رواية سواد القلوب الفصل العاشر بقلم ام سامان
براء
رجعنا ثاني يوم ....بس صرت اشوف صديق أدهم بكل مكان...طبعا حظرت شاهين ...
لكيت روحي جنت غبية ويه نفسي ...جان لازم ابتعد ألف خطوة عن شاهين...من اول ماضم عليه هو متزوج...بس مثل مايكولون غلطة الشاطر بالف...
وهاي ثاني خطأ الي اولها جان ويه أدهم من وثقت بي وهسه سالفة شاهين...
قررت من اليوم مااثق غير باهلي وبس...طلعنا آني وفرح للمول ..باوعتلها تباوعلي وخايفه استغربت احنا تقربنا الفترة الفاتت ..
_ شبيج فوفو...
_ انتي لاتضلين تباوعيلي راح نسوي حادث...
_ مافهمت لاتخافين آني سواقتي فول ..
ابتسمت باستهزاء ...
_ اي صح ابويه الدعم خمس مرات
ضحكت ضحكة عالية
_ هاي منو حجالج
_ شاد من عرف راح نطلع سوه كال راح أشتري الكفن ...من سئلته كلي مو طالعة ويه براء كتله اي كال معناها الله يرحمج...ماصدكته بس شكلي راح اصدكه مع الدليل ...صرت اتلاعب بالسيارة وهي ماتت خوف...لحد ماوصلنا نزلت ورفعت راسها
_ الله ياخذني يابراء بنت ليالي إذا بعد صعدت وياج
ضحكنا ....ودخلنا ...تريد تشتري هدية لفهد بمناسبة عيد ميلاده....
فتنا على محل العطور...
كتلها boos عطره لمفضل كالت لا اريد اخذله على ذوقي ...عفتها براحتها...انداريت فات للمحل...
لابس بنطلون جينز وقميص اسود وجاكيت اسود وفاتح الدكم الأولى ...والمناظر بايده..
درت وجهي من لاحظ دااباوعله....آني باوعتله صدفة مو لان معجبه اوشي بس أعتقد هو فهم غير شي...
ماهتميت ..وكف قريب مني ...
_ لو سمحت تعرف عربي
جاوبه الرجال
_ أكيد ..تفضل عيني...
_ أريد ماركة ديور
وكأل النوع اليريده غمضت عيوني نفس ال
ماركة الجان يستخدمها سيروان
كملت فرح بعد مادفعنا اخذت عطر من ماركة لاكوست
رحنا لقسم الفساتين طبعا هاي ثالث مره فرح تطلع للمولات ...
اشترت فستان طلعه لون اخضر طوخ. وحجاب هم وحذاء...فهد كال التريده جيبيلها انطاها فلوس الي والها...بس آني ماجان الي واهس...
رجعنا بعد ماهلكنا وصرت أشوفه باي مكان ...
ماهتميت ...لغيت فكرة الحب والزواج....وحتى لو بيوم تزوجت الحب مراح يكون أساس بيها ...جربت مرة وفشلت...
""""""""""“""""""“"""""""
فرح
الله دزلي ملاك بهيئة شخص ...أنا الماجنت أنام براحة ...جنت أنام وفاتحه عيوني حتى مااصير مطمع لابن خالي النذل ..اخاف أنام نومة عميقة ويكون سبب بخسارة شرفي ...الحاربت بيها امي ووابن خالي حتى أحافظ عليه...ماقبلت امي تتواصل وياي أبد...شكد خابرت فهد كتله مااريدها....
وهو احترم رغبتي ...عرفت ابويه باقيلة سنة ونص ويخلص حكمه...منتظرته على آحر من الجمر بابا عافنا من جان عمري 11سنة..
يعني صارلي 7سنوات تقريبا ماشايفه بابا مرات جنت أشوفه كاميرا من يخابر امي ..وبعد تهديدات يلا يخلوني احاجيه ...
الحمدلله تحسن وضعي صرت أكدر اطلع واطب براحتي مااخاف من احد ...
حضرت اكلات يحبها فهد...وماما (ليال)تساعدني شاد واياد جابو الكيك والحلويات ...طلبنا من بابا يشغله يرجعون متأخر ....
سوينا العشا لحم بعجين وبيتزا والكيك حهزت طاولة تخبل ...فات اتفاجئ وفرح حيل...تقرب حضن امه وبعدها تقرب وباس راسي...
كل عام وأنت بخير وويايه
ابتسم وباسني مرة ثانية
_ أكيد كلبي...وانتي بخير...انتي فرحي
بالليل مثل كل يوم جابلي عصير البرتقال الطبيعي ....مايمر يوم إذا مايسويها بايده ...
ثاني يوم ....جنا متمددين ردت احضنه فز وكأل
_ او نسسيت اسويلج العصير
_ لزمت ايده انسى حبيبي مايحتاج
_ لاشلون مايصير ...
طلع ...طلعت وراه بعد مالبست جبه أريد أروح للحمام ..قبلها رحت أشوفه واكوله حفوت الحمام ..انصدمت وآني اشوف طحن حبايه وخلاها بالكلاص....رجعت لورا مصدومة...
فتت بسرعة للحمام...اخذت نفس وآني افكر شنو هالحب ..لا المستحيل فهد يسوي شي يخذلني بي ...أكيد دكتورتي منطيته هالحبايه وبيها شي مايريد آني اعرفه اي فهد مستحيل يخذلني
اخذت نفس وطلعت غسلت وجهي ...
دخلت جان كاعد وبصفه العصير...
تمددت وحجيت
_ شولعبت نفسي مااريد العصير حبيبي..
_ لاكلبي مايصير هاي بيها فيتامينات تفيدج...ترى ازعل عليج إذا ماشربتيها...
شربتها ...وآني اباوعله حس بيه شي توتر وصار يفرك برقبته....
كملتها وابتسمت...
_ عاشت ايدك حبيبي...صدك فهد بعد شهر راح يصيرلنا سنة وجم شهرسوه...ومارايحين شهر عسل على كولة براء مناوي تاخذني
جر ايدي وباسها
_ المكان التردينه كلبي كولي اخذج عليه
_ اممم شرايك نروح لدهوك براء تكول يخبل.
_ التردينه حبيبتي...
حضنته...وآني ادعي مايخذلني بيوم...مااريد يصير بيه الصار ببراء ...براء تخطت بوجود اخوانها وامها وابوها آني ماعندي غيره...ثاني يوم رحت ادور بالكاونتر بحاجة انظف الكاونتر ....ماكو مالكيت وكفت اباوع للكاونتر عيوني راحت على فوك الكاونتر .جبت الدرج ..وصعدت غمضت عيوني من لكيته..نزلت جوه وايدي ترجف ..
العصر طلعت ويه براء بحجة احلل حتى اسئل عن الحبايه ومالها أريد صيدليه مختبر يفتهمون عربي ......من شفت براء واكفه تلعب بموبايلها تقربت من الصيدلانيه...عفية ممكن سؤال
_ أكيد عيوني ...
_ لكيت هالعلاج ...وخفت لا الأطفال ماخذينه شفتها بيد بنتي اكدر أعرف لشنو ..
_ باوعتلها وردت باوعتلي ...هاي حبوب منع الحمل يامدام خلي بعيد عن ادين الأطفال ..خاف بنتج ماخذه منها لان مستخدمينه...غمضت عيوني ولزمتني الرجفة
_ لا تاكدت منها يجوز مرت حماي ماخذته... تقربت براء
_ ها فوفو كملتي ..رديت باي واخذت الحباية من الابنيه وطلعت تحاليلي زينة ماكو شي
رجعنا وبراء تحاجيني بالي مو يمها
نزلت وآني احس روحي بغير عالم...طلعت ساعدتهم بالعشا...وآني افكر شلون اواجه شخص صارلي سنه حاسبته سندي الوحيد..مافكرت بيوم انخذل من هالشخص..
بالليل جهزتله نفسي...من شافني بلع ريكه وكال
_ .راح اسويلج العصير طلع ونزلت دموعي ..
بسرعة ليست عليه شي ولحكته شفته ماد ايده يدور عالحبايه
_ ادور على هذا ..اندار باوعلي من شافها بايدي غمض عيونه وهو ضاغط بسنونه على شفته
_ ليش فهد ...ليش توقعت الخذلان من الكل الا انت...لحد آخر اللحظة وآنا أكول أكيد الدكتورة كاتبتلي هالعلاج وبي شي موزين وفهد ضامها عليه...يطلع هاي حبايه حتى تمنعني من الخلفة...
حجيت بدموع...متريدني ام لاطفالك...حقك ..آني مخبلة مو ...أكيد تحسب الايام والشهور يرجع ابويه وياخذني مو.بس هالشي مايمنع تلعب بيه وبمشاعري ..زوجة وببلاش منو يحصلها...تقدم بأعصاب..
_ لاطوخين بالحجي فرررح...
_ اوو صح شلون نسيت يابلاش..دفعت ملايين لخالي ...وننهيت علاقتي بيهم...واحدة ماعدها غيري لو اذبحها تقبل بالنهاية ماعدها أهل يسالون عليها ..صح ....
راد يلزم ايدي دفعته وصحت
_ لاتلزمممممني ...طلعو الكل على صوتي .اجت ماما....باوعتلها
_ جنت تدرين مو
_ شبيج مامافرح
_ جنتي تدرين ينطيني حبوب منع بالسر..
شنوو صاحت مصدومة..
_ بعيني شفته ما...ميريدني ام لاطفاله....ميريدني لان مخبله وماعدي اهل
صاح بيه وتقدملي بتهجم اخوانه وابوه وكفو كدامه صاح بيه
_ ياااغبية لومااريدج ومااحبج ماتقربلج واعتبرج حبيبه وزوجة....تكولين ألعب بيج ...يمتتتى لاعب يمشاعرج من يوم الجبتج فضلتج عالكللل ...اركض وراج مثل الاب اليركض لاطفاله...هوايه مناسبات ماجنت اروحله في سبيل اكضي وياااج وكت اكثر ...ارجع من وكت بس حتى ماتضوجين وحدج..تجين بهالبساطة وتتهميني هييج اتهام وصخخخ
_ جاااا لييش ماتريد أطفال
_ لان الدكتورة كالت وضعج مو مال أطفال ...لازم تتشافين للاخر يلاااوتخلصين من هالعلاج يلاا ...عبالح ماااريد أطفال أحسب يوم بيوم حتى تنطيني الدكتورة الأوك واكطع هالعلاج ....ويصير عندي منج أطفال....عفته وفتت الغرفة واسمع صياحه عليه ....ضربت رأسي
_ غبية غبية...مراح يسامحني دائما يكولي خلي مشاكلنا بيناتنا وآنا فضحته كدام اهله....خايفه من ردت فعله...اختفى صوته..انفتح الباب بقوة...وسدها كمت لحيله وابلع بريكي...قفلها بالمفتاح ..
تقرب مني رفع أيده عبالي يضربني فتحتها من شفته وخر حجابي..جرني لحضنه بجيت بحضنه واشهك ..
_ اسفة فهد اسفه
_ اشششش خلاص كلبي ...
سالفة وخلصت...
متمدده على صدره باوعتله مغمض عيونه
_ انت شنو ذنبك تضل بلااطفال.باوعلي بابتسامة وجودج يمي كافي وبعدين هذا وضع مؤقت كلبي...راح يصير عدنا كومة أطفال
_ ان شاء الله ...سامحني فهد
ماردلي شفته صافن..عرفت اخذ بخاطره مني وحقه..هو ضم حتى لايجرحني وأنا تهمته اتهامات حقيرة...ماادري شلون ديواسيني وماعاتب أبد...
""""""''''’''''''’'’'''''''''''''''
رنا
ماادري شنو الديصير بين يوم وليلةشاهين طلك سرى ....وراها كالت حامل ..ميخالف هالشي وارد...بس انو شاهين ينكلب ويجرح ببراء لهالدرجة ....حتى رضوان كال ماتوقعت يرد سرى ولايجرح براء البنيه جانت راح تروح بيها...للأسف عمة ام رضوان صارت اغلب طلعاته ويه ام أدهم...كلت لامي خاف ساحرينه...امي صارت تشغل سورة البقرة وترش البيت...بس اشوف علاقة شاهين وسرى نفس قبل باردة بس سرى التركض وراه يعني السالفة موسحر بس إذا تباوع لعيون شاهين من يباوع لسرى عبالك نظرات واحد يريد يقتل المقابل ...ابنهم ديكبر بينهم مااشوف شاهين متعلق بابنه...
حتى سرى ولا تحسينها ام لطفل...جم مرة امي متعاركة وياها لان ابنها يبجي ماتروحله...صارت امي هي التهتم بي ...عدا جياتها النا وتطلع ويه امها وام أدهم...الله يستر نهايتهم أبد ميبشر..من يوم السواه شاهين ببراء آني قاطعته....مااحاجيه...شاهين صرنا مانشوفه أصلا ....بيوم رجع رضوان جان طالع ويه شاهين
_ باعي من اليوم مااريدج تشتغلين بالبيت...واذا امي حاجتج كلمة ترديلها عشرة
فتحت عيوني مصدومة من كلامه
_ شبيك رضوان شنو هالحجي كام ولزمني من جتفي قوووي
_ وصاح رنااا الاكوله تنفذينه بلا كلااام سمعتتتي ....أريد من باجر كل دقيقة وكل ثانية تتعاركين وياها لحد ماتطردنا من البيت
_ خو نطلع بدون مشاكل
_ خله جبينه على جبيني...لاطولينها رنا ونفذي الكتلج وأنا اوعدج احجيلج كل شي بس نطلع منا بمشاكل وتنقطع العلاقات بينا
_ بس
خله اصبعه على حلكي
_ اوعديني تنفذين بدون سؤال....
_ مااكدر رضوان أنت تطلب مني شي مستحيل...
_ مو مستحيل هي امي وآني الدااطلب منج أريد شكد ماتكدرين تتجاوزين عليها وتعاركيها ...يلا رنا راح انجلط سوي الكتلج عليه ...
_ رضوان خوفتني
_ لازم تخافين لان احنا كاعدين بين وحوش
كلامه خوفني ....بس وعدته ...صرت مااشتغل ودوم نتعارك واذا تحجي اردلها بعشره رغم مو اخلاقي بس احس رضوان ماطلب هالشي من عبث...وهالشي وراها طلعات امه ويه ام أدهم ..بعد شهرين من هالعركات..عمو فلاح طردنا...رضوان جان حاسب احسابه واجر بيت بعيد عن اهلي ..استغربت بس ماحجيت شي ...بيوم الطلعنا واثثنا البيت....كال لاهله من اليوم أنا متبري منكم وامه كايله لكل العالم أنا ساحرته ماهتميت ....عمامي زعلو منه ...بس هومااهتم ....
اسبوع كاعدين ببيتنا ...اندك الباب ...فات شاهين ..حضني ..مارديتله بعدني مزعوجه منه....
كعدنا ورضوان الي تغير حيل وضعفان...جوه عيونه أسود...كلما اسئله يكلي مووكته
_يطلعون هو شاهين مايرجعون لوجه الصبح صاير اعصاب حيل احاجيه كلمه ينفجر بوجهي منعني أروح لاهلي بس من سرى تبقى عد اهله يخليني أروح.....مااعرف شنو المشكلة وليش هيج كاره اهله.. وبالذات سرى
٫٫"""""""""""“"""""""٫٫٫
براء
سنتين مرت بحلوها ومرها .... خوات سيروان تزوجو وجنت وياهم كاخت الهم...الحمدلله عمة وعمو تحسن نفسيتهم...بس حيل متعلقين بابنهم الثاني ...
وآني ملاحقات مروان الي ماتغيرت واجا تقدم 4مرات وآني رافضة ...خلال هالسنتين روحاتي لعمامي ماقلت بس ماابقى اكثر من يوم ...عمو عبدالله وعبدالرحمن دوم يجونا نطلع هنا سوه ...مقررين يجمعون فلوس وياخذون بيت هنا...قريبين منا...
فروحه بعد علاج ومناهدات الحمدلله حاليا حامل بالشهر الثاني...ابوها رجع بس ماحجوله بالمرت بي.... فرح حلفت فهد ماتحجي تخاف لاابوها يسوي شي ويرجع ينسجن...بس ماادري شحجتله عن امه وخلا ابوها يطلك امها....ابوها بقى قريب منها ويشتغل بمطعم هنا .....
خابرو بابا صديق إله على مود موضوعي آني ومروان ماادري مروان شلون ملاكي صديق بابا ... حتى يتوسطله ...بابا رحب بي
_ سد المكالمة....مدري ليش هالكد كاتب روحه عليج...شو الخشم والحلك تجميل واصطناعي..عوجت حلكي لان بهالسنة سويت خشمي الجان مسويلي عقدة وفلر لشفتي طلعت غير شكل. ...
_ و الله عاد هو مو أعمى
_ اويلي من هاللسان الطويل...لاجديات بنيتي ليش رافضة
_ بس لان صديق أدهم متخوفة منه
_ بس آني سئلت عليه ماعليه غبار ...
_ ماادري بابا خايفه
_ خاف بعدج تفكرين بشاهين
جاوبته بدون تردد
_ أكيد لا ...لو كلبي دك إله اطلعه وادوس عليه...الله يهنيه بحياته ويضل بعيد عني ..بصراحة بابا مااريد ارجع واكون قريبة من أدهم وامه والبقية....
دخلت ماما وكالت
_ بصراحة نفس كلامي....خليج بعيده وراح يجيلج الأحسن من مروان
اشرتله لبابا يعني أسمع
_ ماادري الولد بعيدا عن هو صديق ادهم بس الكل مدحو حتى اهله ناس مسالمينومثقفين..امه مديرة مدرسة وابوه دكتور باطنية....
_ ماادري بابا حيرتني اني مامفكره بي أبد...
_ صديقي مصطفى خابرني على هالسالفة يريد يجي وياه مروان يريد يحاجيج...لخاطري مااريد أكسر بكلام صديقي كعدي وياه وشوفي شيريد...
_ تمام بابا مثل ماتريد...
_ بالليل ...اجو لبست بنطلون وقميص عادي. ..طلعنا للحديقة ...
كعدنا كعد مقابيلي
_ ليش رافضة ...
_ شوف مروان ...أكيد أدهم حاجيلك عنا لاهو المتقبلنا ولااحنا ....فبس لان أنت من طرفه يخليني ارفضك ...وماادري بعد كل هالرفض ليش انت مصر ترجع وتتقدم من جديد ..
_ اوعدج مراح يجي يوم وأدهم يكون سبب مشكلة بينا كمل كلامه...
_ مااعرف كتلك آني اي شي يجي من طرف أدهم تخوفني اضل دائما بخوف...
_ اي ضمان تريدينه أنا جاهز..بس لاترفضين على هيج سبب تافهه..
_ براء من اول لحظة شفتج بيها وانتي داخلة هناوهنا.اشرلكلبه وعقله...مراح اجذب واكول ماجنت اسوي علاقات ويه البنات بس مالكيت وحدة تدخل كلبي ...
عوجت حلكي
_على حد علمي الضباط ماشاء الله كلبهم كوستر ماتقبطه وحدة واثنين
_ ضحك بصوت عالي ...لاوداعتج إذا لكينا الحب الحقيقي نذب كل علاقاتنا السابقة بالزبالة
_ مروان ..صدكني رفضي مو الك كشخص كتلك السبب
_ صدكيني أدهم صديقي الوحيد أكدر هسه اكولج راح اقاطعه بس اجذب عليج لان أدهم صديقي المقرب مستحيل اكدر بدونه يوم واحد ..
_ انطيني مجال افكر جم يوم ...بس ماتعتبر هاي موافقة بس أريد افكر....
_ الج كل الوقت بس من تفكرين ياريت تنسين آنا صديق منو بس فكري أنا مشتريج من اكثر من سنتين واحبج اكثر من نفسي واتمنى رضاج ومستحيل اخونج او اغدر بيج...
_ الله كريم ...
#يتبع
حابه انوه على شغلة براء حاجيتلكم هي مجانت تحب سيروان كحبيب ..وكلتو شبسرعة نست سيروان ..براء ماقبلت احجيلكم فترة خطوبتها والعانته من سيروان بس لان مستعد ماحبت احد يدعي عليه سيروان الله يرحمه اذاها حيل طول فترة خطوبتهم سيروان جان من نوع المهووس وانتو ادرى بهيج نوع وشلون ياذي المقابل وهذا الجان مخوفة وبكل روحة يطلب من براء تسامحه..
وللاسف براء كانت متقبله اذيته بس لان جان صديقها الوحيد ويدافعلها من الصغر ومفضلها على كل كرايبه اما علاقتها بشاهين هي هم ماتدري شلون بهالسرعة حبته وتعلقت بي ..
تكول ماحسيت غير وآني واكعة بحبه يمته وشلون ماادري ولو يرجع بيه الزمن ماجان دورت على عمامي..
شكرا لزيارتكم عالم روايات سكيرهوم
