رواية حين تبكي الجدران الفصل السادس
تنصرف نجوي " ام جاسر " وبمجرد ان تغلق شمس الباب ...
شمس " بغضب " : شوفت الولية قليلة الاصل يجيلها نفس ازاي تخطب لابنها و جوزها لسه داخل السجن .
رجب : الست اتكلمت في جواز يا شمس ، مش اتكلمت في حاجة غلط .
شمس : وهي ملقتش الا بنتنا ؟! عندها البنات مالية الدنيا !!
رجب : ما انتي عارفة ان بنتنا غير اي بنت ، جمال وادب واخلاق وتعليم وتربية ، هما يلاقوا زي بنتنا فين !!
شمس : انا مش موافقة يا رجب ، بكره ارد عليها واقولها اننا مش موافقين وكل شئ قسمة ونصيب .
رجب : وليه نرفض ؟ جاسر شاب كويس مش وحش !!
شمس : يعني انت موافق ؟؟
رجب : وارفض ليه ؟ الولد كويس وهيقدر يعيش بنتنا عيشة مرتاحة .
شمس : واحنا مش ناقصين فلوس علشان نبص لفلوسه ، ولا انت حنيت لست الحسن والجمال ؟؟
رجب : قصدك مين ؟؟
شمس : قصدي ام العريس .
رجب : ايه الكلام اللي بتقوليه ده يا شمس ؟؟
شمس " بسخرية : ايوه شكلك حنيت للحب القديم يا روميو .
رجب : عيب اللي بتقوليه ده يا شمس !! دي ست محترمة وعلي ذمة راجل ، وانا كمان عيني مليانه وانتي عندي بالدنيا كلها ومش ممكن ابص لغيرك .
شمس : اللي هيجنني انك انت وجوزها طول عمركم بتكرهوا بعض ، ازاي الولية دي تيجي دلوقتي تخطب بنتك لابنه ؟؟ الا اذا كان فيه نية تانية !!
رجب : طيب ايه رأيك ان العداء بيني وبين جوزها هو السبب اني موافق .
شمس : ازاي ؟ ده لغز ولا عايز تضحك عليا بكلمتين ؟؟
رجب : يا حبيبتي افهمي ، انا ودياب اغني اتنين في المنطقة ودلوقتي هو في السجن ، يعني لو ابنه جاسر اتجوز بنتنا وانا قدرت اخد جاسر تحت جناحي هتبقي الحته كلها ملك ايديا .
شمس : واحنا مش محتاجين اكتر من اللي عندنا .
رجب : يا خايبة انتي تكرهي لما جوزك يبقي كبير الحته وتبقي انتي مرات كبير الحته والكبير والصغير يعملك الف حساب ؟!!
شمس : اوعي تكون بتضحك عليا بالكلمتين دول يا رجب و يكون كل تفكيرك انك تقرب من الولية دي ؟؟
رجب : تبقي متعرفيش انتي ايه بالنسبالي ولا تعرفي حبي ليكي اد ايه يا شمس .
شمس : ماشي يا رجب هوافقك علي كلامك ، انما يكون في علمك يارجب لو عرفت في يوم من الايام انك بتستغفلني هتشوف شمس اللي عمرك ما عرفتها قبل كده وساعاتها اوعي تلوم الا علي نفسك .
في غرفة شروق
شروق : ايه اللي انا سمعته ده يا ماما ؟
شمس : الست جاية تخطبك لابنها جاسر .
شروق : لا طبعا مستحيل .
شمس : ليه ؟
شروق : من غير ليه يا ماما ، انا مبحبش البني ادم ده ، ده دايما بيعاكسني وانا مش بعبره .
شمس : اااه ، يعني جاسر عينه منك من زمان ؟؟
شروق : جاسر مين ده اللي ابص له !! هو عينه مني ولا معجب بيا دي حاجة تخصه ، انما انا مستحيل اوافق عليه .
شمس : ليه ؟ فيه حد في دماغك ؟؟
شروق " بارتباك " : هااا ، لا لا مفيش .
شمس : ولا حتي شريف ابن المعلم ربيع ؟؟
شروق : اااا
شمس : يا بت انا امك وعارفاكي كويس .
شروق : الصراحة ايوه يا ماما انا بحب شريف ابن عم ربيع .
شمس : وهو بيحبك ؟؟
شروق : ايوه بيحبني .
شمس : لو كان بيحبك مكنش سابك وسافر .
شروق : يا ماما شريف سافر علشان يكون نفسه علي ما الزعل اللي بين ابويا وعم ربيع يتنسي .
شمس : وهو يضمن منين انه يرجع يلاقيكي لسه مستنياه ؟ اسمعي كلامي الواد شريف ده مش بيحبك .
شروق : لأ يا ماما شريف بيحبني اوي كمان .
شمس : حتي لو بيحبك مستحيل تتجوزوا بعد اللي حصل بين ابوكي وابوه .
شروق : واحنا مالنا ومال زعل الكبار ؟؟
شمس : الكبار دول هيحطوا ايديهم في ايدين بعض ازاي ؟؟ من بعد ما فضوا الشركة بينهم في الفرن مستحيل يرجعوا زي الاول يا بنتي او حتي يوافقوا علي جوازكم .
شروق : انا لو مش هتجوز شريف يا ماما عمري ما هتجوز ابدا .
شمس : اسمعي مني يا بنتي ، انا اكبر منك وفاهمة الدنيا عنك ، كل ده مسيره بتنسي بالايام ، وهقولك كلمة من امك شيلي شريف من تفكيرك نهائي لأن جوازكم دلوقتي بقي مستحيل ، واذا كنتي مش موافقة علي جاسر انتي حرة برحتك ، انما شريف انسيه .
تجلس شروق في غرفتها و ترسل عدة رسائل لشريف دون رد !!! تنساب دموعها علي وجنتيها حزنا وخوفا علي حبها الذي امسي في مهب الريح .
تمر اكثر من ساعة ودموعها مازالت لم تجف بعد حتي تأتيها رسالة منه ...
شروق : ايه كل ده يا شريف ؟!!! بعتلك رسايل كتير اوي مردتش ليه ؟
شريف : معلش يا شوشو كنت في الشغل و لسه مخلص حالا .
شروق : انا من ساعتها وانا بعيط .
شريف : لا اوعي تعيطي ابدا ، قولتلك مبت مرة مش عايز عينيكي تعرف الدموع ابدا ، خلاص بقي حقك عليا انا اسف .
شروق : خلاص سامحتك ، انا كنت عايزة اكلمك علشان اقولك حاجة ممكن تزعلك .
شريف : خير فيه ايه ؟؟ حصل ايه ؟؟
شروق : ام جاسر مرات عم دياب .
شريف : مالها ؟
شروق : كانت عندنا النهاردة وطلبت تخطبني لابنها .
شريف " بعصبية " : بتقولي ايه ؟؟ انتي اكيد بنهزري !!!
شروق : اهزر ازاي في حاجة زي كده ؟!
شريف : ازاي ؟؟ ده المعلم دياب وابوكي بيكرهوا بعض كره العما ، وكل الحته عارفين انهم بيكرهوا بعض وكل واحد بيتمني الشر للتاني !! ازاي مراته تيجي تخطبك لابنها ؟ انتي بتهزري ولا عايزة تجننيني ؟!!!
شروق : المعلم دياب اتقبض عليه بمخد.رات واتحبس علشان كده مراته وابنه اتشجعوا وطلبوني للجواز .
شريف : اكيد طبعا عم رجب اتعصب عليها وطردها من البيت ؟؟
شروق : بالعكس ده ابويا موافق وبيقول لأمي انه لو جوزني لجاسر و قدر ياخده تحت جناحه هيبقي كبير الحته خصوصا ان ابو جاسر مش هيطلع من السجن قريب .
شريف : يا نهار اسود !! يعني ايه ؟؟؟ وانتي هتوافقي ؟؟
شروق : لأ طبعا انا مستحيل اتجوز غيرك ، لكن بقولك حتي لو ابويا حاول يغصب عليا بردو مش هوافق !!
يدخل رجب فجأة لبجد ابنته تراسل شريف عبر الانترنت !!!
يأخذ منها هاتفها ويقرأ الرسائل المرسلة بينهما .
ثم تأتي رسالة جديدة من شريف : " انا مكنتش اعرف ان ابوكي بتاع مصلحته بالشكل ده !!! لازم ترفضي يا حبيبتي وانا هرجع في اقرب وقت علشان اتقدملك و اتجوزك ،حتي لو ابويا وابوكي رفضوا هتجوزك " .
اغلق رجب الهاتف بعد قراءة تلك الرسالة ثم انهال عليها ضر.با مبرحا وامسكها . من. شعرها قائلا : بتستغف.ليني يا بنت..ال... و بتكلمي شباب من ورايا ؟!!!
شروق " ببكاء " : لا والله يا بابا ده شريف ابن عم ربيع كان بيكلمني وعايز يخطبني .
رجب : وماشية معاه من امتي يا .... ؟؟
شروق " ببكاء " : لا والله يا بابا ده بيكلمني بس .
رجب : عايزة تف.ضحيني في الحته يا بنت ال ...؟!!!
شروق " ببكاء " : يا بابا اسمعني .
رجب : انا مش هسمعك ، انا هجوزك جاسر الاسبوع الجاي سواء برضاكي او غص.ب عنك !!!
اخذ رجب هاتف ابنته ثم خرج من الغرفة واغلقها .
انها.رت شروق باكية لا تستطيع تجفيف دموعها حتي نامت ودموعها مازالت تجري علي وسادتها !!!
خرج رجب غاضبا قائلا : شوفتي بنتك بتعمل ايه يا ست هانم ؟؟؟ بنتك بتستغف.لني و بتكلم شباب وانتي نايمة علي ودانك !!!
شمس : اوعي تقول كده يا رجب ، انا بنتي متربية احسن تربية .
رجب : شوفي يا هانم الرسايل اللي بينها وبين ابن ربيع !!!
شمس : الولد بيكلمها علي انه عايز يخطبها مش اكتر .
رجب : بتكلمه من ورانا ولا لأ ؟؟؟
صمتت الام ولم تستطيع ان تجيبه !!!
رجب : اعملي حسابك انتي وهي لو ابن ربيع ده اخر واحد في الدنيا مستحيل اوافق انه يتجوز بنتي .
شمس : طيب اهدا الاول يا رجب و....
رجب : مفيش اهدا ، مفيش خروج للبت دي من البيت ، و اعملي حسابك بعد يومين هرد علي جاسر وامه واقولهم اننا موافقين و الجواز بعد شهر واحد .
في اليوم التالي
ينصرف رجب منذ الصباح الباكر الي المخبز ، وتدخل شمس غرفة ابنتها لتجدها نائمة وعلي ملامح وجهها اثر البكاء والحزن !!!
شمس : شروق .. شوشو .. اصحي يا بنتي .
تستيقظ شروق لتنساب دموعها سريعا وترتمي بين احضا.ن امها ...
شروق : انا معملتش حاجة غلط يا ماما .
شمس : انا عارفة يا حبيبة امك .
شروق : بابا بهد.لني اوي يا ماما .
شمس : معلش يا حبيبتي ، له حق اي راجل مكانه لو عرف ان بنته بتكلم شاب هيعمل اكتر من كده كمان .
شروق : بجد يا ماما هو هيجوزني لجاسر غ.صب عني ؟؟
شمس : هقولك كلمة يا بنتي ، ان جالك الغ.صب خده بالرضا .
شروق : يعني ايه يا ماما ؟؟
شمس : يعني دلوقتي جوازك من شريف مستحيل وجوازك من جاسر اصبح امر واقع ولازم تقبليه و تعملي حسابك ان جاسر هو عريسك وهيكون جوزك بعد شهر بالكتير .
شروق : لا يا ماما ، مستحيل !!
شمس : المستحيل بعد اللي حصل ان ابوكي يغير رأيه .
شروق : يعني ايه ؟؟ هيجوزهولي غص.ب عني ؟!!
شمس : خليها برضاكي احسن علشان تقدري تعيشي حياتك في سعادة .
شروق : اعيش ايه !!! انا لازم امو.ت قبل ما اتجوز اللي بتقولوا عليه ده .
شمس : ليه بتقولي كده ؟!! جاسر شاب كويس ، وسيم وغني وبيحبك واي بنت تتمناه .
شروق : اي بنت غيري يا ماما ، فاهمة ؟ اي بنت غيري انا لأ .
شمس : مع الجواز والعشرة هتحبيه .
نهضت شروق مسرعة وارتدت ملابسها و ذهبت لتفتح الباب .
شمس : رايحة فين يا بنتي ؟؟
شروق : دقايق وراجعة يا ماما .
خرجت من منزلها تهرول حتي وجدت جاسر يجلس امام مقهاه ...
شروق : علفكرة انا بكرهك اوي .
جاسر : وانا بحبك اوي .
شروق : انت فاكر انك لما تبعت امك تخطبني انا هوافق ؟؟ ده مستحيل .
جاسر : ليه كل ده ؟! انا طالبك بالحلال !!!
شروق : وانا مش عايزاك يا اخي ، هو بالعا.فية !!!
جاسر : لأ بالحب ، انا بحبك وهسعدك ومتأكد انك لما تعشريني هتحبيني .
شروق : تصدق دمك تقيل اوي !!!
جاسر : وانتي دمك سكر ، صدقيني يا شوشو لما نتجوز هتحبيني .
شروق : ده بعدك ، عمرك ما هتتجوزني ولا تشوف ضافري .
جاسر : وانا علشان بحبك هسامحك علي كل الكلام ده ومتأكد انك في يوم قريب اوي هتحبيني وتعرفي انك كنتي غلطانة .
شروق : ده انت معندكش د.م بقي !! اعمل حسابك لو صممت انك تتجوزني وابويا جوزني لك بالعا.فية هتشوف معايا اسود ايام حياتك .
في المخبز ...
يجد رجب رسالة من شريف : قفلتي ليه فجأة البارح واحنا بنتكلم .
رد رجب " وكأنه ابنته " : بابا دخل الاوضة فجأة .
شريف : كلمك في حاجة علي موضوع الواد اللي جاي بخطبك ده ؟؟
رجب " وكأنه ابنته " : لأ خلاص قولت لبابا انا مش موافقة وهو قالي خلاص مادام مش موافقة هقولهم كل شئ قسمة ونصيب .
شريف : الحمد لله طمنتبني ، ده انا كنت هسافر وارجع مصر فورا .
رجب " وكأنه ابنته " : لا خلاص خليك في شغلك ، بس اعمل حسابك مش هعرف اكلمك الفترة دي .
شريف : ليه ؟؟؟
رجب " وكأنه ابنته " : خايفة بابا يعرف اننا بنتكلم ويغير رأيه .
شريف : معاكي حق يا شوشو .
وبتلك الحيلة استطاع رجب ابعاد فكرة العودة عن شريف !!!
بعد شهر تقريبا
في قاعة الحفلات بالحي ...
تجلس شروق بجوار عريسها بين الاهل والاصدقاء بينما الجميع تملأهم مشاعر الفرح والسعادة كانت هي تحاول اخفاء دموعها !!! حتي انتهي الحفل و اخذها جاسر الي جواره في سيارته ذهابا الي عش الزوجية ....
