رواية الابواب الخمس الجزء الثاني الفصل السادس والعشرون بقلم ريام الهادي
واشاقيهم ، واسولف ،
چلمة الـ مرتاح.!
بس هي المصيبه الروح متعوبه.
اركض وراه ولك يمه تعااال مو شلعت گلبي
يونس : عوفي يمي يلعب
ناي : لا عفيه يونس خلي ياكل بس يفوت الوكت بعد ميحط لكمه بحلكه ورايه امتحان اريد اقرا باجر لازم اروح للكليه من وكت البارحه تأخرت من وراه
يونس : مهدي يريد يجي ياخذه
ناي : يجي يشوفه هنا ماكو مياخذه لو ينط
يونس : مرمرتي الرجال جم مره يطلب مني ياخذه ويحلف الف مره ميعوفه من ايده
ناي : واني كتلك الف مره يايونس ابني ميروح الهم وشيسوي خلي يسوي
اباوع على ابني الصار عمره سنتين وجهه جنه تفاحه يخبل كله خدود والشعر كيرلي ماخذ شعر شرهب وهي مكيفه لان نفس شعرها وتصيحله شبيهي اما يونس ميعوف خدوده طاب طالع يكرص بخدوده ومتعلق حيل بيه قلبي يتراجف على ابني اخاف عليه اكثر من روحي اباوع عليه شون يكمز ويلعب ويه خاله وميقبل ياكل اخذتني الصفنه لشهر الخامس ٢٠١٠ من جنت حامل بيه واريد اسقطه بليوم الي تخبلت وفكرت اتخلص منه
قبل اكثر من سنتين تحديداً شهر الخامس ٢٠١٠ :
صوت شهكاتي علت اكثر واني حاسه بتأنيب الضمير وخايفه لا يسقط اباوع على هاي المره الي اول مره اشوفها ويجمعني بيها هيج موقف جنت دوم افكر انزل واسلم عليها واتردد لحد ماهيه صعدت اليه تشكي صوت الهبط والتكمز وتريد تنوم بتها المريضة جن رب العالمين دزها اليه حتى يكتب لابني عمر جديد ويبين اليه شكد تصرفي غلط وحرام بعد ماقرت الايات وبدت تنخي مي بارد نزل بيها وهدأ كل الالم
تقربت مني ام حسن وكالت
ام حسن : بنتي انتي تصلين
ناي : مسحت عيوني مستغربه سؤالها اي خاله اصلي اكيد
ام حسن : يعني تعرفين الله ومؤمنه بيه
ناي : طبعاً مؤمنه والحمدلله
ام حسن : بس المؤمن بالله مايغضبه مايعترض على امره ولا يقتل روح رب العالمين امر ان تنولد وتجي للدنيا انتي بتصرفج هذا عصيتي وتحديتي وانطيتي لنفسج الحق تگتلين روح مالها ذنب
ناي : رجعت ابجي واني بعدني مدده بلكاع ودموعي تنزل من عيوني على الكاشي واحجي بقهر
متعرفين ظرفي خاله لتحكمين عليه اني مصار كم شهر خسرت ابني وحتى مالحكت اشمه واحضنه
ام حسن : شكد عمره
ناي : سنتين ونص انتل ومات حتى من دفنوه ماشفته خاله اني بيه هم وضيم يهد جبال وماردت يصير طفل يجبرني ارجع لابوه لان هواي اكو شغلات تمنعني ارجع اله
ام حسن : ابنج طير بلجنه ومن راح دزلج العوض بمكانه وانتي مكان ماتفرشين سجادتج وتسجدين شكر وامتنان لله على هديته و كرمة وعظمته ادفرين هديته برجلج وبگل دم بارد
ناي : كتلج خاله لاتحكمين عليه متعرفين بشنو مريت
ام حسن : ابقي نص ساعه هيج نايمه لتتحركين وراها سمي بأسم الله القوي وكومي وانتي تتحركين حطي ايدج على بطنج وادعي
احفظي ورايه
اللهم أعيذ ما في رحمي بكلماتك التّامة، ومن كلّ شيطان وهامّة، ومن كلّ عين لامّه، اللهم أسألك أن تحفظه وتجعله معافى كامل الخلقة، اللهم حسّن خَلقه وخُلقه، وسهّل حمله ومخرجه، واجعله قرّة عين لي، واجعله من عبادك الصّالحين
وصلي على محمد وآل محمد٧ مرات وارجعي كولي
اللهم إنّي أستودعك جنيني الذي في رحمي، أنت الذي لا تضيع ودائعك يا الله. اللهم احفظ جنيني واحمه، وأمسكه أن يسقط، وأتمّ حملي على خير
وارجعي صلي على النبي ٧ مرات
وبعدها اقري سوره الفاتحه ٧ مرات
والاخلاص ٣ مرات والمعوذتين كل سوره مره وحده افتهمتي
افتهمت بس الدعاء بعدني محافظته
ام حسن : ارتاحي النص ساعه وحاولي تنزلين يمي واني تلكيني كاتبته الج
ناي : رحمه الله والديج خاله مااعرف شون اشكرج
ام حسن : راح انزل جوه انتظرج
ناي : نزلت وبقيت نايمه على ظهري مثل مكالت واني الرعب والندم ياكل بيه اكل لحد مامرت النص ساعه وسميت وكمت على كيفي جنت امشي على كيف واكول شون تجرأت سويت هيج حطيت شال على راسي وشمرت العبايه الاسلاميه على جسمي ونزلت على كيفي طلعت خطوتين الباب الي بصفنا باب ام حسن همه الطابق الجوانه من البيت لكيت الباب مفتوح دكيته سمعت صوتها
ام حسن : تعاي بنتي
ناي : طبيت كراج صغير يكمل باب خشب مفتوح وهول طويل سميت ونزعت نعالي وطبيت باوعت البيت اثاثه مرتب مو جديد بس بنفس الوقت مو حيل قديم نص تخم ومكتبه وتلفزيون وجربايه محطوطه بلهول باوعت بنيه نايمه تطلع اصغر من شرهب بسنتين هيج شى يعني بنيه شابه متغطايه وشكلها حلوو بس حلكها اعوج
سميت بأسم الله وحمدته على نعمه الصحه جان تجي ام حسن
ام حسن : اكعدي
ناي : اشرت على التخم مقبلت اكعد يمها بلكاع
مدت ايدها وانطتني الورقه مكتوب بيها الدعاء وعلمتني عليه
ام حسن : هاي بنتي زهراء ولدتها وعدها مرض نادر اول يوم جابوها اليه كالو متعيش واذا عاشت بمرور الوقت تشلل وماتكدر تتحرك ولا تمشي وتصير الحاجتين جواها الله يرحمه عمي ابو رجلي من سمع هيج كال ذبيها شسوين بيها هاي سگط ومالها نفع بس امراض اني حضنتها وبجيت وكتله لو اخلص عمري اداريها مااقصر ولا اشمرها شون اشمر دمي ولحمي ورجلي من شاف حالتي وتوسلي بيه سكت وحمد الله على نعمته ويوم بعد يوم بدت تكبر وكلام الاطباء طلع صحيح مهتميت كلت هاي البنيه امتحان رب العالمين اليه ولازم افوز بالامتحان حتى يجازيني خير يجوز بسببها الله يكتبلي الجنه كل ابتلاء يابنتي امتحان والدنيا صفوف كل متمر السنوات بينا ندخل صف جديد وامتحان اكبر واصعب وهنياله الي ينجح بيها
ناي : الله ينطيج الصحه والعافيه خاله ياريت كل الناس مثلج
رفعت عيني على الحايط صار بوجهي صورتين شباب اثنين يخبلون يعني مثل منكول نور بوجهم مو طبيعي واحد منهم عيونه خضر صدك يصفن جمالهم
انتبهت وين اباوع ابتسمت بقهر وكالت
ام حسن : حلوين مو
ناي : دنكت خجلانه كلت الها الله يحفظهم ولدج خاله
ام حسن : اي حسن وابو عيون الخضر بكر ولدي اكبر من زهراء فرحت عمري تشوفيهم بعد وفاة ابوهم صارو نفسي اليصعد وينزل حسن عمره ٢٨ سنه وبكر ٢٥ سنه
انتي جنتي فوك تبجين لان ابنج عمره سنتين ونص مات الله يرحمه يبقى ابنج وقطعه من روحج والعمر كله متنسي واني حاسه بيج ويمكن اتأذه اكثر منج لان الفرق اني كبرت وسهرت ودرست وشفتهم شباب اقيس طولهم سنه وره سنه وانتظر اليوم الي افرح بيهم وازوجهم واشوف جهالهم يلعبون يمي واعيط على هذا واضرب ذاك واحضن هاي وتالي الليل افتر عليهم واغطيهم لان اخاف عليهم واحبهم اكثر من روحي واكول همه لو طحت راح يداروني بگبرتي لو متت يشيلون تابوتي وبيدهم ينزلوني تالي اني نزلتهم
ناي : انقبض گلبي كتلها مفهمت
ام حسن : يطلعون يشتغلون على باب الله عدهم سياره سواق طرق خارجيه بين المحافظات جان حسن يشتغل وذابح روحه على الشغل لان خاطب ويريد يتزوج
اربع ايام اله و٣ ايام لبكر والرزق على الله وماشي حالنا ويه التقاعد مالتي بخير وبال٢٠٠٧ اثنينهم طلعو وكال بكر اروح ويه حسن لان متواعد ويه صاحبي لكالي سياره بسعر مناسب بلكي اشتري حتى هاي السياره تضل لحسن ويشتغل براحته گلبي وجعني وغيمت الخنكه على صدري كتلهم يمه ليش مايجي لبغداد الولد ليش اله انتم ترحون كالو صاحبنا ونعرفه والطرق تخوف ميقبل يجي لبغداد كتلهم لعد شون ترحون انتم كالو احنا الطرق مال المحافظات نندلها كلها حتى الحصوه الي بلشارع حافظين مكانها اكلوني اكل بلسانهم بوستهم وحضنتهم گلبي يگلي تخليهم يرحون وعقلي يكول لتعرضين الهم خليهم براحتهم شو همه يوميه رايحين راجعين قابل جديده وگلبي تالي طلع الصح وطلعو ومارجعو
ضليت ٣ ايام مثل المخبله ادور عليهم وعمامهم ويايه ورابع يوم اجه عمهم الصغير كال لكيتهم بلطب العدلي ذابحين ولدي اثنينهم وماخذين الفلوس والسياره وشامريهم بلشارع اذا انتي ماحضنتي ابنج قبل مايندفن اني اثنين شباب وجهم مايبين من جسمهم من التعذيب المسوي بيهم
ياريت ماشفتهم قبل مايدفنوهم جان على الاقل يبقى شكلهم بعيني يوم ماودعتهم
لهسه من اباوع على صورهم اشوفهم كلهم دم وزراك واصابع مكطعه مااشوف الي انتي هسه تشوفي
ناي : طكيت بجي واني اتخيل شون حالهم
يعين گلبج ياخاله والله مااعرف شكووول
ام حسن : كولي الْحٍمَدٍ للـّہ ولااعتراض على حكمك ياالله ومشيئتك
ناي : باوعت على ايمانها وقوتها كتلها شون اكدر اجتاز الصار
ام حسن : حسني ضنج باالله ودوم كولي هو الطف بيه من عباده هو يعرف مصلحتي سبحانه راح يكرمني ويجازيني على تعبي وصبري مرات اكعد وانوح وابجي الگلب ينمرد ومايتحمل من الشوق وارجع افتح القران واقرا كلامه واناجي واكول اله جازيني صبري بأن تجمعني بيهم
ناي : الله ينطيج الصبر خاله ويجازيج خير كافي السويتي اليوم ويايه
ام حسن : انتي بعدج صغيره وهواي شغلات بعدج معايشتها لا كل وكعه تأذين نفسج بيها صيري قويه حتى تكدرين تعيشين الله اكرمج بطفل ثاني حطي عطيته بين عيونج وكومي واكعدي اشكري لاتضلين تندبين حظج
سولفيلي شنو الخلاج هيج توصلين
من كثر مرتاحيت الها كلشي سولفت الها من يوم وفاه امي لحد مادكت بابي الله ذب بگلبي تجاه هاي المره راحه عجيبه وهي دوم مااسولف تسبح وتستغفر
جانت بتها فاتحه عيونها وتسمع بس متكدر تحجي اي شى
ام حسن : اخيج وياج وساندج ذبي حملج عليه واوكفي على رجلج اني يوم مااجاني الدلال وكال لكيت مؤجر وجاب يونس بس باوعت بعينه عرفت بيه طيبه وماعنده دغش
جانو قبلكم عائله واطفال هواي عدهم شيلتهم من هوستهم ومشاكلهم ومن كال بس اني واختي كيفت ومرات اغسل الطرمه الصبح اشوفه من طالع ويسلم ذاك السلام الحلوو ويسألني خاله محتاجه مسواك غراض اجيبلج ويايه عرفت معدنه طيب وكمت لا ارادياً ادعيله الله يحفظه
ناي : اي والله ياخاله اخويه طيب ودوم يوكع بمصايب مو دربه
ام حسن : الله الحارس بنيتي وهاي انتي صرتي مثل اخيج بگلبي وادعيلج الله يبرد نارج وتولدين وتفرحين ويعوضج كل خير
ناي : مشكوره خاله اندكت الباب كامت فتحته طلع يونس
يونس : شونج خاله
ام حسن : يم الله ابني تعال طب اختك يمي
يونس : ضل بالي عليها من صعدت ومالكيتها
ناي : هياتني شفته شون خايف ولمت روحي لان كعد احمله هم زياده
ام حسن : ضلو على الغده ويانه شون شيخ محشي مسويه يلوك لحلكم
ناي : بلعافيه خاله غير مره
طلعنا منها وصعدنا فوك وحجيت كلشي ليونس وانقهر مني وعدته بعد مااعيدها ومن يومها صارت ام حسن قريبه حيل اذا اضوج او اختنك انزل يمها سوالفها تخبل تخليني انسى الهم وحتى الوكت وياها وكامت تعلمني على شغلات بلطبخ اني اعرف اطبخ بس هيه نفسها بالاكل مو طبيعي وتعلمت اكلات منها
وحتى من اشتهي اكله تسويها اليه
جنت اشوفها شون تشيل وتحط بتها كوه تمنيت اساعدها بس هيه متقبل لان حامل وتكول ناذره بنتي محد يساعدني بيها لحد ماينكسر عظمي وانام يمها جنت اتعلم صبرها وقوتها وايمانها ومنا سوالف عمه خوله وتدريبها وعقلها الرهيب تكول لازماتني وينفخن بيه منا وحده ومنا وحده كمت انتبهه على هواي شغلات غلط بشخصيتي ولازم اغيرها
شرهب تعرفت على ام حسن والحلوو من تروح شرهب تخلصها ضحك وياها ويه زهراء
دوم ام حسن تكول اختج ورده نبتت بنص شوك لهذا صامده وقويه وعقلها اكبر من عمرها
وهاي الخبله تجاوبها تكولها
شرهب : بس هااا خاله تره ورده بيها ريحه طيبه مو فاشوشي بس شگل
ام حسن : ورد جوري عطره يفوح بكل مكان
شرهب : اي خاله تغزلي بيه اروحلج فدوة بيه تصحر من وره الاستاذ الفاضل رجلي الموقر
حاير بدروسه وطلابه موتني
ام حسن : الله يهدي عليج جوريه
شرهب : هله صار اسمي جوريه موو نوايه
ناي : شفتي خاله تصيحلي نوايه
ام حسن : وشبيه النوه من النوى يطلع الزرع والشجر هو اساس كلشي بليه النوايه ماينبت زرع
شرهب : اروح فدوة لهذا اللسان اتعلمي مو بس ضاله تحجين عليه وابنج تمرايه كون يطلع يشبهني يارب واضل احرك بگلبج
ناي : طول ما مكابلتني وكاعده اكيد يشبهج
خابرت بيبي وعمه بديعه وبلغتهم عمه ماكدرت تكتم فرحتها وهلهلت رغم حزني جانت فرحتهم احسها رغم البعد البينا وبيبي تهوس وتصفك
والكلب مليان بفرح خل تسمع الشماته
واني اضحك على سوالفها گلبي مقسوم اثنين نص يبجي على الراح ونص فرحان بلجاي
بعد مده اجتني سدره وتفاجأت بيها جانت مستحيه لان مااخذت بخاطري بوفاة ابني كالت خفت تطرديني لان ماخذه موقف منهم وتالي حوراء فهمتها وماخذه العنوان منها واجت زارتني اني سدره ماشفت منها غير الخير والاخلاق الحلووه ورحبت حيل بزيارتها واخذت رقمي الجديد لان بدلته ومرات نتراسل تطمن عليه بقت علاقتي بيها طيبه
مرت الايام وبطني بدت تكبر صار عليه ٥ اشهر وكم يوم احسب على الرزنامه ودوم اقرا الادعيه الي تكول عليها خاله ام حسن الجو حار تموز واني كوه ادنك بله بعدني بلخامس وهيج حرگتي ثگيله من اوصل للتاسع شون
دك تلفوني حوراء
هلوو حوور
حوراء : انتي صدك حامل
ناي : شنوو شمدريج
حوراء : لتجاوبين بسؤال انتي صدك حامل
ناي : تنفست بضوجه اوووف اي حامل
حوراء : وليش ماكلتي
ناي : مااريد اكول
حوراء : وهاي شغله تضم من كل عقلج
ناي : مو اضمها بس على الاقل هاي الفتره مااريد اتعب واتوتر جاوبتج على سؤالج جاوبي منين عرفتي انتي عندج اتصال بيونس
حوراء : توترت من كالت هيج وكتلها
هاااا مجرد خابرت اسلم عليه وسإلته وكال مشيتها ثكلانه من الحباله خله شعر راسي يوكف وفوكاها عليج ٥ اشهر ونص انتي شون ساكته لخاطر الله
ناي : لتكولين لمهدي عفيه معودت صار مده ماكو ومرتاحه
حوراء : مهدي بلشمال صار شهر ونص ومجاي لديالى غير التلفونات بينا وكل ميخابر يسألني عنج شون صارت بله اذا خابر هسه شكول اله تعال خويه تره مرتك بعد ٣ اشهر ونص اتجيب
ناي : اكعدي واسكتي مااريد يعرف
حوراء : هذا مو قميص تشتري وتضمي هذا طفل وابوه لازم يعرف
ناي : وان عرف شراح يتغير اني رجعه ماارجع اله
حوراء : تره مهدي تعبان ومكسور والقران مثلج ليش تصيرين انانيه على الاقل خلي يفرح ويحس راح يرجع يصير اب متوقعت منج هاي الدكه
ناي : عفيه لتلوميني تعرفين كلشي لتضلين اطلعين اخوج ملاك واني شيطان هذا ابني الي وحدي وماله حق بيه
حوراء : اني الشيطان يله ارتاحي وراح اخبث وابلغه يله باي
ناي : الوووً يمعوده حوري رجعت دكيت انطتني رفض وراها طلع مشغول مبين خابرته
حيل ضجت لان راح يعرف وبعدين كعدت بيني وبين نفسي الى متى اضمه صدك على كولت حور قابل هو قميص خلي يعرف واني اعرف شحجي ويااه بعيني
خلال يومين اجاني اتصال من يونس يكول باجر عمران ومهدي ولد خواله جايين
لوتني بطني رجعنا لا هله خابرت عمه خوله وبلغتها
خوله : انتي تردين مهدي لو لا
ناي : لا واريده يطلكني
خوله : طلاك مراح يطلك بس احجي بهدوء وياه وبعقلانيه التردي وصلي بطريقه بسيطه بدون مشاكل اي خلاف وعركه وياه مو بصالحج راح تتأذين وترجفين واخاف يأذي الطفل
ناي : لعد اسكتله خلي يولي اني مااريده ولا اريد اشوف شكله اكرهه عمه
خوله : انجبي انجبي اكرهه لو يمي اله الطج على وجهج ليش تكذبين اصلاً تموتين عليه يلخوثه وروحج هيج تطاير من تسمعين اسمه بس كولي اريد اربيله گلب اريد يحس بيه اريد اعيشه الي عشته اصدكج بس مال اكرهه مو عليه بت ذكرى
ناي : نسيتي السواه بيه
خوله : اني مناسيه ولا انتي راح تنسين بس سالفه اكرهه بطليها تردين تبنين حياتج بدونه من حقج تردين ابنج يضل وياج وتعيشي الحرمان العشتي هم حقج بس كلشي يزيد عن حده ينگلب ضده اذا الج نيه تنتقمين بس وراها ترجعين لحضنه لتكطعين كل الخيوط اما اذا تردين تعيشين صدك بدونه اتصرفي صح وبرزانه لان بينكم طفل خطيه ينداس ويضيع بينج وبينه فكري بمصلحتج وبنفس الوقت بمصلحة ابنج يبقى هذا ابوه لو تضمي بجام خانه وتحطين حرس عليه هم يبقى ابوه ومن حقه يشوفه اسسي حياتج الجديده من البدايه بأساس مرتب وقوي حتى لا ينهد البنيان فوك راسج وقرري بعقلج مو بگلبج وعاميج الصار اول شغله لازم تحطيها بالج انتي شتردين من صدك مو بدافع الانتقام تردين مهدي او لا ومن تقررين خابريني اكلج شتحجين يلرعنه يلمابيج خير بس تعوين
ناي : شكد تحبين ترزليني
خوله : تستاهلين لان متعرفين تتصرفين من تقررين نكعد نسولف شتحجين وياهم حتى لتگلبين الكل ضدج
بقيت افكر واحسبها من كل الجهات وقررت واتصلت بعمه وبدت تعلمني شون اتصرف لحد ماتعبت مني وسدته كلامها منطقي جنها كاعده بگلبي وتعرف شريد
ثاني يوم اجت شرهب تساعدني لان يونس كال لازم اكل عيب جايين طريق بعيد وهاي شرهب تكمز كل ميجون لازم ياكلون شطلعت هاي همه جايين يصالحون ناي لو يتغدون ويرحون
سكتها يونس وكال عيب ميصير صعدت ام حسن تساعدنا وطبخت ويانه وضلت تكول لتتعصبين حتى ابنج ليتأذه انطتني ارشادات مثل كل مره تخليني ارتاح ونزلت لبيتها
كاعده بلغرفه انتظرهم انفتحت باب الهول ودخل يونس واسمع اصواتهم
اجاني يونس حتى اطلع الهم لبست العبايه والاسلاميه والشال وطلعت اول مشافني مهدي فتح عينه على بطني لان جانت جبيره
عمران : هله يابه شونها الهزامه الناسيه خالها
ناي : شونك خالو تقرب وباسني من راسي
شلونك عبد وصلاح شلونك
سلمو جان يكول خالو
عمران : ورجلج ماله سلام
ناي : شلونك مهدي باوعت عليه مورث من الاعصاب
مهدي : زين انتي شونج
ناي : الْحٍمَدٍ للـّہ درت وجهي على خالو
عمران : هيج مالنا خاطر عندج بحيث راح تنرزقين بطفل واحنا مندري متردينا نفرحلج لو شنو سالفتج
مهدي : متريدني اعرف حتى تحرك گلبي اكثر ماهو محروك
ناي : مو هيج خالو اني جنت تعبانه ومصار شهرين من عرفت
مهدي : وشوكت ناويه تبلغيني وره متجيبين لو من يدخل للجامعه احسن على وجهه حتى نروح نخطب اله
ناي : حصرتني الضحكه ودنكت
عمران : على كيفك ابني خلي نفهم سولفي بنتي
ناي : ماعندي شى اسولف بيه هسه انتم عرفتو اني حامل وجايين وهله بيكم هذا بيتكم شنو المطلوب مني
عمران : المطلوب منج ترجعين لبيتج لرجلج
ناي : قبل ٣ اشهر اجاني مهدي وحجينا بلموضوع وميحتاج اعيد الي حجيته لان هو يعرفه وكثر الحجي بنفس الموضوع يتفهه واني الصار بيه لا شى قليل ولا تافهه لهذا مااريد احجي واعيد واصقل والنتيجه وحده
عمران : شنو النتيجه
ناي : يطلكني
مهدي : من اجيت وحجيت وياج مجان اكو طفل يجمعنا وعفتج هاي المده كلها كلت خلي ترتاح بلكي يبرد نارها وتعقل وتفهم وجهت نظري بس هسه اكو طفل وهذا ابني مثل ماهو ابنج ومثل متردي بحضنج اني هم اريده بحضني ومااقبلج تتصرفين بكيفج
ناي : شوف مهدي هاي كدام خالو والولد واخويه اياك تفكر تعيد الصار وتاخذ ابني مني او بنتي لان لهسه مااعرف شنو جنس الطفل اياك تفكر تلوي ايدي قسماً بالله وروح امي وروح سيف الي لهسه ناره شاعله بفادي وتحرك بيه صبح وليل لا اخذ طفلي وانهزم بيه واخليك العمر كله تتحصر على شكله واني اليه سوابق بلهزومات لو نسيت من جنت مراهقه اخذت اختي وانهزمت من محافظه لمحافظه واجيتكم يعني مااخاف
عمران : ناي ميصير هيج الحجي تهددين واني كاعد
ناي : لعد قابل على كلامه بعدنا بسم الله كاعد وشايل خشمه ويحجي بأعصاب تكول مسوي منيه على جيته
مهدي : شنو شايل خشمه احجي عدل متستحين
ناي : كوم يله اضربني ولو انت تعلمت تمد ايدك عليه
مهدي : استغفر الله لج شبيج بابا انتي راح تخبليني شتردين وتصفين من ناحيتي مستعد كلشي اسوي حتى گلبج يرجع يصفى
ناي : اطلكني
عمران : ميصير بنتي انتي حامل طلاكج يصير باطل
ناي : قابل العمر كله راح ابقى حامل كلها ٣ اشهر ونص واجيب وخلي يطلك
مهدي : طلاك مااطلك وهاي كدام الكل لو توكفين على تك رجل العمر كله ياناي طلاك مااطلكج واله اعوفج هيج وروحي محاكم اشتكي شتردين سوي طلاك مااطلك
ناي : توترت جريت نفس بهدوء وحجيت بثقه
ولطلك عادي ابقى على ذمتك مو مهم قابل راح ينقص من طولي اذا مطلكت اهم شى ميجمعني سكف واحد وياك وابنك تشوفه ضمن مواعيد اني احددها ومتاخذه ابد لديالى الي يريد يجي يشوفه هنا عندي بيت اخويه مفتوح للكل شوكت متحب تعال شوفه والله وياك
مهدي : سامع خالي شنو تحجي
عمران : يعني انتي حتى محاطه خط رجعه ومحاسبه حساب لجيتنا كلنا اجينا حتى يعتذرلج كدامنا ويرجعج معززه مكرمه وراضي بكل شروطج وجايبنا شهود حتى تصدكين وانتي حتى منطيتي مجال مباشرة ناهيه الموضوع وحاطه شروط
ناي : ماكو رجعه خالو ترجيتك اكثر من مره
منهن من توسلت علمود ابني وكلت الموت سبقكك ومكدرت اجيبه اليه وعذرتك ورجعت ترجيتك حتى تخلي مهدي يطلكني وهم كعد اشوف واكف بصفه ولهذا اليوم ماوفيت بكلمتك ويايه الاريده ولاخر مره منك بأن مهدي يحترم قراري مااريد اسوي شى يزعلك مني لان كافي تعبت حسووو بيه اني بشر مو حجار تجون وتذبون فوك راسي راح واحد مني ليش تردون تاخذون الثاني شسويتلك حتى كل ميصير بيدك شى تلويني وتكسرني تستغله ابشع استغلال
مهدي : ناي اني لا اريد استغلج ولا أذيج بلعكس اريدج ترجعين لبيتج وهذا الطفل ينولد بحضنج وكدام عيني اني هم خسرت ابني ومن حقي اعيش هاي الفرحه بجيه ابن ثاني وكدام الكل اتعهدلج ماأذيج بلعكس احترم العلاقه الي بينا وحسب شروطج وتعرفيني كد كلمتي بس لتمنعيني من ابني
ناي : محد مانعك ماكتلك لتجي تشوفه تعال شوفه بس مااعيش وياك مااكدر البينا بحر لا اني اريد اعبره ولا اسمحلك تعبره وتجي اذا الي معزه بگلبك لتضغط عليه وخليني اشوف حياتي وارتبها
بقينا اكثر من ساعه نعيد بنفس الحلقه ونرجع لنقطة الصفر ويونس كال تبقى يمي عوفو الامور على حالها لحين ماتهدا النفوس
عمران : ماطول متمسكه برأيج نعوفج هاي الفتره والبي خير الله يقدمه الله يكومج بلسلامه
يونس : وين خالو ماكو روحه تتغدون يله
عمران : دايم خيرك ابني ورانه طريق توقعت ناي اطيب خاطري وترجع ويايه اثاري گلبها حيل شايل
يونس : والاكل شعليه ياخالي ترضى اطلع من بيتك بوكت الغدا
عمران : غير مره ابني النه زيارات هوايه الكم
بقى يونس متمسك بيهم ومقبلو اما مهدي يباوع عليه واني عفتهم ودخلت مااريد ابقى واكفه واسمع شى يغثني
بيومها ماقبلو يبقون واعتقد خالو زعل متوقع رفضي
شرهب : اكلج خيه هذا الاكل الضل وين نودي خير من الله يوكلج غدا لمده اسبوع انتي ويونس
ناي : اخذي الج ولعيالج بثواب امي وسيف وهسه اطلع جم ماعون اوزع لجم بيت يمنا ثواب ولخاله ام حسن والباقي اشيله بلفريز
شرهب : حرامات التعب يله ناكله احنا
شهر بعد شهر وبطني تكبر عشت حياة هادئه مابيها اي مشاكل وصوت وصياح ولا اوامر وطحن وتفكير بهاي الفتره نتخابر دوم اني وحوري وتسألني عن صحتي مرات احس المايك مفتوح وعبالك واحد يمها وابقى اسولف عادي ردت اوصل اله فكرة تره مامتت وراك ولا راح اموت وعايشه ومستقره
يونس دوم يخابر واسمع يسولف ويضحك وما اتجرأ اسأل اخاف من الي بگلبي وتطلع حوراء ويوكع اخويه الروميو بمطب جديد
شرهب : اكلج اخوج يمكن يحب
ناي : اكيد مو يمكن
شرهب : واتوقع بت خالج حوراء
ناي : شمدريج
شرهب : عيونه تلمع من ينجاب طاريها
ناي : صخام وعزه اذا صدك معناها وكع وكعه ويه وداد اني بس لو افهم اخوج ليش يشتري المصايب شرايه
كل فتره حابلي وحدي گلب لو كوستر
شرهب : انه الشاب العراقي بأمتياز ذوله گلبهم مايفرغ واذا فرغ يحب روحه مايكدر يااختي مرض بيهم
ناي : والحل اني ماعندي اعتراض يحب ياريت ويتزوج ويستقر بس اخوج يركض على شكوو وحده صعبه مستحيله
شرهب : هو حب سما حب مراهقه وشيار مجرد اعجاب وانتهت القصه قبل لا تبتدي خوفج من الثالثه سامعه الثالثه ثابته هاي حبها بعد فشل بحياته وبعد اغلاط هواي صارت وتعلم منها و گبر هسه وعقله تغير يعني اذا طلع صدك يحب حوراء اخاف ذيج راح ويه جاسم الله لايرحمه وكع نفسه بمصيبه هاي لعيونها يحرر العراق من الامريكان
ناي : هههههههه والله اخوج راح يشل گبدي من اختياراته العجيبه اني احبها لحوري وصدك توالمه حبابه والضحكه متفارك وجهه وحنونه وكلش زينه امنيه عمري بس وديد تقبل عدها قابليه تحرك حور وتشوي على جثتها سمج وماتنطيها ليونس يبوو لابن ذكرى مجرد مااتخيل الفكرة يصير خفقان عندي
شرهب : نحجي وياه
ناي : ماطول مكال النه معناها ميريد يحجي مااحب اخجله
شرهب : يله كصه بكصه انتي لمهدي وحوري ليونس واني اطك اصبعتين بلنص
ناي : لو اموت ماارجعله
شرهب : نشووف
اعيط ولازمه ايد ام حسن واتوسل بيها الالم يكطعني طبيت بشهري شهر ١١ ب٢٠١٠ يونس يتراكض كدامنا بلمستشفى لان فجأه مي الراس طك واجتني الطلوكه اني قبل لا ادخل بشهري اخذت سونار وعرفت بيه ولد جنت حيل فرحانه وبنفس الوقت خايفه لا رب العالمين ميتمم الفرحه اليه
فتحت عيووني اووون ومااميز منو اليمي
كل الي اريده مي ريگي ناشف واصيح سيف وينه سيف
شرهب : موجود گلبي الْحٍمَدٍ للـّہ على سلامتج
ناي : ابني وين اااااااخ
شرهب : شويه ويجيبوه
ام حسن : بلخير بنتي على الرزق الجاج يتربى بعزكم
اني لازم اروح زهره مااكدر اعوفها هواي
شرهب : روحي خاله خلف الله عليج تعبناج
خلي يونس يوصلج
ام حسن : لا ميحتاج تكسي من باب المستشفى لباب البيت اني عفت ام حيدر يم زهره بس تعرفين اخاف عليها
شرهب : مشكوره خاله ينطيج العافيه اخذي راحتج اني يمها
ناي : بديت اصحى واركز يونس وين
شرهب : بره كاعد لج ابنج يخبل مدنفش شجنتي توكلي منفوخ نفخ
ناي : صلي على النبي خبله
شرهب : بس اذا الي بالي صحيح اضل اشمت بيج العمر كله
ناي : شنو
شرهب : يمكن ابنج شعره عليه
ناي : ولج وين يبين بعده ابن نفاس حتى شعر ماعنده قليل كلش وميبين
شرهب : لا عيني شعره مبين كون كيرلي يارب
ناي : شيطلع خلي يطلع بس كون عافيته زينه
جابو وحطوه بحضني واني دموعي متوكف شميته افيييش ياريحتك مثل ريحه اخوك من حضنته اول يوم
شرهب : لتضلين تبجين وتفاولين عليه مصره تسمي سيف
ناي : اي مصره مااريد ينكطع اسم سيف واني ابقى ام سيف
شرهب : براحتج
كل شويه اغفى من البنج لان هلمره ولادتي عمليه مو مثل ذيج طبيعيه
جنت شبهه واعيه واسمع الداير مداير بس عيووني ثكيله مااكدر افتحها سمعت صوته
شرهب :تفضل مبروك على الطفل
مهدي : الله يبارك بعمرج
شرهب : عيونه ادور على ابنه اشرت اله راح بأتجاهه جان محطوط مثل جربايه كاروك صغير مال مستشفى دنك شاله وباسه اني تعمدت انتبهه عليه لكيت عيونه مدمعه
ومخنوك يريد يبجي
مسح عيونه بطرف ايده ولازم الطفل وخايف عليه اندار عليه
مهدي : شسمته
شرهب : سيف ومقبلت غير اسم
مهدي : هذا هو الْحٍمَدٍ للـّہ هااا بابا سيوفي حبيبي ودنك يبوس بهدوء بيه
لزمه وكبر بأذنه ويه كل تكبيره جان جسمي يقشعر لان تكبيرته جان بيها دموع
ناي : جنت اسمعه وحاسه بيه مردت اشوفه حتى لا اضعف واشمر نفسي بحضنه ردت ابقى على وقفي وماانهز لهذا فضلت بهيج موقف الهروب بس السواه خلاني انهز اكثر
شرهب : رجع الطفل لمكانه وتقرب لناي الجانت مغمضه واكص ايدي اذا مو واعيه
دنك وباس راسها وخدها عود اني استحيت ابد والله ولا اندار هيج مشهد ميصير بس بلمسلسلات التركيه وافوته امداني بقيت مركزه بالخمس حواس وطلعت الحاسه السادسه وياهم حتى تكمل واشوف الموقف كله ورجع باس خدها الثاني وهمس وسمعته وداعت عمي الغالي عبودي كال الها
مهدي : الْحٍمَدٍ للـّہ على سلامتج ام سيوفي الغالية يتربي بحضني وحضنج ويجي يوم وارجعج لحضني لان متعرفين شكد مشتاقلج
شرهب : دخل يونس خرب ام اللحظه هسه وكتك لو شويه منتظر نشوف شيصير لقطه بشده مو كعد نتعلم اااخ من التصحر اشتعلت عدي اسمك رجال ورجل الكرسي احسن منك
يونس : مهدي ليش دفعت الحساب
مهدي : اني بكلشي مدخلت ولا اجيت ولا اعترضت على كل السوته طول هاي الاشهر بس مال ابني ينولد وانت تدفع حسابه مااقبل مو ميت اني حتى تاخذ مكاني
يونس : محد كال اخذ مكانك هي اختي واني مسؤول عنها
مهدي : وهي مرتي وهذا ابني يعني اني اتحمل كلشي يخصهم ومشكور ماقصرت
شرهب : عفيه صوتكم لتكعد
مهدي : شوكت اطلعوها
شرهب : باجر ان شاء الله
اني جاي الصبح
شرهب : هله بيك
بس طلع ويونس ويااه مهدي فتحت ناي عيونها تبجي
على شنو تبجين غير لو التلفون يمي اله اصوركم مهند ونور مو مثلكم
ناي : ليش هيج يسوي
شرهب : شسوي قابل اغتصبج هي بوسه وتحمدلج بلسلامه ولوما يونس الله ينطي العافيه مااكول غير شى جان سمعنا جم كلمة رومانسيه
ناي : ذكرتيني بحوري هم مثلج تموت على هاي السوالف العوجه
شرهب : اخوج هسه مشبعها خافي عليه المخلصتها احضن المخده واشوف مسلسلات تركيه والطم على حضي
ناي : لتضحكيني عفيه بطني توجعني
شرهب : شابعه بوس وتبجي والله كوه تخليني اتنازل عن اخلاقي واحجي
ناي : ثاني يوم طلعنا جنت اباوع على سيف اريد اضمه بروحي شرهب شايلته اول منزلنا
لكيت سياره مهدي ركزت بلباب ويمه رجال وعبد وصلاح والرجال مدد اثنين طليان
عدلت شالي وشلت سيف تكول راح ياخذه مني
شرهب : يمعوده متكدرين الدرج تصعدين خلي اشيله اني جيبي
مهدي : صباح الخير الْحٍمَدٍ للـّہ على سلامتكم
ناي : الله يسلمك اشر مبين هذا كصاب وذبح جوه رجلي على سلامتي
وجوه رجل شرهب لان شايله الطفل والسخيفه مكيفه
بيوم ولادتي ونورت الدنيا محد ذبحلي ايباااه الدنيا صغيره وره ١٨ سنه ذبحو جوه رجلي
عبدالرحمن: يوم مايذبحوج انتي وگوشتج الي كل مااشوفج كبرانه اكثر حطي شى على شعرج لو اله اطلعين شعرج للناس
شرهب : حجه لازم تذبلك حجايه متكدر
عبدالرحمن: وليش محد ذبحلج من اجيتي للدنيا
شرهب : منتظرين طيورك تكبر ويذبحوهن جوه رجلي
عبدالرحمن: كورج ويه كور الطيور لان احلى منج طبي لا اجيب السجينه واكص لسانج
شرهب : باوعت صفح وهزيت ايدي وطبيت وبيدي سيف
ناي : لزم ايدي يونس وطببني وبديت اصعد على كيفي والالم فوول كوه صعدت ردت ابجي نص الدرج وكفت مااكدر جان يكوم ويشيلني مهدي وصعدني واني قطره دم مابيه وهي شرهب تغمز لو بيدي ادفرها على عيونها
مهدي : وين اخليج
ناي : بغرفتي
طببني للغرفه ونزلني على الجربايه على كيف
مهدي : تأذيتي
ناي : لا شكراً تعبتك وكلفت نفسك
مهدي : نسيتي انتي منو
ناي : شرهب انطيني سيف
اخذته وحطيته يمي هو دنك وباسه وطلع
شرهب : صاير رجلج جنتل مان ويبيع بطولات مداعرفه
ناي : فرحان بأبنه مو بيه تأذيت حييل عدلي مكان سيف وفراشه وخلي ارضعه يمكن جوعان
بيومها وزعو اللحم على الناس المحتاجه هواي ناس تعرفهم ام حسن وهي تكفلت بهذا الشى وعبد يفتر وياها بسيارته
بكراج ام حسن لان جبير حطو منقله وكعدو يشون تكه ومعلاك وصعدولي معلاك اكلت شويه مااشتهيوالولد كلهم اكلو وحسبو حساب خاله وشرهب للعصر صعد مهدي حط فلوس جوه راس سيف مقبلت
تقرب مني وكال
مهدي : جنت اعرف اعنوديه وراسج كوي وحسبت حساب لهواي شغلات بس متوقعت هيج كويه صايره اني مراح ادخل بيج حتى لتنفرين وتسوين مشاكل باقيه هنا مراح احجي براحتج عيشتج على اخوج ومترضين شى مني هم ابلعها واسكت بس مال ابني اخوج يعيشه لو مو تعيطين لو تملخين روحج مااقبل فلس ينصرف على ابني كل شهر ادزلج مصرفه حفاظات حليب ملابس لاسامح الله طبيب اي شى يخص سيف اني اتكفل بيه
وحجايه ثانيه ازعلج
ناي : سكتت ودرت وجهي وهو طلع شفته خال ٥٠٠ الف جوه راسه اني صفنت على كلامه يونس على كد حاله وصاحب ايجار محل وايجار بيت وعيشه مامجبور يتحمل مصرف سيف ومهدي يبقى ابوه خلي يصرف
مراح احجي مااريد ازيد على راس يونس هم اريده يگون نفسه
ابني بحضني وارضع بيه وابجي من الفرح وبنفس الوقت اتذكر ابني الجبير ويعتصر گلبي
شرهب بقت يمي هاي الفتره هواي تجي عمتها زينه وحبابه ومتكول شى اما عدي عايف شرهب براحتها وهذا الشى هم محيرها لان تعرف طبعه وهم يريحها لان خلصانه من النك مالته
اجتني بيبي وعمه وبان بقو ٣ ايام يمنا حيل فرحت بلمتهم وبيبي تعرفت على ام حسن وحبتها وكالت الله عوضج عن مره طيبه يمج
وصتها عليه
وراها بكم يوم اندكت الباب وطبو الجوك كله خالو عمران وام عبد وام صلاح وحوري وسدره خالو جايبهن وجاي فرحت حيييل بجيتهم لان همه ناس اوادم ودوم تعاملو ويايه بكل محنه ومايوم جرحوني بكلمه ودخلتهم عليه خلت گلبي شكبره من الفرح كل ذوله اجوي اله عمتي ولا وصلت
بعد احسن مااريد اشوفها
ترسو الكاروك فلوس وهدايا فرحانين حييل بولادة سيف وبيومها جلبت بيهم يباتون وخالو قبل بس هو بات يم كرابتهم ويونس نام بلسطح مدخل بيومها تأكدت حوري ويونس على علاقه وهي نامت بفراشه مفضوحه حييل شوقها وحبها اله ردت احجي وياها بس ماكو فرصه كلها موجوده يونس ماقصر من مسواك واكل حتى شلت من الفلوس العندي وانطيته وهو مقبل ولحيت وزعلت عليه تالي اخذ نصهم لان مصرف ثكيل عليه وقبلها بيت بيبي هم ٣ ايام باتو مصاريف اشكال انقهر دوم گلبي ينمرد عليه من يتعب واني اصرف تعبه
ثاني يوم ودعوني وجان يوم حيل حلوو
بهاي الفتره صار التقديم الخارجي ويونس يركض بيها قدم معامله حتى امتحن تمهيدي حتى ادخل وزاري رغم بلبدايه خفت لان طفل وبعده صغير ويرادله اهتمام
تشجعت وقدمت وجان امتحاني بشهر الثاني يعني يلحك شويه سيوفي يكبر جنت اكعد اقرا وكتي قسمته بين سيف وبين الدراسه والبيت اتعب بس على گلبي مثل العسل
عمه يوميه تخابرني جنت اسألها عن صالحه وساهره وتكىل كلشي ماكو هدوء وهذا الشى الصراحه يوتر ميريح لان معناها وراهن شى موزين
بقت تاخذ الاخبار من اشواق الي هيه هم منتظره رد صالحه على سالفه زواج عبيد
طرحتها وضربتها وسوت مشاكل بس اكيد هذا مو اخر شى تسوي اما مهند عاف امه وعاف العراق ورجع لتركيا وحسب كلام عمه كايل الها اليوم الي اسمع ناي اطلكت ثاني يوم اني راجع للعراق وهذا الشى كرهني بيه اكثر غير يجوز مني ويروح
طبينا ٢٠١١ امتحنت التمهيدي وطلعت بدرسين وكدرت ادخل وزاري واليوم اخر امتحان اليه بلوزاري تعبت حييل الدراسه صعبه ومنا اركض شغل ومسؤوليه
عمر سيف صار ٧ اشهر
روحي طير تفتر وراه اخاف عليه حتى من نفسي اقرا وعيني عليه اذا وكع اكمز گبله حريصه لدرجه الهوس
مانسيت ابني رحت اكثر من مره لگبره بديالى واخلي سيف الصغير اما يم شرهب او يم خاله ام حسن اخاف عليه من الطريق واتوكل ازور ابني الجبير
واكعد انوح عليه هذا فرحتي اول فرحه ولجمه الگلب لو الف طفل ميعوضني عنه جنت اروح ويه يونس ساعات انام واحط خدي على گبره واتمنى اشمه واسمع صوته سميت اخوه نفس اسمه حتى اشوفه بيه وكل ماارجع من عنده اكون منهاره واخلصها مريضة بليومين
اكثر من مره يجي مهدي يشوفه ويطلب مني ياخذه لديالى واني مااقبل يعني امه ماكلفت نفسها تجي وتشوفها تستنكف الاخت وتريد ابني يروح لحد يمها حتى هم تهمله ويصير بيه شى اكثر من مره نتجادل واتعصب وتالي يخلي ويطلع مل من كثر مايطلب مني ياخذه واني ارفض الي يريد يشوفه يجي هنا
عرف مهدي بموضوع دراستي رغم مااخذت رأيه ومحجه اي شى ضاج ومكدر يدخل يتعامل ويايه بحذر
طلعت النتيجه ومع الاسف رسبت بجيت بجي بيومها انتهيت حسيت كلشي انتهى بعد مالي حق ادرس واحقق حلمي وكلها تحاول تهديني واني تكول ميتلي واحد
ماامتحنت دور ثاني لان معدلي بلخمسين حتى معهد ميجيب اليه
وسلمت امري وذبيت حملي اراعي ابني وهجرت الدراسه والكتب كلت ماطول جربت ومافلحت اكعد واسكت
بدا ابني يكبر كدام عيني حركاته ضحكاته سنونه وهو يكزكز حتى يعض اما شعره قضيه ثانيه طلع مثل مكالت شرهب كيرلي يخبل ومتخليني اكصه تگلب الدنيا
جنت دوم اباوع على اختي تكبر وماكو شى جديد بحياتها تمنيت تطلك وتجي تعيش يمنا وتعوف عدي شنو وجوده أذيه مو نفع بس هيه ساكته ودوم تكول خلي يونس بوحده صعب يصيرن اثنين رغم لسانها وضحكها وهوستها تكتم وتضم وتأذي داخلها وتظهر النا غير الحقيقه الي عايشتها
كامت تبات يومين بدال اليوم تجي الخميس العصر وتروح السبت العصر حاولت احجي وياها وهي متقبل اختي واعرفها حساسه ومتريد تشيل يونس حملها
شرهب : عدي ملتهي بلتدريس وبحياته وتعلمت على بخله وتصرفاته اليابسه ويايه صرت اشطب يوم من عمري وماافكر بيه حتى لا انقهر عمي وعمتي احبهم ودوم وياهم ومدلليني اما بتهم ابتسام من يوم طلعتها من البيت ومااجت ولا احد شاف خيالها انيال گلبها الي عدها هيج اب وام حنان شون تكدر بدونهم
حياتي ويه عدي اوامر وطلبات وتقضيه حاجته بعد الاسقاط الي صار اليه ماحبلت رغم تاركه المانع ماحبلت مرات اكول هذا الشى لمصلحتي المن مخلفه للفگر ومرات من اشوف سيوفي اريد اصير ام طفل يصيحلي ماما وافرح بيه والعب وياه وانومه بحضني اعوض بيه عن النقص العايشه بيه
طلبت من عدي اروح دكتوره كوه بلمشاكل والعركات قبل وانطاني فلوس الكشفيه بعد ماعيرني الف مره بأن اني ارض بور مااخلف يابه والي وكعو شنوو چكليت غير جهال والله ماقسملي ومن رحت للدكتوره انطتني علاجات ومقويات ومنشطات رجعت للبيت ويه عمتي لان منطاني فلوس العلاج انطيته الراچيته حتى يشتريها اليه رجع يعيط
عدي : اله تخبلت اشتريلج دوه ب٣٥٠ الف اتزوج وحده ثانيه ارخص
شرهب : ليش تتزوج صخله ب٣٥٠ يامره تقبل تتزوج بهيج مبلغ
عدي : خصم الحجي علاج ماكو هاااج
كام وشك الراجيته وذبها بوجهي
شرهب :ليش هيج اقلها جان جبت نص
العلاج
عدي : فلس ماادفع بيج خير احبلي حتى الجلاب الي بلشارع تحبل احسن منج دوا وهاي السوالف التعبانه متمشي براسي تردين شوفيلج عطار مره تقرا عليج وتخليج تحبلين اطباء وفلوس ماكو سمعت كلامج وانطيتج فلوس كشفيه وبعد مااعيدها
شرهب : هي ٢٥ الف شكد انطيت
عدي : ميعيشنج ٢٥ الف ٣ ايام تتزوهرين بيهن بعد ماكو فلس لو تحبلين طبيعي لو تنجبين وتكعدين
شرهب : انجب واكعد احسن انت مو مال تصير اب ضل هيج
عدي : اجي اركع راسج بلحايط اكسر سنونج وافلج وجهج انتي موخوش مره عايبه طفل معرفتني تجيبين وجاي تذب الصوج براسي قبل امهاتنا لا اطباء ولا شى ميلحكن على الجهال وانتي حضرت بت الباشا تردين تخلصيها اطباء وفلوس مو اشتغل لحلكج الجايف
شرهب : كااافي مااروح ولا اخذ علاج كاعده وساكته بس اسكت انفكيت شيسدك بعد من خرب عمي على العيشه الزفره العايشتها
عدي : مو على اساس جبتج من اليرموك الاربع شوارع وعيشتج عيشه موزينه لوما اهلج اهل الزبل والعتيك شجان سويتي ذبوج عليه ذب بس تزوجها
شرهب : عفته ونزلت وحلفت حبايه مااخذ واحبل منه ويطبه طوب
ناي : سنه ٢٠١١ ركضت بينا كل شهر بعد شهر
لحد مصار شهر ١١ دخل عليه يونس وهو مقدم معامله مره ثانيه حتى امتحن غوركت عيني وحضنته
يونس : يله بلسباعيه اريد هلمره ارفع راسي بيج واكول نجحت وعلى عنادكم الدنيا مخلصت واذا رسبتي مره عيدي مره واثنين و٣ لحد متنجحين وهلمره سيف كبر واكدر اخلي يمي وتقرين براحتج لتفكرين بأي شى غير بدراستج ومن اني ماكو خلي يم ام حسن تعرفين بيها شكد امينه وحريصه وتحب سيف
ناي : ان شاء الله هلمره ارفع راسك
عرفت ام حسن وكيفت وثاني يوم اندكت الباب صوتها فتحته الها بيدها علاكتين شكبرهن
شنو ذني خاله
ام حسن : ذني ملازم مال احسن اساتذه بتدريس السادس الاعدادي جيرانه بدايه الفرع الصيدلانيه الي كتلج عليها
ناي : اي اعرفها
ام حسن : رحت باركت لبتها نجحت وطلعت معدل طبيه ومن كلتي راح تمتحنين لبست عباتي ورحت وطلبت منها ملازم بتها لان جانت حاطه الها اگفأ اساتذه بملايين حتى اطلع معدل كل الدروس ومن حجيت الها عنج ماقصرت المره لمت الملازم كلها ورحت اليوم جبتها بس طلبت تحافظين عليهن لان كرايبهم سنه الجايه سادس ويردون ينطون الملازم الها
ناي : حضنتها وبستها الله دزج نجده اليه شون اجازيج عفيه والله كعد تخجليني ياخاله
ام حسن : ادرسي وانجحي وخلي اخيج يفرح بيج
اخذت الملازم وكعدت اقرا ذبيت حيلي وصحتي بلقرايه عبرت الامتحان التمهيدي وهلمره ناجحه
ودخلت وزاري تفرخت لدراستي وساعدني يونس بشكل مو طبيعي كام مهدي من يجي مااطلع اله لان حايره اقرا بس طلبه دوم ينرفض ممنوع ياخذ سيف
اقرا وعيوني راحت كمت انام ساعتين بليوم بس ويونس سجلني دورات تقويه واروح وارجع هلكانه من التعب واذب روحي على الجربايه ماادري شكوو بلدنيا وراها اكعد مخروعه على سيف الكاه بحضن يونس نايم
كام حتى هو يوكله ومن يروح للشغل ينزله يم خاله ام حسن
دخلت ٢٠١٢ واني صرت نص بشر من التعب والسهر والقرايه حتى اكل قليل اكل ومرات انام على روحي من التعب وامتحنت وخايفه ومرعوبه لا يتكرر الصار وارسب بس متأكده كلش زين جاوبت منتظره النتيجه واضافيري اكلتهن اكل وين صرت يايونس وينك راح يجيبها اجه يونس يضحك ويبوس بيه
ناي : هااااا بشر
يونس : ٨٢ معدلج رفعتي راسي
ناي : من الفرحه حضنته وابوس بيه وسجدت لله شكر شويه وخاله ام حسن صعدت تبوس بيه
ام حسن : لوما حالفه مااهلهل وره روحه الولد والله جان هلهلت الج من كثر مافرحانه
بلحظتها دخلت شرهب وعمتها ثاري عارفه النتيجه يونس مخابرها والجكليت والهلاهل مالتها ترس البيت وسيف يكمز ميعرف شكوو
واخيراً بعد سنتين تعب وقهر ودراسه وقله نوم وتفكير ومحاربه دخلت كليه علوم تطبيقيه جامعه التكنولوجيه
بت ذكرى صارت طالبه كليه وتحقق اول حلم لامي
فزيت من صفنتي واني اركض وره سيوفي لان
ميقبل ياكل ورايه باجر دوام وبعدني بأول ايام ومااريد اتأخر او اكسل
يمعودين فضوها اريد اقرا
دك تلفوني باوعت شرهب جاوبتها واني زهكانه هااا يمعوده
شرهب : الحكيني نااااي عدي راح يموووووتني
