رواية احببت غجريه الفصل الثالث عشر 13 بقلم اسماء السيد

(من وسط العتمه)

ــــــــــــــــــــــــــــــــــــــ

بالوكر..

(نيسان..)

الخندق كان طويل وصوت الرصاص بيقرب والخطوات بتزيد..بس مش ورايا..ماعرفش فين 

كل اللي عرفاه ان لازم اجري.. صوت ضرب النار وصوت الرجال وعراكهم بيزيد وكأن في ساحه حرب بره.. 

وقفت وهنا خلاص مبقتش قادره اجري.. 

وقعت عالارض وحطيت ايدي علي ركبي واملي في شوفه بنتي بيقل.. حاسه اني روحي بتروح وان الاتجاه اللي مشيت فيه مش بيودي غير للموت.. 

بقيت في اخر الممر ومفيش مكان للخروج 

واتاكددت اني خلاص مفيش مفر

بس كان نفسي اشوف بنتي واملي عيني منها

الاكسجين بيخلص ودوامتي بتزيد

وصوت بيرن في وداني كل ما قوتي بتروح.

يقولي متخافيش

صوت بنت اتمنيته يكون بنتي..

استسلمت لدوامتي اللي مش عاوزه تسيبني.. 

دوامه ملهاش آخر كل ماقرب من حبايبي مصره  عنهم تبعدني.. 

خلاص..مفيش امل.

وقبل ما اروح في ملكوت تاني حسيت بايدي بتسحبني.. بتقولي..متخافيش انا جنبك.. 

وطاقه نور انفتحت وكانها بتقولي

خلاص من جوه المرار والضياع في امل

ـــــــــــــــــــــــ

(صبا..)

مشي إلياس  وسابني.. انادي وراه، عارفه انه خايف عليا.. بس انا كمان الهاتف اللي في وداني مش سايبني.. بيروح بيا لخيالات واماكن عارفه انها حقيقه ولا مره كدب عليا.. 

عارفه انه طريق خير مش شر.. 

وان الست اللي بشوفها دي ام اقرب حد ليا في الدنيا

فعشان كدا لازم الحقها..مهره تستحق بعد العذاب اللي شفته في الدنيا

لمحت الحرس محاوطني من كل مكان.. جزيت علي سناني وانا بقول ماشي ياالياس آن الاوان 

تعرف اني مش صبا اللي تنحبس.. 

هتشوف يابن النوارس

ابتسمت وانا عارفه انه هيقوم الدنيا كلها عليا 

ويمكن يعاقبني ببعده وهجره ليا

ويمكن يعند معايا ويروح لمراته الدنيا

كل ماافتكر ان في غيري مشاركاه حتي اسمه الغيره بتملاني وببقي عاوزه اقتله بايديا

انت ليا لوحدي ياالياس..

اوف..همست لنفسي..

دا وقته يامجنونه..لازم الحق الحوريه الحزينه..

غمضت عيوني وابتسمت وانا شايفه طريقي كويس وعرفت فين هياخدني.. 

مش قلتلكو انا مبخفش.. 

تليفوني معايا..ومساعديني العزاز..هيقومو بالواجب

رفعت تليفوني واتصلت عليه يقابلني هناك..

وهو هيكمل ويجيب البقيه..

كدا تمام اوي..

ـــــــــــــــــــــــــــــ

بالوكر.. 

تمام بذهول 

وهو بيبص حواليه.. يدور عليها.. 

بعد ماانتهي العراك قدامه المسلحين اللي مربط واللي مرمي.. 

وعلي يمينه إلياس. وشماله ساجي اللي انصاب برجله.. 

حتي عقبه قدامه مرمي.. بس فين هي.. راحت فين.. 

ملهاش أثر.. 

تمام بصدمه..

راحت فين ياألياس..؟ انا هتجنن..

إلياس.. وهو بيدور بعنيه في المكان.. مش عارف هتكون راحت فين يعني.. مش ممكن.. 

حتي التليفون اللي كان الوصل بينا مرمي اهو... 

ساجي بتعب وهو بيشير بصابعه للممر

بصو في ممر هنا يمكن مشيت فيه..

تمام للقوه اللي معاه.. خدوهم كلهم.. وخدو ساجي عالمستشفي

ساجي بتعب.. لا هاجي معاك.. 

ألياس بحده.. تيجي فين.. انت مش شايف حالتك.. يالا روح وانا وتمام واتنين ثلاثه بس هنسكتشف الممر وان شاءالله نلاقيها

انت نزفت كتير..ارجع انت..

ساجي بخوف.. انتو اتجننتو انتو عارفين بيوصل لفين.. وايه مستنيكو هناك..؟

تمام.. متقلقش لو حصل حاجه هنطلب الدعم.. روح بس انت.. طمنهم وطمنا عليك.. 

بقله حيله ارتمي ساجي عالسرير النقال اللي جبوه ليه..

هو فعلا تعبان ونزف كتير..

اللي حصل الليله بوظ خطط كتير وفتح العين بدري والامل بقي ضعيف في القبض عالكبير.. 

يعني لسه الدايره زي ماهي.. وقوه الشر واضح انها لسه موجوده..مش هتنتهي ابدا.. 

ــــــــــــــــ

بعد ماوصلو لاخر الممر انصدمو 

الممر مقفول ومفيش حد.. يعني مشيو دا كله والاخر الممر مقفول.. 

تمام.. وهو بياخد نفسه بالعافيه... مفيش حاجه راحت فين بس..؟

ابويا مش هيعديها عليا..

يالله.. هنعمل ايه دلوقت..

إلياس بتعب.. يالا بسرعه نخرج ليكون فخ.. يالا...واحنا لوحدنا والاكسجين بيخلص..

تمام.. عندك حق.. اظاهر ان الموضوع اكبر من عقبه نفسه.. 

ربنا يستر..

ــــــــــــــــــــــــــــــــ

بالمستشفي. 

ـــــــــــــــ

مهره بدموع..ألياس ارجوك قولي ملقتوهاش

ازاي.

آلياس بحزن عليها..للاسف لما وصلنا مكنتش هناك بس متقلقيش ان شاءالله هنلاقيها..

مد ساجي اللي راقد مربوطه رجله ايده ليها..

فلبت الند ودفنت راسها في حضنه..

خرج الكل وسابوهم..الموقف يحزن..وكل مالامل ينولد يرجع ينواد في ثانيه

(مهره)

طول الليل وانا بمني نفسي اني اشوفها حكايات مؤيد عنها وعن جمالها واني اشبهها فتحت قلبي ليها واتمنيت بس المحها واشوفها واترمي في حضنها..

بس رجعولي باغلي حد علي قلبي منصاب..جريت وانا بقول اكيد لقوها وهناك هترمي في حضنها..وتهون عليا اصابته

بس ملقتش حد غيره برده هو..رموها في وشي وقالولي ملقوهاش

غصب عني لقيت نفسي بسال اشمعنا انا؟

واشمعنا هي؟

ااه ياامي..

فتحلي دراعه فاترميت في حضنه..

خرج الكل ومبقاش غيري انا وهو..

همسلي..مهره.حبيبتي..

بكيت اكتر..وانا بقوله..كان نفسي اشوفها..

اشمعنا انا؟

رفعلي وشي..ومد ايده مسح دموعي بحنيه بتنسيني الدنيا..

ـ وحياتك لترجع بس انتي متبكيش،وبعدين مش قلتي حضنك كفايه عليا..

اترميت في حضنه وبكيت اكتر وانا بقوله..

ااه ياساجي..كفايه عليا..

بس دي أمي..غصب عني..

ضحك وقالي..هترجع..وحياتك هترجع ان شاءالله.

ـــــــــــــــــــــــــــــــ

برا في المستشفي..

كان واقف ألياس اللي قلبه متوغوش عليها وفي ايده تليفونه بيرن ومش بترد..

قرب منه تمام..في ايه؟

الياس..بتوتر..صبا مبتردش..خايف تكون جرالها حاجه..انا هنروح اشوفها..

تمام بخوف من ابوه اللي حايشه عنه طارق بالعافيه..

انت هتسبني وتمشي طارق حايش ابويا بالعافيه..هيموتني

الياس بابتسامه..تستاهل..

تمام.باستنكار.بتبعني يألياس..؟

ألياس بحزن..سيبه يفك عن نفسه ياتمام..كلنا في الهوا سوا..

تمام بحزن..عندك حق..شكرا ياألياس لولا مساعدتكو ليا مكناش وصلنا ليها..يكفي ان عرفنا مكانها

الياس بابتسامه..شكرا ليكو انتو ياتمام..انكو هتخلصونا من تجار السلاح وترحمونا منهم ومن تهديدهم للعزل والمواطنين..احنا معاكو لحد مانخلص منهم كلهم..دا واجبنا..

تمام..عاش ياصاحبي..يالا روح وانا ربنا يتولاني من الوحوش دول...

ـــــــــــــــــــــــــــــ

طارق..

نعم يامؤيد..

مؤيد بحزن..عليها..تفتكر هترجع..راحت فين؟

طارق بوجع بقلبه زي وجع صاحبه واكتر..اظاهر ان نصيبنا الفراق يامؤيد

استودعها عند ربنا ياصاحبي..ولو لنا نصيب هنتجمع كلنا من تاني..

مؤيد بحزن..حط ايده علي وشه يخبي دموعه وهو بيهمس بقلبه..

سامحيني يانيسان..ياريت يرجع بيا الزمان وانا كنت خبستك بايدي ولا سمحت لشويه كلاب يعملو فينا كدا..

ااه يارب..

(طارق)

من ساعه ماخرجت من عندها وانا حاسس بوجع في قلبي..وان في حاجه مني سبتها عندها

حاسس بان في حاجه هتحصل..

قلبي مامشي واخرج ارتمت في حضني ووصتني علي بنتها..

بنتها اللي من وسط جراحي وشوقي نسيت اسألها عليها وعلي شكوكي فيها..

فراقنا كان زي لقانا صعب..حاسس اني في دوامه

ملهاش اول من اخر..

عمال اقاوم اني اروح اخطفها تاني واللي يحصل يحصل

بس فجاه اتحركت رجلي..لمكانه..

رغم حزني منه وانه طول السنين دي كلها اتصل بيه وميردش عليه..

لقيت رجلي مفارقهم كلهم وريحاله..

وقفت قدام خيمته..وقبل ماادخل نادي عليا

زي ما كان دايما..

حافظ خطواتي..

دا ابويا مهما بعدت..ومهما غبت عارف معاناتي.

خش ياطارق..

دموعي نزلت وانا بجري ارتمي في حضنه 

وبقوله..

وحشتني ياأبويه..

طبطب عليا وقالي..

طالت غيبتك يابن الزناتي..

ـــــــــــــــــــــــــــــ

بعد يومين.. 

ازاي يابهايم راحت فين..؟ 

أنا هدفنكم كلكو.. 

الحارس.. والله ياسي ألياس انا جلتلك مره ماحد خرج من اهنه ولا دخل الست صبا بعد مامشيت انت داخله جدامنا من اهنه..

ألياس بجنون..صبااااا مفيش فايده فيكي.. 

ساجي بتعب بيتسند بالعافيه.. علي رجله المصابه.. 

اختي فين ياألياس انا امنتك فيها.. 

الياس بحزن من امبارح وهو قالب الدنيا عليها 

مش عارف، مش عارف..

مفيش مكان مدورتش فيه..أختك هتجنني

ساجي..لو اختي جرالها حاجه مش هسامحك يالياس..مش مسامحك ابدا..

الياس بوجع..مش لما اسامح نفسي الاول...

ااه ياصباا..بس اما الاقيكي..

يارب..

ـــــــــــــــــــــــــــــ

بمكانهم السري

مكان الخطط والمؤامرات زي ماهما مسمينه..

ميعرفش بيه غيرهم..

صبا بغيظ من سبأ..

سبأ انجزي خلصي..هي هتبقي كويسه ولا لا..

دي لسه بتخطرف ومش معانا خالص..

سبأ وهي بتاكل الجزره وبتغني اغنيتهم المفضله

انا الغجريه بنت الوادي والصحرا

انا المولوده تحت السما الحره..

سكتت وقالت..

اه يعني ساعه ولا حاجه وتفوق..دي بس اكمن حرارتها عاليه..اول ماتتظبط هتبقي فل..

صبا بغيظ..انتي يابت هتشليني..اقسم بالله..

بقالك يوم كامل تقولي كدا..

سبأ بغيظ..وهي بتاكل اخر حته في الجزره..

ماهو انتي لو واثقه في قدراتي مكنتيش كل شويه سألتي..

وبعدين لولايا مكنتيش عرفتي تتحركي..

صبا..اوف منك نفس النغمه اهو..وبعدين متنسيش زهري شريك النصايب هو اللي بيلحقنا

بس يكش ميقرش مع اول قلم من الزناتي..

سبا  بانتباه..محكتيليش يعني حكايه نيسان دي..من بدري وانتي بتقولي اتقلي هقولك..

ـ غجريه اسرت قلبي✍️أسما السيد✍️

صبا بغمزه..نيسان دي تبقي عمه حبيب القلب..

سبأ بلهفه..يلهوي قولي بجد وانا اقول الواد.دا جايب الحلاوه دي منين اتاريه من عمته..

سبأ بعد ماافتكرت ألياس..صبا انا مقولتلكيش الياس قالب عليكي الدنيا برا..وسمعته بيقول لتمام..تلاقيها عملت نصيبه تاني وهربيها يعني هربيها..

صبا. بصدمه..وهي بتجز علي سنانها،ماشي ياألياسان موريتك..

وبغمزه كملت ..سيبيه، خليه يدور عليا...

سبأ بذهول..جباره..طب ومهره..؟

صبا بتنهيده..خلينا بس نطمن علي الغلبانه دي وتفوق وتبقي قد المواجهه..لازم تقوي وتقف علي رجلها..صعبانه عليا قوي وانتي عارفاني مبحبش الست الضعيفه

لازم قبل ماتخرج من هنا تكون قويه..

سبأ بفخر..كل يوم بيزيد فخري بيكي ياصبا..

انا همشي انا بقي خلي بالك لو حصل حاجه كلميني..انا جبتلك شريحه جديده وشحنتها..

هتعسس عالاخبار واجيلك بس ادعيلي ابني عمي يحل عن سمايا..احسن هترتكب فيه جريمه..

صبا..مهره عامله ايه.؟

سبأ..حزينه..وساجي حزين عشانك وعشانها..فكري تاني ياصبا ابن النوارس المره دي مش هيعدهالك...

صبا بابتسامه ماكره..تفتكري هيعرف مكاني..؟

سبأ..بقله حيله..مجنونه..اما اروح الحق تمامي..

صبا..بضحك..روحي ياختي روحي..

ومتنسيش تخليه يمسكلك الفار..

سبأ..بضحك..فكرتيني..جيالك ياتمام..

ــــــــــــ

(صبا)

اول مره ابقي مبسوطه ومرتاحه من خيالاتي واللي معايا كمان....انك تنقذ انسان برئ كل ذنبه في الحياه انه سلم نفسه للحب والصحبه بكل امان  وطيبه، اجمل ماعملت في حياتي

بعد ما سابني الياس..اتمنيت بقلبي اساعدها

وفعلا جالي الهاتف وشوفت كل حاجه بعنيا..

وزي العاده لما بحب اعمل حاجه بعملها

انا مبخفش وفي الحق عيني قويه..

المكان اللي شوفته مكنش بعيد عن قصر الجزيره كان باقي، بس ازاي اخرج من قصر ابن النوارس..

مفكرتش هيزعل مني ولا هيعاقبني كل اللي فكرت فيه ان الست دي ضحت بعمرها كله وانغدر بيها من كل الدنيا..

هنا بس صوت المرأه طلع من جواتي وقررت اساعدها بكل قوتي.

من ورا قصر الجزيره قدرت اخرج معرفش ازاي لقيت كل حاجه سهله قدامي

بس اللي انا متاكده منه ان مدام نويت الخير ربك بيسهل كل حاجه قدامك

في الاخر دي نفس بريئة عانت من الظلم والوحده ليالي.

الياس حكالي حكايتها وحكايه مؤيد والصديقه الخاينه اللي مكرهش حد في حياتي قد الصحبه الخاينه.بقرف منهم..والحمدلله لحد الان مقبلتش الصنف دا في حياتي..

جريت بسرعه، لحد ماوصلت قدام المكان اللي شوفته في الخيال

الهاتف جاني وقالي هو دا..

كان صوت الرصاص واصلي في وداني

كنت خايفه تكون النهايه واموت ومامليش عيني من شوفه ابن النوارس..

بس مهتمتش قربت من باب الخندق اللي تحت الارض وفحرت بايدي في الرمل لحد ماظهر باب من الحديد قدامي وبكل قوتي شديته فظهرت هي بتعاني عشان تاخد نفسها..

بتقاوم دوارها..وخلاص هتروح في عالم تاني..

لمحتني..مديت  مسكتها ومدت ايدها..

ومسكتها بايديا..

وقولتلها متخافيش انا جنبك..

نزلت بعد  ما وقعت عالارض بتفتح عنيها وتقفلها..

بالعافيه..

قولتلها متخافيش انا صبا مرات ابن النوارس

همستلي بتوهان، الياس..

ابتسمت وانا بحاول اعدلها من عالارض..اه هو..ولو عرف اني انا اللي ورا انقاذك هيولع فيا..

بس مايهمش انا عاوزه ادوخه شويه..

كانت بتروح في دنيا تانيه خلاص.

قولتلها اجمدي بس نطلع من هنا..

هزت راسها وهي مش قادره تتحرك..

لمحت زهري اللي اتصلت بيه وانا جايه وعرفته المكان..

بيبص في الخندق ويقولي..

ـ صبا ياملكه الاذيه انا عارف نهايتي علي ايديكي ياوليه..

جزيت علي سناني وقولتله شيلها يازفت انت..دي اغمي عليها مش داريه بحاجه..

زهري بولوله..هاتي يختي..انا عارف مبيجيش وراكي غير النصايب..ربنا يستر..

خرجناها برا وركبناها عربيه زهري..وروحنا المكان اللي محدش يعرفه غيره هو وسامر ومهره لو فكرت شويه وطبعا شريكتي في الاذيه طبعا عارفينها سبأ..

واول ماوصلنا كانت سبأ وصلت واسعفتها وعلقتلها محلول مغذي وشويه تفتح وشويه تروح في دنيا تانيه.. 

اتنهدت وانا سمعاها بتنادي باسم عقبه شويه..وساره شويه..ومرات كتير باسم مؤيد..

اكيد دا ابو الغبي عاشق الغجريه..

ـــــــــــــــــــــــــــــــــــ

سبأ..

انا الغجريه بنت الوادي والصحرا.. 

انا المولوده تحت السما الحره... 

(تمام)

من امبارح وانا مش عارف اتلم عليها.. ابويا غضب مني بعد ما مقدرتش انقذ نيسان.. 

للاسف هو عنده حق.. الكل علي اعصابه بعد اصابه ساجي والكل بدا يشك.. 

الجو مكهرب حتي التعليمات اللي جتلي ان الموضوع بقي اخطر من الاول بس انا مستمر يااجل ماتنكشع الغمه وينفك الكرب.. 

اتنهدت بحزن وانا مش لاقيها مخفيه من امبارح..

وانهارده اجازه..مفيش جامعه..

حتي جار الينبوع مش موجوده..

بدور وشي ياجل ماارجع اتعسس عليها في حته تانيه

لمحتها جايه بتبتسم بتغني اغنيه..

غصب عني ابتسمت بتحرق دمي في ثانيه وتنسيني همومي في الثانيه التانيه...

قربت مني بهدوء..وهي بتغني..

تمام بغيظ...كنتي فين يادكتوره سبأ؟

ابتسمت وقالتلي بهمس..وحشتني ياعيون سبأ..

لسه هتقرب عليا..

سمعنا صوت حاد قوي..

بينده عليها..

وبيشدها من ايدها بقوه..

سبأ..

ـــــــــــــــــــــــــــــــ،

الاسكندريه..

الجامعه..

سوزان..

ايوا..يامازن...

مازن..مش هتيجي تقعدي معانا في الكافتيريا شويه..

سوزان بتوتر..لا مش هينفع مستنيه خطيبي...مره تانيه

مازن بصدمه..انتي مخطوبه.؟

جاله صوت زي الرعد من ورا..اه مخطوبه..وياريت تهوينا شويه.

مازن بغيظ..مين حضرتك؟ 

وازاي تدخل كدا.مين سمحلك..

(سامر)

من يومين مارحتش الجامعه خصوصا بعد قلقها علي والدتها وقله اتصالها..

وانهاردا بس قررت تروح..

غصب عني كنت مبسوط من بعدها..انا مش اناني بس الغيره بتنهش فيا..

بيقولو دايما..ابعد عن بنات الغجر بيسرقو الفراشات من عالشجر

بس مقالوش، عن غيره رجال الغجر اللي  زي نار الحجر..

غيرتي نابعه من جوا قلبي..لما بشوفها بتبتسم لغيري بحس بنار طالعه من جوايا حتي لو كان طفل صغير..

مش ذنبي اعمل ايه....؟

دي طبيعه نفس وغيره متوارثه اتربيت عليها.

قلبي مش طري وعشقي حامي..وهي عارفه وانا قلتلها الكلام دا

وصلتها الصبح للجامعه بعد تعليمات مني لا بتنتهي ولا هتنتهي..

وطول اليوم مش شايف قدامي..غصب عني بفكر

ياتري قبلته..كلمته..ولا اتعرفت علي مين تاني...؟

ماهو مش هقدر امنعها عن كل الدنيا للاسف

الشغل كله عليا بعد ماوكلني بيه طارق

طارق اللي من ساعه، رجوعه من ارض الغجر وهو واحد تاني..

لا بقي مركز ولا شايف..وولثقته فيا اداني مكانه..وهو يدوب بيمضي وسارح وعلطول ماسك تليفونه..ومتوتر وقرفان..

كله في مواله بيبكي علي حاله..

وفي نص يومي مقدرتش اكمل..

دلوقتي عندها بريك..الغيره نهشت قلبي وانا متاكد انها هتحتك بيهم..العالم مش انا وهي لوحدنا

سوقت بسرعه ولقرب الشركه من الجامعه وصلت في دقايق..

وزي مااتوقعت لقيت..واقف البارد يكلمها

بس قبل ماكمل سمعتها بتقر وتعترف اني خطيبها الجمله ريحت قلبي..بس رده فعل الغبي دا استفزتني مدرتش بنفسي الا وانا مديله لكمه في وشه وبقوله..

ـ انا خطيبها ياروح امك..

شهقت بقوه والكل في ثانيه اتلم عليا..سحبتها من ايدها..انا كنت عارف اني هطين الدنيا

بقيت اهدي نفسي..

اهدي..اهدي وهي بتبصلي بصدمه..

اديرتلها بعد مامشيت شويه بالعربيه..هتفضلي بصالي كدا..؟

بصتلي بذهول اكبر وقالت..انت مجنون..ايه اللي عملته دا..معملش حاجه..انت فضحتني

قبل ماتكمل كنت موقف العربيه..وشددها ليا..

بتقولي ايه..سمعيني تاني..

اسمعي اما اقولك..انا هتجوزك اخر الاسبوع 

وافقتي موفقتيش هتجوزك..وهتلبسي النقاب لو عاوزه تكملي ياسوزان..

بصتلي بصدمه..اكبر..وقالت وماما..

بصتلها وابتسمت..يعني انتي موافقه..

غمضت عين وفتحت عين زي القطط وقالت..

لو ماما محضرتش مش هتجوز..

اتنهدت..وقولتلها..

والنقاب...؟

ابتسمتلي ابتسامه صفرا انا عارفها.. بتضحك عليا بيها..وقالتلي...سيبها بقي بظروفها..

وجزت علي سنانها وقالت..وبعدين هعوز النقاب في ايه ماانت ماشي ورايا اهو..متقلقش بعد عملتك محدش هيقرب مني..

ابتسمت وغمزتلها..انتي ممتلكاتي الخاصه ياسوزان..وياجل عيونك اهد الدنيا..

وأنا حذرتك..وانتي حره..

ــــــــــــــــــــــــــــــــ

بقصر النوارس.. 

 ثناء.. بذيداكي اجده يا مرت عمي.؟

دريه بحقد..اسمعي اللي بجولك عليه.وملكيش صالح..

ثناء بدهشه..ازاي..دي ماعدتش داريه بالدنيا من يومين وهي نايمه..حرام اجده 

هي عملت ايه.؟ ماهي فيتاهولك اشبعي بيه..

دريه بحجد..هي اللي جبته لروحها..

التوليفه دي هتخليها تغيب عن الدنيا..وميعرفولهاش علاج لحد ماتموت وتغور في داهيه.

ثناء بصدمه..جبتيها منين دي يامرت عمي.

دريه بانتصار..ملكيش صالح انتي ياثناء نفذي اللي جولتلك عليه..واهو كله بتمنه..

حطيها في العصير زي كل يوم..

ثناء..بخوف..لع يامرت عمي..ماليش صالح بيكي..

انتي حوره..بكفيانا اذيه..

دريه..بصدمه..بتعصيني ياثناء..خلاص..

ثناء..انا كنت طاوعتك ياجل مايرجعلي الياس.بس للاسف انا كنت غبيه..اسفه انتي ميهمكيش غير مصلحتك يامرت عمي

ولو حصل ووقعت مش هسمي علي حد..

دريه بغيظ..متتحدنيش ياثناء..واسمعي الكلام..

ثناء..بحده..وان ماسمعتش يامرت عمي..

دريه بابتسامه صفرا..يبقي اتحملي اللي هيجرالك ياثناء انا مهتهددش وانتي خابره

وزي ماعملت في خوكي..

هعمل فيكي..

ثناء بحده..عملتي ايه في مهران؟

دريه بشماته..بكره يجيكي خبره..

هااا..جدامك خيارين..ياتنفذي ياتحصلي خوكي

وفي الحالتين..كله بتمنه..

سابتها ومشيت..وبصت هي ليها بخوف..

ومدت ايدها تنفذ اللي عوزاه..وهي بتقول

ياترا عملت فيك  ايه يااخوي المفتريه..

ومخدوش بالهم من الاتنين اللي سمعهوهم..

خديجه الخادمه..

يلهوي..يامراجل، ابلتي ثريا كده هاتروح فيها لازم نلحقها دول كلهم شر...

مراجل الغجريه.. مفيش غير حل واحد.. 

خديجه بلهفه.. ايه هو..؟ 

مراجل (غجريه بتشتغل في قصر النوارس من زمان وبتحب ثريا وبنتها جدا) 

وقبل ما تكمل كلامها..

كان صوته الملهوف  قاالب الدنيا..

ثرياااا..

ـــــــــــــــــــــــــــــــــــ

تشتد وتشتد ومن وسط دموعنا نقول يارب

تنزاح الغمه وينفك الكرب..

ومن قلوبنا ندعي يمهد لينا الدرب

من وسط العتمه يظهر نور الشمس

ومن وسط دموعنا نلاقي الفرح

دنيا وماشيه برضا الرب..

بس نقول ياهم عندنا رب..

قادر يمحي دموعنا ومن وسط العتمه يظهر نور الشمس

تنزاح الغمه وينفك الكرب..