 |
رواية الابواب الخمس الجزء الثاني الفصل التاسع عشر بقلم ريام الهادي
اصيحن اخ يادهري وجرحاي
واعتن بالوكت كوة وجرحاي
جروح الناس تتعالج وجرحاي
اخيط هاي تنزف هاي بيه
شرهب : جذاب عمه والقران جذاب طب عمي واحنا نحجي وجان عدي جاي وياه انصدمو من شافو حالي وصوت العياط
ابتسام : يمه لا تصدكيها اصلاً هو ايهاب دوم يشكي منها ويكول تتحارش بيه وتسوي حركات
ابو عدي : شصاير هنا
شرهب : كعدت بلكاع ابجي عمي انت مو تكول انتي بتي اليوم بتك راد هذا يلوث شرفها ترضاها
ابو عدي : شنو هذا الحجي بتي منو يطخ شعره منج ولكم شصاير احجووووووو
ابتسام : بابا هاي جنتك وحده ادبسسز وخفيفه ومراهقه ذبت بلاها على رجلي
ايهاب : عمي صار شكد عايش عدكم شفتو شى مني بدر مني شى موزين
شرهب : كمت وكفت واعيط عمو وروح ابويه مستعده احلف على كلام الله هذا الحقير تحارش بيه جنت وحدي بلبيت ولوما ركضت وسديت الباب جان الله اعلم شسوه بيه هو من زمان يحاول يطخني واني اتهرب منه بس هلمره هجم عليه
ايهاب : جذابه والله جذابه والحسين جذابه هي من زمان تسوي حركات حتى اطخها ومايوم انطيتها مجال حتى شكيت لابتسام على سوالفها
شرهب : الحسين شالك كون يشور بيك وينعل سلفا سلفاك ياناقص اوووع امداني اني اتحارش بواحد مثلك
جاان يجرني حييل من ايدي عدي رادت تنغلع بيده
عدي : اذا تكذبين اكص راسج
شرهب : صوتي جان يسمع الشارع من كثر ما عالي جنت متهستره من الصار عطت حيييل ليش اكذب اكو وحده تذب تهمه براسها اكلكم مستعده اطب القران اذا جذابه
ايهاب : عدي لتصدكها اكله بداعت جهالي ماطاخها ولاجاي كرباها هي تسوي هيج حتى نتعارك وبلكت يصير بواحد بينا شى حتى تخلص منك وتعوفك تعرفني مال هيج سوالف عمي شو ساكت احجي شى تخلي هاي بت الشارع بت اهل العتيك تتبلى عليه وانت ساكت تتوقع مني هيج اسوي
شرهب : عيوني تتنقل بين عمي وعدي ومااعرف راح يصدكوني لو يصدكوه جان يجيت عليه ايهاب يريد يضربني لزمه عدي ودفعه على الحاايط
ايهاب : عوفني اذا انت متكدر على مرتك وقابل بجذبها اني اطيح حظها
عدي : لك شون تريد تمد ايدك عليها واني واكف متستحي اخرب وجهك وانعل عشيرتك انت تسمع شتكول اذا طلع حجيها صدك متطلع منا اذبحك
ايهاب : لك شون تصدكها عدي اني صديقك وسنين عايش وياك مايوم تعديت على وحده بلشارع مو عاد اتعدى على مرت صاحبي وفوكاها تسمعون الها وساكتين وجنكم راح تصدكوها
شرهب : جنت اشهك ومتمسكه بموقفي لو اعرف اصيح يونس وادز على عمه خوله مااسكت اليوم جان يكول عمي
ابو عدي : اني رجال تعبان ومابيه حيل الطلايب وناس تذبح ناس بتي ابتسام باجر تحضرين غراضج انتي ورجلج وماتبقون بلبيت بعد
ابتسام : بابا انت تصدك هاي الساقطه وتجذبني وتجذب رجلي اكلك يابو شكه منها ومن استهتارها هاي وحده مراهقه طايشه متقصده تسوي هيج حتى اطلعني من البيت احجي يوم تسمعين ابويه يطردني علمود هاي الچلبه الماعدها اصل
ام عدي : عيب ابتسام شنو هذا الحجي
ابتسام : هو انتم بقيتو بيها عيب بتكم تنطرد وتبقى هاي الكحبه التركض وره رجلي المفروض اطلعوها بملابسها للشوارع تلفيها هذا مكانها مو اطردوني اني ورجلي ومصدكين كلامها اني بتكم مو هيه
ابو عدي : هي هم بتي حالها من حالج
ابتسام : لا مو حالها من حالي اني بتك من دمك ولحمك وهي خلك جنه تروح تجي عشره غيرها وهاي بلذات وحده مو راحه تريد وحده امها كحبه تساويها بيه اكيد تطلع مثل امها ادور زلم يابو كتلكم هاي وحده متفيدنا سمعت امها زباله واكيد تطلع على امها وهاي كدامكم ذبت بلاها على رجلي اليسوه راسها
ابوعدي : هاي التحجين عنها احسن منج اي لتباوعين هيج عليه صارلج جم سنه يمي فد يوم تنغصتي لابوج لو لامج فد يوم وكفتي باب البيت تساعديني من اجي والمسواك على ظهري وحيلي مهدود وريگي ناشف هاي الجنه التحجين عليها من الباب تشيل غراضي وتركض تجيبلي المي وتغسل هدومي ويه امج بكلشي كافي شبعت كتل وصلت للموت وخسرت ابنها حتى بس توديني للطبيب بلوكت الي انتي واخوج اطبون واطلعون وتسمعون كحتي وشون داموت ولا واحد بيكم انهز وكال ابويه التعب علينا وكبرنا وكسر ظهره خلي نعالجه وجملها اخوج شبعها كتل مابقى عظمه صاحيه بيها لان اخذت فلوس منه حتى تعالجني كولي يابتي يامن لحمي ودمي شنو السويتي اليه بوكعتي شنو السويتي لامج بكسرت ظهرها وتعبها وهي تطلع ويايه للسوك وكت ماالمفروض بتها عايشه يمها ترجع تلكه اللكمه الزينه البيت نظيف تساعدين امج بلعكس هلمره تاخذين تعبها وتخليها تشيل وصاختج وصاخه جهالج
ايهاب : عمي انت تفتح دفاتر عتيكه احنا وين وانت وين
ابو عدي : مو دفاتر هاي هذا واقع عايشه وياكم العندي كتله كافي صار سنين عايشين هنا وحالكم هسه زين انت تشتغل وضعك يخليك تكدر تفتح بيت واذا متكدر تفتح بيت عوف ابتسام هيه وجهالها هنا وانت تطلع من البيت وشوكت ماتكدر تفتح بيت تعال اخذها
ابتسام : هيج صارت يابه وانتي يوم تسمعين ابويه وماتمنعني اني انطرد ويه جهالي ورجلي وهاي تضل بلبيت
ام عدي : الي يشوفه ابوج اني وياه
ابتسام :اذا اطلع من هذا البيت اعتبروني متت ولو تنگلب الدنيا مالي دخل بعد بيكم
ابو عدي : على اساس انتي مشرمتها ليل نهار ادارين وتجيبين وتحطين روحي بتي الله يسهلج دربج وانتي شرهب روحي بدلي ملابسج وتعاي سويلي اكل جوعان بويه
شرهب : مسحت عيوني حسيت عمي اخذ حقي من طردهم رغم الاغم مالتي ساكت وصافن بس على الاقل عمي اخذلي حقي وطردهم تمنيت عدي يضربه او على الاقل يحسسني برجوليته اكو واحد مرته رادو يعتدون عليها ويبقى صافن مثل المطي حتى غيره ماعنده شايل الغيره كلها وحاطه على فلوسه بله لو ايهاب ماخذ من فلوسه مجان ذبحه خليت وعفتهم وصعدت وعفت ابتسام وايهاب يعيطون دخلت للغرفه نزعت دشداشتي وبدلتها حسيت بدوخه يمكن ضغطي هبط عساك بمرض ياايهاب ماله علاج وتخلص عمرك كله تون منه كعدت اجر النفس واتخيل لو متقرب مني شجان صار بحالي همزين ماسكتت ادري بيه اذا اسكت راح يعيدها واخاف هلمره الله سترني مره ثانيه ماافلت من ايده اباوع على ايدي مزركه من الرجف والهبطه بقيت بلربع ساعه كاعده حتى اكدر اكوم جان تنفتح الباب وطب عدي
درت وجهي حتى ميعجبني اباوع عليه
عدي : ارتاحيتي هسه طردها وين تروح هيه وجهالها ورجلها
شرهب : انت صدك تحجي اكله تحارش بيه
عدي : اخاف يشاقى وياج
شرهب : عفيه انت صاحي لو بيك شى غيرك رجال ميخلي يطلع من باب البيت اذا ميسكطه وانت تكول يشاقه وياج انت شفت حالي سكتت وباوعت عليه وكتله انت ليش هيج
عدي : وجع شبيهه
شرهب : بخيل وتحب روحك واناني واليوم اكتشفت ماعندك لاغيره ولا رجوله
جان يجي ويلزم شعري حيل ويعيط
عدي : هذا منو الماعنده رجوله حقيره
شرهب : عوف شعري ااااخ مكان مجان تبين رجولتك عليه روح لرجل اختك الراد ينتهك عرضك وخررر دفعت ايده حييل وكمت جريت القراصه وشلت شعري وطلعت من الغرفه وركعت الباب انزل من الدرج وادردم
صاير رجال براسي وجهه الطاوه المحروكه
طبيت للمطبخ لكيت عمتي تحمي الاكل واكفه اجيت يمها وصرت بوجهه عمه
ام عدي : هاا يمه
شرهب : وحق هاي النعمه واشرت على الاكل بلجدر كل كلمة كلتها صحيح وماكذبت ولا تجنيت عليه ايهاب اتحارش بيه واني كدرت انهزم منه
ام عدي : ميحتاج تحلفين يمه مصدكتج
شرهب : شبيج لعد تردين تبجين
ام عدي : اني ابقى ام حتى لو بزرتي طايح حظها وبتي حلفت مالها علاقه بينا حتى بعد تحرمني من شوفتها وشوفه جهالها واني من يوم ما انولدت هي كبالي عيني حتى تزوجت يمنا وهاي اول مره تطلع وبعد مااشوفها مو هينه عليه الله اليعلم النار اليبصدري وشحال گلبي واني اتخيل البيت بليه حسها وحس جهالها
شرهب : تردين اني اروح من البيت
ام عدي : يايمه فوك دكته الناقصه انطلعج انتي هذا حيوان ولو عمج بحيله قسماً بالله جان كسره تكسر وخلاه يصيح التوبه على سويته الي تسود الوجهه
شرهب : دنحجي واجه عمي تقرب وباس راسي
ابو عدي : امسحيها بوجهي بويه امسحيها بهاي الشيبات
شرهب : لا عمو انت شعليك
ابو عدي : ماكدرت اخذلج حقج واخلي يزوع دم على سوايته تعرفين بيه الحيل مو الاولي وكوه اعين نفسي تمنيت كون گبل سنين يندك هيج بيج لااخلي العمر كله يزحف زحوف هذا واحد ناقص شرف وغيره وداس حرمة بيتي وبهذا حالي ماجان بيدك غير اطرده
شرهب :يكفيني صدكتني وماكسرت بيه وطبكت وياه
ابو عدي : اعرفج مثل مااعرف ايدي طبيتي على هذا البيت جاهله صغيره وكبرتي گبال عيني واعرف معدنج واصلج ولو الدنيا كلها تگلي شرهب سوت مكسوره مااصدك لو اشوف بعيني هم مااصدك
شرهب : دنجت وبست ايده وكتله وهذا يكفيني ينطيك العافيه عمو ويخليك خيمه على راسي
ابو عدي : يله بويه شدي حيلج اريد اكل جعت اليوم نضل هيج
شرهب : صاار وكمت اصب ويه عمتي رغم كل الموقف المريت بيه والهبطه الي اكلتها
موقف عمي وطيبة گلبه نستني كلشي اله موقف عدي خلاني اضيف صفه ثانيه فوك صفاته المميزه واغسل مو بس ايدي منه حتى رجلي
مر اليوم كله هدوء حتى جهال ابتسام منزلو ثاني يوم عمي ماطلع للشغل اتوقع بسبب سالفه ايهاب ودز عمتي عليهم حتى يستعجل ايهاب ويطلع وعدنا حلين اما يعوف ابتسام وجهالها وشوكت مايكدر يأجر يجي ياخذهم لو يطلعون كلهم سوه ومثل متوقعت ابتسام سوتها عناد وطلعت ويه رجلها اخذو جم علاكه ملابس وطلعو من البيت جانت عمتي تبجي واني ملتزمه الهدوء حتى بعد مافتحت حلكي ولا حجيت
جان الهدوء بلبيت رهيب صحيح جنت انضرب الجهال ودوم مناكر وياهم بس جنت اتونس بيهم حس بلبيت حتى اني تعلمت عليهم وعلى وكاحتهم واشتاقيت لوجودهم عمتي تعبت وحتى عمي رحت الهم وكتلهم خلي يرجعون واني الوكت البيه ايهاب بلبيت ابقى يم عمتي بس عمي رفض يرجعون وكال النكس ميبات بيتي وبعدها بيومين اجت سياره حمل وبيها ايهاب اخذت غراضهم وبهيج ثبتت سالفه طلعتهم من البيت اني بقيت حابسه روحي بغرفتي مااريد اتواجهه وياه او ويه مرته الي عرفته مأجر مكان وكاعد وبهيج غلصت منه ومن مضايقاته اما عدي تعامل ويه السالفه بأنها ولا صارت وعادي يداوم وياخذ دروس خصوصيه ولا جن صار شى
ناي : كاعده اوكل سيف وحوري يمي
حوراء : اكلج شخبار يونس
ناي : شجابه بالج
حوراء : هههه ماادري شو اجه بالي لان كل مره اسمعج تخابري هاي الفتره ماكو
ناي : اخابره بس قليل مرات اخابره بليل الكاه مشغول لو انتظار مبين اخويه عنده شى
حوراء : شون يعني عنده شى مفهمت
ناي : ماكو واحد بلساعه والساعتين مشغول لو انتظار ويخابر صاحبه اني سألته يكول صاحبي مااتوقع اخويه عنده وحده بس كون مو سما الحيه
حوراء : من كثر ماحجيتيلي على سما من تجيبين طاريها نفسي تلعب شون حبها يونس راح اتخبل
ناي : مراهق جان وهي كبال عينه وبنفس الوقت جريئه وكع بيها وساعه الكشره الوكع
حوراء : خطيه اخوج ولا عنده حظ
ناي : اي والله اكلج حوري انتي هم حبيتي بيوم
حوراء : غير سؤال تاريخي هذا
ناي : الله عليج حبيتي
حوراء : هي العدها اخ مثل مهدي وابن خال مثل عبدو وصلاح تحب من كل عقلج غير جانو مسوين حصار علينا وسدره لوما حبت مهدي هم متحب
ناي : صفنت حست روحها جفصت وكامت تبلعم
حوراء : عفيه لتزعلين مو قصدي
ناي : عادي متعوده ديماً على كولت عادل امام اصلاً سدره عايشه ويانه بنفس الغرفه
حوراء : وهيج تحجيها عادي بكل اريحيه
ناي : قابل شسوي احرك روحي
حوراء : لازم تسوين حل صارلكم ٣ سنوات متزوجين ولا بيوم شفتكم كاعدين سوه تضحكون اطلعون تسافرون مرات احس زواجكم كلاوات وهذا سيوفي اجه بلغلط
ناي : شتردين اتوسل بأخوج حبني
حوراء : انتي تحبي
ناي : غير رجلي ليش مااحبه
حوراء : عوفج من سوالف المتزوجات رجلي ولازم احبه لا مو لازم اكو شغلات من تصير بيها واجبات تفقد طعمها جاوبيني بصراحه تحبي
ناي : مع الاسف احبه لاخوج ومابيدي اغيره واخلي يحبني
حوراء : لا بيدج تحركي تلحلحي البسي مكيجي عدلي شعرج اصبغي رتبي روحج
ناي : ليش شبيهه مو مرتبه ونظيفه
حوراء : مااقصد على النظافه ادري بيج نظيفه بس شوفي حالج شعرج لهسه مرات تضفري تكول وحده بالاول ابتدائي مااشوف مكياج بوجهج غير بلمناسبات هاي اذا صارت ولوما اني الزمج واحف الج جان يمكن هسه شواربج ينحلف بيهن بمجلس النواب
ناي : اي صنفي عليه هذا الفالحه بيه
حوراء : نايه والله اني احجي لمصلحتج ومن محبتي بيج مااريد تخرب حياتج
ناي : ليش هيه مخربانه
حوراء : لا مخربانه كعد تنبني بس بطئ اني ماعندي شى حديقه ودوم كاعده نزلي سيف يمي وانتي تمكيجي البسي سيت حلوو عدلي شعرج وشسوري وفگي خلي يحس يمه انثى مو اسماعيل ياسين بلحربيه
ناي : واذا سويت كل هذا ومتحرك الجبل العندي
حوراء : حاولي مخسرانه شى
ناي : احاول ونشوف
حوراء : من اليوم
ناي : هااا كالو مبارك عرسك كال الليله ادخل يمعوده انطيني مجال اخذ نفس وافكر واخطط
حوراء : شعندج راح تحتلين القدس هي كحله على حمره على تمشيط شعر وتنتهي تخطط وترتب والله بطرانه
ناي : هذا هو بس اسكتي راح اسوي مثل مكلتي نجرب ونشوف
اليوم ارتب نفسي صاعده انظف روحي وانتي خلي سيف يمج وامج اذا اجت كولي الها ناي ماتت لان مراح تفك ياخه مني اذا عرفت دااعدل بروحي لابنها
حوراء : روحي مالج دخل عوفيها عليه
ناي : سويت كلشي كالته حوري نظفت نفسي ورتبتها وعندي دشداشه قصيره جديده ناعمه مال نوم لبستها وشسورت شعري طولان وصاير كلش حلوو وحطيت مكياج بسيط اني مااعرف حيل امكيج شى بسيط طلعت حيل مرتبه وحلوة اباوع على نفسي بلمرايه مكيفه بروحي شويه وكلت اخاف عيب اذب روحي عليه وارجع اكول شنو عيب غير رجلي بقت فكرة تودي وفكرة تجيب وعقلي كل شويه يلعب بيه لحد ماطب مهدي
الله يساعدك
مهدي : ويساعدج
ناي : اسويلك عشا
مهدي : لا اكلت بره ويه عبدو
ناي : بقى يباوع عليه خجلت حيل
مهدي : وين جنتي
ناي : شنو وين جنت
مهدي : مو مكيجه جنتي طالعه
ناي : خرب حظج الاسود ياناي ابتسمت وسويت الشغله عاديه وكتله لا مطالعه هيج عجبني اخلي
مهدي : مو مامتعلم عليج تحطين لهذا استغربت
ناي : بقيت كاعده على الجربايه واگلب بلقنوات مال التلفزيون وهو سبح ورجع تمدد بصفي
هاك الريمونت اخاف تريده سحبه من ايدي وبقى يگلب
مهدي : وين سيف
ناي : يم عمته
مهدي : ينام يمها
ناي : اي
بقه ساكت ويگلب
مهدي
مهدي : هااا
ناي : باوع عليه اندار عليه وبقى يباوع
مهدي : بيج شى
ناي : شتحس اتجاهي
مهدي : شأحس
ناي : اي اقصد بعد كل هاي سنين الزواج شون تشوفني
مهدي : زوجتي وام ابني
ناي : وبس
مهدي : اكو شى بالج احجي لتضلين تفرين السالفه
ناي : هزيت راسي بمعنى لا ماكو سالفه وباوعت على التلفزيون هو تقرب مني يريد يبوسني اعرف قصده تواصل جسدي عباله اني معدله نفسي لهاي السالفه وخرت وجهي منه
مهدي : شبيج
ناي : مابيه اريد انام تصبح على خير وتمددت وانطيته ظهري هو هم تمدد وانطاني ظهره نومتنا المعتاده بقيت حدود النص ساعه على هذا الوضع لحد مختنكت كمت من مكاني باوعت مغمض مبين نايم جريت دشداشه وشال ولبستهم ونزلت اريد هوا احس بلغرفه ماكو نسمه هوا نزلت لجوه الاضويه طافيه عمتي متعلمه تنام من العشره لهذا متأكده نايمه وحوراء اسمع صوتها ويه سيف بلغرفه تكركر مردت ادخل عليها ردت ابقى وحدي طلعت بلحديقه الجو طيب وريحه الاشجار ترد الروح جان شهر العاشر ٢٠٠٩ كعدت اكو كعده مسوين ميز مدور وداير مدايره كراسي ٦
سحبت واحد من الكراسي وكعدت اباوع للاشجار والسما وقفص طيور الزينه المحطوط بين الاشجار وحايره بزماني مرات اكول كافي الاحترام بينا وما مأذيني ومرات اكول شنو الجابرني اعيش ويه واحد معتبرني واجب بحياته ماجمعني بيه بيوم سالفه ضحكه طلعه سمعت صوت مي انداريت شفت صلاح يرش بالاشجار بعد مسافه انداريت وعفته ودموعي تنزل بقهره شويه واسمع صوته ورايه
صلاح : اكدر اكعد
ناي : انداريت عليه متفاجأه واستحيت اكوم لو اكله متكعد مسحت عيوني وكتله تفضل
صلاح : شونج ام سيف
ناي : الْحٍمَدٍ للـّہ
صلاح : مهدي وين
ناي : نايم ودرت وجهي اباوع على قفص الطيور اكيد عيوني صارو حمر زحمه يشوفهن
صلاح :بيج شى
ناي : لا
صلاح : يمكن مو من حقي ادخل بس نصيحه اخويه لتشيلين نفسج الهم الحياة الي انفرضت عليج حاولي تحبيها وتقتنعين بيها وتقبليها بسلبياتها وايجابياتها واذا شفتي نفسج اختنكتي وصعب تتقبليها وصلتي مرحله النهايه غيريها واذا متغيرت غصب غيريها لتبقين تاكلين بروحج الحياة تنعاش مره وحده اكبر غلط الواحد يضيع عمره على سراب والمصيبه العظمى متأكد هو سراب وباقي ينتظر يطلع من السراب بحيرات
ناي : باوعت عليه وگأنه يقرا الي بالي
جريت نفس قووي وكتله
تعبت حييل تعبت ومحد حاس بيه وكله فوك راسي والعمر يمشي واني اودع بيه وصافنه عليه سنه وره سنه وكلشي ما مفتهمه
صلاح : محد تعبج انتي متعبه نفسج كل الي يصير بينا اختياراتنا
ناي : واكو شغلات انجبرنا عليها الظروف جبرتنا
صلاح : والظروف انتهت ليش بعد متمسكين بحجه الظروف احنا البشر مشكلتنا بلحياه نحب انذب اللوم على غيرنا واذا ملكينا شخص نذب اللوم عليه نذبه على الدنيا والحظ والقسمه المهم نلكه شى نذبه براسه
ناي : لو عايش حياتي وظروفي مجان حجيت هيج
صلاح :ماكو انسان مرتاح ميه بلميه كل انسان عنده هم شكل لا تحكمين على المظهر ام سيف ماعندج غير حلين يااما تتقبلين الوضع الحالي وتعيشين بدون تذمر وتبقين تحاولين لحد مايصير الي تردي يااما تعوفين الجمل بما حمل وتفلتين بروحج اما سالفه تعبت ومخنوكه وضايجه متوكل خبز
ناي : ليش احس وره كلامك شى
صلاح :كلشي ماكو مجرد نصيحه تردين تتقبليها كان بها متردين ذبيها للطيور تاكلها
ناي : علاقتك بمهدي قويه بحكم انتم متربين سوه هم يجيب طاري يحجي عني
صلاح : هيج شغلات خاصه منحجي بيها واذا صدفت واجه طاريج يحجي بكل خير لتنسين انتي مرته وبنفس الوقت بت عمته
ناي : سكتت ماعندي شى اكوله وهو هم بقى ساكت ليش احس عنده كلام هوايه وميكدر يحجي
صلاح : من رخصتج طاب انام الله يولف الگلوب بينكم تصبحين على خير
ناي : وانت من اهل الخير خلاني اصفن اكثر مااني صافنه ودايخه لازم احاول ويه مهدي الحب مو اجبار بس على الاقل اريده يحس بيه مو فد مره شايل الفيشه من يمي بقيت بحدود النص ساعه وتالي دخلت للبيت و صعدت للغرفه على كيف توقعته نايم
مهدي : وين جنتي
ناي : بعدك كاعد
مهدي : اي منتظرج مكلتي وين جنتي
ناي : نزلت بلحديقه اشتم هوا
مهدي : تعاالي
ناي : اشرلي بيده نزعت الدشداشه والشال وتمددت اشر على ايده يعني تعاي نامي على ايدي تقربت من حضنه بتردد وبنفس الوقت اعرف هاي رغبه مو حب بس الصار فاجأني سحبني لحضنه وباس راسي وحضني وغمض عيونه انفاسي اضطربت وگلبي يدك اسمع صوت دكات گلبي واني بحضنه وانفاسه تلامس وجهي اعرف بيه منايم اعصابي هدأت حركة بسيطه منك خلتني اهدأ استغربت من نفسي ومشاعري ابرد من الثلج ويايه واني حبيتك زين اذا تحبني شلون وشراح يصير بيه غمضت مثله وقررت اترك نفسي بحضنه وماافكر بأي شى تعبت واني افكر بكل حركة وردت فعل ٣ سنوات عايشه وياه ومايوم نمت اله واني افكر بكل حركة او سالفه او موقف منه
واليوم مراح افكر بكلشي غفيت ومحسيت اله الصبح ونايمه وحدي مبين طالع باوعت على الساعه بال ٩ ونص شعجب عمتي ماسوت مداهمه اخاف طالعه
بدلت وغسلت ونزلت ماكو احد هدوء فتحت الباب على حوراء لكيت سيف يمها نايم وهي هم نايمه
يايمه البيت شكد مريح من عمتي ماكو يصير جنه من صوتها مااسمعه دخلت للمطبخ سويت ريوك وكعدت اتريك واني النفسيه مالتي عال العال
جان اطب لا هله
وداد : اي عيني نايمه للظهاري
ناي : عمه تره الساعه ١٠ الا ربع ياظهاري فدوة وليش مكعدتيني اذا محتاجتني
وداد : رجلج نزل كال عوفيها نايمه تعبانه شبيج مو كدامج عرج مايطكج حيلج احسن من حيلي
ناي : مهدي كلج لتكعديني
وداد : شوفي شگلتي اله وخليتي يتراجف عليج
ناي : بديت اتريك وعفت عمتي ادردم وحدها شبيه مهدي صاير شى اول تالي يكول عوفيها تنام الله يهديك وتحس بيه
حوراء : صباح الخير
ناي : شكعدج
حوراء : صوت امي الي يصحي الميت بگبره وينها
ناي : عيطت وراحت لبيت خالو عمران
حوراء : هاا بشري بصل لو عسل
ناي : تفاح
حوراء : هااي شنو خارج المنهج مااعرفها هيه يابصل وليله طايح حظها ياعسل وكلها غزل هاي التفاح جديده عليه
ناي : يعني بلبدايه انغثيت وراها نمت بحضني للصبح
حوراء : وهذا هو وعاشو عيشه سعيده
ناي : اي شتردين
حوراء :رومانسيه دافئه غزل واحضان حارقه قبلات لاذعه لمسات مشتعله
ناي : هاااي شكوو ليله لو كاعدين بجهنم
حوراء : ربي مااريد اتزوج اله كون واحد يحبني واحبه كون هيج ركع بلنعالات والاحذيه وحروب طاحنه كون نگلب الكاع سما والسما گاع ويوميه انام واكعد اون من حبي اله وهو ينام ويكعد يلطم عليه مااريد اتزوج مثل ذوله الثلج راح يسون شلل وعوق بمشاعري من برودتهم اووي كرهتوني بلزواج ابقى هيج ماكله شاربه نايمه بلعرض بجربايتي ولا انام يم واحد ينطيني ظهره وينام ومااحصل بس الشخير يزرف بيه اذني
ناي : شسوي كلمن وحظه ياداده
حوراء : خلي اتريك وياج قبل متجي امي وتزفني
ناي : مشه اليوم واني انتظره كملت كل شغلي وهم طلبت من حوراء سيف ينام يمها ورجعت عدلت نفسي مثل اليوم القبله وهلمره من رجع من الشغل كال
مهدي : اليوم ما متعشي اريد نتعشه سوه وجيبي العشا بلغرفه مااريد انزل
ناي : كيفت وسويت عشه كعدنا ناكل ومن زواجنا لليوم اول مره يحجي ويايه عن شغله وشون يتعب ويركض منا ومنا لان هو يشتغل بالادوات الاحتياطيه مال سيارات
مهدي : شبيج صافنه عليه
ناي : لا هيج اسمعلك مو صافنه
مهدي : ناي
ناي : هااا عيني
مهدي : تحبيني
ناي : جمدت من كال هيج حتى معرفت شجاوب بقيت ساكته
مهدي : هيج سؤالي صعب بحيث وجهج اصفر
ناي : كلش صعب
مهدي : هزي راسج تحبيني احجي ناي لتسكتين ولتستحين مني عندج مشاعر معينه بأتجاهي
ناي : ابتسمت وهزيت راسي
مهدي : اعرف بروحي مقصر وياج وتحملتي هوايه بس اكو امور مو بيدي تصير ومااكدر اسيطر عليها وصارت بوجهج
ناي : اكو شى صاير خلاك هيج تحجي من البارحه وضعك اختلف
مهدي : مااريد اظلمج ويايه ولا بيوم گلبج يشيل عليه
ناي : لتوكع گلبي صاير شى
مهدي : كلشي مصاير بس صلاح البارحه خابرني وگلي شافج تبجين
ناي : وانت تتعامل هيج ويايه لان صلاح كلك ابجي
مهدي : طبعاً لا اني حسيت بروحي هواي ضاغط عليج واكو فتور بينا وخفت لا اكون ظالمج
ناي : الفتور مو مني منك انت دوم بعيد وما منطيني مجال اتقرب منك واذا تحس بلذنب وتحاول تغير من تصرفاتك ماله داعي تمثل دور المهتم اني ما مظلومه ولا شى واذا جنت ابجي البارحه علمود مشتاقه لاهلي
مهدي : انگلب وجهج بسرعه وتغيرت نبرت صوتج يجوز تشوفيني هادئ وقليل اكعد وياج بس اعرف حركاتج واعرف هواي تفاصيل عنج انتي متتوقعين اعرفها
ناي : اني كلشي مااعرف شئ الوحيد الي اعرفه اثنينا انجبرنا على الزواج انت بقيت نفس مشاعرك واني الغبره تغيرت مشاعري وبلوقت الجنت مااطيق اشوف وجهك كمت هسه وسكتت وكلت بگلبي هووب اوكفي لساني ماضرب بريك ردت اكول اله احبك
كمت واخذت الصينيه ويايه وعفته ونزلت بله هذا النقاش الفارغ الصار بينا شنو معناه
غسلت المواعين وادردم على روحي تالي صعدت لكيته كاعد ينتظرني
مهدي : تعاالي
ناي : اريد انام تعبانه
مهدي : مااسوي شى نامي بحضني
ناي : ليش
مهدي : ارتاحيت البارحه من نمتي بحضني وغفيت اليوم تعبان واريد تنامين بحضني عندج اعتراض
سكتت وتمددت ومثل اليوم الگبله نمت بحضنه كلت لازم انطي مجال يتقرب مني مو هذا الي اني ردته يحس بيها وبدا يحس لازم اصبر واصبر لحد مايتغير الحال بينا ويوم وره يوم بدت اول صخره ثلج توكع بينا يجوز احساسه مو حب راحه بس هاي تكفيني جنت قنوعه بلقليل منه واكول القليل يجي يوم يكبر ومثل ماهسه تعلم مرات يحضني ويكعد يسولف ويايه يجي يوم يحبني
يونس : من يوم ما دخلت شيار لحياتي واني ماعندي غير الشغل وغيرها نحجي هوايه جنت وياها انسه تعبي والصار بيه الضحكه متفارك وجهي طول مااسولف وياها يمكن اني عاطفي وبسرعه اتعلق او يمكن من كثر ما مبهور بيها نسيت الفرق البيني وبينها وهي ومنو اهلها وهي هم ابد متحجي بلفلوس والاملاك نخلصها ضحك وسوالف على شغلات تمر بيه وشغلات تمر بيها مرات حتى نسهر للصبح صوتها كروان يهز روحي يخليني اهيم بيها وبضحكتها بساطتها وعفويتها دلعها يخليني ماافكر بأي شى غيرها وبيوم نسولف ومندمجين جان تكول
شيار : احجيلي عن حياتك قبل مااشوفك وين جنت منو اهلك ليش مكملت دراستك
يونس : يفرق هذا الشى عندج
شيار : لو يفرق مجان اجيك كل مره بنفسي لحد محلك تره الي اسوي شئ كبير ومو هين
يونس : احب كلمة كبير متكولين جبير
شيار : هههههه انت ابقى ركز بكلماتي ويوميه لازم كلمة وتكول احبها
يونس : اريد اشوفج اشتاقيتلج
شيار : مااريد بلمحل من اجي الرايح والجاي يضل يباوع
يونس : وين تردين
شيار : نكعد بمطعم نسولف حابه اسمع كلشي عنك
يونس : شوكت حابه
شيار : باجر عندي امتحان عكب باجر تعال هلمره انت للمنصور
يونس : انطيني عنوان مضبوط واني اجيج واذا تحبين من اليوم ابات بلمنصور لحد ماتجين
شيار : هههههه متسويها
يونس : لتتحديني بعدج متعرفين من احط شغله براسي اسويها
شيار : لا حباب اشاقه
يونس : روحي نامي وراج دوام
شيار : فلتت مني من نتشاوف لازم تحجيلي
يونس : سهله سديته منها واباوع شون اطلع وياها واني حتى ملابس مابيهم خير عندي
وثاني يوم طلعت اشتري ملابس مكيف متواعد ويه وحده ياهو الي يشوفها يتخبل عليها واني حصلتها مثل الجوهره بجام خانه الرايح والجاي يباوع واني الوحيد الي لزمتها
اتلفت يمنه يسره واباوع اي هذا اسم المطعم مديت ايدي بجيبي همزين جبت فلوس الدخل ويايه اكيد هذا المطعم غالي انداريت على المرايه العاكسه مال المطعم اعدل بملابسي مكيف جني جاهل بملابس العيد واعدل بشعري وحاط سبري بيه طالع المع وينج عمشه كون تشوفيني تاكلين راسي وثاني يوم تزوجيني
سمعت صوت الهورن مالتها انداريت وطبكت سيارتها ونزلت منها بكامل اناقتها مايوم شفتها اذا ماافك حلكي على جمالها
شيار : تأخرت عليك
يونس : لا قبل شويه اجيت
شيار : اني ميته جوع مماكله وامتحنت
يونس : تعالي ندخل واطلبي الي تحبي
جابو المنيو واني بس صافن على الاسعار معناها اصرف نص الدخل مال البارحه ومن ارفع عيني واشوفها اكول فدوة الها الدخل كله
شيار : شتطلب
يونس : الي تطلبي
نزل الاكل وجانت اكلات بعمري مماكلها وهي تاكل بشهيه تجرأت واكلت طلعن طيبات هو مثل الدجاج بس شاعلين اهل اهله داكي ومحمصي واكله ثانيه لحم مدري هم شمسوين بيه وكله شغلات بيضه مثل الشوربه الثخينه فوكاه وشاوين الفلفل والطماطه الشى الوحيد العرفته بالاكل كله هو الحمص بطحينه نعمه من الله عرفتها
بدينا ناكل
واثناء الاكل دك تلفونها وحجت مبين ابوها وكذبت عليه كالت اني وصديقتي
من سدته
ابوج
شيار : اي ويسأل لان هاي الفتره حيل متشدد عليه ويريد يجيب حمايه يخاف من التهديدات
يونس : حمايه ليش ابوج شنو يشتغل
شيار : بابا المفتش العام مال (عدم ذكر الوزاره للخصوصيه )
يونس : وكعت الخبزه من ايدي دنكت شلتها واني فاك عيني
شيار : شبيك خفت
يونس : مو خفت بس تعرفين ابوج اذا دره بيه وياج شراح يسوي
شيار : هو ليش فارغ النا هاي صار كم يوم يله كام يخابر ويسأل واني اتهرب من سالفه الحمايه حتى امي تكول الحمايه تجيب العين واني محد يعرف ابويه شنو يشتغل والحمايه راح تفتح العين علينا
شبيك يونس وجهك تغير خفت من بابا
يونس : اول البارحه كلتي احجيلي عن حياتك
شيار : اي وبعدني على كلمتي اريد اعرف وضعك وحالتك قبل بس اذا معاجبك تحجي عادي نسد الموضوع
يونس : انتي ليش قبلتي بلعلاقه بينا رغم تستاهلين واحد احسن مني بالف مره شنو العجبج بيه اني حتى مو مثل باقي الشباب شفتي شكلج من جنتي تمشين ويايه هاي الخطوتين انتي بطولك ونزاكتج ومشيتج المستقيمه واني اعرج وياج مالعبت نفسج من شكلنا
شيار : اول شى الشكل مو مهم عندي ولا راح يهمني بيوم وبلنسبه لرجلك اكيد مسوي حادث وصايره هيج يعني شغله مو بأرادتك ومستحيل بيوم تلعب نفسي منك اني يوم ما شفتك وشفت اخلاقك ويايه وشهامتك رغم جنت متعرفني حيل حبيت اتعرف عليك ومن تعرفت بلشى البسيط الصار بينا عرفت انت مثل الفحم ظاهرك اسود بس داخلك الماس
واليوم من طلعت وياك اريد اعرفك اكثر يونس اني شفت اشكال الشباب اقاربنا بلكليه بلشارع وانواع المستويات حتى اولاد وزراء مايوم ارتاحيت لبشر بكد ما ارتاحيت الك
يونس : تعرفين شنو البيني وبينج
شيار : شنو
يونس : اشرت على السكف كتلها انت الطير واني السمجه لا انتي تكدرين تنزلين تعيشين ويايه ولا اني اكدر اصعد اطير وياج
شيار : انت من سمعت بأبويه تغير كلشي بيك حتى نظراتك واني لهذا السبب ما كتلك بابا شيشتغل ردت تعرفني اني مو تعرف بأبويه وتتهرب مني
يونس : اني ما متهرب ولا خايف بس اني مره عقلي شطح وفقدته وتصرفت تصرف تندمت من وراه مره وحده نسيت نفسي ومشيت وره گلبي وگلني نعل وضيع سنتين من عمري وياريت على عمري يطبه طوب ضيعت خواتي انتي لو تعرفين اشايف بعمري متحجين هيج ادري بالج تكولين هذا شكد جبان بس عرف اني بت منو طفر لا غلطانه اني واحد جار الزمن عليه وجواه من كل مكان بجسمه وبروحه لدرجه ماتلكين قطعه مابيها جويه حتى اتحمل جويات اهلج
شيار : لتكول راح تعوفني شبسرعه انسحبت
يونس : انت بت فلان واكيد عايشه بقصر مو بيت بحكم شغل ابوج وطالبه جامعيه وحياتج عز بعز شسوين بواحد مثلي اني واحد خلص عمره يلم بلزبل تشوفين هذا الاكل الكدامج الي حتى مااعرف اسمه جنت اتمنى
اكل الشواله مالته يعني الباقي منه اذا مسامعه كلمة شواله والخبز هذا اندور عليه دواره بين الزبل والخرايب حتى نحطه بكواني ونبيعه حتى نكدر نمشي يومنا وناكل ونشرب وخواتي يدرسن ومااضطر ابطلهن وهاي القواطي الي يمكن اذا شفتيها بلشارع ادوسين عليها بتاير سيارتج اني ردت اموت من وراهن والنتيجه اسكطيت وبقيت اكزل طول عمري اني فتحت عيني يتيم الاب والام وباقي تحت رحمه عمام ونسوانهم ميعرفون الله ولا يعرفون شنو صله دم
بطلت من المدرسه واني ابن ١٥ سنه حتى اعيش خواتي وبيبيتي ومااخلي احد يذلني ويذلهن ذبيت القميص الابيض ولبست الاسود الاملح حتى اكدر اطلع من الفجر الم العتيك تشوفين العتاكه الي بلشارع واني متأكد تشوفيهم يوميه ويمكن حتى تلعب نفسج منهم اني واحد منهم لا يغرج المحل هاي مصار جم شهر خلف الله على عمتي اجت وسوته اليه اني قبل المحل بأيام جنت انام بحديقه الامه باب الشرجي يمكن حتى مسامعه بيها هاي الحديقه اكثرها ناس سكاره وناس تعبانه سنتين اني انام بنصهم وابيع گلينكس وعلج للناس الي مثلج عدهم سيارات وانتظر الالف والخمسميه منهم حتى اكدر اكل وانتي تخيلي حالتي وهذا كله بسبب غلطه والله غلطه وحده ضاع كلشي من وراها والباقي شويه حجار كعد ابني بيهم الي نهدم واعرف البناء اعوج تالي يا يشار تردين حتى الحجار يروح مني اذا ذيج المره راح سنتين مني وبقيت بلشارع هلمره عمري كله يروح وماطول النهر ضيك على كولتهم خلي اعبره لان اذا عرض النهر مااكدر اسبح واوصلج يابت الناس
يشار : على الاقل نبقى اصدقاء لتسوي هيج بيه فدوة اني لو اعرف راح تنهز من تعرف منو ابويه ولا اكول الك يونس اني تعلقت حيل بيك اترجاك لتعوفني
يونس : لج بابا شوفي حالج اني ماافيدج انتي وين واني وين اصلاً اذا افكر للبعيد وياج اطلع مطي خلي اروح اختنكت وانتي رجعي للبيت وديري بالج من تسوقين
عفتها الدمعه بعينها واني مورث ورحت للكاشير دفعت الفاتوره وطلعت مثل الواحد جان بغيبوبه وبحلم وردي كعد لكه روحه مشلول ومايكدر لا يحرك ايد ولا رجل اخذت تكسي وطلعت بوجهي لناي مدري ليش اجت على بالي اريد مثل قبل من اتعب ويضيك بيه الحال انام وهي تنام يمي واحس امي نايمه يمي ريحتها بيها اخذت تكسي بوجهي لديالى
شرهب : صار كم يوم البيت هادئ ومرتاحه بس معدتي تقلصات توجعني ومرات ظهري يريد ينقسم نصين اجيت كلت لعمتي وهاي اخذي العبايه وسحلتني من ايدي بدلت وكبل للمستوصف وللتحليل وجان اطلع حامل
ام عدي : الْحٍمَدٍ للـّہ ربي دعيت وماقصرت
شرهب : كله من وراج عمه كتلج جيبيلي الحبوب
ام عدي :لا بنيتي صارلج ٣ سنتين من طرحتي واريدلكم جاهل يمله البيت علينا هاي كدامج يصوصي وره روحت ابتسام وجهالها
شرهب : وعدي
ام عدي : شبيهه اكيد يكيف احمدي ربج واشكريه ماقصر وهاي اختج مو صارت ام شبيج انتي مشلوشه وماتردين
شرهب : اريد ليش مااريد بس كدامج العيشه والحال
ام عدي : الجاهل يجي وياه رزقه يمه يله كومي راح يصير المغرب اخاف يرجع عمج ورجلج
رجعت للبيت وباركلي عمي صعدت فوك واني بين الفرحانه وبين اكول اخاف هذا يتخبل عليه سمعت صوت الباب انفتح طب وشمر جنطته ويريد يبدل بدون اي مقدمات كلت اله عدي
عدي : صبي ميت جوع
شرهب : اني حامل
حامل
شرهب : اي حامل شبيك جفلت جنك واحد سمع بخبر موت مو راح يصير اب
عدي : راح اسألج وتجاوبيني
شرهب : ياستار اسأل
عدي : هم صار شى بينج وبين ايهاب
شرهب : شيصير يعني
عدي : لتردين سؤالي بسؤال
شرهب : بس لا الي بالي عطت وضربت على صدري صخام الصخمني شاك بيه ويه هذا النكس يعني هذا مو ابنك انت شبيك تخبلت
جان يجرني من الدشداشه الدكمه انكطعت وخنكني
عدي : لسانج لا اكصه لتشوفين هاي الفتره مامنعنع ضلوعج وساكتلج لان مو بحالج بديتي اطولين لسانج
شرهب : عوفني يامتستحي مو عيب عليك تذب على مرتك هيج تهمه طلعت انكس من ايهاب جان يضربني على حلكي حيل بطرف ايده شاغت روحي سنوني بسرعه وجعني
عدي : اتجاوزي بعد وشوفي شسوي بيج سألتج سؤال
شرهب : هو هذا هم سؤال ينسأل حرام عليك تظلم بختي شفتني موزينه طالعه من الطريق اني لو اكو شى بينا اجي افضحه هيج
عدي : لعد شمعنه هسه حبلتي مو صار اكثر من سنتين ماكو حبابه
شرهب : هذا حظي الجايف الخلاني احبل واوكع بلسانك عوفني خنكتني
عدي : تحلفين على القران ماصار شى بينكم ولا اكو علاقه واختلفتم
شرهب : انت مو صاحي واني مامجبوره اثبت الك اني شريفه متريدني عوفني اولي لبيت اهلي واخلص
عدي : عبالج مثل ذيج المره اخليج اطلعين تحلمين
شرهب : شتريد مني لاتحبني ولا دايرلي بال ولا تريد طفل مني شكو بعد باقيه وياك حتى عيشتك كرهتها خلي افلت بروحي العزيزه واخلص من عيشتك الكلها فگر وقهر
عدي : شفتي شون فريتي السالفه معناها اكو شى
شرهب : كمت اعيط حييل حرام عليك انت متخاف الله اجيت ابشرك راح تصير اب تشك بيه وتريد تحلفني اذا هيج معتبرني مو شريفه المن بقيني بيتك
اندكت الباب وطب عمي وعمتي
تعالو الله جابكم تعالو شوفو ابنكم المعلم المثقف الي يدرس اجيال اجيت اكله اني حامل شاك الطفل مو منه شفتو حظي
ابو عدي : لك دماغسسز اكو واحد يشك بمرته
عدي : شحبلها ليش وره هاي السنين وبهاي الفتره بلذات حبلت
ام عدي : اني اكلك يمه لان مرتك جانت تاخذ مانع واني بنفسي اشتري الها جانت تتوسل بيه وتبوس ايدي حتى اشتري الها ولان اعرف ظرفها وياك جنت عاذرتها وصار مده عاندت وياها وكمت مااجيب الها ردت الك طفل يشيل اسمك شفتك كبرت واني وابوك تعبنه نريد نشرف بزرك وكتلها حبلي ولو بس واحد وهاي الفتره مااخذت مانع وحبلت عرفت يلفهيم
عدي : لج متردين طفل مني
ابو عدي : لا تشوفلك سالفه جديده تأذي البنيه بيها وسالفه القران ماتنعاد هذا كلام الله مو لعب ياهو اليجي يحط ايده عليه القران ماينحلف عليه لا بصدك ولا بجذب تردون تنگلب بينا
عدي : اني ماسويت شى سألتها وهي تخبلت وكله من وراكم طلعتو عينها كبرتو راسها خليتوها تتشمخر وتجاوب وترد كلمة بكلمة عندي دواها هاي يراد ارجع وياها مثل گبل حتى تجر عدل
ابو عدي : فوك الضيم المعيشه الها وقلة العيشه تريد تمشيها بلضرب لا اله الا الله ماتصيرلك جاره لا والله اذا مديت ايدك تلكاني اني كدامك
عدي : يابه غير مرتي واني حر بيها ماعسى احركها مالكم شى يمي
شرهب : مو تايهتلك وتحركني
عدي : هااك استلم لسانها شطوله ومتحترم العرمه
ابو عدي : جفو الشر بهذا الليل وكافي مشاكل مرتك حامل ادعي الله يكومها بلسلامه وتشوف ابنك لا تضل تتهاوش وياها كتلت ابنك مره هلمره هم تريد تگتله هذا الموضوع ينسد وسالفه ايهاب انتهت ومرتك العيبه ماطلعت منها جان لازم تحط مرتك تاج على راسك لان مارضت بلغلط وماخلت واحد غيرك يطخها بس هو هذا انت مامقدر النعمه البين ايدك رافسها برجلك
شرهب : عافنه عدي وطلع واجت عمتي اطيب بخاطري اني طنشت السالفه كلها هو هذا عدي قابل شترجى منه واني صوجي ماعاندت وبقيت اخذ حب المانع هو هذا مال واحد يخلف اله ويسوي اب
طلعو عمي وعمتي واني وكفت كبال المرايه اباوع على شفتي راح تورم للصبح اكيد وسنوني تون انكسرت ايدك مو يد تكول يده مال هاون اوووي عشتو خلي يولي اكوم اسويلي حلاوه شعريه شو اني مكعد اتوحم حطيت ايدي على بطني ولك انت مو تطلع على ابوك بخيل تخليني مااتوحم حتى لا اصرف كلشي يسويها البخت وتطلع عليه
خلي انزل املي بطني وطز بكلشي
خوله : مابقى شى وارجع للسويد ضليت مده طويله وهذا الشى خلاني اخسر حتى شغلي هناك مهتميت بس بنفس الوكت اخاف تصير مشاكل ونجم اكل راسي ارجعي وارجعي
خابرته وكتله دزلي فلوس لان البقه عندي شى كلش بسيط
نجم : شسوين بيهن
خوله : ارجعهن الك وروح ابويه
نجم : شكد رايده
خوله : كل فلوسك شكد جامع دزهن
نجم : غير افهم شسوين بيهن صاير شى لامي لواحد من الجهال
خوله : كلشي مصاير دزهن واني ارجعهن الك شتدري بيه مو كد كلمتي
نجم : ماعندي غير ٥٠ ورقه
خوله : كلش زين شوف واحد ينطيني وانت حولهن لاقاربه حتى ليصير فلوس تحويل هوايه علينا
نجم : خوله لا تسوين مكسوره اعرفج متكعدين راحه
خوله : هاي شبيك شمسويه حسره اسوي شى وانت وامك اكعدي راحه واكعدي راحه
نجم : خابرت امي وكالت على سالفتج ويه عبيد
خوله : شسويت زوجته وريحته بربك اكو اخت احن مني
نجم : هو هذا الي مخبلني وراج سالفه عوجه كلش
خوله : دزلي الفلوس ويصير خير
بقيت انتظر يومين وبهاي اليومين رحت لجوحي واذب لكط اله على سالفه اشغل فلوسي
وهو يدك ناعم ويرجع ليوره لحد مااستلمت ال٥٠ ورقه وشلت ٢٥ وانطيتهم اله
جوحي : كلها شهرين ونبيع البضاعه الي اجت وانطيج حقج
خوله : يا فدوة الك شهر شهرين عندي غيرهم
جوحي : اي لعد ليش متنطيني الباقيات حتى الربح اكثر
خوله : اجرب قابل اذب كل فلوسي غير اشوف شغلك يسوه واحد يذب تعبه لو مايسوه وتره هاي ال٢٥ ورقه هيج كرزات حتى اذا راحن ميهمني
جوحي : هيج صايره ثكيله
خوله : الْحٍمَدٍ للـّہ ربك رزاق يله اروح لعبيد ابارك اله حتى من الصبح اطلع لكربلا
جوحي : صار ١٠ ايام مخلصها يم مرته ولا شفته
خوله : غير عريس ياعيني يوم الالك
جوحي : هذا مو دربي
خوله : ههههه دربك وحياتك الخضر تعلمني بيك اروح ورايه طريق
جوحي : شوكت تسافرين
خوله : جم يوم واسافر ماضل شى وانت مااوصيك اريد شغل مضبوط فلوسي مااشمرها بلشط
جوحي : يمي ليضل بالج
خوله : اروح ضلت يمك العافيه
بعد شهرين ....
جوحي بكربلا وبديعه وبان وعمشه الكل جافل من اعصابه وعياطه و صوته يهز البيت
وبيده التلفون وشكو شى كدامه يدفره برجله
لج عاااااار اعرفج عوجه ماتنعدلين هيج تلعبين عليه لج اني المطكطكهن كلهن يلعب عليه من وحده عايقه مثلج ترجعين الفلوس الاخذتيهم مني لا ورب الكعبه اطيح حظج
خوله : متكدر كلشي تسوي يله تعال شيوصلك للسويد
جوحي : ساقطه لو الزمج اله اذبحج عبالج من طفرتي مااكدر ارجعج لتنسين ابن اخوج هنا احرك گلبج عليه احركله المحل واخلي تراب واخليج تبجين دم عليه لاعبالج اسكت مثل گبل من بگتيني ومدري وين ضيعتي فلوسي وضيعتيهن عليه هلمره اشرب من دمج واذا طفرتي ومااكدر اطخج لان بلسويد عندج هنا يونس اخليج تنوحين العمر كله عليه لج ذني فلوسي لو ابني اذبحه علمودهن مو عاد يونس
خوله : متكدر تسوي كلشي بوخه عياط وصياح ولغوه زايده تحرك محله احركه طز بفلوسك ارجع افتح اله سوبر ماركت مو محل صغير واحرك افادك وابجيك دم عليهن واخلي يشتكي عليك ويكتب عدم تعرض يعني اذا حجاره وكعت من السما على راس يونس يسحلوك انت وعود خلي يفيدك التهديد والفشار يابوخه
جوحي : اااااااااخ لو الزمج اله اسويج وصلتين
عمشه : يمه تهده بلرحمن هاي اخيتك لج خوله يملطومه تسودنتي چا انه شگتلج شعلمتج ماتجوزين هاج خربتيها وجاي تكعدين على تلها اخيج مفرفح
خوله : لتخافين يمه حريشي مايطبه على كولتج اسمعني ابو مرتضى
تريد فلوسك اسمع كلامي ويوصلن ليمك
جوحي : شتردين ويرجعن فضيني
خوله : تكول لساهره عبيد تزوج على صالحه وفلوسك وره يومين بحضنك
جوحي : تردين تحرگيها يخوله
خوله : هيج خايف على اخوك ياعيني طكت دمعتي على حنيتك اوكف خلي امسح عيوني والله تحجي الاخرس كلت اليوم اذا معرفت ساهره وبلغت صالحه بزواج اخوك اعتبر مالك ولا فلس يمي بح طارن يله روح دوختني
