رواية بنت الكهوجي الفصل الرابع عشر بقلم احمد
ياقوت : جنت اباوع للبيت وافكر شگد يرادلنا لحد ما نستقر بيه اكيد راح نتأخر هالمرة لان ناقصنا هواي اشياء بس إن شاء الله نكملهن بسرعة
جانت اكو مشكلة وحيدة وهو انو الجو بارد كلش وايام الشتاء تكون قصيرة الواحد ما يلحگ يسوي اي شي بسرعة يخلص النهار
لذلك ممكن نواجه شوية تأخير بالاستقرار بس ويا الوقت كلشي راح يترتب وبسبب الحلويات عطشت فرحت جبت الماي ورجعت
شلون طلعت من الممر اريد اشرب ماي وتجمدت بمكاني واجت عيوني بعيونها وهي واگفة عند علاگة الحلويات وتباوعلي
بقيت واگفة بمكاني خفت اتحرك وتنهزم وهي خايفة مني لان ما تعرفني وبقت بس تباوعلي اخير شي تقدمت عليها
من تحركت انهزمت وگفت بمسافة 3 امتار تقريبا عني فتحت كعك من الي مرسوم عليه فنجان وكسرت كسرة صغيرة ومديتها الها
اجت تمشي بحذر علي وجانت تقريبا بگد كفوفي اذا امسكها بايديني من وصلت يمي گالت مياو احس اخذت عقلي وياها
شمت الكيكة وما عجبتها بس الغريب انها ما عجبتها وبقت گاعدة قريب مني وبكل حذر مديت ايدي عليها وصرت امسح على راسها
صارت تقرب راسها من اصابعي وكلش حبت الحركة هاي وغمضت عيونها الحلوات وبين ما اني مندمجة وياها سمعت صوت سيارة قريبة من البيت
شلت الحلويات بايد والبزونة بالايد الثانية واخذتها وياي للمخبأ مالتي وسمعت صوت تميم يحجي ويا بابا ودا يتساعدون بالكاونتر
بقيت ماسكة البزونة واضحك على شكلها وهي بكل لطافة تباوعلي وساكتة ومن خلصو بابا وتميم من الكاونتر اندگ الحايط وطلعت ركض
رحت اركض ومديت ايدي لبابا گلتلو شوف شنو اجى علينا
ادم : منين اجت هاي
ياقوت : ماعرف رحت اجيب الماي ولگيتها عند علاگة الحلويات
- خاف عدها ام لو اهل يدورون عليها
- ماعرف بس فدوة بابا خلي نبقيها يمنا بلكي محد يجي عليها
- يا بوية الحيوانات ذني اغلبهن بيهن امراض
- لا مابيها شي اني اسبحها وانظفها
- صفن شوية .. لعد روحي هسا غسليها
- ماكو ماي حار منين اغسلها
- احميلها ماي سوي اي شي المهم اغسليها هسا
- تمام .. يااااااي صار عندي بنوووتتتة
رحت اگمز للمطبخ وبابا يضحك على ردة فعلي حطيتها بالمطبخ وسكرت الباب علمود ما تطلع وحميت ماي واخذتو للحمام
من بلشت اسبحها تخبلت لان البزازين كعادتهن ما يحبن الماي بس لان صغيرة جنت مسطيرة عليها وغسلتها ونظفتها كلش زين
رحت اخذت قطعة قماش من الي مخصصتهن للمطبخ نشفت جسمها وخليتها بالشمس علمود ما تبرد وهم ينشف جسمها
قطع اندماجي صوت الباب من انفتح ودخل بابا بايدو كرتون بحجم صندوق خظراوات تقريبا گال هاج هذا خليه الها
اخذتو وجان اكو ملابس عندنا اني وبابا صارن قديمات كلش فرشتهن بالكرتونة وحطيتها بيهن وبعدها بلشت بالغدا
جانو بابا وتميم جايبين كاونتر من هذا الالمنيوم طابق واحد ووياه سنگ من كملت الغدا تغدا بابا ونام لان جان كلش تعبان
اني اول شي سويتو نظفت الغرفة قبل ما بابا ينام بيها ومن نام بلشت اسفط الملابس ومن خلصتهن رحت للمطبخ ومسحت الكاونتر
بعدها بلشت اسفط المواعين بيه ومن كملتهن شطفتو وتوجهت للصحيات هم نظفتهن واخير شي بقت الغرفة الثانية نظفتها وسفطت الاغراض بيها واخير شي الحوش
بعد ما كملت احس ظهري انكسر واجى باذني صوت الميو مالتها وانداريت لگيت بابا واگف بباب الغرفة گال تعالي شوفيها خبصتنا بصياحها
ياقوت : يمكن جوعانة نسيتها
ادم : تعالي وكليها خطية انشلع گلبها
- صدگ شوكلها هسا
- اسلگيلها بيض لان صغيرة
- تمام
رحت حطيت بيض الها والنا اني وبابا ورحت العب وياها وبسرعة تعودت علي جنت احط ايدي بطارف الكرتونة وتجي تصعد على كفي وتحضن المعصم
بعدها رحت جددت وضوء وصليت المغرب وحطيتلها عشاها بالاول وحطيت ماي الي عالطباخ علمود اسبح بس قبل ما تكمل اكل اجى بابا
اخذ البيض مني وصار يوكلها بايدو واني گاعدة يمو واباوعلها ومن حمى الماي رحت سبحت ورجعت لگيت بابا مشغل الصوبة
مشطت شعري ورحت عالسريع حطيت العشى ورجعت للغرفة جانت شوية دافية والبزونة صايرة بمسافة عن الصوبة ونايمة
تعشينا ومن خلصنا بابا گال لا تغسلين المواعين هسا لا تتمرضين گلتلو تمام وبقينا گاعدين بالغرفة ونحجي بمواضيع مختلفة
ادم : باجر عندنا شغل وراح نتعب بيه هواي
ياقوت : شنو من شغل
- الجينكو من فوگ المكان مالج مو ثابت ويا الجدار ولازم نحطلو بلوك من فوگ
- ليش ما تثبتو بلحيم مو احسن
- اني تعمدت اسويه هيج
- ليش
- لان اريد احطلج صوبة بواري هناك وصوبة هنا علمود من تروحين تشغليها وادمج بوريها ويا هاي واخفيه ورا البلوك
- بس شلون تفتح السگف راح ينزل علينا ماي بالمطر
- لا اكو عجينة بالسوگ افرها عالبوري بحيث حتى رطوبة ما تعبر لعد اهل قبل بالمدن كلهم يطلعوها ويا السگف
- ماعرف لعد انت ادرى
- المهم راح نتعب بالبلوك
- مو مشكلة نتحمل هو يوم واحد
قبل ننام تأكدت من البزونة انها متغطية زين ودفيانة ورحت نمت وما گعدت لثاني يوم حتى صلاة الفجر ما گعدنا عليها من التعب
اول ما گعدت حسيت شي عند صفحتي كأنو حية ملتفة على نفسها ونايمة يمي وفزيت فزة ما اتمناها لعدوي وويا فزتي انهزمت البزونة
باوعت عليها جانت واگفة بزاوية الغرفة خايفة طلعت هي نايمة يمي صفنت عليها مثل الام من ابنها يسوي شي غلط ويضوجها
بعدها تقربت مني وصاحت مياو فورا هدأت وراحت مني الفزة من وصلت يمي شلتها وباوعت بوجهها گلت كون ما يفززني غيرج يا عمري
اندگ الباب وراح بابا فتحو وجاب الريوگ كالعادة وصلينا الفجر وحطيت الريوگ وبابا وصاني اعزل شوية خاثر (لبن-روبة) للبزونة بصحن لحالها
تريگنا وگعدت بالحوش اغمس الخبز للبزونة وانطيها وهي تلحس الخاثر الي عليها وبابا راح للسوگ يجيب الصوبة وسخان الماي
من خلصت البزونة اكل غسلت المكان مال اكلها وخليتها تلعب بالشمس بين ما اجى بابا وجاب وياه السخان والصوبات
رحت للغرفة ودخلو الغراض هو وابو السيارة ومن نزلوهن كلهن راح ابو السيارة واني رحت على بابا وساعدتو بالسخان وديناه لمكانو يم الحمام
وانتبهت ان اكو سخان ثاني گال بابا للمطبخ لان المطبخ بالجهة اليمين والحمامات بالجهة اليسار وودينا كل واحد لمكانو
بدا بابا يشدهن واني اساعدو والشي الحلو ان السباك مسوي البواري على قياس السخان بالضبط بحيث ما غيرنا بالبواري اي شي
والسخانات ثنينهن رابطين عليهن الهيتر بالمحل يعني احنا بس شدينا البواري مالاتو والواير مال الكهرباء وصار جاهز
والثاني هم كملناه وصارت الساعة 10 واجى وقت البلوك والي لازم نخلصو قبل ما يجون ولد الشيخ من الدوام علمود ما يجون يساعدون بابا ويشوفون المخبأ
صرت انقل البلوك ويا بابا من طارف الحوش للطرف الثاني لان البلوك الزايد جانو مسفطينو بطارف الحوش بس جان كلش ثگيل
انتبهت ان بابا دا يشيل ثنين ثنين ومن يمشي متوازن وثابت اكثر مني ومبين انو متعلم على هالشغل من زمان مو شغل يوم ويومين
نقلناهن بنص ساعة تقريبا وبعدها تركت بابا ورحت اسوي الغدا بامر منو طبعا وهو جان يشيل البلوك يسفطو عالحايط وكل ما يسفط عدد يصعد عالحايط ويوصلهن فوگ السقف ويرجع يصعد غيرهن
والحمدلله صارت الساعة 11:30 خلصهن وبنص ساعة بس سفطهن مثل ما هو يريدهن ونزل اخذلو دوش ويا اذان الضهر
قبل ما يكمل الغدا انتبهت ان بابا اخذ الصحن الي خصصناه لاكل البزونة نظفو ومدري شنو حط بيه وراح انطاه للبزونة وگعد قريب منها
ياقوت : شنو حطيتلها
ادم : اكل جبتو الها وياي
- شو ما ادري بيه
- جان بالعلاگة ونسيت ابلغج بيه
- شنو هذا الاكل
- شمعرفني لگيت بيطرية بالسوگ وسولفتلو عالبزونة وانطاني هذا الاكل وگال تخلط وياه شوية ماي علمود يما يسببلها جفاف
- عاشت ايدك والله يعوضك
- آمين .. شصار عن الغدا
- ثواني ويكمل
- تمام
ياقوت : رجعت للمطبخ وكملت الغدا وتغدينا اني وبابا وبعدها اخذتلي دوش وبابا راح للمضيف
( البزونة ماراح اذكر شي عنها بعد هاي الملاحظة لان ما الها احد سأل عنها ولا الها ام وبقو ادم وياقوت يهتمون بيها وما اريد اذكرها علمود ما تعتبر شخصية اخرى بالقصة)
مر اليوم طبيعي مابيه احداث تذكر وثاني يوم الصبح بابا بلش بالصوبات وركبهن ضبط البواري مال الدخان وبقى بس نعبيهن گاز ونشغلهن
المخبأ حطلو صوبة صغيرة والبوري مالها فتحلو فتحة من الجينكو ومددو بضهر البلوكات وجمعو ويا بوري الغرفة بقطعة وصل ثلاثية
وحاليا المخبأ جهز والبيت جهز واستقرينا ببيتنا وبابا بلغ الشيخ بهالشي هذا وبلش بشغلو الطبيعي وجان عندو الصبح استراحة لورا الغدا لان اغلبهم عندهم دوامات
جانت امنيتي ارجع لدوامي ودراستي ودائما اتذكر صديقاتي بالمدرسة وافكر هسا هم اشتاقن الي افتقدني سألن عني
يا ترى اكو وحدة منهن عرفت قصتي وفقداني لماما وباسم شگد صعبة من تتغير حياة شخص ويكون ما بيدو شي يسويه غير انو يراقب حياتو تتغير
تميم : مرت الايام وبلش باسم ببناء بيتو وجان مصر ان هو يبناه وتركناه على راحتو بس وفرنالو عاملين وبدون ما يدري گلنالهم يومياتكم علينا
جان يريد يبني بيت عبارة عن غرفتين بدون صبة ارضية وبدون لبخ مجرد جدران ويدرزهن تدريز (يسكر الفراغات الي بين البلوك)
بس اني وجدي ما وافقنا وخليناه يبني بيت احسن من الي جان هو مخططلو جنا دائما نحاول نساعدو او نوفلو الاشياء الي يحتاجها
بس هالانسان عندو عزة نفس بشكل فضيع وهذا الشي زاد شكي بموضوع اجار البيت لو طماع جان اقتنعت بس مبين انو بالعكس
مرت الايام وبدت تكمل ملامح البيت شوية شوية وجان كلش خجول وما يگول هالشي ناقص ولهالسبب صرنا احنا ندقق بالنقوصات بدالو
وفوگ تعبو يجي للمضيف باوقات الفراغ علمود يشتغل بس جدي جان يمنعو وبدال ما يسوي گهوة يگعد يتعلل ويانا ويسوون گهوة زيد او زياد
اني بالجهة الثانية جنت اجهز لزواجي واتفقنا ويا عمي وحددنا المهر وبلشنا اني وياسمين (بنت عمي) نجهز للعرس وتحظيراتو
ممكن البعض يسأل ليش لحد الان ما تزوجت وانت ابن شيخ فالجواب انو جنت مخلي كل تركيزي عالدراسة وحتى صارت مشاكل ويا اهلي لهالسبب
جانو يگلولي تزوج وكمل دراستك بس اني ارفض لان اعرف مسؤولية الزواج ما راح تخليني اركز بدراستي ومستحيل انجح
والحمدلله من خلصت وصرت دكتور ارتاحيت وهسا صار الوقت انو اتزوج واكون عائلة وافرح اهلي بعد طول انتظار
جان الشي الوحيد الي شاغل بالي ادم وغموضو وموضوع البيت واول شي خلصت منو هو البيت من كملو وانتقل عليه
جدي گالو ممنوع تشتغل قبل ما تستقر ببيتك وترتب امورك وهو خلال يومين كمل كلشي وبلش بشغلو الطبيعي
جان كلش مؤدب ومحترم بس تعرفون بهيج حالة الشيطان يبقى يوسوس اخير شي قررت اروح للشيخ الي جان يشتغل عندو ادم
وما انطيت خبر لاحد علمود محد يمنعني او يوصل الكلام لادم ويصير موقفي كدامو مو حلو وانتظرت ليوم السبت من الصبح ركبت سيارتي وتوكلت
بالتسعة خابروني اهلي گلتلهم عندي شغل لا تنتظروني عالغدا وكملت طريقي تقريبا 5 ساعات وصلت قريب من بيت الشيخ
وصلت يمهم واني افكر شنو انطي حجة على وجودي وماكو غير انو جان عندي شغل قريب منهم ومريت اسلم واتطمن
هم من شافو سيارتي وصلت يمهم انطو خبر للي بالمضيف واجى الشيخ ووياه اعتقد اخوانو رحبو بي ترحيب حار ودخلوني للمضيف
الشيخ : حياك الله وزارتنا البركة
تميم : ابقاك الله شيخ شلونكم شخباركم
- الحمدلله بخير انت شخبارك
- الحمدلله من شفت هالوجوه الطيبة صرت بخير
الگهوجي : تفضل .. وانطاني الگهوة
تميم : زاد فضلك .. بعد ما شربت الگهوة .. الگهوجي متغير لو اني متوهم
الشيخ : اي متغير ابو باسم ترك الشغل قبل فترة
- عسى ما شر
- ماعرف والله يگول ماگدر اكمل بشغلي وشگد حاولت وياه لان خوش انسان بس ما اقتنع
- للامانة اول ما شفت الاخ توقعت ذاك مقصر لو شي ومتخارب وياه
- لا والله ابو باسم ماكو منو بس گلتلك هو ترك الشغل وهم صارت حزازيات بينو هو وابني معتصم وترك الشغل
- بيها الخير الله يوفقو وين ما يتوجه
- آمين .. بس ما گلتلنا عن سبب هالزيارة الحلوة
- جان عندي شغل قريب وگلت امركم اتطمن على اخباركم
- حياك الله باي وقت والله يحفظك ويطمن بالك
- آمين واياكم
حجينا شوية ومن قررت امشي تخبلو شلون تجينا وتمشي بدون غدا وما خلوني امشي الا تغديت يمهم وگضيتلي نص ساعة بعد الغدا ورجعت
كلامهم زادني حيرة بس من حجى عن الحزازيات بين ابنو وادم استنتجت منو ان ادم بسبب المشاكل ترك الشغل واجى يمنا
بس الاهم هسا ان ادم خوش رجال حسب كلامو ويكفي انو ما يقصر بشغلو او يسوي شي مو زين هذا بالنسبة النا كافي
رجعت للبيت متفلش من التعب من وصلت سلمت على امي وگلتلها صار عندي شغل بالجامعة وتوجهت لغرفتي اخذتلي دوش ونمت
ثاني يوم احد ودوام ورحت للجامعة وما رجعت للبيت لحد ما دگت الساعة 2 الظهر تغديت ودا انتظر الجاي وطب زيد مستعجل
زيد : تميم
تميم : ها شبيك
- ابو باسم فقد الوعي
- ياربي سترك
رحنا ركض عالمضيف جانو اخواني مصعديه بالسيارة وتوجهنا فورا للمستشفى جيكو الدكتور گال ما بيه شي مجرد هبوط بالضغط
شكلو مغذي ومن خلص رجعناه للبيت ووصيناه يبقى مرتاح بالبيت هاليومين واحنا بكل الاحوال ماعندنا مناسبة لو گعدة علمود نحتاجو
ياقوت : جنت بالمطبخ دا اسفط المواعين وشلون خلصت طبو بابا وتميم واخوه واول مرة يجون هيج فجأة وانتبهت لبابا مشيتو ثگيلة وسانديه ثنينهم
مادري شلون تحملت وبقيت بمكاني علمود ما يشوفوني ولان بالمطبخ اني وهم ملتهين ويا بابا فما جانو يدرون بي
انتبهت لنفسي ووگفت ورا الحايط وگلبي مثل النار على بابا اريد اعرف شبيه وليش هيج حالتو واسمع تميم گال لاخوه جيبلو ماي
اجى اخوه للمطبخ وويا كل خطوة تزيد دگات گلبي وينترس گلبي خوف والمشكلة لا اكو مكان اختل بيه ولا اگدر اصير ورا الباب لان راح يشوفني اكيد فبكل الاحوال انكشفنا اني وبابا
شكرا لزيارتكم عالم روايات سكيرهوم
