رواية الابواب الخمس الجزء الثاني الفصل الثالث عشر بقلم ريام الهادي
الماعنده بخت لايحلم هواي
الحلم لهل البخت مو للمساگين 💔
شرهب : جنت اسمع واني ميته قهر ومكسوره طب عمي يبجي وكعد يم ايدي ويبوس بيها حتى مااشتكي شكد حنينين عليه وشكد هو حقير وياهم دمعاته وشيبانه وهو يتوسل بيه كسرت گلبي عمي مريض اذا مات مااتحمل اشيل العمر كله ذنبه
باوعت عليهم وكتلهم مااشتكي بس يطلكني ماارجع ساعه يمه
ام عدي : لا يمه على بختج كله ولا انتي
ناي : لعد شتردين ياخاله ارجعها اله بعد سوايته بيها كدامج جان ماتت وفوكاها مات ابنها المفروض نشتكي عليه ونخيسه بلسجن هيج واحد حرامات يشتم الهوا يگتلها كتلت لموت لخاطر جم فلس وياريت الفلوس اخذتهم الها اشترت بيهم شى لو انطتهم لاهلها ودت ابوه للطبيب يعني لو تحجيها لواحد مخبل بلشارع هم يكول عدي يستاهل الذبح مو بس السجن
ابو عدي : حقج بويه هيه هم اخيتج وادري بيج محروك گلبج عليها وترديلها العيشه الزينه بس يابنيتي اخيتج مانكدر بدونها هذا حالنا الله بلانه بزر ذره رحمه ماكو بگلبه ويحب فلوسه اكثر من روحه على نفسه مقحط اللكمه مو عاد على ابوه واخيتج وردة من الجنه والله دزاها النه يعوضنه عن قهرتنه اني وامه من نشوف بعد كل هاي السنين وروحت الحيل والتعب لا البت احنينه ولا الولد
ناي : وهيه شنو ذنبها تكسر عمرها ويااه لتزعلون مني اني مامستعده لخاطر اي احد ارجع اختي الكم صحيح انتم طيبين وياها بس هذا مايكفي مامجبورة تعيش ويه حيوان لخاطر ترضى احد عدكم حل من اثنين يايطلكها وميشوفنه وجهه يايعفن بلسجن وهم غصب عنه يطلكها بلحالتين شرهب مترجع وياكم انتم اذا تحبوها خلي ابنكم يطلكها ونخلص من هاي المعمعه الوكعنه بيها مااكول غير الله لايوفق كلمن زوج هاي الطفله لابنكم
شرهب : عمي وعمتي بقو يتوسلون ويبجون ورغم معزتهم بگلبي جان ردي واحد ماارجع
المسكنات جانت تخليني انام وبنفس الوقت جسمي احسه خشبه وكل قطعه منه توم عليه عدا گلبي اليبجي دم على ابني الراح كل ماتغمض عيوني اتذكر ضرباته وافز مخروعه والزم بطني
فتحت عيني مبين الفجر تيهت حتى الوقت جنا بغرفه وحدنا تعجبت هسه انتبهت من صحيت جنت منهاره باوعت يمنه لكيت ناي حاطه راسها يمي وجسمها على الكرسي لزمت راسها طفرت اسم الله
ناي : بيج شى
شرهب : لا مابيه اكلج احنا وين
ناي : غير بلمستشفى
شرهب : لا اقصد غرفه وحدنا جنه مثل المسلسلات المصريه وين الورد ولو اكيد عدي راح يشتري باكه فجل ويدزها اليه العزاله مال الفجل هااا لا عبالج جديده لان الجديده تگلفه فلوس
ناي : ههههههه انتي بيا حال
شرهب : لا صدك احنا وين
ناي : مهدي حجز الج على الخاص لان بلعام صايره هوسه وصعدوج هنا
شرهب : وعمي وعمتي
ناي : راح يوديهم مهدي للبيت وضعهم تعبان وعمج يكح خفنا يتأذه اكثر اخذهم مهدي وراح
شرهب : ينطي العافيه حباب رجلج رغم هو ميحبني ومن يشوفني بده يشرب من دمي بس گلبه طيب
ناي : لا ليش ميحبج فاهمه غلط هو هذا مهدي هيج طبعه جدي زياده عن اللزوم وهادئ
شرهب :تحبي
ناي : منو
شرهب : اكو غيره رجلج
ناي : مااكرهه يعني تكدرين تكولين تعودت عليه علاقتي وياه عاديه او اقل من العاديه عايشه الْحٍمَدٍ للـّہ لتفكرين وحاولي تنامين بعد وكت ساعه ٤ ونص الفجر وتسأليني تحبي
شرهب : وين راح اروح نايه بعد ما طلعت من ذاك البيت اكيد صالحه مراح تستقبلني بالاحضان والبوسات وعمه وبيبي بعاد لو مخابرتهم بلكت يكدرون يجون ياخذوني
ناي : اخذج ويايه من كل عقلج اعوفج هيج
شرهب : لا مااروح عيب ناس غرب شيوديني عدهم قبل من انهزمنا ردت يتغير حالي وعادي اذا ابقى يمهم بينما وهاي حالتي مااقبل اروح عاله عليهم
ناي : لا عاله ولا شى يجي مهدي واحجي وياه مااكدر اعوفج لوحدج گطنه وشيليها من اذنج واكيد مهدي ميعارض لان من حجيت اله تعاطف هوايه وانقهر اسكتي ونامي والصبح نحجي
بقيت العب بشعرها لحد ماغفت واني افكر وبنفس الوقت خايفه لا مهدي ميقبل اخذها او يضوج مكدرت ارجع انام خلصت الكم ساعه اباوع عليه وشون حالها جوه عيونها صاير اسود والوجهه عوده وسمرانه حتى جسمها ضعفان بس بطن من وره الحمل مبين عليها الجوع والقهر ااااخ يابت ابويه شصاير بحالج
صار الصبح اجوي ساعه ٨ ونص انطوها علاج وراها اجه الطبيب الاخصائي وكتب الها شويه علاجات وكال اذا تحب نكتب الها تقرير عن حالتها اذا تريد تشتكي لان مبين مال وحده مشبعيها كتل طلبت منه التقرير كلت اخاف نحتاجه وبدا يوصي لازم نهتم بأكلها عدها فقر دم عام وسوء تغذيه وبسبب عمرها الصغير والطرح الصار احتمال تصير الها مشاكل اكبر اذا بقى هذا حالها بعدني اسولف ويه الطبيب اندكت الباب وطب مهدي كمل كلامه الطبيب وكال كتبت الها على خروجيه وطلع
مهدي : هاا شون صرتي
شرهب : الْحٍمَدٍ للـّہ
ناي : اشرت لمهدي اخذته وطلعت بره الغرفه
مهدي : صاير شى
ناي : اريد اطلب منك ومستحيه
مهدي : محتاجه فلوس
ناي : لا لا اريد اخذ شرهب ويايه تعرف الوضع وشفت حالها مااكدر اعوفها
مهدي : اني هم خال بالي هذا الشى حضريها ورانه طريق
ناي : يعني تقبل
مهدي : غير اختج وثاني شى وين تروح اكيد يمج حتى عينج عليها واداريها
ناي : تسلم والله فرحت بس اخاف عمه متقبل
مهدي : مالج دخل بأمي شرهب اختج واذا انتي مااداريها منو الغريب قابل يله حضريها ولتتأخرين واني رايح اكمل الحساب دزو عليه واكمل خروجيتها
ناي : طبيت واني فرحانه
شرهب : شو وجهج يضحك
ناي : يله حتى نروح لديالى خلي ابدل الج
شرهب : عفيه خلي اروح يم عمه وبيبي
ناي : اششش بله لغوه تكدرين تساعديني وتتحركين شويه لو بعدج تعبانه
شرهب : اكدر تحركت شوي وعطت جسمي كله يوجعني
ناي : سوده عليه انكسرت ايده ورگبته كون يبقى سكط طول عمره
شرهب : ياريت بس المثله عرج ميطبه كلشي ميصير بيه بلعكس الدنيا تمشي وياه عدل
ناي : اي والله انطيني ايدج خلي اساعدج
كملنا كلشي ومهدي جاب كرسي متحرك ودفعها لحد ماوصلنا للسياره وصعدناها ليوره واني كعدت بصف مهدي وانطلقنا رغم كسرتها والصار بيها جنت فرحانه لان واخيراً خلصت من ذاك الحقير ورجعت لحضني
طول الطريق اندار عليها لان اشوفها متألمه واني اقرا ايات كون متتخربط
لحد ماوصلنا ودخلنا مهدي للبيت
ناي : لزمت ايدها حتى ادخلها مكدرت
شرهب : مااكدر ناي امشي دمعت عيني على حالي والصار بيه
مهدي : شوفي اني مثل اخوج وزوج اختج راح اشيلج
شرهب : لا عفيه لا
مهدي : ماعدنا غير حل المسافه بسيطه ورغم هذا متكدرين تمشين وماعندي كرسي متحرك هنا جان خليتج عليه وحوراء وناي اذا شالنج اخاف ميكدرن وتوكعين هلمره اخاف اكو عظمه صاحيه تنكسر بدربها يله شرهب غمضي وخلي اشيلج
ياالله
ناي : شالها وهي ميته مستحيه اعرف بيها واني امشي وراهم لحد مادخلنا للبيت جنت حاطه ايدي على گلبي لتصير بوجهنا عمتي وتبدي تذب سمها دخلنا ماكو احد همزين
جان تطلع حوراء من الغرفه
حوراء : هااا الْحٍمَدٍ للـّہ على السلامه كالو لاعبه ويه محمد علي كلاي وهازمج بلضربه القاضيه
شرهب : ههههه وداعتج ضربتي اله اقوه من ضربته خسرته ٥٠٠ الف والمثل عدي لو بايعه اعضائه تفصيخ ولا هاي سوايتي
حوراء : هههههه خرب يستاهل حيل بيه
مهدي : راح اصعدج فوك يم ناي بلغرفه
شرهب : لا عفيه بأي مكان
ناي : غير يمي
حوراء : شبيكم على شنو يمج غرفتي اني وبيبي جبيره تساع من الحبايب الف خليها يمنا وخلي رجلج يمج
ناي : مباشره نترت يم بيبي لا لان اعرف بيها متحبها وخاف تحجي شى وتتخبل
حوراء : ليش
ناي : يمي بلغرفة افضل عيني عليها
مهدي : حلوها عادي ظهري انكسر
شرهب : يم حوراء وبيبيتكم ارتاح اكثر ناي عفيه اريد يمهم
ناي : شفتها ضاجت سكتت كام مهدي
ودخلها
عيني على بيبي اشوف ردت فعلها جان تكول
ام ذكرى : الْحٍمَدٍ للـّہ على سلامتج بتي الله يعوضج خير بصحتج وعافيتج
شرهب : شكراً سكتت شصيح بله الها خاله مو مال خاله اخاف اكول بيبي وترزلني خلي اسكت اكرملي
ناي : فرشت حوراء وكالت تنام يمي حتى كل ماتضوجني ادوس على عظامها وتعيط
شرهب : راح اكعد عاقله وداعتج ولا افتح حلكي
مهدي : اني عندي شغل رايح محتاجين شى
ناي : سلامتك
حوراء : بربك مهدي شويه عصرونيات وياك من ترجع عدنا سهرايه اليوم
مهدي : وانتي حجيه
ام ذكرى : ردتك سالم يمه
مهدي : تعالي ناي
ناي : رحت وراه وطلعنا باب المطبخ
مهدي : اخاف امي تحجي شى كولي الها يجي مهدي واحجي وياه اني مالي دخل هو جابها ولا تناقشيها ابد
ناي : ماشي
مهدي : هااج
ناي : شنو ذني
مهدي : اطلعي ويه ام عبد اشتري جم حاجه لشرهب ملابس احتياجات شخصيه لان مو مال ترحين بهاي الفتره لبيتها تجيبين غراضها خلي تفض السالفه ويطلك هذا العار وراها اخذج نجيبهم
ناي : عندي انطيها مني
مهدي : وليش منج هاااج واشتري جديد الها واني ما اتأخر اخلص جم شغله بيدي وارجع
ناي : تسلملي موقف مهدي كلش كبره بعيني لان جنت خايفه ليعترض
كيفت ورحت كعدت ويه البنات
بيبي جانت تباوع عليها وتسبح باوعت عليه جنها قرت الي بالي وصاحتني
دنكت الها جان تشاورني
ام ذكرى : لتخافين لعيونج احبها
ناي : ابتسمت اقلها ارتاح من جانب بيبي بقت عمتي
طلعت من الغرفه رحت لغرفتي سبحت وبدلت ونزلت اسوي شوربه الها طبت عمتي مدري وين جانت
وداد : لا هله رديتي
ناي : بقيت احرك بلشوربه ومجاوبت
كلت اخاف تروح لغرفه بيبي وتشوف شرهب وتعيط خلي احجي اني
عمه
وداد : شكوو
ناي : جبت اختي ويايه
وداد : لا بالله خوش والله فاتحتها ملجأ ايتام شعدها يمه هنا
ناي : مو اني طلبت مهدي وكال من تجي امي اني افهمها
وداد : لا والله هاي سوالفج تعلميني بيج من جوه ليجوه توزين بأبني سمعي لج اختج جم يوم تضل وراها ساعه متبقى هنا انتي مجارعتج يمي هلمره اختج بعد روحي جيبي بيبيتج وعمامج ونعوفلكم البيت ونطلع
ناي : مالي دخل يجي مهدي واحجي وياه عفتها تعيط وتحجي واني اكمل الاكل لحد مصبيته ورحت للغرفه
حوراء : هااا بشري ترزلتي
شرهب : كتلج ياناي خلي اروح لبيت عمو فلاح يم بيبي
ناي : اشش مالج دخل
حوراء : شوفي شوشه امي ميعجبها العجب وتحب تهوس وتتعارك واذا ملكت واحد تتعارك وياه تتعارك ويه ذبان وجهه يعني اسمعي وطنشي لا كلشي تسمعي هنا تحطي بگلبج وصيري سفنجه اشربي رزايل من جهه والجهه الثاني عصريهن اني عايشه ويه امي لحد هذا اليوم ومصار بيه عاهه لان مستخدمه هاي النظريه
شرهب : الله كريم جنت شايله هم ناي اني مااهتم لان عاشرت ازبل من وداد الي يعاشر صالحه وساهره وعدي يشوف وداد بلسم
ناي : اجه مهدي وامه اخذته لغرفتها واسمع صوتها ويااه بس الكلام ماافرزن شنو لحد ماطلع
مهدي : رايح للولد اتاخر
ناي : الله وياك
طبيت للغرفه لكيت شرهب تضحك ولازمه بطنها
شرهب : لج كاافي بطني كامت توجعني من الضحك
ناي : خوش والله اخذتج حوراء مني
حوراء : مسكينه يحوري ياهو اليجي يحجي عليج
ناي : خوفج من المسكين
حوراء : خلي اروح اصيح العوبه سدره تجي تعلل ويانه مهدي جاب حلويات كومه
ناي : اسمع صفير حوراء ماكو دقايق وطبت سدره
سدره : الماكله الجبس مالتي اطمس راسها بلطين هااي منو عدكم جرحى حرب
ناي : اختي شرهب
سدره : عزه ولا عرفتج شفتج بلعرس هاي شصاير بيج
شرهب : كلتي جرحى حرب
سدره : الْحٍمَدٍ للـّہ على سلامتج
ناي : بقينا نسولف ونضحك حسيت شرهب حيل ارتاحت وكلتها والبنات يضحكن وياها حتى بيبي تضحك على سوالفهن وبيومها نمنا كلنا بلغرفه وسدره باتت يمنا واني مصعدت لغرفتي ولا مهدي صاحني ثاني يوم رحت اشتريت الها ويه ام عبد ملابس وشغلات تحتاجها حيل فرحت من شافتهن ودخلت سبحتها اسبح بيها واباوع على ايدها ورجلها وجسمها شون كله زراكات واعصر بگلبي عليها
بقيت على هذا الحال اعتني بيها واداوي جرحها اسبوع كامل وداد ساكته وعيونها تحجي واني مغلسه واكمل كل شغلي حتى متتعارك ويايه وابقى الوقت الباقي يم شرهب كل هاي الايام و اي خبر من عدي ماكو لا طلك ولا دز اي حجايه
شرهب : اريد اخابر بيبي اشتاقيت الها
ناي : يجي مهدي واخذ تلفونه وخابري
شرهب : تدرين نايه لو يونس موجود جان طيح حظه لعدي صحيح رجلج مقصر بس يبقى غريب مو مثل اخويه يمكن جان هسه مطلكه او على الاقل عدي متجرأ يأذيني هيج هو يعرف ما ورايه احد لهذا ماخذ راحته
ناي : شنو الفايده لووو اخوج ضيع نفسه وضيعنا خلي اكوم اكمل اكلج
شرهب : اريد اطلع اتمشى بره تعبت من الكعده
ناي : كومي اطلعي ماطول عمتي ماموجوده
ولترحين بعيد بلحديقه افتري
شرهب : طلعت وحطيت شال على راسي مردت مهدي يجي استحي منه اخاف يحجي حطيته والكذله طالعه اني متحجبت لان عدي ميهتم لهاي السوالف مال الحجاب انطي يهتم بفلوسه وبطنه ونومته والباقي بلشط
اتمشى واجت سدره من شافتني حيل حبيتها هيه وحوراء طيبات وبسيطات ابد ماعدهن تگبر ويضحكن للهوا حتى من اصفن ميخلني
سدره : اليوم الحلووة تفتر اي ماشاء الله طبنا
شرهب : الْحٍمَدٍ للـّہ شونج
سدره : زينه وملتهيه احظر جم يوم واروح لبغداد
شرهب : انتي ياصف
سدره : اني مرحله ثالثه علوم سياسيه جامعه بغداد يوم الالج
شرهب : وين حتى متوسطه ما مكمله
سدره : تكملين الي يريد شى يسوي واذا تحبين الدراسه اتعبي واقري سنه اذا راحت منج متنگلب الدنيا حتى لو سنتين او ٣ المهم وراها ترجعين توكفين على رجلج وتتحدين ظروفج
شرهب : وحوراء نسيت اسألها
سدره : هاي دجه دبل كلشي ماكو كوه كملت السادس اعدادي وكعدت شكد حجيت وياها كالت مااكمل مااحب الدراسه وضلت مكابله امها وكاعده
شرهب : نسولف جان يطب مهدي
تقرب من عدنا
مهدي : السلام عليكم
اثنينا كلنا وعليكم السلام
مهدي : شون صرتي
شرهب : الْحٍمَدٍ للـّہ
مهدي : شونج سدره
سدره : هلو مهدي زينه
مهدي : شوكت ترحين لبغداد
سدره : بعد يومين
مهدي : اني اوديج لان صلاح ميكدر هاي الايام تعرفين لازم طلبيه ولازم يخلصها
سدره : لا ميحتاج اخلي عمو عمران يوصلني
مهدي : وشنو الفرق
سدره : ماكو فرق بس عمو ويايه ارتاح اكثر يله من رخصتكم
شرهب : عيوني تتنقل عليهم اني مو فطنه حيل بهيج سوالف بس مهدي من واكف وياها عيونه تاكلها اكل يابه اكص ايدي اذا مااكو شى قبل كم يوم هم انتبهت من يطب يسلم وهيه كاعده يمنا عيونه لا ارادياً تروح عليها وهيه من تشوفه ادنج ولا هاي ام حس العالي تسكت رجعت نفضت فكري يابه شكد بالي خايس الوادم ملفيني بيتهم واني اذب تهايم عليهم راحت سدره ومهدي طب واني بقيت اتمشى لحد مالمحت صوت صفير مال طيور اكيد هذا ابن خاله لمهدي عبدو رفعت راسي للسما واباوع طيور كومه اطير بسرب واحد
ورجعت سمعت صافوره وادور على مصدرها
عبدالرحمن: هناا هنااا كشش عاااع
شرهب : باوعت على سياج السطح مالتهم
لكيت عبدو ماد نص جسمه عبالك واحد يريد ينتحر
عبدالرحمن: شونج
شرهب : ابتسمت زينه
عبدالرحمن: اوكفي لطبين نازل
شرهب : بقيت واكفه شويه ونزل يلهث مبين يركض اجه
عبدالرحمن: لج هاي شنو
شرهب : خير
عبدالرحمن: صايره فختيه مهلسه
شرهب : باوعت صفح وكتله وهسه شتريد
عبدالرحمن: اتحمدلج بلسلامه
شرهب : وصل الله يسلمك ردت اطب جان يكول شكلج مو مال وحده واكعه وكعتيش تسوي هيج
شرهب : استغربت كلامه شنو واكعه
ليش شسمعت
عبدالرحمن: سمعت واكعه على بطنج والطفل ميت واختج جابتج هنا حتى تصيرين زينه ومن شفتج مو مال وحده واكعه مال وحده مسويها دوشك كتل
شرهب : اي عفيه دوشك كتل هذا الصار ضجت وانداريت
عبدالرحمن: اوكفي شبيج عباس المستعجل خلي افهم
شرهب : شتريد مني تعبانه وكوه واكفه
عبدالرحمن: رجلج سوه هيج بيج
شرهب : حتى ترتاح اي رجلي شبعني كتل وموت ابني بطني عفته وطبيت
ناي : شبيج تأفأفين وضايجه
شرهب : انتم شكايلين لاهل مهدي عني
ناي : محد سألني كلها بس تحمدت بلسلامه مبين مهدي هو حاجي الهم ليش احد حجالج شى
شرهب : ماكو شى عفيه لتنسين اريد احجي ويه بيبي اليوم
ناي : اجه مهدي واخذت التلفون منه ودكيت على عمه طلعت وسلمت عليهم وماحجيت على سالفه شرهب هيه مقبلت وانطيتها تحجي وياهم
بديعه : يمه شعندج يم اختج اول تالي تجين يمها
شرهب : اجيت اغير جو ضايجه
بديعه : لتجذبين صاير شى عايفه بيتج وعيالج ورايحه لديالى علمود ضايجه
شرهب : شبيج ياعمه شويه تعبانه من الحباله وكلت اغير جو باجر لو عكبه ارجع عوفج مني
وضعكم شونه
بديعه : على الله يايمه
شرهب : ارتاحيتو هناك
بديعه : والله يابتي مدري شكول الج هذا الرجال الوعد فلاح جم يوم طلعه للشغل وراها كعد وسكت على عمال هوايه وشغل ماكو وعمج متخبل لان مثل التقشمر وكام هو يدور ويفتر وهو غريب مو من ديرتهم الوادم متشغله
شرهب : شون عايشين لعد وبيبي
بديعه : يوم يشتغل ويوم يكعد وملزكيها وضعنه تعبان حيل وعمتي دواها غالي ربج خوله دزت جم فلس اشتريت الها الدوره والباقي دنمشي امورنا بيه
شرهب : مترجعون لبغداد اذا هيج الحال
بديعه : ميقبل فلاح طك گلبي على احنا يوميه بمكان لازم نتحمل شحجي يابتي الحمل ثگل الله يعينا
شرهب : سكتت شكول اجيكم وانتم اللكمه حسره عليكم ازيد حملكم حمل ثاني بقيت اسولف واتظاهر اني زينه وحجيت ويه بيبي وسديته
ناي : تمنيت اشتغل وادز الهم استحي اطلب من مهدي وخاصه هو ميحبهم
شرهب : بلكت الله عمو يشتغل وتفك عليه
ناي : ليش دكيتي عليهم وضليتي تلحين
شرهب : هيج اشتاقيت الهم
جنت ناويه اروح الهم لان بدت وداد تخبث اباوع عليها دوم تأذي ناي وتسمعها حجي ومن شفت حاله عمه وبيبي بلعت لساني وسكتت
كاعدين وطبت سدره وحوراء مسويات حلاوه شعريه كعدنا نضحك ونسولف جان نسمع دك
هااي شكوو منو عرس
حوراء : ههههه لا مو عرس هاي جلسه ولدنا يكعدون بيها كل فتره يم واحد واليوم اجه دور بيتنا
ناي : مكال مهدي ولو هو شيكول يطب ويطلع ساكت اني شفته جايب غراض
حوراء : اي واني حضرت الهم الكرزات والجبس والفواكهه وعمه ام عبد سوت العشا
راح يضلون لليل شعر وغنه وضحك ونكات واشبعي هوسه
شرهب : شكد حلوو هيج خلي نشوفهم
حوراء : اي حتى يعلكونا شحدها التطلع وتمد راسها بس غرفه مهدي الشباك يطلع عليهم مره اني وسدره طفينا الضوه وكعدنا نتفرج وين ويلمحنا عبد مندري احنا منشوف غير واحد جارنه من شعرنا وكال الاشوف خيالها
اشمرها من السطح واكلنا كفخه كل وحده عدا الرزايل بس هو طلع حباب لوكايل لمهدي جان طيح صبغنا
شرهب : اريد اشوف شون
حوراء : مااخليها بنفسج امشي
سدره : يمعوده خلينه مرتاحين والله يسوها موت علينا تعرفين بيهم
حوراء : منتأخر
شرهب : صعدنا كلنا وطفينا الضوا حتى ميبين شى وفتحنا البرده على كيف واكفات مثل شموع الفكر ومكيفات ونباوع
ناي : اول مره اشوف مهدي يصفك ويضحك وشلوون منطلق ويه جماعته
شرهب : اكلج شو ذوله كلهم حلوين هلمره لابسين دشاديش طالعين ينكرطون
سدره : ههههه ليش مشايفه شباب حلوة
شرهب :خلصت عمري بوجهه جوحي خشمه اطول من عامود الكهرباء مال محلتكم وعبيد جنه الشمر النسخه المحسنه ولدهم شكلهم عادي مو هيج كيك بلزبده
حوراء : ورجلج
شرهب : احوووي الطم اشك هدومي لو انزل ادبج بنصهم واكول دك عيني دك خليني بظيمي بابه اني الي بلجنه طابق كامل مخصوص اليه لان مظلومه من كل الجهاات عفيه خلي اشوف هذا الكيك قبل ميصعد الجالي عندي
ناي : هههههه لج حرام مو متزوجه ميصير هيج تحجين
شرهب :لعد مو حرام اصبح بخلقه عدي شدعيلجن بنات غنيه كون الله يحرمجن الهوا التتنفسنه
حوراء : اكلجن خلي ننزل لحد يلمحنا ونصير جلاوي العشا مالتهم امشن
ناي : انزلو انتم عندي جم شغله بلغرفه وانزل
نزلو البنات واني بقيت اتفرج ردت اشوف مهدي جان صوت ضحكته تدخل لاذني ليش ويايه دوم ساكت وهادئ حركاته وميانته ويه جماعته صفنتني
وراها سديت الشباك ورجعت يم البنات وصعدت للغرفه انتظرت اتأخر ونام
ثاني يوم اجت سدره تودعنا لان راح تبقى بال ٣ اشهر يله تجي تكول الطريق مزعج ومااكدر اروح واجي ابقى هناك منا لامتحانات نصف السنه
مهدي : خالي راح يوديج
سدره : اي يله عيني اشوفكم بخير
ناي : طلعت سدره من غرفه بيبي واني كلت اجيب مي وعلاج شرهب مااريد يفوتها رحت للمطبخ ومن شباج المطبخ لمحت سدره ومهدي واكفين وكفت قريب الباب اسمعهم
مهدي : ليش مخليتيني اوصلج
سدره : كتلج عمو يوصلني
مهدي : صايره حتى بوجهي متباوعين
سدره : مهدي هاي ثاني مره اعيدها عليك انت ابن عمتي وبس الجان قبل انساه مرتك حبابه وصارت صديقتي مااريد بيوم تشك بشئ هو ماموجود اساساً
مهدي : تعرفين بيه احبج و
سدره : رفعت ايدها وكالت عفيه كافي وخلي اروح تأخرت
ناي : بردت اطرافي اني مااحبه لمهدي بس يبقى زوجي وصعب عليه اعرف يحب ومنو الانسانه الي اعتبرتها صديقه اليه
الدنيا افترت بيه كعدت على الكرسي اريد استوعب القبل شويه صار كمت اربط شى بشى
حوراء : تأخرتي وين الدوا ناي يمعوده ام الغيره
ناي : هااا هااا
حوراء : الصفنه مو الج شكوو
ناي : ماكو شى خلي اخذ العلاج
طبيت واني اتراجف
شرهب : وجهج ميتفسر بيج شى
ناي : لا اني راح اصعد فوك ارتاح
شرهب : اصعدي ارتاحي بقيت الوب عليها نص ساعه وصعدت وراها فتحت الباب لكيتها تبجي
عرفت وضعج مو طبيعي كعدت بصفها جان تحضني
عمتج موو
ناي : ياريت اقلها اعرف بسوالفها
شرهب : منو وياج
ناي : مهدي طلع يحب سدره
شرهب : اعرف حسيت
ناي : نطت عيووني متفاجأه شمدريج
شرهب : مهدي من يشوفها يضل يباوع عليها بس الشهاده لله البنيه ماصدر شى منها دوم من هو موجود ادنج لو تسولف ويايه
ناي : شسوي هسه انزل اتعارك اهوس اطلك
شرهب : تكعدين وتسكتين البنيه راحت دوامها
ناي : قابل مترجع
شرهب : خلي نحجي الصدك نايه تتوقعين واحد مثل مهدي عمره ٢٥ سنه ميحب او محاب گبل وخاصه زواجكم صار غصب انتي من تزوجتي ماسألتي نفسج اخاف عنده حبيبة
ناي : مو كدامج الصار كله ركض بركض
شرهب : جان المفروض تكعدين وياه وتسألي انتي هسه مرته واني شفت مهدي يحترمج وما مأذيج
ناي : بس بارد ويايه كتله من جبل مال ثلج مرات انسى روحي متزوجه
شرهب : احسن من واحد حيوان يكومج بكتله ويكعدج بكتله وكل مايحب يغثج يعيرج وموتج جوع اصبري يجوز يجي يوم ويحبج ماطول ما مأذيج
لو شايفه العندي لو مهدي يحب عشره تكولين عادي
ناي : شون بعد اباوع بوجهه
شرهب : الي مثلنا وبوضعنا ماعدها اختيارات هوايه يمكن لو عمه خوله موجوده او يونس او على الاقل حالنا مستقر ويه بيبي جان كتلج امشي لمي ملابسج ونطلع منا
الي مثلنا ماعدها غير تبلع وتسكت وترمي حملها على الله عسى بيوم يتغير الحااال
ناي : جم شهر غيرت حجيج كله صرتي جنج وحده عدها ٣٠ سنه
شرهب : الفضل لحضرت المعلم الفاضل عدي
ناي : مسحت دموعي وكتله صدك سألت مهدي وكال دز خبر وكال جيبوها حتى اطلكها يم السيد
شرهب : كالت حوري يصير غيابي
ناي : يجوز يريد منج متاخذين مؤخر او شى
شرهب : احنا حتى عقد محكمه معاقدين يامؤخر اخاف طمعان بملابسي الداخليه يبيعهن بسوك الجمعه بلكت يرجع ال٥٠٠ مالته
ناي : ههههه يجوز
شرهب : شوكت ميصير مجال خلي نروح فدوة حتى اطلك وافضها
ناي : من عيووني
شرهب : كومي لا عمتج تعيط هاي وحدها يرادلها حيل مامتعوب
ناي : جريت حسره وكمت فكرت بحالنا اني واختي وين نروح اذا طلعت هسه وسويت زعله
بقيت القهره بگلبي وتعاملت ولا كأن اكو شى
شرهب : جنت اشوف يوميه وداد تعيط على ناي وتتعامل وياها مثل الخدامه تحير شتتأمر عليها وميعجبها كل شى عدا مرات تتجاوز وتغلط وناي تسكت ومن يجي مهدي تصير وداد حمل وديع اشوف اختي تشتغل وساكته بس القهر كاتلها
بيوم طلعت ناي للسوك ويه ام عبد طبت وداد بلبدايه كالت لحوراء تروح لبيت خالها ومن طلعت صاحتني تفاجأت منها هاي شتريد مني
هااا خاله
وداد : تعااي
شرهب : سحبتني من ايدي ودخلتني بغرفتها وسدت الباب
وداد :عيني من الاخير وبله وجع راس وكثر حجي بله معنى اني مافاتحتها الج ولاختج ملجأ وكل وحده تزعل من رجلها تجي تخلص العطله هنا
شرهب : صار شى ضوجتج بشى
وداد : من حطيتي رجلج هنا واني البيت بدي احركه اختج كوه متحملتها على ساعه الزمها الباب لوما اخاف على زعل ابني تردين متصير مشاكل واسكت عنها متضلين هنا
شرهب : وين اروح خاله
وداد : واني شكو عسى ماترحين تكودين قابل خلفتج ونسيتج روحي لامج الشمرتج وضاله من حضن لحضن لو روحي لاهلج اهل العتيك خلي يلفوج اني مامجبوره ابقيج بيتي فوك ماهاي الفتره ساكته كمتي على حيلج وصرتي زينه مو عاد تبقين تعشعشين هنا
شرهب : هسه احجي ويه ناي واخليها ترجعني
وداد : اي عيني حتى تكول لرجلها ويجي يهوس عليه
شرهب : شسوي قابل
وداد : اخذي غراضج واطلعي منا
شرهب : وين اروح مااندل
وداد : اني اخذج للكراج واصعدج نفرات بيدي وادزج حتى الكروه عليه وهم انطيج جم فلس بس عوفي بيتي واذا حجيتي لاختج قسماً بالله وروح المرحوم اسود عيشتها اخليها تمشي وتبجي عركه ويه مهدي وراها اطيب خاطره قابل يزعل من امه حتى واذا زعل يوم يومين ويرد لحضني وراها ماارحمها اخليها تصيح الغوث مني خليني هيج بالعتها
ومتقبله وساكته مامطلعه خبالاتي عليها واهجم بيتها تردين تطلك وتطلع وياج هيج هيج متبقى اذا بقيتي ومكان مطلعين وحدج اطلعن سوه اختاري
شرهب : اطلع هذا هو بس لتأذيها عفيه
وداد : اسمعي كلامي حتى اختج يعمر بيتها تعاندين وترحين تحجين الها وتخلن مهدي يتعارك ويايه تشوفين مني امر من نسوان عمامج
شرهب : هو كلجن نفس الصنف عفتها وطلعت من الغرفه وين اروح ياربي عمه حالتهم تعبانه واكيد عمو فلاح ميقبل ويمكن يرجعني لعدي شنو ذنبه يتحملني وبيت بيبي بيه صالحه اكيد مترحمني ومتستقبلني من الباب
يعني مردي ومرجعي لعدي
بقيت افكر الليل كله مانمت حوراء تباوع عليه وتسألني ومااجاوب
قررت للصبح ارجع بس مااكول لناي واخاف وداد تذبني بمكان مثل سالفه صالحه واگلها ماكو غير مهدي
استغليت هوسه ناي بلشغل وطلعت وره مهدي يريد يطلع وصحته
مهدي : محتاجه شى
شرهب : اريد طلب منك وبروح ابوك متردني
مهدي : خير
شرهب : اريد ترجعني لبيتي
مهدي : وين يعني
شرهب : لعدي
مهدي : تخبلتي بعد كل السواه
شرهب : يبقى رجلي واحب اهله
مهدي : تدرين تعاركنا وياه من وراج
شرهب : انت ومنو
مهدي : اني وعبد هذا من شافج قبل مده سألني وحجيت اله كلشي جان ميعرف هيج مسوي بيج عباله واكعه ومن فهمته تخبل وراد يروح يضربه واضطريت اروح وياه لان اعرفه عصبي وميتفاهم وهمزين رحت لج حصره باب المدرسه وكسر خشمه وكدام الطلاب بهذله خلاه فرجه ويعيط ويكله طفله بكد زرك هيج تسوي بيها تهستر لوما الحرس واني جان هسه انتي ارمله
شرهب : وليش هيج سوه اني لا اخته ولا كرابته
مهدي :شافج صغيره وماعندج والي ومحد ياخذ حقج وتخبل
شرهب : الله يوفقه ويحفظه لشبابه
مهدي : ارجعي شرهب للبيت وعكب باجر اخذج حتى تطلكون
شرهب : رجعت واني ساكته شافتني وداد وشعلت نار من عيونها
جان تهمس يمي كتيله موو
شرهب : ماحجيت شى واصبري كلها يومين وتخلصين مني عفتها وطبيت
ناي : شبيها عمتي وياج
شرهب : ابتسمت بوجهه مابيها شى اساعدج
ناي : لا شويه واكمل تاكلين
شرهب : شبعانه
ناي : روحي تمددي وارتاحي
شرهب : رجعت واني الف فكرة بالي تمنيت اشوف عبدالرحمن واشكره موقفه حلو كلش رغم غريبه عنه
كاعده بلسياره وصافنه على الجامه الجو برد حييل ومغيمه شهر ١٢ ب٢٠٠٦
صحتي صارت زينه لان اكل وراحه وادويه زينه ردت روحي رايحه اليوم اطلك من عدي ناي كاعده ليكدام ومهدي يسوق سلمت على حوراء والحجيه حيل حبيتهم
حضنت ام ذكرى جانت غريبه باستني وكالت يمه ابريني الذمه بريتها واني مااعرف شتقصد
اما وداد مسلمت عليها ابد درت وجهي وطلعت كاعده وتشرب كهوه ام الوصخ عود هيه فيگه وراقيه شكد كرهتها تنلام بيبي من تصيح الها ام الگلك هاي هم مدهربه مثل جناين عمشه
وصلنا لبغداد كالو السيد بلبيت رحنا ومن وصلنا لكيت عمي كاعد بلشارع يشرب جكاير فل اشتاقيت اله ولعمتي نزلنا من السياره وهو تلكاني وحضني ويبجي خطيه بكلشي يبجي بست ايده وهو باس راسي على صوتنا طلعت عمتي وسحبتني لحضنها وتبوس بيه باوعت على ناي الله انطاني رجال چلب وانطاني عيال اوادم واختي العكس رغم مهدي مو چلب حباب بس ميحبها ويحب غيرها وكدام عينها هذا هم دمار نفسي
طبينا البيت لكيت عدي شادين خشمه وايده ملفوفه ويعرج والله فرحت بيه وكاعد رجال جبير صديق عمي وسيد وزوج ابتسام وعلى صفحه ابتسام واكفه ومخنزره تكول عبالك اخوها خير واني اتبليت عليه
ناي : عفيه مهدي خلص وخلي نرجع بين متخلصون انلم ملابسها
شرهب : ثواني ناي اريد احجي ويه عدي
ناي : شعندج وياه
شرهب : ثواني ما اتأخر
مشيت للمطبخ وهو اجه ورايه
عدي : شتردين
شرهب : انت بعدك تريدني
عدي : شريد شبيج بابا انتي
شرهب : تريدني مرتك ارجع لبيتك لو لا
عدي : هااا مبين محد لفاج وشمروج وتردين ترجعين
شرهب : شفت اختي شون ترجف عليه وشوف حالك شصاير بيك وهذا اكبر دليل شون متمسكين بيه اهلي ويردوني بس اني احب اهلك ومااريد يبقون تحت رحمتكم انت واختك اذا متريدني عادي طلك تاليتك تضل وحدك ماكو مره ترض بيك وبخلك وتتحمل التتحمله غيري فوك كل هذا اذا ترجع تتزوج يرادلك مقدم ومؤخر وذهب وعرس وانت تضل لاخر عمرك بليه مره وطفل ولا تصرف اذا انت فلوس اخذتها دوا لابوك وصلتني للموت تريد تدفع مهر وتتزوج مره ثانيه احسبها بلعقل تطلع انت الربحان شكلت
صفن بوجهي شويه واكيد هو معلم رياضيات يحسب حسابه سريع جان يكول
عدي : تبقين بشرط
شرهب : هلمره يشرط بله اسمع
عدي : مالج دخل بيه فلوسي شلتهم اذا بيوم دورتي اوشفتج اخذتي الف مني اخاف ذيج المره طرحتج هلمره اذبحج بيدي
شرهب : كلشي مااريد منك وانت هم مالك دخل بيه متجبرني على شى ومتمد ايدك عليه والله اشتكي عليك
عدي : هذا هو واختج ورجلها شون
شرهب : عوفهم عليه
طلعت واني اشوف ناي تاكل بأضافرها يعني القلق وصل حده الها
بلعت ريكي وگلت
روحي ناي اخذي رجلج وروحو اني باقيه هنا
ناي : وين تبقين
شرهب : رجعت لعدي وباس راسي وطيب خاطري
ناي : اكيد تخبلتي امشي سحبتها من ايدها جان تهدني
شرهب : روحي لبيتج عفيه وهذا بيتي
ناي : يابيت وانتي وصلتي الموت بيه ماابقيج لحظه هنا
شرهب : عفيه مهدي اخذها وروحو اتصالحت ويه رجلي
كامت ناي تعيط وتبجي وتتوسل بيه واني كوه لازمه روحي لااشمرها بحضنها واكلها اخذيني منا كل مااتذكر حجي وداد اخاف عليها مناقصها هم وغم كافي الي تعيشه اجي ازيدها عليها حاول مهدي وناي يقنعوني ومفاد اخر شى جرها من ايدها وكلي امشي اختج هي تريد ترجع عوفيها براحتها
ناي : اذا طلعت وانتي مو ويايه لساني ميخاطب لسانج
شرهب : روحي عفيه كتلج مااجي لا تلحين عوفيني شجلبتي اريد ارجع لبيتي ورجلي مااروح وياج ومااطلك واتحمل كلشي وعود لتخافين مااشكيلج ولا اطلب منج بعد تساعديني عوفيني ارجع لحياتي واني احير بروحي طلاك مااطلك كمت اعيط حييل عليها والله مو قصدي اجرحها اريدها تروح مااريد تتأذه وتطلك وتاليها اثنينا نصفه بلشارع
من عطت وكتلها روحي لاتلحين زعلت
اخذها مهدي وبقت تباوع عليه مقهوره مني وطلعت
حضنتني عمتي وابجي وهي ويايه والسيد والرجال طلعو
ام عدي : اصعدي بتي لغرفتج الله يفرح گلبج مثل مافرحتي گلبي وگلب عمج برجعتج
شرهب : صعدت اجر بروحي ونظرات ناي متروح من بالي شون هيج عيطت عليها وحجيت وياها بهلحقاره طبيت لغرفتي رجعت لعشي المهدوم المابي لا حنيه ولا محبه ولا طيبه ولا رجال يعتمد عليه
تمدت بفرشتي الي انترست قهر من دموعي
رجعت للجوع وقله الحيله والتعب
ناي : ماسكتت من البجي ومهدي يحجي ويايه واني مااسمع اصب دموع تكول شلال ليش رجعت شرجعها جانت تحسب اليوم ساعه ساعه حتى تطلك منه وبيوم وليله تگلب هيج
وكف السياره مهدي
مهدي : كافي شوفي حالج راح تتخربطين هي اختارت عوفيها براحتها
ناي : اكيد اكو شى او صار شى خلاها هيج تسوي
مهدي : هي قبل يومين كالت رجعني واني مقبلت الها مبين من طلعت مخططه هيج تسوي
ناي : ليش ما كتلي
مهدي : توقعت شالت الفكره من بالها
ناي : اخاف يأذيها
مهدي : لا ميكدر بعد الگتله الاكلها مااتصور واني باجر اشتريلج تلفون واشتري واحد الها ومن يصير عندي نزله لبغداد اودي الها حتى يوميه تطمنين عليها
ناي : مااريد احجي وياها انقهرت منها حييل
مهدي : تبقى اختج صغيره وماعدها خبره بلدنيا لتصيرين انتي هم عليها انطي مجال جم يوم ورجعي احجي وياها هي ماعدها غيرج وانتي هم گلبج خلي ابيض اعرف بيج شكد تحبيها
ناي : روحي من الدنيا هي اختي وبتي وكلشي عندي
مهدي : لعد لتشيلين ايدج منها هي جم يوم وتوعى على سوايتها
ناي : هزيت راسي وسكتت ماعندي غيره والفكر اكل روحي واني اكول شصار بأختي وخلاها هيج
رجعت للبيت واباوع وداد مرتاحه
وداد : عيني ست ناي ماطول اختج ولت منريد بعد احد من اهلج يجي لا كل شويه واحد داك بابنه
ناي : عفتها وصعدت ولا جاوبتها
مر الشهر وبعده الشهر وطبينا ٢٠٠٧
بدت وداد شغله جديده وهي ليش ماحبلتي اگلت گلبي اكيد انتي عاقر ومتخلفين واذا عبرت السنه وماحبلتي ازوج ابني واني منطتها الاذن الطرشه
يمكن الصار بينا وبحالنا نسانه اهم شى جان المفروض نحسب اله وهو
حطيت رجلي بره اباوع على الدنيا والشمس سنتين مرن واني كاعد بين اربع حياطين وبين انواع البشر الخير والسرسري شفت اشكال المظلوم واليستاهل الذبح على جرايمه
عمري ١٨ سنه لمن حطيت رجلي بغلطه مراهقه لخاطر وحده متستاهل حتى افكر بيها وهاي الغلطه دفعت ثمنها سنتين واليوم طلعت خلصت محكوميتي وعمري ٢٠ سنه بس الصار جوه ويايه طلعني بعقل ٤٠ سنه
مديت ايدي بجيبي لكيت ١٠ الالاف زين عندي فلوس مشيت مسافه طويله واني احسب يايونس اهلك وين وليش صفيت وحدك حتى محد زارك صار سنه
معقوله نسوك خواتك ماتنغصن الك اشوف الي ويايه اهلهم اشكال يجيبون الهم اكل ومعجنات وملابس واني حتى محد زارني محد كال عايش ميت محتاج شى تعبان مريض من اخر زياره من مهدي ابن خالي ومرتضى وبعدها ماشفت واحد
اخذت تكسي وصلني لمنطقتنا مقبلت باب البيت ينزل كتله براس الشارع كمت اتمشى واباوع على البيوت اكو بيهن تغيرن واكو نفسهن الجو بارد واني بطرك القميص واجر بلهوا يابويه هوا الحريه شكد طيب مابيه جيفه ولا ريحه جكاير ولا ريحه المساجين المعفنه اجر بلهوا يمله ريتي واكح وارجع اتنفس واتمشى على كيفي وصلت لبيتنا المحل مسدود اتذكرت شكد تأذيت حتى افتحك واشتغل بيك وشون عمامي وكفو بوجهي وهاي تاليتك مسدود وكاتلك التراب رجعت باوعت عتبت الباب هدوء لا بلال يلعب بابنه ولا شرهب تكمز يمه واعيط عليها اطب لان كبرت اشتاقيت حتى لهوستهم
دكيت الباب ادك ادك ماكو مديت ايدي السرگي متغير منفتح رجعت ادك ادك ذوله وينهم لحد ماسمعت صوتها اي هاي هيه مااتيهه صوتها لو بين الف بنيه شجابها مو تزوجت انفتحت الباب وصارت سما بوجهي
