رواية احكام الفصل السادس والاخير
طلبت منك ايه كمان غير انك تخسر اخوك وتتجوز طليقتو يا جوده
جوده تفتكر كلام احكام بس كان صعب عليه يقوله اتنهد وقال اللي طلبتو هتشفوه في الفرح ...بالاذن
قال كده ودخل ينام وخالد قعد على الكرسي قصاد نوال اللي كانت بتبكي جامد
بصلها بسخريه وقال...ابكي يا نوال...انتي كان في ايدك توقفي كل ده بس خوفتي يتقال جوزك عينو من مرات اخوه ...دلوقتي مش بس هتتقال دي هتتزاع على العلن....ابكي لانك تستاهلي وانا استاهل اكتر منك
عند احكام اتصدمت وقفت و بعدت بسرعه عن ابراهيم بعد الكلام اللي قاله بصتلو بزهول وقالت..انت..انت قصدك ايه
ابراهيم قال بسرعه ولهفه..انا عايزك وراضي بيكي يا احكام ...ومش بس راضي بيكي ده انا مش راضيني اي واحده غيرك...انتي صحيح مش شيفاني لكن انا مش شايف غيرك و
بس قاطعتو لما قالت بزهول..بس...بس انت بتقول ايه...انا...انا مش مصدقه..ده انا بعتبرك اخويا الصغير يا ابراهيم
ابراهيم قال برفض وسرعه...صغير ايه ده هيه سنه ..سنه واحده يا احكام انتي عندك ٢٦ وانا عندي ٢٥ وبعدين انا مش اخوكي ..وعمري ما اكون اخوكي انا..انا بحبك
أحكام بقلم ...زهرة الربيع
احكام كانت مصدومه جدا من اللي بتسمعه ومتجمده مكانها وهو قرب منها وقال برجاء...اديني فرصه وانا ..انا هخطف حنان ونبعد انا وانتي من هنا خالص مش هنخلي حد يعرف طريقنا ابدا انا هحميكي انتي وبنتك من الدنيا كلها صدقيني قولتي ايه يا احكام
احكام ابتسمت بدموع وقالت....قولت حقك عليا....حقك عليا يا ابراهيم...طول عمرك جمبي واقف سند قدامي وانا عمري ما خدت بالي لمشاعرك...عمري ما حسيت بيك ابدا
و قعدت ونزلت دموعها بغزاره وقالت....انا اصلا مخدتش بالي لاي راجل غيره..مشوفتش غيره من اول ما فهمت يعني ايه حب...كان خالد وبس....عمري ما فتحت قلبي لحد تاني ولا حتى عيوني ...حبيتو اكتر من حياتي وهو....هو قتلني اول جوازنا عرفت انو لما قربيلي واتكلم معايا كان علشان يقربني لاخوه...وان جوده هو اللي باعته كنت اقدر اسيبه وقتها ..بس قلبي رفض قلي اديلو فرصه...اسمعيه حتى....وفعلا سمعته
قلي ..انا عملت كده بس بعدين حبيتك بجد يا احكام..ومبقتش اقدر على بعدك وعلشان كده اتجوزتك ...سامحيني
ونزلت دموعها بحسره وكملت وقالت...رجعت صدقتو ورميت قلبي تحت رجليه...انا..انا استاهل كل اللي جرالي استاهل يا ابراهيم لاني غبيه غبيه قوي
وبقت تبكي بشده
ابراهيم قرب منها بحزن وقال...عمر الحب ما كان غباء يا احكام...انتي عملتي بأصلك وهو عمل بأصله الواطي...واهو غار ...خلصتي منو...طاوعيني واسمعس كلامي خلينا نبعد عنهم ونكمل حياتنا
احكام قالت بدموع ..مبقاش ينفع...عشان حنان يا ابراهيم..دي بنتي ..حته من روحي مقدرش اخليها تعيش عمرها كلو هربانه وخايفه..مقبلش أكد كلام الناس ويقولو اني هربت معاك وان كل كلمه قالها الوسخ ده صح.. مش هينفع ابدا
ابراهيم بصلها بدموع وقال..بس ينفع تتجوزيه يا احكام...عايزه تتجوزيه...انا فاهمك...انتي مش عايزه تحافظي على بنتك ولا هامك شكلك..انتي لسه واقفه عند خالد عايزه تتجوزي قدامو وتعيشي مع اخوه وتحسريه مش ده قصدك يا احكام
احكام ابتسمت بدموع وقالت...انت لو قولت اي حاجه عني مش هزعل منك يا ابراهيم ...يحقلك...وانا عمري ما ازعل من اخويا الصغير
ابراهيم قال بغضب وانفعال..انا مش اخوكي مش اخوكي فاهمه..ومش صغير اصلا ...ونزلت دموعه وقال..انا ...انا بكرهك يا احكام مش طايق اشوفك تاني اصلا
قال كده ومشي خطوات بغضب
احكام ضحكت بخفه وهيه بتمسح دموعها وقالت ...ابراهيم...شكرا ...شكرا على كل حاجه ربنا يخليك ليا
ابراهيم بصلها برجاء ووجع وواضح في عيونه وهيه ابتسمت بقلة حيله
فاتنهد وشاف ان مفيش فايده ومشي بسرعه من عندها بغضب شديد وحزن ميتوصفش
احكام اتنهدت وقعدت على الكرسي بحزن ووجع عليه وعلى كل اللي حصل معاها من الاول وافتكرت تهامس الناس عليها وكلامهم السيئ اول ما نزلت الحاره بصت قدامها بدموع وقالت..كلو يهون علشان عيونك يا قلبي ..حياتي كلها فداكي يا حنان
ومرت الأيام اللي قبل الفرح وكانو الناس هيتجننو من الزهول لما عرفو بجوازهم و ازاي جوده هيتجوزها بعد اللي عرفه
ويوم الفرح احكام كانت بتجهز وكانت اجمل عروسه حرفيا كأنها صبيه مكملتش العشرين بس كانت دموعها محبوسه في عيونها ومش طايقه نفسها لانها هتضطر تبقى قريبه منو
دخلت امها وقالت بضيق وغضب..عريسك مستني يا عروسه بعتوني استعجلك
احكام وقفت وبصتلها بابتسامه وقالت..انتي لسه زعلانه يا اما
امها قالت بغضب...ده على اساس هامك زعل امك..ما انتي عملتي اللي في دماغك وبتتزفي على اللي خرب بيتك وبوظ حياتك وفضحنا قدام الخلق
احكام قربت منها ومسكت ايدها وقال....بكره تقولي احكام كان معاها حق يا اما ....انا بعمل كل ده علشان اخلص نفسي واخلصكم من الفضيحه دي
امها ابتسمت بسخريه و قالت....عارفه يا بنت بطني ابوكي سماكي احكام ليه
احكام بصت لها بهدوء وهيه كملت وقالت...لما خلفتك تعبت قوي والدكتور قال اننا هنضطر نشيل الرحم...وانك هتبقي بنتنا الاولى والاخيره...ولان ابوكي كان راجل مؤمن معترضش وقال قضاء ربنا ..يومها قال هسميها احكام
انا استغربتو قوي وقلتلو ايه احكام ده كمان
قالي ربنا حكم علينا تكون هيه بنتنا الوحيده وانا هسميها احكام علشان تبقى صاحبة حكم وقرار في حياتها ومحدش يحكم عليها الا اللي خلقها مهما حصل
وطول عمرك بتعملي كده ومحدش قدر يمشي كلمه عليكي ...بس دلوقت مبقتيش كده يا احكام...جوده قدر يكسر عينك ويجبرك تتجوزيه... ولو فاكره لمجرد انو اتجوزك الناس هتنسى اللي حصل... تبقي هبله...ده الموضوع هيبقى روايه عليها العجب وتستاهل تتحكي في كل مكان
احكام قالت بدموع...انا لسه زي ما انا يا اما ومحدش يحكم عليا غير الله ...ولو كنت اتنازلت شويه علشان بنتي فانا اكيد عمري ما هقبل عيني تتكسر وهتشوفي
امها بصتلها باستغراب وقالت..قصدك ايه
احكام باست راسها وقالت...قصدي اني مليش غيرك متسبنيش لوحدي حتى لو زعلانه مني متسبنيش انا مليش غيرك
وحضتتها بقوه وبقت دموعها تنزل بألم
امها اتأثرت جدا بدموعها وحضنتها قوي وبقت تطبطب عليها وتدعي ربنا يهونها عليها
بعد شويه كانت احكام نازله وايدها في ايد جوده قدام كل الناس اللي كانو مش مستوعبين اللي بيحصل ...وقدام نوال وخالد كمان
احكام التفتت لنوال وبصتلها بانتصار وهيه شيفاها منزله راسها بكسوف وسط الستات اللي بيتكلمو عليها وافتكرت لما نزلت راسها بنفس الطريقه ورفضت تشهد باللي حصل
وبصت الناحيه التانيه على خالد الي كان اكتر حد مكسوف من اللي بيحصل والغضب في عيونه ابتسمتلو باستهزاء وميلت على جوده وهمستلو في ودنو
جوده اتنهد ووقف وسط الفرح وقال ...احم...يا جماعه...عايز اقول كلمتين
الناس التفتولو باستغراب وهو قال بتوتر ..عايز اعتذر لاحكام وابوس راسها واطلب منها تسامحني في اللي عملتو معاها...انا يا رجاله..انا دبرتلها الفضيحه اللي حصلت قاصد ..انا جبتلها تعبان كبير في اوضتها وانا اللي بعت ابراهيم وقتها على البيت ولما صرخت ابراهيم دخل يشوف فيه ايه.....انا.... احم انا عملت كده لانها... لانها رفضتني ومرضيتش تتجوزني قبل كده
الكل اتصدم بشده ونوال لطمت على. خدها وخالد مكانش مصدق اللي بيسمعه
والناس بقم يضربو كف بكف والشيخ نعمان قال بسرعه وفرحه..انا كنت عارف انا ياما قولتلكو دي بت الشيخ عبد السميع ومتعملهاش وبص لجوده بغضب وقال...بس لو كان عندك ريحة الدم او النخوه ما كنتش اتطاولت على وليه ورميتها بالباطل اخس عليك اخس
جوده نزل راسو بحرج والناس بقم يبصولو باستحقار
وام احكام زغردت جامد والستات بقم يزغردو معاها وسط دهشه ابراهيم اللي ابتسم وهو بيبص لأحكام بفخر وفهم ليه وافقت تتجوز جوده
جوده لقى الناس بقت تتكلم كتير قال بزعيق...خلاص خلصنا..كل واحد حر في حياته العائليه...انا غلطت معاها واستسمحتها وهيه سامحتني واهوه قدامكم بنتجوز خلاص موضوع وتقفلو عليه وخلينا نكمل الفرح بهدوء
بس احكام صدمتو لما قالت.... فرح مين اللي نكمله يا معلم...انا لو هأتجوز خنزير واعيش معاه هستنضفوا عليك
أحكام بقلم.... زهرة الربيع
جوده اتسعت عنيه بزهول وقال بغضب شديد...قصدك ايه يا بت
أحكام قالت بغضب اكبر وصوت عالي....قصدي اني عملت الفرح ده علشان اعرف الناس دي كلها حقيقتك الوسخه..مش لانهم هاميني او هاممني كلامهم..لكن علشان بنتي اللي هتتربى وسطهم محدش يجيب سيرتها بكلمه واحده..انما انا نجوم السما اقربلك مني
ابراهيم صفر بسعاده وحضن ام احكام ....ونوال وخالد بصو لجوده بشماته والناس كلها كانت فرحانه فيه
جوده احتدت عنيه بغضب اعمى وقال....انتي ..انتي بتلعبي بيا يا احكام...بتضحكي عليا..لا ده انتي هبله رسمي و متعرفيش مين جوده الصباغ يابنت الزناتي ده انا اخسف بيكي الارض يا بت ولا يرفلي جفن
احكام بصتلو بسخريه وقالت ....اعلى ما في خيلك اركبو ونط من عليه كمان يا معلمه
جوده مسكها من دراعها بغضب وقال بانفعال وجنون.....انتي...انتي فاكره كده هتسلمي من شري...ها فاكره هسيبك في حالك...ده انا اولع فيكي وفي امك وبنتك وكل عيلتك عايشين...وبنتك دي اللي خايفه عليها من شويه كلام ممكن احسرك عليها وتشوفيها في الابيض يا حلوه لو حتى هيكون اخر يوم في عمري فاهمه
احكام بصتلو بقوه وقالت بمنتهى الهدوء ..فاهمه..ومتأكده من كده...عارفه انك مش هتسبني ولا هتسيب بنتي في حالها وعلشان كده جبتلك معايا دي يا جوده
جوده بصلها بستغراب وقبل ما يستوعب جملتها طلعت سكين من جمب الفستان وطعنتو بيها بقوه في اقل من ثانيه وسط زهول الجميع
جوده بصلها بصدمه وعيونه اتسعو على اخرهم واحكام كانت بتبصلو بحقد شديد وطلعت السكين بقوه وضربتو بيها مره تانيه وقالت بغضب اعمى وصريخ ....الاولى علشان شرفي اللي وسخته...والتانيه دي علشان ابني اللي مات بسببك يا حيوااااان
وشدتها وضربتو تاني وقالت بانفعال وجنون ...ودي علشان حياتي اللي استكترتها عليا يا و*سخ
جوده وقع على الارض من شدة الألم ونوال صرخت وجريت عليه وبقت تلطم وهيه بتضمه وبتبكي جامد
احكام كانت عايزه تضربو تاني بالسكين وفي قمة الانفعال وابراهيم كان بيشدها بقوه وقال بصدمه ودموع ...عملتي اييييه... ايه الي عملتيه ده ليه كده لييييه يا احكام
احكام انتبهت وبصتلو واديها بترتعش وقالت بدموع..خلي بالك من امي وحنان...هخليهم امانه في رقبتك
ابراهيم هز راسو بالرفض وقال ..لا..لا مش هيجرالك حاجه لا..يلا ههربك من هنا لازم تمشي يللااااا
بس وقفت مكانها وقالت بدموع..انا طلبت البوليس قبل ما انزل يا ابراهيم..زمانهم على وصول ...متقلقش عليا انا السجن احسنلي من الغابه دي بكتير
ابراهيم نزلت دموعه بصدمه لما قالت البوليس جاي
وجوده كان على الارض في حضن نوال بيلفظ اخر انفاسه وعايز ينطق مش قادر وتقل جسمو ووقعت ايده
ونوال بقت تلطم وتصرخ وخالد كان بيبكي جمبه وقال بزعيق ووجع..ليه...ليه يا احكام ..ليه انا السبب في كل ده انا السبب
احكام ملتفتتلوش وابتسمت بسخريه وراحه لما عرفت انو مات ومسحت الدم اللي في اديها في فستانها الابيض وقربت من امها اللي كانت متجمده مكانها والدموع في عيونها وقالت....حنان يا اما خدو بالكم ليها
امها لطمت وقالت ببكا ...حرام عليكي يا احكام...انتي قتلنيني انا يا بنتي قتلتيني انا يا احكااام
وحضنتها وبقت تبكي بقوه واحكام كانت مش بتبكي ولا دموعها بتنزل بس ابتسامتها مش مفرقاها
ابراهيم قال بسرعه وخوف...مش هيجرالها حاجه يا خالتي .....هقول انا اللي قتلته انا..انا هدخل بدالك و
احكام قاطعتو وقالت بسرعه.....محدش هيتظلم تاني خلاص...انا اللي قتلتو محدش هيشيل شيلتي غيري....انت بس خد بالك لحنان هيه محتاجه راجل جمبها يبقى سند زيك ...لان ابوها ولا راجل ولا سند...هيه فوق نيمتها قبل الفرح مكنتش عيزاها تحضر اللي حصل ده لو فعلا اهمك وبتحبني زي ما قولت خد بالك ليها ...قولولها امك عاشت شريفه طول عمرها...قولولها امك مفيش انضف منها..خلوها ترفع راسها وسط الخلق
قالت كده مع وقوف عربيات البوليس ونزول الشرطه اللي لقوها واقفه والدم على اهدومها وهيه قالت بصوت عالي... انا اللي قتلته ..انا
الظابط اخدها تحت صدمة الجميع والشيخ نعمان هو ورجالة الحته بقم كلهم يكلمو محاميين ليها وبيطمنوها وبيقولو بنتك في عنينا ...هنقوم محامي ...مش هنسيبك
احكام ركبت البوكس وابراهيم وقف جمب العربيه وقال بألم..هستناكي هستناكي العمر كلو
احكام ابتسمت برضا وقالت ...بس انا مش عيزاك تستنى عيزاك تعيش وتنبسط..انت اكتر واحد تستحق تعيش
ابراهيم نزلت دموعه بغزاره ومقدرش يرد والعربيه طلعت وبقى يجري قصادها واحكام قالت بسرعه....خد بالك لحنان يا ابراهيم...قولولها احكام مقدرتش تحوش عنك احكام القدر ...بس قدرت تحوش عنك احكام الناس 💔
تمت بحمد الله
