رواية ارحموني ولو رحمة مرة الفصل العاشر بقلم فراقد حسن علي
محمود /صعدت الغرفتي وحيل مخنوك
-يارب العباد خلصني ما اريد هذا الزواج
انت اعلم بكلبي بس فرح موجودة
-ثاني يوم العصر كلنا متحضرين
اني وامي وأبوي واركان
-نروح لبيت حجي نافع ابو علاء
حتى نشوف البنات ،،
-بعد ما خلصت العزيمة وطلعوا الجماعة أصدقاء ابوي العصر
وامي وأبوي كاعدين كل هذيج الساعات خططوا واتفقوا بيناتهم على كل شي
-بليل أبويه اتصل على الحجي
وبلغه على اليوم نتشاوف (يوم الرؤية)
-وانوب امي حجت ويه أم البنات وتفقن بيناتهن
البنية الجبيرة تصير حلالي
والصغيرة تصير حلال لاركان
-الجبيرة أسمها رفل مواليد ٨٧
والصغيرة إسمها رسل مواليد ٨٩
-مخلصات أثنينهن ثالث متوسط
وكاعدات بالبيت
الحجي يخاف عليهن من الاوضاع الأمنية التعبانة
-بس أني شنو حالتي ماكو البنية المجبورة والمغصوبة على الزواج من كتال ابوها
هيجي روحي وحالتي وجهي أكثر منها حزن وقهر
-أخذوني شحط رايح وياهم بالغصب عني مو با أرادتي لا فرحان ولا شي
-اااخ هسه لو محصل على فرح
أنسى الراشديات والعركات والرزايل
وعادي اوافق على معاهدات واتفاقات أبوي ويه الحجي واخذ رفل الثانية
بس اااخ عمر الامنيات ما تحققت
-وصلنه لبيت الحجي وتلكانه من الباب
طاير بجيتنه ،،
-وابنه علاء الجبير وخالد خوش شباب الله يستر عليهم تلكونه بالصلوات
-بعد السلام والضيافة والمجاملات
-اركان كاعد بصفي تكول خلفته ونسيته
يحجي همس
اركان/اكلك من هسه الحلوه اليه،،
محمود/اخذهن أثنينهن عليك بالعافية
بس خلصوني مو أختنكت
اركان/لو يصير ميخالف بس اطمئن على وضعي
يابه أتزوج أثنين ،،وثلاثه ،،
بس تمشي الامور صح
وتجي ويايه عدله
محمود/شما أشوف راح تفشلنه
وكلشي ماتدبر بيوم عرسك وبس تهوبز
هسه دبر وحدة وعود فكر بالثانية والثالثة
أركان /أفاااا اني أخوك يا أبو شكريه
هيج ضنك بخوك الملازم أبو أسلام
محمود/بس أنلصم،، ابو أسلام
من هسه خططت و تزوجت
وخلفت ولد وسميته اسلام
وانت بعدك ماشايف العروس
والله أحلامك بايخة مثل وجهك
اركان /اكول مو عبالك رزلتني ومسحت بيه الكاع !!
محمود/أنلصم وباوع اجن العرايس
-دخلن ألبنات أثنينهن،،
وامهن سمتهن بأساميهن
حتى يسلمن على أمي
-وعود حتى تنبهنه عليهن ونفرق بيناتهن
-رفل أطول من رسل
وأثنينهن حنطاويات
وحلوات مثل أغلب البنات
محتشمات ولا بسات حجاب كامل
-رفل وجهها بيضوي وعيونها واسعة
رسل وجهها مدور وخدوها متفحة
وعيونها عادية
اركان/اي نيتي صافية ام خدود حلوة اليه
وانت اخذ هذيج العيطة تتراهم وياك
وحلال عليك
محمود/راح أكسر سنونك شعدنه نشتري ساعات والحلوة الك وذيج لا
اركان/يا خويه لا تضوج بعد كلمن وقسمته
ههههههه
محمود/بس خل أوصل للبيت واني اعلمك
اركان/بس اذكرك ترى بعد ماتكدر تبسطني
التدريب العسكري حولني وحش
محمود/هسه غير يكعد ويستجن فاندام
-رجعنه للبيت والدنيا طالعه من عيني
لا مقتنع ولا موافق ولا رايد هذا الإرتباط
والايام صارت تمشي ويايه بصعوبة
صارت طافية مابيها أي الوان بعيوني
-أجى الخميس أعتبره يوم دفنتي مو يوم الخطوبة
-اكولها وما أستحي بهذاك اليوم الاكشر هلكثر بجيت طفت عيوني وروحي من البجي
-كعدت من الصبح بس ما نزلت جوة
وبقيت حابس نفسي بغرفتي
-مارحت للدوام أخذت اجازة من البارحة
-طلعت دفتر الرسم النطتنياه فرح
واباوع على كل رسمه وأتذكر ايام الصغر
ودموعي تنزل على الورقه وترطبها
-لحد يجذب عليكم ويكوللكم الولد ماينجبر
لا اني أنجبرت ووافقت غصباً عني
لخاطر أبوي أنطى حجاية وبعد
عيب يتراجع بيها
-وامنيتي أعاتب عمي نافع واكوله//شدعواك
هلكثر مليت من بناتك ومن حمل مسووليتهن
وشمرتهن براس ابوي بعنوان الهدية
-هسه منو يكول البنات قابلات
والهن نفس بينا
اني متأكد هن هم مغصوبات حالهن من حالنا
-المهم الاباء متفقين ومرتاحين بقرارهم
واني متاكد علمود مصالح الشغل
يالله شوكت نخلص من هذا الظلم للبنات وللولد
وشوكت تتخلص العالم من هاي العادات والتقاليد المتخلفة والهمجية الرجعتنا ليوره مثل بول البعير
العالم وصلت للقمر واحنا بعدنا بعهد الكهوف
-بلا وين صايرة يهدون البنات بعنوان الهدية حالهن حال اي قطعة جماد موجودة بالبيت
لو ياخذوهن فصيلة ويدفنوهن بالحياة
-ولازم الولد غصباً عنه وعن شاربه يرضى بالموجود وينسه هو عنده احساس ومشاعر او حب بحياته وباني عليه احلام وأمنيات
-سمعت امي تصيح عليه
ما اريد انزل واودع أحلى ذكريات ويه فرح كلبي
-اني رايدها بكل ما أملك من احساس ومشاعر
ومو سالفة اني أخذتها من هي طفلة لا مو هيج أحساسي
اقصد مو نظرة عطف
او حتى أخلصها من عواقب الحادثة
-صح غلطت ،، بس اني جنت طفل
يادوب داخل بمرحلة المراهقة
وهي طفلة كلشي ماتعرف وماتفتهم وأثنينا وكعنا ضحية للشيطان وسوء عناية الاهل ومراقبتهم...
-فرح أحبها من صميم روحي
وهي البنية الوحيدة اللي اخذت كلبي وعقلي سلبتني من اول ماشفتها وهي طفلة ونايمة بهذيج السلة
-يمكن على حجاية امي لان من اني طفل كالوا هي الك وهيجي أنزرعت بروحي وبكلبي
قررت ويه نفسي هسه بس خلي أرضي أبوي
ما اريد أكون ولد عاق الوالدين وبعد هذا العرس الاكشر ،اروح اتقدملها واخطبها
واكيد عمي باسم مايرفضني
-نزلت جوه بس شنو صاير كبريت
اللي يكلي شبيك
أكب عليه واحركه وياي بالنار الشاعلة بصدري
-ابوي يراقبني من بعيد البعيد وساكت وامي سوتلي ريوك بس عيونها مغوركة
-امي نفسي حالي تتمنى فرح وخواتها تكول هذني بناتي
وادري بيها تتمنى تصير قسمتي وتجي لهذا البيت بس ماتكدر تعصي أمر أبوي
-اركان بدوامه
دوامه يومي حاله حال الموظف
يطلع وياي من الصبح ويرجع للبيت وياي ندخل العصر
-بديت أتريك بس أحس اللكمة كوه تنزل من زردومي حتى استكان الجاي يشرگ بزردومي ويخنكني
-مشى الوقت بصعوبة
واني على ياساعة انفجر
وابوي مكابلني وكاعد يراقبني
كمت توضيت وصعدت فوك
صليت لوجه الله بس عقلي مو يمي
وما ادري شكول وشحجي
بس خلصت الفرض وسلمت
سجدت لربي وبجيت بجي أحس بتوت كلبي تكطعت
و مو عيب الرجال يبجي
واذا البجي يريح روحي ويحل مشكلتي مستعد يومية انصب عزه واكعد أنحب والطم
اركان رجع من وكت من الدوام
أبوي مبلغ بس عمامه يحضرون
وذمم عليهم مايبلغون عمامي
اجه عمي نوري واسحاق وحامد واولادهم
واجه وياهم جدي سليم وجديتي صفية
وخوالي عمر و محسن و حيدر
وخالاتي اللي بغداد مشن ويه امي
وكم واحد من الاصدقاء المقربين على ابوي
((هنا كوثر عرفت بخطوبة محمود بس ما كدرت تبلغ فرح ))
اركان/محمود كول يالله يمعود
مدكولي شبيك ماد البوز شبر
محمود/اركان انت مو تحب منى ليش تقشمر على روحك
اركان/الصدك ما اعرف احبها لو لا
يعني هواي اتذكرها من هي طفلة
بس ماعندي مشاعر تجاهها
ولا اتمناها زوجة وتشاركني بحياتي
-اركان حب الطفولة ماينسي
لا تقشمر على نفسك
هذا الحب الاولي بعد أنقش بالكلب
اركان/يعني هسه شلون نكسر كلمة أبويه
ونطلع عن شوره ،، وهو وامي يباوعولنا
مثل هلال العيد
محمود/لا يابه منو كال هيج
بعد كل هاي تربيتهم وتعبهم
نصير جحودين ونطلع عن شورهم
وبالاخير نطلع عاقين الوالدين
-أسلم امري لله وهو بعد أرحم واللطف
من أمي وأبويه بحالي وبحالك
اركان /ونعم بالله
-اكول ياقاط راح تلبس؟؟
محمود/البس القاط الحبري
وانت؟؟
اركان/الاسود ،،بس انطيني ألرباط الاسود
مابيه حيل اكعد اكوي
والحجي هو الاصر على عقد الشيخ
علمود نكدر نروح ونرجع عليهم
-بس مالبسنا لا ذهب ولا اكو حلفة
كنالهم بيوم الحنة كلها تصير سوه
-دخلنا نشوف البنات
-المعجبني اركان احسه لا ضايج ولا فرحان
شي عادي عنده
-بس اني وجهي ينقري
من بعيد ضايج ومخنوك
-كاعدات البنات بالهول يم امي وخالاتي
وامهن وخالاتهن وعماتهن موجودات
وجديتي صفية كامت تهوس وتبوس بينا
-البنات لابسات ملابس مرتبة
فساتين محتشمة وحجاب ومكياج بسيط
-امي سوت النا مكان كعدت يم رفل
واركان يم رسل
-حتى لو واحد يريد يسولف يسكت أحسن
لان كلهم مركزين ويانه
وماخذين وضعية الزوم بالنظر
-لا حاجيت رفل ولا سولفت وياها
حتى مالتفت عليها بحجة خجلان منها
-اركان الخبيث يغمزلي ويضحك
هسه من اكوم أخنكة احد يكولي ليش
-رجعنا البيت وابوي هو المستعجل
على العرس مو أحنا
-حدد ويه الحجي الاسبوع الجاي العرس
-يابه متكولي شنو هل الاستعجال
ليش هيج تركض ركض
-وامك وخالاتك ياخذن البنات وامهن
يجهزنهن ذهب وملابس
-الخميس الدخلة
عزمت اصدقائي وعمامي واولادهم وخوالك
وكلشي تم
محمود/يابه صدك جذب شنو احنه مالنا قرار
عادل/محمود لا تخليني اهينك تنفذ وتسكت
محمود/يااااااارب رحمتك
-الاحد رحنا للمحكمة عقدنه على المسائي
لان العقد على الصباحي يطول
بس بالمسائي لان بيها دفع فلوس نعقد بنفس اليوم
-اركان راح لشارع قطر الندى اختار غرفتين
خشب صاج يعني شغل عراقي بس علساس
بنقش وبتصميم حديث
-وهاي امي من تروح لبيت الحجي ننساها
لليل يلا يروح واحد من عدنه يجبها
-ربي ينطيها العافية كملت كل الشغل هي وخالاتي من شراية الذهب وملابس البنات
وتاجير البدلات والصالون
-تكول البنات وامهن كلش حبابات وابد مايطلبن ولا يشرطن
-اني من يوم العقد ابد ماوصلت البيت الحجي غير بيوم عقد المحكمة اخذت رفل بسيارتي من الباب
واركان اخذ رسل بسيارته
-اركان يمكن راح مرتين لو ثلاث مرات
بحجة يجيب امي ويوديها بس يحصل فرص
بس اني ما اريد اوصل لا هسه ولا بعدين
واليوم اربعاء يوم الحنة لا بل يوم التشيع
وشكد تمنيت يحضرون عمامي بس أبوي
ما بلغهم ولا يريد جيتهم
-بس اني وين شارد لغير عالم
اي واحد يشوفني يسألني شبيك ضايج
ليش ماتضحك شبيك ما فرحان
اتحججت معدتي مخربطة ومالي خلك
-رحنا لبيت الحجي علمود نلبس البنات الذهب
من دخلنا أثنينهن كاعدات بالديوانية وحدة بصف الثانية بدلاتنهن مستورة
وشامرين على روسهن حجاب ابيض جبير
اركان/هههه شو هذن كاعدات سويه
هسه نشتبه بيناتهن
محمود/لا تصير خفيف
هذيج مرتك مبيه اكصر من رفل
روح اكعد يمها من هذاك الطرف
-البنات كاعدات وحده بصف الثانية
اركان كعد على جهة ايد رسل اليمنى
واني كعدت على جهة ايد رفل اليسره
-بعد الهوسة والهلاهل جابوا الذهب
-والنسوان مكومات فوك راسي ثولني
وحدتهن صارت أينشتاين براسي
سوي هيجي ولبس هيجي
-بعدها جابوا صواني الحنة
وخالتي (بشيرة) حنت البنات
وحنتنا وياهن
لان هي مراه طيبة وحاجة بيت الله ورايحة مرتين للعمرة
وموظفة ومرتاحة بعيشتها
يعني عود كرفتها زينة
-ثاني يوم الخميس يوم الدفن مو يوم العرس
اباوع على الناس كلها مخبوصة
بس اني مشاعري جامدة
ما رايد هذا العرس كله
مو هاي العروس اللي أتمناها
طلعت سيارات الزفة
سيارتي مشتريها جديد (سوزوكي)
زروقوها الشباب
-وسيارة اركان (سنتافي) هم جديدة هم زروقها
-صار الاتفاق كل واحد ياخذ عروسته بسيارته والزفة ترجع للبيت
-دخلنه هوسات وهلاهل
والله نسوان تكول ديوجه وتعوعي
-شايفين الديج اول ميتراهق
شلون يصير صوته من يبلش يعوعي هيج صوت هلاهلهن
-اخذنا العرايس وسلمنا على الحجي وتشكرنا من عنده ومن اخوانهن وطلعنا
اخذنه فره بشوارع بغداد ورجعنا للبيت
-انوب البنية مكمطاتها من فوك ليجوه
كلساع مجبوحة ومجلبة بيدي
اشحط بيها شحط كلشي ما تشوف
هسه لو ملبساتها بوشية مو ارحملها
-بس دخلتها كعدتها بالديوانية وطفرت للشارع
كعدت يم جماعتي
اباوع الكل فرحان وهوسه وضحك وسوالف
بس اني حتى ملامحي جامدة
بعد ما كمل العشى كل العالم طشت
-اللي مكانهم شويه بعيد رجعوا لبيوتهم
لان فد شويه حضر التجوال
والباقين الاقرباء اللي بقوا ابوي شحتهم لبيت جدي سليم
-هنا دكت ساعة الصفر ..
وزفونا كل واحد لغرفته
-بقوا بالبيت الجوه بس امي وام البنات
وخالتهن وجديتي صفية
وابويه وجدي سليم
-ما استحي من ان اذكر هذا الشي
الصراحة مالي نفس بالبنية حتى ما باوعتلها بنظرة غريزة شاب واليوم عرسه
ومتلهف لموضوع العرس
-يالله ،،يابه اخذي راحتج بدلي
بس سوال انتي تعرفين موضوع العرس
محمود /رفل ترى اني تعبان ومالي خلك
معدتي مخربطة مو يظل بالج
والايام الجاية هواي كدامنا
اخذي راحتج بدلي وارتاحي
رفل/هاا ،،اي ،،بكيفك
بس دير وجهك اريد ابدل
محمود/بس هسه دقايق بس ادخن واخلص جكارتي واطلع اسبح
وانتي بدلي براحتج
-ياربي رحمتك هلكد ما مخنوك
منين ما اباوعلها مالي نفس بيها
كلت انطي لنفس فرصة
وابقى كاعد ادخن جكارة واتفرج عليها
بلكت تتحرك مشاعري شويه تجاها
ماكو قفلت ،،ربي رحمتك
كل ما اباوع عليها يجي بالى يوم حادثة فرح ونظرات عيونها ،، وشلون تنزل دموعها على وجهها وشلون اجرمت بيها وسديت حلكها بيدي
تلكاني ابوي يباوع بوجهي
ويحجي بصوت ناصي
عادل/هاا بويه بشر ،، شبسرعة نزلت
محمود/ماكو شي يابه
نزلت اسبح دبكت
عادل/شنو كلشي ماسويت ؟؟
وتركت بنت الوادم وحدها ؟؟
-ومنين دبكت ول الجو بارد منين جاك الدبك
محمود/يابه اني كتلك وحلفتلك
ما اطخها وما أوصل صوبها
عادل/محمود لا تخليني هسه اتخبل عليك
واهينك جدام امك وجديتك والنسوان الغربه
-هسه تصعد تاخذ مرتك لو اليه حساب ثاني وياك
عادل/لا اله الا الله
يابه انت تريد الوادم تاكل وجهي
امها وخالتها منتظرات يردن ياخذن بياض البنات ويمشن
-اصعد بويه لمريتك لو هسه اهج من البيت
وماارضى عنك ليوم الدين
محمود/عاد بس خلي اسبح شطلعت هاي
كلشي عندك غصب وأجبار
عادل/اسمعني وليدي من الاخير كلمة وحده وما تصير أثنين الك بس ساعة وحده
وينزل بياض البت بيد أمها
محمود/ررررررربي رحمتك
-دخلت للحمام سبحت وطلعت
صعدت فوك صار بوجهي اركان
اركان/هاا أبو شكرية بشر
مووو جنك مستعجل وانت الضايج ول شبسرعة غسلت
محمود/اكول ماتاكل تبن أحسن
اركان/شكو شبيك
محمود/أخوك مخليله كافور
اركان /لا بربك ليش ،،شصار
محمود/اركان افهمني ما راغب للبنية
كلشي ما صخمت
-وانت هم مخليلك كافور؟؟
اركان/أفااا عليك أخوك ذيب ودبرها
-بس الصراحة هي الخوش وساعدتني ويغمزلي الناقص
محمود/بالمبارك عليك بالرفاه والبنين
تستاهل كل خير
نزل يصيح لامي تجي علمود البنية
-دخلت للغرفة واشوف رفل مبدله ملابسها
لابسه الملابس البيضة وحاله شعرها
وماسحة مكياجها
ملامحها مرتبة بنية عادية وتعجب اي شاب
بس اني منو اليقنع كلبي وعقلي عليها
تمشيت فتحت المجر واخذت حباية
هذا هو الحل النهائي
لان خلصت ويايه جميع حلول الأرض
-سمعت صوت الهلاهل من غرفه أركان
-لكيتها بعد حجة لان أستحي اتراجع بكلامي
وشريد اكول للبينة اني مجبور ومغصوب عليج وما أشتهيتج ومهزوم منج
-رفل تسمعين صوت الهلاهل
امج وخالتج جوه منتظرات
ساعديني نخلص الموضوع
لان الصراحة تعبان اكثر منج
-شفتها رجعت ارتبكت وكامت ترجف
ولا جنها قبل دقايق جانت هاديه
-اتقربت عليها واحس كل خطوة وكل حركة تاخذ سنين من عمري
وااااخ ياضيم روحي
-هسه حتى الاسولفله واكوله مجبور مايصدك
ويكولي وين اكو ولد ينجبر على الزواج
بس الصراحة هذا الصار ويايه
-مر الوقت بعذاب جسدي ونفسي اليه
-بكثر هذا العذاب المريت بي بهذيج الساعة
بكثر ماجنت خايف على رفل من ألاذية والوجع لان هي ما ألها ذنب بأي شي
-بدلت ملابسي
تركتها وطلعت من سردابي مو غرفتي
-بعد ما اطمئنيت عليها وتأكدت مابيها شي
نزلت وصحت أمي تصعد تشوفها
دخلت من الهول وطلعت للشارع
ما اريد ادخل للاستقبال واشوف أبوي
اخذت سيارتي وبقيت افتر بشوارع بغداد
اخذتني الطرق ولباب المعظم
للخضر عليه السلام
ركنت سيارتي وكعدت على الشط
-بهذيج الليلة البجي البجيته يمكن بكثر هذا الشط وأكثر
حسيت روحي مجرم
-اول شي جرمت بحق روحي وحسيت نفسي خائن لان ماصنت الحب والوعد
-ثاني شي والاهم كل مااتذكر سوايتي بفرح تطلع روحي مني
-وانوب جرمت بحال بنت الناس الما ألها ذنب بشي
-للصبح يلا رجعت للبيت
ما كدرت ارجع بسبب حضر التجوال
وهم اريد انفه عن روحي بقيت كاعد بمكاني
-بس دخلت حصلت هذاك الراشدي من أبوي
-يلا تعلمت على الرزايل والضرب
بقت على هذا الراشدي
-ام علاء واختها رايحات موصلهن جدي سليمً
-امي متخربطة لان باقين بقلق عليه
يتصلون عليه جهازي موجود بالغرفة
رفل كايلتلها معدتي توجعني ومالي خلك
وعبالهم رحت للمستشفى
بس ابوي ماعبرت عليه سالفة
-ثلاث ايام وكطعت اجازتي وداومت
ورفل بعد ماتقربتلها من يوم الدخلة
اعرف مالها ذنب بس مو بيدي
-مرت الايام والاسابيع وسمعتها تشكي لامي
تكولها//يجيبلي ويطلعني ويشتريلي
وماقصر ويايه بشي بس ابد مايتقربلي
وليش يفرش بالكاع وينام
-وهذا الصحيح بكلشي ماقصرت عليها
بس ما اكدر اتقربلها سالفة مو بيدي
سامعين عربي وقفل على شي
اني عربي وفلاح ابن فلاح عقلي وكلبي وجسمي قفلن على فرح
-اريد بس شويه يتعد الوكت واروح أخطبها
فرح اليه ومتصير الغيري
لو اعرف انزف للكبر اني وياها
-ما شاء الله رسل شهرين وبشرت امي
بخبر حملها ،،
-ورفل بهذاك اليوم ماتت من البجي
انقهرت عليها،،واحجيها بصراحة وما اجذب
من هذيج الساعة كسرت خاطري
قررت اتقرب منها وكد تصير حامل واتركها
على الأقل من يصير عدها طفل تلتهي وياه
-بس شلون اتقربلها والشي مو بيدي
صفنت ولكيت حل جايف ما يرضى لا الله ولا عباده بس ماعندي حل ثاني
كمت أحمل مقاطع فيديو انقلها منا ومناك عن طريق البلوتوث واتفرج عليها حتى تثيرني
واخذلي حباية يلا اكدر اتقربلها
-بس شنو اذا تقربتلها بالشهر مرة أو مرتين
هذا من حسن حظها
-وبهذاك اليوم الجو بارد
وقبل العشة ساعة ب ٨ اكثر أقل مااتذكر زين
جنت كاعد جوه أسولف ويه أبوي
عن اوضاع العراق التعبانة
-يعني اذا افوت من أي سيطرة مدنية لو عسكرية وكالولي هويتك
ولقبي مكتوب بيها الجبوري
-اركز على الحجي اذا الجماعة من اهل ابوي
اكلهم جبوري من البو طعمة
-واذا من اهل امي أكلهم جبوري من الواوي
وهو نفس اللقب الجبوري بس يشتغل على الجهتين
الك الله يالعراقي
-والحمد لله أخلص روحي من سوالف ما يدري شنو وراها بس رب العباد
-أمي ورفل كاعدات يم الصوبة يلفن كبة ويسولفن ويتفرجن على التلفزيون
شلون يفتهمن ويركزن ما ادري
-اركان جان ماخذ رسل للدكتورة عدها مراجعه طبية علمود حملها
-مااحس الا اركان دخل للهول عاصفة رعدية
وجيت عليه دك بوكسات يصرخ يكول
-يالنذذذذل فرح مااااتت بسببك
يوووول يالسكط عمااامي عدومها من ورااااك ..........
شكرا لزيارتكم عالم روايات سكيرهوم
