رواية بنت الكهوجي الفصل الثاني 2 بقلم احمد

من اجى بابا شوفتو نتيجتي وفرح فرحة مو طبيعية وجانت احلى لحظة بحياتي من باوعت لعيونو وشفت بيهن لمعة الفرح 

مر اليوم بفرح تارس البيت بسبب نجاحي بس جان الهدوء الي يسبق العاصفة لان اول ما گعدت ثاني يوم وطلعت من غرفتنا اني وباسم شفت بابا گدام غرفتهم 

جانت حالتو مبهذلة وكأنو سكران باوعلي بعيون حمر مثل الدم وقبل ما اسألو شبيه وشنو صاير وياه وگع بالگاع وفقد الوعي 

من الصدمة ولان هسا گاعدة جان الموقف كأنو حلم انداريت على غرفتو هو وماما جانت ماما نايمة عفت بابا الفاقد الوعي وتقدمت عليها 

جنت امشي بهدوء وكأني خايفة اوصلها جان گلبي حاس انو نومتها مو طبيعية وصلت يمها وصحتها وهزيتها من كتفها وما ردت علي 

صارت دموعي تجري واني اردد ماما يلا اگعدي بابا ماعرف شبيه وهي ما ترد علي اخير شي حطيت ايدي على گلبها وعلى رگبتها ماكو نبض 

صرت اشهگ واردد ماما لا تعوفيني فدوة اني گلتلج ارتاحي من شغل البيت ما گلتلج تعوفيني وحدي وتروحين بعدني محتاجتج وياي 

ماما باوعي بابا ماعرف شبيه فقد الوعي فدوة ماما لا تعوفيني حتى باسم يريدج شلون ينطيج گلبج تعوفينو لحالو وهو يحبج ماماااااااااا 

ماماااااااااا باسمممممممم باسسسسسسمممم الحگني راحت ماما باسممممممممم الحگنييييييي 

صارن ايديني يرجفن بقوة وجنت اصرخ بكل صوتي باسم خطية فز من النوم ومن سمع صوتي سكر اذانو وصار يصيح من الخوف 

من صدگ موقف ما اتمناه لعدوي من گد ما صعب ماعرف ابقى اصرخ على ماما المتوفية لو اروح لبابا الي فاقد الوعي 

على صوتي تجمعو الناس وواحد من ولد الجيران گمز من الحايط وفتح باب البيت ودخلو الجيران نسوان وزلم وشباب 

النسوان دخلن يمي والشباب تعاونو واخذو بابا وياهم واجت وحدة من جيراننا مرة جبيرة بالعمر واخذتني بحضنها وسحبتني من الغرفة 

جانت بكل خطوة تسحبني بيها احس تسحب روحي وياها اريد ارجع لامي ما اريد افقد حنانها ما اريد افقد دفو حضنها ما اريد افقدها 

جنت اترجاها تعوفني اروحلها وهي تحاول تواسيني وتصبرني واني احس نار مشتعلة بصدري من الم فقدان الام 

جنت اريد اي شي يصبرني اريد شوية يهدأ البركان الي بصدري اخير شي صرت اضرب نفسي وگوة مسكن ايديني النسوان 

فجأة اجى باسم ودخل بحضني وهو مرعوب رعب مو صاير ويرجف من الخوف ويردد يوت يوت (ياقوت) وحضنتو واني ابجي 

جان الموقف صعب كلش منا امي الميتة ومنا ابوي الي مادري وين اخذوه ومنا اخوي الي مرعوب وهو مو فاهم كلشي بالدنيا 

نسوان جيراننا جانن يعرفن حالة باسم لذلك ما اعتبرن وجودو فد مشكلة مثل الزلمة الجبير والواعي فبقن طبيعيات 

بلشن النسوان بغسل ماما علمود الدفنة وبهالاثناء دخل بابا من باب الحوش وهو مكسور ودموعو مثل الشلال على خدودو 

عفت باسم وركضت عليه وفتحلي حضنو ومن وصلتو دفنت نفسي بحضنو ومن حضني اخذ نفس بقوة من بين شهگاتو 

ادم : يا بوية كسرتني امج كسرة عمري 

ياقوت : بب باا بابا ييي يريدون ييا يي ياااخذوها 

- باوعيلي بنيتي انتي ابقي ويا النسوان ووصيت خالتج ام فائق (جارتنا) عليج علمود تبقين وياها لازم نبلش بالعزا مال امج 

- بابا ليش عافتني اني وباسم مو احنا نحتاجها 

سكت وسحب راسي لحضنو ومو عارف شيجاوبني لان هو يريد احد يواسيه بهالمصيبة ومبين عليه الانكسار بفقدان ماما 

ام فائق : خوية ابو باسم النسوان غسلنها وكفننها اذا تريدون تودعوها قبل الدفنة 

ياقوت : من سمعتها حجت هيج عفت بابا ورجعت ركض للغرفة اول ما دخلت جانو يشدون الخيط مال الكفن الي من يم الرجلين 

گعدت عند راسها واخذت راسها بحضني وصرت ابوسها وابجي وحاضنة راسها واحس الشهگة تجرح حلگي من تطلع مني 

ماعرف بابا وباسم شنو جانو يحجون جنت اعرف شي واحد وهو انو حاضنة راس ماما المتوفية وبعد شوية راح يحرموني منها 

وصلت الى اصعب لحظة بحياتي من مسك ايديني بابا علمود يفتحهن عن راس ماما وياخذوها مني هنا من صدگ تخبلت رسمي 

ياقوت : لا لا ا باباااااا لااااا بابا لا تاخذوها فدوة فدوة بابا لا تاخذون ماما لا تاخذون امي فدوة عوفوها لا تاخذوها مني 

بابا بابا دا ياخذوها بابا احجي وياهم بابا اخذوها بابا فدوة فدوة لا ياخذون امي فدوة بابا لا ياخذوها باباااااا باباااا 

لااااا لاااااا لا تاخذون امي مامااا مامااااا عوفو امي لا تاخذوها عوفوها يا ظالمين اريد ماما لا تاخذوها فدوة بابا رجعوها الي فدوة بابا 

بعدها فقدت الوعي وماعرف شگد بقيت فاقدة الوعي ومن گعدت جنت مثل السكرانة دايخة وماعرف وين اني وشنو صاير 

جانت ام فائق گاعدة يمي من شفتها تذكرت الي صار ودمعت عيوني وماگدرت اتحمل حطيت ايديني على وجهي وانفجرت بالبجي 

ام فائق : شوفي ماما اعرف فقدان الام كلش صعب وبالاخص لبنت صغيرة مثلج بس انتي لازم تكونين قوية علمود ابوج واخوج باسم 

اني راح ابقى وياج لحد ما يخلص العزا بس بعد العزا لازم تكونين انتي ست البيت وانتي تشيلين ابوج واخوج لان ما الهم غيرج 

كوني قوية علمودهم انتي ذكية وشاطرة ومتأكدة بس تتحملين فقدان امج الله يرحمها راح تصيرين احسن واحلى ست بيت 

وهسا گومي اگعدي ويا النسوان لان اجن يعزنج واجبج هسا تگعدين وياهن يلا بنيتي شدي حيلج وتوكلي بالله امج راحت عند رب غفور رحيم 

جان كلامها شوية بيه فائدة گمت لبست ثوب اسود وشال اسود وطلعت وياها خارج الغرفة جانت الصالة مليانة نسوان 

بدن يعزني ويواسني وفعليا جنت تايهة بينهن ماعرف شنو اتصرف لان اول مرة اتواجد بعزا ويكون العزا ببيتنا يعني الناس جايين علي اني 

بس جان وجود ام فائق مخفف علي شوية وبقيت وياها بقيت صافنة وذكريات امي تنعاد گدامي ودموعي ما توگف بس ابجي بهدوء 

واكثر شي اتذكرو من گلتلها من باجر ما اريدج تشتغلين وهي تگلي بضحكتها الحلوة صار استاذة ياقوت كأنو جان الموت منتظر هالكلمة 

مر اليوم ماعرف شلون بس لا اكلت ولا شربت شي نهائيا ما الي نفس بكلشي وبقيت گاعدة ويا ام فائق لليل لحد ما راحو الناس كلهم 

فجأة دخل باسم يركض وبابا وراه واجى باسم ركض گعد گدامي وهو يأشر للباب ويصيح امه امه (يعني ماما ما اجت) 

باوعت لبابا وكأنو باسم ذكرني بموت ماما ورجعت انفجرت بالبجي وهو اجى گعد يمي واخذ راسي بحضنو وتشكر من ام فائق وهي راحت 

ادم : بنيتي ياقوتتي 

ياقوت : ببجية .. ها 

- انتبهيلي بنيتي اريد احجي وياج 

- شنو 

- شوفي بنيتي اني وانتي وباسم ما بقى النا غير بعضنا لازم نساعد بعض ونكون لبعض لان ما نگدر نتحمل فراگ امج اذا ما اهتمينا ببعض 

وبالاخص اخوج باسم هو اكثر واحد يحتاج مساعدة فاريدج تكونين وياه بكل شي يحتاجو منج لان ما الو غيرج 

- بس بابا شلون راح اداوم واعوفو وانت تطلع للشغل 

- منا لوقتها الله كريم هسا اخذي اخوج ونامو ورانا گعدة من الصبح 

- تمام يلا باسم 

باسم : امه امه 

ادم : روح ابني نام امك بعدين تجي 

باسم : رفع كتوفو يعني مو راضي : امه 

ياقوت : باسم حبيبي تعال نام ومن تگعد تجي ماما 

جان قافل كلش اخير شي راح لفراش ماما تمدد بيه وبقى يبجي لحد ما نام واني بسبب تصرفو بجيت لحد ما ورمن عيوني 

اخير شي رحت لفراشي وبقيت ابجي واني اتذكرها لحد ما نمت والليل كلو افز وانام وابد ما ارتاحيت بنومتي وحلمت هواي احلام بس نسيتهن كلهن 

ثاني يوم گعدت من الصبح راسي مسطور وكارهة الدنيا كلها بس انجبرت اگوم من فراشي لان راح يجونا ناس يعزونا فلازم اگعد 

طلعت من الغرفة جان بابا گاعد على كرسي بالحوش وساكت وباسم بعدو نايم بفراش ماما تركت كلشي ورحت صليت الفجر 

بعدها سويت ريوگ لبابا وباسم وحطيتو الهم وعزلت الغراض الزايدة علمود ما يكون البيت مخبوص من يجن علينا النسوان 

بابا اكل لگمتين وعاف الاكل وحاول وياي الا تعب علمود اكل بس ما اشتهي احس نفسيتي منتهية لگمة وحدة ما اريد احط بحلگي 

من خلصو ريوگ اخذ باسم وياه وطلعو واني اخذت المواعين للمطبخ غسلت الي غسلتو وشلت الي بيه اكل وبين ما خلصت اجت ام فائق وبناتها 

اخذتني وياها والبنات راحن للمطبخ علمود يسون جاي للخطار وگعدتني وياها بالصالة وصارت تنصحني وتحاول تقويني علمود بابا وباسم 

جان كلامها كلش حلو بس تعرفون فقدان الام ما يهون بهالسرعة وكل ما يتذكرها الانسان حتى اذا ما يبجي عليها تدمع عيونو 

بلشن النسوان يجن بس وضعي شوية احسن من البارحة والي يسأل اگولو گعدت لگيتها متوفية وهي نايمة لان جانت مريضة 

وكلش يستغربون من اگللهم ماعرف شنو مرضها لان جانت تاخذ علاجات بس صراحة ما جنت اعرف شنو مرضها كل الي جان يهمني انها تتحسن 

مر ذاك اليوم طبيعي مجرد عزا وناس رايحة وناس راجعة بس وقت الضهر جبرتني ام فائق عالاكل واكلت شوية علمود ما اخجلها 

بالليل هم راح باسم نام بفراش ماما واني كالعادة شبعت بجي قبل النوم ومن ثالث يوم بعد محد يجي لان معارف بابا وماما كلش قليلين 

ام فائق ابد ما قصرت وحلفتني اي شي احتاجو انطيها خبر وتشكرنا منها اني وبابا لان وگفتها ويانا من صدگ ما يسويها ياهو الجان 

موت ماما كسرنا كلنا بابا طول الوقت صافن ومرات تنزل دموعو خلال صفنتو واني نفس الحالة وباسم كل ما تذكرها يصيح امه ويبجي عليها 

ما جان يعرف شنو يعني موت ولا جان يعرف ماما وين راحت ونخاف لا نحجيلو ونجرحو بعد اكثر لذلك نگلو بعدين تجي 

باليوم السابع لوفاة ماما رجع بابا لشغلو لان يعتبر تأخر هواي عنو وجان يشتغل عمالة لذلك لازم يروح يوميا علمود يگدر يجمع مصرفنا 

اني اهتميت باللبيت وجنت احاول گد ما اگدر اكون على قدر المسؤولية وما اقصر ويا بابا وباسم لان اني الوحيدة الي يگدرون يعتمدون عليها حاليا 

بعد ما راح بابا للشغل گعدت باسم وحطيت الريوگ بس بوقتها جنت ناسية لا اسوي بيض فمن حطيتلو الريوك ما اكل كلشي 

حطيت كوعي على ركبتي وحطيت راسي على ايديني وابتسمتلتو رغم الحزن الي تارس گلبي .. شتريد يا روح خيتك انت 

- ابه (بيض) 

ـ لعد گول احبج 

- ابج 

ـ يمة اروح فدووووووووووووة انيييييييي نعل ابو الي ما يحبك 

ضحكلي ضحكة جانت تسوى عندي الدنيا كلها وگمت علمود اسويلو بيض لان مستحيل يطلب شي وما يتنفذ 

ورحت سويتلو بيض وحاولت بذاك اليوم اللطف جو وياه خطية هو ما يعرف شي ما اريدو يبقى حزين مثلي 

من رجع بابا من الشغل وشاف باسم دا يضحك وياي كلش فرح لان اي واحد بمكانو يشوف اولادو هيج راح يكون فرحان 

واكثر شي فرحو انو صرنا نهتم ببعض ودا نحاول نتجاوز وفاة ماما مع بعض وهذا الشي جان امنية بالنسبة الو ودا يشوفها تتحقق 

في مكان اخر 

- اگلك ايمتى نسويها 

- اني راقبت ابوها وعرفت ايام شغلو بعد باجر عندو اجازة مال جمعة ويوم السبت لان اول يوم بالاسبوع فاكيد ما يرجع للمغرب 

- ليش ما نروح باجر 

- مو باجر خميس احتمال يصير وياهم شي بالشغل ويلگوها حجة بعد تعب الاسبوع ويرجعون 

- اني مو مرتاح لروحتنا بوجود اخوها 

- شبيكم انتو جبناء احنا ثلاثة وهم ثنين واصلا اخوها تالي واحد منغولي راح ناخذ ويانا منوم نخدرو بيه واحنا نشوف شغلنا وياها 

- واذا صرخت واحد سمع صوتها 

- احنا من ندخل للبيت نراقبها ونختارلنا لحظة نفاجأها ونسكر حلگها ونخوفها انو نكتل اخوها اذا حجت شي وبعدها نسد حلگها بوصلة وهاي هي 

- بس ليش هيج مصمم عليها انت 

- لك شفتها مو بنية ولك كارثة تدري بقيت صافن عليها وما ادري بنفسي اول مرة اشوف بنت بجمالها واذا ما حصلتها اتخبل 

- لا تخاف راح نحصلها كلنا يوم السبت 

- وهو هيج هالمرة راح نكون كلنا ويا بعض بنفس الوقت 

- هههههههههه تريد تكتل البنية انت 

- لا نداريها معليك 

- ههههههههههههههاي خوش مدارات 

ياقوت : گعدت يوم الخميس ورحت فورا لغرفة بابا وماما جان باسم نايم بمكان ماما لان ما يقبل يعوف مكانها وبابا نايم بمكانو 

گعدت بابا علمود الشغل ورحت سويتلو ريوگ بس ماعرف ليش حسيت بضوجة ونفسيتي مو مرتاحة حطيت الريوگ لبابا وگعدت قريبة منو وصفنت 

ادم : ياقووووت 

ياقوت : ها ها بابا وياك 

- صار ساعة احجي وياج 

- اسفة بابا جنت صافنة محتاج شي 

- شبيج صافنة وملامحج متغيرة 

- ماكو شي بس شوية ضايجة 

- وشنو الي مضوج بنية ابوها 

- ماكو سبب محدد هيج مجرد ضايجة 

- اكيد ماكو شي 

- اي والله بس شرايك تبقى اليوم ويانا اني وباسم 

- والشغل 

- تروح يوم السبت 

- صفن شوية .. هاي هي تدلل بنيتي 

- يمممممممةة اروح فدوة لباباتي .. وگمزت عليه وحضنتو 

صرنا نضحك ويا بعض على ردة فعلي وبقينا يوم الخميس والجمعة ويا بعض بس وقت صلاة الجمعة عافنا بابا وباقي الوقت ويانا 

جنا نتشاقة ويا باسم ونشبع ضحك عليه وهو هم يشاقينا ومن صدگ اول مرة نتونس اني وباسم هيج ويا بابا لان قبل ملتهي بالشغل 

جنت اضحك وماعرف شنو منتظرني باجر وعلى گولة اهلنا يا غافل الك الله جان همي انو استمتع باللحظة لان ابد ما توقعت هيج يصير وياي 

خلص يوم الجمعة بهدوء وراحة مو طبيعي ولاول مرة انام بدون ما ابجي وابلل المخدة بدموعي على ماما وذكرياتها وياي 

اجى يوم السبت وياريتو ما اجى لان اجت وياه فاجعة من صدگ حطمتني وكسرت شكو ذرة سعادة باقية بگلبي گعدت علمود اگعد بابا للشغل وغيري گعد علمود ينفذ مخططو 

شكرا لزيارتكم عالم روايات سكيرهوم