رواية ليتك لا تعرف سري الفصل السادس بقلم اسماء الطبلاوي
(وفي مكتب سامح كان قاعد بيراجع شويه ورق لما لقى قدامه ملف دخول رانيا الزيني بين الملفات نده على الممرضه علشان يسالها ودخلتله.
سامح: هي رانيا الزيني بقالها اسبوع هنا في المستشفى بتعمل ايه.
الممرضه: ايوه يا دكتور دي جات في حادثه عربيه بس كانت حالتها خطر جدا لدرجه انها دخلت في غيبوبه من وقتها
سامح: معقوله طيب ابعتيلي اي حد من المرافقين اللي معاها لحد ما ابقى اروحلها عايز اسالهم على شويه حاجات
الممرضه: يا دكتور رانيا الزينى يتيمه اب وام وما لهاش اي حد ما فيش اي مرافق معاها ولا اي حد سال عنها من يوم ما جت.
سامح: معقول... طيب روحي انتى دلوقتي لما احتاجك هناديلك
( بعد ما خرجت الممرضه من مكتب سامح رجع بذاكرته للقاء ما بينه وما بين رانيا في المستشفى (فلاش باك)
سامح: المره دي جايه وانت اخده برشام منوم وقبل كده قطع شرايين انتى مستفاده ايه من كل ده وعايزه مني ايه بالظبط
رانيا: عايزه ابقى جنبك ومعاك وبس انا بحبك وما بحبش ابقى لوحدي بحب ابقى معاك انت انا بخاف لما ببقى بعيد عنك
سامح: ده مش ذنبي وما تبلينيش بيكي روحي ارمي بلاكي على اهلك مش عليا انا ما بحبكيش ولا هحبك خلي عندك دم بقى لو سمحتي.
رانيا: حاضر هحاول بس انا ما ليش غيرك بلاش تقسى كده عليا على الاقل اتكلم معايا بحنيه.
سامح: لو سمحتى ما لكيش دعوه بيا واطلعي من حياتي اهلك اولى بجنانك ده انا زهقت
(باك)
سامح: مفيش ولا مره حاولت اديها فرصه واقرب منها ومدلوق اوى على اللي كرهاني وبايع اللي بتموت علشان خاطري كل يوم وبعدين يا عم سامح في الموضوع ده.
( وفي مطعم شهير من مطاعم القاهره كانت قاعده اشكي جمال البنهاوي مع ابوها بتحكيله كل اللي حصل مع جاسر وفادي في الشركه بخصوص الصفقه لانه كان في رحله عمل ولسه راجع
اشكي: وبعدين يا بابي في الكلام ده هما هيفضلوا واقفين في الصفقه دي كده لو جاسر صفوت ما ساعدناش ما فيش حد في السوق هيساعدنا وهو راكب دماغه ومش موافق الا بشروطه الخاصه وشروطه دي مش هتخلينا نقدر نسدد ديونا في السوق بردو.
جمال: اصبري بس انا عرفت ان في بنت دكتوره لفه عليه اليومين دول وماليه دماغه مش مخلياه شايف غيرها وانا اللي اعرفه ان جاسر ما لوش في الستات و بيحبهمش يبقى اكيد البنت دي مهمه قوي عنده عشان كده لزقلها انا بس لو اقدر ازيحها عن طريقي شويه علشان يرجع الشركه ثاني و اقابله كنت وصلت لحل معاه انما دلوقتي مش عارف اتلم عليه خالص بسببها
اشكي: يعني هي مشكلتك كلها في البنت دي بسيطه هاتلى بس انت معلوماتها وانا اتصرف المهم نخلص قبل ما الديانا يقدموا ورق مديونيتنا للنائب العام ونقع في السوق وما تقوملناش قومه تاني ويبقى يا فرحتهم فينا
جمال: خلاص بقى ربنا يستر ما توقعيش قلبي بكلامك عن الحكايه دي... ده صفوت الشافعي نفسه بيقولي انت رايح تعقد صفقه مع ابني وانت مديون ليا
ب 2 مليون سدد اللي عليك اول وبعدين ابقى اتكلم في شغل جديد.. تعرفي انا مش نفسي في حاجه غير اني اوقعهم في السوق واخلص منهم بس كله بحسابه
نفوق احنا بس وبعدين نلعبها صح
( وفي يوم كان فادي قاعد مع ابوه قلقان من اتصال فرح المفاجئ عشان طلبت انها تشوفهم في بيتها هي و اهم قاعدين دلوقتي هناك في شقتها ومستنينها تخرج تكلمهم طلعت هي ورحمه وقعدوا عشان يتكلموا
صفوت: ها يا فرح قلتى عايزانا في حاجه مهمه جدا خير يا بنتي في حاجه جديده حصلت
فرح: بصراحه يا اونكل صفوت انا لقيت متبرع لجاسر
(عمت الفرحه المكان وابتسم فادي وصفوت
فادي: بجد يا فرح وده مين ده وانا ابوس ايده انا مستعد اديله كل اللي هو عايزه اي حاجه يطلبها مجابه.
صفوت: ايوه اللي يطلبه هياخده والله.. ده هيدي لابني حياه تانيه
فرح: لا هو مش عايز حد يعرفه يا فادي بس اصل هو عنده مشكله خطيره جدا في الكبد وما فيش امل من شفاؤه وهو غلبان وعلى قده ما يقدرش على زرع الكبد وعيلته كبيره جدا وهو اللي بيعيلها انا بس هاخد من حضرتك 150 الف جنيه اديهم لعيلته عشان يبقى مطمن عليهم وهو هياخد قلب جاسر يعني هنبدل قلوبهم وهو هيعيش بقلبه اي وقت ان كان فاضله.. ايه راي حضرتك.
صفوت: قد ايه هو انسان نبيل بس هو ده مش حرام يا فرح
فرح: اكيد لا هو اصلا كمان كان كاتب وصيته و موصى بوهب الاعضاء بعد موته.. بس علشان وضع جاسر الحرج يعني هو وافق
فادي: ومش عايز غير 150 الف بس طيب قولي مليون 3 مليون احنا مش هنتاخر عليه في حاجه وعيلته دي في رقبتنا بعد عمر طويل ليه ان شاء الله
( قعدت فرح شرحت لهم كل التفاصيل بس وصلت لجزء معين كانت خايفه منه وكان لازم تتكلم فيه
فرح: المشكله دلوقتي يا اونكل هتبقى في جاسر نفسه
فادي: ليه بقى هو مش موافق ولا ايه انا مستعد ان انا احاول معاه تاني
فرح: الصراحه يا فادي انا السبب في رفضه اصل عمتي والده رحمه ما بتردش على التليفون بتاعها بقالها كام يوم من بعد ما رحمه جاتلي واحنا قلقانين عليها جدا ولما قلت لجاسر ان لازم انزل سوهاج مع رحمه عشان اطمن عليها ومش هبقى موجوده في العمليه قالي خلاص مش هعملها وهو وضعه ما يسمحش بتاجيل العمليه وانا مرتبه كل حاجه هنا علشان العمليه دي.. بس رابح ابن عمي ده شيطان وانا ما اضمنش ممكن يكون عمل ايه فعمتي ولو كان شكى في محله يبقى هو عايزني انا اللي اروحله بنفسي.
صفوت: طيب وليه الافترى ده هو ما فيش قانون يعني في البلد وبعدين بصي انتم ما ينفعش تروحوله لوحدكم ده بعد اذنك يا فرح انتى زي بنتي انتى ورحمه انتوا ما ينفعش تدوله الفرصه دي شوفي انت هتفضلي هنا عشان عمليه جاسر وفادي هيروح مع رحمه البلد يخلص الموضوع ده ويرجعها هي ووالدتها لحد هنا تاني بامان ايه رايك
رحمه: فادي مين ده اللي يجي معايا البلد انت فاكر لو رابح شافه جاي معايا هيهملوا حي لحد ما نجيب امي ونرجع ده هيجتله جبل ما يخطي عتبه دارنا حتى مرواحي انا وهو لحد سوهاج مع بعض يعني اثنين مجتولين وشكرا
( غضب فادي من تشكيك رحمه في قدرته على حمايتها من رابح ووقف وهو غضبان وما اضافش ولا كلمه وراح البلكونه بصولها فرح ونوال بغضب من اللي هي قالته.
فرح: ايه اللي قلتيه ده بس يا رحمه الراجل كان غرضه ان هو يساعد تقومي تحرجيه بالشكل ده قدامنا اتفضلي بعد اذنك روحي اعتذريله
رحمه: اروح ايه يا غندوره اعتذر لمين اياك اتجنيتي هو انا كنت جلت ايه يعني مش هو ده اللي هيحصل ولا انا جبت حاجه من عندي.
نوال: اظن يا رحمه انا زي والدتك ولو قلتلك خشي اعتذري منه مش هتحرجيني وتقوليلي لا
رحمه: اعتذر اعتذر.. حاضر هعتذر وامري لله بس لو اتنطط عليا هزعله
( راحت رحمه ورا فادي البلكونه لقيته مديها ظهره ونفسه وصدره بيطلع وينزل من شده الغضب وهو بيتنفس ناديت عليه
رحمه: استاذ فادي انا ما كانش قصدي اجرحك انا بعتذر منك
( ما ردش عليها فادي وفضل ساكت وغضبان
رحمه: انا بجولك ما كانش جصدي انا جلجانه على امي وده لخبط عجلي وخلاني اجول اي كلام.
فادي: هو انتى ما بتحسيش..ولا بترمي الكلام وخلاص من غير ما تعرفي هيجرح حد ولا لا ابن عمك ده انا اقدر ادفنه هناك واجيب لك امك وانا هنا مكاني ومش هروح لحد عنده كمان شكيتي فيا وفي رجولتي ومن غير ما حتى تشوفي انا هعمل ايه انا ما بخافش من حد يا رحمه والوقتى جايه تقولي انا اسفه على ايه بالظبط
رحمه: ياااه كد اكده زعلان مني وللدرجه دي بتكرهني كمان على كل حال انا اعتذرت منك وشوف ايه اللي يرضيك وانا اجوله.
فادي: انا اللي يرضيني ان خطيبتي ما تقللش من احترامي قدام اي حد.
رحمه بهبل: ماشي هجولها ما تجللش م.... هي مين دي اللي خطيبتك يا نضري
فادي: انتى... يعني على اعتبار ما سوف يكون بعد ما ارجع والدتك وجاسر يعمل العمليه هطلب ايدك على طول عشان انا حبيت لسانك الطويل.
رحمه: فادي انا هخرج جبل ما ارتكب جريمه وموافجه نروح البلد سوا وبس.
(وفعلا صباح ثاني يوم كانت فرح عند جاسر في اوضته في المستشفى بتقول له اللي هم اتفقوا عليه
فرح: خلاص يا سيدي هبقى موجوده معاك في العمليه ولا تزعل نفسك اهي دماغك الناشفه دي خلتنا نعيد ترتيب كل حاجه من الاول
جاسر: هو انا قلت لك قبل كده ان لون عينيكى حلوه قوي يا فرح
فرح بارتباك: احم.. يعني هو انت اول مره تاخد بالك من لون عنيا دلوقتي ولا ايه
جاسر: لا انا اخذ بالي منه من اول ما شفتك بس حاسس اني اقدر اقول لك النهارده كده وعاوز كمان اشكرك على كل حاجه عملتيها وهتعمليها معايا وكمان عاوز اعتذر لك عن...
فرح: لا ده بالذات اوعى تعتذر عنه ومن غير ما تسالني ليه وبلاش تشكرني على اي حاجه انا اللي عايزه اشكرك علشان وافقت تعيش للناس اللي بيحبوك ونفسهم تفضل معاهم ووسطهم
جاسر: انتى غريبه قوي طيبه ونظيفه من جواكي ومستعده تسعدي اي حد على حساب نفسك وبتساعديني رغم ان انا ما كنتش طايقك من الاول
فرح: متشكره يا سيدي على المجامله دي بس كفايه كلام بقى علشان تبقى مرتاح لعمليه بكره وكمان عشان ما تتعبش يلا نام شويه
جاسر: بس انا مش تعبان وانا بتكلم معاكي..و على فكره انا عايزك في حاجه مهمه جدا بس هقول لك عليها اول ما فوق من العمليه لو ربنا كتبلي عمر ان شاء الله علشان ما اقدرش اقول لك دلوقتي.
فرح: وانا مش عايزه اعرف دلوقتي حاجه وباذن الله هتقوم وهتبقى زي الفل بس انت تفائل خير كده وما تخافش
جاسر: طالما انتى هتكوني موجوده في العمليه انا مطمن ومش خايف
فرح: اكيد هبقى موجوده طالما وعدتك يبقى لا يمكن اخلف وعدي معاك
(وصباح تاني يوم كان فادي ورحمه في العربيه رايحين سوهاج علشان يقابلوا رابح وكان الجو مشحون في العربيه كل واحد فيهم متوتر لسبب فادي عشان عمليه اخوه ورحمه علشان والدتها حاول فادي انه يلطف الجو وبدا يتكلم
فادي: بس انا فهمت من فرح انك بتدرسي طب انتى دخلتيه عشان تكوني زي فرح ولا عشان انتى حابه طب اصلا
رحمه: بتحاول تفتح كلام يعني ماشي هقول لك انا دخلت طب عشان السببين عشان ابقى دكتوره كيف فرح وفي نفس الوجت علشان انا بحب طب ونفسي ابجى دكتوره كبيره علشان افتح مستشفى صغيره في البلد اعالج فيها اهلي وناسي بالمجان
فادي: جميل قوي ان يبقى عندك هدف زي ده وانا اوعدك ان بعد ما نتجوز هعمل لك مستشفى كبيره في البلد تعالج الناس بالمجان وتعمل لهم عمليات اقتصاديه كمان
رحمه: فادي انا مش عايزاك تقلق على جاسر اخوك باذن الله هيبجى زين وهتفرح بشوفته بصحه وعافيه جريب ولو بتعزني حاول لما تكون جلجان من حاجه او متضايج ما تسكتش ولا تخبي خوفك علشان مش جريمه انك تخاف على اخوك وده امر طبيعي
فادي: تعرفي يا رحمه كانك قاعده جوه قلبي وعارفه انا حاسس بايه دلوقتي انا اصلي مش مصدق ان زمان جاسر دلوقتي بيجهز عشان يدخل العمليات وانا بعيد عنه ومش واقف جنبه وبدعمه.
رحمه: انا عايزاك تسامحني علشان كل ده بسببي بس والله لو كنت اقدر ااجلها ليوم ثاني كنت..
فادي: ما تقوليش كده احنا هنخلص الموضوع ده بسرعه وهنرجع كلنا ونبقى جنبه وباذن الله والدتك تبقى بخير وجاسر كمان يبقى بخير.
رحمه: طب ما انت حلو اهو وبتعرف تتفائل امال مركب الوش الجبس ليه من ساعه ما طلعنا.
فادي: ههههه وش جبس طيب يا ستي عموما انا عاوزاك انت كمان تطمني وكله هيبقى تمام.
