رواية الابواب الخمس الجزء الثاني الفصل السادس بقلم ريام الهادي
مكابر كوة اجيب الراس عالراس
واعاند دنيتي عناد المجانين
وانة شما اطيح اكل للروح لاباس
..على اجروحج توجي ولاطيحين
جرعني الزمــــان اسموم من كاس
... ...اقسة وامر من سم الثعابين
تجرعتة بصبر ما ورجت ناس
....لجن ياحيف فضحتني النياشين
صالحه : اي بعد ايدي ربوها بت جليله خلي رس امها يطلع من راسها هاي صارلها ٣ ايام بره البيت الله اعلم شسوت عيني عبيد لازم ناخذها للطبيب يجوز مو بنيه وجانت بحضن واحد حتى اذا مو بنيه اذبحها وذبها حالها حال چلب الفطايس واذا طلعت بنيه نزوجها
وانطم عارها
ناي : اجر من ايدهم واتوسل عفيه عوفوها خلي نشوف وين راحت
عبيد : وخري انتي الثانيه لا احطج فوكاها واحركجن سوه
ناي : كمت اعيط بكل قوتي بوجهم احركني بس عوفهه عوفهه راح تموت بيدك
بديعه : عوفوها ولكم يتيمه خافو الله بيها يبووو راح تموت بيدكم
جوحي : التدخل بيكم وشرفي اطيح حظها وانعل سلفه سلفاها وخري بديعه لتخليني امد ايدي عليج واتخارب ويه اخويه
بديعه : عساكم صرتو دم ميهمني عوفوها لشرهب خلي نفهم منها شجاكم تخبلتو من شفتوها اسمعوها هاي مكان متاخذوها بحضنكم وتحمدون الله على رجعتها سالمه
صالحه : ومنو يكول سالمه عيني يجوز شبعت لعب واجت هاي ٣ ايام بره البيت وبهاي الظروف الموزينه اذا ولد طلع ينلعب بيه طوبه مو عاد وحده بعمرها وتردين اصدك مجانت بحضن رجال
بديعه : عساج لا صدكتي ولتحجين عليها هاي بنتي ومربيتها واعرف اخلاقها وهيه بعدها صغيره وينهه وين هااي السوالف
ساهره : خوش تربيه مهزومه وجايه وره ايام وادافعين عنها والله خوش اني لو منج اعوفها لعمامها يطيحون حظها ويزوعوها دم حتى لا اختها وبتج يقلدوها ويسون مثلها
بديعه : انتن شنو من مله بس فهموني من ياطين مخلوقين حرام عليكم حتى رحمه بگلبكم ماكووو هذا الحقد على شنو عساجن بنار تحرك بيجن مثل متزيدن نار رجولتجن ومستقوين على هاي الطفله اليتيمه وكمت ادفع بيهم مابطلو ضرب
ناي : اني وعمه بينهم كل واحد بينهم يتفنن شلون يضربها الي بيده والثاني برجله وسوده عليه صارت دجاجه بيدهم وهذا الگلب عبيد لازمها من شعرها وشايغه روحها
ساهره : انتن باطلات محد طلع عينها غيرجن
يوميه وحده مسويه سالفه شكبرها بس مثل سالفه هاي العايقه مصارت
ناي : كل واحد يحجي شى ومحد يميز صوت الثاني من العياط والظاهر بيبي هم جانت تعيط بس محد مركز وياها بسبب حالتها الصحيه وايام اكلها قليل تعبت حيل وصوتها ماعاد الصوت الي يهز البيت ويركعهم على حلكهم ويوكفهم عند حدهم لحد ماسمعنا طبه قويه اثاري بيبي ضاله تعيط حتى يعوفون شرهب ومن شافت محد داير بال والبنيه انمردت بيدها طفرت من العربانه وكعت بلكاع الطبه وصوت الوكعه خله الكل يندار بأتجاهه وتراكضو عليها وعافو شرهب سحبت شرهب من الكاااع كوومي فدوة
شرهب : جسمي يوجعني جان ضربهم بحقد وبحياتي ممضروبه هيج ردت احاول اكووم مكدرت
ناي مااكدر احرك رجلي
ناي : حاولي فدوة اروحلج عمه تعاي ويايه كومناها اريد اخذها للغرفه واقفل الباب اخاف يرجعون يضربوها كومناها
صالحه : وين ماخذاتها بعد حسابها مخلص
بديعه : عسى الله ياخذ عمرج حاطه راسج براس البنيه مالج دخل واسكتي لج من طبت لهسه حرتي شگلتي كومي يمه لازمه ايد شرهب حتى اكومها عيوني راحت على عمتي وشلون مفرفحه روحها على شرهب كامت وراحت الها وكعدت يم رجلها وتبجي منظرها يگسر گلب الكافر وذني الحقيرات ولا يمهن
عبيد : وخري منها گلبه يمه انتي زينه
عمشه : الله يهد حيلكم وتچسر عظامكم عبن كضيتو البت وعدمتوهه العافيه كون ربي يعدم عافيتكم يمه شربت عايني ليه سودة بوچهكم شجاكم تزوملتو واحدكم كاضهه تكولن كاض زلمه جتال اخوه
صالحه : ليش السوته قليل ياعمه
عمشه : عمه العماج يلعايبه البت مزيونه وعين الله عليهه چا عبالج شربت مثل بتج
صالحه : شبيهه عيني بتي لو شصار وصحتو سما بيكم خير طمو عاركم تلكوها مو بنيه هسه وملعوب بيهه
عمشه : لعب بعمرج عزرايل كون وجفانه شرج يبت غنيه غضب الله عليج وعلى امج ذبتجن عليه وعايشه بدنياهه تزاكط ولاجن عدهه بنيات ينكطن سم انه دوم اكولن ماشفت خير من خيتي وتالي رمتكم علي و وانتم يلطراكيع يلواحدكم صاير زلمه براس اليتيمه وجحش ويه مريته انطو صبر نشوف البت وين ولت
ساهره :احنا لازم نوديها طبيبه تفحصها قابل نضل على حجيها
بديعه : شبيهه ياستار
ساهره : شنو شبيهه نكلها ٣ ايام منعرف شى عنها
بديعه : ماما شرهب احجي وين جنتي
شرهب : مسحت دموعي ورجعت شعري ليوره وكاعده يم رجل بيبي وبديت اسولف اول مكلت على عمه صالحه وهي عاطت
صالحه : لج چلبه اني شعليه ولا شفتج
شرهب : كمت اعيط والله انتي اخذتيني لمنطقه اسمها سلمان باك وعفتيني وحدي
عبيد : ليش تكذبين ويه منو رحتي
شرهب : تقرب مني يريد يرجع يضربني جان بيبي ترفع ايدها
عمشه : ميل منها انعل شيب الخلفك عبن تجيسهه كملي يمه وانتم اركدو واسمعوها
شرهب : حجيت كلشي والكل ساكت جان تعيط صالحه مره ثانية
صالحه : خوش والله عمي مو بنات فلك لاعبات لعب بعدج بكد القندره وتجذبين وادورين افلام من كل عقلكم تصدكوها
بديعه : وليش منصدكهه اعرف شرهب متكذب
صالحه : طبعاً تصدكيها حتى محد يعرف شمسويه من مكسوره
ناي : اختي لو مسويه مكسوره مجان رجعت للبيت
ساهره : عيني تلكين الراحت وياه اخذ منها شرفها وذبها قابل الولد شيريد من وحده مثلها تونس وياها كم يوم وذبها
عمشه : خايبه انجبي من عابت لهلجهره لا تحطين خشمج بسالفه متخصج
ساهره : شون متخصني عمه اذا الوكت الاغبر خلاهن بنات عم ابني واني اخاف على سمعته وسمعتنه
عمشه : لاتذبين فروخ حياي هاي سوالفج كضه افادي منهه اخذ مريتك يجوحي ولي لدارك عساكم لا رديتو
جوحي : مااروح يمه شنو جهال كدامج واطردين بينا غير نفهم من هاي الساقطة شسوت بعد
بديعه : همه انتم منطيها مجال تكمل كل شويه وعايطه صالحه
عمشه : گملي حبوبه ومالج شغل بيهم
شرهب : كملت كلشي لحد ماوصلت للبيت وكتلهم مستعده احلف على القران
صالحه : كالو للحرامي احلف كال چاني الفرج اسمعي لج وهاي كدامكم كلكم اني مالي دخل بيها ولا شفتها واكبر جذابه منو امها ام الزلم اكيد تطلع عليها وهاي بان بت بديعه من كعدت شافتني بلبيت لا طلعت منه ولا وصلت للحوش اصلاً وانتم ضلو مصدگين بيها ميهمني بس اذا انتم صدك رياجيل وماتقبلون بلعيبه خلي نستر عليها ونزوجها هاي هسه وهذا عمرها كذبت وطلعت من البيت وشردت ورجعت وفوكاها مسويه فلم هندي شطوله حتى تقنعكم وشوفو حالكم فاكين حلوكم وتردون تصدكون لا عيني لا هنا اني اوكف الكم من صارت سالفه سما واحدكم استلم بتي شبعها كتل وحرتو شسويتو رغم تدرون حماها تعدى عليها وجانت مجبوره ومرحمتوها واني سكتت كلت ابوها وعمها ومن حقهم بس من تسوي بت صمد الاكبر من سالفه بتي
وتبلعوها اگلب الدنيا ومااسكت الجره على سما يجري على شرهب
بديعه : ضرب وضربها شتردين بعد رغم اني متأكده مكعد تكذب
صالحه : شوفي بديعه اطلعي من الشغله كلها لان هاي السالفه مو هينه وتطمطم مثل سالفه بان وعمتي تروح تهد هاي السالفه وراها كسر رگاب خلي عمامه همه يتصرفون
بديعه : شنو اشيل ايدي هاي بتي اني ربيتها
ساهره : لا مو بتج بت جليله امها ذبتها علينا بليله ظلمه
بديعه : مذبتها عليج يايوم انتم شلتو همه لو تعبتو وسهرتو اني الي تعبت وسهرت وكلت وغسلت وكبرت هاي بتي حالها حال بان بعد المرحومه جان عمرها اشهر حرت بيها وصارت قطعه من روحي واذا تحجين على جليله وذيج على كولتج ام الزلم وتشمر خلفتها ليش انتي مو شمرتي خلفتج لو نسيتي بلال انتي وياها واحد متفرقين عنها
ناي : جيتت ساهره على عمه وضربتها وعمه هم مسكتت وردت الضربه تالي وكف بينهم عمو جوحي وبعدهن
عبيد : كااااافي متستحن مو واكفين
بديعه : هو اني الما استحي لو بت خالتك ومرتك
عمشه : يمه نايه خذي خيتج تغسل وتاكل لكمه عبن وجهه اصفر وانتم اركدو انهد حيلي منكم ومن طلايبكم چا انه الله بلاني بيكم عبنكم موش اوادم
ناي : كومت شرهب ومشيتها تسبحين
شرهب : لا من جنت بيت ذيج المره خطيه غسلت ملابسي وسبحت واجيت
ناي : تكدرين تصعدين
شرهب : اي اكدر عفناهم وصعدنا وبان ويانه وجان بلال كاعد على الدرج من شافها حضنها
شرهب : اااااخ على كيفك بلبل
بلال : اووواا
شرهب : اي اوااا جان جسمي كله يوجعني احس ولا عظمه صاحيه بيه ورغم كل الاحسه بجيت شويه وسكتت دوم اضم بگلبي قهرتي
ناي : نومتها بفرشتها وخليتها تعيد كلشي حجته
شرهب : ليش صافنه عليه ممصدكتني
ناي : حضنتها حييل وبجيت شون مااصدكج بس اتخيل شكلج وحدج
شرهب : الْحٍمَدٍ للـّہ الله دزلي ناس زينين
ناي : ليش مخليتيهم يوصلوج لهنا اقلها المره والرجال من يحجون كدام عمامج الجلاب يصدكون
شرهب : خافو سمعت الرجال يكول لزوجته اخاف يذبون تهمه براسنا اشكال بلاوي نسمع والمنطقه مو امان كوه قبل يوصلني من كتله ذبني براس الشارع يله قبل جانو حيل خايفين لا ورايه مصيبه همه ناس فقره وعلى كد حالهم وخافو يتورطون واني عذرتهم اذا مرت عمي ذبتني بلشارع شون بعد واحد يأمن
بان : غير وحده مجرمه ومتعرف الله اني لو افهم الله ليش منطيها العافيه وكلشي ومماخذ روحها مديشوف سوالفها ومصايبها فتحنا عينا على كوارثها من ايام عمه خوله لهذا اليوم سالفه اتعس من سالفه كله من وراج ياناي اول مره اشيلج الذنب
ناي : ليش شسويت
بان : لوما سالفه الرساله جان هسه ولو من هذا البيت جان خلصنا منها مثل ماخلصنه من ساهره
ناي : شمدريني عبالي انتقم منهن ومن سما بلذات لان اذت يونس
بان : وبربج شحصلنا شو اخوج وبعده بلسجن واني وطار مستقبلي واختج وانتقمت منها صالحه بطريقه الشيطان يصفك الها لان حتى على باله متجي والحبل على الجرار ذني اليتقرب منهن يحترك انطيني وحده ما أذنها اولها عمه خوله سحر وخبلنها وفوكاها زوجوها لرجال بكد ابوها ومكفاها هي واختها دمار شبابها معودت عمه صارت زينه وتعيش حياتها وتبتعد عنهن قبل عرسها بكم يوم خربوه وخلو حياتها جحيم والتفتن بعدها لامج وشفتي نهايتها الله يرحمها
واحنا ماشاء الله الجيل الجديد استلمنا بنات غنيه بلسره اني اتمنى اطلع من هذا البيت لاول مره اتمنى مارجعنا من كربلاء مو جنا كاعدين وخلصانين منهن هسه حسيت بقيمه الواحد يعوف هذا المهجوم
ناي : رفعت رجلي من الكاع وحاوطتهن بيدي وكاتلني القهر وافكر بكل الصار يمكن كلام بان صحيح جان المفروض اسكت متوقعت هيج راح يصير اني لعبت بلنار ورايه تشجعت شرهب وهم تقربت منهن وحركت سما كدام اخوها وهاي اني وياها ندفع ثمن سوايتنا من دمنا والله يستر من الجاي
بدلت لشرهب واباوع جسمها مشخط الله يكسر ايدكم طول مااحنا فوك الصوت جوه ما هدا عياط وصياح ومنعرف شديصير ونزلت بان وره شويه صعدت كالت ابويه اجه ومرتضى هم كلهم كعدو يتفاهمون شلون يدمرون اختي واني مابيدي حل لحد متذكرت سالفه خال مهدي عيب ولا كتله على رجعت شرهب صحت بان وكتلها تجيب التلفون من مرتضى وهو مقصر دزه بيدها ودكيت على خالو عمران ومثل كل مرة خطيه ينطيني رفض وهو يخابر
وبلغته برجعتها
عمران : الْحٍمَدٍ للـّہ على سلامتها بنيتي وين جانت
ناي : صفنت احجيله اي خلي احجي احسن ماياخذ نظره موزينه على اختي وسولفت كلشي اله وهو ساكت اخر شى كتله انت مصدك اختي مو خالو
عمران : اي مصدكها
ناي : لعد ليش عمامي ماصدكوها
عمران : لان مع الاسف نسوانهم عاميتهم لو بيهم خير وزلم حوك مجان تجرأت مرت الجبير تسوي هيج سالفه تعرف رجلها واخوته ماوراهم اي شى بوخه بس حجي ومحد يكدر يكسر راسها لهذا سوت سوايتها وگلبها بارد بس نست اكو الله جبير فوك راسها
بسم الله الرحمن الرحيم
إِنَّ الَّذِينَ يَرْمُونَ الْمُحْصَنَاتِ الْغَافِلَاتِ الْمُؤْمِنَاتِ لُعِنُوا فِي الدُّنْيَا وَالْآخِرَةِ وَلَهُمْ عَذَابٌ عَظِيمٌ صدق الله العظيم
ربج مايرضى بلظلم بنتي الهن يوم
ناي : شوكت ياخالو مو والله گلبنا خلص من أذيتهن
عمران : والله لو بيدي حالكم لا اخذكم عندي ومااخلي بشر يمس شعره منجن
ناي : اعرف خالو متقصر رحمه الله والديك ومشكور وكلش اعتذر عطلتك عن شغلك وكل شويه مخابرتك
عمران : لتكولين هيج اني بحسبت عمج ابوج بكيفج الترتاحين اله خالج شتردين بس خابري وكلها ساعه زمان وتلكيني يمج
ناي : شكراً خالو الله يكثر من امثالك سديته منه
بان : اكلج اكو سؤال مدوخني ليش خال مهدي يساعدج متلاحظين اهتمامه زايد
ناي : قابل شعنده ويايه رجال بكد ابويه ولو هو احسن من ابويه وعمامي ومن كل واحد بهذا البيت
بان : مكلت عنده شى وياج بس حيل مهتم وشتردين ميردج
ناي : الله ميكطع على كولت بيبي لا اب ولا ام ولا اهل بيهم حظ دزلي هذا الرجال يوكف النا بوكعتنا الله يحفظة
رجعت التلفون واسمع اصواتهم جوه ماسكتت وصار العصر وماتعبو حتى سألت بان كالت بيبي تعبت ونامت مر اليوم واني وشرهب ايدنا على گلبنا منعرف شراح يصير وخاصه عمو فلاح صعد وسأل شرهب وعادت نفس الحجي وقرر يروح لسلمان باك ويتأكد من حجي شرهب واخذها وياه حتى يندل بيتهم اباوع على حالها تبهذلت وعيونها خايفه رغم ساكته ومتبجي بس اختي مدمره ومنهاره
وراحو واحنا كلنا على نار ننتظر و٣ ساعات يله رجعو ومن رجعو شايف عمو فلاح هاي العائله وكلام شرهب اطابق وياهم فرحت حيل بس يافرحه ماتمت لان مكدرو يثبتون شى على صالحه لان المره من اجت على شرهب وشافتها كاعده بلشارع جانت وحدها ومحد شاف صالحه يعني بقى عبيد واخوه مصدكين هي شردت من البيت وهلمره كالت صالحه يجوز الولد مااجاها المتواعده وياه وهي متندل تاهت وخلف الله على الناس الي لفتها بكل الطرق تريد تثبت التهمه على شرهب وهي مصادقه وانهزمت لخاطر صاحبها اني وعمه وبيبي وبان مصدكيها بس عمامي مع الاسف صدكو صالحه
عمشه : كلشي فض والبت رجعت لدارها مااريدن واحد منكم يجيسهه وتضل يمي
عبيد : خلي بالج ماكو مدرسه بعد
شرهب : لا عمو عفيه امتحانات نص السنه
عبيد : حتى تنهزمين مره ثانيه مو تبقين هنا واذا طلعتي عتبت الحوش احط طلقه برجلج واسكطج
ناي : والله اخذها بيدي وارجعها بيدي
عبيد : حجايه ثانيه حتى انتي ابطلج هو انتن مال مدارس طابات طالعات شمدرينا شسون بهذا الوكت كله
بديعه : اني اوديهن وارجعهن بس لتبطلون شرهب
جوحي : رحمه لاهلج ام بان لتدخلين فلاح سكت مرتك تره اكثر من مره تجاوزت وسكتت الها هي مره غريبه واحنا عمامهن ومسؤولين عليهن لو تعرف من توكع بليه من وراهن تعالو يعمامهن الحكوو
بديعه : لا مو غريبه والف مره كتلكم اني امها اني الربيتها
صالحه : عشتووو ونعم التربيه
ناي : ردت بيبي تحجي وتسكتهم وشفتها تلوب وشفتها بيضه عرفت تخربطت ركضت على علاجها والتهينا بيها
شرهب : كمت من يمهم واني تارسني الكرهه اريد احركهم اموتهم ناس حقراء تمنيت اكو احد ياخذني والله اله انهزم واخلص منهم صعدت وجان اشوف سما العوبه واكفه وتعلج وحاطه ايدها على خصرها جنهه وكفت امها سبحان الله نسخه
سما : هاااا كعدتي بلبيت صرتي حالج حال بان بح ماكو مدارس بعد اخدمن واكربن بلبيت
شرهب : لتفرحين ارجع للمدرسه وغصب حتى عن اهلج
سما : ههههههه من كل عقلج ترجعين كلشي توقعت بس متوقعت اطلعين داهيه هيج تحركيني كدام مهند وتخلين دمي بطولي لا اخليج تبجين دم ضعف الدم النزفته من وراج وره وكاحتج خسرت صحتي وكليتي وصلتيني للموت عبالج اسكت عنج
شرهب : ادري انتي وامج وره سالفتي كلها
سما : ههههههه بربج شون خطه تجنن والله وهااا هاي فكرتي وداعتج مخمخت الها جم يوم لحد متوكعين هاي الوكعه وبعد الشوط الثاني يم كفشه لا اخلي حياتج مثل كفشتج متعرفين الها راس من ذيل
شرهب : وحده ادبسسز شترجى منج
الله شيسوي بيج بعد ومتخافين وبعدج مأذيه
حقيره عفتها وطبيت للغرفه كعدت على الجربايه واهز برجلي وافرك براسي عبالك الدم ميصعد براسي حجي سما أذاني ذني شراح يخططن بعد تعبت والله كمت اروح واجي بلغرفه طبت ناي ركضت الها وشمرت نفسي بحضنها
ناي : اسم الله شبيج
شرهب : امشي نطلع من هذا البيت
ناي : وين نروح صدك تحجين
شرهب : اي مكان والله الشارع ارحم من هذا البيت شفتي شون حادين سنونهم علينا
ناي : كافي گلبي لتخافين واذا على الدراسه اني احجي ويه بيبي خلي شوي تتحسن وارجعج والله
شرهب : ذني مراح يجوزن مني وحجيت شكالت سما
ناي : خلي اروح اطيح حظها
شرهب : وين رايحه فدوة اكعدي واسكتي هاي الجم يوم دمرني واذا تعاركتي وياهن راح يحقدن اكثر اني ممخبلني غير عمامج يعني شكد سامعه من بنات ويايه بلمدرسه عمامهم موخوش بس مثل عمامنا مشايفه
ناي : قسمتنا شنسوي لو اخوج جايز من سما جان هسه هو فوك راسنا اقلها من نطلع من البيت هو ويانه ومحد يكدر يفتح حلكه يونس ما ضيع نفسه بس ضيعنه ويااه وبعد سنه كامله يله يطلع وبهاي السنه شمدريني شراح يصير
شرهب : لهذا كتلج خلي نطلع بأي مكان
ناي : اني وياج مالنا مكان غير هنا كل واحد بنينا امال عليه عافنه وحار بروحه وماعدنا غير نكعد ونسكت ونسلم امرنا بيد الله
شرهب : عفت ناي وكلي يأس ومنتظره الضربه القاضيه مال صالحه لان گلبي يكول مو لهنا انتهى انتقامهن منج يشرهب
واكفه بممرر المستشفى انتظر شراح يصير الجو بارد شهر الثاني 2006 حتى مكدرت اكعد واكفه مره اروح واجي ومره اوكف انتجي على الحايط وراسي رافعته ادعي رب العالمين يطلعها بلسلامه
ومهدي بعد مسافه عني هو وخاله وعمه كاعده لازمه السبحه وتسبح وتدعي
اليوم عملية بيبي اجاني الخال ومهدي وياه من الصبح واخذنا بيبي وبعد التحاليل وروح وتعال دخلوها العمليات
ذيج الايام كلها سكتت لان وضع بيبي تراجع وكامت يوميه تتخربط الخبلني ذوله السكاطه مااجوي لا جوحي ولا عبيد
اما عمو فلاح مقبل يجي لان مستحي من خالو عمران لان يعالج امه وهو ماعنده كال مالي عين اوكف يمهم وهمه ناس غربه دفعت ملايين وعالجو امي والمفروض هذا واجبي واجب اخوتي جان فلاح يبجي وهو يبوس ايد امه ورجلها ويتعذر منها على قلت حيلته وضعف حالته الماديه ومكدر يعالجها
اعرف عمو فلاح لو عنده ولا يقصر خطيه هو عامل يطلع من الفجر يرجع للعصر ويوميته يادوب تكفينا اكل وشرب وخاصه المحل مسدود بعد وكعت بيبي وعبيد شال ايده فد مره من البيت وكامت صالحه تطبخ فوك لان اكو مثل المخزن فرغته واشترت طباخ وتطبخ ومالها علاقه بالاكل والمصرف
ساعات كل ساعه منهن افكر واكول ياترى بيبي ترجع مثل الاول لو يبقى وضعها هيج طلع الطبيب وكال نجحت عمليتها وراها طريق طويل للعلاج وكال بحالتها هاي مايتوقع تمشي مثل قبل على الاكثر تمشي على عكاز وهذا الشى وره علاج طويل يجوز يطخ اكثر من سنه مدري افرح لو اموت قهر لان انحكم على حياتها الباقيه تمشي بعكازه هاي عمشه الجانت تحط العبايه على راسها وتخلصها من فرع لفرع ومن بيت لبيت وتطلع من الفجر تشتغل بلعتيك وكل الحيل بيها هيج يصير حالها
كعدت تعبت من الوكفه وخاطري مكسور مدنكه واباوع على الكاع وافكر بكلشي لحد محسيت اكو ايد انمدت بيها شربت وكيكه صغيره رفعت راسي شفته مهدي
مهدي : هااج اكلي من الصبح مي ماحطيتي بحلكج
ناي : جريت نفس بخنكه وكتله شكراً مجوعانه
مهدي : نحير بيج لو بيبيتج اذا وكعتي
ناي : عود لتحير بيه عوفني بلكاع اذا وكعت ودرت وجهي منه عافهن يمي وراح بأتجاه خاله جنت جوعانه حيل وعطشانه ومامديت ايدي اجه الخال بأتجاهي وشالهن وانطاهن الي
عمران : مااعتقد تردين ايدي
ناي : ابتسمت بقهره وكتله مااردها واخذتهن منه واكلت الكيكه وشربت العصير كله لكيت مهدي يباوع عليه بحقد ياربي هذا الرجال شكد مكروه ولا احسه من كرايبي وابن خالي رغم عمه شكد حجتلي عن خالو فوزي واخلاقه وشهامته هذا عليمن طالع حقنه وشايف نفسه شو خاله ذهب صافي يجوز طالع على امه اكيد مبين نفس الطينه
عمران : مهدي ابني اخذ بت عمتك ورجعها للبيت قبل ممنوع التجوال
مهدي : وانت خالو
عمران : اني رايح لبيت ابو حسن اخذ تكسي منا متواعد وياه وانت وصل ناي وتعالي لهناك اليوم نبات
مهدي : ليش منرجع لديالى
عمران : غير ام عبيد تكوم بلسلامه وانطلعها من المستشفى وراها نرجع خوما نعوفهم على النص شجاك مهدي
مهدي : اني ارجع ناي وراها ارجع لديالى ماابقى بعد
عمران : لا شو تبقى ورجلي على رجلك وكافي عناد يله
ناي : جنت اسمع حجيهم ومابيدي ارد ولا ادخل خلف الله عليهم سوايتهم فضل العمر كله ماينسي
مهدي : يله امشي ارجعج للبيت
ناي : ابات ويه عمه
مهدي : وين تباتين عمتج هنا هيه ويه بيبيتج مرافق واحد بس ميصير اثنين وحتى ان صار اثنين انتي متبقين مكافي قبلت تجين وشعرج طالع
ناي : باوعت عليه بنظره معاجبني كلامه ورحت يمه عمه بلغتها وسلمت على الخال وطلعت ويااه
كعدت بصفه نزلت الجامه الهوا بارد ثلج خشمي صار احمر من الهوا وباقيه اباوع
مهدي : ليش متتحجبين
ناي : اريد افهم ليش شايل هم شعري انت شعليك هي مره مرتين انجمعت بيها وياك وبعد ماننجمع
مهدي : انتي مو صغيره والحجاب فرض على المرأه
ناي : منو يتحاسب انت لو اني
مهدي : طبعاً انتي
ناي : عوفني اتحاسب مشكور على النصيحه
مهدي : لو انتي بوصايتي لا البسه الج بلكوه واشوف يابنيه تنزعه
ناي : الْحٍمَدٍ للـّہ مو بوصايتك سكتنا شويه وكتله انت ليش تكرهني يسوق ويحجي بهدوء
مهدي : ومنو كال اكرهج
ناي : من تصرفاتك
مهدي : اني مااكرهج لشخصج اكره كل واحد من ملتكم انتم سبب دمارنا وكارهه الظروف الكعد تجبرني اشوفكم
ناي : انت مشكلتك تباوع للموضوع من جانب واحد وناسي اهم شى
مهدي : شناسي
ناي : اذا انت ادمرت لان ابوك راح على الاقل اكو من يعوضك امك وخوالك ولد خوالك وعشت افضل عيشه وكملت دراستك وماناقصك شى اما احنا امنا من راحت راح كلشي وياها حلوو وربينا بمكان ماشفنه منه بس الهم والغم ولا واحد بينا عنده مستقبل
اني تأكدت من شغله مهمه انت من عالم واحنا من عالم ثاني واكبر غلط ذوله العالمين يلتقون
مهدي : هاي سوالف الصغار مااحبها اني الشى الزاعجني مااريد اي مكان او مناسبه تجمعني بيكم وخلط لا عالمنا ولا عالمكم ولا هاي السوالف مال مراهقين وياريت تخلص شغله بيبيتج ومااسمع اي شى عنكم تره بزعت حيل
ناي : وعد مني مااخابر لو جاي اموت ومااطلب شى منكم لتخاف هاي اخر مره
وصلني للبيت ونزلت وركعت باب السياره ودخلت للبيت جان هادئ صعدت للغرفه لكيت شرهب نايمه وبان تشخبط بدفاترها استغربت نوم شرهب متنام هيج وكت
شبيهه
بان : مااعرف جانت بالاول نايمه بغرفه بيبي وبقت ضايجه وبعدين صعدت هنا اتوقع لان خايفه على وضعها شون صارت نجحت العمليه وامي وين
اي الْحٍمَدٍ للـّہ نجحت وعمه بقت بايته يمها
بان : تاكلين
ناي : اي جوعانه كلش
كعدت شرهب تاكل ويايه من يوم سالفتها ويه صالحه وهي متاكل زين ودوم ساكته واعرف بيهه مقهوره على سالفه الدوام
يومين ورجعت بيبي نورت البيت جانت فرحتنا جبيره برجعتها صحيح تون من الالم
ومتوجعه بس على الاقل سوت العمليه وراح تعيش نفسها ويانه كافي
تشكرت من خالو عمران هوايه
عمران : وين اختج
ناي : فوك
عمران : صيحيها اسلم عليها
ناي : صحت شرهب رغم استغرابي بطلبه نزلت والشعر مهوس ومعاجبها الوضع متدري خالو عمران واكف شافته ابتسمت
شرهب : هلو خالو
عمران : الْحٍمَدٍ للـّہ على سلامتج بنتي
شرهب : الله يسلمك خاالو
مد ايده وطلع فلوس وراد يحطهن بيدي مقبلت وسحبت ايدي
عمران : اني ردت اشتريلج حاجه على سلامتج خفت لا متعجبج انتي اشتري الي يعجبج
ناي : شكراً خالو عدنا والله
عمران : اني كلت ماعدكم ليش تحسبوني غريب مااحب تنرد ايدي هاج بنتي وديري بالج على نفسج وصيري سباعيه
شرهب : بگلبي اكول يروحلك فدوة عمامي الجياف واحد واحد وياهم نسوانهم لكم يمااااي موش زلمه على كولت بيبي چگليت
دعايه مال نظافه بقيت حايره اخذهن لو لا تالي ناي اشرت واخذتهن
شكراً خالو
عمران : محتاجين شى
ناي : سلامتك مشكور مقصرت جان يجي عمو فلاح وخجل لان شافه وبقى يتشكر منه بعين مكسوره كلش انقهرت عليه وخالو عمران ابد مخجله اخذت شرهب ودخلنا وهاي طبت تكمز من يوم مصارت سالفتها مشفتها تضحك اله هسه
شرهب : حتى فلوسه ريحتهن طيبه
ناي : هههههه لج عيب بكد ابوج
شرهب : هذا لو ابويه فلا اتزوج ابقى اخدمه العمر كله هو عنده ولد بنات ولا سألتج
ناي : اي عنده اثنين ولد وبنيه
شرهب : انيالهم
ناي : الله يحفظه الهم جان ابنه وياهم من اجه اول مره مهدي تتذكرين
شرهب : ياهو منهم
ناي : الولد الجان لابس بنطرون اسود وتيشيرت رصاصي ابو الشماغ لافه مدري شون على راسه
شرهب : ياااا عرفته صاحني بوكتهت وكال تعالي ام كفشه تذكرته لا عيني ابوه احلى منه بهوايه
ناي : امشي ام الحلوين نروح لبيبي
دخلنا وكعدنا يمها ومن يومها واحنا مسؤوليتنا بيبي وعمه البيت هي وبان جنت اقرا قليل اريد النجاح واخلص من الخامس الاعدادي اتذكر من خلصنا الدوا وشرهب طلعت الفلوس النطاهم الخال الها
وكالت كلشي مااريد بس اريد بيبي اطيب
دمعت بيبي رغم ساكته ومريضة بس تحس بلي يصير
وصار تفجير الامامين يوم 2/22 /2006 والدنيا انگلبت والشوارع صارت حرب وناس تكتل ناس ومحد جان واكع بيها بس الفقير
هنا بدت مرحله ثانيه بحياتنا صار الگتل على الهويه واشكال نسمع اليوم انكتل واحد واليوم انباك واحد حتى بلمدرسه الممحجبه اتحجبت والجانت تمشي من تروح للمدرسه سجلت خط من الخوف كلشي انگلب بليله ويوم واني على حالي مااكدر اسجل خط منين هو اللكمه كوه مدبريها كمت اروح واجي ويه البنات المثلي الميكدرن على فلوس الخط نروح سوه ونجي سوه
ومر شهر ونص وبيبي رجعت تحجي وتاكل بس نايمه وضعها بعده وراها وقت طويل حتى تكدر على الاقل توكف بعكازه جنا اني وشرهب نسبحها ونوكلها وتبجي اعرف تبجي على حالها وضعها وهاي الفتره صالحه وسما كل وكتهن يم ساهره مرات نكول خلصانين منهن ومن لغوتهن ومرات نكول الله يستر منهن مينجمعن اله بلمصايب
اجه عمو فلاح وجهه مو طبيعي صاح عمه
بديعه : هااا فلاح شبيك شو من وكت راجع
فلاح : شوفي بدعه اني مايوم كسرت خاطرج وعايشين على حب الله
بديعه : ياستار شصاير
فلاح : اخوتي راح يجون هسه والراح تسمعي متجادلين بيه همه ادره بلحال
بديعه : اخوتك ما وراهم بس الخراب وانت شجابك عليهم مو جنت بلشغل
فلاح : البارحه اجه بليل عبيد وكلي مر عليه للمحل حاول تطلع من شغلك من وكت شغله ضروريه اني هم مكذبت خبر ورحت لكيت جوحي هم يمه وكعدنا نحجي فوك الساعه
بديعه : على شنو غير افهم جان يطبون عوذه كل واحد هو ومرته مرتضى بهذا الوكت جان رايح سفره للشمال وبعده مراجع
عبيد : وين امي ياريت تجيبوها حتى تسمع وصيحي شرهب وناي
بديعه : باوعت على فلاح شكوو
فلاح : مثل ما وصيتج
بديعه : لزمني گلبي ذوله شعدهم طبيت للغرفه لكيت البنات يضحكن ويه بيبيتهن تعالو عمامكم يردوكم ويردون عمتي
ناي : خير ياستار
عمشه : توهم ذكروني
بديعه : والله ياعمه مااعرف شيردون
عمشه : گلهم موجودين
بديعه : اي كلكم
عمشه : چايين والطلايب الكشره تسابق رجولهم بزرتي واعرفن رويحتهم امشينا نشوف بنات غنيه ساحلات ولدي بيا طلابه
ناي : طلعنا ندفع بيبي من العربانه والكل متجمع كعدت يمي شرهب والجهه الثانيه بان حتى سما موجوده گلبي لعب وبدا عمو عبيد يحجي
عبيد : شون كيفج يمه عساج بخير
عمشه : يايمه من اشوفنكم هيج مجموعين مااشوفن الخير گلها عكارك وتمطر علينه
جوحي : ليش يمه هيج شوفتنه متحبيها
عمشه : لا توجعون افادي انه وجعانه ومالي حيلكم شتردون فضوني
عبيد : يمه اليوم سبت باجر ناس جايين على شرهب واذا كلشي فض الخميس اعقد الها وازوجهه
ناي : وكفت على حيلي ياعقد
شرهب : نااي عفيه واباوع بخوف على اختي وعلى بيبي
عمشه : خايب انجبي شنهي بگيفك
عبيد : اي بكيفي واني عمها وصي عليها وهذوله عمامها جوحي وفلاح ورأيهم من رأي
بديعه : لكم كل عمرها ١٤ سنه تردون تزوجها بهذا العمر طفله بعدها
صالحه : ليش طفله اصغر منها بسنه عمتي تزوجت وانتي هم اكبر منها بسنه او سنتين وتزوجتي شنو هاي العياره بعد قابل هيه اول وحده تتزوج وهيج عمرها
عمشه : البت ماتزوج وفضو گلشي ومايعتب الحوش احد انه اريدن شرهب تكبر واخيها يطلع من كربته وهو بيده يزوجها
جوحي : يمه انتي مره مريضة مالج دخل بهاي السوالف احنه نحل كلشي واخوها بعد سنه يطلع والله اعلم شصاير بيه يجوز يصير مجرم كاتل لتنسين سنتين بلسجن شتردي يطلع معمم
عمشه : انه گلت البت ماتزوج ولي لمهجومكم واذا تعاندتو وياي وحك تعبي ونوحي وحك علي اطردكم وانت عبيد تاخذ مريتك البربوك وتولي مالكم مچان يمي
عبيد : مااطلع من البيت لو مو اطرديني يمه شوفي حالج لا عبالج بعدج بحيلج الاولي تهددين وتردين اطردين
ناي : اشتغل المصايح والكل تعيط وصارت هوسه
عمشه : تردون تزوجون البت راضيه تزوج ابن عمهه اوله بيها يامهند يامرتضى
ساهره : هاي البقت ازوجها ابني هو هلواحد اخذله بت جليله اخلي بليه زواج ومااخلي ياخذ هاي خوش بله ياهو التجي اتذب بتها براس ابني
عبيد : يمه لا تحاولين البنيه هذا الاسبوع اعقد الها وشوف هو الرجال شوكت يتزوجها اني الصار قبل شهرين مااخلي ينعاد هاي وكحه ومتنجرع ومااخليها تكسرنه
ناي : حضنت اختي الجانت خايفه احنا حالنا بين الذيابه كل واحد بيهم ينهش بلحمنه شويه ردت واحد منهم يوكف ويانه حتى عمو فلاح ساكت
بديعه : احجي فلاح شو ساكت ترضى على سوالف اخوتك خلي وكاام واني كمت وراه
ناي : شفت عمو راح للمطبخ ركضت وراه وعمه هم
ناي : عفيه عمو والله بعد متطلع مو كدام الناس البقت يمهم شكالو عليها ليش تظلموها بعدها صغيره مو مال زواج حرام والله
فلاح : شوفي ناي من الاخير اني مااكدر على اخوتي كدامج واحدهم ياكلني اكل شايخين ومأذيين واني رجال على كد حالي ومالي حيل طلايب وانتن بنات تاليتجن للزواج اذا هسه او بعد جم سنه نفس الشى اني جاي واحد لبان وممزوجها بتي حملجن ثكيل والكلمة من تطلع عليجن ماتنرد ومصرفجن ثگل وامي علاجها يگسر الظهر وعلى ايدج اخوتي شايلين ايدهم واني خلص عمري اشتغل واعيش برگبتي ٦ نفرات ويونس سابعكم شصير متكوليلي معودت اخوج يشيل الحمل ويايه سواله مكسوره وطيح حظنه رجعت امي شوي ساعدت وكعت وانكسرت ورجعت من الاول استغل وكلكم براسي
اني مااريد اسوي هوسه خلي اختج تفوت بفالها وهي ١٤ سنه مو صغيره
بديعه : يا مو صغيره لتخليني اشك هدومي لك مره وحده وكف اخوتك وتعارك وياهم ولو مره لشوكت تبقى جبان وتخاف منهم
ناي : جان عمو يلزم عمه بدعه شبعها كتل لان حجت هيج اعرف من حركت گلبها على شرهب وخرته كوه وجريتها وطلعنا من المطبخ ردته عون ومافاد
شرهب كاعده وخايفه وتهز برجلها
فلاح : اني مالي دخل سمعتو هي بت اخوكم وانتم ادرى بمصلحتها اني عندي شغله بلسماوه اسبوع ابقى
ناي : وبهيج طلع عمو فلاح منها بالاحرى انهزم من الموضوع هو دوم هيج طبعه شفت بعمه كسرتها خطيه انضربت بسببنا
عمشه : ربيتكم حزام للظهر طلعتو احزام للصخول تجر بيكم نسوانكم ياحيف التعب اهمداني كضيت عمري انه احابي عليكم والحين تهدون عليه ومالي چلمه عليكم
عبيد : يمه شرهب نزوجها لو اعرف احبسج بلغرفه منا لحد متروح لرجلها لتخليني اسوي سوايات مشايفتها
بديعه : لجن الله لا يوفقجن ربي انت العظيم شوفهن انت اقوى منهن كون تكسرهن كسره مايداون بيها
صالحه : انجبي مكطمه لو بيج خير جان اهلج لفوك مو شمروج شمرت الجلب ودارو وجهم وراحو يعرفون ماوراج خير كوومي ساهره هااي هواي تمادت تعالي انطيح حظها حتى تعرف ويامن تحجي
ناي : معرفنا بوكتها شنسوي ركضنا اني وبان وصرنا مثل حايط السد لعمه
شرهب : ناس تضرب بناس واني اباوع عليهم
شنو يزوجوني وين اروح وعند منو شكد اني مااخاف واكول اني قويه بس عمري بذاك الوكت كله ١٤ سنه مستحيل اكدر على صالحه وساهره مستحيل باوعت على سما الجانت رافعه رجلها ومتربعه ومبتسمه عرفت هاي الضربه القاضيه
ناي : بيومها البيت گب نار وناس تهد بناس وبيبي وكعت وتخربطت وجوحي وعبيد هلمره ولا دارو بال عرفت هذا هو ذوله باعو ضميرهم وصارو خدم لنسوانهم ولو همه من زمان هيج بس هسه اتعس
وبيومها حتى ساهره وجوحي بقو مرجعو لبيتهم خافو لا ننهزم
جانت الف طريقه بالي حتى فكرت اخابر خالو عمران حتى لو اتوسل بمهدي علمود شرهب مستعده ابوس حتى رجله حتى يخلص اختي بس ماعندي تلفون اخابر ومرتضى ماكو ولا اكدر اطلع من البيت حتى عمه بديعه منعوها تطلع وحوش انگلبو حتى الشغله تكمل
منعرف منو العريس جبير صغير متزوج ارمل مطلق كلشي منعرف جنت ابجي وعمه وياي وتضرب على رجلها بلا حول ولا قوه مثلي حتى زوجها عافها تواجهه اخوته وطفر
وثاني يوم اجوي ومقبلنا ننزل نصعد عبيد وخنكني
والله اذبح اختج اذا منزلتي
ناي : لتنزلين ابد
شرهب : شفت ناي راح يأذوها ومنا عمه كل شويه تتعارك وبيبي متخربطه على ساعه تموت كل شويه تنوح وتوكع حتى الدوا كام ميسكن عدها سلمت امري ونزلت ويااه حتى مابدلت بملابسي طبيت ومارفعت راسي افرك بأيدي من القهر اريد ام اريد اب اريد اخ اريد احد يفزعلي احد ياخذني بحضنه ويكولي لتخافين اني موجود سمعت صوت مره جبيره
تعالي يمه ليش خايفه
شرهب : رفعت راسي شفتها مره جبيره لابسه فوطه جنهه بيبي
اشرت ساهره وسحبتني من ايدي وكعدتني جان رجال كاعد يمها عوفت هذا الراح يتزوجني يكبرني ب١٨ سنه ممتزوج معلم وعايش ويه امه وابوه واخته متزوجه عدها ٣ جهال وكاعده هم وياهم رجلها گعيدي
كلهم بيت صغير كلش
كلشي محجيت يسألون ومااجاوب حتى ماركزت بلشكل ردت بس اكوم
صالحه : هااا عيني ام عدي شگلتي
ام عدي : شحلاتها عين الله عليها سمره مملوحه واعرفن خجلانه اكيد دمها يلعب
صالحه : يااا تخبل غير خجلانه منكم وساكته تضحك للهوا
ناي : اختي جوه واني فوك اباوع على اختي شو كعد تضيع ومابيدي شى
بجيت لطمت توسلت ومافاد لحد مصعدت شرهب باوعت عليه وكالت
شرهب : كاافي ارحمي نفسج
ناي : شصار
شرهب : هذا هو يناي راح اتزوج
ناي : جنت اتمنى اطلع من البيت بس حتى اخابر حبسونه حتى عمه متطلع جانو دارسين كلشي من كل جهه ومن اجه مرتضى من السفر ابوه مقبل يجي للبيت بحجه بيبيته مريضة وناس طابه طالعه راد ميتقرب اخاف يكدر يمنع الزواج تمنيت اوصله واكله حتى على الاقل يخلي جوحي يتراجع لكن !!!
انقفلت الباب علينا اني وعمه وبان ونزلت شرهب وحدها
شرهب : انزل درجه درجه وصافنه على حالي دخلتني صالحه لغرفه عمو نجم ولبستني صايه ومشطت شعري واني مااكدر احجي وهذا بسبب تهديد صالحه اليه جان عمري صغير واصدك بيها لو جنت بعقل هسه جان حرگتها هي واختها ومااتزوج
قبل بليله : جنت طالعه من الحمام ردت انام وافكر باجر انهزم حتى لو من السطح على الجيران وافلت ويطبهم طوب حتى لو ناي مو ويايه المهم افلت بروحي العزيزه
طلعت من الحمام وجان تجرني صالحه وساهره وياها
صالحه : شوفي بت جليله اخاف باجر تسوين مكسوره وتخزينا او تكولين مموافقه وروح ابويه ازوج ناي بمكانج ديري بالج تسوي شى اعرفج ساقطه ولسان دلاله وبالج الف سالفه وسالفه
شرهب : متكدرين
صالحه : جربي وشوفي وماازوجها المعلم اشوف الها واحد متزوج حتى تنزل على ضره ويوميه يكعدوها بكتله ويكوموها بكتله جبتلج قسمه زينه انجبي وقبلي وبليه لغوه
شرهب : فزيت من صفنتي واني اكوم وراهن وكعدوني وره الباب وبدا يكتبون شهادة موتي
بعدني اريد العب اريد ادرس اريد اضحك اريد اعيش بعدني ماشفت من عمري شى ليش تغتصبون طفولتي ليش تحرموني من ابسط حق اليه اختار حياتي
عشت بيتم وبفقر وقله حال عشت بألم وكسرت نفس وتاليها افتح عيني والكه نفسي ويه رجال اكبر مني ب١٨ سنه
