رواية أرض الخناجر الفصل التاسع والثلاثون بقلم ايلول
منيلها عيــونج خناجر گطعتني!
══━━━━✥◈✥━━━━══
ريـــمه :: صرخت متسودنه وهو يركض مايشوف دربه وانه وسلطان نركض وراه من حلاة روحه يركض للشارع عايف السيارات وسلطان يركض وراه بس يريد يكضه ويجره لسيارة طــروادة نركض ومحد فاهم شي.
صعدت بصف ســليم وهي بحضنه وطرواده فر السيارة بساع
صياحهم وهوستهم وانه عيني بعينها اللي گوه فاتحتها تغمض وترجع تفتح ســليم نزع قميصة وحطاه على راسها يرجف كضيت اديها ابجي يمه هاجر وفززني صياح ســليم على سلطان
ســليم:: ما ادررري ما ادري سمعت صوت طبه قوية ولگيتها يم الدرج والدم تارس الگاع.
الحد گبل المستشفى بعشر دقايق جانت فاتحه عيونها وراها غمضت مغمي عليها نزلنه نركض واخذوها من ادين ســليم للسديه مال الطوارئ واحنا نباوعلها بخوف وهم واحد يفحص نبضها وواحد يقيس الضغط وبنيه تفحّص بالجرح كعدت بالگاع ارجف روحـــي رايحه وگوه اجر النفس اشهك بصوت وسليم كعد المستواي يحاجيني واديه تتراجف
ســليم:: ريـــمه، مابيها شي مابيها شي هسه بس يخيطون راسها تكعد شو عاينــي علي ريـــمه.
يجرني من ايدي بس يريد اتنفس زين وانه الهوه كام مايوصل الريتي
طــروادة:: گوم ســليم طلعها بره هنا تخنك.
جراني ســليم من ايدي طلعني بره الطوارئ وركض يجيبلي ماي امسح دموعي ويردن ينزلن شني من شهر هذا مامر اسبوع اذا ما طاح واحد من عدنه وطب مستشفى.
جراني ســليم فاتح بطل الماي ويغسل وجهي وهوه بطرك الفانيله الداخلية.
مسحت وجهي ودموعي وهوه ضل واكف يمي بأيده بطل الماي ويعاينلي بخوف.
درت عيني للباب اشوفن طــروادة طلع يتلفت يدور علينه لمن لمحنه واجه بساع نزع قمصلته ومدها السليم يگله
-البس شهرتنه.
وسليم اخذها منه يلبس وطرواده يگله
طروادة:: خيطوا راسها وعلكولها مغذي وكعدت هسه راح يدخلونها للأشعة.
جراني ســليم من ايدي گومني يسأل
-ها صرتي زينه نروح يمها؟
هزيت راسي اي ودخلنه جوه الولد كلساع يخابرون على طــروادة لمحت صــيهد ووهب من خابروه وكالهم لا تجون ماكو داعي زينه وبس تكمل اشعة اذا ماكو شي خطر يطلعونها.
ضلينه متانين لمن طلعوها وضلت نايمه على السدية والمغذي يمشي بأيدها كعدت يمها دموعي تجري وجها اصفر وشفايفها بيض سوده بوجهي، امسح على أيدها فتحت عينها كوه تعاينلي بتعب.
-ها هجوره.
زفرت نفس بحسره تعاين السلطان اجوا يمها اثنينهم، وطرواده ضل واكف بالباب دك تلفونه بأيده رد اسمعه يهمس
طــروادة:: ها صــيهد، انتَ شدراك مو بالمعامل؟
حجه متنرفز وعاينوله الولد من عله صوته طلع من المستشفى، ضلينه يم هجوره لمن گالوا ماكو شي خطر تكدرون تطلعون وتراقبوها اذا تقيئت او اغمه عليها ترجعونها.
شالها ســليم وطلعنه من المستشفى وكفوا الولد يعاينون وهـــب بسيارته وصيهد بسيارته وواكفين يم طــروادة يحجون وياه، طــروادة بسّ شافنه طلعنه فتح السيارة وهمه رجعوا كلمن السيارته صعدنه بسيارة طــروادة وهوه اجانه اعاين للولد هم كلمن فر سيارته وراح، وهـــب طلع گدامنه، وصيهد راح بغير طريق.
مشينا مسافه وسلطان گال الطرواده
سلطان:: صــيهد رد من المعامل؟
طــروادة:: لا بس مخابر وهـــب ووهب گايله رايح للمستشفى علمود هاجر ومن سمع اجه.
سكتوا محد حجه بعد لمن وصلنه للبيت عفيه گلب عدها امي وگدرت تنام، ضال بس ابوي وسجاد متانين، اخذها ســليم فوگ الغرفتنه وصعدوا ويانه الولد حطاها بفراشها وسجاد يبوس براسها كعد سلطان كدامها يحاجيها
سلطان:: موجوعه هجوره؟
شالت ايدها تأشر على راسها منين يوجعها
ســليم:: هسه تشربين علاج وتنامين تگعدين زينه.
سجاد:: غير تديرين بالج من الدرج يا بعد روحـــي النوب شغلي الضوه يله تنزلين.
يحجون وياها هوه وسليم وهيه عينها مافارگت سلطان ميل راسه يعاينلها بشك لم اديها وسط ايده اعاينله بلع ريكه وسأل بتردد
سلطان:: شلون طحتي من الدرج هاجر؟
زفرت نفس بحسره وجرت أيده فتحتها تعاين الباطن ايده وتتلمسها بأطراف اصابعها متردده عاينتلي وردت عاينت لسلطان وخلت اصبعها على باطن ايده مثل القلم ركزت وياها وهي تكتب حرف حرف
"الاء"
فتحت عيني بصدمة اريد اجيبلها ورقه حتى تكتب وسلطان صيح يرجف
-عووفيهاا، هاجر الاء دفعتج من الدرج؟
هزت راسها اي، وهو كمز يركض، وسليم يسب ويغلط متحلف اذا سلطان ماطكها يرميها.
ثواني وگب صريخ الاء وصوت بچي غيث سلطان مايشوف گدامه كتلها حيل ويسحل بيها من شعرها للدرج يريد يشمرها كضوه سجاد وسليم، وابوي من جوه يصيح عليه
وكفت بباب الغرفة اعاينلها اول مره ما اوكف بوجهه سلطان وهو متسودن يطلع من بين الولد ويصيح بحرگة ناسي حتى وجع ايده
-ووولج تشمرين هاجر ووولج تردين تموتينهاااا؟
وهيه تسب وتغلط وتصيح
-كعدت غيبييث من نومه مادفعتها انه بس طكيتها وهيه طاااحت.
سلطان:: لنعللل ابوج لا ابو غيث امشييي لا اعدمج وولي لهلج.
ركضت لغرفتها تلم اهدومها وسليم يكله
ســليم:: من باجر تطلكها لا وحگ الحسين احطلي طلقة براسها واريدن شريف يطلع وراها.
وهوه راح يغسل وجهه تعبان طلعت الاء تبجي وشايله غيث جراه من ايدها ودفعها يصيح على سجاد
-وديها الاهلهااا.
الاء:: ابنننني ابني والله ما اروحن بدووونه.
تصرخ متسودنه وهوه يدفع بيها جلبت بأيده تبجي وتتوسل
الاء:: ابني.
انطاه الها وصوته مختنك گال السجاد
-ودّيها الاهلها
اخذها سجاد وراح وهوه ايده ضلت توجعه نزل وي ســليم جوه وانه رديت الهاجر اسألها
-ليش الاء دفعتج؟
رفعت اكتافها ما ادري وتمددت مغمضه عينها،الثاني يوم طب ســليم روحه بخشمه ويحجي وي سلطان بحرگة يگله
ســليم:: مودين عــفراء شلون ودينه مرتك، لنعل ابوهم لا ابو نسوانهم وحگ ذاك الحسين لو طلعوا حچاية تمس ام شمس لاحرك سلفهم بكبره.
وابوي شال النعال شمره على ســليم متسودن ويغلط
شاكر:: ياهي مالتك بيهم يطبهم مرض جعلها لا ردت وجعلهم لا ارتاحوا شلكم غرض بيهم؟
وهم تسودنوا هو وسلطان وسجاد گبوا بوجهه يتعاركون وياه وطلعوا من البيت راحوا البيت عمي شامل.
"""
رنـــه:: كاعده وي طــروادة من غبشه هوه يريد يروح للگاع وانه كاضه قمصلته بأيدي واكله
-البسها والله بارده.
-هسه تحتر واحيرن بيها اذبها بمچان وانساها.
-والله بارده اليوم البسها ولو احترت الدنيا علگها على زوره على عمود حتى تشوفها من تكضي من الگيعان تجيبها وياك.
احجي وهوه مدنك بالگاع يلبس جزمه، وگف اخذ القمصله من ايدي لبسها مبتسم ودرنه على صوت سيارة بصف بيتنا فتح باب الحوش ودار علي مصدوم
-عفره هاي.
طلعلهم وانه رحت بساع اعاين من يم الباب نزلوا هيه وشمس بأيدها ومنذر وياها، اعاين لمنذر خجلان مايحط عينه بعين طــروادة وعفراء عيونها مورمه من البجي، وخرت على صفحة عدلت حجابي وطبوا همه سلم منذر وهو مدنك طب وي طــروادة للدوانيه.
سلمت على عفراء واخذت منها شمس وهيه بساع طبت للبيت مشيت وراها اعاينلها بخوف راحت للمطبخ غسلت وجها واجت يمي
-شبيج عفراء؟
هزت راسها ماكو شي كعدت بالهول حطيت شمس يمها
-شبيج عفراء عيــونج مورمه
تحسرت عيونها متروسه دموع مدنكه تعدل بهدوم شمس وطلع طــروادة دارت عليه بس شافته دنكت تمسح عيونها وهوه اجاها وكف يمنه يحاجيها
-ها عفراء شني شصاير.
عاينت لباب الدوانيه وردت عاينت لطرواده تحجي وصوتها مختنك.
عــفراء:: امس بيت عمي شاكر ودوا الاء سلطان طاكها، ومن امس الهالساعة الدنيا انگلبت الزلم تصيح بصفحة ونسوانهم بصفحة، اكلوا منذر شلون ماتطك مرتك وتوديها الاهلها، يابه ياهي مالتنه احنه؟ لا شلون مثل ما ودوا الاء توديلهم عــفراء.
ويغلطون ويدعون اعمامي ساكتين ومن ضلن النسوان يغلطن ويدعن على ولد عمي شاكر رديت جا شني گـــلبي من حجر واسمع دعاويهن واسكت؟ واعمامي مارضوا عليَّ شلون ما سكتت.
تحجي ودموعها تجري وطرواده يسمعلها بغضب نتر
-منذر هم حاجاج؟
عــفراء:: لا سوده عليَّ تسودن والله وتعارك وي عمامه واهله ومارضى يجيبني بس انه لحيت لان طك گـــلبي من الحجي.
-خيولون لا تبجين بعد ماتردين وياهم.
حجاها وراح المنذر وعفراء تبجي مقهوره وانه من يمي انعل بيهم واسب النوب مو انقهرت حيل ضليت اغلط على سلطان واخوانه طكتني عــفراء
عــفراء:: تحركييين بگلبي انتِ؟ چا انه المن اجيت مغتاظة؟ غير حتى محد يدعي عليهم گدامي ويحرك گـــلبي .
كمت من يمها وكفت يم باب المطبخ
-خيولون مو هاي من وراهم بجيتي.
خزرتني تمسح بدموعها شويه وصاحلها طــروادة مقهور طلعت تحاجي منذر بالحوش وطرواده دنك يبوس شمس، مشيت بساع للمطبخ اعاين المنذر وعفراء من الشباج يمسح دموعها ويگلها
-وعلي لو عدي فلوس اشيلن ما اضلن بالسلف ولا اخليج يحترك گلبج.
عــفراء:: منذر ترى انه ضامه بگلبي وساكته الخاطرك مهونه المر، مليت من عمامك وكل ما الاء زعلت ردوا عليَّ يغلطون ويدعون على ولد عمي گدامي، والله يچوون گـــلبي وانه ما ارضى واحد يغلط على اهلي.
وهوه مدنك مقهور ما يدري شيحجي جر ايدها لوجهه باسها وايده الثانية يمسح عيونها ويگلها بحسره
منذر:: حقج يابعد روحـــي حقج، خل اروحن هسه ما اگدر اضلن مستحي احط عيني بعين طــروادة، ولا تشيلين هم الله كريم.
هزت راسها ساكته باسها بكصتها وطلع وردت هيه طبت للبيت عاينت الطرواده حاط شمس بحضنه ومن شافها كام خله شمس بأيدها وطلع وره منذر عاينت العفراء گتلها
-اسوي عجين تمن وتسيحيلنه؟ نستفاد من زعلج
غمتني تضحك
عــفراء:: اعجني يله يلنادره جا موديه طــروادة للگيعان بدون ريوك؟
-اكل خبز بايت وجبن وجاي كافي طلابه.
اجت عليَّ تضحك وطب طــروادة بعده مقهور بس من شافها تضحك بساع تغيرت ملامحه كاضتني من اذني وحطت شمس بأيدي تگله
عــفراء:: عمّت عيني تريگك خبز بايت؟
ضحك اجه يمنه وهو يگلها
طــروادة:: والله مرات تخبز العصر، تعشينه بيه وتريكنه وبالغده تسويلنه الخبز الضال تشريب وفنه اليفك حلكه ويحجي والله عبود ذاك اليوم راد يبجي يگلي خويه طكني جفاف ابوسن ايدك تزوج تزوج خل مرتك تطبخلنه.
رنـــه :: انهجم بيتك وبيت عبود فد كلاوجيه عفراااء طــروادة يريد يتزوج ومحتار شلون يفاتحنه بالموضوع ذبها براس عبود، اسكت اسكت ابو النسوان اكص ايدي اكصها اذا ماطلعت متزوج وضامها علييينه وحتى احتمال مفرخين
جراني طــروادة عليه وصاح العفراء
-اخذي شمس من ايدها خل اكتلها.
وهي ماصدكت جرت شمس من عدي تطك بيه وهوه كاض ايدي وجراها الحلكه يعضني صرررخت بكل صوتي. خليتهم مايندلون دربهم هوه وعفراء اثنينهم يسدون بحلكي ويصيحون
-اششش اشششش.
دفعتهم شارده
-وعلي المن عليكم السلف كله.
طــروادة:: طاحظج على هالصوت هذا.
عــفراء:: دخيلك ياعلي شاده سماعات ببلاعيمج ووولج؟
ضحكت. وعبود وحسين وزهره كلهم فزوا گال طــروادة
طــروادة :: عبود لو تدك هاونات يمه مايگعد وعلى هالصوت الخايس كعد.
ضحكوا مشوا يسلمون على عفراء وطرواده ما راح للگيعان چلبت بيه عفراء كالتله خل اسوي ريوك تريك ويانه وروح وانه افتر ورأها وابرر
-والله نوبات اخبزلهم الصبح لا يجذبون عليج وعلي اسويلهم اكلات تموت تفحط.
عبود:: ذاك اليوم شوتلنه دجاجة بالتنور غير صارت بالتسعه واحنا ما متعشين وكلنه مكابلين الدجاجه ونهفيلها الجمر طفه والدجاجه بعدها.
طــروادة:: صدك عفراء بس واحد يحجي حگ الله صارت فد شي ماينشبع منها.
رفعت اهدومي من اجتافي اركصلها بحواجبي اضــحك وهي تگلهم
-جا بعد ليش تچذبون وتكولون طاكنه جفاف.
ضحكوا كعدوا بالهول ملتمين على شمس مكعدينها بنصهم وحاطين مخدات وراها يخافون لا تطيح، وگفت اگلي وعفراء سوت سياح. طــروادة خابر عليه ســليم طلع يمه شويه ورد يمنه بالمطبخ گالتله عفراء
عــفراء:: الولد ما تصالحوا؟
طــروادة:: لا والله محد يرضى يتنازل، صــيهد يصيح بعد انتهت ولو جنت امشي بشارع واشوفنهم يكتلون بسلطان اعبر ولا چني اشوفنه، وسلطان يصيح ما اصالحه الا يرضى اسوي عرس واخذ رغد، وكل واحد منهم يجرله بصفحة لعبوا روحـــي.
عــفراء:: هاي اول مره زعلكم هيج يطول!
-اي والله، ســليم حلمان بأبوي يگول جن واكف بالبستان يعاينله من بعيد ضايج ما وصل يمنه عاينلنه وراح.
عــفراء:: ماكتله يعني يكلكم تصالحوا ماراضي عليكم.
-بساع بساع فسرته.
ضحكنه وهوه دنك اخذ سياح من يمها واكل گالها
-صــيهد واحد جذاب امس بس سمع هجوره طايحه من الدرج اجه من المعامل للمستشفى.
-خطيه حتى ماشاف شي من عرسه.
-بس يرد للقرية نعزمهم هوه ومرته ووهب ومرته نسويلهم غده.
عــفراء:: اي والله زين تسوي.
رنـــه :: اخذنه الريوك وكعدنه بالهول طــروادة ياكل وانه اعاين اللگمته هوه وعبود ياكلون سريع وبساع يكضون، كام غسل وكف يم الباب يشرب چاي وعبود كام وراه هم غسل واجه يمه ينشف ايده بالخاولي ويحجي وعفراء گالتله
عــفراء:: يا شو هذا صاير اطول منك.
طــروادة:: غير اكصص رجليَّه اذا اطول مني.
ضحك عبود وكف بصف طــروادة ويرفع رجليَّه يريد يصير اطول منه طكاه طــروادة يضحك شويه عبود اطول
عــفراء:: طــروادة لو يطلع من الباب يدنك انتَ اذا تطول بعد لازم نعلي البيبان.
عبود:: يابه انا حبه ومفشوگه من ابوي نسخه هسه اصيرن بطوله.
طــروادة :: اموتنك ما تصير اطول من عدي.
وعبود يصيح
عبود:: الله اكبر هسه انتَ عايز؟
ضحكوا طــروادة توه يريد يروح للگيعان واندك الباب كمت بساع اعاين طبوا ولد عمي شاكر همه حتى ما يباوسون طــروادة لان امس شايفينه بس عبود وسجاد محاضن جن صارلهم سنة محد شايف الثاني.
كامت عفراء غسلت لان رادوا يحاجونها، طلعتلهم للحوش ما رضوا يطبون للدوانيه، سلمت عليهم وسليم يگلها
ســليم:: خوما واحد مد ايده عليج لو غثج بحجايه، يعني رجلج اقصد.
-لا خويه ابو شمس سبع ماله غرض بحجي احد، ولا رضى يجيبني هناه بس انه لحيت عليه وردت اجي ارتاح چم يوم.
سلطان:: اعذريني خويه ام شمس.
يحجون وياها مقهورين كالتلهم
-خويه صدك جذب عليمن تتعذر؟ شنّي السآلفة.
سكتوا ضايجين، سلطان رد لبيتهم وسليم راح وي طــروادة للگيعان فتنت العفراء عليه
-تدرين طــروادة كضت عطلته وجان اليوم لازم يروح للكليه بس غلس.
-ياا صدك؟ جا تكضي عطلتهم گبلكم؟
-اي والعباس، اكله جا ليش ماتروح يكلي اول يوم هوسه خيولي باجر اروحن وكاضيها غيابات بس انه اكلج هوه يدرس شاد حيله بالامتحانات.
سكتت تسمعلي وانه كضيتها فتنه مره افتن على عبود مره على طــروادة وعلى حسين بس زهره سلمت من عدي لان صاحبتي لا افتن عليها ولا تفتن عليَّ.
ولاول مره مارضيت عفراء تشتغل بالبيت حسيتها صدك تعبانه اشتغلت انه نظفت وركبت الغده كعدت يمها بالغرفة وطلعت كتبي اقرأ گالت
-جا مو بعدها عطلتكم شو تدرسين؟
-غرت من جــويريه مــاسه كالتلي تدرس حتى بالعطلة.
ضحكت تبوس بشمس گالت
-كون صدك يعزمهم طــروادة وانه هنا اريدن اشوفها واشوفن رغد والله شايله همهن .
كمت أشرن الهدوم وسمعت صوت بريا ركض صعدت على گن الدجاج وبدون صوت بس أشرتله فتح اللثام من وجهه واجاني يمشي مدنك مبتسم وصل يمي شال راسه يعاينلي حطيت اديه على السياج اعاينله گال
-صباح الخير
-يا صباح صارت الظهر الساعة بالعشرة ترى.
ضحك مسح وجهه بطرف الچفيه تعبان ورد شال راسه عاينلي مضيك عيونه
بريا:: شلونج؟
-الحمدلله زينه
سكت مبتسم وجهه احمر ومبين تعبان
-انتَ وين چنتَ؟ شو تعبان وبعدين مو عدكم دوام اليوم ليش مارحتوا لا انتَ ولا طــروادة ؟
ضحك داروجهه يتلفت يتأكد محد موجود گال
بريا::اول يوم مو مهم! عوفج مني انتِ شلونج خوما تتخربطين من السكر؟
تحسرت چني عجوز وشايله هم واحجي بحزن
-عاين هوه زين بس انه مرات اكل حلويات بالبوكه ويصعد السكر بساع اشرب حبايه ومن طــروادة يسألني اكله ابد ولا شايفه الحلويات شنّي شكلهن
حجيت بالنهايه مبتسمه لان اغش طــروادة بس هوه راحت ابتسامته وعاينلي بضوجه ما راضي
بريا:: لا رنـــه لا تسوين هيج صدك تحجين ياهو الاهم الحلويات لو صحتج؟
-ترى والله انه بعدني صغيره واحبن الحلويات والفواكه، هسه راح يجي الصيف وتنزل الفواكه الحلوه والرطب النص ونص وتردوني ما اكل والله اكل يا سكر يا بطيخ هاه والبطيخ هم من اروحن للــبستان احوشن وين الصفره ومستويه.
دار وجهه ضايج يمه بلوكه عدلها برجله وصعد عليها يعاين لعيوني، بعصبية يحجي
بريا:: ما تاكلين اي شي حلو!!
-اكلك ترى انتَ تدرس قانون لا تصير عليَّ دكتور مالك غرض انه اعارف ليمت اكل وليمت أخذ علاج.
-واذا تخربط السكر ومحد يمج غير تموتين؟
-الى رحمة الله.
بريا:: واناا؟
-تاكل حلويات وتقرالي الفاتحة ههههههه.
احجي واضحك عادي بس هوه ضايج صدك دنك يحجي بقهر
بريا:: غير اموتن وراج.
سكتت اعاينله شال راسه ضيكت عيوني
-شني تموت وراي؟ ياهي مالتك انتَ اخواني ما يموتون وراي.
نزل من البلوكه دار وجهه من عدي وانه ضايجه احجي عليه بدون غلط رد عاينلي گال
بريا:: هسه عوفي الموت على صفحة وعفيه رنـــه لا تاكلين حلويات.
عاينتله بطرف عيني ماعاجبني اريد انزل گال
-لا رنـــه اوكفي.
رديت اعاينله صعد على البلوكه اعاين لوجهه احسه جوعان ومستحي يگلي
-اجيبلك لفة؟
هز راسه لا ومركز بعيوني
بريا:: انا كل يوم اجي هناه بس ماجاي اشوفنج وما اگدر اصيح عليج خاف يطلع حسين يمج.
-اي النوب طــروادة گال اذا الكاج تحجين وي بريا الا اذب حه.
هز راسه اي متحسر وحجه بهدوء
بريا:: عاينــي اريد تگولين للولد يجيبولج قفص وحمام.
-المن؟ ليش؟
-خل يجيبولج وانا اكلج ليش.
-ما ادري ما يرضون، عود اشوفنهم
توني حجيتها وسمعت عفراء تصيحلي نزلت بساع وركضت للحبل اجت وراي گالت
-تعاي سبحي زهره.
رحت بساع وافكر شسوي بالحمامات سبحت زهره مشطتها وكضيت تلفوني ادور فديوهات لطيور الحمام شفتهن يخبلن شلون يطيرن ويرفرفرن بجنحانهن، احنا عدنا بالنخل بس مو أليفات مثل هذن البالقفص، نزلت الفيديو وديته الطرواده ولعبود كتبتلهم
-اذا تحبوني جيبولي طيور.
طــروادة ماعده نت ما وصله، وعبود وصلته شويه وشافها كاتبلي
-جا موعدج؟
-هذن طيور حب وبلابل انه اريدن حمامات حتى اطيرهن بالسما.
-ويصير اسمج رنـــه المطيرجية.
-انت ابد ما تحبني ولا مره ردت شي وگتلي اي كون كايله الطرواده چا گالي صار ومن عيوني،
هاي هيه ما اريدن منك شي مشكور عبود.
دزيت الرساله وهوه وده ضحك ورد كتبت
-بريا عده طيور صارله جم شهر من جابهن من اجي ابوگن چم وحده من عده.
-صدك عده طيور؟ جا شني هوه احسن من عدي يطير حمام وانه لا؟
ما وصلته الرساله راح النت من عده، سكتت الحد الغده من اجه طــروادة طب يسبح وانه اعاين التلفونه ماعده نت شلون توصله رسالتي، طلع من الحمام ينشف بشعره وعفراء واكفه وشمس بأيدها، اجه يمها باس شمس ونكث شعره عليها وهي تضحك بصوت سودنته اخذها من ايد عفراء يبوسها ويضحك وياها.
كعد بالهول وزهره ركضت جابت مشط واجت تمشط شعره وهوه يعوفها براحتها الحد ما تمل تصعد على اجتافه وتشمر روحها گدامه يكضها يضحك تغار من يضل يبوس بشمس، طبيت وي عفراء للمطبخ گالت
-اكلج اخلي طــروادة ياخذ زهره للدكتور شو حيل ناعمه هسه عبالك حتى ما مسجله بالمدرسه خاف عدها نقص نمو؟
-لا شسالفه مابيها شي خليها ناعمه شتردين منها؟
-والله ما ادري ماتكبر حيل صغيرة، اكلج حجيها صاير زين وقوي.
-اي وصلوات ذكيه حييل تدرين اقري حسين رياضيات ومن اكله عشرة زائد خمسه شكد هيه من يمها بساع تكول اخمسطعش وحسين بعده يحسب بأصابعه.
-حسين ولا يعجبني صاير كسلان فد نوب.
-لا لا ترى انه اجذب من اكولن كسلان احرك بگلبه بس هوه شاطر ولو يدرس مثل الاودام ياخذ الاول لو مايعنطز الخايس.
ضحكت تصب غده مديت راسلي للهول من سمعت صوت رسالة وصلت الطرواده شفت تلفونه بأيده فاتح نت سمعت صوت الفيديو الدزيته اله شافه رافع حاجبه ماراضي بس شال راسه عاينلي شردت للمطبخ صاح.
طــروادة:: شيليها من بالج شني زلمه انتِ تردين تصيريلي مطيرچيه.
يحجي وانه بالمطبخ ضايجه واكفه يم السنك واسمعله گالت عفراء
-شكو؟
وانه مدري شبيه بس واحد يگلي على شي لا ابجي، بساع طاحن دموعي وهيه تصيح
-ياا يااا شكو؟
غطيت وجهي بأيدي وهيه تجرها تريد تفهم شكو ابجي مكطعه روحـــي واجه طــروادة
عــفراء:: شگتلها طــروادة ؟
طــروادة:: رنـــه وعلي هسه اكتلج.
يحجي وانه اشهك وابجي دفعت ايد عــفراء ورحت للسنگ اغسل وجهي وهيه تحجي عليه ماتدري شني الفلم گالها
طــروادة:: ولج تريد طيور شني مطيرچي.
مسحت وجهي ودرت عليه مقهوره
-جا مو هذا ابن الروسيه عده طيور؟
رفع حاجبه خازرني
طــروادة:: اهاا هنا مربط الفرس وانتِ شدراج بصخام عده طيور.
-عبود گالي ما تصدك موو؟ تعال شوف المحادثة
ومشيت بساع جبت تلفوني واحجي والغي واعاتب حطيته بأيده وفنه لو لحگ علي من گد ما احجي سريع حتى ما يفهمني يقرأ بالمحادثة وضحك عاينلي وعاين العفراء يهز ايده ويگلها
طــروادة:: عليج الله انا مخلي بنفسها شي ما جايبه الها؟ بس شني تطير حمام؟ خو فد مره البسيلج صروال وفانيله وكضي الكرك اخذي هاسكي وروحي للگيعان بعد زلمه انتِ.
رنـــه :: خوش خوش ما اريدن هوه هذا هم حظي والله العظيم حظي اسود ومصخم ماعدي حظ وياكم على كلشي تكلولي لا لا لا كله لا.
اخذت تلفوني منه ورحت للغرفة ابجي وادردم وهوه يصيح
طــروادة:: لو صعد السكر اكضج واكت لج.
سديت باب الغرفة اصيح
-خل يصعد كون اموتن حتى تفتك من عدي من كلشي حارميني.
نتر وهوه بالهول
-سدددي حلكج يله يله لا تلغين.
بس انه ولا اسكت بعد سالفة وصارت براسي شي وردته اضل انگ لمن يجيبونه الي، ولان موكلش محترك گـــلبي عرفت السكر ماراح يصعد قفلت باب الغرفة وطلعت الحلويات من وره هدومي اكلت وشمرت الكواغد مالتهن من الشباج.
شويه ودك الباب گال
-تعاي تغدي.
-ما اريدن كلشي ما اريدن منكم والله اذا ما تزوجيت وافكنكم من عدي.
دفر الباب حيل طفرت بساع امسح بوجهي وحلكي فتحته وطلعت ركض كعدت يم الصينية وهوه خازرني بغضب وعفراء ساكته خاف توكف وي طــروادة والومها وخاف توكف وياي وطرواده يحاجيها ضلت ساكته
كعدت اتغده وياهم كلنا ساكتين طــروادة حلو بكلشي بس من يعصب يخوف مايفيد وياه لغوتي ولا زعلي يركعهن عرض الحايط، وره الغده ضلن عيوني يغوشن وحلكي ناشف واتنفس بسرعة عاينلي وعرفني جرني بعصبيه وجاب جهاز السكر يهدد
-الا اك تلج بس الكاه مرتفع هواي.
خنست وهوه من لگاه مرتفع خاف عليَّ شربني الحباية وجاب دولكة ماي. وإلا اشربها كلها من شفته خايف علي وبيها مجال كتله
-شفت لان ماجبتلي طيور.
-اشربي اشربي.
شال دولكة الماي شربت منها وضل يمي خايف عليَّ كل نص ساعة يقيس السكر لحد مانزل اجه عبود وجايب وياه قفص چبير مأجر سيارة وجايبه وطيور الحمام يخبلن منقطات ابيض واسود ورصاصيات وحنيات وسود، وطرواده ما راضي عليه طبب القفص وياه ويحجي ثبتوه بالحوش گال طــروادة
طــروادة:: عاينــي رنـــه لو هاسكي موتهن وطكيتيه ترى اكضج واكتلج لا تكولين ماگال.
-هاااه كشفتك ماتريدني اجيبهن خايف على ابنك والله فنه لو جاسهن الا اطكه بربد.
-فنج والحسين فنج الا اكضهن اذب حهن.
-انتَ كض چلبك وانه اكض حيواناتي.
عــفراء:: يله يابه كافيكم صرنه حديقة حيوانات من وراكم.
صحت العبود شلنه القفص سوه رجعناه بصفّ الحديقة، ومن جهه شرك الصخلة وعلى حايط البيت معلكه اقفاص مال طيور الحب وبلابل، وبالگاع قفص الارانب، وعلى صفحة گن الدجاج هسه صدك صارت حديقة حيوانات ومثل ما اريد.
طــروادة راد يمشي للگيعان صحت وراه
-اخذ هاسكي ترى جاي يعاينلهن ولو وصلهن اكتله.
رد للبيت ضايج اخذ هاسكي وراح وعبود يجر بيه للبيت يريد اطيه فلوس لان اشترالي بفلوسه وانه اصيح
-ما عدددي ماعدي ولا ربع.
عبود:: جذابه احلف عليج ام فليس تجيرين البيضه.
-منيلي حتى ربع ماعدي.
عــفراء:: مساع تكليلي لامه ميه وخمسين.
عاينتلها خازرتها واعض بشفتي وعبود يسحل بيه للبيت بس اجه سجاد وفكني منه راح وانه گابلت الطيور وكعدت مكيفه بيهن وعفراء تگلي
-ولج ينرادلهن وكت وخلك واكل وانتِ عدج مدرسه!
-ترى هذا طــروادة التشوفينه يحجي بس يدير باله عليهن ويساعدني مايضلن بس عليَّ.
سكتت وطبت للبيت وانه افتر يمهن خاف افتحلهن الباب يطيرن ومايرجعلي امد ايدي الهن واتلمس ريشهن ومنگارهن مكيفه بيهن، شلت من الدخن الجايبه عبود طشيته بالقفص وهن ياكلن
بريا:: ليره.
تلفتت ادور عليه من يا اتجاه جايني صوته مو من جهة گن الدجاج، وكفت اهمس خايفه من عفراء
-وينك؟
بريا:: من صفحة بيتنا
مشيت وكفت يم الحايط
-جابولي حمام.
سمعته ضحك وضل ساكت فترة وانه مستنده على الحايط اعاين للطيور واحجي وياه بدون ما اشوفنه گال
-راح اطيج شي؟
-شنو؟؟
ووي حجايته سمعت خفگة جنح طير، رفعت راسي للسما من طارت حمامه لونها ابيض اعاينلها تفتر داير ماداير بيتنا اضحك فرحانه وهي نزلت لحوشنه اعاينلها شلون تمشي رجليها كلهن ريش گال
بريا :: عجبتج؟
-تخبل تخببل هذا عبود ماجايبلي ولا وحده بيضه
ضحك وانه كعدت بالگاع اعاين لمشيتها وهي تمد راسها لقفص الحمامات، گمت وكفت من بريا گال
-غزاله.
-ها؟
بريا :: احم من تردين اجي احاجيج طيريها وهيه تجيني ومن انا اريدن احاجيج اطيرلج حمامه هم بيضه تجي لحوشكم.
-ههههههه شني؟
ضحكت على افكاره ما مهتمه وهو هم ضحك گال
-خليها عدج هاي.
هسه اذا اريد اكضهاتجيني
-عدج دخن؟
-اي
-حطي بأيدج وهيه تجي الايدج حطيها بالقفص وي العدج.
مشيت شلت من الدخن طشيتلها شويه بالگاع وخليت الباقي بأيدي طارت من مچانها الايدي فزيت خايفه خاف تجي على وجهي صاح بخوف
-هاااه؟
ضحكت والحمامه وگفت على ايدي تاكل
-لو تشوووفها شلون تاكل من ايدي.
-هنيالها.
يحجي وانه ما مهتمه اله، مكيفه بيها لان ماخافت من عدي وراساً اجت على ايدي گال
-رنـــه تلوحين تخلين دخن هناه على السياج؟
تلفتت ادور شي اصعد عليه جبت السطل گلبته يم السياج ورفعت ايدي گوه لحت خليت حبوب الدخن على السياج وهوه هم مد أيده يطشه گال.
-افتحيلهن القفص
-خاف ما يرجعن؟
-يرجعن لا تخافين.
-واذا ما رجعن؟
-انطيج طيوري كلهن.
مشيت للقفص افتحه، واعاين للحمامه البيضه راحت على السياج، فتحت باب القفص وهن طارن بالسما خفّت بالبداية خاف ما يرجعن بس من شفتهن نزلن على السياج وبيهن نزلن على الحوش ياكلن الدخن الشمرته مساع.
رديت صعدت على السطل بصف السياج وهنه يتمشن على السياج وياكلن بيني وبين بريا
بريا:: حبيتيهن؟
-كلش.
-انا هم!
اعاينلهن سلون ياكلن گال بريا
-رنـــه عادي اشوفنج.
-لا مالابسه حجاب.
-هاه جا ليش طالعه للحوش بدون حجاب؟
-مو سياجنه صار عالي بعد محد يشوفني.
-ميخالف دوم خلي يمج حجاب خاف صدفة امر واريدن اشوفج.
سكتت افكر بكلامه وحجيت
-بريا صايره اضوجن من حجيك وياي.
سكت فترة وانه متانيه يحاجيني شويه وگال بصوت مخنوك
بريا:: ليش؟
-ما ادري مو مثل گبل كله نتعارك وهاي هسه عبالك حجيك مو حلو وصاير تضوجني گبل من احجي وياك احس مو حرام بس هسه صرت من احاجيك اضوجن گمت احسه حرام.
احجي مقهوره لان گبل من احاجيه واعاركه ضميري مرتاح هسه من اتذكر حجيه اضوج وماحب يحاجيني هيج شلون الفقير ضل ساكت مده وگال.
بريا:: تضلين زعطوطه انتِ ومو صوچچ صوج الحمار اليحترمج.
وكفت عدل متخوصره رغم هوه ما يشوفني
-انه زعطوطه؟
-وكلشي ما تفتهمين كديشه.
فتحت عيني كلها محترك گـــلبي .
-ياهيه الكديشه ولك؟ خاب بالحسين اشبعك غلط شني شفتني محترمتك وضليت تمسلت؟
احجي بحرگه وهوه هم يصيح
-ياهو اليمسلت ادبسز مو اجي اگطع النعال على راسج.
مديت ايدي بحركه اهش الحمامات من السياج اريد احجي واهدد
-وانتَ ياهو وتگطع النعال على راسي خايب المسودن المخطوف ابن الروروسيه امداك وامده اليحترمك.
احجي واحس الحجار اجاني يشمر علي حجار نزلت من السطل لميت الحجار الشمره علي وشمرت عليه بدون ما اشوفنه صاح
-ااااخ .
-حيييل الا افشخك وانعل سلفه سلفاك.
عــفراء:: يااا ياااا رنـــه .
صعدت على السطل والحجار بأيدي بعدني اشمر واجتني عفراء تجر بيه
-ووخري مني وخري اليوم اخلي دمه بطوله.
وبريا يصيح
-الا اذب ح طيورج.
-والحسين لو وصلتهن الا انشر صورتك البلا بجامه بحساب طــروادة مال الفيسبوك واكتب عليها بريا خليل شعلان العريان.
حجيتها وجرتني عفراء حيل تطك بيه وتكرص وانه ادفع بيها محترك گـــلبي .
-هدديني يغلط عليَّ هديني.
طكتني على راسي وتسحل بيه للبيت من كصيبتي
-هدديني خل الم طيوري
-دهر الدهرج ودهر طيورج ام السان شاهرتنه ومخزيتنه.
دفعتها ووخرت اريد ارد اطلع للحوش وجهي مايكصه السيف وهيه كضت الخيزرانه واجت وراي حطيتلهن دخن بالقفص اريدهن بس يجن مايرضن متت من القهر مشيت خابرت عبود ضل يحجي عليَّ شلون طيرتهن وهنه بعدهن ما متعلمات علينه، اجه العصر وجاب بريا الحقنه طبيت جوه واعاينلهم من الشباج ودي هاسكي موجود حتى يركض وراه يأدبه كضوا طير من عدهن والبقيه هنه نزلن يمهم وبريا يگل العبود
بريا:: شني غرت من عدي جبت طيور؟
-اي جا شني انتَ احسن من عدنه؟
ضحك بريا مشه يريد يطلع وعبود وياه غميته بدون ما يشوفني ارتاح گـــلبي، وعفراء ضلت متحلفه بيه تگلي كل ما اتذكر شلون صاعده على السطل وتشمرين حجار ودي اگومن اعضج.
""""
مــاسه :: رغم زعلي من صــيهد بس من خابرني ما گدرت ما ارد عليه اخافن عاينت للتلفون وعدلت كعدتي بس فتحت الخط اجاني صوته
-الو.
-احم الو.
-ها شلونج؟ امي شلونها؟
-الحمدلله زينه.
-وين انتِ؟
-بالبيت.
حجيت اتلفت اعاين لجوري وبدور مرتبكات من يمهن وهو يحجي بتعب گال.
صــيهد:: ادري بالبيت بس وين ياهو يمج؟
-بالغرفه يمي جوري وبدور.
-صيري على صفحة وحدج.
سمعته وبادن رجليَّه كمت من يمهن وهنه يلحكن بيه امشي ويجن وراي طبيت للحمام وسديت الباب بوجهن گال
-هاه وين رحتي؟
-بالحمام ختلت
-مايسمعنج من تحاجيني؟
مديت ايدي فتحت الماي وكعدت على التخته گتله
-لا فتحت الماي هسه لو يموتن ما يسمعن.
سكت شويه وگال
-هيج تحجين وي مــيثم؟
بلعت ريگي ساكته وگلبي يدك بخوف والتلفون على اذني احسه يريد يزلك من ايدي ويطيح گال
-هسه خيولي مــيثم المهم كليلي رغد هم واحد يحاجيها؟
وانه من الهبطه مارديتت عليه بس جريت الردن على ايدي وامسح بوجهي صاح
-مو احچيي وياج.
-ها ها.
-رغد هم واحد يحاجيها؟
-اي ابوي وجدي من وهـــب ما موجود يغلطون عليها.
-همم شيگلولها.
-غلط مو حلو ولو تموتين ماتاخذين سلطان.
وبعد هواي حجي.
-محد يطگها غير؟
سكتت محتاره شگله
-احجيي؟
-لا محد.
-خوش.
سكت وانه عركانه متوتره منه حتى من احاجي مــيثم ما اتوتر هلكد، تحمحم وگال.
-واهلي اشلونها؟
-منو جوري؟
-امم.
-ها زينه.
-هم احد يحاجيها؟
-لا محد.
سكت وانه ودي بس اسد الخط من عده لان زعلانه ما اعارف شلون احاجيه اخذله شويه وگال
-شو انتِ تحاجيني من وره خشمج؟
-انه؟
-جا امي؟
سكتت وسد التلفون بوجهي بعدني ما طالعه من الحمام ودالي رساله كاتب بيها
-ضلي زعلانه ما ينگطع الهوه.
دزيتله تمام شافها وحضرني وانه گلبتها مناحه فوگ ما مزعلني يحضرني ونزلت الامي اشكيلها ورحت الندى هم سولفتلها ومن اجه وهـــب حجيتله گال.
وهـــب:: هوه خابرج يصالحج ترى بس هوه هيج، احنه من نزعل من عدّه يكتلنه عود يله صالحتكم.
-جا يحضرني؟
واجر بصدر دشداشتي لوجهي امسح بيه دموعي گال وهـــب
-شتردين مــاسه يگلج انا آسف واعتذر؟
سكتت دايره وجهي وهوه يهز بأيده
وهـــب::ترى هذا شيخ حيدر زعلان من عده وصيهد شگد راحله حتى يصالحه ما تنازل وگاله اعذرني وانا غلطان.
-جا ترى انه ما اريدن يعتذر من عدي بس هيج مقهوره لان طكاني.
يعاينلي بحيره گال
وهـــب:: خاب ترى مهدود حيله بالمعامل هم على كيفج وياه انتِ.
-سوده عليَّ وين ام البنين وكون تحترك المعامل ونفتك منها.
طكاني ماراضي
وهـــب:: وشناكل حو؟ والوادم التشتغل بيها وين تروح؟
مشه وياي طلعنه من المطبخ هو راح للدوانيه وانه صعدت فوگ يم البنات جوري جنّها دجاجة بساع تنام وبدور تضل تعاين افلام وانه احوس كلساع اروح المحادثة صــيهد والكاه بعده حاضرني الحد ماصارت ب١٢ من الليل بدور نامت وانه بعدني كاعده بالمحادثة وصلتني رسالة من مــيثم كاتب
-شيصير عليج لو توديلي رسالة.
فتحت محادثته وابتسمت نسيت صــيهد كتبتله
-استحي.
-ههههه شلونج عمتي شلونها؟
-الحمدلله زينين.
-اخابرج؟
-لا البنات نايمات يمي يفزن.
-ها خوش، مشتاقلج باجر اجي اشوفنج.
-لاا يمه استحي من اهلي ومن وهـــب
-ومن تگولين استحي اتمنى هسه اشوفنج.
قريت رسالته مبتسمته اغطي وجهي بأيدي من مارديت عليه كتبت
-مــاسه هسه اريد اشوفنج والله طك گـــلبي.
ضليت اعض بأصبعي خجلانه كتبتله
-اوديلك صوره؟
وديت الرساله وركضت شغّلت الضوه ودرت اعاين للبنات جوري جرت الغطا على راسها وبدور ماتحس، درت للمرايه وطلعت الحمره حطيت وفتحت كصيبتي بساع فردت خصل شعري ومشطت كذلتي رجعت للتلفون كاتبلي
-يا ريت.
وكفت يم الشباج حتى البرده تصير وراي وطبيت للكامره أصوّر مبتسمه النوب مو ادقق بالصوره ما تعجبني لو تطلع أثّر حبابه مبين لو احس ضحكتي مو حلوه لو عيوني. اخر شي من ضجت ضليت حتى ما اضــحك صورت وحده ووديتها اله شافها ومارد، وانه طبيت للصوره اركز بيها عبالك كاضين علي سيف وجابريني اصور كتبلي
- لو انتِ يمي هسه! من البوس اگلبها حمره وجنتج الترفه.
قريت رسالته جنت منتجيه على المخده سانده ظهري على الكنتور وصخنت بس شفت كلماته تمددت وجريت البطانيه عليَّ واحس بوجهي مصخن وكل ما اعيد الرسالة مدري شيصير بحالي صخنت وهوه رجع دزلي صورتي ومأشر بدائره على رگبتي وكتب
-كلشي بيج مميز وهلمچان البين أذنج وصدرج احسه موطن وجهي احبن اضم وجهي هناه.
عفت التلفون وغطيت وجهي بأثنين اديه روحـــي رايحه واذني احسها تطلع نار من الخجل وعبالك مگابلني ويحجي مو بالتلفون، غمضت عيوني سرحانه بكلماته وروحي ذبلانه فززني صوت الرسالة الجديدة
مسحت وجهي وفتحتها كاتب
-نمتي حبيبتي؟
وانه احس وجهي يصب عرك كعدت عدل كتبتله
-لا
-جا ليش ما تردين.
عاينت للرساله ساكته اهز التلفون بأيدي وبأظافري ادك على شاشة التلفون خجلانه حييل كتبتله
-ما اعرف بشنو ارد.
وصلته فتحها وطول يله كتب
-اريدن اشوفج حتى لو يم باب حوشكم. دقيقه وروحي.
-لا يمه يشوفونه.
-خل يشوفون رجلج انا مو صاحبج واذا شافوا؟
-عفيه مــيثم والله انه وحده جبانه واخاف.
مارد علي بساع اخذله شويه وكتب
-كلش ردتج هسه حتى لو من بعيد اشوفنج.
وانه الحيره تاخذني وتجيبني ودي انفذ كلشي يطلبه ومن جهه لو اموتن ما انزل للحوش هسه اخافن كتبتله
-اخابرك؟
-اتمنى بس خاف لان ضغطت عليج؟
-لا، بس خل اقفل الباب واجي.
كمت بساع قفلت الباب وعاينت للبنات من جديد جريت مخده شمرتها على راس بــدور بلكن ما تسمع، وجوري لافه راسها بالبطانيه، طفيت الضوه ورجعت لفراشي دفنت روحـــي جوه الغطه واعاين بالتلفون خابرته وصوت دگة گـــلبي عالي اول مارد علي صوته ذبلان عبالك نايم كوه يحجي
مــيثم::الو.
-الو.
-فـــدوه اروحن الصوتج.
سكتت منحرجه غير لو اعرف اردن عليه وهو يسكت فترة متاني ارد عليه ومن اضل ساكته يتحسر
-مــاسه.
-همم.
-اريدج.
غمضت عيوني حيل وصوت نفسي عالي ساكته وهوه كح يتحمحم گال
-مايفيدن لا الصوره ولا الصوت اريدن اشوفن وجهج اسمع صوتج بأذني مو من التلفون. اخابر وهـــب واجي؟
-لااا عفيه لا والله انه استحي.
زفر نفس بحسره واحس گام من مكانه وراها صوت ماي انفتح
-وين انتَ شجاي تسوي؟
-بالمطبخ ما اسوي شي غسلت وجهي وهسه رجعت للهول كعدت.
-ضجت؟
-منين اضوجن؟
-لان ما ارضى تجي لبيتنا؟
ضحك بهدوء
-لا مو هيج بس انا مدري شبيه من كتلج اريدن اجي اشوفج انتِ دزيتلي صوره حتى اشوفج وابطل اجيكم النوب من شفتج بالصوره انشعل گـــلبي وزدت ردت لو حتى من بعيد المحج، واجيتي انتِ الشاطره حليتيها گلتي اخابرك احسن، النوب من خابرتيني وسمعت صوتج أنتهيت خليتني ما اندل دربي .
اسمعله مبتسمه وخرت الغطا من وجهي انگلبت صارت مقابيلي الشباج راحت ابتسامتي وگمت بسرعة فتحتها
ودك گـــلبي حيل
-مــيثم.
-ها گـــلبي.
-تعال يم حوشنه اوكفلك يم شباچ الغرفة تگدر تشوفني من ضوه البلوجكتر.
-لا مــاسه لا هيج ياهو البره يشوفج.
-محد يشوفني والله دوم نوگف هناه لان غرفتنه وره بس بيتكم گدامنه.
-خوش جا لا تفتحين الشباج لمن اوصل واوديلج رسالة.
-خوش.
سديت البرده وبساع بدلت ورتبت شعري والحمره المسحته رديت خليت منها ورشيت عطري اليفوح المحرومه منه، ودالي رسالة ركضت للتلفون وانه اركض دست على ايد جوري فزت مخروعه كاضه ايدها وتصيح
جــويريه::هاا صــيهد هاا
-اسم الله الرحمن اسم الزهره اسم الله، انه هاي مــاسه مو صــيهد.
عاينتلي تتنفس بسرعة مخروعه مسحت وجها ورجعت راسها للمخده ضليت اعاينلها والتلفون بأيدي كلساع توصله رسالة اعاينلهن بدون ما افتحهن كاتب
-بس لا نمتي؟ اذا كاعده وماتردين تفتحين الشباچ كليلي حتى اروحن ماسه .
مارديت عليه مركزه وي جوري لمن نامت كمت من يمها وخرت البرده من الشباج اعاينله التلفون بأيده لابس بنطرون وقميص ويتمشى بصف الحوش ويعاين بتلفونه، فتحت الشباج وصار بيها صوت، وكف والتفت علي بساع شال راسه يعاينلي وانه درت وجهي للبنات اتاكد ما فزن.
رديت اعاينله تقرب يم الحوش كلش، والحوش حيل قريب من الشباج شايل راسه ليفوگ يعاينلي مبتسم وانه ساعة اعاين ساعة ادنك همس ويأشر على زنوده
مــيثم:: بارده عليج ليش نص ردن؟
مسحت على ايدي مدنكه خجلانه وارجع اباوعله الضحكه مافارگت وجهه
مــيثم ::مــاسه.
عاينتله بتركيز مسح وجهه دنك ورد عاينلي بدون ابتسامه همس
مــيثم :: عاشگج انا.
وأنه بساع وخرت من يم الشباج كعدت بالكاع اعض بأيدي وجهي من الحراره يريد ينفجر ميته من الخجل دك التلفون صوت رساله كاتب
مــيثم :: هوه انا اموتن عليج من تخجلين ليش تضمين روحج من عدي.
وكفت بخجل مديت راسي اعاينله وادنك وهوه يعاين مبتسم گال
-هسه ارتاح گـــلبي من شفت وجهج احجي يله خل اسمع صوتج حتى اروحن.
وانه لان گالي احجي بعد حسيت روحـــي خرسه ما اعرف شنو يعني حجي وهوه متاني ليمت انطق وانه ادعي واشجع روحي احجي اي شي حتى لو تكليله شلونك والحجايه ماتطلع من عدي گال.
-ههههه يعني لو صوتج لو شوفتج اثنينهن سوه ما ترهم؟
ابتسمت خجلانه وكوه على روحـــي همست
-شحجي؟
-بكيفج اي شي، بردتي؟
-شويه.
-يله چا روحـــي نامي هاي هيه انا هسه مالك الدنيا ومابيها.
-تصبح على خير
-بعد روحـــي وانتِ من أهل الخير.
توني اريد اسد الشباچ وگال
-مــاسه.
-ها.
-انطيني شي من عدج من هدومج.
سكتت مرتبكه اعاينله
-يعني شنو؟ ترى امي حافظة دشاديشي حفظ.
ضحك بصوت
مــيثم :: حجاب شال.
درت للغرفة ركضت للكنتور دست رجل بــدور فزت خازرتني وتغلط وتتفل رجعت تغطت تدردم وانه ضليت كاعده يم الكنتور كلشي ما اسوي اعاينلها لمن غطت راسها جريت شال من شالاتي واعاين بيه عدل خاف مطبع بيه اثر عطر وعباله انه وصخه.
رشيت عطر بأيدي ومسحت بالشال مشيت يم الشباج اعاينله مدنك همست
-مــيثم.
شال راسه الي لفيت الشال حيل مثل الطوبه وطلعت ايدي من الشباج شمرته اله لگفه وانه اعاينله فتحه طبكه بأيده وشاله لوجه قشعر جسمي من خلاه على خشمه يشمه مغمض عيونه بساع وخرت من الشباج وسديته
نزلت البرده ورحت لفراشي الضحكة تارسه وجهي وميته من الخجل غفيت وانه كلساع متذكره حجاية من حجايته.
ثاني يوم گبل الغده گالوا راح يجي صــيهد وامي كضتنه كلنه رزايل حتى رغد تريدها تعتذر من صــيهد ورغد تحلف لا تعتذر ولا تحاجيه كالتلها امي
-جا يمه انتِ الغلطانه.
رغد:: ادري انه الغلط بس ما اعتذر يمه ولا اريده يحاجيني هوه يكيف يصير بينه زعل خليه على راحته.
سكتت امي ضايجة ورغد اكبر چذابه راحت طبخت الغده مثل ما صــيهد يحب مرگة باميه وتمن اخذت ماي الامي ولكيتها كاضه جوري وتعلم بيها
ايمان:: روحـــي لبيتكم حضري هدومه حطيهن على الچربايه وبخري البيت كوم من يطب ريحة البيت حلوه، وانتِ تكشخي البسيلج ثوب حلو وحطيلج حمره وكحيله، خيبه يمه شمالج لا انتِ بيج خير لا ندى ازوجهم عليجن؟
جــويريه:: خاله زوجيه نذر علي اركصله هجع للصبح بس خلي يتزوج ابوووس ايدج زوجيه
تضحك وجرت ايد امي تبوسها وامي كضتها تطك بيها متحلفه
ايمان:: البارده المابيج خير خايبه يجن الخايسات ياخذنه منج.
وجوري ميته من الضحك امي تطك بيها وهي تبوسها وتضحك وتگلها
جــويريه:: اساعدهن والله أساعدهن حتى ياخذنه ابو الحلوات .
ايمان:: ولج مــاسه وين رغد تعالن اكتلنها الي شلت حالي.
جــويريه:: لا خاله هاي هي عوفي رغد هاي بسّ تحاجيها تصلخني وتمشرني بالمشتمل.
مــاسه :: ههههههه والله بس هيه دواج.
وامي تعض ايدها متحلفه كالتها
ايمان:: جــويريه وعلي اغتاظ عليج، روحـــي لبيتكم خل يحسّ بوجودج شمالج النهار كله شارده يمي، حضريله هدومه البسيلج شي بيه خير كون لو شافج ينسطر.
جــويريه :: البسله هاي الجبتيها الي مال ركص؟ واكضلي خناجر اثنين اول ما يطب للمشتمل اركض وراه والله مو بس ينسطر حتى ينخلس.
ايمان:: يابووويه خايبات جيبنها اليه لو ما عضيتها ما يبرد گـــلبي .
كمت اريد اجرلها جوري وهيه ركضت شارده وصدك راحت للمتشمل بعد ما رغد وندى رزلنها، بدلت الامي وطبيت للحمام غسلت هدومها وطلعت اشرهن سمعت صوته من يحجي وي وهـــب رديت بساع طبيت للبيت وكفت يم الدرج وهوه طب للبيت شاف رغد وندى بالمطبخ كال
-السلام عليكم.
واجه عليَّ بدون ما يعاينلهن ندى ردت عليه ورغد مغلسه تثرم زلاطه، وصل يمي وعبرني چنه ما يشوفني فتحت حلكي بصدمة ووهب يضحك علي،راح الغرفة امي هزيت ايدي واخذتله ماي بارد طبيت للغرفة ضايجة شفته حاط راسه على صدر امي وهيه تبوس بيه وتمسح على ظهره وكفت يمه
-هاك ماي.
شال راسه عاينلي اخذ الكلاص بأيد وكض ايدي بأيده الثانية شرب الماي وجراني كعدني يمه شال علاكه سوده صغيره خلاها بحضني
-هاي هديه الج.
عاينت للهديه ورديت اعاينله دار وجهه الامي وهو يگلي
-لا تضلين زعلانه، اضوجن.
مارديت عليه عاينلي بقهر ضايج وكفت وعفت العلاكه يم امي ضيك عيونه وامي تگله
-حگهن لو زعلن عليك اخيهن ومايهون عليهن تطكهن.
تحسر يبوس بأيد امي الماتگدر تحركها اجت بــدور وماتدري بيه بالغرفة تلعلع ماخذه راحتها لان لا اجدادي هناه ولا جده كلهم ببيت غانم، انخرست من شافته امي كالتله
ايمان:: كوم يمه روح اسبح وارتاح.
هز راسه اي ووگف مقهور عاينلي مد ايده الايدي جراني الصدره شباگني وانه فاتحه عيني بصدمة يهمس بصوت ناصي
-لا تضلين زعلانه من عدي ما احمل زعلج انا.
حطيت ايدي على ظهره
-مازعلانه يابعد روحـــي.
وخرني من حضنه باسني براسي وطلع،وانه الضحكه شاكه حلكي حتى لو ما اعتذر المهم عرف من طكني غلط. فتحت العلاكه اشوف شجايبلي، شال اسود وعطر جديد
""""
جــويريه :: اخذت مفاتيح المشتمل من مــاسه ورحت دخلت محتاره شسوي يعني، فتحت الكنتور طلعلته اتراك خليته على الچربايه من جريته تخربطت البقيه عدلتهن بس مو خوش هم ضلت بيهن خربطه.
فتحت الجرارات اعاين شنو اخليله وي التراك عاينت للسبح شلون مرتبات والله اله خلك رجعت الجراراه هاي هيه زين مني وحضرتله ملابس.
فتحت كنتوري اباوع الملابسي طلعتلي دشداشة ورديه وبيها رسم ورده فصال، سديت باب الغرفة ولبستها وكفت أعاين بالمراية ضيگه عليَّ كلشي مبين، هاي تصير لبدور اضعف من عدي
توني اريد اجيبلي شي غيرها البسه وسمعت باب المشتمل انفتح وانسد شهكت افتر بحيره وركضت للكنتور فتحته ودخلت كعدت بمكاني وساده حلكي بأيدي.
انفتح باب الغرفة وانه گـــلبي يدك بقوة اسمعه يكح واسمع خطواته يم الكنتور الاني بيه حطيت ايدي على عيوني من فتح الباب وانه بالجهه الثانيه والملابس المعلكه مغطياتني ما يشوفني
ساده عيوني بأيدي حيل واحس بيه يحرك الملابس يختار منهن حسيته فلت تعلاكه من التعاليك اخذها وسد الباب.
زفرت نفس براحة ووخرت ايدي من عيوني اعدل كعدتي وشهگت بخرعة من لگيته كاعد يمي ببطن الكنتور وساد الباب علينه
گـــلبي راد يوكف كاعد نفس كعدتي ومضيك عيونه يباوعلي حجه بصوت تعبان.
صــيهد::الله يساعدج گواج الله على التعب.
سكتت ابلعم وهوه مبتسم بطرف شفته
-هلكد تحبين الكنتور؟
مسحت وجهي اعض بشفتي همست
-الحمدلله على السلامة.
ضحك دار وجهه ورد عاينلي
صــيهد:: جنت بالشغل مو بالحرب عليمن الحمدلله على السلامة.
برطمت ساكته على كلشي يفشلني مد ايده لوجهي يوخر شعري لوره اذني گال
-امي گالت مرتك راحت لبيتكم تحضرلك هدومك شو مرتي خاتله من عدي بالكنتور.
يحجي وبظهر ايده يتحسس خدي لزمت ايده اوخرها من وجهي من صارن اصاببعي بباطن ايده لمستها خشنه ووجه انعصر باوعت بيها الجلد متكشر ومجرحه بقيت لازمتها بأيدي مصدومه
-شبيها ايدك؟
تلمستها بأيدي الثانية گال
-مابيهن شي لباجر يطيبن.
عفت ايده لامه رجليَّ الصدري حطيت ايدي على رجليَّ حاضنتهن واعاينله قرب وجهه الوجهي رجعت ليوره اكثر مرتبكه باوع بعيني صوته ناصي ويحجي بهمس
-بخدج ابوسنج.
دنكت عيني ارجف وأحس بأنفاسه يم وجهي گـــلبي يدك حيل وهوه شويه شويه يتقرب الحد ما حسيت وجهي برگبته غمضت عيني حيل اشمن عطره واحس شواربه ولحيته دغدغن خدي باسني وخله وجهه ثابت على خدي.
مد أيده وره راسي يحضني صم راسي برگبته وشفايفي صارن على رگبته تنهد بصوت مسموع يشم برگبتي واني اتنفس بقوه وخوف همست
-صــيهد حباب.
ابتعد بسرعة طلع من الكنتور واني طلعت وراه مرتبكه واكفه ما اريد امشي گدامه راح ياخذ ملابسه من الچربايه اباوعله وهو مدنك يعاين بطرف عينه شال راسه باوعلي رفعت الدشداشة من صدري شمر الملابس من ايده وباوعلي بضوجة يحجي
-هاي الدشداشة طالعه بيها من المشتمل للبيت؟
هزيت راسي لا
-اول مره البسها جربتها وطلعت ضيكه راح انطيها البدور.
احجي مدنكه عيني كعد على الچربايه گال
صــيهد:: بله شوفي اكو ماي حار؟
باوعتله ساكته شلون امشي گدامه وهي لاطشه على جسمي، جر الجنطه مالته طلع ملابسه من عدها وطلع عطره وشاحنته وجكايره يعوفهن على الميز، مشيت بصف الميز دنكت شلت شالي فتحته خليت على خصري مغطيني وطلعت اركض، فتحت ماي الحمام ورجعتله
-اي اكو ماي حار.
هز راسه خوش اخذ ملابسه وگام وكف بصفي يعاينلي
صــيهد:: حلوه عليج بس حدج بيها لباب المشتمل اذا تردين لا تطينها.
بقيت مدنكه ساكته بس طلع ركضت بدلت ولفيت شالي على شعري وشردت للبيت قبل لا يطلع من الحمام وماسه چلبتلي الا اوديله الچاي
-حرام عليج اني ما صدگت اشرد.
-امي عدها استعداد تگوملج هسه اخذيه وروحي.
-يارب مــيثم يشوفج وانتِ تاكلين فلفل حار وبصل وي السمج.
ضحكت تطك بأيدي اخذت الچاي وطلعت لكيته بالغرفة هستوه طالع من الحمام بأيده التلفون الجابه الي باوعلي گال
-عبالي هم شردتي كلت إلا اموتها.
-احم رحت اجيبلك چاي.
انطيته الچاي ووخرت على صفحة اباوعله شرب وعيونه بالتلفون اباوع وياه عشرين مكالمه وكلهن حذفهن خفت بسرعة بررتله
-والله العظيم ما ادري هذا منو المتصل اصلاً حتى جنت ناسيته هنا ابد ما ماخذته وياي للبيت والقران.
-انا.
-ها؟
-انا الخابرت وادري بيه ضال هناه، شني ما تردينه؟
باوعلي اطكطك بأصابعي عاف كوب الچاي والتلفون على الميز ودنك بحيره يحجي
صــيهد:: اتمنى افهم شني التردينه انتِ؟
وگف واجه يمي وخرت من مكاني امشي واحجي
-كلشي ما اريد والله.
وكفت بعيد عنه اباوعله بسرعة عصب خازرني شال أيده يحجي بتهديد
-تحلمين تنامين بذاك البيت بعد
-كلش؟
سألت اريد ابجي وهو تخبل عيونه يردن يطلعن گد ما خازرني واني ميته من القهر ما ارتاح هنا نتر
-اسكتي يللله سدي حلكج
فزيت من صوته. رجعت ليوره حيل وهوه اجاني بعصبيه روحـــي راحت لزمني من أيّدي ميت من القهر ويحجي بعصبية.
-لا تلعبين عليَّ هذا بيتج ومچانج.
-اي.
هد ايدي ابتعدت من يمه الدموع تارسه عيني دار وجهه من عدي يحجي وي روحه واني اريد بس ارجع يم البنات همست صوتي مخنوك
-راح اروح يم البنات.
مشيت اعبر من يمه لزمني من ايدي وحجه بهدوء
-تعاي.
سحبني من ايدي للچربايه. امسح بدموعي لزمني من اكتافي كعدني على الچربايه وكعد بصفي
-هسه عليمن تبجين انا شگتلج؟
دنكت ساكته بس دموعي تنزل مدري على شنو گال
-لا تبجين وحاجيني عليمن تردين بس تشردين من يمي شمسويلج؟
درت وجهي عليه يباوعلي بقهر مسحت دموعي اريد احجي متردده وهو فهم
صــيهد:: سولفي والله عادي.
-اخاف.
-من عدي؟
هزيت راسي اي دنك بحيره متحسر واني شلت رجلي تربعت على الچرباية اباوعله بخوف واردد الكلمات اللي اريد احجيهن دام ابجي وخايفه اخربط ارتبهن گبل لا احجيهن احسن، باوعلي مضيك عيونه
صــيهد:: ترى انا ماجابرج على شي ويوم الگربت صوبج وصحتي وخر وخرت عليمن بعد تصيحين اخافن؟
بلعت ريك اباوع لوجهه همست بخوف
-ابد ابد ما تجبرني؟
هز راسه اي زفرت نفس براحة اباوعله گال
-انا ما اريدن تضلين غاد ما اريدن احد يحس بينا خاصه شعلان وجدتج.
رجعت ابجي واحجي اليحلالي
-ما اريد ابقى هنا والله انت ماتحس بيه وكله تصيح بوجهي
-بعد ما اصيح.
مد ايده الي وخر الشال من راسي وحط ااصابعه بشعري حتى ينزل گذلتي ومن نزلها رجع يحطها وره اذني واني بس اناشغ واحجي تلزيك گال
-غير الصياح شعدج بعد.
مدنكه واشرح وكل ساعة مغمضه عيني بسبب ايده اللي ساعة تتحسس خدي ساعة رگبتي ساعة أذني كتله
-كلشي اكره اكره من تكلي ييله اسكتي اكره من تكلي ااشش اكره من تكلي حلكي سدج.
-سدي حلگج؟
شلت راسي اباوعله هزيت راسي اي وملت على ايده مغمضه عيني وهو بأطراف اصابعه يرسم النجمه ويتحسس رگبتي
صــيهد:: انا احبن من تحجين بالمگلوب.
فتحت عيوني بساع عدلت راسي ووخرت ايده من رگبتي باوعلي ساكت واني وكفت واخذت حجابي من يمه لبسته وطلعنه سوه چانوا جدادي وخالي وليد توهم راجعين حط ايده على جتفي وبدل ما ندخل من باب المطبخ دخل من باب الهول سلم عليهم من وره خشمه جده تباوعل بحقد وجدي من شاف صــيهد حاضني گاله
شعلان:: هالشهرين لو ماحبلت مرتك ازوجنك غيرها.
فتحت عيني كلها مصدومه بيهم وصيهد ضحك گاله
صــيهد:: ليش منو گالك انا اريدن جهال؟ شهرين سنة سنتين بكيفي ليمت ما افكر.
شعلان:: لا مو بكيفك انا اريدن اشوف احفاد احفادي گبل لا اموتن.
صــيهد:: يشهد الحسين انا اجيبهم الگبرك شتريد بعد.
حجاها وعصر جتفي وبرخاوه دفعني يريدني اروح مشيت بسرعة وكفت بباب المطبخ اسمعلهم خالي وليد يضحك وسعاد تگله
سعاد:: يتمنالهم الموت وانت تضحك؟
ضحك صــيهد دار عليها وگالها
صــيهد:: انا وجدي نتشاقى انتِ ياهي مالتج؟
شعلان:: بكلشي حاطه روحها تريدني افرك حلكها.
وسوواا بيها فلك جدي وخالي وليد وجده بصفحة تغلط كامت من يمهم ماتشوف دربها شارده. لغرفتها درت للمطبخ طب وهـــب بأيده رضا يبجي حتى عد وهـــب ما سكت باوع الندى وحجه بعصبية
-انتِ تطكينه؟
وهي هزت راسها لا ومشت اخذته من عده حايره بيه شلون تسكته اخذته منها مــاسه وصعدت فوگ، وندى روحها تطلع من تشوفه هيج يبجي.
صبيالهم غده واحنا تغدينه وي ام صــيهد، وره الغده هوه ووهب رادوا يطلعون بشغل وگبل لا يطلع صاحلي رحتله يم باب المطبخ گال
-اخذي كتبج وامشي غاد بالمشتمل لا تضلين هناه.
#تكملة_البارت_39
#أرض_الـــــخناجر
حجاها وطلع روحـــي طلعت بكيفه يتشرط منو گالك اني اريد انحبس وياك هناك، اخذت كتبي ورحت وگد ما مقهوه ولا گدرت اركز، فرشت كتبي بالگاع كدام الجربايه ادرس بس اريد اسيطر على كم موضوع ما بقى شي وتبدي المدرسة.
فتحت دفتري احفظ رسومات واكثر الشغلات الاحبها اهتم بالرسم والالوان، ألونهم بتركيز اندمج بيهن شلت راسي على فتحة باب الغرفة كعدت عدل وهوه دخل يباوعلي ويباوع للكتب المنثوره بالگاع هوسه عبر من يمهن، ما حاجاني راح للكنتور بدل وكعد على طرف الچرباية يباوعلي
-شدرستي وين وصلتي
-كل الكتب اول موضوع من الفصل الجديد.
هز راسه خوش ودنك اخذ الالوان ودفتر الرسم رجع لمكانه على الچرباية گال
-يله ادرسي
دنكت ادرس واباوعله كل شويه وهو يدخن ويرسم مدري يشخبط، من اندمجت اقرأ نسيته الحد ما سد الدفتر وحطهن يمي هو والاقلام، تمدد على الچربايه يباوع بتلفونه ساند ظهره على المخده
فتحت الدفتر ادور على رسمته لكيتها بالورقه الاخيره
مضلل ورقة باللوان ازرق وسمائي واسود، ونجوم هواي وقمر وقريب على القمر نجمة اكبر من كل النجوم الموجوده وكاتب فوگها بالانگليزي
(I distinguish her like the Polaris star
ابتسمت وحجيت بصوت
-تميزها مثل نجم بولاريس؟ شنو يعني نجم بولاريس؟
ماحاجاني واني مدري شبيه من الموضوع يخص نجمته اكيف واحجي وياه رفعت راسي اباوعله يدخن ويباوع بتلفونه
-صــيهد!
باوعلي طفه الچكاره واني عيني بعينه مبتسمه سألته
-هلكد تحب نجمة؟
يباوعلي ساكت
-شوكت تتزوجها؟
مسح وجهه كعد عدل
صــيهد:: من انتِ تكضين امتحانات السادس.
-ها؟ لا تزوج هسه معليك من عدي.
-لا، من تكضين احسن.
-اسأل وما تصير عصبي؟
جر باكيت الجكاير شعل جكارة جديدة جر منها نفس زفره وهز راسه اي تحمحمت بخوف
-من انتَ تتزوج اني اروح وين؟
-وين؟
-ما ادري انتَ گلي وين؟
صــيهد:: وين؟
-اني اگول اروح يم البنات.
جر نفس طويل مغمض عينه ووميل راسه زفره ورجع باوعلي يحجي من وره خشمه
-تضلين هناه.
-وين هناه؟
-بمچانچ تدرسين!
-ها جا ونجمه.
-مالج غرض بيها هيه هناه يمي بحضني وانتِ بمچانچ تدرسين.
درت وجهي مشمئزة گال
-لازم ماعاجبج.
-جا لا تتزوج أذا هيج.
-اتزوج شعليج.
-تزوج بس اني اروح هناك شنو ابقى اباوعلكم؟
-اكلج ادرسي ادرسي لا تدوخيني عوفي قندره نجمه على صفحة.
-انتَ لو تحبها ما تگول عليها قندره.
نتر بصياح شايل ايده
-لللج سدي حلكج يلله.
دنكت لكتابي خانسه وهوه تمدد يغلط متنرفز واني احجي بگلبي نومه بلا كعده، كملت دراستي طفيت الضوه ورحت يم البنات گلت اذا حاجاني اكله امك ودت عليَّ.
بس مابين وحتى بالعشا مادري وين رايح، وره العشا ردت اصعد يم البنات مــاسه وبدور. ماقبلن هنه اساساً متزاعلات وماسه نزلت نامت يم امها ورغد صعدت يم بــدور، رحت للمشتمل وبسرعة فرشت يم الميز لفيت راسي ونمت قبل لا يجي.
"""
مــاسه :: خانسه جوه البطانيه احجي وي مــيثم رسايل ومسويه التلفون صامت گالي
-اريد استعجل بالعرس
-صــيهد ما يقبل كال الا اكضي سادس
-لا حجي يفيده زين اذا صبرت بعد آسبوعين.
-لا شنو
-مــاسه والله تعبان اريدج يمي، واذا على دراستج والله انا انطيج كل الوقت تدرسين براحتج.
سكتت بحيره وطفيت النت من سمعت صــيهد فتح الباب يحاجي امي غمضت عيني وامي كالتله
-ها يمه تعال؟
طب يمها باسها وسأل
-هاي ياهي النايمه هنا؟
-مــاسه.
حسيته اجه يمي وانه خليت روحـــي طبيعيه مغمضه ومتغطيه اعرف امثل عليه انه نايمه رجع يم امي يسولفون گالتله
ايمان:: ترى حاسه بيك وادري انتَ بصوب ومرتك بصوب.
وهو ساكت كالتله
ايمان:: اطيها وكت عودها عليك مناه لمن كلش كون ترضى بيك ديربالك تجبرها تضل تكرهك للدوم.
صــيهد:: فـــدوه اروحلج يمه سدّي الموضوع ما احبن احجي بيه.
-جا أنه امك ولك.
-حتى لو امي يابعد روحـــي، سالفه بيني وبينها وموصيها ماتحجي شلون تكلج؟
-لا والله ماكايلتلي جا انه مو غشيمه عرفتكم.
وهوه بساع غير الموضوع مايحب يحجي سولفوا على رغد گالها
صــيهد:: داست عليَّ وعبرت انا الردت اردلها كرامتها.
-جا شتسوي تكول ساعة الشفته حاط مسدس براسه نعمت عيوني كمت ما اشوفن غيره، وابن عمك شاريها ورايدها ولو ضلت ترى يزوجونها الغيره.
صــيهد:: ليش هوه بكيفهم يزوجونها؟ اكو واحد يجبرها وانا موجود؟ يمه انا ما اكسر گلب اخواتي وردتها السلطان بس ما اشمرها هيج واخليها تتعذب، جنت اطرد سلطان حتى يحس بقيمتها ليش ضيعها اول مره؟
ليش خلاها ملوعه صغيره رغد صغيره وحملت هم اكبر من عمرها بسبب سلطان لا چان كفو واجه واجهني وگال رايد اختك ولا صار سبع واخذها گوه عليهم خلاها تتزوج غيره ويدري بيها هيه رايدته
رغد ما مار يوم ورجلها ماطاكها ملوعه ومعذب
يمه انا طلعت اختي من الموت جريتها جر شلتها من بيتهم جنازه تردون ارد اشمرها يم ميلاد ومرت سلطان ويسولهن سالفه عليها لو لعبه وسلطان هم يعوفها
تضل عدله هاي لو رد عافهااا؟
والله أبصملج بالعشره تموت
احسبلها ألف حساب ومن اشوفنها ضايگ خلگها الدنيا تطلع من عيني وحسبه تاخذني وحسبه تجيبني شلون ازوجها السلطان وما اخليها تتعذب من امه ومرته.
تالي ست رغد داست حجايتي بالقندره وركضت السلطان يمه حطت ايدهاا بأيده گدام عيني اصيح عليها ما تررررد، انا يعقدون الاختي عد وادم وزلمهم كلها درت اختي اجتهم شارده وي ابن عمي، والله ويشهد الحسين تمنيت روحـــي ميت ولا سوايت رغد هاي.
يحجي بقهر محترك گلبه وامي تحجي وياه بهدوء
-لا تحجي هيج صــيهد يمه اخيتك ولو غلطت انتَ الچبير وتعذرها، فـــدوه اروحنلك صالحها وحاجيها.
صــيهد:: لا اريدن اصالحها ولا احاجيها.
-وتضل هيج رغد معلكه؟
صــيهد:: لا ماتضل معلكه تنحل تنحل عوفج من هالموضوع عوفيه الوكته، اكلج يمه انا طاك مــاسه وحتى جــويريه مضوجها وانتِ مناه تمرضتي شتگولين نروح للزيارة؟ انا وانتِ وماسه وبدور وجوري؟
-ياهو الي انه هيه رغد مداريتني ما اروحن بدونها
تحسر صــيهد ساكت شويه وگالها
-هيه وياج رغد، خل اشوفن كون وهـــب يجيب مرته ويجي بسيارته حتى اعوفن وحده من البنات وياه.
ايمان:: هاي هيه يمه ديله روح نام ومثل ما وصيتك بعد روحـــي جويريه عوفها على راحتها.
سكت باسها وطلع، وانه بعد ما شغلت النت لفيت راسي ونمت ثاني يوم من الصبح أجتني جوري مكيفه گالت
-بعده نايم شردت ومن يسألني ليش شردتي اكله مــاسه مريضه واجيت اداريها.
-اكله چني حصان كلشي مابيه.
ضحكن هيه ورغد وندى، وهوه كعد بس تريك. وراح للصناعية اخذ سيارته يضبطها حتى نروّح للزيارة رغد بالبداية مارضت تروح لمن امي حجت عليها يله رضت .
العصر مــيثم بس ودالي رسالة كاتب راح اجي هبط ضغطي صــيهد اجه ووهب هم موجود، اوديله رسايل اكله لا تجي ما يرد علي نص ساعة وكتبلي
-جايج عشر دقايق.
ضليت الطم وهنه يغلطن عليَّ الطم وابدل واكشخ نزلت جوه اعاين من شباج المطبخ، صــيهد ووهب واكفين بالحوش يسولفون على السيارات وندك باب الحوش صــيهد ضل بمچانه بنص الحوش ووهب راح فتح الباب
بادن رجليَّه من شفته مــيثم لابس دشداشته البيضه وبأيده وردات ثلاثه حمر هم شادهن بشريط صــيهد بساع عدل وگفته يعاينله رافع حاجبه
وهو سلم على وهـــب وطب للحوش مد ايده الصيهد سلم عليه
ووهب من وراه يعاين للوردات ويهز أيده مستهزئ ويأشر الصيهد " اطگه"
صــيهد گال الميثم
صــيهد:: خير اليوم لفيت يمنه؟
وهو يحجي بهدوء مبتسم
مــيثم:: جاي اشوفن مرتي.
وهـــب:: مصدك روحه هذا بابا شني انتَ تعاقب بينه؟
وهو يدنك مبتسم وانه انطحن من الخجل والخوف جروا ايده اثنينهم يعاينون للوردات گاله صــيهد
صــيهد:: گضت الحديقة گضت.
مــيثم:: فـــدوه الها الحديقة والبيت.
وثنينهم صاحوا بوجهه
-هيييي سدّ حلكك.
يدنك يضحك صــيهد عاين الوهب گاله
-اخذه للدوانيه خل اجيبن الجيسي واجيك.
مــيثم :: عبالي تگول اجيبن مرته واجيك.
جراه من صدر الدشداشة وميثم يضحك دفعه صــيهد يگله
-وعلي راح اكت لك حتى عطرها گمت اشمنه بيك امشي ولي من گدامي.
راد يمشي للدوانيه جراه وهـــب يشم بيه ويگله
وهـــب:: ولك خاف تلتقي بيها من ورانه اعدمك ترررى.
مــيثم :: هالاسبوعين عرسي لا اعدمكم ولا تعدموني اخذ مرتي وافكم شري.
صــيهد:: شو تقرر وحدك؟
ضليت اكل بأظافري واسمعلهم مــيثم حجه بجدية وقهر گاله
مــيثم:: والله صــيهد انا عدل ما احبن المايلات يوم الردتها اجيتك ويوم العقدت عليها وعرفت هاي هيه بعد هذا حدي اريدنها ببيتي كتلك اريدن اتزوج ليش اضلن يوميه جايها ومشلوع گـــلبي وگلبكم؟
دنك صــيهد ساكت رد عاين الميثم گاله
-السنة التجي هيه سادس؟
-انا وياها خطوه بخطوه وعود لو شفتها هامله دراستها بسببي تعال اخذها وفنه اليفك حلگه.
تحسر صــيهد بحيره گاله
-الله كريم.
راح مــيثم للدوانيه وي وهـــب وصيهد اجه للمطبخ طفرن البنات كلهن شاردات وضليت بس انه وجهي صوفر وروحي رايحه وكف بباب المطبخ يعاينلي وانه. مسويه روحـــي ما اشوفنه اغسل بالاستكاين
صــيهد:: ها ست ماسه سوي روحج فقيره كلشي ما تدرين!
درت عليه اسأل
-شنو؟
-صخامج خطيبج بالدوانيه يعني على اساس ما تدرين وانا اكلج، جيبيله چاي.
حجاها وراح ركضت للتلفون كتبت الميثم
-الا ازعل من عدك انه ما اگدر احجي اسمك گدام اخواني شلون تريد اكعد يمك.
فتحها ومارد علي اخذت الچاي ورحت ارجف طبيت للدوانيه حتى ماسلمت وهـــب اخذ الصينية من ايدي ودرت اريد اشرد گال صــيهد
-تعاي اكعدي.
بلعت ريك بخوف وكعدت بصف صــيهد مدنكه اعصر بأصابعي وهمّه يسولفون بينهم على ولد عمي شاكر شويه وصيهد جر تلفونه حطه على اذنه يگول
-الوو.
حجاها وكام طلع بره رغم محد جان مخابره ووهب يشرب چاي ويطلع صوت وميثم بس يكح گال
وهـــب:: لا تكح ما اطلع ماستي هاي ما اعوفنها يمك.
مــيثم:: ههههه ضل عادي.
وهـــب:: تعاي مــاسه تعاي يمي
كمت من مچاني خجلانه كعدت يم وهـــب شبگني وباس خدي يحرك بگلب مــيثم ويگلي
وهـــب:: تاخذين هذا الخايس وننحرم منج؟ ولج بس الچاي التسوينه يسوه راس مــيثم وبريا.
مــيثم :: اشكرك.
-راح اطلع بس لو الكاك متدني يمها أرميك ترى.
يحجي وانه وميثم إثنينا مدنگين مشه وكف بالباب گال
-مــاسه اكعدي ليغاد ولا تتحركين من مچانچ.
كمت كعدت بعيد وميثم يضحك طلع وهـــب وسد الباب شلت راسي عاينت للباب مــيثم بعده ما حاجي وكتله
-ليش اجيت؟
-اشوفنج گدامهم انا ما مسوي شي حرام حتى اضل اعاينلج بالختله.
-عاين والله هبطتني انه استحي من اخواني گـــلبي راد يوكف.
-اسم الله على گلبج حاجيتهم على العرس وهاي هيه بعد ما اجي مناه للعرس.
وكف ووكفت انه هم اطكطك بأصابعي من حسيته ضاج تندمت بس مو بايدي مستحيه من الولد، خله الوردات بأيدي مبتسم
مــيثم :: آعذريني ماقصدي احرجج گدامهم.
سكتت گال
-يله روحـــي وصيحيلي وهـــب.
طلعت وهـــب راحله حيل انقهرت لان حسيت بنفسي ضوجته.
""""""
رغد:: ما شفته ولا سمعت عنه اي شي الحد اليوم اللي على اساس نروح بيه للزيارة كالوا الفجر نطلع، بالليل اجه سجاد ابن عمي شاكر ووياه هاجر وهي تباوسني خلت بأيدي رساله دك گـــلبي حيل ولأول مره اقراها وانه مبتسمه كاتب
نمرشه
منذ سنين وأنا انتظرك بقرب شجرة التين
الان وبعد ان اصبحتي لي هل تأتين؟
ضميت الرسالة مبتسمه بيومها حجيت الامي كلشي مر وشكد ألتقينا گالت
ايمان:: تدرين جنتوا گبل تلعبون يم هاي الشجرة وانتم صغار جنه فد بيت لو غطيتي ومالكيتج الكاهم ماخذينج هوه ووهب تلعبون غاد جوه شجرة التين.
-ههههه، هسه يمه اروحن لو لا؟
-يمه كضيتي عمرج ترحين بودن ما تساليني هسه جايه تسألين رغده يمه شلج بيها هاي.
ضحكت وغطت راسها عبرت ال١٢ صعدت فوك شفته يم الساگيه ويعاين للشجرة، نزلت بساع لبست عبايتي طفيت الضوه وطلعت أمشي بخوف صــيهد ووهب ناموا من وكت علمود السياقة وعود مطمنه محد موجود
افتريت من وره الحوش امشي واعاين السلطان مبتسمه اشوفنه، وهو وكف يعاينلي والضحكه على وجهه يلوحنه ضوه من بيت عمي خليل.
بعدني ما واصلته ووكفت بمچاني فاتحة عيني على وسعها وانه اشوفن وراه ....
شكرا لزيارتكم عالم روايات سكيرهوم
