رواية ارحموني ولو رحمة مرة الفصل الثاني عشر 12 بقلم فراقد حسن علي

اركان/يالله ،،السلام عليكم 

-شلونكم يالربع 

-اتوقع عرفتوا أغلب قصة حياتي 

من ظلعي وأخويه الزين أبو شكريه 

-عرفتوا ماعندي بعد أخوه أو أخوات 

الحمد لله على نعمة الاخوة

أبو شكرية بالنسبة اليه عشيرة من ألاخوان 

-مرات الواحد عنده عدة وعدد من الاخوه والخوات بس بوكت الضيج تلكاهم تبخروا 

-((الخوه مو بالعدد الخوه رفعة راس

يوسف اخوته أحدعش وحسين بس عباس

-عباس روح وقلب وجفوف وعين ورأس

لحسين واحد قضى وحسين اعز الناس))

-من أني وصغير هواي أميل لامي وأهلها وطائفتها

-الحمد لله مو طائفي ولا أفرق بين المذاهب 

زلمه تفكيري معتدل 

بس كلبي تعلك بأهل أمي

- واذا أحلف واكون مضطر 

أحلف بغيره ونخوة ألعباس أبو فاضل

-والصراحة أحب خوالي وأهل أمي 

أكثر من عمامي وأهل أبوي

-من صغري واني حرك مشعوذ

مااعرف اكعد مستجن ،،

لازم أسويلي مكسوره مو بيدي 

-حتى بالدراسة هو يفتهم بالدوس العلمية 

-واني مالي خلك لا بالعلمية ولا بالأدبية 

بس أقرا وأطلع كبل 

-المشكلة الصارت ويه أبوي وعمامي اني واعيها واتذكرها جنت بالمدرسة مو صغير 

-هواي حزت بنفسي 

وشلت بكلبي على عمامي

لان هانوا أبوي وهو جبيرهم 

-صح أبوي تلاغه ويه عمي محمد 

بس عمي باسم وعمي أحمد 

عبالك سالفة الورث صارت لمصلحتهم 

وأجت من جانبهم 

حتى ماوكفوا بوجه عمي محمد وردعوا 

وبتالي أبوي طلع بوز الگبح

-من شلنا لبغداد هواي أكتسبت أمور زينة

بعد مادقوا كلبي بكلمة ألمحافظات

عرب جول لو العربان 

-صديقي سيف قنعني ندخل للكلية العسكرية سويه وعجبتني الفكرة مابيه حيل أقر وامتحن وأشخبط

-صح بالكلية العسكرية اكو أمتحانات 

بس مو مثل باقي الكليات 

هنا المتغلب التدريب والحركة والانضباط 

-اني اعتبر أبوي هو أول مدرب عسكري اليه

من الصغر ويطبكلي الحزام

ويسوي بي صوت يرهب ويجلدني 

شويه أبجي أمي تنقهر عليه تراضيني وتغسل مكان الضربة بالمي 

اكوم أدبج ولا عبالك هسه أنجلدت 

-الحمد لله تخرجت من الكلية العسكرية ضابط برتبة ملازم 

-مااريد أجذب عليكم وأصير بروسكم 

زلمه خير وماكو مني نسخة ثانية 

-اول شي سالفة الشرب أبد ماوصلتها

ولا حتى جربت او فكرت اشرب 

مو خوف لو مستحى من بشر 

بس خوف واحترام ربي عندي فوق كل شي 

من صغري امي علمت أبويه شكرية على الصلاة واني تعلمت وياه 

ومن هذاك الوقت الحمد لله مستمر بصلاتي 

-ثاني سالفة اول ماتخرجت جماعتي سولهم

حفلة وجابوا شرب وبنات بشقة تابعة لصاحبنا

-يعرفوني ما اشرب ويسموني المومن 

لان ملتزم بصلاتي وما افوت فرض 

-عرضوا عليه البنات وكالوا جرب 

وحالي حال كل شاب مامتقرب قبل لبنية

ويشوفها فرصة وأجت لعنده 

والشيطان دك وركص بعقلي 

وافقت وكتلهم اجرب 

دخلت للغرفة بنفس الشقة 

والبنية موجودة جوه 

-من تقربتلها بلهفة شاب ماشايف ومهيف 

واول مره ينجمع ويه بنية وشيطان يردح بعقله 

-يادوب حظنه وبوسه لعبت روحي منها ونفرتها

يكرم طاري اسم الله ذبيت من راسي

-تخيلتها شلون هذا الكلاص المربوط بحبل 

بالبرادات مال المي البشارع مي سبيل 

وياهو الجاي شارب منه 

الوسخ والنظيف والمريض والصاحي 

هيج تخيلتها 

وانوب شميت بيها ريحة تلعب النفس 

اطر خشم الميت وتصحي من كبره 

عجيب شلون الباقين متقبليها 

-تركتها وطلعت من الغرفة ومن الشقة كلها 

من أنعل أبوك لا بو اليصاحبكم 

صدك لو كالوا الصاحب ساحب 

-عاد الحمد لله من وره هاي المهزلة 

أختاريت أثنين أصدقاء نفس شمرتي 

ونفس طبعي

-بيوم أبوي سوه عزيمة فرحة تخرجنا 

صديقه حجي نافع هدالنا بناته 

بس ماعتبرناهن هدية ابد 

رحنا على حسب الاصول مشية زلم 

وذهب ،،وجهاز ،، وأخشاب 

حالهن من حال باقي كل البنات 

ولو هي معروفة الهدية ياخذوها بعباتها 

حالها من حال الفصلية 

بس هذا الفعل مو من شيمنا 

-ومن أبوي عرض علينا البنات للزواج

وافقت عادي لا أحب ولا أكره 

المهم مراه ويايه ونس بغرفتي 

وتشاركني بحياتي

-بيوم العرس جنت شويه خايف ومرتبك

لان اعرف الاكل يخلون النه بي كافور 

واكيد كل واحد يعرف نفسه 

-بس الحمد لله سيطرت على أموري 

ورسل هم جانت شوية جريئة 

شحطتني قبل مااشحطها 

وسوتلي واهس وشجعتني

-الحمد لله رسل خوش بنية ومطيعة 

من أول يوم صكرتها ،،بس أعيط بيهاصوت واحد تخنس

-عكس أختها رفل شكد تنك وتحجي 

ولو مو صوجها صوج الرابطها 

تاركها براحتها تصول وتجول 

-وكم مره أسمعها تشكي وتبجي لاختها

على أهماله الها ،،وحتى شكت لامي 

-اني اعرف مثل مايعرف كل زلمه من عدنا

اذا واحدنا أنجبر على شي يصير يكرهه 

وبالذات أذا أنجبر على مراه 

وحده من الأثنين 

- لو يجرم بحالها ويأذيها وضرب وشتم وأهاين 

-لو يموت من ناحيتها ويصير بارد وياها 

نفس حال أبو شكرية

-ابو شكرية مصيبته مصيبة 

واحنا اصدقاء قبل لا نكون أخوان 

كلشي نسولف بيناتنا ومانضم شي على بعضنا 

مايرغبلها ابددد اذا ما يبلع ويتفرج مقاطع 

يعني رغبته تجاه البنية صفر 

-ما اعرف ألوم منو 

وأشمر الصوج على منو

وخطيتهم اثنينهم بركبة منو 

-اني الحمد لله من تزوجت خلصت من سالفة المقاطع اللي جنت أتفرج عليها حالي حال أي شاب عزابي بس بعد عليش أتفرج عليها وعندي مرتي مكفيتني

-رسل بيوم الفرحتني بخبر حملها 

طرت بيها من الفرح 

-رسل كلش أحترمها واقدرها ونعم الزوجة 

الله يكومها إليه بسلامة 

وأشيل وليدي بين ايديه 

-بس القهرني رفل بهذاك اليوم شلون بجت من القهر مدكولي منين تحبل واخوي هاجرها ونايم بالكاع 

وبعدها شلون تراقب أختها من تتوحم 

ومن وتكبر بطنها ،، صح أهتمت بيها 

بس مبين عليها تتمنى الطفل 

وحقها حالها من حال أي بنية تريد تصير أم 

-وكل شهر أخذ رسل للمراجعة الطبية 

هم أطمئن عليها وهم أطمئن على أبني 

-بيها ولد وناوي من يجي بسلامة اسمي ( أسلام )

-وبيوم وديتها لدكتورتها جانت بنهاية الشهر الثامن

-دك تلفوني عمي أحمد 

ورزلتني كوثر رزالة معتبرة 

-الصدك حتى هل كوثر ما اتذكر شكلها زين 

مو لسان لا بلدوزر وكام يسحك 

يابه فورت دمي 

-اني مشكلتي أعصاب بسرعة أكب وأفور

ويطفى عندي الضوه تصير الدنيا ظلمة بعيني 

أفقد من الاعصاب أكوم أكسر واعيط واصيح وافشر واسب كلشي مو زين اسوي من أتعصب

بس وره شوية من ابرد وتروح عاصفة الاعصاب لو المتعارك ويايه يريد قميصي انزعه وانطي من طيب خاطر 

-عكس أبو شكرية يبقى محافظ على هدوئه

وبارد وثگيل وحتى لو سولف برزانة لو شكد 

مجان الموقف يحرك الواحد 

-اني احسده بس على برود اعصابه بهيجي مواقف اللي تحتاج هوسة ومعارك 

بس بي طبع مو حلو يجمع السوالف والاحداث وبعدها ينفجر ويهجم الدنيا 

-من رجعت للبيت وأفتهمت موضوع فرح 

نار وتاكل بصدري 

هسه شسوي اعدم اخوي على فعل المراهقة 

لو الوم أبوي الكطع فرد كطعة من عمامي 

لو ارجع الومه واعاتبه الف مرة عارك محمود وضربه لان يريد فرح ...

محمود /صحت على أركان 

-ااااااارررررركاااااان 

-صعدلي يركض ،،

-هاا شبيك 

-رايح لبيت عمي باسم ،،

تمشي وياي أخلص فرح من ورطتها 

لو أروح وحدي 

اركان/امشي وياك اكيد هاي أختي وبنت عمي 

-((يالخوتك عالراس تاج ولبسته 

ولو يوم اخاوي أثنين هم أنته وأنته)) 

-انتظرني بس ابدل واجيب سلاحي واجي

-وين سلاحك ؟؟أخذه وياك كولشي يصير

-رجعت للكومدي أخذت المسدس وحطيته بحزامي ليوره بظهري وعدلت سترتي السودة ونزلت

-تلكتني أمي ،،من شافتني متعصب 

وقافل على الطلعه 

لزمت باب الهول وكفت معترضه طريقي

فاطمة/يا أبن بطني ما اخليك تطلع 

اذا ماتفهمني شنو سالفتك 

لو هسه اطلع للعالم مفرعة واخلي النذل والدوني يتفرج على حالي 

اركان /نزلت ركض يادوب بس لبست 

بلوز واخذت الستره ،،وسلاحي بحزامي 

-شفت أمي سادة باب الهول

ومعترضة طريق محمود 

أبويه ماموجود يمكن بالتواليت

-ورفل حارت برسل تلوب من بطنها توجعها

ما اعرف شبيها و شصارلها 

الدكتورة كالتلها//بعد كدامج فد أسبوعين على الولادة 

-ها أبو شكرية اني جاهز نمشي

-يمه ديري بالج على مريتي 

شو مالها خلك وتكول بطني توجعني

فاطمة/لا تخبلوني وين ماشين 

بعد شويه راح يبدي حضر تجوال 

وين رايحين لا تخلوني أشك ثوبي 

عاااادل ووووينك عاااادل تعال شوف ضيم ولدك عليه 

محمود/الله يخليج خلينا نمش نولي للمحمودية لبيت جدي ناصر 

فاطمه/بس فهمني شبيك 

شعندك 

شنو سالفتك مو راح تخبلتي 

محمود/امي فقدت أعصابها وكامت تطلم على وجهها ،، لزمتها من أيديها بلكوة سيطرت عليها حظنتها وقفلت عليها بيدي 

-يمه الله يخليج بس أعصابج لا تتخربطين هسه بس اكعدي واني اسولفج كل السالفة 

عادل/اي بويه ترى ضغطي صعد 

وتخربطت أحوالي ورحت ذبيت من راسي سولفلي العندك خل أفتهم راسي من رجليه

محمود/كعدنا كلنا بالهول اني و اركان. وابوي وامي 

بعد ما اركان صعد البنات فوك بغرفته وقفل عليهن الباب ونزل المفتاح بيده 

ما يريدهن يسمعن كل التفاصيل 

وهم مرته مالها خلك ما اعرف شجاها 

شكلها على يا دقيقة تولد 

-يابه السالفة كارثة بحق فرح 

وبحق نفسي 

وبحق الطفولة 

-من جنت طالب بالمتوسطة يعني بداية مراهقتي

-العفو يابه من هل كلمة ،،

بهذيج الليلة من جنا أنام يمكم بالغرفة 

شفتكم بموقف الحالة الزوجية

-وهاي الصورة طبعت براسي 

وبقت تنعاد يومية بفكري 

دمرني الفضول شنو اللي يصير وياكم 

وكل ماتنعاد الصورة يذبحني الفضول اكثر 

واريد أجرب واطبق الشفته 

-بيوم وزني الشيطان ،،وذبحني الفضول

صارت فرح كدامي جانت بعدها طفلة 

عمرها ٤ لو ٥ سنوات 

-حبستها بغرفة المخزن وجرمت بحالها

وصارت سالفة واخذتها 

فاطمه/يماااااا دخيلك ياعلي 

أحضرني يبو الشدات 

-يعني صخمت كصة البنية 

ليش ماحجيت ليش ما سولفت بكل هاي السنين المضت

عادل/من أنعل أبوك لا ابو أهلك لا أبو الخلفوك

ياعار ياأبن العار 

-شكو ساكت ومخلي قندره بحلكك كل هلسنين المضت 

محمود/يابه جنت صغير واخاف أحجي 

صح جنت اعرف الشي سويته غلط 

بس ما فاهم بالصورة المضبوطة 

-ومن خلصت سادس وردت أخطبها 

انت ضربتني ولعب بيه طنب 

وكتلي اتبره منك وتشيل فرح من راسك 

وبكل أيام وسنوات الكلية يومية افتح الموضوع وياك وانت حاير بس تكفخ وترزل 

-وانوب زوجتني بالغصب 

والف مرة كتلك فرح اليه ومتصير الغيري 

-وماكدرت احجي كلت خاف افضحها وعمامي يذبحوها

-واني اصلا ناوي اتزوجها واخطبها 

مو بالقصد اصلح السالفة لا 

بس احبها يابه تفهم شنو احبها 

-واني اصلا ماناسي الموضوع 

وهواي بحثت عنه بمجال الطب

وحتى سألت دكتورة أستاذة جبيرة بالطب النسائي بس كتلها أبن اخويه 

أستحيت اكوللها اني من جنت طفل

-كالت /ماكو اي شكال 

وتكدر البنية تزوج عادي من تكبر 

لان بعدها طفلة وهو طفل 

واعضائهم التناسلية غير مكتملة 

وغشاء الطفلة يرجع يألتأم بمرور الزمن

-فلهذا أني محسب أحساب لكلشي

وفرح اليه وماتصير الغيري 

واتزوجها وغصباً عن الكل 

-واذا بعد قسمة الله ما مكتوبة نكون سويه

حتلو أتزوجت ما عليها شي 

فرح باكر وغشاء البنات موجود عدها 

وانتم بعد الكم ألفهم 

عادل /من تف عليك وعلى الخلفوك ياعار 

-شوف يالنذل بنت عمك انت تستر عليها

-مالي علاقة بهاي سوالف الطب مالتكم 

مادام طلع دم هاي هيه يعني أنفض بياضها

-مو تروح تاخذ الغريب

وما ادري تصيب لو تخيب وياها

وتنذبح البت و روح اهلي اذبحك وراها

-انطيني تلفوني من يمك من لا بارك الله بهاي 

خلقتك ،، تف عليك ياجلب 

محمود /يابه أحسن قرار أتخذه بحباتك 

اني السالفة ردتها من الله أجتني من عبد الله 

عادل/تف عليك هاي مره ثانية ياجلب يا أبن الجلب تكفى شري ترى أكوم اكطع القندرة على راسك

كوم من كدامي ترى بيني وبين الخبال شعره 

محمود/أتصل ابوي على الحجي أبو البنات 

وكاله متخربط اريدك تمر بيه هسه

-صدك ماكو اقل نص ساعة 

واجه الحجي واولاده علاء وخالد

-وبأسلوبه الناعم يسولف 

والحجي والولد يسمعون

-ولو بنتك تقبل تنذبح ،،ومالهم ذنب 

وأثنينهم جهال ومايعرفون 

-واني خجلان منك بس لازم سالفة هيجي تنحل حتى ما تنكشف البنية وخطية تنذبح 

-وما اعرف وين أضم روحي منك 

واريد منك السموحة حتى محمود يستر على بت عمه 

وانت اخوي ما اضم عليك شي وهل بلغتك 

كلت خاف يصير بالكم عليش تزوج على رفل

وبتكم مابيها اي قصور 

-وسالفة بعد صارت وكلنا مجبورين على حلها

-وحجي نافع گب وصار 

حامي الولايه على كولت اخوانه المصريين

حجي نافع /توكل بالله ،،وروح وكف البت 

واني وياكم أسترها

وعرضكم هو عرضي 

-ورفل كلبت الدنيا بالبجي والصريخ

وتصيح//ما اقبل يتزوج عليه 

اذا يتزوجها يطلكني 

-وامي تهدي بيها وتبرد الموضوع

تكلها /يااا ولج خالة بالجذب بس كدام العالم يتزوجها حتى لا تنفضح ويذبحوها خطية طفلة شنو ذبها

-ورسل تلوب وتبجي ما ادري خايفة 

ما ادري متوجعة

اركان حار بيها ويريد بس يعرف شنو سالفتها

هواي يحترمها ويخاف على ابنه

-امي اخذتهن ودخلتهن بغرفتها تهدي بيهن

-عاد الحجي اقترح كال /هسه ماتلحكون توصلون حضر التجوال والطريق مو أمان 

من الغبشة اطلعو وحجزوها

وانت عمي محمود باوع عليه 

أنت ابن عمها انهي عليها وحجزها 

أنت اولى بيها من الغريب 

حتلو مابيها شئ هي من حكك 

-وأخوك يوكف بظهرك أنهي على البت وخلصها

والليل كله بيتنا مكلوب عزه 

رفل تبجي لان راح اخذ عليها فرح 

-ورسل تبجي بطنها توجعها ومو وكت ولادتها

-بس شع ضوة الفجر اركان اخذ البنات لبيت أهلهن 

-ابوي وامي متحضرين يمشون ويانه

بس رجع اركان طلعنا كل احنا بسيارته

-حظي المصخم وين نايم 

الامريكان كاطعين الطريق 

لان المجاهدين زارعيلهم ألغام بالطريق

اركان/ما الوم أخوي من جان طفل لان مايفهم شنو سالفة 

-بس الومه من كبر ليش ماحجي بالموضوع 

ولو حقه يكول اخاف عليها تنفضح وهاي سالفة شرف

وهو بعد سائل عن الموضوع ومطمئن عليها 

-بس ألوم ابوي كطع فرد كطعة 

ويه عمامي ومخلاله درب رجعة 

-وكم مره محمود يكوله اريد فرح واحبها 

ومتصير الغيري 

-هو يعاركه ويصيح اتبره منك 

وأخلي بيك صواب وأشمرك للجلاب

-زين هسه يابه

الا بهاي الحالة يلا وافقت 

هم خلف الله عليك من وافقت وفزعت لفرح 

-محمود جايب باجك لو لا

محمود/اي جايبه ،،ليش

اركان/تعال انزل ويايه حاجيهم 

تدريني بالانكليزي فول بس مااحب 

انكس الساني واسولف وياهم 

محمود/اي اعرفكم بلبل تغرد بريطاني

-شكلهم بلا لو نزلنه

اركان/اني اطلع باجي 

وانت هم طلع باجك

كلهم عدنا حالة طارئة بالمحمودية 

-نزلنا ورحنا عليهم موجهين أسلحتهم على العالم واغلبهم زنوج واحدهم حايط واكف 

وبلاجمه مادهن شبر

-تقدم عليهم محمود يحاجيهم 

وهم اخذوا ونطوه وياه بالحجي

-طلعلهم الباج وعرفوا طبيب 

وكاللهم عدنا حالة طارئة بس سهلوا امرنا 

وبس سيارتنا تطلع 

-اني هم طلعت باجي ونافخ ريشاتي 

ضابط وبالجيش العراقي وكذا 

شو هذوله كاموا يعفطولي ،،

أحترموا محمود أكثر مني لان طبيب 

خل أضم باجي وانلصم 

أحسن ما أهوبز عليهم 

-للظهر يلا وصلنا لبيت جدي 

-ومن دخلنا اااخ ياذكريات الطفولة 

هنا كعدنا ،،وهنا لعبنا 

وهنا أكلنا ،،وهنا حجينا 

-دخلت امي فاطمه أول شي 

وبعدها دخل ابوي ومحمود واني 

-خاله سهام وخاله هناء وعماتي 

من شافن أمي كامن يصرخن ويبجن 

-وعماتي نامن بركبة أبوي وبجي ونحيب

وشوية ولن طبوا عمامي ثلاثتهم 

بقوا مصكوكين باب الهول 

عمي باسم شبك أبوي وثنينهم يصرخون 

وصوت بجيهم أعلى من صوت بجي النسوان

-انوب أبوي هو تقدم وحظن عمي محمد 

وهنا الكارثة عمي محمد يبوس بيدين ابوي ويبوس براسه ويشهك ويبجي 

-وعمي أحمد نفس الحالة 

من الاخير البيت كله صار ينحب ويبجي 

زلم ونسوان وجهال كلها تنحب 

-بعد ماسلمنا على عمامي وعماتي 

وحتى نسوان عمي بوسناهن لان نعتبرهن خالاتنا

-شويه ودخلت عمه شمس وياها عروس

مغطايه من فوك ليجوه بالابيض 

محمود/من شفت عمه شمس دخلت وياها العروس وكف كلبي 

نفس موقف البارحة انعاد ويايه 

احس كلبي يوكف ثواني يلا يرجع ينبض 

وينبض بقوة الخفقان يخنكني 

هاي فرح كلبي شنو راح تروح من ايدي وتنزف لغيري 

حسيت الدم فار بشراييني 

وكلبي انهجم هجم ،بس عصرت أيد اركان 

-حال لسان محمود يحاجي فرح من شافها بدله العرس

((ﻣﺎﺣﻠﻤﺘﻲ ؟ 

ﺷﻜﺪ ﻏﻔﻴﺘﻲ

ﺷﻜﺜﺮ ﻧﻤﺘﻲ 

ﻣﺎﺣﻠﻤﺘﻲ ﺟﻨﻲ ﻃﺎﻳﺢ 

ﻭﺍﻧﺘﻲ ﻓﻮﻙ ﺿﻠﻮﻋﻲ ﺩﺳﺘﻲ 

ﻣﺎﺣﻠﻤﺘﻲ ﻣﻦ ﺍﻟصبح ﻟﻠﻴﻞ ﺍﺻﺮﺥ 

ﻭﺍﻣﻲ ﺗﺼﺮﺥ ﻳﺒﻨﻲ ﻛﺎﻓﻲ 

ﻭﺍﻧﻪ ﺍﺻﻴﺤﻦ ﻳﻤﻪ ﺳﻜﺘﻲ

ﻣﺎﺣﻠﻤﺘﻲ ﺑﺒﺘﻮﺕ ﻛﻠﺒﻲ

ﺣﺒﻞ ﺑﻴﺪﺝ 

ﻭﺷﻜﺪ ﻟﻌﺒﻪ ﺣﺒﻞ ﺑﻴﻬﻦ ﻟﻌﺒﺘﻲ 

ﻣﺎﺣﻠﻤﺘﻲ؟

ﻣﺴﻮﺩﻥ ﺍﻓﺘﺮ ﺑﺎﻟﺸﻮﺍﺭﻉ 

ﻭﺗﻀﺤﻚ ﺍﻟﻮﺍﺩﻡ ﻋﻠﻴﻪ

ﻭﺍﻧﺘﻲ ﺍﻭﻟﻬﻢ ﺿﺤﻜﺘﻲ 

ﻭأنه من ﺟﺎﺑﻮﻟﻲ ﺍﺳﻤﺞ ﻛﻤﺖ ﺍﺻﻠﻲ 

ﻭﺍﻧﺘﻲ ﻣﻦ ﺟﺎﺑﻮﻟﺞ ﺍﺳﻤﻲ ﺷﻜﺪ ﻛﻔﺮﺗﻲ 

ﻣﺎﺣﻠﻤﺘﻲ؟

ﺍﻧﺘﻲ ﺍﺷﻄﺮ ﻃﺎﻟﺒﻪ ﺑﻤﺪﺭﺳﻪ ﺍﻟﻜﻠﺐ

ﺷﺒﻴﺞ ﻣﻦ ﻋﺪﻫﺎ ﻧﻔﺼﻠﺘﻲ؟؟))

-لسان حال فرح ترد على محمود 

-((أبحلك ﺟﺮﺣﻲ ﺳﻮﺍﻟﻒ ﺿﺎﻡ ﺍﻫﻮﺍﻱ 

ﺍﻟﻚ ﻳﻠﻤﺎ ﻭﻓﻴﺖ ﺍﻭﻳﺎﻱ ﺑﻠﻌﺸﺮﻩ 

-ﺟﻨﺖ ﺍﻗﺮﻩ ﺍﻟﻤﺤﻨﻪ أبيوم ﺍﻻ‌ﻛﻴﻚ 

ﻫﺴﻪ ﺍﻟﻔﺎﺗﺤﻪ ﺍﻣﻦ ﺍﻟﻜﺎﻙ ﻛﻤﺖ ﺍﻗﺮﻩ

-ﺷﻴﺐ ﺭﺍﺱ ﺟﺮﺣﻲ من ﺍﻭﻝ ﺍﻓﺮﺍﻙ

ﻭﺗﺨﻴﻞ ﺍﺑﺠﺮﺣﻲ ﺍﺧﻼ‌ﻓﻚ ﺷﻜﺒﺮﻩ

-ﻋﻔﺘﻨﻲ ﺍﺑﺮﻭﺡ ﺟﺎﻫﻞ ﻧﺎﻃﺮ ﺍﻟﻌﻴﺪ 

ﻭﺑﻮﺍﻫﺲ ﻳﺘﺎﻣﻪ ﺍﻣﺘﺎﻧﻴﻪ ﺍﻟﻔﻄﺮﻩ))

اركان /محمود عصر أيدي 

باوعت بوجه أصفر وأشرلي على كلبه

-وجان أعيطن بالنسوان عيطه 

خليت طشارهن مالي والي 

- مييييييييي جييين مييييي 

ياااااااابه عادل ألحكني 

-ماادري منو من البنات انطتني دولكة مي

شمرتها بوجه محمود 

-وظليت أفرك بكلبه وبصدره 

بلكوه يجر النفس ويرجف 

-مااريد اسولف عن امي 

شلعت حياطين البيت بالصريخ 

-عاد عمه هناء نزلت جهاز سكر وجهاز ضغط

قست ضغطه مرتفع ،،وسكره طبيعي

-شحطته بالكوه وسنده ويايه عمي أحمد وديناه للمغسلة غسلت راسه وجهه بمي بارد 

-رجعته ومددته بالهول 

شويه وبنية طبت علينا مستعجلة 

نطتني كلاص نومي حامض

كمت أدير بالصحن وأشربه 

-الهوسه الصارت بجفه واريد 

اشوف هل كوثر الرزلتني بجفه

-العروس بس دخلتها عمه شمس

بوجها دخلوها للغرفة الجوه بعد ماشفناها 

-عمي باسم بلغ العريس هو منهي 

ممنوع يوصل وحق غيره العباس 

أصوبه واكسر رجليه ........

اترككم في أمان الله وحفظه 

وأنتظروني في الحلقة القادمة 

-----------

الفصل الثالث عشر من هنا 

شكرا لزيارتكم عالم روايات سكيرهوم