رواية الابواب الخمس الجزء الثاني الفصل الثانى والثلاثون بقلم ريام الهادي
أكابر عالجرح ومن احجي اكول بخير
وامشي عالجمر واضحك من اتعثر..
ابجي بداخلي واضحك بوجه الناس
واجامل بالفرح وبداخلي اتحسر
وللغير اضمد جروح واني جروحي جتالات
وأعلم عالصبر وما كادر اني اصبر
ألم دمع عيني اشلون خاف يطيح
لكيت جروح كلبي دم وألم تمطر
انحطت بحضني علاكه رفعت راسي هااي شنوو
ناي : هااي فلوس عمه دزتهن رحت استلمتهم اليوم وهذا نيشاني من زمان جابوه اليه مكدرت اكول اله حوراء اخر مره من جتي جابته اليه
اخذهم وصلح محلك وانطي الرجال فلوسه والله يعوضنا خير بيك
يونس : من كل عقلج اخذهن وانتي منو كلج تكولين لعمه خوله مكافي فتحتلي المحل اجي اخذ فلوس منها
ناي : مضطرين هذا المحل رزقك ورزقنا وبلياه راح نتأذه عدا هذا صاحب المحل الي بصفك راح يسوي مشاكل واحنا مناقصين وهسه العالم بس ادور زله حتى تتعارك وتسوي فصول وطلايب فض سالفته وعمرالمحل وراها يصير خير
يونس : مااخذهم ناي ورجعي نيشانج نسيتي ذني فلوس مهدي
ناي : لا مو فلوسه ذني حقي نيشاني واني ممسويه شى غلط من حقي اذبهن انطيهن ماله حق اي احد يحاسبني فدوة يونس بليه اعناد الوضع مومال اعناد ومگابر فض شغلتك وراها اذا الله رزقكك عود اشتريلي المهم ميوكف المحل ولا ينسد
وتعال انت نسيت صار جم سنه عايشه عليك اكلي وشربي ولبسي وكليتي ومصرفي كله منك شوو ماستحيت منك ومن احتاج شى اجي اركض عليك
يونس : ليش بينا هاي السوالف شبيج
ناي : كول لروحك مو اليه وهااك روح كمل شغلاتك كافي يوميه هبده على الراس مو حتى گلبنا خلص من الطلايب بروح امي اخذهن وفرحني مو حتى اني وشرهب نوم مكعد انام من وره هاي السالفه وشوف حالك سوده عليه معودنا ترجع للشغل بيومين وجهك انبلع وحيل مابيك
يونس : شون تردين حالي واني اشوف رزقي وحالي محروك كدامي
ناي : حقك والله بس هااي كدامك الحل اخذهن وتوكل على الله احنا مابينا عيب ومستحه وفلوس هاي وذيج جيبنا واحد يله مو شلعت گلبي
يونس : لوما حيل محتاجهن ولا اخذهن
ناي : اخذهن وكول ياالله وتوكل على رزقك كاام حضني وباسني من راسي
يونس : ادعيلي الله يرزقني وارجع ذهبج
ناي : فدوة لتراب رجلك رجعن وان مارجعن كافي انت سالم وبينا تسوه ملك الدنيا
طلع يركض اعرف بيه حيل مضايق وضعه مخربط كلش وانسدت عليه من كل جهه
يونس : بعت الذهب بس بالاول وزنته حتى اخاف بيوم يصير عندي اكدر ارجع ذهبها بله فلوس عمه خوله هاي اني وياها بس ناي لان الذهب مشتري مهدي تحسست من الوضع
رحت للي تكفل بلشغله رجال خير من المنطقه وكتله دبرت فلوس صاحب المحل الي بصفي بس خلي ينزل اليه هوايه ٧ ملايين هو محترك نص المحل وغراضه مابيهن ٣ ملايين
ليش بعد ٧ وثاني شى لهسه مااعرف السبب من محلي لو من محله
ادخلو الناس الخيره وفضت ب٥ ملاييين وهواي ناس كالت على الاكثر محله السبب بس لان ذاك صاحب عزوه وعشيره وراه ناس هوايه واني بطرك روحي كلها خافت تدخل ميردون مشاكل فضيتها ب٥ ملايين وراها رجعت اني ومصطفى انرتب ونصبغ كمت حتى ابات بلمحل واوصي البنات يقفلن الباب عليهن ردت بس اكمل مكدرت اجيب عمال لان ياخذون هوايه اشتغلت اني ومصطفى بكل حيلنا وبدينا نرجع المحل مثل قبل واحسن وخلال اقل الاسبوع كلشي كمل واتسوكت ورجعت وبفضل الله فتحت
يله يمعوده تأخرنا
شرهب : ممصدكه رايحه اشتري ترجيه ذهب لج حتى زرف اذني انسد
ناي : يونس كال هاي هديتها جنت حالف بس تنجح اشتريلها حتى سوار بس تعرفين وضعه خطيه فلوسه متكفي كال بس ترجيه ويمكن مو حيل ثكيله خفيفه
شرهب : ياااا راضيه نعمه فدوة لگلبه كافي ذكرني عساها بحضك وبختك ياعدي الچلب اخذ سوار بيبي الي انطته اليه بعرسي المصخم وباعه كون فلوسه تخلصها حبوب قبض ومتلحك على الحمام
ناي : ههههههههه خرب شون دعوه
شرهب : من حركت گلبي
ناي : تلكين فلوسه انطاهم للفصل
شرهب : هااي اذا مباع حتى هدومي كون اشوفه وبوجهه اكول اله حيييل بلعافيه اكلتها مدبس
ناي : خلي يولي وامشي نشتري قبل ميصير الليل
رحنا واشتريت الها ترجيه جانت كسر يعني ذهب مستعمل حتى تفرق الصياغه واكدر اخذها شويه بيها ثكل مو حيل خفيفه جانت شبهه جديده حلووة وهي طايره بيها وكل شويه بلبيت تهز راسها مثل الجهال
ناي : كاعده اهفي من الحر الكهرباء تروح وتجي موتتنا وسيف روحه تلوب من الحر جنه ابوه نفس السوالف وسولته بلمي ينكع روحه ويجي يضحك حتى لا اضربه
شرهب : اكلج شو مهدي ماكو
ناي : ماادري يجوز تزوج وحاير بمرته
شرهب : لابالله مقتنعه بكلامج
ناي : شتردين هسه ماكو شسوي اخابر واكله ليش متسأل
شرهب : اكص ايدي اذا ماميته تردين تعرفين وين راح وليش غايب صار فتره
ناي : القاهرني هو بغداد مو بديالى حتى اعذره
شرهب : شفتي اي احجي احجي طلعيهن المكبوتات
ناي : جوزي مني لا اركع راسج بلحايط
شرهب : هو ابويه مايكدر بس على امي تردين تذبين حركتج بيه
ناي : شوشه
شرهب : هاااا
ناي : ليش مهدي ماكو
شرهب : كولي مشتاقتله وفضينا المن تلزكين بلحجايه تلزك
ناي : خلي اكوم اسبح الجو حار
شرهب : صار دبك ومن تسبحين غني وين انت عن عيني ابعدت وين بلكي يسمعج ويجي
ناي : سخيفه دومج
شرهب : عياره تريده ومن يجي ادفره عمي النسوان كارثه بلكعبه
ناي : تره كعد اسمعج
شرهب : هو هذا الشاطره بيه اسمعج تعال حبيبي هااي امك راح تجلطني
ناي : بقيت بحيره وارجع اكول ليش سكت اني اخاف من سكوته
دك تلفوني يونس
هاا حبيبي
يونس : البسي واطلعي عبد اجه ياخذ سيف
ناي : ليش ابوه وين
يونس : الظاهر ميريد يجي ودز عبد
ناي : يرجعه غير هو قريب مو مثل قبل بديالى
يونس : اسألي عبد
ناي : مااشي
اخذت سيف وسبحته وبدلت اله لحد ماسمعت صوت هورن ودكت باب
شرهب : منو اجه وليش سيوفي مبدل
ناي : اجه عبد ياخذه
شرهب : هذا صاير مرسال بس من نوع ثاني الناس تودي وتجيب رسايل فلوس هو يودي ويجيب جهال
خلي انزل
نزلت على عبد نزل من السياره شال سيف وباسه
شونك عبد
عبدالرحمن: بخير ام سيف انتي شونج
ناي : يم الله صدك ابوه وين ليش مااجه اخذه
عبدالرحمن: ميريد يشوفج
ناي : هااااا
عبدالرحمن: اجذب عليج ميريد يشوفج كال بس اشوفها اتعارك وياها
ناي : ضجت من كلامه وسكتت
عبدالرحمن: باجر ارجعه
ناي : خلي بالكم عليه
عبدالرحمن: ان شاء الله
ناي : صعدت مخنوكه وحايره مو اني مبتعده عنه ليش هسه ضايجه
بقيت اليوم كله افكر واريد اوصل لقرار مكعد اكدر
ثاني يوم انتظرت سيف خابرتني صديقتي من الكليه تسلم
اشرت لشرهب تجيب سيف لان زحمه البنيه تحجي واسده منها
شرهب : اهووو شينزلني
نزلت انفخ من الضوجه شلت شعري واكمز من انزل فتحت الباب صار بوجهي عبد تفاجأ لان اني فتحت الباب
عبدالرحمن: السلام عليكم
شرهب : وعليكم السلام وين سيف
عبدالرحمن: نايم بلسياره مردت انزله اله تنزل امه لان حاره
شرهب : انطينياه
عبدالرحمن: سمعت بيج نجحتي
شرهب : هاااا ومنين سمعت وشمدريك ادرس اصلاً
عبدالرحمن: مبروك على نجاحج زين طلعتي شاطره وعبرتي الثالث
شرهب : احد كلك اني غبيه وماادبرها
عبدالرحمن: انتي ليش هيج
شرهب : شبيهه وگلبت عيني معجبني احجي
عبدالرحمن: صوتج عالي واليحجي وياج تردين تاگلي
شرهب : اني هيج انت شعليك عم بنيه خال وليد انطيني سيف مو انصمطت بلحر
فتح السياره وشاله وكفت هاي شون اخذه منه معناها راح اصير قريبه حييل عليه واحتمال يطخني والله زحمه واني ثوله بهيج سوالف
سيوفي ماما اكعد
عبدالرحمن: ليش تكعدي خطيه
شرهب : خباثه اني احب اكعده اختنك اذا نايم ولك سيف اكعد رحمه لجدك
عبدالرحمن: اذا مابيج حيل اتصعدي اني اصعده
شرهب : اي احسن شى صعده انت
طبيت ردت اصعد تذكرت شون اصعد الدرج كدامه ماترهم فوت
عبدالرحمن: بعد تأمرين بشى
شرهب : لا ودير بالك على ايده لاتتأذه بلحايط باوع رفع تك حاجب معجبه كلامي وصعد واني وراه وكف بلباب دكيت الباب ناااي طبي جوه عبد صعد
دفعت الباب وهو طب خله سيف على القنفه
مشكور تعبناك
عبدالرحمن:شعجب شكرتيني
شرهب : الله اكبر شحجي معاجبك متكولي شتريد باوع ناي ماكو جان يتقرب
عبدالرحمن: شكد عاشرت نسوان مثل لسانج وكاحتج مشايف
شرهب : لعد معاشرت هوايه لان هواي اكو مثلي واوكح
عبدالرحمن: الجواب على طرف لسانج لازكته
ناي : هلوو عبد شونك
عبدالرحمن: هله ام سيف هذا ابنج رجعته مناقص لا ايد ولا رجل
ناي : يمه اسم الله عليه شكراً تعبناك
شرهب : يباوع عليه من فوك ليجوه وطلع هذا شبيهه مركز ويايه والله ياالله
ناي : شبيج ويه عبد
شرهب : شمدريني يمعوده هو يشوفني لازم يذب حجايه يخليني اتعصب
ناي : ابتعدي عنه هذا ابو نسوان اكشر مامبقي وحده مامصادقها جانت حوراء تكولي كل اسبوع مبدل وحده يبدل البنات اكثر مايبدل قمصانه
شرهب : شايف نفسه لان حلوو شكد اكره الرجال المغرور بشكله عود شوفوني اني حلوو اييييع اصلاً محلوو ويلعب النفس
ناي : هسه مفهمت حلوو لو لا
شرهب : هوو حلوو بس غثيث
ناي : شرهب ايااج
شرهب : يبووو على شرهب هسه اني وهذا المطيرجي نار وبانزين منتلاكه اله واحد يريد يضرب الثاني وبلا سبب وربج فشجابني عليه وانتي تبسمرين
ناي : غير اخاف عليج ياعيني
شرهب : لتخافين اخر واحد بلدنيا اباوع عليه هو عبد وثاني شى الولد هم مو بحالي لتسوين قصص وافلام براسج وتمثليها
ناي : سكتت يمعوده خلي انوم سيف جوه
بعد كم يوم جانت شرهب يم خاله ام حسن وصعدت تلعب بشعرها وتفكر من اشوفها هيج يعني وراها مصيبه
شرهب : اكلج نوايه
ناي : ياستار
شرهب : اني شحجيت وكلتي ياستار
ناي : من تكولين نوايه وهاي النظره وايدج تلفلف بشعرج معناها مسويه مكسوره بكد كفشتج
شرهب : تربعت وكعدت كبالها وداعتج مو مكسوره سمعيني وركزي ويايه ومااعيد تره
ناي : خييير
شرهب : من جنت يم خاله ام حسن شفتها مشتريه جم حاجه سألتها كالت من وحده تبيع اقساط
ناي : محتاجه شى تشتري
شرهب : غير تخليني اكمل
ناي : كملي
شرهب : فهمتني شون تشتغل سالفه الاقساط وبيها ربح وهم بلبيت متطلع النسوان يرحن الها عود مره كل فتره تروح للسوك تتسوك من اهل الجمله مثل الشورجه وترجع ليش منشتغل بالاقساط وهم نساعد هلمكرود الي يطلع من الصبح ميرجع لليل احسن ما مخلصاتها اكل ونوم
ناي : ماادري هي خوش فكرة بس يونس يقبل
شرهب : وليش ميقبل وعود من نريد نتسوك هو يجي ويانه والي يشترون نسوان قابل زلم ونخلي ام حسن تسويلنا دعايه حبايبها هوايه ونطلع جم فلس يساعدونا علتنا مو يونس علتنا منين انجيب فلوس نشتري بيها الغراض
ناي :محلوله اني عندي من المصرف الي ينطي اليه مهدي صار ٣ اشهر مااصرف هوايه شو بلبيت كاعدين وسيف كطع الحليب وياكل بس حفاظات وجمعتهن كلت اخاف يصير شى اسم الله يفيدنا قبل يومين حسبتهم بيهم ٩٠٠ الف اسحبهم ونشتري بيهم وبمرور الايام ارجعهم
شرهب : واني ابيع ترجيتي ماعندي غيرها
ناي : ابد مخبله واخليج تبيعيها شايفه شكلج شون فرحانه بيها وهاي هديه نجاحج
شرهب : الله عليج اريد احس روحي مشاركه وعندي فلوس اشتغل بيهم بداعتي ناي ومن يصير عندي اشتري احلى منها لتخربين واهسي
ناي : هذا هو بكيفج
شرهب : بقى يونس شون نقنعه
ناي : اجه يونس وحجينا وياه ورفض نهائياً
يونس : حتى ناس طابه وناس طالعه من كل عقلجن
شرهب : شكوو بيها ياعيني قابل رياجيل هنه بنات ونسوان مثلنا وهم نستفاد
يونس : مقصر عليكم بشى
ناي : ابد والله حشاك من التقصير بس احنا هم نريد نشتغل بقينا نحجي وياه وهو قفل الموضوع رغم شرهب مرغلت روحها وماقبل تالي نزلت لخاله ام حسن وحجت وياها وام حسن اقترحت البضاعه تبقى عدها لان عدها غرفه فارغه والنسوان يدخلون لبيتها لان كل المنطقه تعرفها وتحبها وبهيج محد راح يصعد يمنا وتكفلت تقنع يونس وبلشافعات يله رضه واحنا حتى منتعب خاله ام حسن اقترحنا عليها تصير ويانه والربح حتى لو بسيط يتوزع علينا وقبلت بشرط اطب بفلوسها مو بس المكان
وبدينا نتسوك شغلات بسيطه جراحف على ملابس بيت على بطانيات ملابس اطفال جدوره مواعين وام حسن يابيت تروح اله تبلغهم صارت شرهب شبهه مقيمه جوه من تكمل من النسوان تصعد واتفقنا مانسحب من الربح منا لل٣ اشهر حتى نكدر نشتري غراض اكثر ونشتغل براحتنا
الرزق بسيط بس احساس يجنن من تشتغلين وتجيج العشره والعشرين الف من تعبج
ايام مرت واجه رمضان ورحنا مرتين لبيت بيبي لان تخابرنا تعالو افطرو ويايه تحب لمتنا واحنا نعوف كلشي ونروح الها وعمه بديعه مكيفه لان نشتغل واني وشرهب اول مره نشتري الها ولبيبي ولبان ولبلال شغلات بفلوسنا صّـْْ(☑)ـْْحّ شى بسيط بس فرحنا لان من جيبنا
اما يونس صار واهسه وحيله كله بلمحل وهذا الشى اريح اله حتى ليفكر ويتعب
اجه مرتضى يفطر مره يمنا وسألناه على شغله عبيد الي طولت الي عرفناه اشواق متنازله وطلع من السجن بس بعد ماانسحل ذهاباً واياباً وصاح التوبه وصالحه متشمته بيه
مرتضى : عمكم مايكعد راحه اتوقع راح يقشمر اشواق ويرجعها
شرهب : من ثول الثولها اذا رجعت حصلت بيت براسه من كل عقلك ترجع
مرتضى : خاله تكله رجعها وحاول تقشمرها وتخليها تتنازل عن البيت
ناي : جان غيرها اشطر هي مو كتلت روحها حتى يطلكها وصار الي رادته شنو بعد رجعها هاي خالتك كبرت واخرفت
مرتضى : مو عمجن لاعب على الحبلين ذيج الفتره كلها سكت صالحه بحجه بس ارجع البيت اطلكها ومره زهكان وكال الها رجعت البيت حتى يخلص من النك مالتها مو دخل السجن وطلك اشواق عبالها مسيطره البيت بأسم عبيد صدمها من كال جذبت عليج مكدرت اخذ البيت منها خله خالتي ادك وتلطم وهي بنفسها تكله رجعها حتى بلكي يصير شاطر ويرجع البيت
شرهب : والله ولا يرجع اشواق النسخه المحسنه من صالحه من كل عقلكم تتقشمر وترجع هيج بيت لعبيد
مرتضى : هي لايصه وناس تحرك بناس
ناي : وانت الواكع بيها
مرتضى : يمعوده زهكت كمت حتى مااروح قليل لعبت روحي منهم حتى البيت اطبله تالي الليل انخمد بيه والصبح اطلع
شرهب : عائله تسوي شلل رباعي يله مثواك الجنه
مرتضى : عاب هلوجهه موتيني
شرهب : على اساس عايش بشقه باريس وتفتح الشباك على برج ايفل فتخاف تموت وتعوفها لوما تصبح بساهره انت مجاهد وداعت ابوك الغالي مجاهد
يونس : كومي سوينا جااي وجوزي من مرتضى
مرتضى : اي عفيه من اجي هنا مااشيل هم غير لهاي ام لسان شيسكتها
يونس : متعرف شى عن اهل مهدي لان قريبين عليكم
مرتضى : سمعت من امي باقين هاي المده ومبين شغلتهم اطول والي بالك بعدها ممسافره تنتظر معامله لم شمل ولا اطب ولا تطلع محبوسه بلبيت
يونس : ماكو شى بالي
مرتضى : لك عليييه
يونس : الجاااي وين صااار
مرتضى :وياج بطل ثلج طفي نار اخوج
اجه العيد ومثل كل مره يجي عبد ياخذ سيف يوم وثاني يوم يرجعه
مهدي لا وصل ولا شفته ولا حتى سمعت صوته طول هاي الفتره ومصاريف سيف يدزهن بيد عبد واني هم ساكته منتظره اشوف شيصير
رجعت للدوام بدت السنه الثانيه اليه راجعه بهمه ونشاط اريد انجح من الدور الاول نتعاون اني وشرهب على البيت وعلى الشغل
بدا الجو يتغير وهبت نسمات الهوا البارده خلصنا العاشر ودخلنا شهر ال١١ ودعنا الصيف والحر كل واحد بينا يحاول يسوي الي عليه حتى تمشي حياتنا
لحد مابيوم
اجه يونس من المحل وكت عصريه كلت احتمال متسوك او عنده غراض يريد ياخذهم
يونس : نايه
ناي : هاا عيني محتاج شى
يونس : مهدي هم اجاج
ناي : لا ليش
يونس : عبد خابرني قبل لا اوصل البيت وسألني عنه كال تلفونه مغلق من الصبح ومحد يعرف شى عنه
ناي : مغصتني بطني من الخووف شون محد يعرف عنه شى
يونس : لا هو ولا صلاح وعبد وخالهم دايخين وميعرفون المن يسألون لان من طلعو مابلغو وين رايحين واثنينهم تلفوناتهم مغلقه
ناي : تعرف بيه صار اشهر ماوصل وعبد ياخذ سيف
يونس : اعرف وكلت لعبد وكال من هوستهم مبقو احد مسألو عنه عسى ولعل يعرفون شى
ناي : خابر وافتهم
بقى يونس يخابر ويحجي ويه عبد وصار الليل وماكو اي خبر لحد مادك تلفون يونس جاوب حسيته انخطف لونه ويباوع عليه اشرت اله شكووو مجاوبني
سده وكفت يمه والقلق اكل روحي
هااا بشر ماكو خبر
يونس : سمعو اكو انفجار بديالى ومبين الولد هناك لان هاي الفتره يرحون ويجون علمود شغلهم
شرهب : يعني الانفجار يم محلهم
يونس : لا بغير سوك شوداهم هناك محد يعرف
شرهب : منو كال همه هناك يجوز مو بديالى اصلاً
يونس : عبد يكول ابوه مخابر جماعه هناك ومن ناس لناس على اساس واحد شايف الولد بلهوسه بس منو منهم ميعرف اسمه كال شفت واحد منهم مصوب وكعد يدور على اخوه مفقود وميعرف شى عنه وضاعت ياهو يقصد الرجال مهدي لو صلاح ناي تسمعيني
ناي : يونس يحجي ويايه ومااوجد الكلام اذني تصوفر وعيوني مغوشه ايدي اليسره خدرت اريد استوعب هذا شديكول شنو تصوب شنو ميعرفون شى عنه
عطت مهدددي وين
شرهب : على كيفج راح يوكف گلبج
ناي : متسمعي شيكول
شرهب : يجوز هذا الرجال متوهم هسه راحو ونشوف شيصير
ناي : هذا مهدي المفقود كعدت بلكاع ابجي
شرهب : ان شاء الله لا مهدي ولا صلاح اثنينهم ميستاهلون كومي ياعيني مو ابنج اخترع من عيطتج
يونس : اني كل شويه اخابر واطمنج ادعيله ان شاء الله ماكو شى كومي ليصير بيج شى شوفي حالج شوو تعالي
دنك وشالني من الكاع حتى رجلي بادت اريد اوكف مااكدر
جيبيلها مي
شرهب : اي
ناي : كعدني على القنفه وابجي خايفه ليصير بيه شى بغض النظر كلشي صار بينا بس اني احبه لمهدي وابو ابني ومااتحمل يصير بيه شى
بقيت شاده راسي من الالم وشويه ابجي وارد اسكت اقنع بروحي مابيه شى هسه يوصل خبر كلشي مابيه
هااا فدوة يونس ماكو خبر
يونس : بعدهم يدورون من مستشفى لمستشفى وصيت عبد بس يسمع شى يخابر هم خلف الله عليه بكل هاي الخبصه كعد يجاوبني
شرهب : هم عايزه ميجاوب
يونس : الواحد بيا حال ويجاوب لتنسين اعز اثنين عنده ميعرف شى عنهم صوته يتراجف والخوف مبين عليه وغيره واحد يغلق التلفون ويخلص من الدوخه كتله ولو ازعجتك بس لتغلقه انطيني خبر اي شى تسمعه والرجال كال لخاطركم مغالقه واله اني اريد افلشه للجهاز مبين اعصابه منهاره
شرهب : الله يعينه ويعين خالو ياترى وداد شنو حالها
يونس : شجابها بالج
شرهب : روحها بمهدي ليش نسيت كون تجلط وتموت ومهدي مابيه شى توب هيج والحظ يسويها
يونس : حرام هذا الحجي ليصير گلبج اسود ان شاء الله مابيها شى وكلشي ميصير
شرهب : تقربت من ناي وشاورتها اكص ايدي واذبهن للعتوي الشالع گلبي مال المنطقه اذا مو يونس يفكر بحوراء وحالها وخايف عليها ادري كلمن بيكم يفكر بحبيبة واني اهش ذبان
ناي : وخري منا رحمه لامي
شرهب : وخرت يمعوده هسه تشوفين كلشي مابيه ويرجع وتتمالخين وياه ولا جن العزه الي مسويته هسه علموده عود اتذكري
ناي : شرهب اذا ماوخرتي اطيح حظج
شرهب : هذا اليحجي الحق مينراد راح اخذ ابنج اوكله وانومه خرعتي للطفل
ناي : الليل كله منعرف شنسوي اي خبر ماكو ويونس خابر مصطفى وبلغه ميرجع للمحل
وعلى هذا الوضع للصبح ويدك يونس ومحد يجاوب خلصت طاقتي والف فكرة موزينه اجت براسي كل شويه اتخيل التلفون يدك واسمع مصيبه
لحد مطلعت الشمس يونس نام بلهول مادخل غرفته وشرهب بلغرفه هيه وسيف اله اني افتر مثل المصرع مااهود من القلق
باوعت على عيني حمره دم يمكن ضغطي صعد عدا الدوخه الي مشگله ويايه لازمه السبحه وادعي حتى مكدرت اشرب مي عسى الضغط ينزل لحد ساعه ٧ ونص الصبح دك تلفون يونس طفرت وهو هم فز من النوم
يونس : اي عبد بشر
عبدالرحمن: لكيناهم
يونس : بيهم شى
عبدالرحمن: مهدي مصوب وصلاح هم
يونس : متأذين حييل
عبدالرحمن: صلاح حيل متأذي بس مهدي لا زين
يونس : ياالله الْحٍمَدٍ للـّہ على سلامتهم وين انتم هسه
عبدالرحمن: بديالى ونحاول ننقل صلاح لمستشفى بغداد لان هنا بعگوبه قبطتت جرحى والوضع خربان
يونس : محتاج شى
عبدالرحمن: سلامتك ردت اطمنك واطمن ام سيف اكيد بالها يم مهدي
يونس : مقصرت رحمه الله والديك
ناي : حطيت ايدي على وجهي اشهك من البجي اجه حضني
يونس : شبيج مو سمعتي كدامج مابيه شى
ناي : خفت حييل عليه كلت بس لا يتيتم ابني
يونس : اذا انتي هيج تخافين عليه ليش قفلتي مترجعين اله متوقعت بعده گلبج هيج متعلق
ناي : من ضيم الشفته ويه امه كل ماافكر ارجع اذكر سواياتها بيه واتذكر تصرفاته هو هم وارجع اقفل ليش الشفته قليل
يونس : الْحٍمَدٍ للـّہ على سلامته مابيه شى كومي غسلي وحاولي تنامين من البارحه وضعج مخربط لتتمرضين
ناي : مااشي وانت راح تروح للشغل ليش متكعد اليوم المن رايح
يونس : لازم اروح نمت جم ساعه مابيه شى واذا تعبت عود ارجع
ناي : اسويلك ريوك
يونس : اتريك بلمحل مااشتهي هسه
ناي : كمت غسلت وتمددت عيوني تحركني من البجي اكلت هبطه عليه تسوه عمري غمضت من التعب فتحت عيني على بوسات سيف يكعد بيه
حضنته وشلته افييييش ياريحتك باوعت ساعه ٢ الظهر حييل لهسه نايمه صحت على شرهب
شرهب : صح النوم يعروسه
ناي : ليش مكعدتيني
شرهب : شكعدج وشخيرج واصل لديالى
ناي : مااشخر لتكذبين
شرهب : حتى صافورات طلعتي خليني ساكته
ناي : والله جذابه لتلعبين عليه
شرهب : كملت الغدا كومي ناكل سوه والحمدلله على سلامه ابو سيف خابرت يونس اول مكعدت من النوم شفتج غاطه بلنوم كلت خطيه مااكعدها
ناي : الله يسلمج
شرهب : خابري تحمديلي بلسلامه
ناي : هاااا ماادري
شرهب : اهوووو رجعنا لسوالف المزعطه والمناحه الكلبتيها البارحه يمعوده الغريب هم يشيل ويتصل ويطمن خابري على اساس ابن خالج مو رجلج عيب والله
ناي : جريت التلفون ودكيت مغلق
مغلق
شرهب : خابري عبد وسألي
ناي : دكيت على عبد شويه وجاوبني سلمت عليه وراها كال
عبدالرحمن: تفضلي ام سيف محتاجه شى
ناي : يمك مهدي اريد اتحمدله بلسلامه سكت شويه مبين اكو احد يمه وجاوب
عبدالرحمن: هااا مشغولين شويه من يصير مجال اخلي يخابرج
ناي : شكراً سديته منه ومااجاني اي اتصال واستحيت اخابر بعد
ثاني يوم كاعده اريك سيف وضايجه حيل اندكت الباب
اوكف ماما خلي اشوف منو لبست شال على راسي ونزلت فتحت الباب شفت مهدي گبالي احساس غريب بعد اشهر مشايفته وبنفس الوقت شغله الضربه مالته حييل اثرت بيه
دمعت عيني حتى محجيت شى اباوع جهه اليمنى من راسه مشدوده والحنج بيه بلاستر واصابيعه مشدده الايد هم اليمنى
مهدي : شلونج
ناي : الْحٍمَدٍ للـّہ على سلامتك
مهدي : الله يسلمج اكدر ادخل اشوف سيف
ناي : اي اكيد صعدت وصعد ورايه فتحت الباب سيف بس شاف ابوه كاام ركض وحضنه ويبوس ويشم بيه وذاك يم ايده على البلاستر يريد يجره اكعد ماما
مهدي : عوفي براحته
ناي : طبيت جبت مي وكلاص عصير وطلعت جان يلعب ويااه كعدت گباله
نزل سيف بلكاع يلعب وباوع عليه
مهدي : لو ميت جان خلصتي مني
ناي : اسم الله الرحمن حس بنبره كلامي خوف عليه
مهدي : بربج خفتي عليه
ناي : وليش مااخاف غير ابن خالي وابو ابني
مهدي : وبعد
ناي : شلون صرت غيرت الموضوع مرتبكه حيل منه
مهدي : زين الحمدلله
ناي : وصلاح
مهدي : تعبان
ناي : شنو الصار وشوداك لديالى
مهدي : عندي بضاعه مال المحل وصلاح يطلب ولد فلوس طلعنا الصبح وكلنا مانتأخر وصلنا للولد كلت اتسوك ماطول السوك مفتح بين ميجي صلاح ومحسيت غير العصف شامرني واباوع السوك انهجم وناس مجطله ومحلات واكعه الي خوفني الكه صلاح ميت بقيت مثل المخبل ادور عليه لحد مالكيته كاطع النفس وجروحه قويه الله كتبله عمر ونقلناه لبغداد بالاسعاف وبس اطمنت عليه اجيت اشوف سيف لحظه حسيت مراح اشوفه
ناي : عمرك طويل خوفتنا حييل عليك
تقرب وكعد بصفي رفعت راسي اباوع عليه حجه بهدوء
مهدي : ناي الله كتبلي عمر اعيشه لو شايفه الناس شون متكطعه تكولين شون طلعت عايش مااريد اعيش الجاي وحدي تعبت ونفذ صبري اجيت بكل الطرق وياج يابنت الناس اني شاريج واريدج بحضني انتي وابني والشفته اول البارحه يخليني اعيد كل حساباتي ارجعي وكافي مشتاقيتيلي
ناي : دنكت افرك بيدي ومجاوبت جر نفس وكال
مهدي : اذا مشتاقيتي اني اشتاقيت لحظة الوكعت انت وسيف بعيني اكذب عليج اذا كتلج مافكرت بيج لا فكرت وخاصه هاي الفتره كلها مشايفج وحيل مشتاقلج تصوري البارحه من سمعت صوتج تحجين ويه عبد مكدرت اجاوبج لان ردت وجهه بوجهه واذا اجيت اشوف سيف فنيتي بالاول شوفتج انتي كلت حتى لو نتعارك المهم املي عيني منج
ومتوقعت اشوف بعيونج الخوف عليه وجهج وتعابيره فاضحتج ناي اگلبي صفحه وارجعي لبيتج ولحياتي وخلي الصار درس اليه والج سبحان الميغلط هواي شغلات صارت غلط خلي نشمرها وره ظهرنا وارجعي مااوعدج بشى عيشي ويايه وانت راح تشوفين التغيير الصار اريد ابني يگبر كبال عيني عاجبج هذا الوضع اني بجهه وانتي وابني بجهه صبرت شكد ومااعترضت بس نفذ صبري حسيت بلي صار اول البارحه العمر شكد قليل واحنا نضيعه بزعل وتمسكي بيج كل هاي السنين اكبر دليل على محبتج ومعزتج بگلبي كدرتي تزرعين محبه بداخلي متوقعت بيوم راح احس هيج اتجاهج اجيت الطريق گله واني افكر من اشوفج احضنج من كثر ماتلوعت عليج واكولج رجعيلي خلي گلبج جبير وانطينا فرصه ثانيه
ناي : گلبي يدك دكات مخربطه هدوئه وكلامه ثارت حنين بداخلي بس اعرف هلمره الغلطه ادمرني تماماً وتخرب كلشي سويته حتى اوكف على رجلي باوعت عين بعين ويااه وحجيت بثقه وهدوء مثل هدوئه شوف مهدي اذا اكلك مخفت عليك اطلع جذابه خفت عليك وبجيت وراد گلبي يوكف لان العشره متهون اله على ابن الحرام والاهم من هذا الك لهذا اليوم محبه بگلبي ومكدرت اطلعك منه شكد حاولت مكدرت بس مو على حساب گلبي اضيع عمري
مهدي : شون يعني مفهمت
ناي : ارجع الك بس عندي شرطين بدونهم ماارجع
مهدي : شنو شروطج
ناي : الاول اكمل دراستي كليتي مااعوفها اريد شهادتي بأيدي مو بعد كل هذا التعب اعوفها على النص
مهدي : سهله كملي هنه سنتين بقن وتخلصين وتاخذين شهادتج بلعكس اني احب زوجتي عدها شهاده لا عبالج ضجت يوم ماقدمتي وامتحنتي ودخلتي كليه بليه حتى متاخذين رأي رغم الطريقه محبيتها بس مضجت بلعكس افتخرت بيج يجوز مابينت هذا الشى كدامج بس بداخلي جنت فخور حيل بيج كدرتي تحاربين ضرفج وتقرين وتنجحين وهذا الشى خلاني احس بقيمتج اكثر هذا شرط كلش سهل واعتبري انتهى
ناي : الشرط الثاني ماارجع ويه امك مااعيش الي عشته تريد مااكول الك اشتري بيت اخاف امكانيتك متسمح اجر النا حتى لو شقه او مكان صغير المهم اني وانت وابني
مهدي : وامي اعوفها وحدها مترهم واكفه كلش اني لو عندي اخ ثاني اطلع من ثاني يوم بس اني هلواحد وامي وحدها حتى حوراء كلها كم شهر تسافر وتروح لزوجها المن اعوفها لو امج تعوفيها
ناي : اني خلصت اربع سنوات وياها شفت المر اجت ايام عليه العن الساعه الجمعتني بيك بسبب امك هواي شغلات متعرفها وجنت مااكولها الك مرات مراعاة لضرفك اكول يجي تعبان وشغل اكعد اشكيله ومرات تجنب للمشاكل واكول اخاف يطبك وياها ضدي وروح اسأل حوراء اذا اني اكذب خلي تحجيلك شون تحاربني بكلشي حتى اللكمه حتى السبح حتى النوم من انت ماكو البيت جحيم ينگلب عليه اصير خدامه حتى الخدامه يعاملوها ويراعون الله بيها اكثر مني
ومن ترجع انت للبيت تصير انعم من الدخن حتى كدامك تبين هيه ممسويه شى امك تكرهني كره العمى لتغير الحقيقه واعرف بيك تعرف بهذا الشى ومغلس عدا جنت اسمع صبح ظهر ليل بترس اذني امي تنسب وينبش كبرها وابقى اطحن وابجي ومااكدر اردها لان راح تگلبها عليه واطلعها بيه غير وكت تكول عدها ثار ويايه غير سوالف التعيير وبت اهل العتيك وماشافت احد من كرابتكم واجوي خطار عدنا اذا مافشلتني وسوتني هلكدوتني وانت اذا تقبل مرتك تنهان ويتقلل من قيمتها هذا الشى راجعلك اني مااقبل بعد ولا مجبوره اتحمل حتى لو احبك وانت تكول الصار خلي درس النا واني العشته ويه امك درس كلش جبير اليه ومااعيد الغلطه مرتين
مهدي : يعني انتي حطيتيني بين نارين
ناي : بلعكس اني كعد اجنبك النار اني وامك ماننجمع بعد ورجعتي هلمره راح تأذيني وتأذيك وحدتنا ماتتحمل الثانيه وبالاخير راح تخسرني لان اذا قبل تحملت امك بسبب ظروفي هسه مااتحمل وراح ارد الكلمة بعشره و يوميه عيطه بيتك ومستحيل تعيش الحياه الي تريدها ويايه انت تكول شاريج اثبتلي هذا الشى ورجعني معززه مكرمه لبيت وحدي وترد اعتباري كدام الكل انت بيوم طلعتني مهانه ومطروده من بيتك من حقي ارجع بكرامه ورفعت راس اذا كدرت ازرع محبه بگلبك مثل متكول انطي حق لهاي المحبه وعيشني عيشه استاهلها لان الشفته كلش هوايه وكاافي مصخت وارجع الف مره اكررها عليك مامجبوره اتحمل امك واهانتها وكرها اليه تريدني ارجع من باجر مستعده وكتلك قبل مده غير بيت وحدي مااتحرك خطوه وعدا هذا الشى اعتذر والقرار الك
ضل صافن بوجهي واني سكتت ماعندي شى احجي كاام دنك باس سيف وطلع حتى بدون ميكول كلمة سديت باب الهول وراه وهو نزل وحده حتى ماانزلت للشارع
انداريت شرهب ورايه فزيت كاعده من النوم هيه وكفشتها خرب ببليسج فزيت
شرهب : لج شنو انتي مدااعرفج خوله نمبر توو عمشه بشبابها شرهب بعركاتها شنو هذا الحجي بثقه وقوه لا لا احد لاعب بالاعدادات ولكم وين ناااي
ناي : اسكتي اريد اتخربط من كثر ما گلبي يدك
شرهب : اتخربطي اوكعي شسوين سوي حجيج ويه مهدي ينطوج جائزه الاوسكار عليه
ناي : ليش لعد منطاني جواب
شرهب : توقع بعد وكعته راح تتنازلين وتشتاقين وخاصه هو طلع من موت يعني راح تركضين لحضنه ركض
ناي : الصراحه ردت اركض واحضنه وابجي على صدره من كثر مامشتاقتله وهبطت عليه بس هاي اللحظه لو مسويتها جان كلفتني عمري الجاي كله
شرهب : اجيب مبخره ابخرج حتى لا احسدج
ناي : بطلي سخافه مو احجي موضوع مصيري
شرهب : واني هم اخاف عليج من عيني يمااااي تعااي ياعمه شوفي ترباة ايدج واخيراً اختي انحرفت وكدرت تواجهه
ناي : انحرفت هزيت ايدي امشي مشطي جنج وحده منتوله
كعدت وحطيت ايدي على خدي واقنع نفسي اني ماسويت غير الصح واذا قرر يتركني هذا الشى راجعله هو متنازل لخاطري وفضل امه ونفسه على راحتي يعني هلمره اذا تركني وطلكني وروح امي دمعه ماانزل عليه الميشتريني بروحه ميستاهل حتى ازعل عليه
مر اكثر من اسبوع وماكو اي خبر خابرت سدره عيب لازم اتحمدبلسلامه لصلاح
يارقم اخابر اتصلت على ثاني رقم جاوبتني
سدره : هله بلمهزومه وينج عاش من سمع صوتج
ناي : انتي العايشه گلبي الْحٍمَدٍ للـّہ على سلامه صلاح
سدره : الله يسلمج جان اجيتي شفتي هو مو مثل اخوج
ناي : اي والله اخ عزيز وكفاته حلووه بس تعرفين الوضع
سدره : انتي جنة هذا البيت ياوضع بعد قابل احنا بغداد لوما بيت جدج خطوتين انتي يمنا تعالي الله عليج خلي اشوفج واشوف ابنج
ناي : صعب ادخل ذاك البيت ليش متعرفين
سدره : عمتج ماكو بلمستشفى
ناي : شبيهه
سدره : من وره سالفه الانفجار صعد سكرها وضغطها وتخربطت وضلت على هذا الحال طلع عدها جلطه بلقلب واليوم يسون الها قسطره تشخيصيه وراها يحددون احتمال عمليه لگلبها مهدي راد يموتها
ناي : سلامتها
سدره : متأكده
ناي : قابل ادعي عليها شعليه بيها
سدره : متردين تشوفين ابني وبنتي
ناي : تعااي انتي خلي اشوفج وانتي يمهم
سدره : اي والله شسوي اداري صلاح عفت بيتي صار اسبوع كم يوم وارجع بربج نايه تعاي حتى امي وخاله ام عبد مشتاقيلج وميكدرون يجون وخاصه حوراء حتى تبجي عليج وتخاف تخابر اطرديها تعالي لا مهدي ولا امه ساعه وارجعي تره احنا هم النا حق بيج وهاااا جيبي شرهب وياج خلي نشوفها
ناي : مااعتقد يونس يقبل
سدره : غير تأدين واجب اكلها لا مهدي ولا امه هااج خالو عمران يحجي ويااج
ناي : بس كاال الوو دمعت عيني والله مشتاقتلهم وخاصه خالو
عمران : متردين تشوفينا
ناي : انت خالو كطعت الوصل ويانه لو نسيت
عمران : لتشبجين سالفه بسالفه تعرفين شكد غاليه عندي تعالي خلي اشوفج
ناي : اسأل يونس اذا قبل اجي ساعه وارجع واذا مقبل تعذرني
عمران : براحتج بنتي الله وياج
ناي : سديته وخابرت على يونس ومعارض كال براحتج التحبي سوي حسيت يونس يريد يقربني منهم لان بعد ماحجيت اله على شرطي وكلامي ويه مهدي توقع ارجع اله بأقرب فرصه
يونس : روحي ولتتأخرين
ناي : توقعت تعارض
يونس : شوفي الوضع وتصرفاتهم وياج حتى تحكمين هذوله الناس تكدرين تعيشين وياهم وتصيرين جنتهم من جديد لو الگلوب تغيرت ورجعتج متنفع بعد
ناي : اذا رجعت وحدي شعليه بيهم
يونس : يبقون اهله وعزوته وميعوفوه حتى لو بيت وحد وخاصه الخال عمران حيل اله تاثير على مهدي مخسرانه شى ساعه لا هوايه
هم تأدين واجب وهم تفهمين شديصير حتى لتكولين ياريت مارجعت
ناي : اخذ شرهب ويايه
يونس : اخذيها وخابري ابو الخط مالتج ياخذكم ويرجعكم واني انطي كروه لطلعون تكسي ساعه نايه مو هواي
ناي : مااشي بلغت شرهب كيفت
بدلنا وانتظرنا ابو الخط اجانه وبلطريق اخذنا سله مرتبه مال حلويات عيب ندخل ايدنا فارغه وصلنا لشارعنا
شرهب : شكد صار مجايين لهذا الشارع صلوحه هسه بلبيت لو جايبين نعال مسلفن ويانه ونروح نزورها نكفخها بيه ونطلع
ناي :يمعوده خلي تولي وصلنا لبيتهم واتفقت ويه ابو الخط ساعه ويجي دكيت الباب طلعت سدره وجهالها يركضون كدامها ماشاء الله يخبلون
سدره : هله بلبذاته
حضنتها وسلمت عليها هي اخذت سيف تبوس بيه واني ابوس بجهالها وسلمت على سدره وطبينا عيوني تباوع على اركان البيت ليش اشتميت ريحه امي بيه بينما امي صار ٢٠ سنه من اخر مره دخلت لهذا البيت اتخيل هنا كعدت هنا ضحكت هنا بجت اني مداخله اله او يمكن دخلت واني صغيره وياها مااذكر
مشاعرها كلها تكول مكان امج هنا
دخلت للصاله اجت ام عبد وام صلاح جان استقبالهم اليه كلش حلوو وبحراره وشوق جبير ابد ماتغيرو بلعكس حنيتهم اكثر هلمره
انطتهم شرهب السله
سدره : تعااي صلاح هنا
ناي : دخلت لغرفه جوه مفروشه وبيها صلاح تحمدت اله بلسلامه صار اسبوع وهيج شكله لعد بأول يوم شون الله يعينه الْحٍمَدٍ للـّہ عااش
شرهب : سلامتك
صلاح : الله يسلمج
ناي : نعوفك ترتاح
شرهب : طلعت من الغرفه صار بوجهي عبدالرحمن صار هواي مشايفته لابن تراك شتائي اسود وحاط كلاو مال التراكسود على راسه ومربي لحيه وحاط عود مال اسنان بحلكه هذا ابن مااريد اسب ابوه احبه للرجال هذا شياكل لخاطر الله ليش هيج يوميه يحلووو صاير كيك
عبدالرحمن: هااي منو يمنا
ناي : هله عبد شونك
عبدالرحمن: زيين مهدي يدري انتي هنا
ناي : لا
عبدالرحمن: خلي اخابره
ناي : لا عفيه شويه ونروح
عبدالرحمن: شونج اووو نسيت اسمج
شرهب : سعديه
عبدالرحمن: شرهب اي تذكرت
شرهب : يمكن لاحك ضربه مثل الولد لهذا نسيت
ناي : حوراء وين سدره وينج
شرهب : هاي اختي الحبابه كامت ادور على حوراء وعافتني واكفه ويه هذا
عبدالرحمن: اريد اشتري غراض
شرهب : واني شعليه
عبدالرحمن: مو تشتغلين بالاقساط انطيج لتخافين مااكلهن عليج
شرهب : اوزعهن بلاش وانت ماابيع الك
عبدالرحمن: يابويه هيج كارهتني
شرهب : وانت منو حتى اكرهك من رخصتك
عبدالرحمن: اوكفي لحظه شبيج انهزمتي
شوكت تقدمين للسادس
شرهب : ليش تريد ادرسني
عبدالرحمن: احد كلج اني مدرس
شرهب : ااييي صحيح نسيت انت اختصاص طيور
عبدالرحمن: هذا ابو الطيور المعاجبج مخلص كليه تحلمين ادخلين الها وبتقدير جيد
شرهب : ليش قابل مخلص طب
عبدالرحمن: بيج زود قدمي وادرسي ونجحي وبذاك الوكت اوكفي هاي الوكفه انتي كافي عليج شهاده الثالث اصلاً مدبرين السادس واذا نجحتي وهذا الشى مستتحيل معدلج ٥٠ على الحافه
شرهب : شكد طلعت معدل بلسادس انت
عبدالرحمن: ٨٢ ونص وعلمي
شرهب :اله اطلع اعلى منك وعود انفخ ريشك مثل طيورك عفته ومشيت شكد مستفز كون اكمشه من شعره واركع راسه بلحايط ومااعوفه اله انومه بصف ابن عمه
ناي : وين حوراء
سدره : فوك تستحي تنزل
ناي : بيا غرفه
سدره : على ايدج اليمنى جانت غرفه امج الله يرحمها
ناي : صعدت الدرج وصلت لباب الغرفه دكيتها سمعت صوتها
حوراء : تفضل
ناي : ادخل هي شافتني اجت تركض وحضنتني وتبجي
حوراء : اشتاقيتلج هوايه
ناي : لتبجين بقت حاضنتني هوايه وتشهك بله خلي اشوف وجهج رفعت رايها ليش منزلتي
حوراء : بيا وجهه انزل عليكم
ناي : بهذا الوجهه الي صاير يلعب النفس ولج وين خدودج صايره عوده
حوراء : هاي هيه راحن ويه الي راحو تعاي اكعدي سيوفي وياج
ناي : اي جوه
حوراء : شخباركم
ناي : الْحٍمَدٍ للـّہ بخير انتي شونج شوكت تتزوجين دنكت والوجهه مغيم وتعبان حييل
حوراء : مبقى شى لو شهر الثاني لو الثالث
ناي : الله يسعدج
طبت شرهب ورانه وسلمت على حوراء
شرهب : ايااج تسألين عن يونس خلينا حبايب
حوراء : دنكت ابجي واتكطع من القهر
ناي : مالج دخل بهاي اسألي
شرهب : ليش تسأل وتگلب عليها المواجع شوفي من الاخير الولد الله هداه ورجع لشغله وعايش وانتي هم عايشه ما متي يعني قسمه ومصارت
حوراء : الله يحفظة ويرزقه اهم شى عرفت هو بخير
شرهب : لتعوين فدوة اروحلج اجينا نشوفكم ونروح انتي زينه وضعج حياتج ويه امج وخطيبج شونه وياج
حوراء : كلتيها عايشه يعني متفرق اذا زينين او لا
ناي : الله يجعل ايامج سعاده ويطلع عبدالله خوش رجال
حوراء : شايفين هاي الغرفه هاي مال امكم
بيبي دوم تكول انتي شبهه ذكرى طلع كلام بيبي الله يرحمها صحيح حتى بلحظ حبيت واتزوجت غير الاحبه لهذا ميفرق اي شى كلها ايام ونعيشها
ناي : امشي انزلي جوه ويانه مبقى شى ويجي ابو الخط متردين تشوفين سيف
حوراء : نايه عرفت بسالفه شرطج على مهدي حجالي رغم من يوم سالفه يونس هو ميحجي ويايه ولا يباوع بوجهي بس اجه منج مخنوك يكولي احجيلي امي شمسويه بناي وحجيت هواي شغلات وبقى صافن وراها رزلني ليش مجنا نكول اله
ناي : ارجع والله بس بيت وحدي
حوراء : المشكله امي تمرضت وضعها موزين وهذا الشى صعب طلعت مهدي اذا هو قرر ينفذ شرطج وره وكعت امي الاخيره اكيد غير قراره
ناي : اني اعذره وحقه امه تبقى وهو وحيدها بس اني ويه وداد ماارجع لو السما تنطبك على الكاع
حوراء : خايفه لا تخسرين مهدي
ناي : هواي خسرت مبقت على هاي كومي خلي ننزل
نزلنا واني فكري كله بكلام حوراء شافني خالو اشرلي تقربت منه باس راسي
عمران : هيج متشيلين تلفون على خالج
ناي : خالو الصار مو قليل وكلامك اخر مره كطع گلشي واذا اجيت اليوم من معزتكم عندي لهذا لاتعتب فدوة
عمران : تبقين عزيزه عندي وميحتاج اكول الج شتحتاجين اني موجود وحتى انتي بويه شرهب
شرهب : مشكور خالو متقصر يونس الله يحفظه موجود وممخلينا نعتاز احد بعد الله
ابتسم الخاال وكاال
عمران : اعرف محروك گلبج على اخوج وهذا الي يعجبني بيج ادافعين عنه حتى لو جان على غلط ابقي بويه هيج حنينه عليه واياج تفضلين بشر على اخوج كله يتعوض الزوج والابن اله الاخ ميتعوض
اني جااين خطار عليه من رخصتكم
ناي : يله ماما سيف دك ابو الخط خلي نروح
سدره : ابقو على العشا
ناي : غير مره تأخرنا
عبدالرحمن: اوصلكم اني
شرهب : ميحتاج جاي السايق ياخذنا
عبدالرحمن: هاااا السايق
شرهب : ااااااايييييي عندك اعتراض
عبدالرحمن: لا العفو
شرهب : طلع عبد ومد راسه السايق مال ناي ولد شاب بس كلش مؤدب وخلوق حتى صوته مينسمع هذا بقى يروح ويجي وعاد على ناي خلي اني اوصلكم سلمت عليهم وصعدت وسديت الباب وعبد يباوع رافع تك حاجب معاجبه من خفت لهلحاجب احلى من حاجبي
ناي : سلمت على الكل حوراء حضنتني حسيت بيها جن حضنت يونس والله هاي البنيه ميته قهر من وراها حتى مكدرت تحجي شى وبعيونها الف سؤال عنه ورجعنا للبيت
سألنا يونس ونفس نظره حوري ايدور بوجهنا شى عنها يطمنه ومن ضمن الكلام كتله كلهم بخير وحوراء هم زينه ابتسم بقهر وكاام
شرهب : اله تحجين كدامه
ناي : اخويه واعرفه يلوب يريد يطمن عليها مكلت شى بس كلت زينه حتى يبرد گلبه
شرهب : ولا توقعت هيج يحبها
ناي : تعلق كلش بيها لهذا متأذي وحوراء طبعت بعقله وگلبه ومااكول غير الله ينسي حبها
رجعنا للبدايه ورجع مهدي يدز عبد ياخذ سيف وسألته كال راح ياخذ امه ويسافر للهند علمود عمليه بگلبها
وبقيت معلكه لا اني المطلكه وفاض كلشي ولا اني الراجعه
الشى الوحيد الي كمت افكر بيه دراستي
شغلنا بالاقساط اتوسع ونص نسوان المنطقه تشتري من عدنا كمنا نجمع ونحرص على الفلوس حتى نكدر نساعد نفسنا وهم نشيل الحمل من يونس الي طول هاي المده غير الشغل ماعنده
دخلنا ٢٠١٤ والحياة تركض بينا اباوع سيوفي كبران وبده يسأل عن ابوه ويصيح هوايه بابا يابابا واني ابقى ساكته لو الهي بلعب
معرفت رجع من السفر اله يوم مااجه عبد ياخذ سيف مثل الحالف ميشوفني هاي الشهر الثاني وهو مااجه طكت روحي اريد حل زهكت
خابرتني عمه بديعه كالت غنيه ماتت ام صالحه وساهره سألتها عن بيبي كالت بقت ساكته ومحجت اي شى
ماتت من المرض
بديعه : لا من الهبطه طلعت ساهره بايعه حصتها بلجديد مثل صالحه وضل البيت مساحه كلش صغيره ما متحمله جلطه وماتت
ناي : شسوي بيه باعته بله ذيج قشمرها عمو هااي شجاها
بديعه : جوحي ميعرف بايعه حصتها ومتعارك وياها وين الفلوس تكله ماعندي
ناي : انتي شمدريج
بديعه : من خوله تعرفين بيها ماترتاح تفتر كل الوكت وراهن وتسأل مرتضى كل فتره
ناي : كون يتمالخون عساهم
بديعه : ملايين طلعت الها ومحد يعرف وين ودتهن وهذا الي مخبل حتى مرتضى ومترضى تحجي تكول حصتي واني حره بيها انطيتها لملجأ
ناي : وصدكتي
بديعه : هااي شبيج من كل عقلج شوفي شسوت بيهن
ناي : وصالحه
بديعه : اني سمعت شغله وگلبي لعب
ناي : شكوو
بديعه : تتذكرين جيرانه ام غدير
ناي : اي اتذكرها خوش مره شبيهه
بديعه : تخابرني كل فتره تطمن على بيبيتج وعلينا من كعد نسولف تعرفين بيها تعزني كالت سما شايفيها ويه واحد بسياره يمكن صاحبها
ناي : صخام بعينها منو هذا
بديعه : ماادري يابنتي مو بحجه تدرس كامت اطب وتطلع ومبين طاشه سالفه موزينه عليها
ناي : متنجب وتكعد البيها ميخليها
بديعه : بس لا تصير علج بحلك الوادم
ناي : على اساس هيه شريفه روما غير سماوي شنوو نسينا
بديعه : تبقى بت عمجن وسمعتها من سمعتنا شون بليه
ناي : مالنا دخل بيها ومانتشرف لا بيها ولا بعمي هلكد ماامها ياهو التلزمها اطلعها مو شريفه افترت بيها وهااج بتها صارت بحلك شباب المنطقه ذوله شون اتسكتهم ذوله هم شرهب وناي تشمرهم بره البيت
بديعه : كون متسوي شى موزين وتثكل
ناي : ابد وعيونج وراح تشوفين شون راح تضيع سمعتها وماانقهر عليها الي من ايده الله يزيده
واكف براس الشارع اباوع من بعيد الزفه مالتها صوت المزايق التارسه الشارع والهورنات ادك بروحي والشباب التركص فرحانه دوم هذا الشارع شفت بيه ابشع ايام حياتي بس متوقعت اشوف بيه زفه حوراء جابج الدهر عليه من ديالى لهنا حتى تنزفين كبال عيني اكو اكثر من هيج ظلم واذيه
مرتضى خابرني وبلغني وعفت كلشي واجيت طاير حاط شماغ على راسي ومغطي نص وجهي مو خايف منهم حتى يشوفوني خايف دموعي تفضحني واني اشوف حب عمري تنزف لغيري ردت المح خيالها واشوفها بلبدله البيضه البستها لغيري خفت لا يدخلون السياره للكراج ومااشوفها من علت الهلاهل انفتحت الباب الوره مال السياره طلعت من البيت مغطايه ماشفت وجهه بس لمحت بدلتها تسحل بيها جن تسحل بگلبي امسح بدموعي واجر هوا الله واباوع عليه واكول اله صبرني صعدت وانسدت الباب وصعد عبدالله بصفها اتخيل نفسي لو بمكانه شون جان حالي وشون جان حالها
كعدت بلكاع بلتراب متحملت يجوز دمعه الرجال عزيزه بس بهذا اليوم واني اشوفها صارت دمعتي ارخص من التراب الكاعد عليه
الكل فرحان ويهلهل ويضرب طلقات اله اني كل طلقه احسها بصدري وبگلبي اخذها المايعرف حتى عمرها اخذها الي ماسهر ليله علمودها اخذها الي ماتعب يدلل ويداري ويداوي جروحها اخذها المايستاهل حتى يباوع على طولها اااااااخ يگلبي زين منك وتنبض
عرفت بيومها حوراء زواجها دخلنا انذار ليصير شى بيونس دخل لغرفته اخذ حبة فاليوم ونااام سهرنا اني وشرهب نخاف ليصير بيه شى مبقينا دعاء ولا صلاه مصلينه حتى يبرد نار گلبه للفجر نتناوب حتى نمنا يمه بلغرفه
كعد الصبح هادئ وماحجه شى وطلع من البيت للشغل واني وشرهب صافنين عليه
اخويه متعوب وهلمره التعب جبير بس سكوته اكبر
كمنا نحسب يوم يوم لحد ماعدت الايام وبدا يرجع يسولف ويضحك صحيح مو مثل الاول بس اهم شى ما أذه نفسه ولا سوه عركه او شى جان يباوع بعيونه يعرف خوفنه عليه ويمكن هذا الشى الي خلاه يبين هو طبيعي حتى ليتعبنا
صارت عطله نص السنه وعطلنا كم يوم وكاعدين نحسب بلفلوس ونجرد الغراض اخاف محتاجين مسواك اندكت الباب وشرهب نزلت فتحته وعيونها تتغامز
هاااا شبيج
شرهب : مهدي اجه
مهدي : السلام عليكم
ناي : وعليكم السلام وكفت واني كلت هاي هيه السالفه خربت جااي يطلك حسيت سكري وضغطي هبط وارجع اكوول صيري قويه لازم ننهي هاي السالفه طولت حييل
كعد وكال لشرهب جاي وحبه وجع راس راحت تسوي واني كاعده محتاره شراح يكول
انفتحت الباب وطب يونس تسالمو علاقتهم موزينه بس الظروف دوم تجمعهم
مهدي : اني خابرت اخوج حتى الحجي يصير كدامه
ناي : بلعت رييك اييي
مهدي : انتي ردتي بيت وحدج حتى ترجعين واني كتلج وضعي وانتي ماقبلتي
ناي : وبعدني مااقبل
مهدي : وصلت الج الاخبار امي سوت عمليه وشون وضعها
ناي : اي اعرف
مهدي : وهذا الشى صعب الشغله اكثر
وانت يايونس لو بمكاني لو شما تسوي امك بمرتك مستحيل تعوفها وهي ماعدها احد ومريضه حتى الله ميقبلها
يونس : صحيح باوعت على ناي الصفر وجهه
مهدي : واني لان متمسك بناي فكرت هوايه ومالكيت غير حل واحد ياريت تقبلي لان هذا اخر حل وخيط بينا يااما تقوي ياتكطعي
ناي : شنوو الحل
مهدي : هاي الفتره مااكدر ارجع لديالى لان الظروف تعبانه وخالي هم ميرجع يعني مضطرين نبقى بغداد وصعب اطلعهم من البيت لهذا مبدأياً في حال وافقتي راح أجر بيت طابقين ولازم الفوك مفصول عن الجوه شون هذا البيت الي انتم كاعدين بيه امي جوه وانتي فوك ومالج دخل بيها ولا هي الها دخل بيج واجيب مره تساعدها بشغل البيت وتبقى جوه عيني وبهيج راضيت امي وماعفتها وحدها وسويت الي تردي راح تكعدين وحدج ولا ادخلين عليها ولا تدخل عليج كأن الجواج مره غريبه
واذا رجعنا لديالى افصل الطابق الفوك عن الجوه نفس النظام وهناك ام عبد وام صلاح يساعدوها واكيد بذاك الوكت كامت على حيلها مراح تحتاج احد
وهم تبقين بطابق الفوك وحدج معزوله معززه مكرمه محد يوصل يمج شگلتي
