رواية مريم الفصل الخامس بقلم جمانه السعيدي
كمل الجكاره وكال نامي انتي اني راح اطلع برا شويه وبعدين انام
بس اريد اطلب منج شي مهم
كلشي حجيته هسه ما يطلع خارج هاي الغرفه
واذا باجر سئلوج عن ليلة العرس كولي كلشي تمام
مريم هزين راسي يعني موافقه
هو طلع واني سديت باب الغرفه ونزعت السيت ولبست
دشداشه نص ردن وتغطيت
حاولت انام بس حجاياته ما يروحن من بالي ابد
بقيت شويه ونمت لان كلش تعبانه
اليوم كان تعب من بدايته النهايه
جمانه السعيدي
ولله غفيت جان اسمع صوت شخير عالي
فتحت عيوني بلبدايه كلت اني وين
نسيت اليله عرسي
بعدين شفت الحجي نايم يمي ويشخر
اول مره اباوع علي هيج بتركيز
ولله كلامه كسر كلبي وحسيته رغم الهيبه والسمعه والفلوس بس انسان مسكين
حاولت ارجع انام بس صوت الشخير عالي واني ما اعرف انام اذا اكو يمي صوت
اصلا اني بصعوبه نمت لان متغير مكاني
سمعت الاذان اذن مال الصبح كمت توضيت وصليت
ودعيت ربي يسهل امري ويحبب هذا الرجال بيه
ويحنن كلبه عليه
رجعت ماكدرت انام يمه من صوت الشخير
اخذت مخده وجرجف ورحت نمت بلصاله على القنفه
سمعت صوت جرص الباب اندك طفرت الساعه بلعشره الصبح
كلت اكيد هاي سميه لو ام علي
رجعت الجرجف والمخده للغرفه
خاف يعرفن احنا ماصار بينا شي ابد
واني وعدته هذا يبقى سر بينا احنا الاثنين فقط
ورحت افتح الباب
جمانه السعيدي
فعلا طلعت سميه بس شافتني
سميه هذا كله نوم لازم جانت ليله حمره وتغامزلي
مريم اهلا وسهلا
سميه هذا ريوك ابوج دزه اللج ويكول بليل اجي اشوفها
هاج اخذي اني مستعجله اريد اروح للسوك
انطتني العلاكه من باب المطبخ وراحت
اني دخلته جووو
فتحته لكيت كيمر عرب وصمون حار ومربى وكاهي
خليت القوري على النار ورحت اكعد الحجي
وصلت يمه وصوت الشخير يرج الغرفه رج
مريم حجي حجي تكعد تتريك
حجي حسن نايم وبغير عالم واسمع صوت مثل صوت الملائكه يكعدني نسيت اني مزوج
فتحت عيوني شفت مريم صباح الخير
مريم صباح الخير حجي تكعد تتريك بابا دزلنا ريوك
حجي حسن اي بويه كاعد
جمانه السعيدي
مريم رحت قبله للمطبخ حضرت كوابه للجاي وخليت الكاهي بمواعين اني كلش جوعانه اخذت شوبه صمون وكيمر وخليت بحلكي لان البارحه بقيت بدون عشى
غسل الحجي واجا كعدنا نتريك
الحجي منو جاب الريوك
مريم سميه جابته
....سميه زوجت ابوج
...اي
...وليش مابقت عدنا
...تكول مستعجله اريد اروح للسوك
بدينا ناكل وهو سوا لفه كيمر وصمون وكال اكليها من ايدي استحيت مديت ايدي اخذها
كال لا اني اوكلج
خلاها بحلكي وابتسم
حجي حسن اني البارحه ردت اوكلج بلعشى بعدين شفتج
حيل مستحيه مني كلت خليها لمن تتعود عليه
مريم ابتسمت ودنكت
حجي حسن تدرين انتي شكد حلوه ومن تستحين اتصيرين احلى
الخدود عبالك طماطه مد ايده وكرصني من خدي
جمانه السعيدي
ياربي شلون بيه خجلت كلش اني جوعانه اريد اكل بس كلامه خجلني حيل
اكلت شويه وكمت بعدني استحي منه
دك تليفونه كال جيبي باباتي
رحت جبته من الغرفه
كال منووووو
باوعت المتصل ام علي
مريم هاي عمه ام علي ا
أخذه ورد عليها
اني التهيت انقل بلواعين وامسح ميز الطعام وهوبيده الكوب يشرب ويحجي وياها
خلص وكال ام علي طابخه غدا هسه شويه اجيبه وتجي
مريم هله بيها وكل الهلا
وفعلا الساعه ١١ ونص اجت ام علي وجايبه وياها الغدا
حايره شطابخه برياني وسمج شوي ومركه وطرشي وخبز حار
خليته على الطباخ وهي دخلت كعدت تسولف ويه الحجي
اخذلتهم ببسي وجكليت وماي
ماحبيت اكعد يمهم يجوز عدهم كلام خاص
رحت طلعت الفرشه مال الغرفه
واني افوت قريب على الغرفه رايحه للحمام اخلي الفرشه بلغساله سمعت كلامهم بلصدفه
ام علي البارح سجاد اجا وكام يحجي ويصيح
يكول ماخذ وحده بكد احفاده شني يضحك على روحه يضحك علينا
وهاي على شنو ماخذته على جماله لو على شبابه
اكيد طمعانه بفلوسه
رجال جبير بعد هو والعرس شنوووو
عيب علي فشلنا كدام العالم
حجي حسن ليش فشلتهم زواجه على سنة الله ورسوله
لو لان راح تشاركه بلورث مزعوج
وحتى لو اخذتني علمود فلوسي خلي اعيش الباقي وياها من عمري سعيد ومتهني وبلعافيه عليها الفلوس
لو استاذ سجاد لا اغنيك ولا اخلي رحمة الله تنزل عليك
ما يقبل يخدمني اله اسجل البيت باسمه
على الاقل هاي البنيه الحد الان كلشي ماطلبت مني لاهي ولا اهلها
بعدين هو شمدخله فلوسي واني حر بيهن
ازوج اطلك اشمرهن بلشارع اتبرع بيهن
هو ليش يدخل بحياتي
اني مدخل بحياته مشاركه بفلوسه
جمانه السعيدي
اذا اجا مره ثانيه كليله شتريد اسوي سوي اني مايهمني ابد
مريم رحت خليت الفرشه بلغساله الصراحه حيل خفت خاف اتصير مشاكل واني موكدهن
ام علي اتغدت ويانه الساعه بلثنتين وراحت
الحجي باباتي بعد انتي اسبحي بدلي نامي بكيفج اني اجيب عشا جاهز
اني رحت سبحت وتمكيجت وبدلت وكعدت على التلفزيون
شويه وكال ذوله الولد الي اماجرين المحلات والمشتمل
اجو يباروكلي
حضري شي أقدمه الهم
اني رحت حضرت الماي والببسي
وطلعته جكليت خليت بلمقدمه
وانطيته قدم الهم
كعدوووو شويه وراحوووو
اجا كعد يمي
حجي حسن الله شنو هلعطر الطيب
دنكت بعدني استحي منه
رفع وجهي بايده وكال ياربي كل الجمال الي بلدنيا شايلته
باسني بخدي وبعدين اخذ ايدي وباسه
بقا لازم ايدي وخالها على صدره
مريم التفتت علي حجي اسويلك جاي
حجي حسن لا كلشي ما اريد ابقي كاعده يمي وبس
جان طالع فلم اجنبي كلش حلوووو
حجي حسن شنو عاجبج بلافلام الا جنبيه الترجمه تعمي العيون
مريم اني احب الأفلام الاجنبيه اني اعرف هواي كلمات اجنبيه بسبب الافلام يعني اعرف الفضهن واعرف معانيهن
حجي حسن اني ما احب الافلام الاجنبيه لان ما اكدر اقرا الترجمه
مريم عادي اني اقرالك الترجمه
حجي حسن جان يريدني احجي ويااا حتى حاجز الخوف بينا يروح
ماجان هامه الفلم الاجنبي بكد ماكان يدقق بملامح وحركة وجهي وشفايفي واني احجي
اني بديت اقصله القصه واحجيله التفاصيل وهو
كلشي ما افتهم لان عقله بغير مكان
حجي حسن ردته تحجي حتى يوكع حاجز الخوف بينا
هي تحجي واني عيوني عليها
شلون تحجي وشلون توضح
كلشي ما افتهمت من قصة الفلم
اباوع عليها واكول معقوله هاي الحلقومه زوجتي
هذا العسل كله اليه
سبحانه الخالق المبدع
بعدني لازم ايدها وخاله على كلبي
يمكن الحرمان الي عشته والوحده الي حسيت بيها
هي الي مخليتني ما مصدك ابد
مريم كلما اريد اسحب ايدي يلزمها اكثر
للمغرب يله كام كال اني هسه اجي
اني رحت توضيت وكمت اصلي هو جاب علاقه وخلاها على الميز
وراح يصلي
خلصت وفتحتها بيها كلشي
ككو وكيك ونوكه وعلج ونستله وبطالة عصير
وسمسميه
خلص صلا وكال هاي الحلويات كلها االلج
واي شي تردي بس كولي تلكي كدامج
مريم شكرا الله يحفضك اليه
حجي حسن وين ذهبج شووو بس هذني لابستهن
مريم اني ماعندي بس هذني
.. يعني ما اشتريتي بس ذني
...مو اني اشتريت سميه اشترتلي اني ما رحت ابد للسوك
....ولايهمج اله البسج ذهب من راسج الرجليج
...شويه واجا العشى تعشينا ونضفت المطبخ وخليت الجاي على النار
اندكت الباب
باوعت من شباك المطبخ ذوله اهلي كلهم جايين
حتى بيت عمي وياهم
كلش فرحت عبالك مفاركتهم صار سنه
دخلوووو واني رحت سلمت عليهم وبوستهم
قدمتلهم ماي وعصير وجكليت
بعدين سميه كالت تعاي بلغرفه
اجت هي ومرت عمي والجهال كلهم
ما اسولفلكم الجهال سووو انتشار سريع بلغرفه مابقه
مجر ما فتحووو ولا ميز
ما دخلو رأسهم بي
طلعت علاكة الحلويات الي جابها الحجي ووزعته عليهم
بعدين سميه كالت
سميه شني شغلتكم خلصتوها
مريم هزيت راسي اي
سميه اي الحجي بعدا شباب ديري بالج علي
وددلي ترا ازوجه وحده ثانيه
جمانه السعيدي
تحجي وتهز بايدها اباوع لابسه بتوت ذهب اربعه
وبلايد الثانيه اثنيين سوارات
فتحت شاله تعدله لأبسه تراجي كبار
كلت بكلبي عرفت ليش مستعجله الصبح رحتي تشترين ذهب بفلوسي الي اخذتيهن من مهري
حصلتي من ورا عرسي اكثر من ثمن ملايين
المفروض هذا الذهب اني هسه لابسته
الله ينتقم منج ياطماعه
بس وبن ترحين من رب العالمين وانتي ماكله مال اليتيم
بقو يمنا تقريبا ساعه ونص سميه جابتلي ديباج هديه عرسي
وبيت عمو علي جابولي اثنيين ثريات كلش حلوات
راحوووو واني رحت سبحت ولبست دشداشه فانيله قصيره ام الاستيكه من الصدر وخليت معطر وكعدت على الجربايه
الحجي قفل بيبان البيت ودخل سبح وطلع بلفانيله والشورت
رجعلي احساس الخوف مره ثانيه
رغم الليله مو مثل البارحه بس اني حيل خايفه
اني مامستعده نفسيا الهاي التجربه
بس شسوي لاحول ولا قوه
طفه الضوه مال الغرفه واجا تمدد يمي
حجي حسن l انتي خايفه مني
مريم اي
...ليش خايفه ترا اني مراح اكلج
....بعد يجوز كل بنيه تخاف من تجربة الزواج
...خلاص اني الليله عافيج من كلشي
اني مراح اجبرج تسوين شي مامقنعه بي
انتي خايفه مني لان بعدج ما متعوده عليه
نامي وأخذي راحتج احلام سعيده تصبحين على خير
مريم وانت من اهل الخير
خمس دقايق بلضبط وصعد صوت الشخير
شلون ما اعرف انام وواحد يمي يشخر اخذت جرجفي والمخده ورحت نمت
