رواية قصة وجدان الفصل العاشر 10 بقلم انين الليل

وجدان

كعدت بالارض يمي علووش واباوع العمي عاصف انطى العلوش خاشوكه وصار يخلي بالدجاج كدامه وهو يكله

:: ياالله ابو حسين اكل

علووش ما جاوبه باوعلنه صافنيين بوجهه ضحك عليش صافنين بوجهي

= منو ابو حسين عمو

:: هاا ما تعرفون ياهو ابو حسين غير كل علي كنيته ابو حسين

= هاا تقصد على علووش

:: اي مو اسمه علي

هزيت راسي = اي

باوع العلاوي وگله :: لا تصفن بعد عمك واكل شو. تفك حلكك واكل

دنى خاشوكه بيها تمن وشويه دجاج وخلاها بحلك علي اخويه بعدها باوعلي وكلي

:: وانتي لا تفهيين اتغدي ياالله

فلت وجهي وهزيت راسي صرت اكل واباوع العمو الي اخذ خبزه وصار ياخذ لحمايه وياكلها تقريبا اكل شويه اكثر من نص الخبزه وكال :: الحمد لله انتو اكلو ومن تكملين شيلي الصينيه وجيبيلي چاي

راح يغسل رجع شاف علاوي ما ياكل عمي لزمه من معصمه وكله

:: انا شبعت انت ليش ما تاكل

بقى لازمه ويباوعله علووش اول مره من يوم الحادث نطق ( ) ال حمد لله شششبعت

بين فرحتي بكلام اخوي وذهولي لان علاوي كلماته متقطعه عمي كله

:: زين رووح غسل وتعال اشرب وياي چاي

هز راسه ( ) ما اااحبه

راح وعمو سالني :: اخووج حجى منتبهتله يوچوج هو من زمان هالشكل كلامه

هزيت راسي وجاوبته = لا عمو علووش ابد ما يقطع بكلامه

سحب نفس قوي بالجگاره ونفخ الدخان :: يصير خير خلي نشوف المحامي وبعدها ناخذه للطبيب اذا كملتي اكلج

روحي جيبيلي جاي وبطريقج شوفي امج بلكي تاكل الها لگمه

اخذت الصينيه رحت للمطبخ وهناك بجييت حييل وانا اگول = يعني هي ناقصه وهسه اكتملت ويه علاوي وبعد

شراح اشوف ياربي

رحت الامي دخلت عليها بالغرفه شفتها متمدده على الكاع وايدها جوه راسها اتقربت منها وكعدت وانا ثانيه رجلي

لزمتها من چتفها = ماما اكعدي اكلي حتى لو لكمه

هي ما جاوبتني رغم شفتها گاعده وترمش رجعت حاجيتها == ماما الله يخليج اكعدي مو تردون ترحون للمحامي بس

اگعدي اكلي شويه مو زين عليج تبقيين هالشكل

هم ما ردت عليه صرت احجي وياها ودموعي على خدي = ماما لا تسوين هالشكل تره اني خايفه هوااي

هي باوعتلي انا هزيت راسي = اي خايفه عليج يصير بيج شي

ردت عليه بتعب // كل شي ما يصير بيه شوفيني شكبري وشكدي

= ماما ... صرت ابجي حييل هي جاوبتني // من اجوع اكل انا هسه شبعانه طلعي وسدي الباب وراج

دارت وجهه وانا طلعت من الغرفه رحت للمطبخ مسحت دموعي وخدرت چاي العمي واخذته اله هو باوعلي

  :: باچيه مو

صرت ابرطم هو. خلا الجكاره بالطفايه وكلي :: روحي غسلي وجهج روحي بابا

رحت غسلت وجهي وصرت اغسل بالصحون وانا ساكته ودموعي يوكعن على خدي لا اراديا كملت المطبخ

ورحت للصاله كعدت تصدكون حتى ما الي خلك ادخل للحمام واسبح. واغير ملابسي

اتمددت ع القنفه يمكن غفييت سمعت الباب يندك فزيت

وعمي ايكول :: هلا بيكم حياكم الله اتفضلو

سمعت صوت مره وهي تكول // وينج وجدان تعالي

رحت فتحت باب الصاله وشفت بيبي هديه جايه وام كرار زوجة ابنها كريم وياها خاله شيماء بت بيبي شفتها

سانده بيبي الي ما تكدر تمشي باوعتلي وسالتني

  - شنو نايمه

هزيت راسي = لا بس يمكن غفييت شويه

- الزمي بيبيتج كعديها خلي ادخل المسواك ويه مرت عمج

انتبهت علاليك هواي منزلين لزمت بيبي ودخلتها للصاله وهي تتنفس بتعب من گعدت سالتني // شلونج بيبي

  باستني = الحمد لله انتي شلونج

- امج شلونها

= ع حطة ايدج بس تبجي وما تاكل وما تحجي ونايمه بالگاع

- اووف يابيبي الله يساعدها

اجت ام كرار // اشلونج خاله

  = الحمد لله

- وامج

بيبي جاوبتها // تكول نفس ما هيه

- اي حقها الي صار بيها مو قليل

بيبي //. روحي جيبيلي ماي يبس ريكي

رحت جبت ماي بالدولكه والكلاص خليته يمها اجت خاله شيماء باوستني //. اشلونج خاله

=. الحمد لله

شيماء وهي تبچي // سوده عليه هذا الصار بيكم منين شو حتى نجاة فقيره

بيبي هديه //. اي چيفن فقيره هيج صار بيها

شيماء //. الله يساعدها ويكون بعونها لا مرد لقضائك ياالله

بيبي هديه // روحي صيحيها عمج يگول بس نشرب چاي نروح للمحامي

هزيت راسي = خلي اخدر جاي واندهها

ام كرار // دروحي خلي بالقوري ماي وارجعي صيحي الامج

رحت للمطبخ وانا اشوف ع الكاونترات علاليك ما فتحتهن لان ما يهمني خليت ماي بالقوري وفتحت النار ورجعت

بيبي سالتني // اتغديتو

هزيت راسي // اي بيبي الحمد لله

- منو طبخ منو جابلكم ؟

= بيبي عمو عاصف راح اتسوك ورجع واليوم جاب من المطعم

   بيبي // - خوش هذا عمج جاب مسواك وهسه باجيتج تكوم تطبخ

هزيت راسي ء= لا بيبي المن منو ياكل

- مي خالف بيبي تطبخ وتضمه بالفريز ايفيدج روحي صيحي امج

= اي بيبي

رحت للغرفه ما لگيت امي طلعت وصعدت فوك وام كرار تسالني /. شكو شصاير

رحت لگيتها بغرفة رامي وهي مطلعه ملابسه وتشم بيهن وشفت خدها مخروط صاير دم وهي تعاتب بي

- وك يمه ليش هالشكل ليش سويت بيه هيج تعال وشوف حالي ولك صرت مخبله ما انام ولا اشوف شي ولا ادري بشي

- كل شي ما اريد ارجع انت واخوك ارجع يمه

اتقربت منها وحضنتها وانا ابجي واگلها = ماما استغفري ربج

باوعتلي // اااخ يمه شلون بيج واحد مدفون والثاني مسجون

صرت ابجي واشهك جاوبتها = اجت بيبي ام كريم وياها خاله ام كرار وخاله شيماء ويردوج حتى ترحين للمحامي

= لزمتها من ايدها ياالله ماما تعالي

خلت اديها بالكاع وكامت بان عليها التعب والانكسار نزلت وهي نزلت وراي لاگتها شيماء

- وج نجاة راح تتخبلين على كيفج ويه روحج

وكانما خاله ذكرتها بلي صار امي صارت تبجي بصوت عالي ام كرار لزمتها وكعدتها ع القنفه بس امي گعدت بالكاع

شافتها بيبي حاچتها // ولج عمه شمسويه بروحج ولج لا تجيبلج وجعه ما تكومج ومنو الهليتيمه

امي صارت تبجي وتكلها // عمه اوليداتي راحو عمه

وشتسوين شييدج الله يباوعلح ويبرد گلبج

رفعت راسها وايديها //. الله يسمع منج

دكومي ياالله سبحي والبسيلج دشداشه حتى ترحين ويه عاصف وابو كرار

هزت راسها بتعب بيبي استردفت وحاجت ام كرار // وانتي عمه اطبخي الثواب او وزعي مثل ما وصيتج

- صار

امي باوعتلي انا رفعت اچتافي بيبي كالت // كريم اتسوك وندري بهاي المسكينه ما تتخرج عاد كال المرته اطبخي ثواب

وزعي ع الجوارين

هزت راسها امي وكالت //. اي عمه اوليدي ما ذكرته حتى بثواب ملتهيه زماني دوهني (صارت تعيط وتخمش بخدودها )

دوهني واحد دفنته والثاني محتاره خاف ينعدم

وبقت تضرب على وحهه وتملخ بشعرها لزمتها خاله شيماء وهي اتگللها

- كافي نجاة اتخبلتي كافي

امي صارت تلهث من التعب وشيماء حضنتها وصارت اتطبطب على ظهرها وتكللها بهدوء

• ابنج مو غريب ومقدرين الي انتي بي وكريم اتسوك وكلنه نطبخ ونوزع على روحه وجاب مسواك حتى ام كرار

اتطبخه وتضمه بالمجمده لان ندري ابتج ما تعرف دي كافي ياالله وبدلي ملابسج وروحي وياهم لو بكيفج اروح

اكللهم يرحون ابحدهم وانتي تبقيين

امي ما جاوبت راحت للغرفه وام كرار اخذت جاي انطتهن الزوجها وعمي

امي طلعت لابسه فوطه وفوكاها عبايه وجواريب والشحاطه مالت البيت وكعدت ساكته اجت ام كرار

وكلت الها // ياالله نجاة يكولون اذا كملتي حتى ترحين وياهم

امي راحت وبيبي اتكلها //روحي يمه واتوكلي على الله ومحمد وعلي ان شاالله يبرد كلبج

راحت امي تمشي بيبي تحجي على كييف وهيه تتنفس بعمق // يساعدج الله مصيبتج جبيره

باوعت الخاله شيماء // روحي وياها ولا تعوفيها

شيماء //. يمه شسوي اروح

بيبي //. روحي هناك خاف تحچي لو تسمع حجايه من المحامي تملخ روحها وعاصف وكريم ما يقبلون عاد انتي يمها

شيماء //. رايحه يمه الله يعينها

طلعت خاله بقيت وام كرار حجت // عمه راح اطبخ وانتي (تحجي وياي ) روحي جيبي جودليه افرشيها البيبي

حتى تتمدد

رحت للغرفه جبت الجودليه فرشتها وساعدت بيبي تنزل من القنفه سالتني

• امج وين تنام

= لو بغرفتها لو مرات اهنا بستنام بالكاع لا مخده ولافراش جواها

• الله يساعدها وانتي يمها

لا بيبي ما تقبل انا وعلاوي بغرفتنا هاي ( اشرت عليها )

• اي بيبي لا تعوفين امج

ام كرار // اي لاتعوفيها تره هيه مو بوعيها لاتسوي بروحها شي لو تطلع وماتلكوها

بيبي خزرتها // شلج بهالحچي هذا

-شنو عمه قابل مكذبه اني ما تشوفيها شلون. دا تتصرف مو بوعيها

-الله يساعدها ويكون بعونها

راحت ام كرار بيبي تحجي ويه نفسها انهجم بيت الباميه // مكذبه ودا تتصرف متبغدده انا صارلي خمسين سنه 

ما غيرت كلامي

ابتسمت على كلام بيبي الي كالت لي // روحي بيبي ويه مرت عمج ساعديها وكفضي المسواك

رحت شفت مرت عمي تغسل بالدجاج باوعتلي وكالت السمج اعزلي وحده وحده ابحد واكو مقطع هم عزلي بعلاكتين

بقيت واكفه هي مسحت ايدها وصارت تثرم بصل دارت شافتني واگفه

- شبيج صافنه عمج كريم جاب شكم سمجه شوي والمقطعات تكلا لان يدري محد يتسوك

بقيت ساكته وعاكشه وجهي //يا شبيج هالشكل

= تلعب نفسي من السمج

- يعني ما تحبينه

= لا احبه من ينطبخ بس هيج لا ما احب الزمه

هزت ايدها // عوفي للسمج نكعيلي بهاي الطاسه اربعه تمن تعرفين تغسلينه مو

=اي

ياالله حبيبتي

هي صارت تطبخ بالدجاج وانا غسلت التمن كعدت ع الطاوله باوعت لي //طلعي الباميه قلميها

طلعتها وصرت اقلم بالباميا مثل الخيار يعني اخليها ع الطاواله واقطع راسها هي ضحكت واجت اخذت مني السچين

ولزمت وحده قلمتها وگلتلي //هيج تتقلم باعي

هزيت راسي واخذت السچينه وصرت اسوي مثل ما علمتني هي سالتني

-اگلج شنو خالاتج ما اجن

  هزيت راسي //لا

-ولا حتى يتصلن باامج

= لا لان هي ما عدها نقال

-شلقصه ؟

رفعت اكتافي =ما ادري

-اخلطيلي طماطه بالخلاط تعرفين

=اي اعرف

خلطت الطماطه گلتلي //روحي اكعدي يم بيبيتج اخاف تريد شي

اجيت يم بيبي وكعدت هي سالتني // ها كملتن طبخ

  = بعد خاله ام كرار جاي تطبخ

-خوش تعالي اسحكي رجليه

رحت يمها وصرت ادوس رجليها وهي مره تكلي على كييف ومره تكلي شويه حيل بعدها كلتلي

- كافي بيبي الله ينطيج العافيه

نزلت وكعدت يمها سالتها = بيبي

- ها بيبي

= ليش خالاتي وخوالي ما يجونه

جاوبتني // شني بيبي ما يجون غير اجو بالفاتحه

= منو اجه هو بس خالي حسين وخالتي غنيه وثاني يوم رجعو

+

هزت راسها //اي بيبي لان بيبيتج مريضه ومحد ايداريها

= وحتى قبل هم ما چانو يجون ولا يسالون

- بيبي كلمن ملتهي بضيمه انتي ديري بالج على امج واخوج

هزيت راسي وانا ويه نفسي ادري اكو شي بين امي وخوالي رحت شفت علاوي شفته متمدد يمكن نايم اجت ام كرار

كعدت يم بيبي وكلتلي //جيبيلي ماي

جبتلها من البراد بيبي سالتها //كملتي

هزت راسها //اي عمه بس التمن يتهدر

-الله ينطيج العافيه

-لا شلقصه ما سويت شي

-الله يجازيج خطيه محد اتذكره بثواب وهلتشوفين امه عبالك مخبله

-الله يساعدها مصيبتها جبيره

-اي والله الله يساعدها

-بس اكمل التمن اطبخ سوب لحم واضمه ويه مرك الباميه

-اي سوي طبخات

-اي عمه عاد تطلع وتحمي بس تدرين عمه

-شنو

-لكيت مسواك هواي بالمجمده

باوعتلي بيبي هزيت راسي = عمو عاصف جاب مسواك واليوم جاب غدا من المطعم

نفخت //اي هم زحمه من بيت ام احسان كله تجيب غدا وعشا

ام كرار // اي الله ينطيها

تمينه كاعدات الى ان سمعنه باب الصاله انفتح ودخلت امي وخاله شيماء وعمي ابو كرار ورا عمي عاصف وهو يكول

:: ياالله سلام عليكم اشلونج عمه

بيبي گعدت من سمعت صوته ردت علي // هلا بيك عمه هاا بشرو

  ::الله كريم ان شاالله خير

- ان شا الله شكال الكم المحامي

  كريم // يمه بعد

ام كرار جابت ماي وانطته الزوجها الي بدوره قدمه العمي عاصف وحاچتني

تستمر القصة أدناه

-انا راح اصب وانتي تعالي وزعي

هزيت راسي وكفت عمي عاصف سالها :: شنوام كرار البنيه شنو ؟

جاوبته // مو ابو كرار اتسوك وگلي اطبخ ونوزعه ثواب للمرحوم

   باوعله :: مشكور ابو كرار الله يطول عمرك

ابو كرار //. ما سويت شي هذا واجبي

   عمو عاصف :: ام كرار صبي وانا اوزعه

كريم. //. شبيك عاصف تره عادي اي احد يوزعه

هز راسه :: ادري بس وجدان ما تطلع هي بيا حال صبي ام كرار وانا اوزعه هو غير للجوارين المنا ومنا

انا اخذه الهم

  وكفت //ان شاالله

بيبي سالته //عوف الثواب وسولفولي شكال الكم المحامي وهاي المسكينه شسوت

عمي عاصف نفخ وصار يضرب برجله على الكاع وكريم جاوب //يمه الشغله يراد الها صبر. وفلوس

امي بهاي الاثناء طلعت وراها خاله شيماء وهي جايبه بايدها علاكه وكالت بصوت متعب ومبحوح

- هاك ابو كرار انت وعاصف اخذو هذني الفلوس كل الي نملكه وبيعو السياره ولموهن وانطوهن للمحامي

خلي يطلع ابني ولو عدي بعد شي ابيعه هم بعته بس هذني كل ملكية سعدي

بيبي // اذكري الله يمه

امي بحرگه // عمه ابني معترف هو كاتل اخو يكول انا جبت السجين وكتلته

- مو اكو شهود

ابو كرار // يمه المحامي يكول هو معترف وحتى كايل الشهود امي واختي شهدن زور حتى اطلع براءه

امي صارت تضرب على وجهها بلا وعي // اي عمه شفتي شصار بيه انوب الثاني يروح اعدام

( اتقربت تستعطف عمامي ) فدوه خويه ابو كرار وانت عاصف الله يوفقكم لا تعوفون اوليدي تره من ينعدم ينهجم بيتي

بيبي // استهدي بالرحمن نجاة عاصف وابو كرارما يعوفونج

- شلون بيه عمه شلون انوب الثاني ينعدم لو يگضي كل شبابه بالسجن

عاصف :: هسه خلي نتاني وضمي فلوسج بلكي المحامي يسويلنه مواجهه اله وانتي تقنعينه يبدل اقواله

باوعتله وهي تبرطم بيبي كالت الها // يمه نجاة خلي عينج بعين الله وان شاالله تخلص وتظل سوالف

ابو كرار // حتى سوالف ما نريدها ان شاالله هشام يطلع وننسى كل شي

اجت ام كرار // صبيت الثواب وخليته بحافظات وعلاكه

:: اي هسه كايم اوزعه

را ح عمي عاصف ام كرار كالت //. شنو هالعقد شراح يصير لو وجدان وزعت الثواب

  شيماء // ما يصير شي بس عيب مادام زلم موجودين ليش النسوان هي. التطلع

هزت ايدها بيبي كالت الها // روحن حضرن العشا

ابو كرار // يمه خلي انصلي

راح يتوضى وبيبي حاجت امي // عمه كومي اتوضي وصلي وسلمي امرج ال الله

  - والنعم باالله

- اي عفيه بنيتي گومي

هزت راسها وراحت وام كرار كالت // الله يساعدها هنوب عفيه اهلها شكد عدهم گطع محد اجه ولا سال عنها

  شيماء // الها الله الها الله الاحسن من كل واحد

     بيبي // تعاي بيبي كوميني وصليني للمغسله خلي اتوضا

اجيت كومتها وراحت للمغسله تتوضا وهي تستغفر الله. فرشت الها السجاده باوعتلي وسالتني

  - وانتي تصلين يو لا

   هزيت راسي = اصلي بيبي

   - دا. روحي اتوضي وتعالي صلي يمي

تستمر القصة أدناه

رحت اتوضيت وفرشت السجاده وصرت اصلي ودموعي ينزلن ما اعرف على حال امي لو على رامي الي مات گدامي

لو على هشام الي ما اعرف مصيره لو على علووش الي ما يحجي او حتى يمكن على نفسي

كملت صلاة ودعيت ربي ان يهدي بال امي ويرجع علووش يحچي مثل قبل

لميت السجاده واجتني ام كرار كالت روحي شوفيهم كملو صلا واساليهم اصب العشا

رحت شفتهم كاعدين دگيت الباب عمو عاصف سالني :: ها بابا

عمو نص...

قاطعني التلفون اتصلو علي هو جاوب

:: هلا حجيه

  :: الحمد لله زين

:: اي بس نتفق ويه المحامي واجي ان شاالله

  :: شلون يمه اعوفهم هو هذا شلون حچي

  :: حجيه الولد النكتل والكاتل اولادنا من بطن وحده وظهر واحد

   :: اووو يمه احنه ابختج انا وين.وانتي وين

   :: حجيه وجهت بهاء ومهدي للشغل وانا بس افرغ اجي

  :: لا مو عصبي وداعتج بس ضايج چنه يم المحامي والوضع ما يطمن

  :: يمه شتحچيين شفنه اكبر محامي وهذا يريد فلوس يابو فلوس

   :: يمه المشكله الولد هو معترف على روحه لو تنحل بفلوس جان هينه

   :: اي حجيه هشام معترف هو كاتل اخو الولد مو برايه متندم ومقهور

    :: ان شاالله اجي وارد بس اخذ الزغير للطبيب

  :: ما بي شي تعبان شويه

   :: الله وياج

سد التلفون وغمض عيونه واتنفس بعمق بعدها فتح عيونه وگلي :: ها بابا شردتي تگولين

= عمو تكول عمه ام كرار تصب عشا

  :: اي بابا خلي تصب

رحت لكيتها صابه العشا اخذت الصينيه الهم وهي جابت اللبن والماي

وبعدها فرشت السفره يم بيبي وصرت اجيب بالثواب راحت شيماء وجابت امي وبيبي كالت الها

- نجاة هذا بثواب رامي اذا ما تاكلين وروحه ما راح اخلي لگمه بحلگي

امي بقت ساكته وبيبي تحجي وياها // ياالله عمه تعالي وسمي بالرحمن من باب تردين مواجهه الابنج ومن باب ما تاكلين

خاله شيماء // نجاة احبيبه اكلي وشدي حيلج الراح راح

بيبي // اذا ما تاكلين كلنه ما راح ناكل

خاله شيماء جابت طاسه زغيره بيها سوب وانطتها الامي الي وخرت الخاشوكه وشربت شويه وخاله اتكللها

اشربي دافي زين الصدرج

بس امي شربت شويه وبيبي سوت لفه زغيرونه ودنتها يم حلك امي الي اخذتها وصارت تاكل بيها وهي عيونها مليانه دمع.

ومن كملت اللكمه الاولى كالت //. الحمد لله

وصارت تقرا الفاتحه ودموعها ينزلن

كلنه انكسر خاطرنا عليها وبوجهنا نفس الكلام المفروض. هسه اخواتها او امها يمها وهنه يواسنها

بعد ما كملنه العشا انا لميت الصحون وشلتهن للمطبخ واجت خاله شيماء كالتلي

روحي صبي جاي واخذي العمامج وانا اغسل المواعين

اخذت كوبين جاي ورحت للديوان ابو كرار سالني // اتعشيتن

هزيت راسي كلي // زين راح نجي للصاله

انا رحت للصاله وكلت = عمو ابو كرار يريد يجي

  — بيبي خلي يجون شني شعدنا

شيماء // يمه يعني لان ام كرار وانا موجودات غير نلبس شالاتنا

  - ها ايي نسيت

اجو وعمه ام كرار كالت // رجعي الجاي برد وصبي غيره

تستمر القصة أدناه

رحت اصب چاي وبصراحه انا ارتاح الوجود اقاربنه ويكعدون ويسولفون هاي صارت بعد وفاة ابوي

جبت الجاي بكوابه وقدمته البيبي وخالاتي وبدورها بيبي حجت عليه بنتر // هو شنو جايبتلي بكوب شني صابتلي حليب

شيماء // يمه هيه شمدريها انا راح اصبلج بستكان

   عمو عاصف :: حتى انا ام علي

- صار خويه

بيبي // چا انتي بيبي ما تعرفين تصبين بستكان

بقيت ساكته ما اعرف شجاوب راحت ام علي جابت استكانيين جاي

  بيبي //. هسه فهموني شكال الكم المحامي

  ابو كرار // بلكي ايحصل النه مواجهه ونقنعه يبدل اقواله

امي ساكته ومدنكه عمو عاصف سالني

:: علي اتعشى

  هزيت راسي =. ما قبل ياكول

  بيبي //. خافنه ما يشتهي

     :: هو شني ما يشتهي هو شماكل ( سالني ) هو وين ؟

    اشرت. = بالغرفه

وكف عمي وراح العلي واسمعه يكله :: ليش ما اتعشيت ما يصير تبقى بدون اكل

طلع علي ويه عمي عاصف الي كال :: طالعين انا وابو حسين شويه ونرجع من رخصتكم

  شفته غمز الابو كرار الي بدوره جاوب // احنه هم شويه ونروح

  :: وين رايحين ما نتاخر ؟

  ابو كرار // لا تعبان تدري من الدوام واجيت لهنا

:: اي انا ما اتاخر بعد وكت

طلع عمي عاصف واندك الباب راح ابو كرار فتحه اجت ام احسان الي سلمت ونزلت على بيبي باوستها اجت وياها

منار من كعدت عمي ابو كرار راح للديوان وام احسان كعدت وكالت // ثواب الواصل

بيبي // بالعافيه خاله شلونج وشلونج ابو احسان

- الحمد لله حجيه زينين

  بيبي // والله فضلكم ما ينسي الله يكثر خيركم ويخليلج احسان وابو

- يا خاله صدك چذب احنه اهل ما سوينه شي

     بيبي // لا والله كريم يكول ابو احسان واگف ويانه وگفة اخو ولا عافنه حاله من حالنه

   - خاله حق الجار وابو احسان وابو هشام الله يرحمه اكثر من الاخوه. ونجاة مثل اختي

باوعت الامي وام احسان صارت تبجي وبيبي صارت تنعى وتبجي لمن ما خاله شيماء كالت الها يمه

- - اسكتي شفيد البجي

  - - لا ما يفيد هيج نبچي شويه يبرد گلبنه

ام احسان رادت تغير الموضوع :: من طلعت شفت عم الجهال هو وعلووش خو ما بي شي

شيماء // لاراح ايعشي ويفره خطيه ضايج

   - اي الله يساعده

جابت ام كرار جاي لام احسان الي بدورها اخذته وردت // شنو هالزحمه توني شربت واجيت

- - لا ماكو زحمه قابل شسويتلج

ام احسان سالت امي // ها نجاة بشري شكلج 

 المحامي

امي وهي عاضه على شفتها اتنفست بعمق // گلي بعد

- شلون يعني

- يكول ابنج معترف هو كاتل اخو متعمد

- يا يا

  - اي شفتي شلون زماني يفر بيه يحتار خوله يحتار شيسوي وياي

- استهدي بالرحمن نجاة وگولي ياالله

امي رفعت اديها وهيه تگول // ياالله بكيفك سلمتك امر ابني هشام وامري وامر هاليتيمه واليتيم

شيماء // نعم من سلمتيله امرج

اندك الباب واجه عمي عاصف وراح كعد بالديوان يم ابو كرار وابو احسان وعلي رجع للغرفه لمن ما ابو كرار

خابر زوجته الي كالت // عمه كريم يگول نروح

بيبي ردت // لا انا ابقى انا وشيماء نبات اهنا وباجر نجي

خوش (باوعتلي ) انا ضميت الطبخ بالفريز انتي طلعي قبل وقت واحمي

هزيت راسي ام احسان كالت // ليش همه شنو كلافتهم احنه نطبخ وندز الهم

بيبي // خاله نعم الله عليكم ما قصرتو ابو كرار اتسوك ومرته طبخت مال شكم يوم

  ام احسان // خاله ماكو فرق

- مي خالف خاف يجيهم خطار على غفله عاد بسرعه تحمي وتصب

   اشرت عليه // هاي الطفله

  شيماء // لا شنو طفله سباعيه وحديثه

  ام احسان //. ال صدك هي كل شي ما تعرف

  بيبي // لاتخافيين عليها الوكت يعلمها

ام كرار // ياالله تصبحون على خير

- وانتي من اهله

- عمه مو تنسين علاجج

- لا ما انسا

راحت ام كرار وشيماء شالت الاستكانات وراحت للمطبخ وراها راحت ام احسان وخاله تغسل بيهن وام احسان تمسح

بالكاونتر وهي تسولف على شيماء وتسالها

-اكلج ام علي هذوله اهل نجاة صدك يحجون

- شبيهم

- ولو اني غريبه ومو من حقي اتدخل بس دادا هاي المسكينه نجاة المفروض اخواتها يمها وحده من بنات اختها

امها مرت اخوها

  هزت راسها. // صحيح بس شبيدنا

   ام احسان // لا ام علي احجي على اخواتها خابريهن كليلهن اختجن راح تتخبل ومحد يمها بس بتها وهاي خطيه زغيره

مو حمل هذا الي دا يصير بيها

شيماء /. دادا ما يجون بيناتهم حزازيات

   - - اي ليش ؟

   - - مو بفاتحة سعدي امه واخواته طردنهن

         ام احسان // يا صدك

    - - اي صدك

  - - ما سمعت ونجاة ما گالتلي هي ما تضم عليه

- - — يجوز استحت ما حجتلج

  - - عود ليش طردتهن

- - بعد همه متعاركين من زمان ومن اتوفى سعدي كالت الهن الحجيه هذا هو گمتو بالواجب الله وياكم ومن اختها كالت

احنه جايين البتنا الحجيه جاوبتها هاي بتكم تريد تروح الله ومحمد وعلي وياها محد كامشها

  ام احسان // الله يساعدج يانجاة همه اهلها ما يجونها من زمان ولايسالون عليها بس هسه اختلف الوضع

  شيماء // يمعوده كلمن يگول ياروحي

- -الله يساعدها ويكون بعونها

   خاله شيماء // انوب الولد الي معترف على نفسه

ام احسان //. تحچيين صدك

     هزت راسها //اي هاي جمل الغرگان غطه

طلعن راحن يم بيبي وكعدن يسولفن وامي ساكته لمن ما سمعت صوت عمي عاصف يكول

:: ياالله يالله خويه ابو احسان يكول نمشي

  —- اي دادا

وكفت وكالت // تصبحون على خير

- - هله بيج خاله وانتي من اهل الخير

طلعو واجه عمي عاصف سال بيبي :: ها عمه تباتين اهنا

  - - اي انا وام علي

   :: خوش حتى تبقن يم ام هشام خاف احد يجي

  - - ليش وين تريد

:: اخذ علي للطبيب

امي انتبهت وردت بصوت مبحوح // ليش شبي علاوي ؟

الفصل العاشر من هنا