 |
قصه انتحار طبيب نفسي الفصل الثاني والاخير بقلم مني محمود بركات
أول ما قالتلي انها هتعرفني السبب حسيت بقبضه في قلبي كنت عايزة أعرف وخايفه اوي في نفس الوقت فضلت ساكته حاولت اسيطر علي دموعي أو رعشه أيدي بس مقدرتش مدام زينب فضلت ساكته كتير كنت حاسه بيها أنها مترددة من الخطوة دي ففضلت ساكته لحد ما حسمت قرارها وبدأت تحكيلي فعلا
ــ دكتور بيبرس الشاب الوسيم المنفتح علي الحياه اللي شوفيته دا مكنش كدة ابدا وهو صغير .. كان طفل خجول جدا ومنوطي ومبيتكلمش مع حد ملوش صحاب أهله غلبو معاه كلام من غير فايدة وعرضوه علي أخصائي نفسي اللي اكدلهم وقتها أنه بيعاني من اكتئاب وأنه صعب جدا علي طفل في سنه أنه يعاني من مرض زي دا
قاطعتها بدهشه
ــ أكتئاب ؟! معقول ؟
ــ اه معقول لما أبوة وأمه دورو كويس وراه في المدرسه والنادي اكتشفوا أنه بيتعرض للتنمر من ولد معاه في المدرسه والتمرين وان كل الأطفال بتضحك أو تتفرج محدش منهم بيدافع عن بيبرس وأن اكتر حاجة بيتريقو عليها أسمه ... للأسف أسمه كان بيخلي الاطفال تتريق وتضحك عليه
ــ أيوة بس دا مش سبب للاكتئاب ؟ كلنا أتعرضنا لمضايقات في المدرسه والجامعه والحياه عموما
ــ ما تصبري عليا ما بحكيلك اهو
ــ طيب أسفه كملي
ــ أهله مسكتوش كانو بيقولوا زيك كدة اكيد في حاجة تاني دورو علي دكتور نفسي متخصص في أكتئاب الاطفال وبدء بيبرس معاه جلسات وعرفه منه أن بيبرس كان طول الوقت بيتعرض ل التنمر من واحد معاه في المدرسه وان كل الأطفال بتضحك عليه وأن الولد دا مكتفاش بالتنمر اللفظي بس لكن كان بيضربه ومسميه الواد الطري وكتير يقوله يا سوسن لما تكبري هنشوفك عريس كلام كتير مؤزي مفيش طفل في سنه يستحمله واللي زود الموضوع عند بيبرس أنه لما جرب في مرة يحكي ل ماماته مدام إلهام كانت للأسف في الوقت دا عندها مشاكل كتير في شغلها ف زعقتله وقالتله أنا مش فاضيه لحواراتك التافهه دي من وقتها وهو قفل علي نفسي ودخل في الاكتئاب
ــ وبعدين
ــ أهله نقلوه من المدرسه دي خالص وفضلو مكملين في علاجة عند الدكتور واهتمو بيه جدا وقربو منه لحد ما اتحسن وخف وكمل حياته وبقي دكتور بيبرس اللي أنتي شوفتيه بس اللي محدش كان يعرفه أن بيبرس مخفش هو كان بيظهر لكل اللي حواليه أنه خف ... مكنش ليه صحاب كتير وكلهم علاقته بيهم علاقه سطحيه مقدرش يعمل صداقه قويه ابدا واللي أكد ل أهله أنه مخفش لما أخته أتخطبت واتصدم يوم الخطوبه أن ابن خاله العريس يبقي الولد اللي كان بيتريق عليه وهو صغير
عيوني وسعت من الصدمة
ــ معقول !! اي الحظ دا بس
ــ للأسف بيبرس اول ما شافه كأن السنين دي كلها مكنتش ورجع الطفل الصغير الخايف من تاني
ــ أنتي عرفتي كل دا ازاي ؟ معلش اني قاطعتك بس عايزة اعرف عرفتي كل دا ازاي ؟
ــ أنا كنت يوميا في البيت دا أنا اللي مربيه بيبرس ونهال أخته كنت موجودة في كل مراحل حياته ولما كبر ومكنش له صحاب كنت أنا صحبته ( دموعها نزلت ) كان بيحكيلي كل حاجة كنا صحاب ويوم خطوبه نهال أنا بس اللي لاحظت أن بيبرس أتغير فجأه سألته قالي مفيش حاجة واستاذن من الحفله ومشي تاني يوم شوفته هنا وسألته تاني
فلاش باك ...
ــ أنا مش هسيبك اللي لما أعرف في اي ؟ مالك يا حبيبي بس ؟
ــ يا دادة الله يخليكي متتعبينش معاكي مش قادر اتكلم والله
ــ أنا مش هخرج من هنا غير لما أعرف وانت عارفني كويس ف قول بقا في اي ؟ قول يا بيبرس بقا تعبتني
ــ ا انا شوفته يا دادة بعد كل السنين دي شوفته تاني ورجعت نفس الطفل تاني ليه ظهر ليه يا دادة
ــ هو مين دا يا حبيبي فهمني
ــ مصطفي .. مصطفي عبد السلام محمود الماحي الطفل اللي كان سبب كل حاجة وحشه حصلتلي في حياتي اللي بسببه فضلت سنين بتعالج وبردو مقدرتش اخف ١٠٠ في ١٠٠ شوفته في الحفله وبكل بجاحة جاي يفكرني بنفسه وهو مبتسم اوي ويقولي ياااه الواد الطري اي الصدف دي كان بيضحك نفس الضحكة الباردة المؤذيه اللي كانت ديما تطاردني في كوابيسي وعشان تكمل يطلع ابن خاله عمرو شوفتي يا دادة شوفتي
باك
ــ فضل يعيط اليوم دا كتير كان بيقول في وسط عياطة كلام كتير يوجع القلب ... أنا كدة كوابيس كلها هترجعلي تاني ... أنا مش هقدر اتحمل تاني يا دادة ... أنا مش عايز اشوفه تاني ... بلاش الضحكة دي انا بخاف منها بخاف اوي .... بعدها اتقابل مع مصطفي دا تاني في تجمع عائلي في رمضان اللي فات ومنه لله كان واخدة طول القاعدة تريقه بس في شكل هزار عشان محدش يحس ب حاجة رجع بيبرس مكتئب من تاني رجع الطفل الصغير الخايف الخجول وكأن مفيش اي تغير حصل فضل الفتره اللي فاتت يفكر في قرار السفر كان السفر هو الحل الوحيد اللي قدامة عشان يبعد عن مصطفي بس انتي يا راجيه اللي منعتيه من القرار دا
شاورت علي نفسي بدهشه
ــ أنا !!! أنا ازاي ؟؟
ــ بيبرس كان معجب بيكي ... وكان حاسس انه لو هرب وسافر هيبقي جبان وميستهلش أنه يكمل معاكي لو في نصيب يعني ف قرر يواجه مصطفي عشان يبطل تنمر عليه ... الكلام دا كان قبل ما ينتحر بيوم
ــ م معجب بيا أنا ؟ ازاي ؟ دا عمره ما قالي اي حاجة ولا لمحلي حتي
ــ كان مستني لما يحس انك جاهزة ل حاجة زي كدة الاول
ــ وبعدين طيب كملي
ــ مفيش بعدين يا راجيه اخر حاجة عارفاها أنه قرر يواجه مصطفي تاني يوم كنت عندهم وبتكلم مع مدام إلهام لاقينا نهال خارجة من أوضته بتصوت وتقول بيبرس مات
ــ وهتسكتي يا مدام زينب ؟ هتسيبي حقه يروح كدة ؟
ــ وانا في أيدي إيه اعمله بس
ــ لا في ايديك كتير بصراحة أقل حاجة تعرفي أهله بكل الكلام دا وهما يتصرفو لكن تسكتي وتسيبي حقه حرام عليكي والله حرام
ــ وهيفيد ب ايه بعد ما مات خلاص ملوش لازمة أنا حكتيلك انتي عشان كان معجب بيكي ولو حصلك اي انتكاسه هو كان هيزعل مني
اتعصبت عليها
ــ هو ايه اللي ملوش لازمه حرام عليكي حقه يروح كدة حرام عليكي الحيو ان دا يعيش حياته كدة عادي ويكمل أذيه في الناس ازاي هتقدري تنامي وانتي عارفه أن بيبرس مظلوم ومقهور والله اعلم الزفت دا قاله ايه خلاه رجع انتحر وهانت عليه نفسه بالطريقه دي ازاي هتسكتي عن حقه وهو اللي كان معتبرك انتي اقرب الناس ليه انتي بتقولي انك الوحيدة اللي كان بيتكلم معاكي وأنه ملوش صحاب غيرك هتسيبي حقه كدة يروح بسهوله ليه كدة ليه ؟
كلامي أثر فيها وفضلت تبكي كتير وانا سكت كنت بتنفس بسرعه وغضب كبير كنت حاسه اني لو شفت الشخص دا قدامي هقتله فوقت من أفكاري علي صوتها وهي بتكلمني
ــ طب قوليلي أعمل ايه وأنا هعمله
ــ أولا أنا هحكي كل اللي قولتيه دا علي صفحتي في بوست ممول ومش بهدف الشهرة ربنا يعلم أني عايزة اجيب حقه بأي طريقه ثانيا هتحكي ل أهله كل حاجة الناس اللي حاربت مع ابنها السنين دي كلها الاكتئاب من حقها دلوقتي تعرف اي حصله من حقها تاخد فرصه أنه تجيب حقه ارجوكي ساعديني نجيب حقه ارجوكي
بعد يومين في اوضتي وفي معاد البوست اليومي بتاعي كنت بكتبه وانا دموعي نازله بوجع علي شاب راح بسبب محاربته ل ظلام الاكتئاب اللي رفض يسيبه مهما حاول حكيت حكايته في البوست وختمته ب
ــ دي حكايه دكتور بيبرس الدكتور المحارب اللي اختار مهنه الطب النفسي بالذات عشان يحارب مرضه كان بيقاوم ويعافر عشان يكون انسان طبيعي لكن في لحظة لما الماضي رجع تاني بكل بشاعته مرضه اتمكن منه واتغلب عليه وفي لحظة ضعف منه نهي حياته ... حكايه دكتور بيبرس موجودة في بيوت كتير ارجوكم خدو بالكم من أولادكم ربوهم كويس اهتمو بالتربيه زي ما بتهتمو بالدرجات والشكليات واخيرا أن شاء الله حقك من اللي ظلمك راجع يا بيبرس ربنا يرحمك ويغفر لك يارب ويصبر اهلك
خلصت كلامي ودوست نشر وانا بدعي من جوايا اني اقدر اساعد في رجوع حقه من الإنسان اللي كان السبب في دماره وقررت اني مش هستسلم ل مرضي وهعافر وأكمل زي ما كان نفسه يشوفني ديما ناجحة وقويه هكمل يا بيبرس عشانك وعشاني
تمت ...
