رواية بنت ابليس الفصل الخامس و العشرون بقلم حياة محمد
بسيوني: شوف يا سيد إذا كان الكلام هيريحك احكى لو مش هيريحك أسكت
سيد: لا يا بسيوني انا هحكى لك كل حاجه لأنى بجد عايز ارتاح.
&&&&&&&&&&&&&&&&&
سيد::أدى كل حكايتى من غير ما أخبي عليك حاجه يا بسيوني.
بسيوني: طيب انا هخرج أشوف أكل عيشى
وقفه سيد ومنعه من الحركه: خارج كده من غير ما تقول أى كلمه.
بسيوني: وعايزنى أقولك إيه.؟
سيد: طبعا هتقول زى الناس كله إنى غلطان وحرام عليا هتقول أستاهل كل إللى عملته فيا بنتى وان ده ذنب أبويا.
بسيوني:وأقولك ليه انا كنت مين عشان أحاسب الناس على أفعالها دى حاجة تخص ربنا واحده.لكن لو حاسس انك غلطان فقول انك غلطان
سيد : لأ مش هقول لأنى مش غلطان في حاجه أنا مغلطش في حق حد وأولهم أبويا انا كنت بحافظ على فلوسه من الطماعين إللى حواليه إللى كانوا بيستغلوه
بسيوني: وياترى لما عرفهم على حقيقتهم رجعتهم له.رجعت لأبوك فلوسه لما طلبها.
سيد:……… لأ
بسيوني: يبقى إيه الفرق ما بينك وبينهم
سيد: أنا إبنه.
بسيوني: بس سرقته أما هما فكانوا بياخدوا برضاه فحتى كل الطماعين دول فلوسهم حلال وانت الوحيد إللى فلوسه حرام
سيد : لا حلال ده أبويا انا ابنه الوحيد وكل حاجه له كانت هتبقى ليا بعد عمر طويل فإيه الفرق انى أخدها وهو عايش ابويا وانا حر في فلوسه.
بسيوني: انت مصدق نفسك يا سيد ده سيدنا النبي قال: انت ومالك لأبيك ماقالش مال ابيك حطه في جيبك.ولا دى حجتك عشان تحلل لنفسك الحرام.
سيد بعصبية: انت عايز توصل لإيه لإن فلوسى حرام.
بسيوني: أنا مش عايز أوصل لحاجه انت إللى معطلنى على شغلى
(( في الطريق))
سيد: بقى بتقول لما اساعد الناس يبقى حرام عليا
بسيوني: انت مسمى الربا مساعده الناس
سيد: أه بساعدهم بسلفهم وباخد فلوسى بالتقسيط.
بسيوني: انا مش عارف انت عمال تعيد وتزيد في كلامك ليه عايز تقنعنى ولا عايز تصدق نفسك.
دخل بسيوني القهوه وحط الجزم إللى خيطها فيها وخرج لقى سيد على نفس حالته.فمشى لحد الرصيف وقعد مكانه وحط صندوقه على الأرض جانبه مستنى أى زبون
سيد: انا تاجر ببيع وبشترى والمبلغ الزياده ده مكسبى وانت عارف ان ربنا أحل البيع
بسيوني: طب ماتكملها ربنا أحل البيع وحرم الربا..
سيد: ماتقولش ربا طب أيه الاحسن ياخدوا منى ولا ياخدوا من البنك.
بسيوني: الإتنين خراب مفيش حد مشى في السكه دى إلا وخرب
سيد:: مش للدرجه دى
بسيوني: لا والله وأكتر ده حتى فيه حكايه بتقول المال الحلال قال للمال الحرام(( مال صاحبنا عاينك ومخبيك وأنا لأ)) رد عليه المال الحرام (( أصلى لما همشى هسحبك معايا))
سيد: مش للدرجه دى….إلا احنا قربنا من العصر ومفيش ولا زبون واحد جالك.دلوقتى هتقول إنى نحس ونحستك صح
بسيوني: يا سيدي هو أنا اتكلمت انت إللى بتقول وانت إللى بتفسر على مذاجك.بقولك إيه العصر بيأذن انا هروح أصلى ها هتاخد بالك من الصندوق والا هتقول برضوا حرامى
سيد:: شفت يا بسيوني شفت أهو جه اتنين عايزين يمسحوا جزمهم وانت بتصلى ومشيوا.
بسيوني: طيب وإيه يعنى ؟
سيد: بقولك اتنين ومشيوا مش زعلان انهم مشيوا
بسيوني: وأزعل ليه دول مش رزقى إللى ربنا كاتبوا ليا لأنهم لو كانوا رزقى كانوا رجعوا
سيد: يابرودك يا أخى.أديك قاعد من غير شغل هتعيش إزاى ؟
بسيوني: ياااااه ده انت غلبان أوى هو ربنا إللى خلق الدنيا دى كلها هيغلب في رزقى استغفر الله.
سيد: ماقصدش استغفر الله
بسيوني: يبقى شاغل نفسك ليه انا مش شاغل نفسى انا بخرج وبتوكل على الله وبسعى وسايب الرزق على ربنا جالى كتير الحمد لله جالى قليل الحمد لله مجاش حاجه خالص الحمد لله
سيد: طيب وانت عايش إزاى؟
جمع بسيوني حاجته وحطها في صندوقه وقال شوف يا سيد انا مادمت لاقى لقمتى وهدمتى نضيفه وفيه اربع حيطان مداريانى فانا كده ملك زمانى مفيش حد احسن منى.
قوم قوم تعال نروح نعمل لنا لقمة نأكلها ولا اقول لك تعال نحط الصندوق في البيت وناخد المترو ونروح الحسين نصلى هناك مغرب وعشا وهعزمك على ساندوتش سمين انما إيه احلى ساندوتش سمين هتاكله في حياتك.وبعدها نشرب كوبايتين عرق سوس هناك إلا بتحب العرق سوس
ضحك سيد وقال: لأ
بسيوني: خلاص ابقى اشرب انت تمر هندي
&&&&&&&&&&&&&&&&&
أخدت زينب كوبايتين عصير وراحت ليوسف عند البحر: وأدى احلى كوباية عصير للريس بن حميدو إللى هيغدينا أحلى سمك إلا اصطدت كام سمكه يا ريس
يوسف بسخريه: كام سمكه دول كلهم يادوب سمكه واحده بساريتين.
زينب بضحك: اخص اخص اخص بقى دى أخرتها نتغدى ببساريتين لا ياريس شد حيلك
يوسف: اشد إيه وبعدين انا مبحبش الصيد من أساسه ماليش صبر على الصناره والطعم والكلام الفاضي ده.انا اصطدت بس عشان خاطرك
زينب: ليه يا يوسف هتبقى حاجه لذيذه وذكرى حلوه لما نقعد سوا نصطاد السمك
يوسف: انا مش شايف فيها أى حاجة حلوه وبعدين أنا زهقت
زينب:: خلاص إيه رأيك نروح حلقة السمك ونشترى لنا شويه جمبري على سوبيط على سمك وأعملك اكله إنما إيه كلها فسفور
يوسف: سمك إيه وزفارة إيه يازينب مبلاش جو الرومانسيات الملزق ده يا زينب مش لايق عليكى ولا على مستواكى.يازينب إنتى برنسيس يعنى تأمرى والكل يطيعك شغل العرسان الجداد إللى لسه بيبنوا عشهم طوبه دهب وطوبه فضه كلام فارغ لأن انتى سيدة الأعمال زينب هانم صاحبة شركة مقاولات كبيره بتعملى مشروعات من اكبر المشاريع في مصر كلها فياريت تحسى بنفسك وتعرفى مقامك
زينب: انت مش عاجبك حياتنا
يوسف: حياة ايه يا زينب انتى مش شايفه احنا قاعدين فين قاعدين في عشه اد عشه الفراخ وبدل ما نقضى شهر العسل في دلع وفسح مقضينه بنصطاد سمك عشان نتغدى بيه وانتى قاعده نص وقتك في المطبخ مع الحلل والمواعين.
زينب: بس أنا مبسوطه وسعيدة كده
يوسف: وانا مش سعيد
وسابها ودخل جوه الشاليه في حين قعدت زينب على الارض الشط وكلمة يوسف بترن في ودنها: (( وأنا مش سعيد))
يااااه مستحيل بقى ده يبقى حالها بعد خمس ايام ومن جوازها.
&&&&&&&&&&&ــ
نزلت من العربيه وشالت انس
وطلعت لباب شقة ابوها.كانت خايفه وبتدعى ربنا يحنن قلب ابوها عليها.
فتحت لها أمها
نورا: أمانى يا حبيبتي وحشتيني( وحضنتها))
أمانى:إزيك يا ماما عامله ايه وحشتينى أوى انت واخواتى.
نورا: خشى خشى تعالى
أمانى: بابا هنا
نورا: هو مريح شويه خشى وبقولك إيه استحمليه يا امانى انتى عارفه انه طيب وقلبه ابيض بس خاطره مكسور منك وزعلان
أمانى ببكا: انا نفسي يسامحنى والله العظيم مش عايزه اى حاجه إلا أنه يسامحنى
نورا: ان شاءالله بس اصبري عليه شويه
&&&&&&&&&&&&&&&ـــ&
ركنت عربيه ليموزين بيضه عند باب الشاليه فخرج يوسف وراح لزينب: إلحقى يا زينب فيه عربيه غربيه عند البوابه
زينب بهدوء: انت قلقان ليه انا عارفه انا إللى طلبتها.
يوسف ،: ليه؟
زينب: تقدر تقول اقتنعت بكلامك
يوسف: وبعدين
زينب: ولا حاجه هناخد شنطنا وهنروح فندق ((…..)) نقضى باقى شهر العسل فيه والعربية إللى بره عشان نروح فيها يعنى عشان الواجه الإجتماعية وكده.
يوسف: كده تعجبينى يلا بسرعه.
وصلت العربية للفندق ودخلت زينب ويوسف واتفاجأ يوسف إنها حاجزه الجناح الملكي عشان يقضوا فيه شهر العسل وكانت مفاجأة كبيرة ليوسف إللى كان طاير من الفرحه
&&&&&&&&&&&&&&&&
بسيوني: إيه دى يا سيد
سيد: انت اتأخرت وجه واحد عايز يمسح جزمته فمسحتها له ودى الفلوس إللى دفعها
ابتسم بسيوني وقاله: طيب وبتدهالى ليه هو أنا إللى اشتغلت دى فلوسك إنت
سيد: بجد لا لا ماينفعش خد انت الفلوس
بسيوني: وليه ما ينفعش خدهم حلال عليك
(( والغريبه ان سيد كان فرحان أوى بالخمسه جنيه دى حتى انه قرر انه مش هيصرفها))
-&&&&&&&&&&&&&&&&
مسترخى عند حمام السباحة وجابله الويتر كوبايه عصير كوكتيل فرش.بص لزينب إللى بتاخد (( تان)) جنبه وقال في نفسه: هيا دى العيشه وإلا فلا أأمر والكل بيطعنى حفلات وسهرات لحد الصبح وجناح ملوكى ماكانش يحلم بس يفكر فيه وجانبه بنت من أجمل وأذكى البنات في مصر كلها اخيرا ضحكت لي الدنيا كلها
قام من مكانه
زينب: على فين ؟
يوسف: عندى جلسة تدليك وبعدها أروح الجاكوزى
زينب: ماشى طب وبالليل هنعمل ايه؟
يوسف ::سمعت ان عمرو دياب هيحيي حفله كبيره إيه رأيك تحبى نحضرها
زينب: إللى نشوفوا يا حبيبي
يوسف: نحضر اكيد ده عمرو دياب.
زينب: ماشى.
&&&&&&&&&&&&&&&&&&
سيد: إيه الروايح الحلوه دي
بسيوني: واحد كان بيفرق وبعت لينا كيلوا لحمه ضانى فقلت اعمل لنا شويه باميه مع اللحمه.
سيد: ومين الراجل اللى بعتها
بسيوني: معرفوش ومش هسأل عنه وهوجع دماغى بإسمه ليه ده رزق وجالى لحد عندى.
سيد: حلو يعنى هناكل النهارده كيلو لحم سوا
بسيوني: ليه هو أنا اتهبلت اطبخ كيلو مرة واحدة اكيد عاين نصهم في كيس.
سيد: اعوذ بالله منك يا بخيل.
بسيوني: قول إللى هتقوله هتدعك برضو المواعين وتحط لنا الشاى.
سيد: ماشى على فكره انا مسحت التلات جزم إللى خيطهم .
بسيوني: تسلم ايدك بقولك يا سيد إيه رأيك أجيب كام علبة ورنيش وفرشه ونحطهم في صندوقى القديم وتسرح انت بيهم.
سيد: اسرح بصندوق وأمسح الجزم.
بسيوني: وفيها إيه مانت بتمسح الجزم لما بكون مشغول.
سيد: بس دى حاجه بسيطه بساعدك فيها اما يجى زبون وانت في الجامع ولا بتشترى حاجه بس انها تكون شغلتى لأ صعب صعب أوى.
بسيوني: ولا صعب ولا حاجه هو الصندوق موجود وسليم وزى الفل والورنيش أهو في الدكان وانت كده كده بتشتغل فا ليه بتأجله االمفروض تتوكل على الله وتبدأ.
سيد: وانت مش هتزعل وانا بقاسمك رزقك
بسيوني: لا يا حبيبي مابتقاسمنيش في رزقى ده الرزق بإيد ربنا.قلت إيه نتوكل على الله
سيد: خلاص اتوكل على الله
&&&&&&&&&&&&&&&&&
خرج من الأوضه لقى أمانى قاعدة وأمها يتلاعب ابنها فبص لبنته وقال: بتعملى هنا إيه ؟ أنا مش قلت لك أوعى اشوف وشك هنا.
قامت امانى تسحب إيد ابوها عشان تبوسها: ابوس ايدك يا بابا تسامحنى ابوس ايدك ماتبعدنى عنك انا ماليش فى الدنيا حد غيرك
بص لها بحزن وقال: ليه مش هو ده إللى انتى عايزاه عايزه تاخدى راحتك من غير تحكمات ابوكى ادينى سيبت لك الحبل على الاخر جايه ليه؟
أمانى: يابابا انا اتبهدلت شفت الذل اتبهدلت وحط كرامتى تحت جزمته وفي الأخر طلقنى
ضحك بوجع وقال: كمان وجايه هنا ليه
أمانى: جيالك يا بابا ابوس ايدك واقولك سامحنى انا ماليش حد غيرك انت امانى وحمايتى مفيش حد بيسأل عنى ولا حد بيحمينى ابنى ده هيعيش مقطوع مالوش حد يسأل عنه ذنبه ايه ؟
-((ذنبه انك أمه))
أمانى: يا بابا متبعدنيش عن اخواتى خلينى اتحامى فيك .
نورا: عشان خاطري يا أبو امانى متكسر بنتك أكتر من كده
بص لمراته بحزن وقال لها: بنتك هيا إللى كسرتنى وحطت راسى في الارض خلتنى مش عارف ابص لحد كسرتنى وذلتنى وضحكت عليا القريب قبل الغريب
نورا: لا محصلش بنتك ربنا سترها معاها ومتفضحناش ولا حد كسر عينا
رد عليها: بس انا اتكسرت قدام نفسى وده كسر لا يمكن يتجبر.
أمانى: سامحنى يا بابا ماتبعدنيش عنك وعن اخواتى.
نورا: بالله عليك لتسامحها دى غلبانه ملهاش حد غيرنا.
رد على مراته وقال: أهى عندك بس انا مش عايزها تقرب منى لا هيا ولا ابنها وسابهم وخرج.
-&&&&&&&&&&&&&&&٥٥
شايل الصندوق على كتفه وحاسس بالكسوف وهو بيمشى في الشوارع وبيقول لنفسه: بقى دى تبقى أخرتك يا سيد بتلف في الشوارع مستنى حد ينده لك عشان تمسح له جزمته هتاكل لقمتك من رجلين الناس وساعنها افتكر كلمة بنته ان ابوه كان بيعمل طعميه مع مراته عشان يعيش ويصرف على نفسه ساعتها حس بالوجع للدرجه دى كسر ابوه للدرجه دى وجعه وياترى ابوه حس زيه كده بالحسره وبالوجع
نادى عليه واحد فراح له واخد جزمته وقعد يمسحها ويلمعها وأول ما اخد اجرته لقى نفسه بيبكى ويقول (( الله يرحمك يا أبا))
&&&&&&&&&ـــ&&&&&٥&
يوسف: مش مصدق نفسي ان شهر العسل خلص هو ماكانش شهر كان عشر ايام بس
زينب: خمستاشر مش عشره
يوسف: بس عشنا عشر ايام في الجنه والله مش عايز ارجع
زينب: لا يا حبيبي احنا لازم نرجع لأننا سايبين الشركه لواحدها.
يوسف: ليه هو فين أبوكى.
زينب: سيبك منه المهم انت سعيد معايا
يوسف: اوى اوى هطير من السعادة
زينب: ولسه بقولك ايه انا عايزاك تنزل تحت في الريسبشن تقفل حسابنا عشان نروح على ما ينزلوا الشنط.عشان انا عامله لك مفاجأة حلوه
يوسف: مفاجأة إيه قولى
زينب: لا طبعا انا عايزاك تتفاجأ يالا روح اقفل حسابنا وسلم المفاتيح ماشى
يوسف: ماشى
نزل يوسف تحت الريسبشن ولقى الموظفه
يوسف: صباح الخير
الموظفه: صباح النور يا فندم
يوسف: انا جاى عايز اقفل حسابى وأسلم المفاتيح
الموظفه: أتمنى تكون الإقامه عندنا عجبتك يا فندم
يوسف: أوى أوى ده أنا مش عايز اروح بس وعد لازم هاجى هنا كتير
الموظفه: تشرفنا يا فندم.انا راجعت الحساب اتفضل الفاتوره
بص يوسف للفاتوره وقال بخضه: ١٧٠ ألف جنيه! ليه ندفع ١٧٠ الف جنيه في عشر ايام
الموظفه: فيه حاجه يا فندم
يوسف بقلق: لأ مفيش
الموظفه: حضرتك هتدفع إزاى هل هتدينى الڤيزا ولا كاش
يوسف: كاش إيه وڤيزا إيه استنى هودى الشيك لزينب وهيا هتتصرف
الموظفه: حضرتك رايح فين يا فندم
يوسف: هروح بس اشوف….
الموظفه: هنشوف مين المفروض حضرتك تسد الفاتورة الأول لو سمحت يا فندم ادفع الفلوس من غير شوشره
مدير الفندق: فيه اى مشكله يا فندم
يوسف: مافيش مشكله انا هطلع للمدام فوق وهيا هتدفع الفاتوره.
مدير الفندق: أه لا يافندم حضرتك تقعد هنا واحنا هننده لك إللى انت عايزه
يوسف: طيب يروحوا الجناح الملكى هتلاقى مراتى زينب هانم هناك وهيا هتيجى تدفع الفاتوره
اتكلم المدير في اللاسلكي وطلب يروح الجناح أى حد من الروم سيرفيس ويشوفها.
بعد شويه ردوا عليه إن الجناح فاضي ومفيش حد هناك حتى مفيش اى هدوم ولا متعلقات شخصية هناك
يوسف: يعنى إيه يعنى إيه استنى انا هتصل بها على المحمول رن عليها جاه الرد: هذا الرقم غير موجود بالخدمه.
مدير الفندق: يافندم من غير شوشره ولا فضايح هات الفلوس يا إما هتصل بالنيابة
يوسف: إزاى إزاى دى قالت خمس دقائق وأحصلها يعنى إيه
مدير الفندق للموظفه: اتصلى بالنيابه حالا ويا امن اتحفظوا عليه لحد ما تيجى النيابه تقبض عليه
يوسف: هيا دى مفاجاتك يا زينب عملتيها يا زينب عملتيها يا بنت إبليس.
&&&&&&ـــ&&&&&&&&&&&
إيه رأيكم في القفله حلوه ولا لأ
ياترى توقعاتكم إيه في الأحداث الجايه وياترى هتعمل زينب إيه في يوسف
