رواية اوجاع الماضي الفصل الثالث عشر
الجد: مال صوتكم عالي كده ليه؟
جميلة (بلطافة): لا يا جدو ده إحنا بنهزر.
إلهام: لا يا جدي، البت ديه من ساعة ما دخلت البيت وهي واخدة الكل تحت جناحها.
الجد: أولاً دي بنت عمك، وغير كده، إنتِ تزعلي يعني لما البيت يكون هادي؟
إلهام: آه، أزعل، هي خدت حب الكل والاهتمام، وأنا بقيت على الرف، وكمان إنت بتحبها أكتر مني.
الجد: له كلكم واحد عندي.
شمس: خلاص يا إلهام، روحي شوفي بناتك اللي سايباهم لامك ليل نهار، وجاية تتضايقي من الناس!
إلهام: وهي أمي اشتكتلك؟
شمس (بأدب): أنا بتكلم بأدب.
إلهام: أنا وامي حرين مع بعض، وبعدين أنا حامل، المفروض الكل يخدمني.
نسمة: ليه يعني الكل يخدمك؟ هتجيبي اللي محدش جابه؟
إلهام: ومالك إنتي؟ قاعدة في بيتنا ليه؟ ولا الست جميلة لمّت اللي مالهمش لازمة وجعدتهم جارها؟
عشق (بكسوف): معلش يا جميلة، أنا لازم أرجع بيتنا. شكراً يا إلهام.
إلهام (بضحك): والله في واحدة طلعت عندها دم!
(تلتفت لنسمة)
إلهام: أنا بقا ماعنديش دم وقاعدة ما بمشيش؟
الجد (بحزم): اطلعي فوق يا إلهام، وإياكِ تتحدي ضيوفي تاني. كده حجك عليا يا عشق يا بنتي.
لياءات نزار: مالها عشق يا جد؟ بتحجّ نفسك ليها ليه؟
نسمة: أصلك أختك طردتها.
روضة: تتشلّ في لسانك يا بعيدة.
نزار: بعد إذن جدي وأخويا شمس، عشق تبقى عروستي، وأي حد يضايقها يبقى بيضايقني أنا.
إلهام: والله عال! ما بقاش إلا العيال.
شمس: يعني إنتي عاوزة إيه دلوقتي؟ جَدِّك قالك اطلعي، ما سمعتيش؟ عاوزاني أمد إيدي عليكي يعني؟
نسمة (بسخرية): قلبك أبيض يا جوز أختي! ولا أقولك: اديها جلمين تتعلم تحترم الكبير.
روضة: يابتي اسكتي، ما تولعيش.
الجد: خدي البنت يا جميلة واطلعي عند جدتها، وانت يا شمس خد مراتك واطلعوا. هملوني أنا وإلهام.
شمس: حاضر يا جدي.
جميلة: تمام، يلا يا بنات.
نسمة (بضحك): أحسن، خلي جدي يربيها بتجيله!
(يصعد الجميع فوق)
الجد: اقعدي يا إلهام، وقوليلي مالك بتضايقي من بنت عمك؟
إلهام: دي مش مربّاية، شايفة لابسة إيه! وفاشلة كمان.
الجد: جميلة؟ دي المذيعة الكبيرة، والمخطوبة لضابط وابن وزير، دي فاشلة؟! ولا اللي ماخدتش الإعدادية؟
إلهام (ببكاء): بتعايرني يا جدي!
الجد (بحزم): اسمعي يا إلهام، لو ضايقتي بنت عمك تاني، تاخدي جوزك وبناتك وتسبي البيت من سكات.
إلهام: إيه يا جدي، بتطردني عشان بنت ولدك الصايعة دي؟
(الجد يصفعها بالقلم)
الجد: انتي يابتي! محدش جادر عليكي، طالعة زي أبوكي، شرانية وقلبك أسود.
(تصعد إلهام تولول)
إلهام: والله يا جميلة لأربيكي وأطفّشك من هنا واطلعك بفضيحة!
(عابد يصحى)
عابد: مالك؟ خدك أحمر كده ليه؟
إلهام: جدي ضربني عشان البت جميلة!
عابد (بعصبية): عملتِ لها إيه؟
إلهام: عاملة نفسها صاحبة بيت، ولمّة البنات حواليها، وبجول عليها صايعة، جدي يضربني ويجوللي "خدي جوزك وبناتك وامشي!"
عابد: الله يخرب بيتك، إنتي جاموسة؟ بتخربي كل اللي بخططله؟
إلهام: إنت كمان عليا؟
عابد: يابتي افهمي! جميلة مش هتاخد على عيشتنا، وهتمشي. وعداوتك ليها مش ف مصلحتنا. كفاية علينا شمس، ولا عاوزاني أهج ومحدش يعرفلي طريق؟
إلهام (بخوف): لا لا خلاص.
عابد: يبقا تسمعي كلامي.
إلهام: طيب، بس نسمع برضو كلامها ونزار كمان هيتجوزها؟
عابد: اهي كده طربجت من كل ناحية. لازم تاخديهم كلهم تحت جناحك.
إلهام: والله عال! أنا إلهام بنت عبدالرحيم أوطي نفسي ليهم؟
عابد: مافكيش فايدة.
إلهام: آه عاوزة أعفص عليهم كلهم.
عابد: هخليكي ست الكل لو سمعتي الكلام.
إلهام: أمري لله.
عابد: تنزلي تعتذري للكل.
إلهام: بس…
عابد: مفيش بس. انزلي لجَدِّك واعتذري ليهم.
(تنزل إلهام بتمثيل)
إلهام: أنا آسفة يا جدي، وعاوزة أعتذر لكل البنات، أصل كنت غيرانة من جميلة، وفاكرة إنك بتحبها أكتر.
الجد: يا بتي، جُلتلك كلكم واحد عندي.
(تُقبّل يده)
إلهام: خلاص، انده عليهم.
(الجد ينده عليهم، وتنزل جميلة ومعها البنات)
إلهام: حجكم عليا يا بنات، أنا آسفة ليكم، إنتو أخواتي من النهاردة.
نسمة (بهمس): والله البت السودة دي بتخطط لحاجة.
جميلة (بطيبة): محصلش حاجة، وأنا بكرة أعمل الغدا للكل.
الجد: جميلة، انتي مستقلة بيا ولا إيه؟
جميلة: لأ، ما فيش تعب، هو بابا فين؟ وحامد وأدهم؟
الجد: طلعوا يتمشوا.
الجد: نزار خيك يا إلهام.
إلهام (بخبث): حاضر يا جدو.
الجدة: ربنا يهديكم.
إلهام: تعالوا نقعد في الجنينة.
نسمة: هطلع أنده روضة أختي.
تكمِلة المشهد في بيت الجد بعد النزول للجنينة)
الجد: نسمه، طلعي وقولي لشمش: جدك عاوزك.
نسمه: من عيني.
(تصعد نسمه لجناح شمس)
نسمه: شمش، يا شمش! كلّم جدك، وانتي يا روضة تعالي اقعدي معانا في الجنينة.
روضة (بتردد): له! إلهام تزعل.
نسمه: إذا كانت الهام الحرباية ذات نفسها اللي نزلت واعتذرت وقالت نجعد ف الجنينة!
روضة (بفرحه): ربنا يهدي! بس انتي قصري لسانك.
نسمه: هبقى أشوف شمش، خبط على نزار عشان يقعد معانا.
شمس: ماشي.
(تنزل روضة ونسمه، وينضم ليهم نزار، ويقعدوا كلهم في الجنينة، وشمس يقعد جنب جده)
شمس: خير يا جد؟
الجد: مش عارف يا ولدي، جلجان من أبوك، خايف يتصرف تصرف من تصرفاته.
شمس: ربنا يستر يا جد… بس عامل نفسك زين قدام الناس عشان اليومين دول يعدّوا على خير.
الجد: وانا ميّت يا ولدي، عاملته عفش! هي عمايله السودة اللي مخلياني مش طايقه.
شمس: أقولك إيه بس… ربنا يهدي.
(يضحك الجد)
الجد: بس إنت ما شاء الله عليك، إنت ومراتك، وشكم منور! وهي كمان البنيه ما بقتش تنام زي الأول، بقت مفنجلة على طول.
شمس (بضحك): يعني عشان صحيت يومين بقت خلاص؟
الجد: العشق باين ف عيونك يا شمش، والبت تستاهل.
بس عارف أنا شفقان على مين؟
شمس: على مين؟
الجد: على أدهم، ولد عمك. وجع ف البت نسمه، ميعرفش جنانها، ولا يعرف إنها بتعض، ومعلمة على عيال البلد كلها!
شمس: آه والله يا جد، دي سنانها حامية زي الموس.
الجد (بضحك): وه! أوعى تكون عضّتك؟ راحت هيبتك ف البلد يا ولدي؟
شمس (يضحك): لا طبعا… بس عضت مرات أخوها! وإيه يا عيني… كانت ناقصة تاخد واحد وعشرين حُجة، وكمان كسرت رجلين!
الجد: معتمد كلمني فيديو، وراني يد مراته ويد بنته اللي عضّتهم.
(يضحك الجد ويفتكر)
الجد: فكرني قبل ما يتجوز أدهم، نطعّموه!
(يدخل عز مع أولاده)
أدهم (بقلق): تطعموني من إيه يا جدو؟
شمس (بضحك): أنا ف عرضك يا جدو، الجوازة هتبوظ!
الجد (بضحك): له يا ولدي، فيش حاجة… ده أنا قصدي على الناموس.
عز: والله يا أبويا، البلد بقت جميلة جوي.
الجد: أمال إيه يا ولدي!
أدهم: أمال جميلة فين؟
شمس: كلهم في الجنينة، نسمه معاهم.
الجد (بضحك): آه، معاهم.
(يفرح أدهم ويمشي)
أدهم: عن إذنكم، أصل "جيمو" وحشتني.
(ينزل أدهم للجنينة)
أدهم: مساء الخير على الجميع.
الكل: مساء النور.
(يجلس جنب نسمه)
أدهم: إيه القمر ده؟ يخربيت جمالك!
نسمه (تمسك يده): تعالى أقرألك الكف!
أدهم: بتعرفي؟
نسمه: أمال إيه!
(تمسك يده وتحطها في بُقّها وتعضه عضّة شديدة)
أدهم: آآه! يا بنت العضّاضة!
نسمه: علشان تحرم تعاكسني تاني.
(يدخل أدهم البيت وهو بيصرخ)
عز: مالك يا أدهم؟
(شمس يبص في إيده ويضحك)
شمس: خلاص يا جد، أدهم مش محتاج تطعيم، نسمه عضّته!
عز (بضحك): عضّته؟
شمس: أصل نسمه أليفة، مبتعضش غير اللي يضايقها.
الجد: بس يا شمش، ما تولّعش الدنيا.
عز: هي فعلاً عضّتك؟
أدهم: آه، عضّتني! ضحكت عليا وقالتلي هات إيدك أقرالك الكف، راحت عضّاني!
عز: أنتَ لو كنت ضايقتها، تبقى تستاهل.
أدهم: الله! دي مش خطيبتي؟
الجد: يا حبيبي، دي عندكم ف مصر كده. حتى شمش، جعد يحب ف روضة كذا سنة، لحد ما كبرت وجوزتهاله.
(أدهم ينسي وجع إيده، ويبص لشمس)
أدهم: أوبا! ده إنت طلعت حبيب يا ابن عمي؟
شمس (بضحك): كده بردك يا جدو؟ تفضحني؟
الجد: ما البلد كلها عارفة قصة غرامك لروضة.
أدهم: الله يسهلها، بس مراتك يا شمش ما شاء الله هادية، غير أختها خالص.
شمس: الله يكون ف عونك يا أدهم.
الجد: يلا هنعمل إيه؟ جدرك ونصيبك.
(يدخل حامد)
الجد: أحسن، هيا ديه اللي هتربيه، والله أنا فرحان فيه.
الجد (بضحك): باين عليك متعب يا أدهم؟
عز: فعلاً يا أبا، أكتر واحد تعبني في تربيته… شقي أوي.
أدهم (يمثل الزعل): يعني كلكم عليا؟
شمس: بقولك إيه، أوعاك تزعل نسمه. أديك شايف عز، وهو بيقدر يتكلم معاها؟
الجد: تعالوا نجعد معاهم، ولا خايف يا أدهم؟
أدهم: أخاف؟ أخاف من إيه؟ يلا بينا.
---
المشهد ينتقل إلى بيت عيّاش:
(بعد ما مشي عجور وعبدالرحيم)
عجور: ملك، فرصة وجاتلك لغيت عندك، أوعي تضيعيها.
ملك: أضيع إيه؟ لأ طبعًا، ده أنا ما صدقت! نطلع على وش الدنيا زي الناس.
عجور: لما عبدالرحيم يبعت الفلوس، أنا هاخد نصهم… ولا انتي ليكي كلام تاني؟
ملك: كلام إيه؟ أنت تاخد عنيا يا أبا!
فضيلة: ربنا يهديكم على بعض.
(عبدالرحيم وعجور في الطريق)
عجور: مش هتبطّل لهفتك على البنات الصغيرين؟ كل ما تشوف بنت حالك يتشجلب؟
عبدالرحيم: كلهم كوم، والبت ديه كوم تاني! دي جَمره، وشها مورد ومنوّر.
عجور: مش هتكبر أبدًا!
عبدالرحيم: يا راجل! روح… مش أحسن مني؟
عجور: معرفش أنا ليه كاره صنف الحريم… دول نعمة يا ولد خالتي.
عبدالرحيم: لسه بتحبها؟ دي ماتت وشبعت موت.
عجور (بغضب): اقفل خشمك! ما تجيبش سيرتها تاني على لسانك.
عبدالرحيم: إنت زعلت؟ خلاص… ياسيدي، متزعلش.
عجور: خلص، إنت جاي معايا؟
عبدالرحيم: لأ، أنا مروح.
عجور: عاوزك تجيل، ومتعملش مشاكل مع أبوك ولا مع عز.
عبدالرحيم: مزاجي رايق، ومعايزش أعمل مشاكل مع حد. هروح أنعس، وأحلم بالعروسة الجديدة.
(يترك عبدالرحيم المكان، وعجور يقعد على صخرة ويفتكر حبيبته)
عجور (بحنين): يا بت يا ساره…
ساره: نعمين، يا نور العين.
عجور: أنا في إيدي مصلحة، وهخلصها وأجيلك أتجدم لك.
ساره: أوعى تكون هتسرق تاني! كفاية سنين عمرك اللي قضيتها ف الإصلاحية.
عجور: لأ، خلاص… توبت.
ساره: تعال نتجوز على طول. إنت عارف ماكانش ليا غير أمي، واهي توفت.
تعال نعيش على لقمة بملح.
عجور: يابت ده انتي غالية جوي، أنا نفسي أجيبلك الدنيا كلها.
ساره: أنا عاوزاك إنت بس.
عجور: يعني نتجوز في الأوضة بتاعتي؟
ساره: آه، وماله!
عجور: من غير عفش ولا حاجة؟
ساره (بضحك): أنا موافقة يا سيدي.
عجور: خلاص، نروح للمأذون؟
ساره: يلا بينا.
