رواية الابواب الخمس الجزء الثاني الفصل الرابع والأربعون بقلم ريام الهادي
إحنه النحب وفارگينهَ
لحَد يجيّ ويُواسي بينهَ
عوفه ودمعنهَ الطّاح ما راح
أكبر غلط لو ما بچينه
هيَّ المشاعِر مو لعب والراح نِنساه
وشنسوي خاطِر ما نِحن ع العِشنه وياه؟
المُشكله المفارك حَبيبه بـ كُلشي يلگاه
مَدري شلون راح وأنتهينهَ
وعافُونه رضيّنه ما رضيّنه ..
چم واحِد يعاني فراك الأحباب؟
وعلى هذا العمُر خلص سنيّنه ..
شرهب : مواقف بسيطه تغير مصير ناس
رجوع حوراء غريب والصار بيها كدرت تستغله وبطريقه ذكيه برجوع حوراء غير مصيرين
مصيري ومصيرها
ناي : رجعت للكعده الجنت رافضتها من الاساس لان هيه خطأ وكفت على صفحه اسمع كلامهم ومتكتفه ومعاجبني الوضع جان مهدي يكول لعبد الله
مهدي : حطيتنا بموقف سخيف ماله داعي كل الصار صغرتني وصغرت نفسك وحتى خالي اني الغلط مني قبلت على هاي المهزله جان المفروض مااقبل ولا احلف يونس
عبدالله : اختك هي الوصلتنا لهيج درب لعد اني راضي بهذا الشى تعرف شنو شعوري واني اكعد كبال الجان رايد مرتي
مهدي : انت لو عندك ذره احساس وغيره مجان حطيتني وحطيت ابوك ومرتك بهذا الوضع
وداد : ماما غير رجلها ومن حقه يتأكد
مهدي : لتخبليني شيتأكد ليش انتي متعرفين بتج وتربيتها يعني صار اكثر من سنتين هيه يمك شفت شى موزين عليها تجاسرت عليك لزمت شى تكول شاك وامي تأكد كلامك ومن ردت دليل منك كلت نواجهه يونس وهاي واجهته وتسوه عمرنا من قللنا من نفسنا ومن اختي شفته المعاجبك يوم مااخته انظلمت على ايدي ماكسر بيها ولا انطه ولا حتى سألها انتي مسويه هيج شى مباشره اخذها بحضنه وحاماها مني واني اليوم بيدي كسرت بأختي
عمران : على كيفك ابني
مهدي : ياعلى كيف خالي الزم ابنك وعلمه الظاهر الشهادات الماخذها نساه الاصول واذا يونس ذبله جم كلمة وطلع فهذا كلامه ضربه اليه صحتني على هواي شغلات اسمع وهاي كدام اخوك وابوك حوراء متضل على ذمتك غلطتي وافقت من الاول وزوجتها الك
عبدالله : زوجتها بعد مافضحتك
مهدي : لك طايح الحظ تعيرني وهي عرضك
عبدالله : لتغلط مااسمحلك لتشوف ساكتلك وانت تحجي لوما ابويه كاعد جان عرفت شجاوبك
مهدي : ليش انت سويت احترام لابوك اول واحد انت قللت من قيمته وصغرته لتزعل خالي هذا الصار واذا بيوم جنت صاحب حق واكدر اوكف بوجهه يونس واواجهه بعد دكت ابنك مالي عين اشوفه
وداد : واذا عيني قابل وزير لو دكتور وتستحي منه نسيت هو منو وشنو مستواه
ناي : اخويه وتاج راسي ويسوه الدنيا بأخلاقه الي بوقت من الاوقات طعنتو بيه وصغرتوه واعتقد اليوم عرفكم شنو مستواه وشنو مستوى ابو الشهاده والحسب والنسب
وداد : انتي ليش واكفه تتسمعين وشنو قصدج بهذا الكلام كعد تسمع مرتك شتحجي امشي لج اطلعي بره بيتي وبعد لدخلين بيه
مهدي : اني صحتها وميصير اطرديها واني موجود
وداد : مسمعت كلامها شون بكل صلافه واكفه وتتجاوز على ابن خالك
ناي : اني متجاوزت انتم الي دوم متجاوزين بحق اخويه وكعدته اليوم كدامكم كلها مابيها معنى زين منه اجه وكعد جان يكدر يرفض قابل شسون اله بس مراد ينفهم رفضه ويتفسر غلط مكفاكم قبل وصلتو للموت هلمره كاعدين وتحققون وياه
وداد : على اساس اخوج خير ومعتدى علينا وفضحنا لطلعين اخوج شريف واحد تربيه شوارع وطعن بتي المفروض يذبحوه على دكته
ناي : يادكه بنيه رادها على سنه الله ورسوله غلط ماانكر بلطريقه بس انتم هم مقصرتو وياه ولتفتحين سوالف قديمه تضرج متنفعج البنيه تزوجت وصارت ام وعيب على كل واحد يحجي بهذا الموضوع
عبدالله : ماشاء الله مخلي محامي اله هنا واني اكول مهدي شبيهه طابك ويه هذا
ناي : لتكول هذا عنده اسم واسمه يونس لتحاول تقلل قيمته فأنت قبل شويه صغرت حيل كدامه وكت مشكيت بمرتك وطلبت يحلف مرتك عدها شى وياه لو لا سوايتك ميسويها لا عاقل ولا مثقف حضرت الدكتور
مهدي :اسكتي ناي بله انت متستحي تكول طابك ويه يونس التحجي بيها وصاحبت الشأن اختي وعوف يونس وطلعه من الموضوع كله اني هسه علتي حوراء والديصير بيها
عبدالله : ترجع ويايه وانسد هاي السالفه كلها اني ماخذ كم يوم اجازه مو هوايه ولازم خلال كم يوم اسافر
مهدي : سافر الله وياك قبلها اطلكها وتروح
عبدالله : مااطلك حتى اختك تروح تركض لحضنه موو
ناي : كاام مهدي لزمه من هدومه وراد يضربه لزمه خالو عمران
عمران : على كيفك ابني
مهدي : ابنك اذا تجاوز بعد بحجابه واخلي يسافر على سديه كاعد ويشمر بلحجي ومعاجبه احد اسمع لك من باجر تمشي بأجراءات الطلاك واطلك وتولي
وداد : ابني ياطلاك من كل عقلك
ناي : عاااط مهدي حييل بأمه خلسها
مهدي : انتي بلذات لتدخلين كله منج تنطين بيها لخاطر ابن اخوج نسيتي هيه بتج صوجي سمعت كلامج هذا الزواج من اساسه غلط
عبدالله : ليش غلط فوك متشكرني لان سكتت حلوك الكل عن اختك
مهدي : وخره خالو من وجهي حاسب حساب وكفتك بينا اذا تنفس راح ادمي
عبدالرحمن: والله خبصتنا سديت حلوك وسديت خشوم بابا هاي مرتك عيب بعد تحجي بسالفه القديمه على اساس انت نبي وخلصتها لازم السبحه وتسبح بكرة وعشيا شو خلصتها ونسه ونسوان وطبه وطلعه ومتونس بفلوس ابوك وتدرس وعفتها سنين يمكن حتى متتذكر اسمها
عبدالله : انت لتدخل شغله متخصك
عبدالرحمن: تخصني ونص حوراء مثل اختي وتربت ويايه واذا انت صاير سبع براسها اكسرلك راسك اشايف روحك يول لتغرك شهايدك الماخذهن لوما فلوس ابوك مجان مخلص متوسطه
عبدالله : مبقى عليه بس المطيرجي الفاشل من غيرتك لان مصرت مثلي
عبدالرحمن: طبع مااصير مثلك قابل اصير ناقص غيره واكعد احجي بمرتي واخلي الغريب والكريب يحجي بشرفها لك هيج لاقطره مستحه ولا مرجله ذبيتهن هناك واجيت
لك انت العار امام جامع مقارنه بيك طم روحك طمها
عمران : ولا واحد بيكم سوه احترام لوجودي كلكم ناقصين تربيه
عبدالرحمن: بله لتجمعني بأبنك المدلل وعوفك مني لو من حجيت اني تذكرت تعيط
اني طالع وانتم حلوها
ناي : طلع عبد ورجع وكف كبال مهدي
عبدالرحمن: اذا بيك خير طلك اختك منه هذا واحد حرامات عنده مره مثل حوراء علي شأن اختك وشوف ابن عمتك شسوه لاخته وشون خلاك تتوسل حتى ترجعلك وتذكر هاي يتيمه وانت ابوها واخوها وعوف امك وخالك ماوراهم غير مصلحتهم وشكلهم كدام الناس اشتري اختك قبل متضيع ضلعي
ناي : طلع عبد وهذا عبدالله شكد صلفح يحجي على عبدالرحمن والي خبلني ابوه ساكت
عمران : عوفك من اخوك ونرجع لموضوعنا
مهدي : ماكو موضوع نحجي بيه خالي ابنك يطلك وخلينا اهل
عمران : اني ماارضى بلطلاك مو كل مشكلة نركض على الطلاك نسيت عدهم بنيه شنو ذنبها تعيش بعيده عن ابوها تعرف كلش زين ماعدنا مره تطلك المره تتزوج ماتعوف رجلها اله بموتتها
مهدي : وحوراء ميته وياه وماابقى اتفرج على حالها وادوسها واظلمها مره ثانيه
عبدالله : مااطلك واذا تردون اطلك اخذ بتي
مهدي : شون تاخذها من امها الطفله بعدها ترضع
عبدالله : هذا العندي ياترجع ويايه وتجفي الشر يااخذ بتي وكلمن يروح لحال سبيله
مهدي :لا شو اطلك والبنيه من حقها انت الظاهر متجي بعين والاغاتي تريدها تگبر وتصير موزينه وياك
عمران : هاي عود اكول انت العاقل والجبير وراح تعقلها ترجع لبيتها ورجلها
مهدي : ابنك ماخله لا عقل ولاتفاهم مااحترم خالي محبتك بداخلي غير تعرف اعتبرك ابويه ومارديتك بيوم بس حوراء اختي وماعندي غيرها واذا حكمت اتخير بينك وبينها اختارها
وداد : لا تخبلت اكيد هذا مو اسلوبك ولا حجيك نسيت عمران منووو تلكه مرتك الحيه اكلت براسك وغيرتك هو انت عليه تغيرت وگلبتك وهسه اجه دور خالك عرفت تريدك الها وحدها حتى تمص دمك وتستفاد منك تريد تبعدك عن اهلك وعزوتك
مهدي : عوفي مرتي لخاطر الله ولا كل شويه وذابه شغله براسها واذا تغيرت عليج من حركاتج وتصرفاتج وهااج اكبر دليل حوراء بتج الوحيده ولا دايره بال الها ولوضعها وحايره شون ترجع ومتطلك
عمران : عوفي وداد حتى التعبت وياه واعتبرته اغلى من ولدي اليوم يكسر كلامي
مهدي : ماكسرت كلامك الشغله سهله يطلكها وكلمن يكعد بمكانه
عمران : واني مراضي بلطلاك عقل اختك مااريد اخسرك وخلي الگلوب طيبه بينا
مهدي : لتعب نفسك خالي حوراء مترجع اله هيه برضاتها اما سالفه ترجع غصب انسوها
عبدالله : لوما محدد بوكت ورايه سفر جان عرفت شسوي بيها واتوبها تشيل عينها بعيني مو توكف بوجهي وتريد تنفصل
مهدي : مو تايهه الك احجي عدل وصلت حدها وياك
عمران : امشي عبدالله نرجع غير وكت ونتفاهم
وداد : وين رايح ياخويه اكعد
عمران : الكعده هسه راح تتعقد متنحل واني مااريد تطور بينا وكولي لحوراء خلي تگبر عقلها وتفكر بتها واذا على عبدالله اني احجي ويااه يعدل من اسلوبه وياها اما طلاك خلي تنساه
ناي : طلع عمران وعبد ومهدي متخبل
عاط على حوراء
حوراء : جنت اسمع كلشي وخاصه من يونس موجود شعوري واني اسمع الانسان الي الكل قلل منه شون يدافعلي ويبيض وجهي بلوكت المفروض زوجي هيج يمدح بيه شعور دمرني
يوم بعد يوم اندب حظي لان ماجمعني بالانسان الي فعلاً يستاهلني وخلاني اصير زوجه لشخص حتى احترام لسمعتي ماعنده
كعدت ابجي وحاضنه بنتي واسمع كلشي لحد ماعاط مهدي طلعت واني اشهك من البجي
ناي : شفت حالها الوجهه دم صاير والعيون منتهيه من البجي اخذت الطفله منها وشلتها وهي كعدت كبال مهدي اجه مهدي وكعد بصفها
مهدي : المن هذا البجي كله
حوراء : مااريده فدوة طلكني منه تعبت حييل ومااريد ارجع اعيش وياه
مهدي : اني مراح ادخل واقنعج هاي المره التردي يصير
وداد : تريدها تطلك وتكعد كبالي والناس تاكل وجهنه
مهدي : اخليها يمي تعيش مالج دخل بيها انتي بيتج وهيه بيت اخوها واني اشيل مسؤوليتها وبتها اربيها حالها حال سيف عندج شى ثاني
وداد : ليش تكسر بختها ياامي وبتها تتربى بليه اب
حوراء : يابخت تحجين عنه اني ادمرت وياه ارحميني وكافي تنطين بيه وادوسيني سنين عمرج كلها تعامليني اني والماكو سوه لو عندج كومه بنات شجان سويتي اني هلوحده المفروض شابعه دلال وحنان منج مو اجي اشكيلج اطبكين ويه الظالمني
وداد : اذا اطلكتي انسي عندج ام
حوراء : هيه وينها متكوليلي عافتنا وطبت لغرفتها
ناي : كومي فوك يمي ارتاحي امشي
مهدي : اصعدي ويه ناي
حوراء : خليني هنا
ناي : امشي شرهب فوك تنتظرنا
حوراء : عدكم امتحانات ودوام مااريد اشغلكم
ناي : يادوام امشي الله عليج
حوراء : باجر من ترجعون اصعد يمكم
مهدي : امي اذا حجت شى لتجاوبيها واذا ضجتي تعالي فوك خلي تخلص سالفه طلاكج اخذج يمي
حوراء : حضنته وابجي فدوة لترجعني
مهدي : وروح ابويه ماارجعج لتبجين عيونج راحن
ناي : انتي ترضعين لتنزل الشوطه وتصير بتج
مهدي : امشي اصعدي انتي الثانيه تعبتي
ناي : ابتسمت وكتله تطردني من بيت امك
مهدي : اي اطردج حتى ترحين لبيتج لان بليه وجودج اظلم
ناي : عضيت شفتي استحيت وحوراء تمسح عيونها وابتسمت
حوراء : والله وكت شفت اخويه يتغزل بناي
مهدي : هااا كملتي نواح وانداريتي عليه
ناي : هااج بنتج يله حبيبي خلي نصعد
حوراء : الله يسعدكم
ناي : لزمني مهدي وطلعنا من البيت وصعدنا
مهدي : شبيج تضحكين كل هاي الهوسه وتضحكين
ناي : فرحانه بيك
مهدي : ليش
ناي : لان معفت اختك وكفت وياها
مهدي : احد كلج اني ظالم وموخوش انسان
ناي : لا حشاك حبيبي بس خفت ترجعها
مهدي : يوم مازوجتها لعبد توقعت راح ابعدها عن الاذيه وتعيش عيشه مرتاحه متوقعت هيج راح يصير ردت مصلحتها وداعت سيف
ناي : عوف كلشي وتعال ندخل ارتاح شويه بين مااسويلك العشا لتطلع اليوم حباب
مهدي : مااطلع صار ام سيوفي وغمزلي
ناي : اول مطبينا فتحت الباب طفرت شرهب كدامنا ماعبالها مهدي ويايه
شرهب : وين صرتي شصار
ناي : فزيت وهو ضحك
مهدي : احجيلها لتموت من الفضول ودخل لغرفته
شرهب : شكد عيب شراح يكول عليه
ناي : فزيت والله
شرهب : نمتي جوه وين صرتي سولفي شصار
ناي : كعدت حجيت كلشي الها
شرهب : عمتج مال واحد يلزمها ويزينها صفر ويلبسها ملابس مكطعه ويدعبلها بلشارع وشكو جاهل يفتر وراها ويشبعها حجار
ناي : اششش ليسمعج مهدي
شرهب : بالي يم يونس
ناي : هج سوده عليه من قهرته تدرين بيه من تضيك الدنيا بعينه غير امي ماعنده يشكيلها
شرهب : راح اروح باجر يمه مااريد اعوفه وهم انظف الهم واغسل ملابسهم خطيه اكيد جافو
ناي : ترحين من الدوام
شرهب : اي اخلي ابو الخط يوديني وعكب باجر ارجع
ناي : سمعت صوت مهدي العشا وينه كمت يله ساعديني خلي نسوي العشا
حوراء : اخذت بتي ودخلت لغرفتي اباوع عليها شون حلوة مااريد انحرم منها حضنتها وابوس بيها ماسه احلى شى صار بعمري بس اذا رجعت لابوها راح تفتح عليها على عائلة متفككه اب وام واحد مطايق الثاني خلي تفتح عينها على ام مطلكه بس سعيده افضل من تعيش دوم مهمومه
بليل اجتني امي ردت انام وفتحت الباب وكعدت بصفي
وداد : انتي ليش ثوله ومتعرفين مصلحتج ومصلحه بنتج
حوراء : عدلت نفسي وكعدت وكتلها وانتي ليش تردين أذيتي
وداد : اني امج شون أذيج من زوجت لابن اخويه لان من مستواج واحسن هم مال وجاهه وشهاده وبلخارج اكو افضل من هيج قسمه البنات يتمنن ربع الي عندج وانتي متبطره على قسمتج
حوراء : القسمه السوده مااريده تعرفين شنو مااطيقه ولا اطيق ساعه انام يمه
وداد : تردين تطلكين حتى ترجعين لابن العتاكين
حوراء : رحمه لابويه لا كل شويه تجيبين طاري يونس عوفي بحاله شغلته ماضي وانتهى وكدامكم كلكم كال حتى لو تطلك متصير اليه شيكول بعد
وداد : هاي كلاوات ماامشي بيها تطلكين وره سنه سنتين يجي يخطبج وعلى تصرفات اخوج الاخيره الي غيرته بت الگلب وخلت گلبه حجر عليه متأكد راح يشيل وينطيج اله غاسله دماغه الحقيره
حوراء : مااتزوج مستعده احلف على كلام الله شتردين ضمانات انطيج حتى طلعه من الباب مااطلع بس خليني اطلك واخلص منه
وداد : مااصدكج انتي مو نفسج جنتي مصادقته سنين وتلفونات وحبجيات ومندري بيج عود انتي مطالعه لباب البيت اني مااكدر لصلافتج ما أمن بيج وحده جذابه
حوراء : شون لعد احرك روحي حتى ترتاحين
وداد : ترحين لمهدي وتكولين اله ارجع لابن خالي وسافري وكافي وجعتي راسنا صار ايام ومن وراج راح تخرب علاقة اخوج بخالج
حوراء : حلم تعرفين شنو حلم ارجعله ولتضلين كل شويه مسممتني بلحجي رجعه انسسسسي
عافتني وطلعت بعد مانشفت ريگي رجعت نمت كوه غفيت اريد اخلص من الموضوع كله تعبت وحيل مضل بيه كارهه حتى نفسي
ثاني يوم تريكت وامي متحجي ويايه عفتها ضليت ملتهيه ويه ماسه وللظهر صعدت يم ناي سوالف وضحك نستني مصيبتي وابد مافتحت طاري شغلتي وهذا الشى حيل ريحني
شرهب : رجعت من الدوام لبيت يونس طبيت ماكو احد بدلت باوعت البيت مو حيل وصخ زين بس ملابس هوايه شغلت الغساله وكمت اغسل هدومهم ونظفت البيت سويته يلمع اكلت لفه على السريع اسد بيها جوعي وكلت على العشا اكل ويه الولد كملت كلشي صار العصر نزلت على ام حسن سلمت عليها وعلى بتها واتفقت وياها بليل انزل نشتغل بلحسابات صعدت لكيت الباب مفتوح شفت مرتضى يباوع يمنه ويسره مشيت خطوه على كيفي عطت حييل فز فزه واني متت ضحك وكعت على القنفه من الضحك لك ياحيف الزلم تفز من عيطه
لزمني من شعري حييل
مرتضى : متجوزين من خبالاتج
شرهب : ههههههه ااااخ عوف شعري كادر عليه عود جنت بلحشد وتقاتل وصاير رامبو علينا تالي فزيت من عيطه وينج يابان تعالي شوفي رجلج مكيفه بيه وفوكاها تموت عليه متدري بيه بنفخه يطير هد شعري وكعد بصفي
مرتضى : بربج تموت عليه صدك لو تتشاقين
شرهب : روح اسألها
مرتضى : خبلتني تخجل ومتحجي
شرهب : ااممممم تخجل خوفك من الخجول وراه بلاوي
مرتضى : شنو قصدج
شرهب : اني نظفت وتعبت وغسلت ملابس مابيه اسوي عشا تجيب عشا النا سفري واني اطلب يله اكلك
مرتضى : ارقى عشا بس احجي
شرهب : حجايه وحده مااكول غيرها
مرتك المصون تموت عليك لك انت روحها خليني ساكته مو الساني فلت هذا فتح حلكه والضحكه ترست وجهه وكام يتوسل مثل الطفل
مرتضى : الله عليج احجي هي كالت الج تحبني
شرهب : صير سبع وجر بوشها كلها ليش تضمين عليه انتي تحبيني وبعيطه هيج مال حمش هسه تبجي وتحجي كلشي
مرتضى : گلبي مينطيني ابجيها
شرهب : شويه صير حووك زلم تالي وكت انت مو وجهه نعمه بان متحبك وتموت منك يله ارتاح
مرتضى : اريد اتزوج شرهب
شرهب : اوكف خلي اطلع بان من جيبي قابل اني ضامتها عنك متروح تتزوج
مرتضى : شويه عوفي الشقه السنه مال ابوها طلعت صار ٤ اشهر واني لا تحركت ولا اجرت منتظر سالفه المشتمل وعلى هذا الحال يوكعن سنوني ويشيب شعر راسي ومااتزوجها البيت مكعد ينباع شسوي
شرهب : من وره خالتك الحبابه غير وعمك وابوك عصابه الرداء الاسود ماوراهم بس المصايب ربطو البيت ربط
مرتضى : واضل اني هيج
شرهب : شوف ماعندك غير تشوفلك شقه على كدك غرفه وهول وملحقاتها تأجرها ايجار مناسب وتأثثها وتتزوج وشوكت ماينباع قصر الملك غازي تشيل منها وتعيش بلمشتمل الي وعدتك بيه الملكة كليوباترا
مرتضى : والله خوش حل بعد مااتحمل انتظر اريد مرتي بحضني
شرهب : واني اريد العشه
مرتضى : ماكو عشه ولي
شرهب : اخزيك واعزيك واگلب الشارع عليك تروح هسه تجيب عشا صدك خابرت يونس
مرتضى : اي خابرت وعلى جيه
شرهب : يله كووم جيب كتلني الجوع
مرتضى : جوعيه مو بطن مغاره كلشي تعلس وفوكاها متسمن
شرهب : قل اعوذ برب الفلق اذا زدت كيلو يامرتضى حتى عرسك اخربه
مرتضى : شتاكلين
شرهب : اممم
مرتضى : اني اجيب لتفكرين هسه تخسريني عشى ثكيل واني رجال متضرر ورايه زواج
شرهب : تقديراً للظروف الراهنه الي انت بيها جيب فلافل بس بربك حاره وبيها بتيته وبيتنجان مشكل وكثر العمبه اريدها تسيح منها العمبه بداعت بانه
مرتضى : اذا هيج تدللين
شرهب : طلع واني كعدت انتظره دخل يونس تفاجأ من شافني
يونس : هااا اليوم يمنه
شرهب : شلونك يبعد اختك وروحها ونظر عينها
يونس : رايده شى
شرهب : والله مو خوش سمعه قابل بس وكت المصلحه اي رايده
يونس : شفتي عرفت كعدت بصفها شتردين
شرهب : اريدك زين ومرتاح
يونس : لو طالبه مال الدنيا يمكن اسهل من طلبج اني واحد الدنيا شاده عداوه كل متخلي يصفى ترجع تعكرها اكثر
شرهب : فدوة اروحلك انسى الصار ذوله دماغسزيه انت صوجك ولا اروح
يونس : ميصير مااريدها تتأذه اذا مو بحكم الحب الجان بينا تبقى بت خالي وعيب عليه مااوكف وياها واني حجيت الحق ومكذبت
شرهب : الله يعين گلبك ردت انزل واهد البيت على راسهم
يونس : رايدك وكت العوز جبار مولد
شرهب : تصنف موو
يونس : جوعان اكو اكل
شرهب : مو بلحيف قطيت ابن عمك بفلافل
يونس : خلي اسبح بين ميجي
شرهب : ارتاحيت من زرت امي
يونس : زرت اثنين دوم يهونون عليه امي والامام علي اثنينهم يسمعوني ويحسون بيه ويطبطبون على جرحي خلي اكوم اسبح هلكت من الطريق
شرهب :اموت من اشوف يونس مهموم مباشره اتكأب واتأذه على أذيته
بعد مااكلنا نزلت يم ام حسن كملت حسابات الشغل وياها والحمدلله زايد راس المال وضعنا كلش زين وراها صعدت و بقينا نسولف اني والولد بالاول على شغله حوراء وراها على مرتضى واقتراحي ومبين عجبه
ثاني يوم داومت ورجعت لبيت ناي منتظره هاي السنه تخلص حتى ارجع بعد يم يونس
وضع ناي بدا يتحسن
ناي : التزمت بعلاجات السيد واليوم عندي روحه القران ماتركته وقبل ماانام اقرا سوره الفاتحه والمعوذات وايه الكرسي كل وحده سبع مرات لحد مااغفى واحط جوه راسي صدقه لو ٥٠٠ او ١٠٠٠ دينار يوميه ومن اكعد الصبح واروح اداوم انطيها بطريقي
صار ايام على موضوع حوري والكل ساكت حتى امها كاعد احظر نفسي حتى نروح للكوفه كعدت شرهب اليوم ماعدنا دوام حتى تقفل ورانه الباب وتخلي بالها من سيف
دير بالج عليه وحوري راح تصعد يمج الظهر هيه كالت
شرهب : افتهمت والله هاي عاشر مره تعيدين نفس الجمله روحي اريد ارجع انام
ناي : يله بسته ونزلت لكيت مهدي ينتظرني وتوكلنا من ساعه ٨ الصبح للكوفه
حوراء : كعدت تريكت ورضعت بتي ورجعت نامت ردت اخذها واصعد
وداد : المن ساحلتها من فراشها عوفيها مرتاحه
حوراء : فوك انومها لان صاعده يم شرهب
وداد : خوش والله هلمره شرهب علينا اكيد اخوج اخذ مرته وراح يفتر بيها وعايفني مريضة ومدايرلي بال
حوراء : هااا بدينا
وداد : عوفي ماسه نايمه واذا كعدت ادكلج مسكول وانزلي اخذيها
حوراء : باوعت نايمه بعمق خطيه اطلعها بهذا الحر بستها وعفتها واخذت تلفوني ولبست عبايه اسلاميه فوك التراك مالتي وصعدت على شرهب
شرهب : هااا خيه تأخرتي
حوراء : بين ماتريكت ورضعت ماسه سيوفي وينه
شرهب : نايم عوفي فدوة ليكعد ويگلب البيت علينا
حوراء : ليش ناي متسوي طفل ثاني كبر ابنها
وراح تصير الحباله كلش صعب عليها
شرهب : هيه صحت حتى تحبل شويه هاي الفتره كدرت توكف على حيلها
حوراء : شونه مهدي وياها
شرهب : كدامي ماينجرع طابوكه وكاعد على الگلب الضحكه بفلوس تطلع منه
حوراء : ههههههه ولج اخويه لتحجين عليه
شرهب : قابل جذب
حوراء : زين هاي كدامج وراج
شرهب : علمي علمج بس اشوف اختي شاكه حلكها اطب وتطلع تضحك وياه يعني الامور طيبه
حوراء : الله يجعلهم
شرهب : كومي لتسوين نفسج خطار امشي نحظر الغدا
بدينا نشتغل والتهينا بلسوالف لحد مصارت ساعه٢ الظهر
حوراء : اكلج هاي امي مادكت عليه حتى اروح على ماسه خلي انزل اشوفها
شرهب : لتتأخرين حتى اصب
حوراء : نزلت وطبيت للبيت شفت امي تتغدا
ماسه كعدت
وداد : اجه ابوها اخذها
حوراء : وكع التلفون من ايدي ياابوها
وداد : هاااي شبيج ابوها نسيتي
حوراء : ومنو كلج تنطيها اله
وداد : قابل امنعه منها كال اخذها وباجر ارجعها
حوراء : كمت ارجف دنكت شلت الموبايل ودكيت على عبد مغلق
هذا تلفونه مغلق اذا مارجع بتي هسه احرك الدنيا عليهم
وداد : خبال الخبلج شبيج تعيطين قابل غريب هو ابوها ومشتاق الها وانتي مترضين يشوفها
حوراء : شوكت مارضيت هو اجه عليها وطردته من يوم الكعده لهذا اليوم مااجه ولا شفت طوله شلج بهذا العذر
وداد : انتي وياه اني شكوو خابري وخلي يرجعها
حوراء : كمت اروح واجي تهسترت اعصابي رجعت دكيت على خالي ميشيله على امه هم متشيله
هنا خلص صبري وكمت ابجي المن اخابر تذكرت عبدالرحمن خابرته
عبدالرحمن: هلو حور
حوراء : فدوة عبد روح لبيت اهلك جيبلي ماسه
عبدالرحمن: شوداها لبيت اهلي
حوراء : هذا اخوك ماخذها واني ماادري ومهدي مو هنا جان جبته واجيت رايح للكوفه
عبدالرحمن: على كيفج متوجهه للبيت اجيبها واجي
حوراء : اي عفيه بقيت انتظر جيته واعض بأصابيعي شون عفتها وحدها انداريت على امي شون تنطي بدون متخابريني وتكوليلي
وداد : خوش والله هلمره تريد استأذن منج اكلها ابوها دك الباب سأل عليج كتله فوك اصيحها كال لا ميحتاج اخذ ماسه باجر ارجعها واخذ جم غرض الها وطلع
حوراء :گلبي ممرتاح حاسه امي تكذب انتظر دقيقه دقيقه هلمره اتصل على عبد ينطيني رفض وفوك الساعه يله دك
هااا بشر ليش متجاوب گلبي فحم من الخوف
عبدالرحمن: هذا اخويه الگلب اخذ ماسه وسافر بيها
حوراء : شنو سافر اكله مصار مده بسيطه من اخذها
عبدالرحمن: مبين الجماعه طابخيها وامج وياهم لان ماخذها منا وطالع گبل للمطار وماادري طارت طيارته لو بعدها
حوراء : كمت الطم على وجهي راحت بتي من ايدي راحت
وداد : شنو راحت شبيج على كيفج
حوراء : وخرررري مني كله من وراج اريد بتي اذا مرجعها العب بيكم طوبه انتي متخافين الله حرامات انتي امي مثل ماانطيتيها اله ترجعيها واله اخلي مهدي العمر كله ميباوع بوجهج
وداد : امشي حقيره لسانج طولان وتهددين شكو تذبيها براسي اني مالي دخل
حوراء : طلعت اركض مثل المخبله وابجي واخابر عبدالرحمن تعالي فدوة
عبدالرحمن: هو اني اصلاً جايج
ضليت واكفه بلباب وابجي
شرهب : تأخرت حوراء وسمعت عياط نزلت وشفتها واكفه بلباب وتضرب على صدرها وضعها يخوف ركضت شبيج
حوراء : اخذو بتي مني شرهب الحقير سافر واخذها حتى يحرك گلبي
شرهب : ويصير ياخذها هيج بدون علمج
حوراء : كلشي يصير لان هو ولي امرها
شرهب : شون اخذها انتي مو كلتي نايمه
حوراء : من وره امي شكووول ربي الك المشتكى هااي مو ام شايفه هيج وحده ترتاح اتأذي بتها كسرت راسي ونزلته
شرهب : الله لايوفقها شنو من وحده حتى بتها مسلمت من اذيتها
طبك عبد وحوراء ركضت عليه
حوراء : اخذني لبيتكم بلكت جذب ممسافر
عبدالرحمن: امشي يله
اخذها وراحو حيل انقهرت عليها شون لزموها من ايدها التوجعها دوم هيج الزلم اذا يريد يلوي ايد مره من جهالها ولا ذره رحمه بگلبهم حسبي الله عليج ياوداد انتي وكلمن وياج خليت وصعدت وبالي كله يمها
ناي : وصلنا للكوفه بعد وكت طويل باوعت لافته مكتوبه حداد اني شفتها اختل توازني
مهدي : هذا مو اسم السيد
ناي : كمت امتمت من الصدمه ماااات
مهدي : لا اله الا الله صار اكثر من ١٠ ايام واكول اخابر عليه مغلق خلي ندك الباب وناخذ من خاطرهم
ناي : بلحظتها حسيت ضعت ورجعت لنقطه الصفر مجرد وجوده وكلامه جنت احس اني بامان وهسه انشمرت بقعه سوده بلا ملامح
طلع ابنه اخذنه من خاطره ودخلني على العلويه وراح مهدي وياه اني شفتها متحملت حضنتها وكمت ابجي بصووت عالي
مات وصه بيج يشهد الله مارحتي من باله
ناي : ليش مخابرتيني اقلها اجي اشوفه
العلويه : اخر شى يصلي وهو كاعد كال راح اصلي ركعتين لوجهه الله واني رحت اكمل شغلي اجيت لكيته ميت حرك گلبنا بموته عاش فقير وطيب وماله حس ومات ماله حس وبين ايد الله
ناي : جنت ابجي من كل گلبي مو لان بس جان يعالجني لان جنت اشوفه الاب الي اتمناه بكلامه وايمانه واخلاقه وحسن معاملته متحملت خبر وفاته والالم نزل بمعدتي واخذتني العلويه للحمام اتقيأ حيل اتأذيت بوقتها تالي بنته ومرته حارو بيه لحد مرتاحيت مهدي جان يم ولده
العلويه : عافلج هاي السبحه كال كل متسبح بيها تقرالي الفاتحه هاي يتيمه ومن تذكرني الله يخفف عني سيئاتي اخر يوم ذكرج وذكر عائله هو متكفلها هم يتامه يمشي ويوصي بيكم تقروله الفاتحه
ناي : ابقى لاخر يوم بعمري اقراله دنكت ودموعي تنزل على ايدي اريد اسكت مكعد اكدر
العلويه : لتركين الي وصاج عليه واستمري وشتحتاجين اني موجوده صحيح اني مو مثله بس اعتبريني امج وان شاء الله صحتج ترجع مثل الاول
ناي : اخذت السبحه من ايدها جانت ريحتها تخبل مثل المسك اول مالزمتها قريت الفاتحه اله اصعب مره دخلت بيها لهذا البيت وراعيه ونوره ماموجود بيه
التقيت بيه مرات معدودات بس ترك بيه اثر لهذا اليوم واني اقراله الفاتحه وحتى ثواب بأسمه اطلع صار حاله حال امي الثواب واجب يطلع بأسمه وجهه وصوته وصاياه ماانساهم لنهايه عمري الف رحمه على روحك يااطيب سيد عرفته بحياتي وينور قبرك بحق جدك الرسول
رجعنا والطريق كله مخنوكه اول مره ارجع من الكوفه مألومه مامرتاحه ارجع وگلبي يبجي دم على السيد
مهدي : انقهرت حيل الله يرحمه
ناي : راح اتيهه بعده
مهدي : كولي ياالله ميصير هيج تحجين انتي الْحٍمَدٍ للـّہ شبهه طبتي وبأيامه الاخيره شكد كام يكولج شعلمتج عليه استمري واني مجرد سبب والله وكلامه همه علاجج ميصير هيج تنسين وتجلبين بفكرة راح ترجعين مثل الاول
ناي : مالي حيل احجي عفيه
مهدي : ارتاحي حاولي تغمضين ورانه طريق طويل
ناي : غمضت والدمعه وكعت على خدي حاولت استرخي اكثر من مره بس احساس القهر مسيطر عليه
وصلنا قريب بغداد دك تلفون مهدي
ناي : منو
مهدي : هاااي حوراء
الووو
حوراء : اخذو بتي مهدي
مهدي : على كيفج خلي افتهم
حوراء : عبدالله اخذها وسافر
مهدي : صدك تحجين شون اخذها وشون انتي تنطيها اله من الاساس
حوراء : كله من امك كله من وراها
مهدي : انتي وين
حوراء : رحت لبيت خالو وكلها تبرت وكالو مالنه دخل ومنعرف كلهم جذابين واني هسه ويه عبد راجعه لبيتك مااريد اشوف امك اريد بتي مهدي بداعت سيف رجعلي بتي
مهدي : جاي بلطريق
ناي : شون اخذها يمه الله يساعدها هاي متقصد حتى غصب عنها ترجع
مهدي : المنحط خلي اشوفه اله ازوعه دم
ناي : وين تشوفه اذا تكول حوراء سافر وامك شون كدرت هيج تأذي بتها
مهدي : راح اوصلج للبيت واروح لبيت خالي افتهم
ناي : اجي وياك مااروح للبيت
مهدي : انتي تعبانه
ناي : مابيه شى شغله حوراء خلت مهدي يشب نار حرك الشارع من السرعه كلت راح نندعم واخاف اكله على كيفك ليعيط
وصلنا لبيت خاله ونزلنا ومهدي نزل يعيط
وينه ابنك
عمران : جاي تتعارك
مهدي : اذا لزمت ابنك اجنزه تجنز ماابقى عظمه صاحيه بيه خلي يرجع ماسه احسله
عمران : اني كلت لاختك مااعرف بيه من سافر كال راح اشوف ماسه وارجع
مهدي : تدري بسوايه ابنك شصار
عمران : خلي يوصل واني اخابره يرجعها
مهدي : شوف خالي اذا ابنك مرجع الصغيره اعتبر ابن اختك مات وكل خيط وياكم ماعندي وحتى الدم البينا اعتبره صار مي وابنك لو بعد سنين شكد عندي عمر بس الزمه اكسره الك اذا يحترمك والك قدر عنده مثل ماكل هاي السنين تكول خلي يرجعها واله اعتبرك واعتبر امي انتم السبب بكلشي وحرگت گلب حوراء ماافوتها الكم
عمران : لتنسى نفسك وتعلي صوتك بوجهي
مهدي : احسن متحاسبني روح حاسب ابنك الضربك عرض الحايط وماسوالك اعتبار وكسر الاتفاق وسافر كلمتك الي انداست رجع هيبتها مو كدرتك عليه رجعو ماسه افضل الكم والنا
يله نااي
ناي : طلعت اركض وراه صعدنا بلسياره شراح تسوي
مهدي : المصيبه مااكدر اسافر اله لو بلد قريب هسه احجز واروح
ناي : بكل الاحوال حتى لو بلد قريب متكدر تجيبها لتنسى هو ولي امرها للطفله واي واحد ميكدر يسفرها اله بموافقته لعبو صح عليك وعلى حوراء والله يعين گلبها
وصلنا للبيت ودخل يعيط ويكسر بيت امه وامه تريد بس تهدي وتحلف هيه متدري راح يسافر بيها گلب البيت على راسها شفت مهدي بحاله تشبهه نفس الحاله يوم متهجم عليه بسالفه مهند بس الفرق هاي امه ميكدر يضربها بس بنفس الوقت كسر البيت ولعب جوله بيها خلاها تتخربط وهلمره حتى ماوكف وشافها شبيهه عافها وطلع واني طلعت وراه اخاف حتى اطلع نفس
طبينا لبيتنا لكينا حوراء كاعده بلكاع وشرهب تفرك بصدرها لان مخنوكه وهدومها كلها مي اني اكثر وحده حاسه بيها مريت بهذا الموقف يوم مااخذو ابني الاول مني هلمره حرت انقهر عليها لو على السيد اليوم من بدايته اسود مصخم
حوراء : بحركة عبدالله خلاني تراب سمجه متزوهره ومااعرف المن اشكي او انطي وجهي الكل يحاول يهديني ويطيب خاطري بس ياخاطر يطيب واني بنتي بعيده عني هلمره صدري يدر حليب يعني جوعانه وكت رضعتها كمت اشيل نفسي واركعها بلكاع اريدها جيبولي بنتي يمممه مااااسه
ناي : وكعت وتمرضت والصخونه سيطرت عليها صار اربع ايام اي خبر من عبدالله ماكو ومهدي يروح يتعارك ويرجع ميفيد الكلام حتى عبدالرحمن مسكت وماكو فايده كمنا انداوم بين يوم ويوم حتى انداريها منكدر نعوفها يوم اني ويوم شرهب اما وداد حاولت تحجي ويه مهدي حتى بس تقنعه هي مالها ذنب قفل عليها فد قفله وبوجهه ميباوع حتى منعها تجي تشوف حوراء
شرهب : كاعده يم راسها والعب بشعرها شحجي قابل اكول الها لتبجين على بتج قابل هينه
دك تلفونها رقم دولي
كعدتها حوري
حوراء : فتحت عيني الصارت تنفتح بلكوه من الصخونه والورم مال البجي
شرهب : هذا رقم دولي يمكن عبدالله
حوراء : طفرت وسحبت التلفون
الووو
عبدالله : شونج
حوراء : كمت اصرخ رجعلي بتي
عبدالله : وهيه هم بتي واذا ترديها ترجعين لهنا
حوراء : اترجاك رجعها اليه وروح عيش حياتك مااكدر بعد اعيش وياك عبد والله اخليك تشوفها ومايوم اقسيها عليك بس رجعها اليه
عبدالله : وين لسانج وصوتج العالي اني تقشمرين عليه ومن توصلين لبغداد اطلبين الطلاك
حوراء : شتريد مني
عبدالله : ترجعين لهنا وانتي الممنونه بتج هذا مكانها وانتي يمها وتنسين اهلج والعراق كله اما ماسه لو حريتج مني
سده بوجهي
شرهب : شگد سافل
حوراء : راح اسافر اله
شرهب : تخبلتي حتى يسويج دوشك مال كتل ومذله هناك
حوراء : شفتي شون يحجي ويايه
شرهب : عندي حل بس كون تصيرين سباعيه وتتحملين
حوراء : شنو
شرهب : كوليله اريد حريتي وبنتك الك وكلها وره العده اتزوج يونس واخلف منه مكان البنيه اثنين واعيش حياتي واذا على بتي هيه وياك ماعليها شى ويه ابوها مو غريب تكبر ومردها ومرجعها اليه
حوراء : حتى يتخبل
شرهب : هو هذا المطلوب يتخبل لازم تتحملين بعاد بنتج حتى يتنازل هذا واحد شايف نفسه اذا متكسرين خشمه راح يبقى يأذيج رجعوج اله وبشروطه راح يصير مذله الج العمر كله
حوراء : وشكد اتحمل
شرهب : لازم تتحملين اسألج سؤال انتي تردين بتج مثل مكال لو حريتج
حوراء : طبعاً بتي مستعده اتحمل كلشي لعيونها
شرهب : ومستعده تسافرين وترجعين اله
حوراء : اي بس تنام بحضني ماسه وطبه مرض هو اعتبر روحي ارمله او مطلقه وانطي الاذن الطرشه
شرهب : كلش زين ماطول لخاطر بتج ترجعين ارجعي بس على الاقل وانتي بمركز قوه مو مدمغه بيده اخذي حقج بالاول منه والبعدها ربج يحلها
حوراء : اني صار ايام بعيده اني وحتى بأحلامي تجي شون اكدر ابقى بدونها اكثر
شرهب : لازم تتحملين ويبقى رجال مستحيل يتحمل يربي طفله وحده راح يزهك شهر شهرين او اكثر وراها يحاول يتحارش بيج او يخليج تشتاقين الها حتى ترجعين خلي الشروط الي تحبيها
حوراء : كلشي مااريد منه غير بتي وميمد ايده عليه وماله دخل بيه ابد
شرهب : وهذا الشى مراح يصير اله تربيله گلب وهم لازم امج وخالج يحسون كل السوه مجاب نتيجه وراح تطلكين حتى هم يضغطون عليه من جهه ثانيه لتخليهم يحسون انتصرو عليج
حوراء : خليني افكر
شرهب : الله يقويج
حوراء : كل يوم يمر اشتاق لبنتي اكثر واحاول اقوي نفسي وتالي الليل احضن ملابسها وانام
ورجع خابرني عبدالله وكتله مااريدها خليها يمك وطلكني تبقى بتك وانت راح تربيها احسن مني بقى يغلط ويعيط سديته بوجهه حجيت بس لناي وكتلها لتكولين لمهدي اخاف يحجي شى كدامهم اريد الكل يقتنع اني اريد اطلك مااريد ارجع ومتنازله عن بنتي
اني عايشه بحرب ياافوز بيها يااخسر كلشي
شرهب : طبيت اهلهل كللللووووووش
لا تكولون وحيد كل احنه اخوته
زفيناه بصاية حيدر
مرتضى : الجيران كلها راح تطلع عليج
يونس : مو كتلك لتجيبها ويانه
شرهب : لعد منو يهوس اله والله خوش شقه بلعافيه عليك شوكت تفرشها
مرتضى : راح اجيب عمتي وبان وبيبي وبلال باجر واطلع اني وبان نشتري شغلات بسيطه ونهايه الشهر العرس بينا
شرهب : شتريد هديه مني
مرتضى : يكف لسانج عني
شرهب : هديه صعبه بصراحه
يونس : هديتي اني وشرهب غرفه النوم
مرتضى :لا بربك شنو غرفه النوم مااقبل هوايه اني اشتريها ومنيلج فلوس
شرهب : مو بعينك خير من الله عندي وعود شوفوني مااخذ هدايه شوف عيونك شون تلمع بطل هاي سوالفك العتيكه
مرتضى : هواي بابا
شرهب : اني ردت اجيبها على ذوقي بينجاني على مشمشي
مرتضى : غير لون حقير
شرهب : بس كلت اخاف مرتك تضيع بلون ومتلكاها
مرتضى : مرتي احلى منج
شرهب : اقنع نفسك هو اكو احلى مني
يونس : اطلع انت وبان وهاي فلوس الغرفه اشتروها على ذوقكم اذا مكفت بلغني حتى انزيدها
مرتضى : والله مااعرف شون اشكركم انتم ماعدكم
شرهب : هو جوحي وساهره خلفو واحنه ابتلينا
مرتضى : هااج مااريد بعدنا بسم الله
شرهب : هااي شبيج بهزر معاك مهنى وشايف كل الخير والبردات والدوشك راح يوصلون وره الغرفه حتى تكمل وهااا ناي كالت الثلاجه عليه وعمه خوله الطباخ والغساله يبقى عندك الكاونتر اشتري صغير وفد تخم قنفات بسيط وتعرس
مرتضى : وكفتكم ماانساها العمر كله
يونس : انت بس بيض وجوهنا واتزوج واستقر
مرتضى : الْحٍمَدٍ للـّہ من جعلكم اخوتي وسندي
شرهب : كللووووش لدبجلك دبج معدان ووصل الطين لجتافي
مرتضى : لا قبضنا
دخلت بدوامه جبيره احارب نفسي وامومتي واني اسمع صوت بنتي وبجيها عذبني عذاب للكافر متتمناه لعب بأعصابي وخلاني يوم بعد يوم اكرهه من جنت ابقى وحدي افكر شون ارد للكل أذيتهم اليه مو بس عبدالله اذاني لا حتى خالي مارحم حالي ودموعي وماوكف ويايه وطبك ويه ابنه عليه ولا امي هزها دماري الكل اتفقو يشمروني على عبد وهو يحير شون يتفنن بقهري مقبل يطلك وكال ابقيج معلكه وجان جوابي كلها جم سنه واقدم تفريق لان هاجرني واطلك غيابي عنك خليته يكمز بلزايد خاف مني لا ارجع ليونس هذا الشى خلاه ميركز اضافه طفله صغيره ميكدر على مداراتها وحده ويخاف عليها من الخدامات اعرف بيه عنده وهواس بلنظافه والترتيب واي وحده مراح يعجبه تعتني بماسه ويبقى حاير بيها وحده
كام يدزلي مقاطع صوت شون تبجي لو شون تناغي ومرات صورها كل ميوصلي شى منه احقد عليه اكثر واتمرض على شوفتها حتى صدري كطع الحليب من الشوطه والاذيه وكل مااضعف شرهب تقويني هاي البنيه عجيبه شكد قويه وذكيه ومجنونه ومرات تضحكني حتى بس ماابجي واتخربط
واحلى شى من تكول البيت بيه بس عاهات واني الممرضه مالتجن شوكت اطيبن واستقال موتني
اللوعه الي شفتها بسببها قررت يوم مااسافر اخليهم ممرتاحين اخليهم يتأذون اضربهم بأكثر مكان يتأذون بيه مو بيدي حقدت عليهم ومكان مجانو اهلي صارو اعدائي
عدا مهدي جنت اشوفه شون متأذي عليه ومابيده شى تعارك عيط قاطعهم كلشي سوه وماغير شى لتخاف يبن امي وابويه دواهم عندي
بان : لابسه البدله البيضه منتظره حبيب العمر طلعت من الصالون ورجعت للبيت وبيبي وامي وبلال وشرهب وناي وحوراء وام حسن موجودين ماعدنا معازيم هوايه راح اطلع من بيت يونس لان من كربلا بعيد واتعب رغم العرس بسيط كلش ومابيه معازيم بس فرحتي ماتوسعها الكره الارضيه اليوم انزف لاكثر انسان احلم بيه ممصدكه كلها ساعه واصير بيته وبين احضانه
شرهب تهلهل وتصفك وتركص ويه بلال تحاول تسويلي جوو متدري اني هسة قلباً وقالباً لمرتضى وماافكر غير شون راح انجمع بيه بغرفه وحدنا وشون راح اتحمل دكات گلبي واني بحضنه
سمعت صوت هورنات كال يونس وجم صديق عنده راح يجون يزفوه
متوقعت يجيب مزيقه ودكت صوت المزيقه ودك گلبي وياها ودخل فارس احلامي وحب عمري بقاطه الاسود وجواه لابس قميص ابيض طالع يخبل لا ارادياً رفعت راسي رغم البركع نازل على عيني ولمحته
رفعه وابتسم وباسني من راسي
حوراء : شرهب توسلت بيه احظر العرس حتى اغير جو وخافو لا ابقى وحدي ويصير شى بدلت شون مجان ورحت وياهم كتلها مااريد اشوف يونس كالت اكدت عليه ميصعد ومراح تشوفي
ومهدي بلبدايه جان رافض وناي كالت اله الى متى تتهرب منه غير ابن عمتها والصار قبل انتهى اكسر هذا الحاجز وحتى لتصير حساسيه وحجي يونس راح يبقى بره وميدخل نفض العرس ونرجع
وكوه اقتنع واكد عليه سلام مااسلم عليه وماانسى نفسي اني على ذمه رجال واني كذلك احترمت روحي مردت اسوي شى بلحرام لهذا حاولت ابعد يونس عن فكري وافرح لبان الجانت عيونها فاضحتها من الفرحه
دخل العريس واصدقائه حتى يزفوه واحنا وكفنا على صفحه واصفك وفرحانه الها شون اصدقائه شالو العريس ويهوسون
يونس : مردت ادخل لان عرفت بيها جوه بس اصدقاء مرتضى مقبلو اله يزفوه ودخلو للبيت وزحمه ماادخل وياهم وهم أكد على البنات يوكفون على صفحه وبدون شعور عيوني دورت عليها صار سنتين مشايفها وجان تصير عيني بعينها
بعد اشهر
حوراء : سيطرت على روحي ونفسي وضميت امومتي بگلبي وتحملت المر في سبيل اجازي كلمن أذاني وعيشني هذا الجحيم
واليوم كدرت اگلب المعادله عليهم ومكان مجنت اضعف وحده بلموقف كله صرت اقواهم
واكف خالو وزوجته وامي ومهدي صاحوني نزلت مسيطره
جدال .. نقاش .. تجاوز .. كلام جارح .. صياح بعلو الصوت وكلمن يحجي شكل
والكلمة الجنت انتظرها انكالت
عمران : شنو طلباتج وترجعين وتفضين هاي المهزله كلها
حوراء : بگلبي گلت اضربك واضرب امي لان لو ما انتم مجان تزوجت عبدالله ولوما انتم مجان اتجرأ ياخذ بنتي ويحرمني منها ويلوي ايدي وينومني ابجي عليها واكعد مخروعه صوتها بأذني واشم ريحتها بلملابس الضلت عندي وابوس ليل نهار بلصور المخزونه بموبايلي
كلت بصوت هادئ تخطبون شرهب لعبد الرحمن
