر؟
هز ايده
عبود:: شبشر صارت مكاتل.
عــفراء:: يمه شني؟
عبود:: وعلي احنا ويانه صــيهد من الفجر يعاونه النوب اجوا ســليم وسلطان وگبت بينهم وبين طــروادة همه يردون يشتغلون ويانه وطرواده ما رضى تالي صعدوا بالدركتل غصباً علينه وسليم هوه الجاي ينگل بالبذور والنوب اجوا جدّي وعمامي تعاركوا وي الولد مايرضون الولد يشتغلون بگيعانه ويساعدونه، صــيهد بله محد يحاجيه بس ســليم وسلطان سووا بيهم فلك وطردوهم للمعامل گالهم ســليم من نگضي حصاد وي طــروادة نروح للمعامل.
رنـــه :: جا ليش هيج يسوون؟
عبود:: عناد بعمي شاكر ما ادري ليش، وطرواده طايح بين نارين عمي وجدي يحجون عليه ، وعمي شاكر يصيح انتَ تستغل ولدي ومصاحبهم على مصلحة خله طــروادة ينشال وينرگع من القهر طرد ســليم وسلطان رادهم بس يعوفونه ولا رضوا ولا راحوا.
عــفراء:: خليهم احسن حتى اعمامي يعرفون شما يسوون الولد يضل گلبهم على گلب طــروادة.
عبود:: شتحجين انتِ لو موجوده وتشوفين شلون تعاركوا اخوج ضل يرجف صــيهد كضه وغطه بالشط گاله اشتعلت خل اطفيك.
رنـــه :: اشتغل ومقهوره على طــروادة سوينه الريوك وعبود اخذه وراح ودينه حسين على ام صــيهد من ضلت عــفراء تبجي من الوجع اجت شافتها وگبل خابرت منذر اجوا هوه وامه وراحت وياهم ام صــيهد خلوني وحدي الوب من الخوف وگلبي نار افتر اسوي بالغدا وادعي.
كل ما اسمع صوت دركتل اطلع اعاين من بين فتحات السياج اشوفنه مره يجي ســليم يسوق الدركتل يفرغ البذور على النايلون اللي فرشناه البارحه، ويرد يروح يجي وراه سلطان ومره صــيهد مره سجاد، وي الغده هم طلعت شفته ســليم فرغ البذور وطفه الدركتل وخر الچفية اللي متلثم بيها من وجهه تلفونه يدك مسح وجهه ورد اسمعه من گال
ســليم:: هااااه؟ ... يابه جعلك لا تريگت ومرض.
يحجي ويسكت يسمع اللي جاي يحاجيه ويرد يحجي گاله
-بريا تروح عني لا ابتلي بيك..... اناااا ســليم اتوسل بالخايسه رنـــه حتى اجيبلك لفة اجيبلك سم حتى سم.
فتحت عيني وبساع صعدت على گن الدجاج
-هيووو ياهي الخايسه؟
دار يعاينلي والتلفون على اذنه خازرني
-انززززلي
- راح اسكتلك علمود ريـــمه
-وانا ما اسكتلج لأجل احد انزززلي.
حجاها وضل يصيّح بالتلفون ويغلط
ســليم :: لا تتريك لا تتريك يطبگ مرض خاب ما اگلها لو لفتها هسه تطيبك.
يحجي وانه اعاينله تذكرت من ريـــمه گالتلي ضل يصيح بالمستشفى ويگلهم اختي اذا صار بيها شي احرگكم
-ســليم.
دار عاينلي بعده خازرني.
-لا تغلط عليَّ وانه هم بعد ما أغلط.
هز ايده نزلت من گن الدجاج طبيت جوه واحجي على روحـــي
بعد كافي ما ضل واحد ما تعاركتي وياه بعد هاي هيه ما اعارك احد، شبعت عركات بعدّ التوبه، ندك باب الحوش ومشيت وكفت يم شباج الهول زهره راحت تفتحه ســليم واكف بالباب گالها
ســليم :: زهره روحـــي گلي الرنه الحيوان بريا يريد لفه.
زهره:: هههههه.
ســليم:: الفطيره عليش تضحكين؟
دنك شالها وباسها بخدودها وهيه فد وحده گبل تشبگ بالزلم تموت عليهم واذا مره باستها تمسح بوستها گالها
-بريا شبيه؟
زهره :: هيوان.
-عفيييه.
ســليم :: بريا الحيوان شيريد؟
زهره:: لفه!
ســليم :: عفيييه واللفه تسويها رنـــه المطيه.
هزت راسها زهره لا وكضته من اذنه وشالت اصبعها بوجهه رافعه حاجبها.
زهره:: لا تعلط على لنه !
جر ايدها من اذنه عضاها
ســليم:: لج اذا عدتيها بعد اطيح حظج انزلي انزلي.
نزلها خازرها وطك الباب حيل زهره وخرت خايفه منه مديت راسي من باب الهول عاينلي مخنزر نتر
ســليم :: سويلي لفة مال اي شي حتى لو تحطين بيها زفنبوت.
-المن؟
-الخالتج.
-احترم نفسك.
-يلللله.
وخرت اريد اروحن اسوي لفة البريا وافكر بيه الدنيا الظهر والمسكين بعده بدون ريوك لو عده اخت جا ماضل هيج صاح وراي ســليم
-اكتبيله شي بورقه حتى لو تغلطين عليه.
ما رديت مشيت للمطبخ ومغثوثة من سالفة الرسالة طلعت وذرة لحم من الجدر مال الغدا، فردتها على الخبزه ورشيت عليها ملح لفيتها وطلعت الباب مسدود مديت بس ايدي السليم اخذها بنتر گال
-وين الورقة؟
-خل ينچب شني انا صاحبته واكتبله رساله بورقه وعلي ترى اگل الطرواده عليه، وگله بعد لا يضل يدور لفات من عدي كلشي ما اسوي وامده عيوني البچن عليه
ســليم:: وبوفاضل لو انتِ اختي الا هذا السانج اكصه.
سديت الباب بوجهه رگع اغلط عليه بيني وبين نفسي طبيت للبيت هم لگيت زهره تغلط عليه ضايجه حتى من بريا شلون
يگله خل توديلي رسالة تذكرت من منذر وده رسالة العفراء ولعبت روحـــي حتى من افكاري " ايععع".
رديت للمطبخ اسوي الزلاطه شويه واجوا الولد طبوا للدوانيه همه ولزلم اليشتغلون بالحاصوده اجاني حسين تعبان وهوه كلشي ما مسوي بس عجبه يروح وياهم وراه اجه طــروادة للمطبخ هلكان من التعب ووجهه احمر من الشمس اتلفت يسأل
-جا عفره وين؟
-راحت من الصبح صار عدها ولاده.
فتح عينه بخوف يحجي
-جا غير تخابروني؟؟؟
-هيه مارضت والله
يحجي وياي وطلع تلفونه من جيبه يخابر منذر وانه واكفه يمه سلم عليه وسأله وراها ابتسم وگال
طــروادة :: يا الله الف الحمدلله يابه على الخير والبركه الله يجعلها من الذرية الصالحه، عفره شلونها؟ يا الله الحمدلله والشكر، على الخير على الخير.
حاجاهم وسد التلفون
-هاه؟
-شويه ويجون! الحمدلله الف الحمد والشكر.
مسح وجهه شفايفه تتحرك ما ادري شيحجي ومشه للجدوره فتحهن عاين بيهن وغسل خاشوگه اجه يتذوق لان مايثق بطبخي عجبه سألني
-انتِ طابخه؟
-اي علمتني عفره طيب؟
-اي والله، روحـــي افرشي فراش العفره وانا بس اغسل واصلي واجي اساعدنج.
هزيت راسي اي ومشيت بساع حضرت فراش العفراء ورديت للمطبخ نصب الغدا انه وياه ونگلوا الاكل للدوانيه ضليت بالمطبخ واكفه يم الچاي واعزل بالمواعين حتى ماتصير علي هوسه واشوفن طــروادة گام طلع فتح باب الحوش وطبن
ام صــيهد سانده عفره وهيه گوه تمشي وام منذر شايله الطفلة ركضت الباب الهول والضحكه شاگه حلگي وبس اريدن اشوفنها اخذناها للغرفة تمددت موجوعه وحالها حال وخلّوا الطفلة بكريكوت وخلوها يم عفراء كعدت يمها على ركبي واعاين لوجها مدنفش ووردي مغمضه عينها
-فدوووه فدووووه.
اعاينلها واضحك بس مدري ليش دموعي تجري وعفره تعاينلي مبتسمه غطيت وجهي بأيدي وبجيت جرتني عفراء الصدرها وهيه هم بجت وتحاجيني
عــفراء:: شبيج رنـــه؟
ضميت وجهي بصدرها ابجي بلا سبب وما ادري على شنو مدري من فرحتي مدري من امنيتي بوجود امي بهالوكت مدري حازه بگلبي عيون عفره وهيه تتلفت وتدور ام تتلگاها.
جرتني ام صــيهد الصدرها تحاجيني وتمسح بعيوني وجنها حست بالبگلبي گالت
إم صــيهد:: انه لو بأيدي ساعه ما اتيهجن، بس يشهد الحسين يا معزتجن بعز بناتي ، انه امجن واختجن منا لمن اموتن.
عــفراء:: عمرج طويل عمه.
رنـــه :: مسحت عيوني وگمت من صاح عليَّ طــروادة واگفين بباب الغرفة هوه وعبود حتى ما كملوا غداهم گال
طــروادة :: جيبيها خل نشوفها
-اخاااف.
عبود:: بهذا الكريكوت مالتها شيليها
طــروادة :: خلي ام صــيهد تجيبها.
رجعت للغرفه وهنه سمعن السالفة ضحكن وكامت ام صــيهد شالت الطفلة مشت وانه وياها عاينولها يضحكون ويصلون على محمد من بعيد يعاينولها بدون ما يوصلون يمها.
عبود:: ما تفتح؟ حتى اشوفنها تعارفني لو لا.
ضحكوا شويه وردوا مشيت للمطبخ صبيتلهن غده والتهيت بين المواعين والچاي شويه وردوا للحصاد وام منذر للعصر وراحت، بس ام صــيهد تروح البيتهم وترجّع علينه
عدن اول يومين من الحصاد بالثالث اجت حاصودة علمود گيعان جدادي ماشيه عشر مترات وعطلانه ومودين على أغراضنا گايليلهم عشرة ايام يله يوصلنكم ضلوا ينطحنون من القهر، وطرواده يحصد ووادم السلف هم بدت تحصد وهمه يدورولهم على حاصوده ثانيه وماكو گيعانهم هواي اقل شي تضل ١٥ يوم تحصدلهم.
باليوم الخامس عبود جاب بعد نايلون فرشه لان الفرشناه اول مره ما كفه، وطرواده متعجب من الرزق الاجاه ماتوقع هلكد وهذا كله وهوه بعده ما مخلص حصاد ينرادله بعد ثلث ايام يله يكضي وحتى من اروحن للمدرسة بنات من السلف يگللي
" يگولون گيعانكم هاي السنة طاگه"
واعاين عليهن بطرف عيني واحجي من وره خشمي
"بفضل رب العالمين"
وفعلاً بفضل رب العالمين ربي رزق طــروادة اضعاف مضاعفه بحيث السنبله يطلع منهاا حبوب گد سنبلتين من دون گيعان كل السلف، الولد صدك ماعافوه وحتى وهـــب التعبان اخر ايام شفته وياهم يعاونهم، بس مــيثم جان ملتهي بين گيعان جدي وبين بريا، لمن كضه الحصاد نعاين للبذور واحنا ببطن الحوش على گد ما عالي صار تل.
وطرواده گال الصيهد
-اخابر على شيخ حيدر واگله اريدن الحاصوده تحصد لجدادي؟
صــيهد :: والله جاي اكلك لان السنبل دگ بالگاع شيحصده بعد
طــروادة :: هزيت راسي اي مو الخاطر شعلان بس الخاطر الولد هذآ تعبهم هم همه سهروا وركضوا وشتغلوا حالهم من حالي ومايهون عليَّ تعبهم يضيع.
مشينه انا وياه طالعين، تلاگوا ويانه شعلان وعمامي بباب الحوش رادين من الگيعان جانوا يدورولهم حاصوده گالهم
صــيهد:: هسه طــروادة يخابر شيخ حيدر ونحصد بهاي الحاصوده لا تدورون.
شعلان:: انااا احصد گيعاني وره طــروادة وبنفس الحاصوده؟
يحجي ويعانيلي بحقد ضحكت وين تريد توصل بجبروتك وغطرستك شال ايده يحلف
شعلان:: لووو تضل اخر حاصوده ما تمر على گيعاني.
طــروادة :: ههههه بكيفك ضل.
شال عوجيته يخليها بصدري دفعها صــيهد وهوه يهدد
شعلان:: تضحك؟ اضــحك اضــحك وراك هواي بچي؟ اذا ماكسرت ظهرك معتب، اطيحك شما عليت
ضحكت مستهزئ
طــروادة :: تذكر زين بيرغ عراضه انا ما اطيح، وبفضل الله اضلن دوم عالي اشباهك اليطيحون وينداس عليهم.
مد ايده يريد يجرني وصيهد واعمامي بينا همه يغلطون وهوه يغلط اعصابي احتركت ورغم كل هذا اردن عليه ببرود
-يااابه ضل جعلك لا حصدت
شاكر:: لا باارك الله بيك
-انتَ تسدد حلكك صوتك مايطلع لو زلمه وبيك خير ماتوديلي بتك للگيعان.
رنـــه :: ركضت على صوت الهوسه اعاين من باب الحوش واشوفنهم صياح وواحد يجر بالثاني عمي شاكر يهد على طــروادة وطرواده يهدد ويريد بس يكضه، التمت كلها وصياح وهوسه، صــيهد ووهب جابوا طــروادة للبيت طبيت للهول اعاينله ميت من القهر صاح عليه صــيهد
صــيهد :: سد حلكك يله مو توك سبع وتضحك عليهم جاا شمااالك؟
وطرواده كعد ينافخ ميت من القهر واعمامي من بره الحوش يغلطون لمن طشوا، صــيهد ضل يم طــروادة شويه وراح.
طب طــروادة للبيت سبح ومشه للغرفة يم عفراء سولف وياها ويضحك الشموسه وهيه بس تبجي
لـ١١ بالليل كاعدين وگمت لميت الهدوم من الحبل صار هوه قوي وراها بشويه الهوه زاد طــروادة خابر على عبود جاب نايلون وطلعت وياهم غطينه البذور وثبتنه النايلون ببلوك، طبينه جوه ركضت اخذت الطيور جوه والارانب ردت اجيب الصخله طــروادة ضل يصيح عفتها بالحوش مالتها طبينه للبيت ربع ساعة
وهبت عاصفة قوية وتراب يخنگ صاح طــروادة بقهر
طــروادة :: خرب راحت گيعان الولد.
عبود:: اي وعلي والله قهر.
يحجون ويعاينون من الشباج باب حوشنه انشلع والسياج كله ضل يروح ويجي گلت الطرواده
-جا واذا عاصفه وين تروح الگيعان؟
طــروادة :: غير هوه قوي السنبله تنفض بذورها وتدك بالگاع بعد ماتنحصد.
-اي چا طبهم مرض غير هستوهم عاركوك.
دار عليه بقهر
طــروادة :: لا تحجين هيج هذا تعب الولد همه الركضوا بالگيعان وتعبوا.
سكتت منه وهوه ميت من القهر عليهم عفتهم ونمت، كعدت بالسته الصبح على صوت شمس تبجي فتحت عيني الها اشوفن عــفراء حطتها بحضنها ترضعها گمت غسلت وطلعت للحوش مشلوع السياج وعبود وطرواده يثبتون بيه ومرجعين الباب سألته
-ها گيعان بيت جدي خربت؟
هز راسه اي ساكت بقهر عبالك گيعانه الخربت، ورغم هذا همه جابوا حاصوده بس ماحصلوا شي خسروا هوواي وعمي شاكر تخربط واخذوا للمستشفى راد ينجلط، طــروادة وعبود مقهورين بس انه ما مهتمه.
""""
مــاسه:: اهلي حيل مقهورين على الزرع الراح هيج صرفوا عليه هواي وكله راح، كلها مهتمه ومقهوره الا وهـــب حاير بضيمه شكد حاولت وياه اطلعه من ضوجته ابد ما اهتم، اروحن للمدرسة ونرد وهوه بلا ريوك امي تگلي
-شوفيه شلع گـــلبي مارضى يتريك.
واخذ الريوك واروح يمه بالگوه ياكل شويه ضعف حيل وملامحه تارسها الحزن احنا تعودنه على غيابها بس هوه ابد ما تعود ولا تقبل فكرة يعيش بدونها، اطلع من يمه مقهوره اروحن وي جــويريه للمطبخ وحده تساعد الثانية حتى نكضي شغل بساع ونصعد فوگ ندرس.
جوري حتى ماعدها وكت تسولف ويانه بس تدرس وتعبانه نوبات شغلات ما تفهمهن تضل تبجي اموتن من القهر عليها وادري صــيهد يعارف بس هيه ماترضى تروح يدرسها شارده منه حسره يطب للبيت تركض فوگ وهوه يسألني بقهر، يوكف بباب المطبخ ويحاجيني
صــيهد:: زينه؟
-اي
-تدرس لو جده ماتخليها؟
-لا ساكته منها جده ماجاي تحاجيها
هز راسه خوش وحط ايده بجيوب البنطرون گال
-گليلها نهاية هذا الشهر العرس.
سكتت مرتبكه أشر شكو
-مو شسمه هيه تگول لا من اكضي سادس.
عگد حاجبه ماراضي
-گليلها يگول هالاسبوع العرس دام هيج تتشرط .
-بس..
طب للبيت بعصبيه دفع الباب على وهـــب گاله
-گوم.
وهـــب :: غطيت وجهي مالي خلك اجه علي جر الغطا وطگاني راشدي بأيده الچنها كرين نترت بوجهه
-شبيييك؟
-گوم نروح البريا جان يم الدكتور اليوم.
كمت وياه استغفر وهوه مايهتم اذا واحد گاله لا ما اروحن ما اريد هاي الحجايات ما يسمعهن المهم هوه قرر طز بالباقي،
مشينه تلاكه ويانه طــروادة هم رايح ويانه البريا سلمنه على مــيثم وطبينه للغرفه يم بريا وجهه تعبان وبعد بيه اثار جروح من الحادث سلمنه عليه وكعدنه يمه
صــيهد :: يله ماصرت زين عدنا شغل؟
بريا:: شغليش خل ارد اتمرض؟
ضحكنه وطرواده كاعد بصفه مايضحك قلقني وقلق بريا
بريا :: احم جا ســليم وسلطان وين؟
صــيهد:: بالمعامل .
بريا:: شمسوين؟
سولفناله وحجينه عن الگيعان لمن كضت سوالفنه دار طــروادة گال البريا
-صرت زين؟
وبريا يعاينله ساكت هز راسه اي وصدمنا طــروادة من طگاه راشدي حييل وكضه من وجهه خازره
طــروادة :: دامك صررت زين، ارجع امرضك لو وصلت يم رنـــه افتهمت.
جراه مــيثم دفع طــروادة
مــيثم :: شني السالفة طــروادة.
طــروادة :: هو يعرف السالفة بريا عاين لو تمووووت سمعت لو تمووت ماتلوح رنـــه لو تضل آخر زلمه ما اطيكياها.
مــيثم :: ما رايدهااا شبييك؟
بريا: رايدها.
حجاها وسودن طــروادة ينكض بعد شيكضه الا نربطه ندفع بيه انا وصيهد وهوه جنه ثور وهايج مايطي مجال وهذاك مايسكت
بريا:: شبيه انااا وماتطينياها؟
طــروادة :: لا تگلي شبيه ولك سودنك شعلااان حطاها براسك ضحك عليك جاهل رنـــه جااااهل ياخايس.
بريا:: اي عود تكبر واخذها.
-خررررب
راح مــيثم بس يريد بريا يسكت وطرواده متسودن اذا كض بريا ياكله
صــيهد:: بريا سد حلككك، وانتَ كافي ثنينهم زعاطيط هاي هيه اسكت.
بريا:: رنا ما تصير الغيري اذبحهاا وما اخلي غيري يوصلها.
وهـــب :: تيهت طــروادة طبك مرض انت الردت تنكتل رديت كعدت اعاينلهم مــيثم وصيهد ماگدروا الطرواده وصل البريا طكاه وبريا يصيح
بريا:: لو تذبحني هم اضل اريدن رنـــه .
طــروادة :: لانعل ابوك لا ابو شعلااان ااششش سد حلكك اسمها لا تجيبه على لسانك اذا مازفيتها گدام عينكك.
طــروادة يحجي محترك. وبريا يحجي ببرود
بريا:: ماتزفها الغيري على گص رگبتي رنـــه الغيري ما تصير.
مــيثم :: سدد حلككك اسكت اسكت.
طــروادة :: هدووووني وخررررو بس اطينياه تعال تعال بريا تعااال تعااال.
بريا:: تعال انتَ.
وطرواده ينشال وينرگع يريد بس يفلت من ادين صــيهد وميثم
صــيهد:: كااافي، وانتَ انچب وسد حلگك، تدور مره هيه رنـــه غير تاكلك وتشربك بلسانها مسودن صاحي انتَ ؟
وهـــب :: ضحكت وطرواده نتر اديه من بين ادين صــيهد خازره طلع من البيت يرگع بالبيبان
صــيهد :: بالحسين اذا تعيد هالسالفة اشگك نصين
وهم صــيهد رگع الباب وطلع وميثم يعاين البريا بحيره گاله
مــيثم :: انا مو گتلك عوف هالسالفة.
وبريا ساكت لمن طلع مــيثم من يمنه عاينلي ودار وجهه للشباج گمت كعدت يمه
-عاشگها؟
عاينلي متحسر چن حاس بلوعته
بريا:: ما ادري اذا عاشگ شي ما مار على گـــلبي گبل.
-طــروادة ما يطيها لا تتعب روحك.
بريا:: اتعب روحـــي المهم أخذها ما اعوفنها لو طــروادة يذبحني.
سكتت بحيره وأصل مرحلة مآبيها رجعه
-واذا هيه ماتريدك؟
سكت يمسح بوجهه
بريا:: ما ادري وهـــب انا رايدها، جنت اكرها اموتن منها من نروح يم طــروادة الچاي ما اشربنه لان ادري بيه منها، وهسه اتمنى اي شي ايدها لامسته حتى لو سم.
-وين تورطت انتَ؟
دار وجهه مقهور ومتحلف
بريا:: ما اعوفنها حتى لو هيه ماتريدني أخذها.
-نچب شني تنهي عليها؟
-لا ما انهي بس الا انا ميت يله تاخذ غيري
-جا هاي شيسمونها خالي غير نهوه؟ بالحسين طــروادة يكتلك موت.
سكت ونزل راسه للمخده مغمض عيونه ضليت يمه شويه وطلعت احس البگلبي كافيني مابيه احمل هم غيري ولا اريدن أفكر بأحد ثاني ،. ثاني يوم الصبح واكفين انا وصيهد يم الگيعان نعاين للفلح جاي يشيلون البوه من الگيعان حتى نحرثها على الموسم الجديد
اجه يمنه مــيثم مضيك عيونه وصيهد يضحك مايگدر يكض روحه گبل گاله
صــيهد :: ها ابن الروسيه ماتحمل شمس؟
مــيثم :: اروحن؟
ضحكنه سلمنه عليه
مــيثم :: انتَ تداوم كليه تجذب علينه؟
صــيهد :: غير اولت امس رحت چا يوميه؟
مــيثم :: لا شني يوميه شلون يصير صــيهد يداوم يوميه مو عيب
-هههههههه
وهـــب :: عاينتله احسه يريد يحجي ومتردد سولف من الكليه للگيعان شويه وحط اديه بجيوبه عاين علي ودار عاين الصيهد
مــيثم :: أحم صــيهد اريد احاجيك بشغلة
صــيهد:: سولف شبيك ياهو مضوجك افصملك ظهره وعلي.
مــيثم :: هههه وكفو لا والله غيّر سالفة
صــيهد:: احجي، تريد وهـــب يروح.
-لا هوه ثنينكم اريدنكم.
وهـــب :: حسني گـــلبي وتمنيت ما يحجي اعاينله ساكت يمسح شاربه ولحيته محتار شلون يحجي رد عاين الصيهد وحجه متردد
مــيثم :: انا اريدن اختك احم مــاسه على سنة الله ورسوله، يعني اذا انت ترضى والبنيه ترضى.
درت عيني الصيهد سدّ أيده بغضب ساكت تمنيت مايحجي شي يقهر مــيثم ضل ساكت فترة يله گاله
صــيهد:: مــيثم انتَ اخوي والنعم منك واعرفك واعرف تربيتك بس اختي تريد تكمل دراسه.
مــيثم :: فاهمك وانا راضي بكل شرط تخليه اذا جان بخصوص المدرسه آو غيرها.
وهـــب :: خزره صــيهد ودنك مــيثم ساكت بحيره لمن حاجيته انا
- مــيثم والله نتشرف بيك ومانلگه مثلك بس وعلي مــاسه خالتي رايدتها ومطينها ححچايه وهم لان اختنا ماتريد تاخذ بالقريه.
صــيهد:: مــيثم تعذرني اثنينكم اعزاز وتدري بيه شكد أعزك وخاطرك مايهون عليًّ بس اختي منطيها الأبن خالتي ومن زمان والله، لا يضل بخاطرك مني
هز. راسه اي يمسح برگبته وجهه صار احمر
مــيثم :: الله يوفقها ويسترها، لا يابه شسالفة هههه شبيك عليمن ازعل چا هيه نصيب
-رحم الله والديك، ان شاءالله تلگه مره تستاهلك.
وهـــب :: سكت ميثم وغير السالفة بساع ما گدرت اشيلنه من بالي اعاينله حتى عيونه صارن حمر غسل وجهه بالشط ومسح رگبته مختنك ضل يمنه شويه وراح دار صــيهد خازرني.
صــيهد :: اذا مــاسه طلعت حاجيه وي مــيثم ومطيه مجال يشهد الحسين اثنينهم اذبحهم.
-انچب يله انچب وين شايفته هيه، واصلاً هيه لو تزوجها الجلب من الشارع ترضى المهم مو من القريه
بعد شلك بهالحجي.
ضل ينافخ ومشه للبيت .
مــاسه :: فزيت بخرعة على دفعة باب المطبخ حطيت ايدي على گـــلبي وانه اشوفن صــيهد گدامي واكف بعصبيه خازرني، جويريه وراي ماشال عينه وعاينلها گال
-تعاي.
تقدمت ينه بخطوات ترجف وكل شويه اريدن اشيل ايدي احمي بيها وجهي وصلت يمه مد ايده على ايدي كضاها وجراني للمشتمل ما منتبهه انه حتى بلا عبايه طب صاح
-امشي للغرفه هسه اجيج.
مشه للحمام يغسل وانه احس بروحي راح اختم القران مشيت للغرفة وانه اردد "وَجَعَلْنَا مِن بَيْنِ أَيْدِيهِمْ سَدًّا وَمِنْ خَلْفِهِمْ سَدًّا فَأَغْشَيْنَاهُمْ فَهُمْ لَا يُبْصِرُونَ "
كعدت على طرف الجربايه واقرأ بالقران گـــلبي يدك بخوف وارجع عقلي خاف مسوويه مشكله كلشي ما مسويه بس فتح باب الغرفة وگفت خايفه طب سد الباب وصيح
-گعدي.
كعدت راح لباكيت الجكاير شعل جكارة وعاينلي مضيك عينه گال بهدوء
صــيهد :: راح اسأل ولا تجذبين عليًًّ،
هزيت راسي اي
-مــيثم ابن عمي خليل محاجيج؟ گايلج اريدنج ومن هالحجي؟
فتحت عيني حيل وهزيت راسي لااا سكت وانه ارجف
- خطبج مني!
عاينت لوجهه مصدومه ونزلن دموعي اشهك
-عفيه والله اموت مو انت گلت محد يجبرجن؟
وكف بساع واجه يمي
صــيهد:: ياهو يجبرج؟ والله لو تتكاتل زلم ما اجبرج دام انتِ ما رايده.
مسحت عيوني مأمنه ادري بحچايته شنو مد ايده شال وجهي وعاين لعيوني بشك
-وخالتي عبير رايدتج لمحمد ابنها؟
بلعت ريك وعضيت شفتي ساكته بس أريد أدنك عصر فكي بأيده
-ها مــاسه؟
-انتَ بكيفك.
-اممم بكيفي، انتِ شايفته محمد؟
سكتت گـــلبي يدك حيل واذني احسها تبخ حراره وخر ايده من وجهي اعاين الايده كلساع تنقبض بغضب وكوه مسيطر على عصابه شلت راسي لوجه. وهزيت راسي اي خايفه
-من چنت طفلة واروحن وي امي الاخوالي وبعرس وهـــب شفته بالحوش بس والله العظيم والعباس بعد ماشايفته.
احجي ودموعي تجري خايفه منه هز راسه اي
صــيهد :: مصدگج، اششش لا تبجين گتلج.
مسحت دموعي ضاغط بأيده حيل على خشبه بحافة الميز مسح وجهه وگال
-هاي هيه هسه اريدنج تدرسن زين وتعوفين هالموضوع تشيلينه من راسج فهمتي؟ اريدن درجات اريد تنجحين للسادس بمعدل خوش؟
-اي والله.
-گومي يله روحـــي
كمت اريد اطلع بعدني بالباب گال
-وديلي جــويريه .
سكتت محتاره طلعت من يمه جوري متانيه بباب المطبخ خايفه
-ضرربج؟
-لا حجه وياي حچي حلو
-جا ليش باچيه؟
-مو انه خفت، اكلج يريدج!
جــويريه:: سكتت مرتبكه ما أريد اروح گالت مــاسه
-روحـــي حتى تحاجينه علمود العرس ترى من گال هالاسبوع مايتردد عده ستعداد يسويه باجر، هوه گبل بيومين خطط وسوه عرس وهـــب .
-واذا اجت جده؟
-شبيج بيت غانم عازمينهم غده ولا تجي .
جــويريه :: مسحت وجهي بحيره حطت عباية امها على راسي اعاين نص دشداشتي طالعه مشيت واتلفت من شباك الهول شافتني سعاد وباوعتلي يغضب وبدل ما ارجع مديت ايدي اسويلها حريگه لان هيه معاديتني وبس تغث بيه.
فتحت باب المشتمل ودخلت امشي واتلفت دگيت باب الغرفة وبقيت واكفه بمكاني لحد ما اجاني صوته بهدوء
-تعاي!
دخلت عيوني تدوره كاعد على الچربايه يدخن لابس قميص وبنطلون سود حزين مدري على منو وكفت وره الباب دنكت همست
-مودي عليه.
بقى ساكت شلت عيني اله يجر نفس من الجكاره ويزفره لمن خلصها طفاها وگام طك قفل الباب بلعت ريّك عيني وي ايده دار المفتاح وجراه عافه على الميز
صــيهد:: وين هالغيبه خاتونه؟
-احم اد.. ادرس.
مدنگه واحاجيه مد اصبعه على حنكي رفع وجهي خطف ووخر ايده باوعت لعيونه عاگد حاجبه ومركز بعيوني
-تدرسين لو شارده؟ شسويتلج وهيج گضيتيها تتختلين من عدي؟
-ما اتختل يعني يعني ادرس اني.
تقرب خطوه رجعت ليوره بخوف مد اديه اثنينهن على خصري وقبل ما يلزمني گال
-اريدن اخليج على الميز لان عليتي گـــلبي گد ما تدنگين.
ووي اخر كلمه خله اديه على خصري خليت ايدي فوگ اديه بخوف وجسمي يرجف رفعني من الگاع خلاني على الميز وهوه عالي عاف اديه من الجهتين يباوع لعيوني
صــيهد:: عرسنا هالاسبوع شلون تضلين هيج شارده انتِ بوادي وانا بوادي؟
-اريد احجي؟
هز راسه اي واني اعصر اصابعي حييل واشلع بالحلد اللي بصف اصبعي
-أحجي براحتج سولفي اسمعنج.
-يعني خلي اكمل السادس اني.
هز راسه لا ومد ايده بلا ما يشوف ايدي وخر ايد من ايد
-سولفيلي بغير شي مثلاً شتردين العرسج تعيشين بهذا المشتمل افتري بيه شوفي شنو ترديله بعد، سولفيلي هيج سوالف مو غير شي .
سكتت اباوع لوجهه گـــلبي يدك حيل شال ايده نزل العبايه من راسي خلاها على الميز منتظرني احجي واني بس ساكته
صــيهد:: ااي سولفي شنو تردين اجيبلج للعرس؟
هزيت راسي لا بهدوء گال
-خناجر ماتردين؟
حجاها وتسلطت على شفته ابتسامه بسرعة محاها ورحع لنفس الملامح همس
-ام الهجع.
حطيت ايدي على ايده استند اريد انزل ثبّتني بمكاني
صــيهد :: هييي ارگدي.
-اروح.
-مو تردين تحجين شو سكتي؟
هزيت راسي لا
صــيهد:: لا احجي حتى لو غلط انا افهمج!
-ما خايفه ما احجي غلط.
احجي مبرطمه مقهوره منه ضحك وقرب وجهه الوجهي
-متأكده؟
هزيت راسي اي وعيني بعينه متحديته وهو يبتسم بتحدي ويقرب وجهه اكثر
صــيهد:: اذا گد حجايتج أثبتي بمچانچ.
رمشت ساكته گـــلبي يدك بقوة وهوه يقرّب وجهه اكثر الحد ما حسيت نفسه يضرب بوجهي ميلت راسي شويه شويه لحد ما بعدته من گدامه ضحك
صــيهد:: المو گد كلمته يتعاقب.
-ماحركت.. ماتحر..ماتحركت.
-اثبتي.
غمضت عيني مرتبكه من قربه ملت كلي على صفحة رجع ليوره يعاينلي
-شتريد؟
-تحجين وتخربطين
-ما خايفه.
-اخوفج.
-ما اخاف.
-اوترج وتحجين مگلوب.
هزيت راسي لا مبتسم متأكد من كلامه گال
صــيهد:: خوش اذا ثبتي بمچانج وما گدرت اخليج ترجفين وتحجين غلط الج حگ انتِ تحددين موعد العرس.
باوعت بعيونه متوتره بس مدري منين اجتلي الجرأة وگتله
-تلغيه؟؟
عگد حاجبه وراحت ابتسامته
صــيهد:: اهااا هيج الحجي؟ خوش، واذا انا الربحت حچايه زايده ماتحجين.
بتردد هزيت راسي اي واحجي بصوت يرجف
- بس.. بس وخر ايدك ما يصير تلزمني.
-ايدي شعليها، بكيفي الزم شسوي اسوي كلمن يضل گد حجايته.
لزمت اديه اثنينهن أبعدهنّ لوره ظهره
-لا والله ما يصير بعّد مايصير هيج بدون ادين.
-خوش اذا استخدمتي اديج استخدم إديه متفقين؟
واني مثل الحمار اهز راسي اي بلا فهم ابتسم متحديني لزم اديه رجعهم لوره ظهري وجر شالي من شعري يريد يشدهن جريتهن بسرعة
-لااااا ما گلنه بيها شد.
-ههههههه يله خوش جاي تشلعين بگلبي ترى.
-خل اشد اديك اني؟
خزرني بعصبيه نتر
-انچبيي.
-خل نبطل بعد ما العب هيج اني.
-لااا ما نبطل ترى باجر اسوي العرس.
-ما اغلط والله ما اغلط ليش ما تصدگني اني بس من أسوي مشلكة اخاف وأغلط بالكلام بس،، بس هسه ما مسويه شي.
-ادري وگتلج انا اعرف شلون اخليج ترجفين وتحجين مگلوب واتفقنا وانا ما ارجع بأي اتفاق خوش؟
سكتت مرتبكه هزيت راسي اي رجع اديه لوره ظهري وثبت رأسيّ مقابيله، حط اديه هوه هم وره ظهره گال
-گد حچايتج؟
-اي.
-ممنوع تتحركين وممنوع نستخدم ادينه.
سكتت مرتبكه وهوه گوه لازم ضحكته احس يحرك بگلبي گتله
-اذا اني ربحت وماحجيت غلط تلغي العرس للأبد وتتزوج البنيه نجمه.
راحت ضحكته وبسرعة نترسن ملامحه غضب هز راسه خوش
صــيهد:: متفقين وشرط انتِ بنفسج ترحين تخطبيلي.
-اي.
هز راسه خوش وقرب وجهه مقابيل وجهي كلش بعد بين شفتي وشفته قليل لميت شفتي الداخل حلكي ابتسم وعيونه تتنقل بين ملامحي
-اثبتي جاي تتحركين.
-ما،لا تحركت ماتحركت.
-ههه لا تضمين بشفتج ما ابوسنج لا تخافين.
حجايه حسستني بطني نمغصت وكانما فراشة مشت على طول عمودي الفقري جسمي قشعر وگلبي يدك بقوة زفرت نفس براحه من صار راسه بصف راسي وحلكه يم أذني يهمس بصوت ناصي
-أثبتي.
غمضت عيني لازمه ايد بايد وره ظهري واعصرهم حييل انفاسه الحاره احسهم على رگبتي همس
-احجي، جاي ترجفين.
-ما، ار.. جف.
شهكت من مشه خشمه من اذني الرگبتي الحد عضم الترقوه واستقر على وشم النجمه من يحجي يضرب نفسه على جلدي
-احجي، هسه.
-ما، ما.. خايفه.
واول ماحجيتها طبع شفايفه على رگبتي يبوسها ويشمها حيل شهكت بفززه وبأثنين اديه لزمت بزنوده ارجف ورافعه نفس من الميز وصيحت من بين اسناني
- صيهدددد
صيحت روحـــي رايحه وكل جسمي يرجف بأيده ميلت راسي اريد ابتعد شال اديه يثبتني وحده على رگبتي ووحده على رجلي واني اديه لازمه فوگ معاصم ايده كارصتهم حييل بعد بس شفته يردد
-احجيي، رجفتي، بأيدي لا تجذبين
- عوفني ، ما اجرف، ما.. ما اجلف.
-ههههههههههههههه
ضحك حيل وباوع لوجهي وجهي احسه يطلع نار اباوعله بحقد وهوه يضحك.
- بعد لا تتحديني.
دنكت اريد انزل من الميز شالني نزلني دفعت ايده مبتعده
-تغش.. انتَ تغش.
-اناااا؟
ابتعدت اهز راسي اي احس اللحظة الباسني بيها مو حقيقة مثل الحلم اذني تصفر مرتبكه گال.
-لا تعيديها لا اطگج على عيــونج ياهو الغش انا لو انتِ
دنكت ساكته مديت ايدي اريد اجر الشال من الميز لزمه قبلي
فتحه وهوه يحجي
صــيهد:: لا تگليلي تغش حتى بالشقى ما اغشن.
حجه وفتح الشال خلاه على راسي بلا ما يلفه حجيت بهدوء
-مايصير تبوسني حيل اكرهك واكره روحـــي لان جاي نغشّ نجمه.
حجيتها اباوع لوجهه لم شفته الداخل حلكه وهز راسه اي
صــيهد:: ادري بيج تكرهيني وانا هم اموتن منج بس بستج لان تحدي والا انا مايعجبني اگرب صوب وحده غير نجمتي.
-باوع يعني خطيه البنيه خلي نلغي العرس والله خطيه هيه.
-لو تموووتين انتِ وياها ما الغي.
-خليه بالعطله مال نصّف السنه.
-لاا
حجاها وبظهر ايده مسح رگبتي مكان شفته ولف الشال على راسي يحجي
-اذا مشعول سألج وگتيله اريد أأجل العرس ابوج اسمطه خوش؟
سكتت مرتبكه طلعنه من المشتمل سوه اني رحت للبيت وهوه طلع حجيت الماسه وهيه ساكته محتاره مثلي واني خايفه حيل من صــيهد خايفه يتزوجني صدك مو جذب وكل شويه اتذكر كلامه من يگلي بكيفي مو بكيفج.
باوعت بالمرايه فوگ النجمه اللي برگبتي صاير أحمر صغيره ماتنشاف الا احد يركز مسحتها مقشعر جسمي اباوع الايدي الشعر اللي بيها خفيف يوكف كل ما اتذكر بوسة صــيهد لرگبتي.
بالليل احنا بالمطبخ وصاح علي جدي مشيت اركض وكفت گدامه گال وعينه مضيگها
-تعرسين هالاسبوع؟
سكتت ودرت عيني الصيهد واگف بالباب بغضب ووهب يمه بلعت ريك همست بخوف
-لا وره امتحان نصف السنة.
وليد:: هاي هيه والبت ابوها هم ماراضي يريدها تطلع بزفه من يمه شنيي بكيفك انتَ تحدد؟
شعلان:: يله امش ولي مناااه ماتاخذها هسه.
جــويريه:: رجعت للمطبخ خااايفه من صياحهم وعركهم طردوهم للمعامل وي سلطان وسليم، ومتت من القهر مت شفت ام صــيهد مقهوره تندمت لان ما سكتت اول وتالي يسوي العرس ليش حجيت ليشش.
مــاسه:: ما گدرت الومها تخاف من صــيهد وحقها، ثاني يوم داومنه وتناگرنه وي بنات غانم لعبانه روحنه منهن، طلعنه من المدرسه ندور على الحجي اللي يرجعنه مشينه نريد نصعد ووكفت جــويريه شهكت مرتبكه وانه اشوفن ابوها اجه علينه وكف كدامنه گالها
-ها جــويريه بويه حبيبتي شلونج؟
وجويريه اعاينلها شفايفها يرجفن نزلن دموعها بلا صوت جراها الحضنه والوادم تعاين علينه باسها براسها ووخرها گالها
-تعاي بويه تعاي احجي وياج وكونج تبريني الذمه على سوايتي بيج.
جــويريه:: لازم .. لازم نرجع للبيت السايق منتظرنا.
-اي بس احاجيج شويه واطيج هديتج وروحي.
مــاسه :: كضيت ايدها خايفه گالي
-لا تخافين بويه هاي سيارتي عاينيلها احاجيها شويه وتجيج دقيقتين.
جــويريه جرت ايدها مني وهزت راسها تطمني
-لا تخافين مــاسه هسه اجيج تانيني بسيارة الخط
وراحت وياه گـــلبي يدك حيل اعاين عليهم بمجرد صعدت جويرية وياه وره. اثنينهم شخط السيارة وفرها بين السيارات طاير.
