 |
اسكريبت القطه مديرة التسويق كامل بقلم الست نور
- بقى أنتِ القطة مديرة التسويق؟
- نعم!
حمحم ودخل بدون إذن مني وأخد من مساحة مكتبي ما يكفيه يحط تليفونه ومفاتيح عربيته وأقرب كرسي لمكتبي وقعد ورجليه كانت عارفة طريقها فبكل أريحية حط رجل على رجل.
- اقف عندك.
- نعم!
- كل إلا السجاير! قد أغفر ليك أي تجاوز باستثناء إنك تاخد حقي في النفس الطبيعي وتتعب جيوبي الأنفية.
- بس كده؟ ده إحنا عنينا لجيوبك الأنفية.
بقوة مايلة للمرونة فعص سيجارته بقبضة إيده كأنه بيلعن ضعفه لعادة سيئة ملهوش يد في اعتياده ليها.
- عندي براند ...
- جميل، اسمه أي؟
- لسة هنختار الاسم سوا مانا جاي علشان كده.
- تمام حضرتك، طيب بالنسبة للمحتوى! البراند بيتكلم عن أي وأي الخدمات اللي بيقدمها؟
- حب ودفا وتشجيع ...
- نعم!
- مصري وصيني وياباني ده نوع الأكل.
- اااه يبقى البراند مطعم.
- لماحة والوجه السمح ده ميقولش شيء غير كده.
- سمج!
- نعم!
- كلامك سمح يا فندم.
- شالله يكرم أصلك يا أصيلة.
- فكرني كده محتاج أي للبراند بتاعك؟
- مأذون واتنين شهود؟
- نعم!
- نعم الله عليكِ! بقولك شيف واتنين جرسون والذي منه يعني.
- طب والمشاريب مين هيحاسب عليها؟
- الليلة بتاعتي والله ما حد يحاسب غيري.
- قصدي كاشير يا فندم، حضرتك مش محتاج كاشير في مطعمك؟
- أحم وماله نجيب كاشير.
- ناقص حاجة تانية؟
- الإشهار مهم بين الناس.
- قصدك التسويق للبراند؟
- تؤ الإشهار بين الناس.
- الإشهار ده لما تعمل مشروع جواز مش مشروع مهني يا فندم.
- سبق وقولتلك لماحة والوجه السمح ده ميقولش شيء غير كده.
- الله يعزّك يا فندم.
- أستلم الخطة في حدود أمتى؟
- شهرين يا فندم.
- كتير عليا ستين شمس وستين ليل يا جاحدة!
قفلت اللاب مصحوب بـ رزع عالمكتب وأنا بحاول أفهم خفة الدم اللي انفجرت في وشي دي:
- أي يا أبنودي بيه مالك ما تظبط حالك كده.
- الأبنودي ده كان عليه كلام إنما أييي؟
- أشعااار كان بيقول أشعار.
- عليكِ نور، ألا قولتيلي اسمك أي؟
- نور يا فندم.
- اسم النبي حارسك وصاينك اسم على مسمى والله
- من ذوقك يا فندم.
- مبتحبيش الأكسسوريز يا نور؟
- ليه السؤال يا فندم؟
- أصل مش شايف دبلة.
- وهشيل معايا ليه دبلة؟
- يبقى مش متجوزة.
- لأ
- ولا حتى مخطوبة؟
- برضو لأ.
- ولا مشروب عليكِ شاي؟
- اللهم طولك يا روح لأ يا فندم.
- بتحبي الشاي؟
- لأ تقيل على قلبي.
- هو مين؟
- الشاي يا فندم.
- مش مهم أنا على قلبي زي العسل.
- مهو واضح على قلبك مراوح يا فندم.
- الشاي بتاعي مظبوط سكر أرجو متحطليش ملح في الشاي.
- وهحطلك ملح ليه؟
- لوازم تطفيس العرسان وكده.
- لأ هو إحنا لسة هنطفش! إحنا بنحط سم على طول.
- شرسة بس عسل
- أنت لسة شوفت حاجة؟
- أموت أنا في البنت البراوية.
- ليه فاكرني نادية الجندي! بص أنت هتعمل أي هتاخد ديلك في سنانك ومن مكان ما رجعت وتقول يا فكيك.
- وإلا؟
- وإلا؟
تخليت عن ثباتي وقومت من على الكرسي وطلعت شنطة سكاكين من تحت مكتبي وأول سكينة طلعت في وشي شوحت بيها في وشه.
- يا بنت المجانين بتعملي أي؟
- أنا عملت حاجة لسة؟
- الطيب أحسن.
- شششش اسمك أي؟
- محسوبك عيد.
- اسم النبي حارسك وصاينك اسم على مسمى عيد ورايا يا عيد يلا هترجع للي باعتك تقولهم دي مجنونة ورفعت عليا ســلاح أبيض وأي حد يدخلها بتعمل معاه الجلاشة.
- حاضر حاضر.
- بعمل معاه أي؟
- الجلاشة.
- شاطر.
- والشاطر بنوديه فين يا عيد؟
- بنوديه فين؟
- بنوديه القناطر عيد يا عيد علشان مضطرش أعيد كتير
- حاضر حاضر الشاطر بنوديه القناطر
هرب من تحت إيدي وجري لـ برا وأنا رجعت السكيـنة مكانها ولا كأن شيئًا قد حدث، وكان التليفون بيرن:
- حاضر يا ماما جاية.
- اشتريتي شنطة السكاكيـن علشان جهازك؟
- أها ومعايا في المكتب أهه.
- بتعمل أي معاكِ في المكتب؟
- برازي بيها العملاء!
- نعم ياختي؟
- أصل أعداء النجاح دول كتير يا ست الكل وفاكرين لما كل يومين يبعتولي عميل مزيف يرازي فيا ويضيع وقتي كده هيشتتوني ولا أخاف ههه قال وعلى رأي المثل اللي فاكرني طيب! كل سنة وهو طيب.
- أنتِ مخك لسع خالص يا بنتي لا حول ولا قوة إلا بالله.
- تسلميلي يا ست الكل.
- شوفي خطيبك لو بيرنلك علشان رن عليا اشتكالي إنك مبترديش عليه.
- أهو بيرن
- خلاص شوفيه.
قفلت معاها واتنهدت ورديت وعارفة هيفتح وصلة عتاب زي كل مرة مش هخلص منها، بس قبلها لبست الدبلة اللي خلعتها لأول مرة بعد خناقة إمبارح بس مش عايزة حد نفسه مريضة يفهم ويفسر على مزاجه فاحترامًا ليه لبستها ومَلست عليها بكل حب قبل ما أرد عليه:
- أنتِ عارفة باقي على فرحنا قد أي؟
- عارفة أها شهرين!
- ستين شمس وستين ليل يا جاحدة!
- لا حول ولا قوة إلا بالله استنى كده! لا حول ولا قوة إلا بالله
#الست_نور
