رواية عشقت كبريائي فهد ومليكة الجزء الثالث (لقاء الاحبة) الفصل الرابع 4 بقلم دودو محمد

فى المستشفى 

حطو اسر فى الإسعاف المجهزة وركبت معاهم مها ومشيت على المطار وراح وراهم يوسف وجاكلين وسمر فى عربية يوسف 

والتوأم مليكه ومى فى عربية فهد ومليكه

وباسم وهنا وفرحه ومى فى عربية باسم 

عماروفريد فى عربية عدى 

وبعد وقت وصلو المطار والكل ودع اسر ومها وركبو الطياره الخاصه المجهزه بجميع الادوات الطبيه ورجع كل واحد على بيته 

،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

فى فيلا فهد المنشاوى

وصلو كلهم وهما تعبانين واول ما دخلو اتصدمو من منظر لبس روان 

روان :- جريت على فهد باسته فى خده وقالت عمو فهد واحشتنى 

فهد :- احم اذيك يا حبيبتى 

روان :- بدلع كويسه اول ما شوفتك 

فريد :- غير وشه وبص فى حته تانيه وقال عن اذنكم هدخل اوضى اريح شويه 

مليكه :- بغيظ ادخل يا حبيبى 

جاكلين :- بصدمه نهارك اسود ومنيل ايه اللى انتى لابسه ده الله يحرقك 

روان :- ياى انتى بتكلمينى بالطريقه دى كده ليه حاجه بيئه خالص 

جاكلين :- انا بيئه يابنت المبقعين طب وربنا ما انا سيباكى 

مليكه :- جاكى ولا نفس اطلعى اوضك 

جاكلين :- انتى مش سمعها بتقول ايه يا ماما 

مليكه :- كلمه واحده اطلعى اوضك 

جاكلين :- انا هوريكى يا بنت سلطح ملطح انتى انا قولتلو بلاش صمم عليكى وبصت ليها بقرف وطلعت اوضتها 

فهد :- عدى تعال معايه المكتب عايزك 

عدى :- بقلق حاضر يا بابا 

روان :- انا جايه معاكم 

مليكه :- لاء خليكى هنا انا عايزاكى

وراح عدى مع فهد المكتب

 وساب روان مع مليكه 

فهد :- ادخل وأقفل الباب وراك 

عدى :- حاضر ودخل وقفل الباب وراه وقال خير يا بابا

فهد :- مش خير خالص ايه اللى مراتك لابسه ده انت ناسى أن فى شاب فى الفيلا وانا ازاى تسمح بكده 

عدى :- وانا ايه عرفنى انها هتكون لابسه كده يا بابا مش كنت معاكم 

فهد :- بس هى لو عارفه انك مش هتقبل بكده مكنتش لبست كده وقعدت بيها قدام الكل 

عدى :- سكت شويه وقال يا بابا المشكله ان هى اتربت فى بيئه غير البيئه بتاعتنا اتربت وسط اهلها كل حاجه عندهم عادى البنت ممكن تلبس عندهم مايوه وتنزل بيه قدام الناس كلها عادى لسه مش متعوده على الجو بتاعنا انا بحاول اغيرها بس واحده واحده احنا لسه بقالنا يومين متجوزين ملحقتش يعنى يا بابا 

فهد :- بص يا ابنى هقولك كلمتين مراتك فيها من امك الحقيقه مروه ولو مقدرتش تغيرها بسرعه متحاولش كتير لانها مش بتشوف قدامها غير الفلوس وبس وغلطتك لما جريت وراه قلبك واتجوزت واحده مش من بيئتنا هتتعبك كتير وممكن فى الاخر متتغيرش هى وتغيرك انت زى امك ما عملت معايا زمان متبقاش ضعيف معاها علشان متندمش بعدين 

عند مليكه كانت وقفه وبتبص لروان بغيظ 

روان :- بصت بقلق لمليكه وقالت هو انتى بتبصلى كده ليه 

مليكه :- بقى بتقولى على بنتى بيئه وبعدين انا مش قولتلك المره اللى فاتت تنزلى بهدوم محترمه ايه القميص اللى انتى لابسه ده ناويه على ايه يا هانم ها 

روان :- بخوف ا.ا.انا مقصدش حاجه انا كنت حرانه ومفيش حد فى الفيلا قعد براحتى 

مليكه :- ليه حد قالك علينا احنا مسافرين ده انتى حتى مهنش عليكى تيجى تبصى على الراجل التعبان انتى شيفه نفسك على ايه ها ده عيلتك كلها هزوق فى بعض بس هو اللى اتنيل على عينه وحبك معرفش على ايه 

روان :- بغيظ لو سمحتى يا طنط متجبيش سيرة أهلى على لسانك 

مليكه :- نعم يا روح امك اه ولا صح بلاش امك نعم يا روح مامى مجبش سيرة مين 

روان :- اهلى وبعدين انا عروسه ومن حقى اخد راحتى وانتو قعدين على قلبنا الصراحه المفروض تروحو تقعدو فى اى مكان تانى وتسبونا نعيش يومين لوحدنا 

مليكه :- نععععععععم يا روح ماما نمشى فين حلو دى البيت بيت ابونا والغرب يطردونا لا يا ماما الفيلا دى بتاعتى واقعد فيها وقت ما احب وامشى منها وقت ما احب وبعدين لو عايزه تقعدى براحتك عندك دور بحاله مخصوص ليكم اقعدى فيه براحتك انشالله تقعدى ملط محدش هيقولك نص كلمه لكن هنا لاء لو شوفتك كده تانى هرميكى فى الشارع فاهمه 

روان :- انتى ازاى تكلمينى كده بأى حق انا مستحيل اقعد فى البيت المختل ده 

مليكه :- اللى ايه يا حبيبتى سمعينى تانى احسن مسمعتش 

روان :- مختل وقذر كمان 

مليكه :- اتعصبت وقالت انا هوريكى القذاره على اصلها ورفعت كم هدومها ومسكت روان من شعرها

روان :- عاااااااااااااااا الحقونى الست المجنونه دى هتموتنى عاااااااااااااااا

الكل جه على صوت روان 

عدى :- ينهار اسود روان وراح يسلك شعر روان من ايد مليكه 

مليكه :- ودينى ما انا سيباكى يا بنت القرع انتى دا انتى عيلتك كلها مفهومش ولا شعره يا معفنه شايفه نفسك على ايه  

روان :- عاااااااااااااااا الحقنى يا عمو فهد 

فهد :- خلاص يا مليكه سيبى شعر البت 

مليكه :- لاء لازم اعرفها أن الله حق 

جاكلين :- ايوه يا ملوكه يا جامده اديها كمان وكمان 

فريد :- بتقوميها بدل ما تنزلى تسلكيهم من بعض 

جاكلين :- اسلك مين ده انا فرحانه فيها فرحه زى فرحة المطاهر يوم طهوره وبعدين لو زعلان عليها انزل سلكها انت 

فريد :- والله لو مكانتش لابسه اللبس اللى هى لبساه كنت نزلت سلكت بس اتحرج انزل وهى كده 

جاكلين :- يبقى نقطنا بسكاتك وبعدين قالت ايه ااوه اللى ايه بيحبوه هيييييا اديها يا جامد ملوكه ملوكه 

فريد :- هى مصارعه بتشجعى 

جاكلين :- بدى ماما روح اجابيه علشان تواصل ضرب فيها 

عند مليكه كانت لسه مسكه شعر روان فى ايديها 

مليكه :- انتى أهلك مربكيش وانا هربيكى من اول وجديد 

عدى :- ابوس ايدك خلاص يا ماما سيبى البت هتموت فى ايديكى 

فهد :- شال مليكه ودخلها الاوضه بعد معاناه 

مليكه :- بغيظ اوعى يا فهد سبنى عليها بقى بنت المبقعه تقول علينا بيئه وتقول بيت مختل وقذر بنت المقشفه 

فهد :- هههههههههههههههههه

مليكه :- بتضحك 

فهد :- من زمان اوى مشوفتش جنانك ده وبعدين تعالى هنا بذمتك انتى ضربتيها علشان قالت كده ولا علشان بستنى اول ما دخلت 

مليكه :- ع.ع.علشان الاتنين وبعدين تبوسك ليه ها بصفتها ايه وقامت تانى ولسه هتروح عند الباب 

فهد :- شدها فى حضنه وقال أهدى يا مجنونه دى من دور جاكى يعنى زى بنتى وبعدين دى مرات ابننا معقوله هتغيرى عليا من مرات ابنك 

مليكه :- لاء البت دى مش مظبوطه بتلبس لبس مش مطمنى هى لو قصدها بيه عدى كانت قعدت بيه فى الاوضه بتاعتهم مش تنزل بيه وعلطول تقعد قدامى و تقول بطريقة روان عمو فهد حاجه خيال كده رغم شعره ابيض وكبير فى السن بس اجمل من اى شاب اااااه لو طولتها كنت اكلت امها بسنانى بتتغازل فيك قدامى

فهد :- ضمها فى حضنه وضحك وقال هههههههههه بعد العمر ده كله ولسه بتغيرى عليا يا مجنونه 

مليكه :- اعمل ايه لحضرتك كل ما بتكبر كل ما بتزيد حلاوه 

فهد :- بغمزه بجد 

مليكه :- بجد انا نفسى احبسك معايه فى الاوضه مخرجكش منها ابدآ

فهد :- وانا موافق بس بشرط 

مليكه :- بفرحه بجد ايه هو الشرط وانا موافقه عليه علطول 

فهد :- تفضلى فى حضنى ومتبعديش عنى ولا ثانيه 

مليكه :- وانا موافقه 

فهد :- كده طيب يلا نبدأ من دلوقتى وشالها حطها على السرير وفتح زراير القميص بتاعه و(بما أن شهرزاد طفشت من الجزء التانى هنكمل من غيرها ونسيب العواجيز براحتهم شويه 🙈🙈🙈🙈)

،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

فى فيلا باسم 

دخلت مى وباسم على اوضتهم وطلع عمار وفرحه وهنا كل واحد على اوضه 

فى اوضت باسم ومى 

دخلت مى ورمت نفسها على السرير وقالت 

مى :- ربنا يرجعك لينا بالسلامه يا اسر وميوجعش ربنا عليك ابدآ اسر ده اخويه اللى مجبتهوش امى الله يرحمها بحس فيه من ريحت امى وابويه ربنا يشفيه ويرجع لينا احسن من الاول 

باسم :- يارب فعلا اسر ونعمه الاخ صاحب صاحبه مستعد يعمل اى حاجه علشان يساعد الكل ويشوفه سعيد ومبسوط ومد أيده وقال خدى يا قلبى العلاج 

مى :- اخدته منه وقالت ربنا يخليك ليا وميحرمنيش منك ابدآ يارب 

باسم :- ولا منك يا عمرى واداها الميه شربت العلاج واخدها منها وقال ريحى شويه يا حبى 

مى :- لاء مش عايزه انام هقوم اعمل اكل العيال زمانهم جعانين 

باسم :- بسها من راسها وقال خليكى انتى انا هعمل 

مى :- لاء والله انا مش تعبانه 

باسم :- اموت واعرف ليه رافضه اجيب ليكى واحده تساعدك فى البيت 

مى :- انت عارف يا باسم بحب اعمل الاكل بأيدى وبعدين مش فى واحده بتيجى تنضف الفيلا يومين فى الأسبوع خلاص ملهوش لازمه أن تيجى واحده تعيش معانا وتعرف خصوصياتنا

باسم :- عندك حق يا قلبى ربنا يكملك بعقلك يارب 

مى :- لسه هتقوم 

باسم :- علشان خاطرى خليكى قعده وانا هعمل ليكم احلى طبق مكرونه بس حضرى رقم الإسعاف 

مى :- ليه 

باسم :- هنحتاجو بعد اكل المكرونه علشان يتعمل ليكم غسيل معدة

مى :- ههههههههههه وعلى ايه الطيب احسن 

باسم :- ايوه كده اضحكى خلى الدنيا تضحكلى وبسها فى راسها وطلع من الاوضه 

مى :- بصت عليه لحد ما خرج من الاوضه وبعدين قالت انت اكبر نعمه ربنا بعتها ليا تعوضنى عن كل اللى فات بس حاجه واحد متتعوضش غياب بنتى عنى طول السنين دى ودموعها نزلت منها مسحتها وقامت تغير هدومها 

فى اوضت هنا 

دخلت عليها فرحه وهى متعصبه 

فرحه :- بعصبيه انتى دخلتى اوضى 

هنا :- ايوه اخد من عندك البلوزه السمرا بتاعتك علشان اروح بيها الجامعه بكره 

فرحه :- بعصبيه مين سمح ليكى تخديها 

هنا :- فيها ايه يا فرحه احنا اخوات 

فرحه :- بعصبيه لاء مش اخوات فاهمه اياكى تدخلى اوضى وتمدى ايدك على حاجتى تانى 

هنا :- بدموع حاضر 

فرحه :- اخدت البلوزه وخرجت من الاوضه وفى الوقت ده كان باسم طالع يبص عليهم ويطمن وشاف باب اوضت هنا مفتوح وبتعيط دخل عندها وقال 

باسم :- بخضه مالك يا هنا 

هنا :- مسحت دموعها وقالت مفيش يا بابا 

باسم :- رفع وشها ليه وقال امال الدموع دى ايه 

هنا :- سكتت

باسم :- مالك يا عمرى حد ضيقك فى الجامعه 

هنا :- لاء يا بابا بس فرحه اتنرفزت عليا علشان اخد البلوزه بتاعتها وقالت ليا اننا مش اخوات 

باسم :- انتى عارفه أن فرحه اختك عصبيه ومش بتحب حد ياخد حاجتها وهى لما تهدا هتلاقيها جايه تصلحك لواحدها 

هنا :- عارفه أن هى مش بتحب حد ياخد حاجتها بس ابو صحبتى مات وانا هطلع بكره من الجامعه عليها اعزيها ومعنديش حاجه سمرا البسها قولت اخدها وبكره اغسلها وارجعها تانى ليها 

باسم :- انا زعلان منك يا هنا 

هنا :- ليه يا بابا 

باسم :- علشان انا قايلك اى حاجه تحتاجيها تيجى تطلبيها منى علطول ليه مقولتيش انك محتاجه فلوس تشترى بلوزه سمرا 

هنا:- يا بابا انا قولت هى كام ساعه مش محتاجه اشترى واحده جديده 

باسم :- لاء مش كده انتى اتكسفتى تطلبى فلوس صح 

هنا :- بصت على الارض وسكتت 

باسم :- شوفتى ازاى انا فاهمك عمومآ يا ستى احلى بلوزه سمرا هتكون عندك الصبح تروحى بيها مكان ما انتى عايزه 

هنا :- ربنا يخليك ليا يا بابا وحضنته 

باسم :- حضنها وطبطب عليها وقال ويخليكى ليا يا حبيبت بابا وبعدين قال يلا اغسلى وشك وانزلى علشان الاكل انا اللى هعملو ربنا يستر بقى هههههههههههه 

هنا :- هههههههههههه شكرآ يا بابا 

باسم :- خرج من الاوضه وقفل الباب وراه وراح عند اوضت فرحه ودخل 

فرحه :- تعال يا بابا 

باسم :- دخل وقال انا زعلان منك يا فرحه 

فرحه :- ليه يا بابا 

باسم :- كده تزعلى اختك وتخليها تعيط 

فرحه :- هى قوام راحت اشتكت ليك 

باسم :- لاء مجتش ليا واشتكت انا اللى شوفتها بتعيط صدفه ليه تجرحيها وتقولى ليها كده 

فرحه :- انتو عارفين أن انا مش بحب حد يدخل اوضى ولا يمد أيده على حاجتى انا ماشيه بنظام معين 

باسم :- بس هنا اختك مفهاش حاجه لما تاخد منك بلوزه 

فرحه :- هى غلطت فى تلت حاجات اول حاجه دخلت اوضى من غير اذن تانى حاجه اخدت حاجه من حاجاتى من غير ما تستأذن تالت حاجه هى مفكره علشان هى اختى مسموح ليها تشاركنى فى حاجتى وده اكبر غلط انا واحده بحب الخصوصيه لكل حاجه تخصنى 

باسم :- فرحه انتى مش بتحبى ماما مى 

فرحه :- اكيد طبعآ بحبها

باسم :- طيب يا حبيبتى زى ما هى عوضتك عن حنان الام احنا لازم برضه نعوض بنتها حنان الاب والاخت صح ولا لاء 

فرحه :- سكتت 

باسم :- كمل كلامه وقال يعنى هى لو كانت اختها تيلا موجوده دلوقتى مش كانت راحت طلبت منها البلوزه بتاعتها وكانت أدتها ليها علطول 

فرحه :- ايوه

باسم :- يبقى ليه يا حبيبتى تحسسيها انها وحيده فى الدنيا دى وملهاش اخت خليكى انتى اختها وصحبتها هنا علطول واخده جنب لواحدها وانطوائيه علشان مش لاقيه منك حنان الاخت روحى دلوقتى عندها وصلحيها واديها البلوزه وقوليلها انا اختك وحاجتى حاجتك واحتويها علشان خاطر ماما مى وعلشان خاطر احنا كلنا عيله واحده 

فرحه :- حاضر يا بابا 

باسم :- بسها وقال ربنا يكملك بعقلك يا حبيبتى ويخليكم لبعض وميحرمناش منكم ابدآ

فرحه :- ويخليك لينا انت وماما مى يارب 

باسم :- يلا روحى لاختك على ما اروح اشوف مجنون البيت ده بيعمل ايه 

فرحه :- هههههههه ماشى وراحت فرحه عند اوضت هنا ومعاها البلوزه وباسم راح لعمار الاوضه 

باسم :- خبط على الباب وفتح ودخل 

عمار :- بسومه تعال 

باسم :- بأستغراب بسومه 

عمار :- ايوه بسومه ولا انت غيرت اسمك ولا ايه بالظبط 

باسم:- يا ابنى انت طالع كده لمين 

عمار :- اه انا اسف ليكم بجد أن طلعت فرفوش فى عيله نكديه كان المفروض اطلع شاب كئيب علشان اعجب 

باسم :- ياريتك طالع فرفوش انت طالع اهبل 

عمار :- بأستغراب اهبل 

باسم :- اه اهبل احنا وفى سنك كده كنا بنضحك وبنهزر بس برضه شيفين مصالحنا وبنعتنى بأهلينا وبنراعى الظروف لكن انت زى الاهبل عايز تضحك ليل ونهار وبس 

عمار :- الله يكرمك يا حاج كل ده مدح فيا مش عارف وادى وشى فين من الكسوف منك 

باسم :- بصله بأستغراب 

عمار :- مالك مسبهل كده اصلك نسيت تقول حاجه كمان أن الجيل بتاعكم عنده دم لكن احنا الجيل بتاعنا اللهم لا حسد معندهوش ولا ذرة دم 

باسم :- وقف وقال لله الامر من قبل ومن بعد هقول ايه قوم يا اخويه اجهز علشان هعمل الاكل 

عمار :- طيب انت هتعمل الاكل انا مالى اتحنط لحد ما تخلصه ليه اعملو وخلص وابعت ليا على الواتس آب وهكون عندك فى منت 

باسم :- لاء لو قعد اكتر من كده هتشل منك 

عمار :- طيب الحق نفسك يا بسوم وانزل بدع لينا فى الاكل 

باسم :- لاء فعلا زى ما انت قولت معندكش ذرة دم واحده 

عمار :- عيب عليك يا معلم عمار مش بيقول حاجه غلط ابدآ قشطه عليك 

باسم :- بصله بغيظ وخرج من الاوضه ونزل يعمل الاكل

،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

فى فيلا اسر 

وصل يوسف ومعاه البنات 

يوسف :- تحبو اجيب ليكم اكل من بره 

مى:- اه ياريت احسن هموت من الجوع 

مليكه :- انتى واحده عندك دم ازاى جايلك نفس تاكلى وبابا تعبان ولا هو ولا ماما فى وسطنا 

مى :- ومال الاكل ومال الزعل زعلانه اكيد على بابا بس ده ميمنعش أن اجوع 

سمر :- خلاص انتى وهى بطلو صداع وبصت ليوسف وقالت انا هعمل اكل مش لازم تشترى جاهز اطلع انت غير هدومك على ما اجهز اكل 

يوسف :- لاء يا سمر اعملى اكل وكلو انتو انا مليش نفس 

سمر :- لاء ما لو انت مأكلتش معانا مش هناكل احنا كمان 

مى :- لنفسها وانا مالى انتو بتتعزمو على بعض انا ايه ذنبى ماكلش 

يوسف :- ماشى يا سمر جهزى هاكل لقمه صغيره

مى :- لنفسها واخيرآ ظهر الحق وزهق الباطل هناكل الحمدالله 

مليكه :- بطلى تكلمى نفسك يا مجنونه 

مى :- اطلعى منها انتى يا اختى وطلعت اوضتها وغيرت هدومها ونزلت قعدت وقالت خلصتى الاكل يا سمسمه 

سمر :- فاضل عليه شويه 

مى :- لما نشوف الاخت نظيره هتأكلنا ايه 

سمر :- مى تعالى خدى الاطباق مليكه روحى نادى على يوسف 

مى :- انا هروح انادى يوسف وهبعت ليكى مليكه تساعدك 

سمر :- ماشى يا كسوليه انجزى

مى :- طلعت خبطت على باب مليكه وقالت انزلى ساعدى سمر تحت 

مليكه :- طيب وانتى ليه مساعدهاش

مى :- ها انا هروح انادى يوسف وسبتها ومشيت 

مليكه :- بنأدمه كسوليه ونزلت تساعد سمر 

مى :- راحت خبطت على باب اوضت يوسف 

يوسف :- فتح وقال عايزه ايه 

مى :- بتقولك سمر يلا انزل الاكل جهز 

يوسف :- روحى انتى وانا نازل وراكى 

مى :- متغبش بس 

يوسف :- انزلى يا مى 

مى :- حاضر بس متزوقش كده ونزلت تحت وقعدو التلاته مستنين نزول يوسف وبعد وقت نزل يوسف 

مى :- ايه يا عم انت بتعذبنا كل ده علشان تنزل 

يوسف:- بصلها ومردتش عليها وقعد على السفره وقال سمر انا من بكره هنزل الشركه بتاعت بابا وانتى معلش ترجعى من الكليه تخلى بالك من الفيلا ولو قدرتى تعملى لقمه للبنات وخلى بالك على اخواتك البنات زى ماما ما كانت بتعمل انتى مكانها دلوقتى لحد ما يرجعو لينا بألف سلامه 

سمر :- حاضر يا يوسف 

يوسف :- بص لمى ومليكه وقال وانتو متفكروش أن علشان ماما وبابا مش هنا هتقضوها لاء هتمشو زى ما هما كانو هنا واحسن كمان 

مليكه :- انا عن نفسى معنديش مشكله 

يوسف :- وانتى يا مى 

مى :- طبعآ موافقه وقالت لنفسها جينا لشغل التحكمات بقى 

يوسف :- بتقولى حاجه يا مى 

مى :- ها لاء انا بقول ربنا يرجع ماما وبابا بالسلامه 

الكل :- يارب واكلو وكل واحد طلع على اوضه 

،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

عند تيلا 

كانت خارجه من الشركه وهى فرحانه ولكن اتصدمت وقالت

تيلا :- انت ايه جابك ورايا انت بترقبنى ولا ايه 

انس :- وهو انتى مفكره أن انا هسيبك تتحركى بحريتك كده وتبعزقى فلوس عمى يمين وشمال 

تيلا :- كام مره اقولك أن الفلوس دى ملكش حق فيها عمك كتابها كلها بأسمى وانا اتصرف فيها زى ما انا عايزه 

انس :- لاء ليا حق الفلوس دى بتاعة عمى لكن انتى اللى ملكيش حق انت تقربى ليه ايه يا بتاعة الملجأ انتى واحده اهلها رموها فى الشارع ولولا عمى كان زمانك مرميه فى الشارع

تيلا :- حاولت تمنع دموعها انها تنزل وقالت على الأقل بنت الملجأ كان فيها الخير عنكم يا قرايبه ومن لحمه ودمه مهنش عليا ارميه فى عز تعبه لكن انتو يا رجاله عملتو ايه استخبيتو زى النسوان ومظهرتوش غير لما مات 

انس :- بعصبيه بت انتى لمى لسانك 

تيلا :- الحقيقه بتوجع صح لكن هتوجعك ازاى وانت بنأدم معدوم الإحساس والإنسانية اصلا 

انس :- انا كل ده بحاول معاكى بالود لكن صدقينى مش هتقدرى على اذيتنا 

تيلا :- اعلى ما فى خيلك اركبه ومش عايزه اشوفك تانى فى سكتى وسابته ومشيت روحت على البيت

انس :- انتى اللى اخترتى استحملى بقى اللى هيحصلك 

،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

فى فيلا فهد 

فى اوضت عدى 

دخل الاوضه مع روان وهو متعصب رزع الباب وقعد على الكرسى

روان :- بقى انا البتاعه اللى تحت تمد ايديها عليا وتشتمنى مبقاش انا لو مكنتش اندمها بنت الشحاتين دى 

عدى :- قام وقف وراح وقف قصادها ورفع أيده وضربها بالقلم على وشها 

روان :- حطت ايديها على وشها بصدمه وقالت انت بتمد ايدك عليا 

عدى :- واكسرك رقبتك كمان لما تغلطى فى امى وانا قاعد تبقى عايزه تتربى من اول وجديد كفايه شكلى قدمهم كلهم بقى وحش بسبب لبسك وتصرفاتك اللى تكسف ازاى كنت اعمى ومشوفتش فيكى كل ده ازاى قعد احبك المده دى كلها وانتى كده صحيح مراية الحب عاميه كنت اعمى ومش شايف حاجه لكن دلوقتى انا فتحت بس للاسف فتحت متأخر اوى بعد ما ضيعت عمرى فى حب كداب 

روان :- اولا مليكه مش امك يا عدى مليكه واحده شفقت عليك وربتك بعد ما ضحكت على ابوك واخدته من امك الحقيقيه وهى ولا بتحبك ولا حاجه هى بتعمل كل ده علشان تضمن انك تكون تحت دراعها وتضمن فلوس بنتها وابنها الحقيقين فكر كده وروح قولها انا هاخد الشركه شوف وشها الحقيقى اللى هيظهر سعتها حتى انا بتعمل معايه كده خايفه لاخدك منها وتفقد هى سيطرتها عليك مليكه دى مش طيبه زى ما انت فاكر دى حيه كبيره انا بس اللى فاهمتها من اول دقيقه دخلت عندكم هنا وعلشان كده مش طيقانى 

عدى :- حط أيده على ودنه وقال بس كفايه كلامك ده بيكشف ليا حققتك قد ايه اتخميت فيكى انتى اللى حيه وعقربه عايزه تكرهينى فى امى مليكه امى يا روان وهتفضل امى واحترمها واسمع كلامها مهما طال الزمان وعلاقتى بيها اقوى من واحده واطيه زيك تضعفها على رأى بابا انتى شبه امى مروه حيه زيها بتتلونى كل شويه بلون ومستعده تعملى اى حاجه علشان الفلوس انا خلاص مش عايزك يا روان انا كرهت كل لحظه اتمنيتك فيها انتى بنأدمه اقل ما يتقال عليها واطيه انتى طالق يا روان 

روان :- بصت ليه بصدمه وقالت بطلقنى يا عدى بعد ما كنت بتبوس رجلى علشان اقبل اتجوزك هتندم صدقنى فى وقت مينفعش فيه الندم وسعتها هتيجى تبكى بدل الدموع دم علشان ارجعلك وهسيبك كده بنارك ومش هسأل فيك 

عدى :- كفايه كل ما بتتكلمى بتنزلى من عينى اكتر واكتر اطلعى بره مش عايز اشوف وشك بره بررررررررره 

روان :- وهى بتحط هدومها فى الشنطه هتندم يا عدى هتندم وقفلت شنتطها وخرجت من الاوضه 

عدى :- قعد فى الارض وقال ليه ليه تعملى كده ليه انا بكرهك يا روان بكرهك 

،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

انتهى يوم طويل وشاق على ابطالنا ليأتى يوم جديد بأمل جديد واحداث جديده 

صحى يوسف من نومه قام دخل الحمام اخد شاور واتوضه وخرج لبس هدومه واداه فرضه ونزل كان كل اللى فى الفيلا لسه نايمين خرج من باب الفيلا وركب عربيته ومشى بيها وبعد وقت وصل الشركه بتاعة ابوه وركب الاسانسير وطلع عند المكتب ودخل بص على المكتب بتاع ابوه وبص على الكرسى اللى بيقعد عليه اسر وبص فى الصور لاقه صور هو وسمر ومى ومليكه حطتهم قصاده على المكتب مهنش عليه يقعد فى مكتب ابوه خرج وقفل الباب وراه وطلب من السكرتيره أن هى تحضره مكتب تانى فى مكان تانى غير مكتب اسر وبعد وقت حضرت السكرتيره المكتب فى اوضه تانيه ودخل يوسف وقعد مكانه وطلب من السكرتيره تبعت ليه حد من المختصين فى الشغل ده يجى يفهمه طبيعة الشغل وبعد وقت دخل ليه شاب فى أواخر العشرينات مع السكرتيره 

السكرتيره :- استاذ يوسف ده المهندس معاذ اكفاء مهندس عندنا فى الشركه واستاذ اسر بيعتمد عليه فى معظم الشغل اللى فى الشركه 

يوسف :- تمام اتفضلى انتى على مكتبك وخرجت السكرتيره راحت مكتبها ويوسف بص لمعاذ وقال 

يوسف :- اتفضل اقعد يا باش مهندس

معاذ :- شكرآ حضرتك وقعد قصاده على الكرسى 

يوسف :- انا يوسف اسر ابن الأستاذ اسر وهمسك الشغل هنا فتره لحد ما يرجع الشغل بس للاسف انا مليش فى شغل الهندسه والديكور فا كنت عايزك تفهمنى طبيعة الشغل هنا فى الشركه 

معاذ :- مفيش مشكله حضرتك احنا هنا فى الشركه عندنا مهندسين ديكور من اكفاء المهندسين واستاذ اسر جه فى الاواخر كان بيشرف بس على الديكورات اللى مرسومه على الورق لكن التنفيذ بيبقى على المهندسين 

يوسف :- ايوه انا محتاج افهم الرسومات دى ايه وازاى استاذ اسر كان بيتفق على الشغل   

معاذ:- تمام يا فندم اتفضل معايه على طربيزة العمل وانا هفهم حضرتك كل حاجه 

وقام يوسف مع معاذ وبدأ معاذ يشرح الشغل ليوسف 

،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

عند تيلا 

صحيت من نومها بصعوبه بعد ليليه قضتها ما بين دموع وبين كوابيس بتشوفها من وهى صغيره قامت دخلت الحمام اخدت شاور واتوضت وخرجت لبست هدومها وأدت فرضها ونزلت من الشقه وهى بتدعى ربنا يوفقها 

وقفت تاكسى وراحت عند الشركه اللى كانت فيها اليوم السابق ودخلت وهى بتستعد لمقابلة المدير دخلت عند السكرتيره وقالت 

تيلا :- صباح الخير 

السكرتيره :- صباح النور 

تيلا :- انا اللى جيت ليكى امبارح 

السكرتيره :- ايوه فكراكى والمدير الجديد جه النهارده 

تيلا:- بجد يعنى هقبله دلوقتى 

السكرتيره :- ثوانى أبلغه ومسكت التليفون وقالت ايوه يا فندم فى بنوته صغيره لسه متخرجه جديد جايه تقدم لورشة العمل 

يوسف :- ايه ورشة العمل دى ومين دى اللى جايه تقدم 

معاذ :- استاذ يوسف 

يوسف :- بص ليه 

معاذ :- خليها تدخلها وانا ابقى افهم حضرتك بعدين  

يوسف :- حط السماعه تانى على ودنه وقال دخليها وقفل التليفون 

السكرتيره :- تعالى معايه 

تيلا :- هقابل المدير دلوقتى 

السكرتيره :- ايوه 

فى المكتب 

يوسف :- ايه ورشة العمل دى 

معاذ :- ورشة العمل دى احنا بناخد الشباب حديثى التخرج وبنعلمهم كل حاجه بطريقه حرافيه وبنعمل ليهم اختبار كل سنه وبناخد اكفاء المهندسين اللى بيعدو الاختبارات دى بمهاره 

يوسف :- طيب والتانين 

معاذ :- بيرجعو تانى الورشه يدربو من اول وجديد

يوسف :- بما أن انا مش هفهم حاجه فى المقابله دى اتفضل انت قابلها وشوف ايه الاسئله المفروض تسألها ليها وانا هريح شويه على الكنبه دى 

معاذ :- براحتك يا فندم وفى الوقت ده دخلت تيلا مع السكرتيره 

السكرتيره :- بشمهندس معاذ دى البنوته اللى جايه تقدم الوظيفه 

معاذ :- ماشى اتفضلى انتى على مكتبك 

وخرجت السكرتيره وقفلت الباب وراها 

معاذ:- اتفضلى اقعدى يا انسه 

تيلا :- شكرآ وقعدت على الكرسى وهى متوتره 

معاذ :- اسمك ايه

تيلا :- تيلا 

يوسف :- اول ما سمع الاسم قام بسرعه وراح عندها لكن اتفاجئ بوجود نفس البنت اللى خبطها مرتين 

معاذ :- استاذ يوسف فى حاجه 

تيلا :- اول ما سمعت اسم يوسف بصت مكان ما يوسف وقف بس اتصدمت لما شافت هو هو اللى خبطها بالعربيه 

يوسف :- راح عند معاذ وقال شكرآ يا معاذ انا هكمل المقابله 

تيلا :- بقرف وانت تكمل المقابله معايه بصفتك ايه 

يوسف :- بصفتى مدير الشركه عندك مانع 

تيلا :- اتصدمت لما سمعت كده وقالت ايه 

يوسف :- وقعتى ولا حد سمه عليكى يا قطه 

تيلا :- وانا مش عايزه اشتغل خلاص 

يوسف :- خايفه

تيلا :- قلبى مبيعرفش الخوف بس ميشرفنيش أن اشتغل مع واحد زيك 

يوسف :- لو انتى صحيح مش خايفه اشتغلى هنا وتحت رحمتى ومعايه 

تيلا :- انا عمرى ما كنت تحت رحمة حد انا تحت رحمة ربنا وبس

يوسف :- احم ونعمه بالله طبعآ 

تيلا :- افتكرت ما بينها وبين نفسها أن هى محتاجه شغل وتعبت على ما لاقت الشغل ده وقالت لنفسها وانا خايفه اشتغل معاه ليه وكده كده هبقى انا فى مكان وهو فى مكان يعنى مفيش حاجه هتجمعنا ببعض 

يوسف :- قررتى ايه 

تيلا :- قعدت وقالت هشتغل 

يوسف :- بصلها بتحدى وقال تمام نبدء الاسئله 

تيلا :- وانا مستعده 

يوسف :- اسمك 

تيلا :- تيلا وسكتت شويه 

يوسف :- كان متحمس يسمع اسمها الثلاثى كان عنده امل انها تطلع هى بنت خالته قال بلهفه اسمك الثلاثى 

تيلا :- تيلا تامر محروس 

يوسف :- بخيبت امل قال منين 

تيلا :- سكتت شويه وقالت من المنصوره 

يوسف :- ولما انتى من المنصوره جايه تشتغلى هنا ليه 

تيلا:- والله حاجه متخصش حضرتك 

يوسف :- احم سنك 

تيلا :- اربعه وعشرين 

يوسف :- لنفسه غريبه نفس السن ونفس الاسم انا ليه عندى احساس أنها هى وبعدين قال شكل اشتياقى ليها خلانى اتخيل الناس هى 

تيلا :- لنفسها انا ليه حاسه ان اعرفه من زمان واشمعنا ده بالذات اللى اسمه زى اسم يوسف وبعدين قالت شكلى من شوقى ليه بيتهيألى الناس كلها هو 

يوسف وتيلا اتكلمو فى نفس الوقت وقالو مع بعض

يوسف :- انتى هتفضلى كده ساكته كتير 

تيلا :- فى نفس الوقت انت هتفضل كده ساكت كتير

الاتنين بصو لبعض بأستغراب 

يوسف :- لنفسه تيلا الوحيده اللى كانت بتنطق الكلام معايه فى نفس الوقت 

تيلا :- لنفسها يوسف الوحيد اللى كان بينطق الكلام معايه فى نفس الوقت 

يوسف :- احم م.م.ممكن اشوف الورق بتاعك 

تيلا :- احم ايوه طبعآ اتفضل ومدت ايديها بالورق 

يوسف :- لفت انتباهو جرح قديم فى صباع ايد تيلا بصله وسرح فيه وقال من ايه ده 

تيلا :- سحبت ايديها وبصت على الجرح وافتكرت لما ام السيد شدت من صوبعها الخاتم جرحتها من غير لا شفقه ولا رحمه ضمت ايديها على بعديها وقالت ده جرح قديم وقعت عليه وانا بلعب صوبعى اتفتح 

يوسف :- ماشى وبص على الورق بس كان بالنسبه ليه خيبت امل كبيره لان الورق اثبت ان حياتها كانت فى المنصوره واسمها الثلاثى طلع زى ما قالت ليه بصلها تانى وقال تقدرى تيجى من بكره تبدأ التدريب فى الورشه 

تيلا :- شكرآ عن اذنك 

يوسف :- تيلا 

تيلا :- ايوه حضرتك 

يوسف :- احم لاء خلاص تقدرى تتفضلى 

تيلا :- بصت عليه بأستغراب وفتحت الباب ومشيت 

يوسف :- غبى حبك لتيلا واشتياقك ليها مخليك متخيل الكل هى انتى فين يا تيلا قلبى وجعنى عليكى امته ترجعى ليا من تانى وطلع تليفونه وفتح الصور بتاعته هو وهى وقعد يتفرج عليها ويضحك وشاف الصوره اللى كانو شايلين مى ومليكه فى المستشفى وهما لسه مولدين وقعد يضحك عليهم وبعدين قال واحشتينى اوى اوى يا تيلا  

،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

عند تيلا 

خرجت من الشركه وهى حاسه نفسها مخنوقه وقالت 

تيلا :- ليه كنت حاسه ان يوسف جنبى كنت حاسه ان هو بيطبطب عليا ويقولى معلش انسى هموم الدنيا ومتزعليش ليه بقيت اشوف يوسف فى كل الناس ياترى بقى شكلك ايه احلويت ولا وسكتت شويه وضحكت وقالت اكيد هتكون حلو زى ما كنت زمان قبل ما الزمن يجى علينا ويفرقنا ياااااااا يا يوسف واحشتنى اوى اوى ونفسى اترمه فى حضنك وانسا هموم الدنيا كلها وبعدين افتكرت حاجه مهما وقالت انا ممكن اوصل لاهلى عن طريق المدرسه هى كانت اسمها اه افتكرت اسمها (.........)وطلعت الفون بتاعها وفتحت النت وعملت بحث عن اسم المدرسه وجابت العنوان ووقفت تاكسى وراحت عند العنوان اللى جابته بس اتصدمت لما شافت المدرسه اتحولت لعماره كبيره راحت عند البواب وقالت 

تيلا :- السلام عليكم 

البواب :- وعليكم السلام امرى

تيلا :- هو مش كان فى مدرسه هنا اسمها (.........)

البواب :- ايوه المدرسه الخاصه بس دى من فتره وقعت على الطلاب وفى منهم مات وصاحب المدرسه قفلها وهرب من أهل الطلاب وبعد فتره الحكومه هدتتها واتباعت الارض واتبنا عليها العماره دهى وشاور على العماره اللى قاعد فيها 

تيلا :- بخيبت امل طيب شكرآ ليك 

البواب :- العفو حضرتك تأمرى بحاجه 

تيلا :- طلعت فلوس وحطتها فى أيده وقالت لا شكرآ ومشت وقفت تاكسى وروحت على البيت بخيبت امل 

،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

فى فيلا فارس المنشاوى 

كانت جومانه داخله المطبخ تحضر الفطار ومره واحده صرخت 

الكل نزل على صوت صريخ جومانه 

فارس :- ايه في ايه 

جومانه :- وهى بتضرب فى كريم قالت ابنك ده كان هيوقف قلبى داخله المطبخ وفى امان الله الاقى المخفى ده لابس ليا وش مخيف ولابس ملايه سوده ومستخبى ليا وراه الباب 

فارس :- وهو بيكتم ضحكته وانتى مش عارفه ابنك يعنى 

جومانه :- ما هو علشان انا عارفه هربيه من اول وجديد 

كريم :- ما كفايه يا حاجه انتى بتنجدى مرتبه ورمت وربنا 

جومانه :- وانت لسه شوفت حاجه انا هربيك من اول وجديد يا ابن فارس 

فارس :- دلوقتى بقى ابنى مش ابنك 

كريم :- طيب خليها تسبنى وابقو شوفو النسب ده بعدين 

جومانه :- انا مش سيباك النهارده يا كريم 

كريم :- انت يا عم الحاجه مالك مكتفى كده بدور المتفرج ما تعمل اى حاجه وانقذنى من ايد زينه دى 

بسمله :- ههههههههههه احسن علشان تبطل تعمل فينا مقالب 

كريم :- اه يا بسلة الكلب لما اطلع من ايد زينه دى هعرفك مقامك ما خلاص يا حاجه 

فارس :- خلاص بقى يا جومانه الولا استوا تحت ايدك 

كريم :- ايه استوا دى يا حاج هو انا قلقاس وبتعمله ولا ايه ده ايه العيله دى ياربى وبعدين خاطرت فى باله فكره كان ماسك صاروخ فى أيده ومد ايده سحب الولاعه وولعه ورماه تحت جومانه 

جومانه :- انا هعلمك ال عاااااااااااااااا

كريم :- طلع يجرى وهو بيضحك وبيقول تعيشى وتاخدى غيرها يا مزه 

جومانه :- ماشى يا كريم وربنا ما انا هسيبك 

فارس :- وهو مش قادر يمسك نفسه من الضحك قال ههههههههههههه ذنب ناس بتخلصه ناس فاكره مقالبك فيا ابنك بيطلعه كله عليكى دلوقتى 

جومانه :- شمتان فيا يا فارس طيب وربنا هوريك انت وابنك 

فارس :- وانا مالى الله 

كريم :- من فوق خفى على الراجل شويه هطفشيه من ايدك يا وليه 

جومانه :- يولولو عليك يا بعيد ادخل اوضك بدل ما اطلعلك يا كلب 

كريم :- حاضر امامى بس خلى بالك فى صرصار وراكى 

جومانه :- عاااااااااااااااا وراحت اترمت فى حضن فارس 

كريم :- من فوق اى خدمه يا معلم 

فارس :- قد ايه انك واطى 

،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،