رواية ظل امرأة عنيدة الفصل الثاني عشر
صباح اليوم التالي
تستيقظ فاتن تشعر بألم برأسها من اثر التفكير والبكاء طوال الليل .
الام : صباح الخير يا بنتي .
فاتن : صباح النور .
الام : مالك ماسكة راسك كده ليه ؟؟
فاتن : حاسة بصداع جامد في راسي .
الام : وانا كمان ، ده انا طول الليل معرفتش انام .
فاتن : ليه كده ؟؟
الام : كنت سامعه صوت عربيات مطافي ، معرفش كنت بحلم ولا بجد !!
فاتن : وانا كمان سمعتها ، تبقي اكيد حقيقة .
الام : ربنا يكفينا الشر ، يا تري ايه اللي حصل في المنطقة بالليل .
فاتن : انا هنزل اشتري فطار واشوف ايه اللي حصل .
تذهب فاتن لشراء الفطور وتسمع حديث أمرأتين عن احتر.اق كشك المعلم شعبان في الموقف .
لا تستطيع كبح فضولها فتسألهم : حر.يق ايه اللي حصل بالليل ؟
: الكشك الخشب اللي بيقعد فيه شعبان اللي ماسك الموقف اتحر.ق بالليل ، ده هو كمان كان نايم فيه وبيقولوا انه ما.ت .
فاتن : ما.ت !! متأكدة ؟؟
: بيقولوا ، ناس كتير بيقولوا ان المطافي خرجتوا من الكشك متفحم بس لسه كان فيه الروح وما.ت قبل ما يوصل للمستشفي .
فاتن " في خاطرها " احمدك واشكر فضلك يارب .
تتركهم وتنصرف وتفاجئ بحمزة امامها يبتسم !!!
تتذكر الموقف الوحيد بينهما حين سألها عن سر غيابها وردت عليه ببرود وتركته وانصرفت !!! تشعر فاتن بالخجل من ذاك الموقف فتبتسم في وجهه .
حين يري ابتسامتها له يقفز قلبه فرحا ويشعر وكأنما الشمس اشرقت في عينيه بعد شتاء طويل !!!!
يتجه اليها ويقول " في تردد " : صباح الخير يا فاتن .
فاتن : صباح النور .
حمزة : عرفتي اللي حصل بالليل ؟؟
فاتن : قصدك الحر.يق اللي حصل ؟؟
حموة : ايوه ، الكشك اتحر.ق بشعبان جواه .
فاتن : انت متأكد انه مات ؟؟
حمزة : ايوه متأكد لأن النار أكلت جسمه لأنه كان نايم ولما حس بالنار وصحي مقدرش يخرج بسرعة بسبب الكسر اللي في رجله ، عموما الحمد لله انه بعد عنك للأبد .
فاتن : ايوه الحمد لله ، أستأذن انا همشي ومتشكرة اوي علي الاخبار الجميلة دي .
تهم فاتن بالانصراف فيوقفها حمزة سريعا : لأ استني .
فاتن " بتعجب " : فيه ايه ؟
حمزة : انا ... اناااا .....
فاتن : انت ايه ؟
حمزة : انا عايز اخطبك .
فاتن " تضحك " : تخطبني !!! لكن انت لسه بتدرس !!!
حمزة : انا خلصت امتحانات اخر سنة و هتخرج واشتغل علطول وعندي شقتي اللي اتجوز فيها ، وقبل كل ده انا بحبك اوي .
فاتن : انا مقدرة مشاعرك لكن اعذرني انا مبفكرش في الجواز دلوقتي .
حمزة : طيب نتخطب دلوقتي ، ونتجوز بعد سنة او سنتين .
فاتن " تبتسم " : لأ معلش انا مبفكرش حاليا ولا في خطوبة ولا جواز ، ربنا يرزقك بواحدة احسن مني .
تتركه فاتن وتنصرف وتعود الي المنزل .
فاتن " تضحك " : عارفة الحر.يق اللي كان بالليل كان فين ؟
الام : فين ؟؟
فاتن : كان في كشك شعبان وهو كان جواه والحمد لله ما.ت وارتحت من اذ.اه .
الام : لاحول ولا قوة الا بالله .
فاتن : انتي زعلانة عليه ولا ايه ؟؟
الام : لأ مش زعلانة ، لكن مهما كان ده بني ادم .
فاتن : بني ادم مؤ.ذي الحمد لله ارتحنا من اذ.اه .
الام : ايوه ، دلوقتي تقدري تنزلي وتخرجي براحتك بدون خو.ف .
فاتن : ايوه ، انا هفطر معاكي وانزل اشوف شغل .
الام : انتي لغاية دلوقتي مش لقيتي شغل ؟!!
فاتن : قدمت في اكتر من شغل ، والنهاردة رايحة اقدم في شغل تاني .
الام : ربنا يوفقك ، حاولي متتأخريش علشان السمسار كلمني وقالي علي شقة نشوفها النهاردة .
فاتن : حاضر يا ماما .
تنصرف فاتن وفي طريقها للبحث عن عمل وهي مازالت تشعر بسعادة بعد رحيل شعبان تفاجئ برسالة من طارق !!!
تفتح الرسالة لتقرأها " اوعي تفتكري بعد اللي حصل لسهير اني هبعد واسيبك ، تبقي بتحلمي !! لو مش هترجعيلي بمزا.جك هترجعيلي لما تشوفي الفيديو اللي هبعتهولك كمان شوية ، ولما تشوفيه لو عايزاني اذيع قول ذيع " .
ينقبض قلبها بسبب رسالته و تتسائل فيديو ايه اللي هيبعته ؟؟ وايه اللي حصل لسهير ؟؟
تنتظر وصول الفيديو حتي يصلها وتفاجئ بأنه لها مع طارق اثناء علاقتهما !!!
لا تستطيع التفكير او الانتظار طويلا لترد عليه وتتصل به ...
فاتن : عايز ايه يا طارق ؟
طارق : عايزك يا عسل .
فاتن : انا قواتلك يا طارق اني بطلت وبعدت عن الطريق ده .
طارق : ابعدي زي ما تحبي لكن متبعديش عني انا .
فاتن : قولي الاول ايه اللي حصل لمدام سهير ؟
طارق : بوليس الاد.اب قبضوا عليها هي واللي معاها وشمعوا الشقة .
" تتنفس فاتن الصعداء وتقول في خاطرها الحمد لله " ثم تقول له : يا طارق انت شاب وسيم ومعاك فلوس والف واحدة تتمناك ، ليه مصمم ترجعني للغلط تاني ؟!!!
طارق : مزاجي ، لقيت مزاجي معاكي .
فاتن : لو بتحبني نتجوز .
طارق : تاني انتي ؟؟!! ما انا قولتلك مش هتجوز واحدة شمال زيك .
فاتن : مادام انا شمال معلق نفسك بيا ليه ؟؟!! بص يا طارق انا حبيتك بجد لكن مش هقدر ارجع للطريق ده تاني ، انا دلوقتي بصلي وبقرأ قران و توبت ومش عايزة ارجع لكده تاني ، ارجوك بلاش تعمل معايا كده .
طارق " يضحك بسخرية " : تصلي بعد ايه يا بت ؟؟ بعد كل اللي عملتيه عايزة تتوبي وتصلي !!!
فاتن : ربك غفور رحيم وبأذن الله يقويني اني اكمل ومرجعش للغلط تاني .
طارق : يبقي نذيع الفيديو علشان الشباب تنبسط ، معلش يا عسل هضطر اذيع الفيديو ده هيعمل مشاهدات كتير اوي ، بصراحة ادائنا كان عالي .
فاتن : تصدق انا فعلا ندمانة علي كل لحظة حبيتك فيها !!!
طارق : حب ايه يا بت !! هي اللي زيك تعرف الحب ؟؟!
فاتن : طيب سيبني افكر و بلاش تنشر الفيديو دلوقتي .
طارق : هتغكري اد ايه ؟؟
فاتن : كام يوم افكر .
طارق : هما يومين بس ، تفكري وتردي عليا يا عسل بعد يومين هتلاقي الفيديو الجميل ده في كل حته .
فاتن : حاضر .
بعد يومين
تشعر فاتن بر.عب من مجرد فكرة انتشار الفيديو المخل لها !!
تجد اتصال من طارق فيدق قلبها خو.فا ثم ترد ....
فاتن : الو .
طارق : احلي الو سمعتها طول عمري ، عملتي ايه يا عسل ؟؟
فاتن : طارق ممكن نتقابل ونتكلم مع بعض شوية ؟؟
طارق : قوليلي وافقتي ولا لسه معانده زي ما انتي ؟؟
فاتن : لما نتقابل ونتكلم .
طارق : وماله يا عسل ، نتقابل .
فاتن : انا هكون جاهزة بعد ساعة .
بعد ساعة تنزل فاتن من منزلها و يبدو وجهها شاحبا من اثر الخو.ف .
تصل الي احد الكافيهات لتجد طارق يجلس في انتظارها .
بمجرد ان يراها طارق ويري ملابسها الفضفاضة و الحجاب الذي يغطي رأسها ترتسم علي وجهه علامات التعجب !!!
طارق : ايه اللبس الغريب ده !!! انتي توبتي بجد ولا ايه ؟؟
فاتن : كنت فاكرني بكدب عليك ؟؟
طارق : تكدبي او لأ المهم اني شوفتك وكنتي وحشاني اوي .
فاتن : يا طارق انا زي ما قولتلك قبل كده انا توبت ومش عايزة ارجع للغلط تاني ، لو فعلا بوحشك وبتحبني اتجوزني .
طارق : وانا قولتلك مش ممكن اتجوز واحدة ش.....
فاتن : خلاص يا طارق متكملش ، كفاية سمعتها منك كتير اوي .
طارق : خلينا في المهم ، هتيجي معايا الشقة دلوقتي ؟؟
فاتن : حتي بعد ما شوفتني كده ؟!!!
طارق : ايوه بقولك وحشتيني .
فاتن : ياااه انت فيه جواك شر كبير اوي !!!
طارق : انتي مالك جوايا شر ولا خير ؟ وبعدين انا اعرف منين انك مش بتمثلي عليا وواخدة الهدوم ده من اي واحدة علشان اصدق الدور اللي بتمثليه ؟؟
للكاتب عادل عبد الله
فاتن : لا يا طارق انا فعلا توبت بجد و...
طارق : متكمليش انتي بقي ، انا ميهمنيش كل اللي بتقوليه ده ، اللي يهمني دلوقتي اني عايزك ، قولتي ايه ؟
فاتن : لأ يا طارق ، مش هرجع كده تاني .
طارق : حلو عنادك ده اوي !! ابقي خلي عنادك ده ينفعك لما الكل يشوفك يا عسل في الفيديو وانتي ......
فاتن : وهتف.ضح نفسك معايا ؟؟!!
طارق : انا وشي مش واضح زيك يا عسل ، انتي وشك كان منور الشاشة .
فاتن : اتقي الله ، خاف من ربنا .
طارق : الكلام ده مع واحدة شريفة مش واحدة زيك .
فاتن : واذا كان ربنا اداني فرصة اني اتوب ، انت ليه عايز تحرمني منها ؟!!
طارق : انا الكلام معايا خلص ، معلش هقوم علشان عندي مشوار مع موزة تانية ، هستني منك تليفون علشان نتقابل بكره في شقتي ، لو مش اتصلي بنفسك وقولتيلي انك جاية شقتي بعد بكره هتكوني منورة علي كل المواقع .
انصرف طارق وتركها تبكي بمر.ارة وخو.ف !! لتأخذ حقيبتها وتمشي في انكسار لا تعرف كيف تتصرف مع ذلك الجحو.د !!!
عاد طارق الي منزله وبمجرد دخوله يقوم شخصا بمباغته بضر.بات سريعة ومتتالية !!!
يحاول طارق صد ضر.باته الا ان ضر.باته كانت سريعة ومتتالية حتي او.قعت طارق ارضا رغم بنينه القوية !!!
طارق : انت مين ؟ وعايز مني ايه ؟؟
: ابعد عن فاتن .
طارق : فاتن !!! وانت مالك ؟
فيباغته هذا الشخص بعدة ضر.بات قوية سريعة ثم يقول : سمعت قولتلك ايه ؟؟ ابعد عن فاتن ، اوعي تتعرض لها تاني!!!
طارق : انت مين ؟؟ ومخبي وشك بالماسك ده ليه ؟؟
: ملكش دعوة ، انا دلوقتي ممكن اخل.ص عليك ، لكن هديلك فرصة تعيش ، لو فكرت تتعرض لفاتن تاني هيكون اخر يوم في عمرك !!
