 |
رواية الابواب الخمس الجزء الثاني الفصل السابع والأربعون بقلم ريام الهادي
بعدهن حارات اجروحي اجروح
!لچن عندي صلابه وروحي جسرة
!اروف جروحي بيدي وماگلت اخ
!والگه الخيط بس تضيع الابره
!يلاگوني يباس ارواحهم بور
!بس انه الوحيد الروحي خضرة
الخضار البيه يجبر خاطر الگاع
افرفح غيظ من طيح شجرة
عل جفى المحابس جانت اتغار
بيدي وضيعتهن شذرة شذرة
مهدي : باجر اوديج لان شفتج تعبتي
ناي :كون يارب الفرحه فرحتين ونخطب باجر ليونس ونخلص
مهدي : هذا هو قررتو
ناي : ممصدكه واخيراً يونس قبل يخطب
حوراء : حسيت رجلي وكفت والدم بعد ميجري بجسمي الصدر ضاك عليه والهوا اختفه المفروض مااحس هيج بحكم لان متزوجه بس اكو امور مو بيد الواحد
ضليت اريد استوعب السمعته لا ارادياً نزل دمع حرك خدي دمع بيه لوعه گلبي والظلم الي تعرضت اله مجرد فكرة يونس يرتبط بغير انسانه ويحبها وادري اي وحده راح يرتبط بيها راح تنسعد ويااه خلتني اكره نفسي واكره كل اهلي الظلموني
دخلت للغرفه احاول اهدي نفسي مااريد ناي تشوفني اكيد راح تعرف شبيهه
حوري وينج حوووري
حوراء : هنا بلغرفه كمت امسح بعيوني بس كل ماامسح تنزل دموع اكثر الشهكه نزلت بصدري
ناي : اصيح عليج شكعد تسوين
حوراء : دنكت سويت نفسي ارتب الملابس كعد ارتب الجنط
ناي : شو باعيلي مبين من صوتها باجيه ارفع راسج يمعوده
حوراء : رفعت راسي
ناي : شبيج منو وياج
حوراء : ماكو احد ابجي لان راح اسافر
ناي : تضمين عليه
حوراء : عفيه عوفيني وحدي
ناي : غير افهم شبيج
حوراء : مابيه
ناي : حتى ما سألتي عن شرهب وشصار
حوراء : الله يسعدها تستاهل كل خير ويسعد يونس بنت الحلال الي تريحه
ناي : كعدت بصفها سمعتينا مو
حوراء : واذا سمعت قابل راح يتغير شى ومو من حقي حتى ازعل اصلاً عيب عليه تنزل دموعي بس وداعت بنتي مو بيدي حاول اسيطر على نفسي مكدرت
ناي : حضنتها سوده عليه شكد متأذيه جان حييل تحضني وتناشغ بلبجي
مااكدر اكول الها من حقه يعيش لان بعد مترهم بينكم عفتها تفرغ الي بگلبها عسى من تسافر تعيش بوضع افضل من الوضع الراح
قبل ١٠ ايام
شرهب : كمت اعيط على ناي مااريد اتزوج وناي تضحك بوجهي شبيج فطيره كعد اكول نكته
ناي : والله جذابه تردي
شرهب : ودكتهم بيه نسيتيها
ناي : شوو كومي جريتها من دشداشتها كوووومي
شرهب : راح اوكع على كيفج كمت من الفراش وحافيه جرتني
ناي : مدي راسج وشوفي حاله
شرهب : مديت راسي بدون ميلمحني هااي شنو شبيهه مشدد
ناي : كل هذا من وراج وياريت مقدره
شرهب : ويه منو متعارك
ناي : ويه ابوه هيج واحد تحطي على راسج مو تتنعوصين ومااريده
شرهب : رجعت للغرفه حايره شوو تعالي فهميني وكعدت ناي تسولف كلشي الصار
ناي : شفتي شون يحبج لتأذي كافي خسر اهله لعيونج والله هيج حب مشايفه مو دوم تكولين اريد واحد مثل المسلسلات التركيه يحبني ويشبع كتل هااج اجاج وبلنسخه العراقيه
شرهب : لو كاسرين ايده ورجله وطلقه بطنه ويدخل مستشفى جان شويه صار اكشن واحلى واروحله للمستشفى والزم ايده واتوسل يعيش وانزلي جم دمعه وامسح خشمي من القهر وتالي يكوول مااعوفج حبيبتي عايش لعيونج ياااايمه المنظر فانتاستك
ناي : كفختها على راسها الرجال مفشوخ وانتي تردين طلقه مخبله
شرهب : كلت لووو لووو يعني الواحد حرام يحلم
ناي : عابت هيج حلم فضينا انخطبي وخلي نفرح سمعت صوت مهدي طلعت اركض
مهدي : ابقي هنا بليل اجي اخذج
ناي : ماشي حبيبي طلعو وصلهم يونس للباب وطب
هااا حبيبي شگلت
يونس : منو منكم مخابر عمتي ومبلغها
عمشه : شنهي تحاسبنا
يونس : يعني انتي بيبي
عمشه : چاغير عمتك ولزوم تعرف شنهي خراعه خضره وماتگللها
يونس : عمه تكول انطيها
بديعه : والله اني نفس رأيها وبعد شكالت
يونس : گالت
خوله : ياابني اقبل افضل لحياتها البنيه مطلگه وهذا الشى يأثر عليها وكبرت لشوكت تخليها يمك واذا مقبلت عليه المن تزوجها وشمدرينا شنو الناس حظها الاول وعرفناه اخاف تنعاد الكره وتوكع بواحد اتعس من عدي
يونس : اني مردت غير ابوه يجي حتى متتعاير
خوله : هي هيج هيج تتعاير ماطول امها جليله اقلها الولد شاريها وذابح روحه عليها هيج واحد راح يقدرها الي يتقدم بعدين ويسأل ويستفسر اكيد مراح يتقبلها بسهوله واذا تقبل هم راح يعايرها باول عركه بينهم
توكل بالله وانطيها وخلي يصير عدها عائله وبيت وجهال لتكسر بختها حبيبي واذا على ابوه يبقى ابنهم ويجي يوم يرضون عليه
كافي عبد واجهه الدنيا وابوه واجه يتوسل حتى تقبل هاي شكبرها خلي البنيه تفوت بفالها لتروح تاليها تصير مثلي بليه رجال وجهال وتعيش وحدها
يونس : واني مو ابنج
خوله : انت روحي ولو عندي ابن مستحيل يصير بغلاوتك اسمع كلامي وتوكل بالله وانت هم حظر نفسك
يونس : خير
خوله : شفتلك مره
يونس : هههههه وين يمج
خوله : لتضحك مكعد اتشاقه بدعه وام حسن شافولك ذيج البنيه الترد روحك وتشيل تعبك وتزيل قهرك بس تشوفها راح تحبها
يونس : خلي اكمل سالفه شرهب والله كريم الولد بره نتخابر بعدين
خوله : لتنهزم يونس وره خطوبه اختك تروح تشوفها وبله وجع گلب
يونس : الله كريم
بديعه : حجي عمتك عين العقل شرهب تعاااي
يونس : خلي اني ادخل عليها
شرهب : سمعت صوتهم مطلعت طب يويو عليه
يونس : هااا عروستنا
شرهب : منو كال عروسه
يونس : اني مااجبرج على شى وبكلشي انتي حره ولو عليه ولا ازوجج والله واخليج يمي بس مااريد اظلمج وعبد يستاهلج لان شاريج انتي اذا رفضتي حرف مااحجي ولا اعلق واذا قبلتي انطيني خبر حتى احدد موعد وياهم للمشيه شى خلي بالج الرجال الي يصير كد كلمته ويوكف بوجهه الكل وياخذ حبيبته هذا نامي وانتي مأمنه على حياتج وياه لان هو اكثر واحد يعرف ويقدر شكد تعب يله حصل الي يحبها وقبل ليأذيها راح يفكر الف مره ويخاف يخسرها
شرهب : سكتت ومنطيت جواب والكل عافني
وبليل دك تلفوني عرفته عبد مجاوبته يدك ومااجاوب فوك ال٧ مرات لحد مااجتني رساله
عبدالرحمن: اذا متجاوبين اطلع مو رجال اذا مااجيت دكيت بابج بهذا الليل وتعرفين بيه اسويها
رجع دك فتحت الخط
عبدالرحمن: ليش متجاوبين
شرهب : والله هاي حلووة بكيفي مااريد احجي وياك
عبدالرحمن: على الاقل كولي الْحٍمَدٍ للـّہ على سلامتك داخل حرب من وراج واكلت كتل من وره جهرتج واخابر متجاوبين
شرهب : احد كلك تتعارك
عبدالرحمن: شرهب
شرهب : نعم
عبدالرحمن: اشتاقيتلج
شرهب : خرب غير سحت
عبدالرحمن: احجي ليش ساكته
شرهب : شكول
عبدالرحمن: مشتاقيتي اليه
شرهب : لا
عبدالرحمن: جذابه والله معقوله هليومين مافكرتي بيه
شرهب : وعلى شنو افكر اني وحده اشتري راحه بالي ومااحب اغث نفسي اخاف على وجهي من التجاعيد المبكره وتساقط الشعر التفكير الزايد يكبرني واني بعدني صغيره ليش اكبر نفسي لخاطر اي احد
عبدالرحمن: هااا هيج صارت
شرهب : اييي هيج وهسه شرايد
عبدالرحمن: توافقين حتى اتصخم واتزوجج
شرهب : شوو تتصخم يمه
عبدالرحمن: لعد وحده داخل علمودها حروب طاحنه حتى اتزوجها وتالي تكولي اخاف على بشرتي وشعري ماافكر بيك حظ مصخم لو لا
شرهب : الصراحه مصخم الله يعينك
عبدالرحمن: صيري يمي وراح اشوفج التساقط والتجاعيد شون تطلع اله اشيب راسج قبل مترصلين ال٣٠
شرهب : شحدك قابل اسكتلك يوميه اتعارك وياك واخلي حتى السكسوكه يوكع الشعر البيها وضغط وسكر وذبحات قلبيه عبالك اني هينه لا عيني جان يكوول بهدوء
عبدالرحمن: انتي تعالي بحضني وراضي بكلشي
شرهب : مااجي
عبدالرحمن: شوف هااي عبالها بكيفها سمعي ولج من باجر تحضرين نفسج خلال اسبوع اخطبج
شرهب : شوو خلال اسبوع
عبدالرحمن: هاااا هوايه موو عمي مستعجله مبين يله افتحي الباب مستعد هسه اعرس عليج
شرهب : مووو هذا قصدي شكد متستحي اقصد ليش اسبوع شمعنه
عبدالرحمن: اطيب ايدي وراسي اجي مشدود حتى زحمه
شرهب : مااقبل بيك لتجي
عبدالرحمن: اكو حايط يمج
شرهب : باوعت اي طبعاً اكو
عبدالرحمن: جم واحد
شرهب : اربعه
عبدالرحمن: اركعي راسج بيهن اربعتهن لان خلال اسبوع راح تصيرين مرتي يله روحي نامي ليصير سواد جوه عينج وانزل من مهرج
شرهب : شنو هاي الثقه التحجي بيها مااقبل لو تطلع نخله براسك
عبدالرحمن: اذا ماامرد حلكج هذا بيدي صيري اليه وبعدين نتفاهم
خبله اني احبج
سده بوجهي خلاني افور اخابره ارزله رجعت فكرت وابتسمت واتذكر حجايته خبله اني احبج حتى غزله اعوج
دز يونس الموافقه وره كم يوم وشرط ميجي وحده حتى لو اصدقاء او اقارب المهم كدام الجيران عوف ابوك واهم شرط خلاه اكمل دراستي وماابطل واخذ كلمة منه بأن اكمل عنده وميضيع تعبي ومهدي كذلك انطه كلمة وكال مثل ناي ان شاء الله تتخرج وميضيع تعبك وتعبها
فزيت من صفنتي والكل يبوس بيه صاحوني كالو جايب شيخ يعقد مجنا نعرف اكو عقد توقعنا بس قرايه فاتحه بدا الشيخ يعقد واني ردت اكول نعم ناي حطت ايدها على حلكي كالت ٣ مرات يله تكولين هوايه والله مره كافي تالي كلت نعم واشتغلت الهلاهل مره ثانيه كومتني ناي بلغرفه توقعت يصيحوني مره ثانيه محد صااح وزعو الكيك والببسي والجكليت وطلعو وحتى عبد وياهم هذا وين راح جان نسمع المزيقه ادك اجتني ناي صاحتني تعااي شووفي ركضنا اني وناي وبان بطنها كبرانه جنهه طوبه كريكر ونباوع من السطح
ونشوف الشباب كلها تركص وشايلين عبد يهوسون اله وكفت بلسطح اردح
ناي : لحد يشوفج
شرهب : غير خطوبتي وافرح بيها لوما العيبه اله انزل جوه بنصهم اركص واذب لحم
ناي : هههههه حتى عبد يعلكج بلبنكه
شرهب : شحده
ناي : اممم ضلي انفخي وتالي تصيرين كتكوت بيده لاتحوصين ولا تنوصين
شرهب : نشوف يااختي منو الراح يصير كتكوووت
اسمع الكولات وضرب الطلقات والمزيقه ابتسامتي مابطلت على وجهي اي فرحانه ومن گل گلبي حتى خفت من كثر مافرحانه لان اعرفها مدوم اليه واتعوذ من الشيطان واكول الله موجود قادر يديم الفرحه بعمري
اشر يونس ندخل مبين روسنا ظاهره الهم خلينا ودخلنه
واستلمتني عمشه
عمشه : يايمه بلمبارك خلصنا من شرج
شرهب : صرت شر عمشه والله ميغزر بيج امشطلج شعرج واحني الج خلي يكتلج الشيب
عمشه : مابيج حظ الحنه تترس علباتي وظهري وملابسي گلها تخرب بدعه ايدها العافيه تمسدلي راسي وتحنيني
شرهب : شوفي بعد منو يحنيج وخلي تفيدج عمه
عمشه : تعالي ليه احبنج
شرهب : مااريد بوستج زعلت
عمشه : من خفت لهلبراطم جنهن مال بعير
شرهب : هاي الشفايف الي تخبل تعيبين عليهن ولكم منو لاعب بعدادات بيبي صايره بس تقلد عليه
جاان تجرني من شعريي اااخ وحضنتني وبجت هااا عمووش سالمين شبيج
عمشه : يايمه البيت راح يخله بلياج چا انه ويامن اتناجر واذبن همومي
شرهب : اي هيج صيري حبابه ولتعيبين لتخافين اجيج كل يوميه اتعارك وياج وارجع
عمشه : انتي حضني ابو كرعه چا حتى انه تنسيني بيش گيلو
شرهب : افاا عليج عموش انت الكبد والمزاج العالي شون انساج جان تعت شعري شيغت روحي ااااااااااخ والنبي تكطع
عمشه : ماتجين وتسألين عني احشن راسج حش واخلي صلعتج بكد صلعة زلمتج
شرهب : هو اني وليت تره بعدني يمج هسه الوحده يقرون فاتحتها الناس تبارك الها اني يكطعون شعري خرب بلعيشه
عمشه : اريدن گيكه جيبلي يلمدهربات
بديعه : سكرج موزين عمه
عمشه : چا انتي تفتهمين اكثر مني جيبلي لا اكلبنه عزه عليجن
شرهب : جيبولها رحمه للفحمه خلي تهدني وهذا عبد خلي يجي اشوفه لا ابطل اتزوج
عمشه : انهجم راسج تراجف عليه ومن تكضه تكولن مااريده عياره
شرهب : بقينا ساعه ناس تركع ناس وبان الفطيره من الضحك راح تجيب ولاده مبكره اندكت الباب عدلت نفسي وكعدت طب مهدي وعبد ويونس تقرب مني يونس وباس راسي
يونس : بلخير حبيبتي
شرهب : يوم الك حبيبي
مهدي : مبروك
شرهب : الله يبارك بعمرك
عبدالرحمن: احممم يله
شرهب : وين
يونس : استأذن مني ياخذج على العشا وكتله لتتأخرون
شرهب : وليش مو هنا
يونس : بكيفكم ابقو هنا كلنا نتعشى سوه
عبدالرحمن: لا بروح اهلك شويه ونرجع منتأخر يله شرهب حتى لنتأخر
شرهب : اباوع عليه يخزرني بله افكس عيوونه
يله امشي
عبدالرحمن: وين بدلي ملابسج مااطلع وياج هيج
شرهب : شبيهن فستان حلو
عبدالرحمن: بدلي ملابسج اذا مصارت زحمه عليج
شرهب : يريد يهجم ويكطعني طبيت للغرفه لبست بنطرون كابوي وبلوز جديد لون وردي وبيه وردات بيض وقمصله حطيتها بيدي وشلت شعري عالي ونزلت خصل منا ومنا على وجهي وعيووني وسبحت بلعطر وطلعت
نزلنا واني مستغربه الوضع كدام الكل اطلع ويااه والله شعور حلوو على غريب
صعدت بسيارته ابتسمت من صعدت قبل وجنا نتعارك هلمره مرته
حرك السياره وشخطها اني كلت لازم اصير هادئه وشويه ثكل
جان يشغل كاظم
ويغني ويااه جانت اغنيه احبيني بلا عقد
وصل مقطع وكام يغني بصوت عالي ومنطلق
أحبيني بطهري أو بأخطائي ... وغطيني أيا سقفا من الأزهارِ
يا غاباتِ حنّائي
أنا رجلا بلا قدرٍ ... فكوني أنتي لي قدري
أحبيني .. أحبيني ...
شرهب : هااا عبد الساهر شوكت تفض صدعت من صوتك الساهري
عبدالرحمن: هم الج عين وتعيبين على صوتي على اساس صوتج شونه
شرهب : جاان اغنيه مقطع من نفس الاغنيه
أحبيني ولا تتسائلي كيفَ ... ولا تتلعثمي خجلاً ولا تتساقطي خوفا
كوني البحر والميناء ... كوني الأرضَ والمنفى
كوني الصحوةِ والإعصار ... كوني اللين والعنفَ
باوعت فاتح حلكه هزيت راسي خيير
عبدالرحمن: اشتعلو عشيرتج شنو هذا الصوت الي يخبل مرتي مطربه
شرهب : شعبالك اضحك وياك اني مكاني مو هنا بأرب ايدول
عبدالرحمن: اذا سمعتج تغنين كدام احد اكسر سنونج بحلكج بس اليه
شرهب : على اساس لازمه المايك وافتر على الجيران
عبدالرحمن: تدرين شنو هسه انتي
شرهب : شنو
عبدالرحمن: مرتي مررررررتي
شرهب : فضحتنا والله جان يجر ايدي ويبوسها ويباوع عليه يريد ياكلني بعيونه بله اني مال هيج سوالف هسه شسوي استحي لو اجر ايدي لو شون
عبدالرحمن: وين حابه تروحين
شرهب : بكيفك ضل لازم ايدي ويلعب بأصابيعي جريت ايدي جان يرجع يجرها والله حصرتني الضحكه اتذكرت بيبي من اضفر شعرها وتجر ايدي تعضها اخاف هذا هم هيج يسوي بله بيبي سنونها مكسره هذا سنونه كامله اخاف يأذيني والله اركعه على وجهه اسويله طبره بصف طبرت راسه
عبدالرحمن: ليش ساكته
شرهب : شكول يعني
طبك السياره بمكان اكيد مااعرفه بس جان مقابيلنه حدايق كلش حلوو واندار باوع عليه
عبدالرحمن: من باجر نمشي بمعامله المهر حتى نكطع مهر محكمه
شرهب : ليش مستعجل
عبدالرحمن: وبعد منكطع مهر بأسبوع نتزوج
شرهب : انت صدك تحجي مستحيل ماالحك
عبدالرحمن: صبر مااصبر لو توكفين على جبل عرفه وتعيطين جم سنه انتظرج لخاطر الله اني لو بيدي هسه اخذج لبيتي
شرهب : اقلها اكمل هاي السنه وبلعطله نتزوج
عبدالرحمن: بتموز موو حتى نصير تشريب باگلا مااتزوج بلحر
شرهب : على الشتا الجاي
عبدالرحمن: لا خليها على يوم القيامه اقلها الشياطين تزفنه زفه مرتبه
شرهب : ليش تعيط كعد نتفاهم
عبدالرحمن: شوفي شرهب صبرت عليج هوايه وتعاركت وياج ولخاطرج اكثر ماتعارك الحمزه بفلم الرساله لطلعين خبالاتي وباجر اخذج لبيتي مرتي شرعاً شتردين تسوين
شرهب : مو هيه بكيفك
عبدالرحمن: تحبين تجربين
شرهب : شغل السياره وراد يطلع للبيت لزمت ايده بغلاتي اوكف
عبدالرحمن: بوسيني من خدي يله اوكف
شرهب : عبد احنا بلشارع شجاك
عبدالرحمن: تبوسيني لو اسوق اسرع
شرهب : حرك الشارع كلت هذا راح يسويها بسته من خده سريع وضحك
عبدالرحمن: بعد من اريد شى اصعدج بصفي واسوق سريع واهدد بيج
شرهب : سويها بعد اطلع اخبل منك وافتح الباب وبأول سيطره اكلهم هذا خاطفني واشبع طن گتل لحد متثبت اني مرتك
عبدالرحمن: انتي منوو
شرهب : مرتك
عبدالرحمن: اووويلي ربي كعد تشوف هي تجني على نفسها تكولي تعال تحارش بيه
شرهب : هههههه كافي وامشي نرجع خبطت معدتي من سرعتك
عبدالرحمن: خلي نتعشا ونرجع
شرهب : كعدنا بمطعم واول منزل الاكل
عبدالرحمن: بله نزاكه مال بنات وهاي القشامر عود نازوكيه وانتن وحدتجن بالثنتين بليل تضربن باجه وبصل وبلمطعم بلشوكه والسكين وشبعت والماعون على حطته اكلي لان دافعين فلوس
شرهب : ومنو كلك اني ابيع نزاكه بعدك مشايف شى كعدت اكل ولا يمي وهو هم جنت جوعانه الماعون بقى يصيح الغوث عوفيني
عبدالرحمن: والله وتبردين الگلب هذا الاكل وين يروح اذا هيج تاكلين المفروض هسه وزنج ١٥٠
شرهب : صلي على النبي ياهو اليجي تاكلين هوايه ومتسمنين
عبدالرحمن: عيني بارده لان احبج تدرين شرهب انتي اول وحده اتعلق بيها هيج لو افهم شنو المميز بيج وخلاني افقد عليج
شرهب : جمالي الخلاب وطولي الفارع وعقلي العبقري وضحكتي الرنانه وحركاته الجميله اعدد صفاتي الباقيه لان اذا عددت للصبح نبقى بلمطعم
عبدالرحمن: نسيتي اهم شى ولسانج اليراد كص
شرهب : كص لو فلافل
عبدالرحمن: صيري بيتي اله اسويج حمص بطحينه
شرهب : بعدك جوعان مبين
عبدالرحمن: تردين بعد ادلزج شى
شرهب : لا شكراً رجعنا والطريق كله يغني واضحك على صوته جنه سياره الصالنصه مالتها مزروفه
وصلني للبيت وقبل ماانزل باس ايدي مبين راح اشبع بوس من الايد
لكيت الكل كاعد ويضحكون طبيت سلمت
وكعدت لكيتهم يحجون بسالفه يونس
يونس : كتلكم لتنطون حجايه للناس بعدني مقرر
بديعه : ياابني شوفها بالاول والله راح تكول من باجر زوجوني
يونس : اذا انتم تردون تتفقون على كلشي باجر مو بس اشوفها
عمشه : شنهي تريد تبصبص وتعيف البت
يونس : بيبي اني مرايد اخطب من الاساس جم مره كلت وعدت
بديعه : لو تشوف البنيه من خيرت البنات حليوة وبت ناس وصغيره وامها كلش خوش مره كيفت لان اجيت من طرف ام حسن
ناي : شوفها ياعيني واذا كلت تمام نحجي بلتفاصيل نريد نفرح بيك انت مو فرحت بينا هم حقنا نشوفك عريس
عمشه : باجر نروح للوادم واريدن اشوفن ياوليد مايروح ويانه وحك علي افرهده تفرهد
يونس : نروح بيبي لتعيطين
ناي : اني مهدي راح يجيني وباجر الصبح ارجع الكم
يونس : نايه
ناي : هااا عيني
يونس : لتحجين شى كدام احد على سالفه الخطبه
ناي : افهمت قصده كدام حوراء اشرت براسي اي بس اني قررت احجي واسمعها لازم من تسافر تعرف بعد ماكو شى يرهم بينهم حتى ترتب حياتها
وهاي اني حاضنتها وهي تبجي وانقهرت حيل بس لازم تعرف وتعيش لنفسها ولبنتها
حوراء : نمت ودمعتي على خدي حلمت بيه حاضنته ويبجي بحضني جاان مو حلم من كثر ماجنت متأذيه حسيته حقيقه وصدك احس بلمساته ودمعاته من لهفتي حضنته حييل وابجي وياااه كعدت الصبح استغفر حتى الحلم اعتبره حرام باوعت ماكو احد وصوت الباب كمت كوه جسمي متكسر لا ناي ولا مهدي ولا سيف اتوقع راح يوديهم لبيت يونس صحت منووو سمعت صوت امي
فركت عيني وشلت شعري وفتحت الباب الها
وداد : شكد دكيت وين جنتي
حوراء : باوعت على الساعه بال١٢ الظهر جنت نايمه خير
وداد : اجيت اشوفج اخاف محتاجه شى قبل متسافرين باجر
حوراء : وحتى اذا احتاج انتي اخر وحده اجي الها واطلب منها حاجتي
وداد : شوفي بت فوزي اخاف هاي الاشهر كلها تحملت سوالفج وتجاوزج ولسانج الطويل هسه مااتحمل انزع الي برجلي واحطه على راسج نسيتي اني امج
حوراء : اي نسيت ومااريد اعرفج
وداد : كله لان دافعت عن بيتج وردت الج حياة بيها حظ وخير ومااريدج تصيرين مطلكه
حوراء : مشكورة مقصرتي دمرتي كلشي حلوو بيه والحياة الي تكولين عنها خليها الج لان حياتي لبنتي تدرين ليش قبلت ارجع لخاطر مااعيش بنتي مثل عيشتي ام موجوده بس بالاسم مااريدها تعيش العوز الضكته على ايدج
وداد : لتخليني اغلط عليج ياعوز وانتي غركانه بلخير والاكل والملابس والبيت الحلوو غيرج بنات يتمنون ربع عيشتج
حوراء : يابنيه تتمنى امها تشمرها شمرتج يابنيه تتمنى امها تصير قاسيه مثلج انتي عبالج العوز الاكل والشرب العوز من اشوف امي كبال عيني تفرقني عن اخويه وتعامله افضل مني وابسط حق من حقوقي ادوسه برجلها العوز من ابجي وحدي ومااتجرأ اشكي الها واشمر نفسي بحضنها واحجيلها الي مأذيني لان اعرفها قاسيه ومراح تفهمني العوز ياام مهدي من اكون يتيمه الام وامي عايشه
انتي زوجتيني ابن اخوج لمصلحتج وشكلج الاجتماعي ماميته عليه ولا تردين راحتي كل الصار لاجل ترضين روحج ورضيتيها لا تجين هسه تمثلين دور الام الحنينه الخايفه على بتها وتريد سعادتها كل تعاسه عشتها وراح اعيشها وكل دمعه وحسره راح تطلع مني انتي سببها ومن يوم ماحطيتي ايدج بيد عبدالله وانطيتي بتي وخليتي يستلذ بأذلالي اعتبرتج مو امي لهذا عفيه انزلي لبيتج وعوفيني بحالي وبله حنيه جذابه متوكل خبز
وداد : حرامات التعب والسهر والربه بيج تعضين الايد الربتج ناكره وناقصه مثل عمتج
ماطلعتي عليه مع الاسف
حوراء : همزين ماطلعت عفتها وطبيت وهي كالت بصوت عالي يطبج طوب عبالي ادميه واجيت اطمن عليج خلت ونزلت
كعدت بلغرفه اباوع على جنطي اخاف ناسيه شى
ناي : وصلت لبيت اهلي كعدت حوراء ماكعدت عفتها نايمه لان الليل كله منامت
اتغدينا سوا ومنطين موعد للناس بال٤ يمكم
رحنا اني وبيبي وعمه وام حسن ويونس شرهب بقت يم بلال وسيف رادت تروح مقبل يونس كال عيب هوايه نصير
شرهب : من يمي صرتو هوايه اني الكم بعرسي اليجي اطرده دوم ادكون بيه هاي الدكه اني كتلني الفضول اريد اروح اشوفها حلووة جكمه
ناي : اخذ كيه صديق مرتضى لان سياره خصوصي متكفي وانتظرنا الولد بلباب وصلنا لبيت البنيه فتحت النا امها ومرت اخوها كعدنا جان استقبالهم حلوو ومبينين خوش ناس شفت يونس متوتر حيل ممرتاح واني بگلبي اقرا ايات كون يرضى ونتفق حتى جم نذر نذرت بس يخطب
سوالف بيبي وامها وام حسن اخذهن الواهس لحد مطبت البنيه جانت ناعمه وكلش مرتبه وحلووة وابتسامتها هادئه اكو مرات وجوه من تشوفها من اول مره ترتاح الها اني بس شفتها گلبي انفتح يونس ماباوع لحد ماوصلت يمه وقدمت العصير وسلمت
رادت تطلع
بديعه : عيني ام كاظم خلي البنيه كاعده يمنا هم نشوفها وهم ابنه يحجي وياها تعرفين هاي نظره شرعيه حلال
اي عيني ابقي يمه وهم شعندج كولي ليونس لازم واحد يحجي ويه الثاني
ناي : الصاله جبيره كاعدين وهمه كعدو بعيد عنا
يونس : اباوع عليها ماكدرت بجرأه مااريد اخجلها عيوني اجت على ايدها وبعدين على وجهه كاعده بعد مسافه عني كتلها شسمج ردت ابدي الكلام وياها
اسمي ضحى
يونس : عااشت الاسامي
الله يسلمك
يونس : اجت عيوني على حلكها ابتسمت واتذكرت حوراء يابه هو گلب لو اسفنجه يشرب حب ويذبه جريت نفس وبديت احجي وياها واسألها وهي تجاوب البنيه هادئه واسلوبها حلوو
كاعده كبالي وكل صوره احاول اخذها واتمعن بيها تجي حوراء بوجهي واحاول خلال هاي الساعه بس اشيلج من راسي ليش صوتج يرن بأذني مكان صوتها وليش ملامحج تنرسم بعيوني بمكان ملامحها حتى تفاصيل طولها وهيئتها ماكدرت اركز لان اشوفج بيها
اشرتلي عمه يعني نحجي بلتفاصيل كمت وكلت نرفع الزحمه ان شاء الله نجيكم غير وقت
ناي : بهت وجهنا شبيهه مو جان كاعد وشكلهم حلوو من يسولفون سكتنا وسلمنا على الناس وحده تباوع بوجهه الثانيه نريد نعرف شقرر وليش كاام صعدنا للكيه اشر محد يحجي لان ولد غريب يسوق يابو يوصلنا للبيت
وصلنا واجت شرهب تركض هااا بشروو نهلهل
يونس : بله هلاهل
بديعه : ياابني شبيك كمزت غير تكعد بعد ويه البنيه تفتهم منها
يونس : البنيه مابيها اي عيب بلعكس كأي شاب ينعجب بيها
عمشه : شمالك تسودنت وتطافر جنك عكروكه ماانطيتنا مفگه نفهم الوادم
يونس : خاله ام حسن من يمج سدي الموضوع ومشكوره لان دورتي وتعبتي اني مااتزوج
بديعه : صخام انت صدك تحجي شجاك
يونس : عمه من اريد اتزوج انطيكم خبر خلي ابدل وانزل لشغلي
ناي : طب للغرفه لحكته وسديت الباب شبيك فدوة مو جنت كاعد ومثل الورد
يونس : ناي محد يفهمني لخاطر الله افهميني انتي لتصيرين مثلهم
ناي : من وره حوري
يونس : مااكدر اشوفها بكل البنات احبها لهاي اللحظه اتنفسها
ناي : وهي باجر راح تروح لرجلها وعائلتها
يونس : الله وياها ماكو حل بيدي لا اكدر اغير قدري ولا قدرها بس بنفس الوكت مااكدر اظلم بت الناس ويايه شنو ذنبها تعيش ويه رجال ميشوفها ويشوف مره ثانيه تتذكرين شصار بيج من وره مهدي
ناي : وراها حبني وتعلق بيه
يونس : لان مهدي ماحب بت خاله مثل مااني حبيت حوراء ولا ذب روحه للموت لعيونها اني هاي الانسانه حبيتها بعقلي وبگلبي واعتبرتها حبيبة وام واخت وكل ناسي شون تردين اخلي وحده ثانيه مكانها تردين اتحمل ذنب مره ثانيه اني ممسوي حرام وطايح حظي ويوميه طلابه شكل هلمره اتحمل ذنب وحده تدعي عليه لان ممرتاحه ويايه حتى تكمل
ناي : انطي لنفسك فرصه فترة خطوبه انت عاطفي ويجوز تتعلق بيها
يونس : شون اتعلق واني احب كل قطعه الله خلقها بحوري اني كاعد واشوفها كاعده كبالي شووون ابدلها واني حتى مااتجرأ ابدل الصوره بموبايلي هاااج شوفي كدامي طول الوكت
ناي : وهي تزوجت وخلفت وراح تكمل حياتها انت ليش توكف حياتك علمودها
يونس : ومنو گلج موكف حياتي علمودها اني حياتي وكفت من وحدها وغصب عني يوم ماشفتها بعيني تنزف عروس لغيري اني گلبي قفل روحه على روحه وضيع مفتاحه يوم ماعيني اجت على طرف بدلتها وهي ترفعها حتى تدخل سياره العرس وتروح لغير رجال
تعرفين من شفتها بيوم زواج بان شصار بيه
لج ناي ردت اروح احضنها وابجي بحضنها واشكيلها حالي بدونها مو رجعت للعراق وماشفتها بس مرتاح لان اني وياها نشتم نفس الهوا اني ٣ سنوات عشت وياها جنه ناكل سوه ونشرب سوه ونشكي همنا سوه حتى من انام ماانام اله على انفاسها جنت ارجف من الرصيد يخلص واروح اركض اشتري حتى بس اسمع صوتها
ومرات ماعندي مصرف واشتري الكارت واضل بليه اكل واكول صوتها هو يشبعني واشتغل واركض على العيشه حتى بس الم مهرها اذا خابرت ومجاوبت جنت اضل اتراجف هاااي روحي واعز من روحي شتحجين انتي مو كلشي ينكال اكو امور هوايه جمعتني وياها مااكدر احجيها حوراء انعجنت بدمي ولهاي اللحظه مرات مثل الطفل ابجي من اشتاق الها وتردين اعيش ويه وحده واظلمها ويايه خليني بحاله بروح امي مجرد ماعرفت باجر راح تسافر اني حسيت انشمرت بگبر وانذب عليه تراب واني عايش مااريد شى منكم غير تعوفوني بحالي هيج اني مرتاح خليني احير بروحي
ناي : براحتك حبيبي احنا ردنا سعادتك والله
يونس : عوفوني بحالي واني اصير سعيد
ناي : على راحتك گلبي طلعت جان يكولي
يونس : بس وصليلها من ترحين كوليلها يكول يونس مره كلتي صحتك ونفسك ابد لتضيعهم لان محد يستاهل واذا بيوم صار جرح بسيط لزكه بتيب قبل مايمشي ويكبر
ابشرج ضاع كلشي وعلى ايدج والجرح مالحكت الزكه لان صار ندبه جبيره الف تيب وعمليه ماتغطي كوليلها خلي تدعيلي تطلع من راسي مو حتى اتزوج حتى ارتاح ومااشتاق الها لان تعبت واني اشتاق والخلقني تعبت وماضل حيل بيه
ناي : دمعت عيني عليه عفته وطلعت ورحت لعمه وبيبي وكتلهم عوفوه براحته بمرور الايام من وحده يجي يطلب منكم يتزوج لتلحون عليه
اجه مهدي وسألني باوعت عليه بقهر وكتله ميقبل يتزوج اخويه مكسور گلبه ودرت وجهي منه اتذكرت هو احد اسباب الرفض
مهدي : نايه
ناي : مجاوبته لان مخنوكه ومردت ابجي
مهدي : مرات البشر مامعصوم من الغلط اني ردت لاختي القسمه الزينه
ناي : وهاي القسمه شفتها شصار بيها عاشت ايدك وايد امك وخالك دمرتوها
مهدي : لو ينعاد الزمن
ناي : لتكمل ميحتاج اعرف بيك نادم على زواج حوري من عبدالله بس الندم ميفيد ولا راح يداوي اخويه ولا يسعد اختك سد الموضوع مااريد انغث اكثر
سكتنا ودخلنا للبيت وبيومها حتى مانمت يم مهدي حجي يونس بحرگه والعبره الي بصدره وهو يحاول يكتم دموعه زرفت گلبي تمددت بصف حوراء الي متقل مأساة عن اخويه هم خلصتها بجي
كتلها كلام يونس ومجاوبت لان دموعها ترجمت كلشي
واكفه الصبح اودعها ومهدي يصعد بلجنط حضنتها
حوراء : وصليله ليونس راح ادعيلك بكل صلاة الله يريح گلبك ويرزقك بنت الحلال الي تسعدك واداوي جرحك السويته اني
ناي : دير بالج على نفسج وبنتج
حوراء : ربج موجود ميعوف عبده
ناي : صيري سباعيه ولتسكتين
حوراء : راحت ذيج الفاهيه المدمغه راجعه وحده ثانيه مااخلي بشر يأذيني وارد الصاع صاعين
ناي : الله يوفقج حضنتها حييل ودعتها وباست سيف ونزلت حتى مامرت على امها
حوراء : راجعه لبنتي وحياتي الي بمزاجي راح امشيها محد نصفني وماكدرت اخذ حقي واقرب الناس طعني نفضت الكل من گلبي وتوجهت لاكثر انسانه محتاجتني بنتي ماسه
يونس ياريت ماعرفتك ولا حبيتك ولا أذيتك بس هذا قدري احبك واتمنى الحياه وياك واكون لغيرك وقدرك تحبني وتعيش بدوني
شرهب : واكفه كبال القاضي نعقد وفرحانه عقد النا القاضي وطلعنا جان يونس ومهدي وناي منتظرينا
باركولنا كلنا وطلعنا للبيت نتغدا كلنا سوه
صعدت بسيارته وكاعده بصفه
عبدالرحمن: جايبلج هديه تخبل كلت ماانطيها الج اله نعقد
شرهب : بشرفك شنوو مااتحمل لحد مانوصل البيت
عبدالرحمن: لا حبيبتي نوصل ونتغدا حتى وراها تشوفيها حيل راح تعجبج بالاحرى اثنين
شرهب : هله هله غير تكول حتى اني هم اجيبلك
عبدالرحمن: بوسه منج تسوه الدنيا حني علينا الجفاف صاير بأوج عظمته موتيني
شرهب : من نتزوج
عبدالرحمن: لعد شسوينا هسه نلعب ختيلان
شرهب : اقصد بيتك
عبدالرحمن: يمكن راح نضرب بوري مامضروب بيه واحد
شرهب : ليش عيني
عبدالرحمن: اكو وحده مخطوبه متشتاق لخطيبها تتغزل بيه
شرهب : اليوم اترسلك علاكه غزل وانطيهن بيدك من تروح بس كولي شنو هديتي
عبدالرحمن: من نتغدا
شرهب : اهوووو طنكر بعد
وصلنا للبيت جان الغدا جاهز صبينا وكعدنا كلنا اريد بس نكمل حتى اعرف شجابلي
اكلنا وكملنا والبنات وعمه شالو السفره وصبينا الجاي أشر اله ولا يمه لحد مكام مهدي وكال رايح عاف ناي وسيف يمنا ويونس اخذ سيف بهاي الظهريه يشتريله
نزل للسياره وصعد
قبل ميدخل اشرت لناي تاخذ عمه وبيبي وبان ويدخلون جوه اذا منطاني الهديه هسه اشمره من الدرج
فتح الباب وطب علبتين بيده وحده صغيره والثانيه جبيره وجهي الابتسامه مالته وصلت لاذني
عبدالرحمن: هااج هاي بالاول
شرهب : اخذتها فتحتها بيها الحلقه وتخم ذهب
عبدالرحمن:نيشانج اشتريته على ذوقي
شرهب : وليش مو اني اشتري
عبدالرحمن: لان صار اكثر من سنه اشتريته الج وضامه بيوم مانجحتي من السادس واجيت لحضرت جنابج مشايه واني مشتري وانضربت بوري ورجعت ضميته اذا محبيتي بدلي وانطيج فلوس فوكاه
شرهب : باوعت عليه كلش حلوو وثكيل بلعكس ذوقك يخبل
لبسني الحلقه طلعت شويه بيها گبر كال اصغرها الج حبيت الذهب كلش وفرحانه جان ينطيني الهديه الثانيه فتحتها ركض جان تروح ابتسامتي وعيوني انفتحت هااي شنوو
عبدالرحمن: ارقى هديه ١٢ شال من كل الالوان والنقشات حتى لتكولين ماعندي اللون الفلاني واذا تردين نطلع نشتري بعد
شرهب : المن ذني
عبدالرحمن: لامي لان ماعدها الج غير
شرهب : بس اني ماالبسهم
عبدالرحمن: ادري هيج تحجين من اليوم لا مو من اليوم من هاي الساعه تحطين الشال على راسج وهذا الشعر اذا طلعت خصله منها اكصها لو اعرف اسكط شعرج الاحبه ولا اخليج هيج تفترين بدون حجاب
شرهب : عفيه عبد مااريد اتحجب
عبدالرحمن: مو بكيفج ولا انتي صغيره وتعالي المن مطلعه شعرج اني رجال اغار على مرتي ومااريد احد يشوف شعرها
شرهب : واني مااتحجب وانت تقصدت من تعقد يله تكول اليه لو ادري هيج راح تسوي ولا اقبل نتزوج
عبدالرحمن: سمعي شرهب بكلشي ارضى واكون وياج اله بهاي السالفه تاكل وتشرب ويايه سالفه حجابج وعنادج هذا ميمشي عليه تلبسي وانتي الممنونه وحجاب عدل مو نص كذله طالعه
شرهب : ماالبس وشتريد تسوي سوي ايدك الك
جان يطلع حجاب وحطه على راسي وعااط واجت ناي وعمه يركضون
خيركم
عبدالرحمن: عقلوها منا وغاد طلعه من الباب ماكو بليه شال واله ياشرهب حتى الكليه احرمج منها
شرهب : مو من حقك
عبدالرحمن: من حقي ونص لتنسين اني منو
شرهب : مصار ساعه من كطعت مهر وتريد تمشي كلامك عليه
عبدالرحمن: امشي واكسر راسج واريد اشوف يامره متسمع كلام
طب يونس متفاجأ
يونس : خير بعدنا بسم الله
عبدالرحمن: اعذرني يونس عليت صوتي وهذا كل من وره اختك اني ماردت شى منها غير تتحجب وهذا من حقي
يونس : حقك ونص
شرهب : يويو
يونس : الرجال يغار على مرته شون نكله لتغار وهي قطعة قماش راح تقل من طولج بلعكس كلش تلوك لوجهج
واني مردت اجبرج لان هاي الامور مو بالاجبار
شرهب : كلتها مو جبر ليش هو يريد يجبرني
يونس : لان زوجج ومن حقه
عبدالرحمن: لاعاب حلكك هاي كدامك شرهب متطلع من الباب بليه شال اختك على ذمتي وحالياً هي امانه يمك كلها جم يوم واخذها
شرهب : ولا اروح وياك وطلكني ماامشي بهيج اسلوب وسوالف التهديد مالتك حجاب مااتحجب
جان يتقرب عليه وعيونه براسه
عبدالرحمن: احتراماً لاخوج مراح احجي شى تنعاد هاي الكلمة والي تصرف ثاني وياج ونهايه الشهر زواجنه
يونس : توكل بالله وصلني بدربك
شرهب : شمرت الشالات بلكاع كدامه واخذه يونس وطلع
ناي : شجاج تخبلتي
شرهب : شوفي شون نافخ روحه ويتأمر عليه
بديعه : كل رجال هيج ياعيني يريد لمرته الستر ويخاف عليها من عيون الناس
شرهب : قابل اني ملكة جمال ويخاف عليه
بديعه : هو يشوفج احلى البنات واله مجان تكتل نفسه
شرهب : مااتحجب لو ينط ومااتزوجه نهايه الشهر
عمشه : هاذه الزلمه صكارهه بعد ايدي كون يكضج ويطك اعضاج گلها ويستر شعفتج
شرهب : طبيت ضايجه منه حتى الذهب عفته بلهول وماشوفته الهم اختنكت حييل اسلوبه ماحبيته حجت عمه وناي وبيبي واني انطيت للكل الاذن الطرشه لحد مراحت ناي لبيتها
بليل يتصل ومااجاوب حرك التلفون تالي طفيته ونمت عباله اسهر وانقهر ميدري بهيج امور محد يلحكني
نايمه على وجهه جفي بلهول احب انام على بطني ومتغطايه حسيت واحد وخر الغطا والشعر من وجهي وباسني من خدي والبوسه صارت اقوى مكعد احلم فتحت عيني تك لايت واشوف عبد فوك راسي كمزت شجابك
عبدالرحمن: من الباب اجيت
شرهب : يبووو اتذكر حالي من اكعد من النوم عبوه طاكه بوجهي طفرت اريد اغسل واعدل الخلقة المكلوبه جرني
عبدالرحمن: اريد اشوفج هيج المن رايحه بعد كلها جم يوم وهم تكعدين بهذا حالج
شرهب : وخر مني خلي اغسل على الاقل
عبدالرحمن: ميحتاج ريحتج تخبل حضني وكام يبوس برگبتي وبخدي واني معت تذكرت سالفه الحجاب دفعته صدك ليش جاااي
وشون دخلت للبيت
عبدالرحمن: عمتج فتحت الباب وطبت مره اصيله تعرف بيه مشلوع گلبي وعافتني وياج
شرهب : وشتريد
عبدالرحمن: اجيت اراضيج
شرهب : ماارضى اله تكول لتتحجبين
جان يكعد بلكاع يمي وسحبني عليه وكعد يرتب بشعري ويبوس بيه
عبدالرحمن: شون اقبل اعز من روحي الرايح والجاي يباوع عليها قدري غيرتي اترجاج اني لوما احبج مااريد ابعد انظار الناس عنج
شرهب : اني لبسي مستور مو اله احط على راسي قطعه قماش وهي مراح تمنع عيون الناس عني غلطان
عبدالرحمن: بس ارتاح من تجين من الدوام وتفتحين شعرج بس اليه شرهب من شعرج لاضفر رجلج اعشقه واغار عليه انجن اذا واحد لمح شى منج اذا الي معزه بداخلج مااكول حب لان اشك ماطول تردين حضرت جنابج تطلكين
شرهب : غير من سوالفك
عبدالرحمن: انتي عيديها لااخليج تندبين الساعه الي انولدتي بيها ابتعدي عن الشغلات الي تستفزني اني من اتعصب مااشوف كدامي
شرهب : على نفسك مو عليه جاان يجر راسي ويبوسني حيييييل كطع نفسي دفعته عزه ليجي احد
عبدالرحمن: انتي متجين اله هيج
شرهب : شتريد هسه
عبدالرحمن: البسي الحجاب وخلي نجهز لعرسنا
شرهب : واذا مالبست
عبدالرحمن: هم اتزوجج لان مااكدر بدونج
شرهب : ابتسمت على كلامه لان لو كايل غير شى جان علكت بينا
هذا هو راح البس
عبدالرحمن: فدوة للتسمع الكلام تعاي اشاورج
شرهب : لا عيني مااجي انت متكعد راحه عمه وينج
عبدالرحمن: افلتي وين ترحين تاليتج هنااا واشر على صدره وتتوسلين بيه حتى ابوس واتحارش بيج
شرهب : يااافدوة اتوسل كول انت راح تخلصها توسل
عبدالرحمن: اتوسل ليش لا غير حبيبي وبحضني شريد من الله بعد انطيني تصبيره الكدامج مسكين
شرهب : الله ينطيك روح يله خلي ارجع انام
عبدالرحمن: ضامهن كلهن الج بعيني ام خشم اليابس
سحبته من ايده وطلعته اشر على خده بسته وراح وركض للمخده العزيزه مالتي ورجعت اشوخر
مابقى غير يومين واروح لبيتي خلصتها ركض بركض من وره عبد حتى الدوام اخلص محاظرات واطلع للسوك
مارحت لبيته لان اعرفه ميكعد راحه لحد قبل الزواج بيومين واخذت عمه ويايه شفت البيت مأثث وكامل وحتى غرفه نوم بيها فرحت راح يصير عندي بيت ورجال يحبني توسلت بعمه تحجز وتجي كالت ماالحك ردت الكل ويايه
عكب باجر زواجي كملت كلشي اتفاقنا اطلع من البيت بفستان ابيض وكبل لبيتي ماردت عرس وهوسه مردنا تصير مشكله وعمران يتوقعها عناد بيه اهم شى الفرحه النا متهمني الشكليات
بليل ننتظر يونس ماكو نخابر عليه مغلق لعب گلبنا لان هو كال اجي من وكت علمودي
خابرت ناي وبلغتها سديته منها متحملت خابرت عبد وكتله شوف يونس بلمحل
بديعه : كال اجي قبل ال٩ وصارت بال١١ وهو ماكو زين تلفونه ليش مغلق
شرهب : اكل بشفتي من القلق لحد مااجه عبد وجهه الف حجايه بيه
هاااا بشر
عبدالرحمن:جايه قوة ماخذه يونس
بديعه : دخيلك ياابا الحسن ليش ماخذي ومنو ذوله
عبدالرحمن: محد يعرف ناس تكول حشد ناس جيش المهدي ناس داخليه والولد الي اسمه مصطفى رايد يعرف منو ذوله مامنطي نجده مخابر على مرتضى وصار ساعتين من مركز لمركز يدورون عليه وماكو اي خبر عنه
شرهب : كعدت بلكاع مصدومه واباوع على عبد اذا صار شى بيونس امووووت
عبدالرحمن: ماكو شى ياحبيبي هسه نفتهم ليش اخذوه
شرهب : خلي نعرف همه منو بالاول ماكو غير عمامي الجلاب يونس ماعنده عداوه ويه احد
طب مهدي وجايب ناي وحدتنا كوه حابسه دموعها ونقشمر روحنا راح يدخل هسه ويكول اشتباه وطلعوني
بيبي تخربطت والولد اخذوها للمستشفى
كاعده شاده راسي وحاطه ايدي عليه اريده يهدا من الصداع
اجه يوم عرسي والمفروض هسه رايحه ويه عبد بس مصار لان يونس صار يومين محد يعرف شى عنه كل واحد يذبهم على جهه شكل حارو وين يرحون حتى يسألون لا ليلنا انام بيه ولا نهارنا بيه طعم بدونه كاعدين على نار وننتظر بشر يطمنا على اخونا متحملت لبست عبايتي الاسلاميه وحطيت شال على راسي
ناي : وين رايحه
شرهب : لبيت عمج جوحي
ناي : شعندج ويااه
شرهب : سمعت عبيد وصالحه عايشين يمه اليوم اسحل صالحه بلشارع واخزيها
ناي : همه شعليهم
شرهب : محد عنده عداوه ويه يونس غيرهم تلكين منطين فلوس حتى يأذوه ويخلوه يتنازل عن البيت وهاي الحقيره صالحه متسكت متأكده هي دفعت ذوله الطليان حتى يأذوه
ناي : اكعدي لترحين لاي مكان خلي يجون الولد
شرهب : انتي ضلي انتظري اني اذا ابقى انجلط
ناي : يمعوده وين رايحه لبست وراها وطلعت ردت اجرها حتى متروح جانت متشوف كدامها اعرف شرهب اذا متتعارك هسه مراح ترتاح خابرت مهدي حتى يلحكنا كال بعيد خابري عبد خابرته كال جايكم
صعدنا تكسي بيتهم قريب علينا مو حيل بعيد ربع ساعه وصلنا
خلي نرجع فدوة اروحلج
شرهب : اسكتي بله كسرت الباب من الدك جان تطلع صالحه اول مفتحت الباب متحملت وجيتت عليه وملخت شعرها ذبيت حرگتي بيها تريد توخرني متكدر وكعت بكاع وصرت فوكاها لزمت راسها ودك بلكاااع واعيط اذا صار شى بأخويه حتى بتج اذبحها
صالحه : وخري مني بت الگلب جايه هداده عليه الحكوني راح اموووت
شرهب : اييي خلي يجون يشوفون السحاره وبتها العايقه وينها بتج خلي توخرج مني
ناي : يمعوده كوووومي كاافي ثور وحطو كدامه وصله حمره شرهب كطعتها لصالحه تريد ذيج تجر النفس متكدر كلت راح تموت بيدها
شرهب : اليوم اخليها تلحك امها بلكبر شتردون من عدنا مكافي دمرتونا رجلج والگبر وبعدج تخبثين عفنا الدنيا كلها الكم وجاي تركضين ورانه لج شيطان انتي شوكت الله ياخذج شكو زين مات وانتي ضاله على گلوبنا اختج الساقطه الحراميه هجت وعافتج عاله علينا واليوم انعل اهلج
دك راشديات فقدت كمت مااشوف كدامي خصل من شعرها تنهلس براسي لحد منشاليت حيييل وشفته عبد وخررر عوفني هاي دمرتنا وجايه تضيع اخويه
عبدالرحمن: شسويتي تخبلتي
شرهب : كتلك عوفني اليوم اموتها بيدها هااي رجلها واخوه وهي تكود بيهم مثل الطليان وضيعو يونس لخاطر البيت مستحيل ماالهم يد
عبدالرحمن: شووو تعالي
جرني حييل وغطه راسي وصعدني بلسياره وشفتي وايدي يرجفون من الاعصاب
ناي : دنكت على صالحه اريد اكومها هااي شسوت بيها الخبله جان تطبك سياره ونزلت سما منها شافتنا اخترعت
سما : شجابكم هنا
ناي : تعاي على امج يمكن تخربطت
صعدت بسياره عبد وعفنا صالحه منتهيه من الكتل
تخبلتي هاي سوايه تسويها
شرهب : كله من وراكم معفتوني اموتها
عبدالرحمن: شون اعوفج رادت تموت بيدج
شرهب : انهاريت واعيط متعرف هاي شسوت بينا ويريد عبد يهديني وهو يسوق منتبهه ابو ماطور صار گباله وجان يصير جوه السياره وعطت دير بالك
