رواية عندما يعشق الصقر الفصل السابع 7 بقلم اسماء الطبلاوى

(رجع صقر البيت وهو معاه الورق وطلع دخل اوضته وقفل على نفسه الباب وقعد يراجع فيه ورقه ورقه. 

صقر: يا ابوي كل دي سرجه امال لو ما كانش ابوي مامنك على كل حاجه كنت عملت معاه ايه ده انت كانك طلعت اسوء من الديب اللي كان بياكل الغنم وانا جتلته ماشي يا سالم انت كمان دورك جاي واما نشوف اخرتها.

( قعد صقر يفكر. هيعمل ايه في موضوع الورق ده في نفس الوقت اللي كانت فيه عزيزه في المطبخ واقفه مع واحده منقبه ومرمر داخله تسال مين دي.

مرمر: في ايه يا خاله عزيزه هي مين اللي واجفه معاكي دي وجايه اهنه ليه 

عزيزه: لسه بشوف اهو يا بنتي انا اصلي كنت جايله لمطاوع يشوف خدامه كيف ما سيدي منصور جال شكلها جايه عشان اكده ولا انتى جايه عشان حاجه ثانيه يا صبيه.

( المنقبه دي كانت حنان وجايه تشتغل في البيت علشان تنتقم من صقر لانه رفضها 

حنان بكذب: ايوه انا جايه عشان اشتغل خدامه حريم مطاوع جالولي وانا محتاجه الشغل هو في مشكله ولا حاجه يا خاله

عزيزه: لا يا بنتي ولا مشكله ولا حاجه انتى اسمك ايه 

حنان: ام مرسي

مرمر: اهلا يا ام مرسي ده اسمك وحدك ولا انتى عندك مرسي

حنان: لا انا بيجولولي اكده عشان اسم ولدي مرسي

مرمر: اه يعني ده اسم ولدك ربنا يبارك.. خلاص فهمت.. خلاص يا خاله عزيزه فهميها كل حاجه وشغليها 

عزيزه: هي مش محتاجه تفهم حاجه. تنظيف.. وطبخ.. وغسيل واهم حاجه في ده كله الامانه

حنان: ما تجلجيش ابدا يا خاله انا اشتغلت في بيوت كتير عمري ما حد جال عني ان يدى طويله ولا حاجه

مرمر: يبجى كويس هتعمرى اهنه طالما امينه ويدك نظيفه.. بس لما انتى اشتغلتى في بيوت كثير مشيتي منها ليه امال واشتغلتي حدا مين اصل انا عارفه بيوت البلد كلها. 

(حنان لقيت نفسها اتزنقت ومش عارفه ترد على سؤال مرمر بس هربت منه بكذبه تانيه 

حنان: لا ده انا ما كنتش شغاله هناك ده انا كنت شغاله في بيوت البندر اول مره اشتغل في البلد بس جوزي جالي ما عدتيش هتطلعي من البلد نوبه تانيه وده اللي خلاني شفت بيت في البلد اشتغل فيه وهلاجي فين احسن من دار العمده 

عزيزه: ربنا يعزك يا بنتي ان شاء الله هترتاحي في الشغل هنا جوي جوي 

مرمر: خلاص يا خاله جربيها في اي حاجه لاجل نشوف بتعرف تعمل ايه وانا هطلع اشوف لو سيدي صقر عاوز اي حاجه

(حنان اتعصبت قوي لما سمعت مرمر بتقول انها طالعه لصقر وبدون ما تحس انفعلت 

حنان: طيب ما اطلع انا لسيدي صقر اشوفه لو محتاج حاجه اعملهاله 

مرمر بشك: وهو انتى لسه تعرفي اي حاجه في الدار علشان عايزه تطلعى لسيدي صقر. 

عزيزه: معلش يا ام مرسي هملي موضوع سيدي صقر ده لمرمر لان هو ما بيحبش حد يطلعله غيرها

حنان: طيب ماشي ما كانش جصدي حاجه 

(خرجت مرمر وهي شاكه في الوليه دي وفي نفس الوقت كان صقر لم الورق ولبس هدومه عشان يروح المركز مع مرمر زي ما اتفقوا لقى الباب بيخبط ودخلت

صقر: تعالي يا مرمر كنت لسه هنزلك لاجل ما نروح المركز كيف ما اتفجنا 

مرمر: انا جايه لك بس علشان اجول لك ان في خدامه جديده في الدار من النهارده يا ريت ما تختلطش بيها واصل ولا تطلب منها اي حاجه

( استغرب صقر من طلب مرمر بس حس انها غيرانه وحب يغيظها 

صقر: وما اطلبش منها حاجه ليه بجى هي مش خدامه في الدار اهنه هنا يبجى لازم تخدمني ولا هي حلوه وانتى غيرانه منها

مرمر بغيظ: غيرانه من مين دي بنت ناشفه وحاشفه وبعدين هو انا يعني كنت شفت خلجتها علشان اغير ثم انك عاوز منها حاجه ليه وعاوزها تخدمك ليه هو انا مش جايمه بكل طلباتك

صقر بحب: ولا عمرى يملا عيني غيرك يا مرمر انا بس بحب انكشك مين بجى اللي جلجاكي جوي اكده لو متضايقه منها نمشيها 

مرمر: لا سيبها انا بس شاكه فيها مش عارفه ليه.. تحسها مش مظبوطه اكده

صقر بشك: ليه هي عملت ايه

مرمر: مش مهم يلا انا لابسه وجاهزه. 

صقر: يلا بينا وبعدين هنتكلم في الموضوع ده بهدوء 

(نزل صقر ومعاه مرمر وقال يعدي على ابوه في مكتبه قبل ما يخرج ولما دخل لقى ابوه بيكلم سالم في التليفون

منصور: ايوه يا سالم يا ابني ما تجلجش هو يعني صقر هيعمل ايه بالورج... هو بس هيبص عليه وهيرجعه تاني.... ما تخافش من حاجه يا سالم صقر مش شكاك وبعدين انت كيف ولدي.... طيب هكلمك تاني يا سالم مع السلامه.

( قفل منصور مع سالم وشاور لصقر انه يجي يقعد وقعد 

صقر: خير يا ابوي ماله سالم بيتشكى مني ليه 

منصور: ما اشتكاش ولا حاجه يا ولدي هو بس مستغرب انك رحت اخذت الورج بتاع الحسابات ومشيت

صقر: انا مشيت جبل ما الورق يتكب فوجه قهوه ثاني كيف ما كان هيتكب فوجه اولاني وبعدين الورج تمام وانا هرجعهوله وانا معاود من المركز انا ومرمر 

منصور: انا كنت متوكد انك هتلاجي الورج تمام سالم ده شغال معايا من وهو لسه عيل صغير وعمره في حياته ما يخوني واصل

صقر: ماشي يا ابوي المهم هتعوز حاجه احنا خارجين دلوك رايحين المركز علشان نعمل كيف ما جلتلك

منصور: تروح وتيجي بالسلامه يا ولدي خلي بالك من مرمر دى ما طلعتش من الدار غير مرات جليله

مرمر: ما تخافش عليا يا سيدي منصور 

صقر: ما تخافش عليها يا ابوي واحنا مش هنتاخر 

(خرج صقر ومعاه مرمر بالعربيه وطلعوا على الطريق وهم بيتكلموا

مرمر بحب: ما تعرفش انا مبسوطه كد ايه يا سيدي اننا.... 

صقر: قبل ما تكملي ايه سيدي دي احنا مش لوحدنا دلوك.. اتكلمي معايا عادي بجى سيدي دي جدامهم هناك في الدار 

مرمر: ما انا بخجل جوي لما بجولك اكده من غير الجاب 

صقر: يا ستي انا راضي وبعدين يعني لما نتجوز هتفضلي تجوليلي يا سيدي صقر.. طب جربي اكده تجولي يا صقر. 

مرمر بخجل: صقر... يا ابوي والله بحبك جوي 

صقر: ههههه وانا كمان بحبك ورايدك تفضلي جنبي العمر كله وما تجلجيش انا لا هبص لا لجديده ولا لقديمه وما فيش في جلبي غيرك. 

مرمر: يكون احسن بدل ما اخلع جلبك انت واللي هتبص لها واكلوا حي 

صقر: يا ابوي ده انتى طلعتى شرسه جوي وانا اموت في الشرس

مرمر: بعيد الشر عنك يا جلبي

صقر: المهم عاوزك تجولي اللي جلتلك عليه بالظبط في المركز

مرمر: ما تجلجش كل اللي حفظتهولي هجوله بالحرف في المركز 

صقر: يبقى اتكلنا على الله 

(جه صقر يلف بالعربيه في الملف وبيحاول يهدي لقى معهوش فرامل 

صقر: انا كنت حاسس ان في حاجه غلط من الاول 

مرمر: في ايه يا صقر

صقر: مش عاوزك تزعلي مني بس انا لازم اعمل اكده اللي عاوز يخلص مني وعمل اكده جصدني اني وانتى ما لكيش ذنب

مرمر: يعني ايه مش فاهمه

صقر: يعني العربيه ما فيهاش فرامل وانا مضطر ارميكي بره العربيه علشان ما تموتيش

مرمر: وااااه ما فيش فرامل لا يا صقر استنى. انا...... 

(ما كملتش مرمر كلامها لما صقر فتح الباب وحاول يهدي على قد ما يقدر وحدفها من العربيه قامت بوجع وقفت وهي بتبص على العربيه بتاعته وهي بتلف وبتعيط

مرمر: الحجوني يا ناس الحجوني يا خلج حد يوجف العربيه دي.. مفهاااش فرااااامل.. 

( اتنين كانوا جايين بعربياتهم شافوا عربيه صقر بتلف حوالين نفسها وسمعوا صوت مرمر وهي بتقول ان العربيه ما فيهاش فرامل قفلوا على عربيه صقر من الجنبين وقفوها غصب عنها ونزل هو منها سليم.. مرمر جرت عليه بخوف

مرمر: الحمد لله انت زين حصل لك حاجه

صقر: انا زين الحمد لله ما تخافيش الف شكر يا رجاله

راجل: لا شكر على واجب يا ريس احنا شفنا البنيه عماله تجول ان العربيه ما فيهاش فرامل جفلنا عليك عشان عربيتك تجف الناس لبعضيها

راجل ثاني: بس ايه اللي حصل وكيف تطلع بالعربيه من غير فرامل يا اخوي ومعاك حريم كمان

صقر: ما كنتش اعرف ان ما فيهاش فرامل وتجريبا كده مقصود ان ما يبجاش فيها فرامل

الراجل: تجصد ان كان في حد بيحاول ياذيك. 

صقر: شكلها اكده يا ابن عمي.

راجل ثاني: ربنا يكفيك شر خلجه يا اخوي تحب نوصلك في حته

صقر: لا ده المركز خطوتين تشكروا كثر خيركم.

( مشوا الرجاله ومرمر وقفت تعيط وصقر حاول يهديها

صقر: بتعيطي ليه دلوك يا مرمر ايه اللي حصل منا زين اهو

مرمر بعياط: كيف ترميني من العربيه افرض كان جرى لك حاجه دلوك.

صقر: على الاجل كان هيجرالي لوحدي ما كنتش هحس ان انا شايل ذنبك. 

مرمر: طيب على الله تحصل تاني يا صقر 

صقر: ليه هو انتى ناويه ان احنا نتجلب بالعربيه كل يوم ولا ايه... خلاص انا مش هصبر كثير والموضوع ده كله هيخلص.

مرمر: طيب يلا على المركز علشان نعاود احسن انا جتتى اتكسرت من الواجعه

صقر: حجك عليا يا جلبى.. المهم انك زينه يلا بينا 

(راح صقر مع مرمر المركز وخلصوا مشوارهم ورجعوا على طول في الوقت ده كانت رحمه ماشيه في السوق بتنقي شويه حاجات جه وقف جنبها واحد يكلمها

رزق: صباح الفل يا ست البنات كلهم منوره السوج.

رحمه: بجولك ايه يا جدع انت انا شايفاك ماشي ورايا من ساعه ما خرجت من الدار انت عاوز ايه بالظبط بجى

رزق: والله يا ست البنات انا ما عاوز حاجه كل اللي عاوزه انى انول الرضا وبس 

رحمه: شكلك بدل ما هتنول الرضا هتنول علجه سخنه تكسر عضمك

رزق: لو من ايديكي انا راضي

رحمه: والله شكلك ما هتجيبها لبر لعلمك انا لو بس زعجت بالصوت هلم عليك السوج يعجنوك اهنه

رزق: ما جلتلك كله منك حلو.

( مشت رحمه وهي مخنوقه انه ماشي وراها في كل حته خصوصا انها لسه تعبانه وخارجه مزوغه من الغفر عشان تتمشى. ويا دوب طلعت على الطريق عربيه وقفت قدامها ونزل منها جوز رجاله عاوزين ياخدوها شد رزق عصايه كبيره ونزل عليهم بيها خبط خبط خبط لحد ما جروا ووقف رحمه على جنب يطمن عليها

رحمه بخوف: مين دول وكانوا عاوزين ايه

رزق: ما تخافيش جوليلي جرالك حاجه

رحمه: لا الحمد لله انا زينه انت جرى لك حاجه 

رزق: انا بخير ما تجلجيش لو خلصتى اللى جياله يلا عشان  ارجعك دارك

رحمه: مش عاوزه اتعبك ده كفايه اللي انت لسه عامله معايا برغم اني لسه مهزجاك 

رزق: ولا يهمك المهم انك زينه يلا بينا وما تجلجيش مني والله انا ولد حلال وطيب

رحمه: باين عليك وشكلي انا في الاخر اللي هطلع ظلمتك

رزق: انا راضي... اي حاجه منك راضي بيها يلا بينا 

(اخذ رزق رحمه ورجع بيها البيت في نفس الوقت اللي كان لسه داخل صقر ومرمر ومنصور مستنيهم اول ما عزيزه شافت مرمر ندهتلها على طول

مرمر: خير يا خاله عزيزه... حصل حاجه ولسه هنحكيها لسيدي اصبري شويه يا وليه 

عزيزه: لا ما هو حصل حاجه ثانيه برده وعاوزه احكيلك عليها اول جبل اي حاجه

مرمر: حصل ايه يا خاله جلجتيني جولي بسرعه

( حكت عزيزه كل حاجه لمرمر واتصدمت.وخرجت مرمر وسابتها وراحت تشوف اللي بيحصل بره

منصور: اتاخرتوا اكده ليه يا صقر

صقر: هحكيلك يا ابوي كل اللي حصل من اول ما خرجت من الدار

( اتفاجئوا برحمه داخله ومعاها رزق 

صقر: مين اللي جاي معاكي ده يا رحمه 

رحمه: ده اسمه رزق يا اخوي ما تعرفش ايه اللي حصل معايا في السوج وهو لحجني ربنا يستره

منصور: ايه اللي حصل معاكي في السوج.

رزق: سلام عليكم يا جناب العمده لا مؤاخذه اني جاي دارك بدون دعوه بس حبيت اني اطمن انها وصلت سليمه وبخير 

صقر:كتر خيرك يا اخوى بس حصل ايه يا رزق

رزق: عربيه وجفت في السوج ونزل منها رجاله حاولوا يخطفوها بس الحمد لله جت سليمه

رحمه باعجاب:بس رزق عدامهم العافيه يا ابوي وجريوا جدامه كيف الفراخ 

منصور بصدمه: ناس حاولوا يخطفوكي كيف الحديت ده

صقر: مش مستغرب يا ابوي هتلاجيهم نفس الناس اللي فكوا فرامل عربيتي وكنت هروح فيها انا ومرمر لولا ستر ربنا

منصور برعب: انت بتجول ايه يا ولدى.