رواية حين تبكي الجدران الفصل الثالث
ربيع : لأ يا معلم رجب انا شايف اللي اتعجن واتخبز كويس ، كده الدقيق ناقص تلات اشولة !!!
رجب : انا بقولك مش ناقص ، انت بتسرقني انا كمان ولا ايه ؟؟؟
ربيع : لا يا رجب ده مالك زي ماهو مالي ، لكن انا متأكد ان الدقيق ناقص .
رجب : بقولك ايه يا ربيع لو هتوصل انك تسرقني يبقي بناقص منها و نفض الشركة بينا وكل واحد يروح لحاله .
رببع : اللي تشوفه يا معلم رجب .
يتركه ويسير نحو العمال ويقف بينهم حتي يغيب رجب عن الانظار فيأتي " اشرف " احد العمال ويقول : دي مش اول مرة يا معلم ربيع ، وكويس انك جيت بدري علشان فعلا الدقيق بيتسرق كل يوم .
رببع : مين اللي بيسرقه يا اشرف ؟
اشرف : الواد جمعة والمعلم رجب .
ربيع : هما اللي بيسرقوا الدقيق ؟؟؟
اشرف : ايوه يا معلم .
يدخل رجب فيلاحظ وجود اشرف بجوار ربيع !!
يناديه غاضبا : واقف بتعمل ايه عندك ياض يا اشرف ؟؟
اشرف : بكلم المعلم ربيع .
رجب : سايب شغلك وواقف تتكلم !! عندك يومين خصم الاسبوع ده .
اشرف : المعلم رجب اللي ناداني .
رجب : امشي انجر من قدامي بدل ما اخصملك الاسبوع كله .
يمشي اشرف ساخطا يكاد يبكي !!!
ربيع : فيه ايه يا معلم رجب ؟ الواد قالك انه واقف معايا !!
رجب : ده عيل قليل الادب ، شوفت بيرد عليا ازاي !! ده يمكن يكون هو اللي بيسرق الدقيق واحنا مش واخدين بالنا !!!
ربيع : لا يا معلم رجب اشرف صانيعي كويس وامين ومش ممكن يعمل كده ، انا مرضتش اكسر كلمتك قدامه ، ياريت انت تشيل الخصم من عليه ، الواد مغلطش و عيل غلبان بيصرف علي امه واخواته البنات .
رجب : بقولك ايه يا ربيع انت واقفلي زي اللقمة في الزور كده ليه ؟؟ خلي بالك اللي انت بتعمله ده غلط ، انا كده مش عارف اشتغل .
ربيع : انت هتعلمني الصح والغلط ولا ايه يا رجب ما تحاسب علي كلامك .
رجب : لأ احنا كده بقي نفضها شركة احسن .
ربيع : خلي بالك دي تاني مرة تقول الكلمة دي !!!
رجب : من عمايلك يا ربيع .
ربيع : عمايلي انا ولا عمايلك انت ؟!! ولو فاكر انك كده بتهد.دني تبقي غلطان يا رجب ، فضها شركة لو عايز .
رجب : النهاردة اخر النهار نروح للمحامي و نفضها .
في المقهي ...
المعلم دياب : خد ياض يا فتحي تعالي .
فتحي : نعم يا معلم .
المعلم دياب : البضاعة اللي معاك خلصت ولا لسه ؟
فتحي : خلصت .
المعلم دياب : و فين فلوسها ؟؟
فتحي : هدخل اجيبها من جوه .
يدخل فتحي داخل المقهي ثم يخرج ويعطي المعلم دياب كم كبير من المال .
المعلم دياب : هات الفلوس و خد البضاعة دي تشتغل بيها النهاردة بس علي الهادي علشان العين متبقاش عليك .
فتحي : حاضر يا معلم ، انا كنت لسه عايز اقولك اني النهاردة شايف ناس غريبة في الشارع وخايف يكونوا اللي بالي بالك !!
المعلم دياب : طيب اصحي لنفسك علشان انت لو وقعت انا معرفكش !! هقول ان البضاعة دي تخصك انت وانا معرفش عنها حاجة !!
فتحي " يضحك " : يعني هتبيعني يا معلم ؟؟
المعلم دياب : وابيع اي حد ، دي فيها سجن يا حيلتها ، لو ابني نفسه اللي اتمسك هقول معرفش عنه حاجة !! يا روح ما بعدك روح .
في المساء ...
في منزل شريف
نبيلة : اتصل بأبوك يا شريف شوفه فين ؟ اول مرة يتأخر كده !!!
شريف : الغايب حجته معاه .
نبيلة : لازم تتصل ، ده كان نازل الصبح بدري وباين عليه زعلان مع رجب شريكه !! لتكون حصلت بينهم حاجة .
شريف : حاضر يا امي هتصل به .
في مكتب المحامي ...
المعلم رجب : يعني فض الشركة دي هياخد منك وقت اد ايه ؟؟
المحامي : اسبوع بالكتير علشان اجيب سماسرة يتمنوا كل حاجة في الفرن .
المعلم رجب : ايوه تمنوا كل حاجة ونشوف نصيب المعلم ربيع كام وانا ادفعه .
المعلم ربيع : وليه انت اللي تدفع ؟
المعلم رجب : علشان انا اللي هاخد الفرن .
..... يدق جرس هاتف المعلم ربيع فيرد : ايوه يا شريف ، فيه ايه ؟؟
شريف : اتأخرت ليه يا بابا امي قلقانة عليك ؟!!!
المعلم ربيع : انا في مشوار دلوقتي .
شريف : يعني انت كويس ؟؟
المعلم ربيع : ايوه ، يلا بقي علشان قاعد مع ناس .
شريف : ناس مين يا بابا ؟؟
المعلم ربيع : مش وقته لما ارجع البيت نتكلم .
يغلق المعلم ربيع مكالمته ثم يتوجه بالحديث لشريكه ....
المعلم ربيع : لأ يا معلم رجب انا مش همشي من الفرن ، انت تاخد فلوسك وتسيب لي الفرن .
المعلم رجب : لأ ، انا اللي في الفرن ليل ونهار وعارف دبة النملة فيه و الصنايعية واحد واحد مربيهم علي ايدي واعرف اشغله وانا مغمض ، انما انت اكتر من نص وقتك مش في الفرن ولا بتابع حاجة يبقي انا اولي به منك .
المعلم ربيع : يكون في علمك يا معلم رجب لو انا اللي مشيت من الفرن هفتح واحد تاني جنبك علشان تكون عارف .
المعلم رجب : وماله براحتك ، كل واحد وله رزقه .
المحامي : معاكم اسبوع اتفقوا فيه مين اللي هيشتري من التاني علي ما اتمن كل حاجة واكتب العقود .
في منزل شريف
يعود والده " ربيع " ويبدو عليه الغضب !!
نبيلة : مالك يا ربيع ؟ كنت فين وشكلك متضايق كده ليه ؟
ربيع : مفيش حاجة .
شريف : مالك يا بابا ؟ فيه ايه ؟؟
ربيع : فضيت الشركة في الفرن مع رجب .
نبيلة : ليه كده كفانا الشر ؟
ربيع : شدينا قصاد بعض في الكلام وفضينا الشركة .
نبيلة : يمكن تروقوا بكره وتتصالحوا زي كل مرة .
ربيع : لأ احنا روحنا للمحامي علشان يفض الشراكة بينا .
شريف : ده الكلام بجد بقي المرادي ؟!!
ربيع : ايوه ، انا هاخد نصيبي وافتح فرن لنفسي .
نبيلة : طيب اهدي دلوقتي يا ربيع وبكره ولاد الحلال يتدخلوا ويصالحوكم علي بعض .
ربيع : لا خلاص مفيش صلح ، ده انا عرفت النهاردة كمان انه هو والواد جمعة بيسرقوا الدقيق .
نبيلة : مش معقول !!!
ربيع " بعصبية " : يعني انا كداب يا ولية ؟؟؟
نبيلة : لأ مقصدش .
ربيع : طيب يلا امشوا من قدامي الساعادي .
يدخل شريف غرفته يبدو عليه الحزن ثم تدخل خلفه والدته ...
نبيلة : معلش يا شريف ، ابوك بس متضايق دلوقتي .
شريف : انتي فاكرة اني زعلان علشان شخط فينا ؟ لا مش هو ده اللي مزعلني .
نبيلة : انا عارفة انك زعلان علشان موضوع شروق .
شريف : ايوه يا ماما ، ده بابا وعم رجب فضوا الشراكة بينهم وهما زعلانين بالشكل ده معناه ان مستحيل يوافقوا علي جوازنا !!!
نبيلة : متستعجلش يا شريف ، اللي فيه الخير يقدمه ربنا .
في منزل شروق
يعود رجب الي المنزل ويبدو عليه التفكير بعمق !!!
شمس : مالك يا رجب راجع متأخر ليه و سرحان في ايه ؟؟
رجب : مفيش حاجة ، روحي حضري العشا .
شمس : ما تقول مالك يا راجل فيه ايه ؟
رجب : امشي من قدامي دلوقتي وحضري العشا بقولك .
شمس : طيب بالراحة .
دخل رجب غرفته واغلقها بالمفتاح من الداخل ثم يفتح خزنته الكبيرة ليظهر بها كم هائل من الاموال !!!
يخرج رجب بعض الاوراق منها ليتفحصها ثم يبدأ في عد الاموال .
في المطبخ ...
تقف شمس تجهز الطعام لزوجها وتدخل خلفها ابنتها شروق وتسألها : ابويا ماله يامه ؟؟
شمس : وانا اعرف منين يا بت ؟! انا زيي زيك اهو .
شروق : باين كده فيه حاجة كبيرة بيفكر فيها .
شمس : انا هسيبه دلوقتي علشان هو مش طايق يكلم حد و بعد العشا هعرف منه فيه ايه .
بعد العشاء....
تدخل شروق غرفتها لتجد هاتفها عليه عدة مكالمات فائتة من شريف !!!
فتقوم بالاتصال به ...
شروق : معلش يا شريف كنت بتعشا مع ماما وبابا .
شريف : عرفتي اللي حصل ؟؟
شروق : فيه ايه ؟؟
شريف : ابويا وابوكي فضوا الشركة بينهم في الفرن .
شروق : ليه ؟؟
شريف : معرفش تفاصيل ، كل اللي اعرفه انهم اتخانقوا وراحوا للمحامي علشان يفضوا الشرك بينهم .
شروق : يبقي ده سبب ان ابويا راجع متضايق .
شريف : وابويا كمان راجع متضايق وزعلان ، بس المشكلة انهم فعلا لو فضوا الشرك بينهم مستحيل هيوافقوا علي جوازنا .
شروق : واحنا مالنا ومال الشغل اللي بينهم ؟!!
شريف : انتي عب.يطة يا شوشو !! عايزاهم يناسبوا بعض ازاي بعد ما كانوا شركا واختلفوا ؟؟؟
تبكي شروق ويسمع شريف صوت بكاؤها !!!
شريف : لا لا بتعيطي ليه ؟؟ اوعي تعيطي او اشوف دموع في عيونك .
شروق : وانت عايزني اعمل ايه بعد اللي بتقوله ده !!! هو ده اللي انا كنت خايفة منه !!!
شريف : متخافيش يا حبيبتي طول ما انا موجود ، انا هعمل المستحيل علشان نتجوز و نكون لبعض .
في غرفة نوم رجب ...
ترتدي زوجته شمس ملابس نوم مثيرة وتأتي لتجلس بجانبه وتسأله في دلال : مالك بقي يا حبيبي ؟؟ راجع من بره متضايق ليه ؟؟
رجب : انا وربيع فضينا الشرك في الفرن .
شمس : و فيها ايه ؟! انت اصلا مش محتاج شريك ، انت معاك فلوس تشتري بدل الفرن عشرة .
رجب : يا وليه ربيع له معارف كتير وكان بيخلثلنا اي حاجة .
شمس : وانت فلوسك احسن من اي معارف وتخلصلك اي حاجة .
رجب : بمناسبة الفلوس بقي عايز منك فلوس علشان ادي لربيع حقه .
شمس : وفلوسك انت فين ؟؟
رجب : انا فلوسي كلها متجمدة في البيوت والمحلات .
شمس : يا راجل اطلع من دول ، ده انت علي قلبك اد كده !!!
رجب : وحياتك زي ما بقولك .
شمس : اومال الخزنة دي اللي مش بتفتحها الا وانت لوحدك وقافل عليك الباب مفيهاش فلوس ؟؟؟
رجب : وغلاوتك عندي كلها اوراق واخر فلوس كانت فيها اللي اشتريت بيها البيت اللي في اول الشارع .
شمس : ماشي يا رجب هعمل نفسي مصدقاك .
رجب : حبيبتي يا شوشو .
شمس : انا بس علشان بحبك بصدقك في اي حاجة حتي لو مش داخلة دماغي .
رجب : وانا بحبك اكتر ، قوليلي بقي هتجهزي الفلوس امتي ؟؟
شمس : قولي عايز كام وبعد يومين يكونوا جاهزين .
في اليوم التالي
يجلس دياب امام مقهاه ويجد ربيع يمر من امامه .
دياب : اتفضل يا معلم ربيع .
ربيع " بدهشة " : يزيد فضلك يا معلم دياب .
دياب : بقولك ايه يا معلم عايز اكلمك كلمتين .
ربيع : خير يا معلم .
دياب : خير طبعا ،خير كتير اوي .
