رواية ليتك لا تعرف سري الفصل العاشر بقلم اسماء الطبلاوي
(خرج جاسر من شقه سامح وهو بيجري على السلم غضبان وحاسس انه هينفجر من الحزن ومش قادر يستوعب اللي عنيه شافته.. وقتها قعد سامح جنب فرح وهي بتعيط.
سامح: كان هيجي وقت ويعرف كل حاجه وكان لازم تتوقعي منه اي رد فعل يعني انتى كنتى متوقعه منه ايه يا فرح ده مجرد احساسه لوحده انه مسؤول عن حالتك دي كفيل انه يخليه ينهار مش بس يسيبك ويمشي.
فرح: روح وراه يا سامح ما تسيبوش لوحده عشان خاطري روح وراه وخلي بالك منه.
سامح: مش هينفع لازم يفضل لوحده دلوقتي يا فرح صدقيني على الاقل لحد ما يهدى.
(اتصدموا هم الاثنين لما سمعوا صوته جاي من وراهم وقوم سامح وقعد مكانه جنبها
جاسر بدموع: فرح انا اسف غصب عني والله ما كنتش عارف انا بقول ايه يا حبيبتي.. بس ما هو من صدمتي مش حرام عليكى اللي انتى عملتيه فيا ده كنتى سبتيني استنى انا واتحمل انما انتى لا انا مش قادر اشوفك كده وايه اللي على الحيطه ده.
(بص جاسر وراه لقى شاشه بتاعه مراقبه بتظهر الغرفه اللي هو كان مستقر فيها اثناء وجوده في المستشفى وفرح كانت طول الفتره دي بتراقبه وبتطمن عليه من بعيد لبعيد.
جاسر بصدمه: وكمان كنتى بتراقبيني وبتطمني عليا كل الوقت ده وانا كنت هموت واعرف اخبارك ايه.. انتى فاكره ان انتى بس اللي بتحبيني انا كمان بحبك زي ما بتحبيني ومش هسكت مش هسيبك تعيشي كده ابدا انا هتصرف وكل حاجه هتتصلح... لو سمحت يا سامح ساعدني واتصل هاتلي عربيه اسعاف مجهزه حالا انا هطلب اعمل حجز في اكبر مستشفى في المانيا انا وفرح هنسافر دلوقتي حالا.
سامح: بس ده خطر لاننا لسه ما لقيناش القلب ومحطوطين على قائمه الانتظار ولسه ما حدش كلمنا لحد دلوقتي.
فرح: ما تتعبش نفسك يا جاسر الموضوع متعقد.
جاسر: الكلام ده كان قبل ما انا افوق واعرف الوضع ده قبل ما نوصل المانيا يا حبيبتي هيكون القلب جاهز.. فاكره الناس اللي انا سالتهم على قلب مطابق ليا الحمد لله لقوا قلب و بما ان انا وانتى متطابقين يبقى القلب هينفعلك ما تقلقيش.
( وهناك في بيت عيلة الشافعي كان صفوت قاعد مع فادي بيتكلموا باستغراب من صفوت للكلام اللي فادي بيقوله
صفوت: طيب وجاسر طلب منك ليه انك تخلي الدكتور اللي اتصل وقال ان هو لقاله قلب يجهز كل حاجه للعمليه مع انه الحمد لله عمل العمليه خلاص
فادي: مش هتصدق يا بابا اللي حصل انت تعرف القلب اللي اتزرع لجاسر ده يطلع قلبي مين اصلا في الاساس.
صفوت: طبعا قلب الراجل اللي جابته فرح اللي كان مريض كبد مش هي قالت لنا كده.
فادي كذبت علينا كلنا يا بابا القلب اللي اتزرع لجاسر هو قلب فرح نفسها وفرح اخذت قلب جاسر
صفوت بحزن: مستحيل يا ابني ازاي كل ده يحصل ده على حسب التقارير الطبيه بتاعه جاسر فرح دلوقتي ما بين الحياه والموت انا مش قادر استوعب ازاي ده كله حصل.
فادي: المهم دلوقتي ان القلب ده جه في وقته جاسر قال للدكتور ما يتصرفش في القلب وما كانش عارف ليه وبمجرد ما لقى فرح كلمني وقالي اكلم الدكتور واكد عليه وقاله يجهز كل حاجه واتفق معاه على توقيت العمليه وزمانهم مسافرين دلوقتي.
صفوت: يبقى احنا لازم نكون جنب اهل فرح ونساندهم في كل حاجه وما نخليهمش محتاجين اي شيء لحد ما جاسر وفرح يرجعوا بالسلامه.
فادي: اكيد وباذن الله فرح بس تقوم بالسلامه وانا ورحمه وجاسر وفرح هنتجوز في يوم واحد ونفرحك بينا ان شاء الله.
صفوت: معقول كل الفتره دي يبقى ده الوضع وفرح تبقى عامله كل ده انا لازم اعرف منها كل حاجه باذن الله بعد ما تقوم بالسلامه لازم اعرف عملت كده ليه
( وفعلا جاسر اخذ فرح على طياره خاصه مجهزه طبيا لالمانيا وكان ماسك ايدها طول مده السفر وهي بتبصله وبتعيط وهو عنيه مدمعه
جاسر: ما تبصليش كده يا فرح كفايه احساسي بالذنب اللي مموتني ومش قادره اسامح نفسي على ان انا السبب في حالتك دي بعد ما كنتى مليانه حيويه ونشاط بقيتي تعبانه ووشك دبلان ومش قادره تتحركي انا عمري ما هسامح نفسي ابدا على وضعك ده
فرح بحب: ما تقولش كده ابدا انا عملت كده وده كان بارادتي ما كنتش مجبوره عليه وكنت في قمة سعادتي وانا بديلك قلبي علشان تعيش انا ما اقدرش اتحمل ان انت تتوجع قدامي وما اعملش حاجه.
جاسر: خلاص بقى كفايه كلام ووفري قوتك لحد ما تعملي العمليه وتخفي وبعدها هنتعاتب ونتحاسب كثير قوي انت فاهمه
فرح: طيب اخر حاجه عاوزه اقولهالك اياك تفكر انك ترجعلي قلبى ثاني ويكون ده اللي انت ناوي عليه لما نوصل المانيا وده لسبب بسيط انه ما بقاش ينفع انت فاهمني
جاسر: انا مش عاوزك تفكري في اي حاجه ارتاحي بس انا مرتب كل حاجه واول ما نوصل هتدخلي العمليات على طول الفرق بقى يا ستي انك لما تخرجي هتلاقيني واقف مستنيك مش هختفي واوجع قلبك عليا زي ما انت وجعتي قلوب كثير عليكى وزي ما قلتيلي هتدخلي بسرعه وتخرجي بسرعه علشان قلبي هيبقى مشغول على خطيبتي ومراتي في المستقبل القريب اول ما تخف ان شاء الله.
فرح: اه لو تعرف انا استنيت الكلام ده منك قد ايه مش هتصدقني ولا تصدق فرحتي بيه.
جاسر: انا عارف بس من هنا ورايح هتسمعي الكلام ده مني كل ثانيه.
( وفي نفس الوقت في بيت عيله فرح كانوا لسه قاعدين مهمومين لحد ما جه فادي ومعاه صفوت ورحبت بيهم نوال بعينيها المنفوخه من كتر العياط على بنتها
نوال بلهفه: لسه ما فيش اخبار عن فرح يا فادي اصل جاسر قال لي مش هتاخر عليك وارجع لك فرح تبقى في حضنك ولسه ما جابهاش.
فادي: انا عايز اقول لك على حاجه يا طنط هيريحك لو عرفتي ان فرح موجوده فعلا دلوقتي مع جاسر
رحمه: واه واه كيف وهي فين وكانت فين كل الوجت ده وجلجانا عليها.
صفوت: التفاصيل دي كلها هنعرفها من فرح لما ترجع بالسلامه ان شاء الله انما دلوقتي احنا عايزينكم تطمنوا فرح مع جاسر بس الصراحه هي تعبانه شويه علشان كده جاسر اخذها وسافر بيها المانيا هتعمل شويه فحوصات وتحاليل واول ما هتبقى كويسه ان شاء الله هيرجعوا فورا اطمني عليها بقى.
نصره: كيف الكلام ده هي تعبانه لدرجه انها تسافر لبلاد بره ليه ايه اللي حصل عشان ده كله.
نوال: مش مهم دلوقتي يا نصره المهم انها عايشه وبخير انا مطمنه عليها طالما هي مع جاسر هو قالي انا مش هتاخر وهرجعهالك ونفذ وعده ليا وانا هستنى بصبر لحد ما يرجعها لحضني زي ما وعدني.
فادي: جاسر عمره ما وعد حد وعد وخلفوا ابدا وفي اقرب وقت ان شاء الله هتلاقيهم راجعين وهي بالف خير.
نوال: الحمد لله كده اقدر ادخل انام شويه اخيرا اطمنت عليكى يا فرح وهستناكى يا قلب امك اما ترجعيلي وتنوري بيتك.
صفوت: من ناحيه هترجع هترجع بس هتنور بيت ثاني خالص.
( وفي المانيا وصلت الطياره الخاصه بجاسر وفرح وكان في انتظارهم عربيه مجهزه تنقلها للمستشفى مطرح ما هتعمل العمليه وفعلا تم نقلها للمستشفى وهي حاسه بخوف وقلق قعد جنبها جاسر قبل ما تدخل العمليات.
جاسر: انا مش عايز اشوفك خايفه خلي عندك ايمان زي ما علمتيني وخلي ارادتك حديد ماما نوال ورحمه وعمتك نصره مستنيين رجوعك بالسلامه وكمان فادي مستني علشان يتجوز رحمه وحالف لا يعمل فرحه معانا في نفس اليوم وانا قلتله ان اللي انتى هتقولي عليه هو اللي هيتعمل
فرح علشان خاطري اخرجي بسرعه علشان قلبك اللي جوه صدري هيبقى ميت من الخوف عليكى ارجوكى ما تخلينيش اقلق انا بحبك ويا ريتني حبيتك من يوم ما اتولدت مش من ثلاث سنين بس
فرح بصدمه: ثلاث سنين هو انت قرات مذكراتي
جاسر: اما تعملي العمليه وتقومي وتخفي ونرجع مصر هنبقى نتكلم في الحاجات دي يلا بقى علشان وقت العمليه زي ما قلتلك دخول سريع خروج سريع
(وفعلا دخلت فرح اوضه العمليات تحت انظار جاسر القلقانه لانه كان حاسس انه بيدخل العمليات لمرتين ورا بعض وفضل قاعد يدعي كتير لفرح.
جاسر: يا رب تخرج بالسلامه يا رب وما تضرنيش فيها ابدا بعد ما اخيرا لقيت فيها كل اللي كنت بتمناه.
(وفي نفس الوقت ده في القاهره كان فادي ورحمه قاعدين في مطعم بعد ما صمم فادي انه ياخدها ويتغدوا مع بعض بره وطلب اكل كتير جدا ورحمه كانت بتبصله بغضب برغم انها كانت ماسكه ضحكتها غصب عنها
رحمه: كل ده وكل طلبته ليه انت عامل وليمه هو انت جعان للدرجه دي يا فادي
فادي: اه بصراحه انا جعان للدرجه دي مش شايفه انا خسيت النص ازاي الفتره اللي فاتت وبعدين انتى هتبقي مراتي خدي بالك لازم تاخدي بالك من اكلى كويس وتغذيني انا بلعب رياضه يعني بعمل مجهود كبير
رحمه: مجهود ايه انت على اكده لو جعت وما لجيتش حاجه تاكلها بعد ما نتجوز هتجوم تاكلني وتحلي بالبوتاجاز
فادي: يا لهوي هو انا اقدر وخصوصا بعد بوتاجاز دي ده انتى لو تعرفي يا رحمتي انا بحبك قد ايه هتقولي عليا مجنون رحمه ولا لغتك الصعيدي دي عسل عسل
رحمه: بمناسبه رحمتي دي بجى انا عايزه اعرف انت مخبي عليا ايه عن فرح ايه التعب ده اللي يخلي جاسر ياخدها ويسافر بيها المانيا اكده على طول.
فادي: شوفي انا مش هكذب جاسر كان محتاج عمليه زرع قلب زي ما انتى عارفه وفرح قالت انها لقت متبرع بس لما جاسر لقاها واخذها المانيا اكتشف انها هي اللي ادتله قلبها واخذت قلبه وكانت مريضه جدا وعايشه على الاجهزه فهو اخذها المانيا عشان في قلب مطابق هناك هيزرعوا لفرح وترجع ده كل اللي اعرفه والله
رحمه: يا مري كل ده حصل وانا ما اعرفش.. فرح عملت كل ده لا ده لما ترجع لازم اعرف كل حاجه
( وبعد ما فرح عملت العمليه وخرجت بالسلامه فضلت في المانيا شهرين كان جاسر بيخليها تكلمهم صوت وصوره كل يوم تطمن عليهم علشان حالتها المعنويه لحد اليوم اللي رجعت فيه مصر وهي دلوقتي قاعده ما بين احضان امها
صفوت: انا عايزك بقى يا بنتي تفهميني انتى عملتى كل ده ليه.
فادي: وما تخافيش احنا قلنا لمامتك ايه اللي حصل بالظبط علشان تحكي وانت مطمنه.
جاسر: بس انت لو تعبانه يا حبيبتي بلاش تحكي حاجه وخليها بكره احنا مش مستعجلين
فرح: لا انا كويسه يا حبيبي وهقول لكم حصل ايه.. الحقيقه يا اونكل صفوت انا بعد ما وعدت حضرتك اني هلاقي متبرع او واهب اعضاء علشان جاسر حصل عكس اللي كنت عايزاه كأن الدنيا كلها وقفت قصادي وقفلتها في وشي كل ما اكلم مؤسسه لوهب الاعضاء عشان يشوفولي قلب يقولوا نستنى على قائمه الانتظار واخر فحوصات عملتها لجاسر خوفتني لحد ما جالي المتبرع اللي قلت لكم عليه لكن للاسف هو كان عنده فشل في الكبد زي ما قلت لك ومات وعلى بال ما نقلوه للمستشفى عندنا كانت الانسجه ماتت وما ينفعش ناخد القلب... وطبعا ما قدرتش اخذ منكم الامل اللي اديته ليكم تاني وكلام فادي اتكرر في دماغي انه لو يقدر يدي لاخوه قلبه ويعيش بقلبه هو الكام يوم اللي فاضلين في الدنيا كان عملها والفكره ما خرجتش من راسي لاني بحب جاسر من ثلاث سنين وما كنتش قادره اشوفه تعبان.. عرفت ان قلب جاسر عندي حسب الفحوصات يخليني اقدر اتحمل فتره اطول بكثير من الفتره اللي هو هيتحملها بس بشرط انى ابقى دايما على الاجهزه وبعد الجراحه خليت سامح يجهزلي بيها غرفه كامله في شقه رانيا مراته بالفلوس اللي اخذتها منك وفضلت قاعده مستنيه دوري على قائمه الانتظار ده اللي حصل
جاسر: خلاص انا مش عايز اسمع اي كلام ثاني عن الموضوع ده اللي عدى عدى بمره وبحلوا من دلوقتي ما فيش تعب وبعد اذنك يا حاجه نوال انا طالب منك ايد فرح وصدقيني هحطها جوه عنيا وهعوضها عن اي لحظه تعب عاشتها.
فادي: ايه ده يا عم انت فاجئتني انا كنت لسه برتب الكلام.. احم طيب وانا كمان يا حاجه نصره طالب منك ايد رحمه علشان تبقى نصى الحلو وربنا يستر عليها بقى وتعرف تخلي بالها مني ومن نفسها
( وبعد مرور سنتين كانت فرح نايمه لما لقت حد بيشد في شعرها وكانت كارما بنت فادي.
فرح: مالك يا كارما انت بتعيطي ليه يا روحي قوليلي بس بصوت واطي عشان عمو جاسر لسه نايم
( فضلت كارما تقول كلام مش مفهوم وفرح بتضحك ومش فاهمه
جاسر: انتى برده بتساليها اكيد حوار كل يوم هتلاقي فادي اكل الشيكولاته بتاعتها ونسى يجيب غيرها افتحي الدرج اللي جنبك واديها واحده وخلصينا.
( وفعلا فرح اديتها الشيكولاته اخذتها كارما ولسه واقفه ما مشيتش.
جاسر: استغفر الله العظيم على الصبح.. كده يبقى في حوار كبير انا نفسي افهم هي دي بنتي ولا بنت الحيوان اللي اسمه فادي كل يوم يسربها من بدري وتيجي تنطلي هنا.. يلا يا ستي قومي نشوف في ايه مزعل الست كارما هانم على الصبح علشان ارجع اصبح عليكى.
فرح: هههههه لسه عايز تصبح.
جاسر: لا وحياة طنط نوال لازم اصبح وربنا ما يقطعلي عاده احسن والله هسربها واقفل الباب
فرح: لا وعلى ايه تعالى نخرج نشوف الموضوع ونرجع.
(خرج جاسر وهو شايلها ونزل بيها وهو بيبرطم.
جاسر: اه منا الاسانسير اللي جابهولك ابوك يا استاذ فادي خلي عندكم دم بقى ولموا بنتكم وسيبونا ننام يا بشر
رحمه: ده جزاءنا اننا جايبينلكم خبر زين.
فادي: مش قلتلك ما يستاهلوش انا زعلت.
فرح: ما تقولوا بقى في ايه يا جماعه حرقتوا اعصابي.
صفوت: التحاليل والاشاعات بتاعتكم وصلت من شويه والدكتور كتب تقريره بانكم خلاص تقدروا تاخدوا خطوه الخلفه وما فيش خطر على فرح من الحمل بما انها يعني عملت عمليتين ورا بعض.
نوال: الف مبروك يا حبايبي ربنا يكمل فرحتكم بالخلف الصالح.
جاسر بحب: بجد يعني انا هبقى بابا مش عمو جاسر وبس وفرح هتبقى احلى ماما يا لهوي على الهنا اللي ربنا مغرقني فيه.
فرح: بالراحه يا حبيبي هيجرالك حاجه قبل ما نخلف انت مجنون كل ده عشان هنجيب نونو جميل يهبل يجنن خالص.
رحمه: كل ده وهو اللي مجنون ده انتى ضربتي يا حبيبتي.
نصره: ربنا يهنيكم يا اولاد
جاسر: انا برده مجنون بس مجنون بيكي.
فرح: بحبك.
جاسر: وانا بحبك يا ذات القلبين يا فرحة عمري.
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
