رواية في ساعته واوانه كامله جميع الفصول بقلم نشوه عادل
- اهلا وسهلا نورتونا يا جماعة والله انما لا مؤاخذة يعنى يا ابنى انت جاى بطولك انت والوالدة اومال فين ابوك؟
= موجود ان شاء الله لو حصل القبول هيكون هنا المرة الجاية ف الاتفاق الاخير
ـ جميل طيب ممكن تكلمنى عن نفسك اكتر
= انا اسمى رامى مهندس مدنى عمرى ٢٧ سنة معيد بكلية هندسة عين شمس وبشتغل ف شركة ديكورات
ـ هايل ربنا يصلح حالك طيب بالنسبة للسكن يعنى ان شاء الله لو حصل نصيب هتعيشوا فين؟!
رامى: انا الحمدلله عندى شقة كويسة مساحتها ١٨٠ متر بس هى ع الطوب الاحمر واقفة ع التشطيبات وان شاء الله سما هيكون ليها دور كبير ف كده
ـ ليها دور فى كده ازاى معليش؟!
رامى: اقصد يعنى لما تاخد فلوس الورث بتاعتها هتساعدنى ف تشطيبها
ـ نعم؟! انت ايه اللى بتقوله ده؟!
رامى بتوتر: المفروض انى انا وسما اتفقنا على كده هى معرفتش حضرتك ولا ايه يا حاج محمد
محمد: ايه ده ما شاء الله انتم متفقين كمان على كل حاجة طب ولزومها ايه تتعب نفسك وتيجى لحد هنا طالما متفقين كنت خليك فى بيتك وانا جيبتها وجيت اتقدمتلك بنفسى
رامى: لو سمحت يا حاج مفيش داعى للتجريح ده وبعدين ايه المشكلة لو وقفت جنبى وساعدتنى ف البداية لا هو عيب ولا حرام
محمد: الكلام ده لو كانت مراتك وع ذمتك وبتبنوا نفسكم ايدك ف ايدها انما وانتم ع بر ازاى يعنى ده كلام ناس عاقلة ولا انت يا ابنى مش بتفهم فى الاصول
رامى: لو مش بفهم فى الاصول مكنتش زمانى هنا دلوقتى معاك بطلب ايد بنتك
محمد: لا وانت الصادق انت جاى هنا عشان تستغل بنتى هناك فرق
رامى: استغلها ازاى يعنى
محمد: طيب انت فعلا نيتك خير مش كده اكتب ليها الشقة باسمها وانا بنفسى اول ما الوديعة تتفك هجيبها لحد عندك عشان تشطبها
رامى: ايه الهبل ده ازاى يعنى اكتب الشقة باسمها هو اى تعقيد وخلاص قول انك مش موافق وخلصنا
محمد: عليك نور كويس انك بتفهمها وهى طايرة انا مش موافق
رامى بغضب: تمام يلا يا امى من هنا لو سمحتى
بعد ما نزل رامى ووالدته من الشقة ورزع الباب خلفه .... محمد بغضب جحيمى: سماااااااا
يوسف زوج اختها الصغرى سلمى: اهدى يا عمى الامور تتحل بالعقل
محمد: عقل ايه يا يوسف انت مش سمعت اللى الواد قاله والثقة اللى كان بيتكلم بيها وهو بيقولى اتفقنا يعنى جاي ليا تحصيل حاصل اى كلام يعنى
خرجت سما ببرود ووقفت امامه: نعم
محمد وهو يحاول كبت غضبه: الكلام اللى الواد ده قاله حقيقى
سما: ايوة
محمد واتسعت عيناه من الصدمة: ده ايه البجاحة والبرود ده وواقفة قصادى ولا كأنك عاملة عملة سوده على دماغك
سما: ليه ايه الغلط اللى انا عملته اظن دى فلوسى وحقى من ورث المرحومة امى واعمل بيه اللى انا عاوزاه
محمد: ليه كاسر عينك بايه يا بت ولا يكونش ماسك عليكى ذلة
سما بصدمة: ايه اللى حضرتك بتقوله ده اقسم بالله ابدا مفيش اى حاجة من اللى بتقوليها دى
محمد: اومال مرخصة نفسك معاه ليه عشان ايه
سما: عشان بحبه مثلا
محمد: حبك برص ادخلى على أوضتك حالا مش عاوز اشوفك ولا اسمع صوتك
سما: ايوة بس انا .............
محمد بزعيق: قسما بالله لو ما مشيتى من قصادى حالا لاكسر عضمك كله انا ماسك اعصابى عنك بالعافية غورى من وشى
مشيت سما من امامه وهى غاضبة ايضا ودخلت الى غرفتها ولحقت بها اختها سلمى
يوسف: اهدى يا عمى من فضلك وان شاء الله كل حاجة هتتحل بهدوء
فى الاسفل امام بيت سما .. فريدة والدة رامى: استنى هنا انا عاوزة اعرف ايه اللى حصل فوق ده؟!
رامى: زى ما سمعتى يا ماما
فريدة: سمعت ايه يا متخلف انت هو فيه واحد عاقل يروح يقول للى هيبقى حماه انا جاي اتجوز بنتك بفلوسها
رامى: اللى حصل بقى وبعدين المفروض يحترم انى صارحته وكمان انا معرفش ان سما مقالتش ليه
فريدة: وانت ازاى اصلا توافق على حاجة زى دى
رامى: وفيها ايه يعنى احنا مستعجلين وعاوزين ننجز وقت وانتى عارفة عشان اشطبها محتاج ليا سنتين تلاتة
فريدة: وابوك طبعا عارف بالكلام ده مش كده
رامى: ايوة وعلى قلبه زى العسل
فريدة: طبعا ما هو بخيل عمال يكنزهم على قلبه اد كده لحد ما هو هيموت وهما هيروحوا لسبيل حالهم فمش مستغربة ولا مصدومة من عملته لكن انا مصدومة فيك انت يا ابن بطنى حاولت بقدر الامكان اربيك كويس لكن النهاردة خيبت املى فيك
رامى بغضب: بذمتك يعنى يا امى انتى شايفة ان ده وقت ومكان الكلام ده خلينا نمشى من هنا الاول لو سمحتى من فضلك
فى غرفة سما ....سما بزعيق: اطلعى برة يا سلمى انا مش عاوزة اتكلم مع حد
سلمى: بس انا مش حد انا اختك حبيبتك مش ده كلامك ليا دايما لما اكون متعصبة
سما: وانا مش عاوزة اتكلم دلوقتى
جلست سلمى إلى جانبها واخذت رأسها فى احضانها بحنان لتشتد سما من احضانها لها وتنهار بالبكاء
سلمى: فى ايه بس يا حبيبتى احكيلى
سما: بابا بيكرهنى يا سلمى
سلمى باستغراب: ايه اللى بتقوليه ده بس ..انتى اللى بتقولى كده ده انتى روحه واكتر حد فينا قريب منه
سما: محصلش بابا لو بيحبنى بجد كان وافق على رامى
سلمى: بالعكس انا مأيدة بابا جدا فى قراره ده متزعليش منى بس اللى اسمه رامى ده انا مش بطيقه ولا برتاح ليه
سما: بس انا بحبه وعاوزاه وهو تقبلنى بالرغم انه اصغر منى بسنتين بحالهم
سلمى: وفيها ايه يعنى حتى لو اصغر منك ب ١٠ ده انتى ست البنات كلها والف من يتمناكى كفاية احترامك واخلاقك وجمالك
سما: يا سلمى افهمينى انا فرصى فى الجواز قلت انا واحدة داخلة ع ٣٠ خلاص وووو....
