رواية ليتك لا تعرف سري الفصل الثاني 2 بقلم اسماء الطبلاوي

(كانت فرح لسه واقفه ومصممه ان جاسر يعتذر منها على الكلام اللي قاله. 

صفوت: معلش يا بنتي امسحيها فيا ده عمره ما اعتذر لحد.

فادي: وبالذات لو واحده ست

فرح: انا ما ليش دعوه بالكلام ده كله هو غلط والمفروض يعتذر.

جاسر بغضب: هو انتى بتستهبلي ولا بتتكلمي جد انا اعتذرلك انتى يعني تبقى غلطانه وكمان عاوزه تنولى الشرف ان انا اعتذر لك وتبقى انتى اول واحده في التاريخ من الجنسين اعتذرلها هو انتى هبله.

فرح: هو انت طالع فيها على ايه اللي غلط يعتذر وده الصح 

جاسر: ده الصح من وجهه نظرك انا ما بتعاملش بالطريقه دي ومتدخليش في حياتي ولا تكلميني ثاني فاهمه.

فرح: ما احبش اصلا اني ادخل في حياتك واللي انت عايز تعمله اعمله ومش عاوزه خالص الاعتذار بتاعك التاريخي ده 

(خرجت فرح وهي متغاظه منه وبدا جاسر يلبس هدومه وصفوت اتخض.

صفوت: انت بتعمل ايه يا ابني انت لسه تعبان لازم تفضل هنا لبكره.

جاسر: بابا انا هخرج من هنا حالا انا زهقت 

صفوت: ما ينفعش يا حبيبي بقولك لازم تفضل هنا لبكره الدكاتره قالوا كده لازم تفضل تحت الملاحظه 

جاسر: انا مليش دعوه بالكلام ده عايزين تستنوا لبكره تمام انما انا مش فاضي للقعده دي انا ورايا شغل كتير

فادي: مش عارف ليه حاسس ان الشغل ده ليه علاقه برقبتي ربنا يستر 

(وثاني يوم في الصعيد كانت رحمه بنت عمة فرح قاعده في اوضتها ماسكه تليفونها عاوزه تكلم فرح زي كل يوم قبل ما تروح الجامعه دخلت عليها امها

نصره: صباح الفل يا زينه البنات كيفك يا جلب امك ان شاء الله تكوني نمتي زين ليله امبارح وما تعبتيش 

رحمه: الحمد لله ياما كنت جلجانه شويه وبالي مشغول اصلى خايفه لا رابح يتخن عجله وما يسيبنيش اروح زياره الشهر ده لفرح وجتها هتحصل خناجه كيف كل مره

نصره: ليه يا بتي بتجولي اكده وهو رابح هيرفض ليه ده حتى بيحب فرح جوي ما انتى عارفه.

رحمه: ما هي دي المشكله ياما هو بيحب فرح بس فرح ما بتحبوش جلبها مش حاسس بيه وانتى عارفه رابح جاسي وعنده راكبه وما بيعملش حساب لحد

نصره: انت بتجولي فيها طالع كيف ابوه الله يرحمه جلبه اسود وما يجبلش حد يجوله لا ما هو مات بحسرته من كتر ما ظلم ناس ربنا ما بيسيبش لحد 

رحمه: خلاص ياما بجى ما يجوزش عليه غير الرحمه دلوك... انا هتصل على فرح اطمن عليها والبس علشان اروح الجامعه واللي عاوزه ربنا هيكون

نصره: طيب انا هجوم اجهزلك الوكل عشان تاكلي لجمه جبل ما تخرجي وسيبي موضوع زياره فرح ده عليا انا هعرف ازاي اجنع رابح.

( خرجت نصره وسابت بنتها بتستعد وبترن على فرح وعلى الجانب الثاني الصبح في المستشفى اللي شغاله فيها فرح كانت لسه خارجه من الاسانسير ورن تليفونها برقم رحمه جاوبت عليه وهي بتضحك 

فرح: الو صباح الفل يا رحمتي وحشتيني قوي يا بت

رحمه: صباح الجمال يا ستي اتكلمي معايا بجى كيف ما بنتحددت علشان ابجى مرتاحه

فرح: حاضر كيفك يا بت عمتي مش ناويه تاجي زياره الشهر ده ولا هتهربي 

رحمه: لا والله يا فرح انا جلت لامي تتكلم مع رابح علشان اجيلك بكره على طول لو عرفت 

(كانت فرح لسه بتتكلم مع رحمه لما دخلت قسم الاشاعه خدت النتائج منه بتاعت جاسر

رحمه: مالك يا فرح كنك مشغوله وبالك مش رايج تحبى اجفل دلوك ونتكلم وجت ثاني

فرح: ابدا يا حبيبتي دي بس حاله اكده جلجاني شويه وصاحبها شاب غريب

( في الوقت ده كانت فرح واقفه قدام اوضه جاسر بتبص جواها لقيتها فاضيه اتصدمت لانها طلبت من ابوه يخليه في المستشفى وما يخرجش

رحمه: اللي واخد عجلك يتهنابه يا فروحه كنه مهم جوي الراجل ده عندك صح ولا انا بتهيالي 

فرح: رحمه انا مليش في الكلام الفارغ ده بجولك ايه اجفلي دلوك علشان جالي شغل وهبجى اكلمك نوبه ثانيه 

رحمه: ماشي بس هتجوليلي على كل حاجه انتى فاهمه يلا مع السلامه دلوك علشان انا كمان هنزل الجامعه.

( قفلت فرح الخط مع رحمه ودخلت الاوضه اللي كان فيها جاسر امبارح وهي بتبص حواليها بغيظ.

فرح: برغم اني ما اتكلمتش معاه ولا كلمه الا اني متاكده انه انسان غريب ورخم كمان ما كانش قادر يصبر شويه على كل حال انا هروح مكتبي ابص على ملفه لو لقيت حاجه زي ما انا شاكه هكلم صفوت بيه ولو ما لقيتش يبقى الحمد لله على كل حال.

( راحت فرح مكتبها وقعدت تبص على ملف جاسر باهتمام شديد وكل ما قرات فيه كانت بتحس بزعل لحد ما خلصت قفلت الملف وفضلت سرحانه شويه لحد ما دخل دكتور سامح وهي مش واخده بالها منه 

فرح: ايه ده سامح انت جيت امتى.. انا اسفه ما حستش بيك وانت داخل الاوضه خالص.

سامح: لا ما انا اخذت بالي ايه اللي شاغل بالك ومخليكي سرحانه قوي كده ما تشاركيني يمكن انفعك

فرح: ولا حاجه ما تشغلش بالك انت.. انا لازم اقوم دلوقتي عشان ورايا مشوار مهم المكتب مكتبك طبعا 

سامح: مكتب ايه استني بس يا فرح ايه الموضوع اللي مغيرك كده على الصبح اتكلمي معايا 

فرح: قلتلك ولا حاجه يا دكتور في حاله عندي بس شغلاني شويه عن اذنك بقى 

(سابت فرح سامح مذهول من اسلوب كلامها الغريب لان دي اول مره تتكلم معاه بالطريقه دي..

سامح: معقول كل العصبيه دي بسبب حاله عندها.

( سابته فرح وراحت للاستقبال تسال على اي معلومه عن جاسر

فرح: ناديه.. شوفيلي كده رقم او عنوان الحاله اللي دخلت امبارح بتسمم هو شاب اسمه جاسر صفوت الشافعي اي معلومات عندك موجوده في الاستماره هاتيهالي على طول

( جه سامح وراها وسمعها وهي بتسال عن جاسر 

سامح: هو مين جاسر اللي قالب حالك بالمنظر ده يا دكتوره فرح على الصبح ده كان تسمم بس زي ما انتى بتقولي وانتى تخصصك قلب وشرايين شاغله بالك بيه ليه بقى دلوقتي

فرح: دكتور سامح هو انت بتراقبني؟؟ اظن انا اهتم بالحاله اللي تعجبني واللى اشوف انها تستاهل واللي انت بتعمله ده تدخل منك في حياتي وشغلي انا ما اقبلوش... يا ناديه حضرتى اللي طلبته منك

ناديه: ايوه يا دكتوره اتفضلي ده كل الموجود عنه

فرح: متشكره جدا بعد اذنك يا دكتور عشان ورايا شغل 

(مشت فرح وسابت سامح واقف بيفكر والفضول هيقتله عشان يعرف مين المريض اللي مخليها مشغوله قوي كده 

سامح: لا كده كتير انا لازم افهم في ايه بالظبط دي عمرها ما كلمتني كده في اسوء حالتها حتى ايه المميز في المريض ده يعني... ماشي انا هستنى لما ترجع وتهدى

( خدت فرح ملف جاسر وركبت عربيتها وطلعت على العنوان اللي كان موجود في الورق عشان تقابل صفوت الشافعي وتتكلم معاه

فرح: انا مش عارفه اجيبها له ازاي بس انا لازم اتكلم معاه واوضحله كل حاجه وقتها بقى هو يقرر ناوي يعمل ايه وابقى انا عملت اللي عليا على الاقل عشان ما احسش اني قصرت

( وفي فرع الشركه اللي فيه جاسر كان بيشتغل بمنتهى الاجتهاد على ورق صفقه قدامه وكان بيفحص كل حاجه فيها من المكاسب والمخاسر والمبلغ اللي لازم يقدمه لما دخل عليه فادي

فادي: جسوره حبيبي كده تنزل بدري قبل ما نفطر سوا وتحرم روحك من طلتى البهيه ده كلام برده وبعدين انت لسه تعبان يا جدع ايه اللي نزلك

جاسر: البركه فيك هو انا ينفع اشوفك وما اتعبش وبعدين انا عايز اتحرم من طلتك او انت تتحرم من طلتي يعني مش فارقه

فادي بغضب: جاسر انا ما بهزرش في الموضوع ده وبطل تجيب سيرة الموت يا اما والله همشي وما تعرفليش طريق تاني انت فاهم

جاسر: في ايه يا فادي انا بهزر انت مالك قلبتها جد كده ليه ما كنتش اعرف انك بتحس وبتخاف عليا كمان انت فاجئتني الصراحه

فادي: ايوه بحس يا جاسر انت اخويا الوحيد وما اقدرش اعيش من غيرك ابدا واقفل بقى الموضوع ده خالص 

جاسر: خلاص قفل يلا... انا كمان بحبك انت بس لو ما كنتش غبي شويتين... القصد انت كنت جاي عايز ايه اصلا 

فادي: اوباااا دي زمانها خللت بره اصل البنت التنكه الملزقه بنت جمال البنهاوي بره وبتقول عاوزاك في شغل وانا قاعد ارغي ونسيتها

جاسر: يا باااااظ، قي انا ما بقبلش البنت دي... يعني ما كنتش عارف تزحلقها انا اصلا تعبان... المهم دخلها خلينا نشوف عايزه ايه وخليك قاعد ما تقومش

( قام فادي ودخل اشكي بنت جمال البنهاوي لمكتب جاسر وقعد على الكرسي اللي قدامها فضلت تبصله شذرا لانها كانت عاوزه تقعد مع جاسر لوحده 

جاسر: اهلا يا انسه اشكي شوفي انا تعبان وبفكر اروح اصلا يعني خشى في الموضوع 

اشكي: كده على طول لا الف سلامه عليك تمام نخش في الموضوع. 

(في الوقت ده كانت فرح وصلت لفيلا صفوت الشافعي دقت الباب وطلبت مقابله صفوت بيه و حسن الخدام دخلها ودخل يدي خبر لصفوت وهي استغربت لما ما لقيتش ولا ست في المكان وشويه ونزلها صفوت

صفوت: اهلا وسهلا يا دكتوره فرح نورتيني يا بنتي خير ان شاء الله طمنيني النتائج طلعت

فرح: اهلا بيك يا صفوت بيه متشكره جدا على الترحيب ده وبرغم اني مش عايزه اقلقك الا انه الصراحه مش خير خالص.

(حس صفوت بالقلق الشديد في كلام فرح قعد بخوف وهو بيستفسر 

صفوت: ليه بتقولي كده يا بنتي هي التقارير الطبيه بتاعه جاسر طلع فيها حاجه خطر لا سمح الله طمنيني عليه الله يخليكي

فرح: في الحقيقه ابن حضرتك عنده مشكله خطيره في القلب قصور كامل في عضله القلب وتلف في الصمام الرئيسي

صفوت: يا حبيبي يا ابني... ازاي ما اعرفش حاجه عن كل ده قبل كده ولا هو يعرف على كده الهبوط اللي بيجيله ده بسبب الموضوع ده 

فرح: فعلا بسببه بس يمكن ان استاذ جاسر يكون كثير الشغل علشان كده ما بيحسش بالتعب اللي لازم يحس بيه او يمكن بياخد كثير علشان ما يحسش بحاجه وده بيأخر ظهور المرض بشكل كامل وللاسف ده اكبر غلط وانا لما هو طلب مني مسكن قبل كده رفضت اكتبهوله 

صفوت: انا ما بقتش فاهم حاجه انا حاسس اني بحلم ولا ده كابوس... بصي انا عايزك تشرحيلي انا ممكن اعمل ايه بالظبط في الوضع ده وايه الصح اللي المفروض نعمله علشان نلحقه

فرح: حاضر انا هوضح لحضرتك كل حاجه واللي المفروض نعمله دلوقتي ايه.

( في الوقت ده عند جاسر في المكتب كانت اشكي لسه بتتكلم مع جاسر وفادي وهي بتبص لجاسر بوقاحه وهو كان حاسس بوجع في صدره لاحظ فادي انه تعبان فحب يقفل القعده دي بسرعه

فادي: يعني حضرتك عايزانا دلوقتي نمضي معاكي صفقه 500 برميل بترول ومكسبنا فيها يبقى الربع وانتم الثلاث اربع لا وكمان احنا اللي ندخلها ونوصلها لحد عندكم صح 

اشكي: بالظبط كده وطبعا هنعوضكم في صفقات جايه كثير بس انا كنت احب اسمع رايي مستر جاسر في الموضوع برغم اني جايه ليه مخصوص ولحد دلوقتي ما قالش اي حاجه ايه رايك يا مستر جاسر... ... 

جاسر: طيب ما هو مستر فادي برده يعرف زي ما انا اعرف ان اللي انت بتقوليه ده اسمه عبط مش شغل انتم بس عايزين تستغلوا اسمنا في السوق علشان تكبروا... وصلي بقى لوالدك انه لو عايز الصفقه دي تتم يبقى المكسب هيبقى بالنص ده اولا وكمان التوصيل هيبقى عليكم ده ثانيا وكفايه اننا هنضمنكم في السداد عند الموردين واحنا اسمنا لوحده علامه تجاريه لحد هنا انا كلامي خلص علشان انا تعبان

فادي: من فضلك يا انسه كفايه بقى وصلي قرارنا لوالدك ويا ريت لما يحب يتفق على حاجه بعد كده يجي بنفسه واعتقد انك شايفه ان المقابله انتهت اتفضلي معايا.

( خرجت اشكي غضبانه من مكتب جاسر وفادي دخل جري لاخوه وهو قلقان

فادي: مالك يا جاسر وشك اصفر كده ليه انت تعبان بجد ولا ايه.

جاسر: باين كده انا مش قادر اتنفس وحاسس بهبوط شديد رجعني البيت دلوقتي حالا

فادي: طيب ما اوديك المستشفى احسن شكلك تعبان قوي.

جاسر: لا مش عايز اروح مستشفيات وديني البيت هاخد مسكن وانام..