رواية نارا حيدره الفصل الثالث عشر بقلم نمارق رحيم
نزلت من السيارة فتحت الباب علئ السريع ونسيت الجنطة ورحت اركض ،دخلت لللبيت امي ونور ونبراس گاعدات بنص الطرمة وملاخات شعرهن ويبچن ويصرخن!!
گعدت علئ ركب رجليه ،باوعت لأمي وعيني مليانه دموع صرت ما اشوف واضحَ گلت والحرف بلگوه يطلع مني ..
- شنو صااار احچوو!!!
ماردت عليه تالي "نـور" صرخت من كُل گلبها
نور :- نااااردييين بااابااا باابااا راااح مااات ودوو للمستشفئ نارررديين بااباااا !!..
ضليت متفاجئة ما مستوعبه كلامها و البچي والصريَخ ايديه و كُل جسمي تشنج صرخت ..
- شدتحچييين شنوو مات أبـوي؟ لا تضحكون عليه شنو هذا الحچي وينه هسه وين باباااااا ؟؟؟؟
- انوووينه بـابـا مااات ما رراح يرجع بعـعددد
اثناء ما داتحچي "نـور" دخلت "نـرجـس" شمرت جنطتها وراحت تصرخ وتلطم وتگابلت هيه و أمي يبـچن
ولحد هل لحضه ما مستوعبه كُل شيء كُل الي اعرفه اليوم خطوبتي اليووم رح يجي "حيـدرة" يعقد عليه اليوم مناسبة حلوة اليوم احلئ يوم بحياتي اليوم چنت منتظرته من أيام معقولة "أبـوي" مـات!!
شده التفكير واني گاعدة اباوع عليهن بسكوت تامً، النسوان علئ صريخ أمي دخلن وضلن يبچن ما تحملت إلي دايصير سديت اذني بقوة تمددت بالگاع فقدت الوعي انغمئ عليه من الحجم الصدمة المفاجئة، إلي تعرضت الها ..
حسيت بروحي بعالم ابيض ما بي آي لون اسمع اصريخ أمي و أخواتي و اني نايمة،فزيت لگيت نفسي بالغرفة ، تذكرت الي صار، باوعت الساعة بـ6 المغرب!
صارلي 6 ساعات نايمة وما ادري بالدنيا
اتذكرت الساعه 5 يجي الشيخ، أكيد حيدرة
جاي هسه ،واني ما محضرة نفسي، بسبَب نـور تشاقه وياي أكيد چذب بابا مايموت هو وعدني اليوم يكون حاضر بخطوبتي
گال ألي اجي من دوامي من وكت، وهو ما يُخلف بوعده ،، آيي هوو هيچ گـاال!!
طلعت من غرفتنة ،اول ما طلعت شفت البنات يطلعن ويطبن ويمشن بالممر ،ولابسات أسود!
غلست ونزلت جوه واتجهت لغرفة بابا،بخـوف وأدعي بگلبي الگا موجود وگاعد يباوع علئ تلفزيون مثل كُل يوم بهيچ وگت
دايضحكون عليه يردون يخربون فرحتي،أكيد هاي ماما سمعت اليوم رح انخطب ورادت تبچيني بـ أحلئ يوم!!
دخلت للغرفة چانت فارغه مابيها آي أحد طلعت ،أصوات بچيهن عالي ،أريد مكان فارغ ماكو ؛ البيت متروس نسوان!!
دخلت للديوانية نسوان،الكل تلطم وتنعي وأمي تصرخ ،ما تحملت وطلعت بدون كلام،رحت للمطبخ البنات موجودات ،بقيت واكفة
اتفحصهن هم يبچن! شنوو الموضوع؟
طلعت بسرعة للطرمه الباب مفتوح ،والنسوان اطب وتطلع وهوسه ، طلعت للشارع انتبهت لمحت "سـالار" واگف ويريد يركب السيارة
رحت ركض حافي ، شافني واجه اتجاهي چان لابس أسود وچفيه علئ رگبـته ..
رحت حضنته ، بعدني و اخذني من ايدي
للبيت وماحچه شي ، وراد يطلـع
هنا ما تحملت صرخت :- أرررررريد باباااا ابوويه سالاااار اررريد ابويــــة ويييين اخذتـوو احچوووو!!!!
رجع عليه شبكني ، گعدنه بالگاع بچى وياي
اجن نور ونبراس هم لابسات دشاديش سود وعيونهن حمر ، اجن حضنهن سالار وگعدنه نبچي بصوت رج البيت رج ..
واني الوحيدة إلي ابچي بدون سبَب!
ما اعرف علئ شنو ؟ بعدني ما مستوعبة
أريد أحد يفهمني!!
سالار انبح صوته وهو يكول :- يا يابه يا بويه
اجن عماتي اثنين گومنه جوا، و "سـالار"
اجو الولد گومو اخذو وهوو منتهي كُلش
دخلنه للمطبخ وصحت بيهن و اني ابچي وبصوت قوي :- أبـووي أبـووووي ووووينه ؟؟ احچن ويينه شلووون مااات صدگ يعني مااات هاهيه راااح!! يمته وشلووون شلووون!!!!!!
ولطمت علئ خدي ..
نبـراس: سوا حادث الصبح وهوو جاي من دوامه الساعه 8 والناس متصلين بسالار بعد ما اخذو موبايله وهناك ودوو للمستشفئ مالحگوو عليه مااات و عافنه!!!!
- شلــووون عرفتوو
- اتصل علينه سالار چنت اعدل بالديوانية وفرحانين عبالي اتصل يگلي شنوو محتاجة شنوو النقص عصاير شيء بس گال إلي حضري المستمسكات والجناسي أبـوي،إستغربت گلتلة لييش والمن چان يگلي انطي الموبايل لامي انطيته وگال إلها توفى بابا!!
ما دا نستوعب ولا مصدگين واجه للبيت چان منتهي عيونه حمرر رايحه من البچي اجو الولد وعمامي التموو بلبيت يله صدگنه!!
استمع الها ورجعت ابچي صوتي راح
من البچي ..
بچيت و بقيت وياهن تالي صعدت للغرفة
اجن البنات طردتهن ..
- اطلعن لحدد تجييي لحدد تصعد يمي ماارييد اشوفكم،قفلت الباب وگعدت بالكاع
سكتت ساعة كاملة اصبر بروحي وكُل ما أريد احچي أصرَخ اششش واهز براسي ..
لحد ما اكتفيت بالسكوت وصرخت طلعت كُل إلي بگلبي اصرخَ بصوت وحالي يگطع الگلب دعيت ربي ياخذ امانتي مثل ما اخذ روح أبوي
البنات يدگن بالباب واني قافلة ما افتحة
اصررخ وابچي بحررگه گلب ..
ليششش باااابااا ليشششش شلووون انطاااك كلبك تعوووف اربع بنااات بهلدنيااا أنتتتتَت مو عدتنييي البارحة گلت إلية نـاردين بوويـة رح اخطبج اله رح افرح بيوم عقدچ علئ إلي تحبيي!!
البااارحة چنت تشوفني اركض منا ومنا ،اعدل وانضف چنت تضحك عليه وتگلي علئ كيفچ لاتعبين روحچ ونوب تعبين وانأجل الخطوبة البيت ماراح يطير روحي ارتاحي خواتچ ينظفن!!
وين الگه مثل حنيتك بعد!!
منو بعد يگلي بوويـة بعدك!!
ليييش عفتنه ليييش فرحتي ماتمتتت! رحتتت من الدنيا فجئه ما دريت البارحة آخر يوم اشوفك بي آخر يوم اسمع صوتك وضحكتك البارحة گلت إلية "بويـة تصبحين علئ خير" وييين الخييير باااابااا صبحتت علئ موووتك!!
صريخي و كلامي يسمعو ويدگون الباب من سمعت صوت "سالار ومصطفئ"وهمه يگولون: أفتحي الباب بداعـة ابونه فتحي"
گمت فتحته ..حضنوني ما گدرو يسكتوني ويصبروني وهما نفس حالتي و أسوء!!
صوت الملايه تنعي خلاني انهار كل شيء تجمع من أول ما وعيت علئ بابا لحد هل يوم وكل ما اتذكر موقف يذكرني بـ أبوي وحنيته و طيبتة
وحُبه الچبير النه ازيد بچي و اصرخ من كون الله ماخذ روحيَ ومنطيها اله!!
"سـالار" انهار حيل و اني حاضنة مُصـطفئ دخلوو ولد عمامي ، و أمـجد راح اخذ سـالار وبلكوه كومه وراحو ..
سـالار قوي حتئ اذا "نقهر،حزن،ضاج" ما يگول ما يبين گدامنه حتئ لو صاير شيء چبير
بس هسه حسيت صدگ انكسر ظهره! "
گعدن بحضنه نـور ونبـراس طلعت بنات خالتي يمي وباب الغرفه ما انسد كل ساعة تدخل مرة تسلم علينه وتبوس راسنه وتگول البقية بحياتچن حتئ ما اعرف ارد علئ هيچ كلام لساني ينربط!!
أنتبهت علئ ملابسي اريد ابدل اختنگت صحت لنبراس راحت جابتلي دشداشة لبستها واتذكرت جنت ضامتها البسها بس بمحرم بابا جابها ما تخيلت البسها بفاتحتة!!
رجعت تمددت بصف نور و افكر بالدنيا إلي اخذت اعز شي عدنه،حاادث سيارة يموت
أبـوي و يحرمنه منه للأبـد!
نمت ساعتين وگعدت محد بالغرفة طلعت وبعده الصريخ متواصل وكل شوي تدخل وحدة من كرايبنه تلطم
نـور انغمئ عليها وهيه تبچي اخذتها
للغرفة وقفلتها عليها ..
دخل سـالار من باب الكراج و دخلو عمامي يصيحون بٲسم أبـوي "جاسم نكسر ضهرنه بفاجـعة موتك شلون حالنه يصير بعدك"
گعدت بالهول وكل النسوان الكبار ينعن واغلبهم مصدومين مامتوقعين هلخبر علئ غفلة، لمحت "أمجـد" و "سـالار" دخلو وصعدو فوگ عفت بيبي ورحت وراهم لغرفته، وگفت يمه وهو يفتح الكنتور ..
- نـاردين روحي يم خواتچ
- أنت وين رايح ؟
- چنه بالمستشفئ اجرائات وتحقيق
بالحادث وراجعين هسه ناخذه للمغيسل
- ليش راح ادفنون بابا هسه
- انغسله ونطلع بي لنجـف بعد الـ12
- اني أرووح وياكم
- لاا وين رايحة ما ترحين
- أروووح والله معليه اريد ارووم للمغيسل اشوف بابا اخر مره اودعه فدووووة
- وين رايحة نـارديـن، كلهم زلم
أمجـد: خليها ترووح تشوف عمي آخر مره وتودعه اذا ما تشوفه رح تبقئ بحسرتها بسببك
عفتهم ورحت لبست جبه مالت أمي ورحت وياهم سـالار قبل بس اني أروح و ماما ما راحت ولا نـور ولا نبـراس يخافن من هيچ مكان گالن بوسي وسلمينه عليه إمانـه
اكثرها زلم راحو، الشارع متروس
سيارات وكلها طالعة
ركبنه بسيارته وركبو أمجد و اثنين من ولد عمي ومن شافوني حچو علئ سـالار الدنيا ليل
گال الهم تريد تروح ومعاندة ، سكتو
وصلنه للمستشفئ وهناك وكفن ثلاث
سيارات ولد عمي واخوان أبوي
بس انصدمت واني گاعدة بسيارة "سـالار"
وعيني علئ الجامة ؛شفت سيارة "حيـدرة"
ليش جاي ؟
نزل أخو حيدرة "حـسن" راح ركض لـ سالار
حضنه حييل بقوو حاضنين بعض ويبچون يگله أنكسر ظهري حسن وهو يعزي ويصبره
راحوو كلهم واني مانزلت بقيت گاعدة
وعيني علئ باب دخول المستشفئ
چان يطلع حيدرة يمشي سريع راح لسيارتة طلع محفظه مدري شنو، وقبل ما يرجع شافني
رجع مشى اتجاهي وعيني بعينه
تقدم وفتح الباب ..
حيـدرة: السلام عليكم
سكتت تالي رديت السلام، ونزلت عيني
حيـدرة: البقيه بحياتچ نارديـن
- حياتك الباقية حيـدرا
حيـدرة: بوية الله يساعدچ ويساعد گلبج
ويصبرچ علئ فراگ الوالـد
سكتت ما عرفت أجاوبة كلامه بحنيه
خلاني أبچي
- حقچ تبچين فراگ الابو مو سهل ابدًا
طلعي الي بكلبچ و ابچي
- حيدرا ما داستوعب أبوي ماات
هسه رح ندفنه و نرجع كُلش صصعبة!!
- ربچ كاتب إله اليوم يموت وگلنه علئ هذا الطريق بدون إعتراض طبعًا فـ صيري قوية
- والنعم بالله صعب اتعود علئ حياتي
بدون ابوية كُلش صعب
- صح بس تتعودين شهرين ثلاث و تستوعبين بس خلي ابوچ بعيونچ وين ما ترحين و ادعيله دائمًا ابدي صلي اله من الليلة ما رح يرجع بالبچي صدگي
شهكت مسحت دموعي، هزيت راسي "آي"
- نـاردين!
- هاا ؟
سكت راد يگول شي وصاح حسن علئ شغلة راح ،واجه حسن وكف وگـال:
- البقيه بحياتچ خيتي
- البقية بحياتك خوية حسن
اجوو سالار والبقيه رحنه وسيارة
الاسعاف گدامنه
وصلنه للمغيسل لازمه بيد سـالار قوي خفت وانرعبت من المكان حار و ريحه معقم وصابون غريبة!
النسوان يصرخن وزلم تبچي
طلعو جثه ميتهم ..
دخلو بابا وراحو گعدت علئ الكرسي وسـالار وأمجـد و عمي دخلو والبقية بقو واگفين گبالي واحتئ شباب جايين يغسلون جثه ميتهم
انتبهت لحيدرة يباوع عليه ما ادري شنو تفسير نضراته يخزر بيه تالي شوية واجه يمي وگـف گبالي غطه عليه وهو مچتف ايدية ماخله أحد يباوعلي انطاني ظهره ..
بقئ واگف كأنُ حارس يحميني من عيونهم
بقيت ساكتة وكل شوي اعدل الجبه ما متعودة البس هيچ وطويلة مالت امي ..
طلع أمجد صاح لـ حيدرة
- خلي تجي ناردين
دار عليه وگـال :- اذا بيچ حيل تشوفين ابوچ ادخلي واذا خايفة گولي ما ادخلچ!
-لاا لاا اريد اشوفة
واني بداخلي خوف ما عندي جرئه اشوفه بمغيسل و اودعه للحضه اتراجعت، تالي ما نتبهت علئ نفسي واني داخله للحمام مشيت وسالار اجه يمي رحت تقدمت
اكو شيء مثل الصبه چبيره متمدد عليها ومغسلينه، مغطيه نص جسمه بخاولي طويل وصابون ومي يمه كأنُ إلي داشوفه حَلم
طلع و أمجد هم خلوني لوحدي ..
رحت يمه شمرت روحي علئ صدرة واني أبوس راسه .. بابااا اگعد باااباا فدووووة اگعد شلووون ينطييك گلبك تعووف ولدك و بناااتك محتاجينك صعبة حييل صعبة بووويـة!!
فدوووة بداعتييي اگععد تمنييت هذا اليوم إلية قبلك فدووة رحتلك بويه باباتي حبيبي ياروح ناردين انته اگعد اجتتك نارددين تودعك احچي فتح عييينك فدوووة نبـرراس ونـور حييل مشتاقات الك يگللي سلمينه علئ ابونة امانـه ما تحملن يشوفنك بهذا المكان صعبة بوية صعبة بس اني آم الگلب القوي اجيت أشوفك
ليـش ما تگعد!!
ما تحملت منضره صررخت صررخة بلحضتها من صدگ ستوعبت ودريت بابا مات وبعد مانشوفه
زلغت خدودي وصريخي هد حيلي واني ادگ علئ صدره واگوله اگعددد اگععدد
دخل "سـالار" واني حاضنته ما اريد اطلع حاول يجرني واني لازمته قوي و اصرخ عوفوني
ما اريد اروووح ما اشبعت منه
دخل "حيـدرة" علئ صريخي جرني بقوة من ايدية دفعته و اني متخبلة ..
سحبني من ايدية لحضنه و شالني
طلعني من المغيسل واني اجر بقميصة و اصيح
" نزلن حيـدرررة فدوووة أريدد أبـوي
حرررام عليييك"
شالني لسيارته خلاني علئ كرسي ربط حزام الآمان حول خصري و هو ساكت
ضليت اگح قوي وحالتي حالة ولازمة گلبي
راح جابلي بطل مي من سيارة سـالار و عدل الكشن خلا أوسع انطاني مي وبقئ مچتف ايده واني أشرب
فتح بطل ثاني وغسلي وجهي بيده ويصلي علئ مُحمد حسيته صدگ خايف علية!!
- ليش هيچي سويتي بروحچ عيونچ وگلبچ و انتي گلچ انتهيتي!!
سكتت ..
- شلون صرتي ؟
- مو زينه ، اريد بابا رجعني اله
- ناردين ابوچ مات استوعبي هل شيء حتئ لو صعب عليچ كافي تعذبي حسبالچ ما يسمع بچيج بالمغيسل؟ لا، يسمعچ وهسه هو حييل متأذي ما يصير ياابه جاي تعذبي بدموعچ ياعيني، اسئلچ سؤال ..
ابوچ من يشوفچ تبچين يفرح ؟،جاوبي
سكتت ..
- چا ما يصير هيچ تسوين بروحچ گتلچ اذا مابيچ حيل لا تشوفي لاتشوفي!!
تالي سكتنه .. عيني صارت علئ التابوت طلعو من المغيسل وربطو علئ سيارة سـالار وحـسن صعد وياه ..
وقبل ما تحرك السيارة اجه سالار شافني گـال
- هااا گلتلچ لا ترحيين انوب لاتتخربطين يمنه!
باوع لحيدرا وگـال اله ..
- خوية اخذها للبيت رجعها بلا آمر عليك!
حيـدرة: بعيني
صحت ..
- لااا ما ارجع أروووح لنجف
سـالار :- اسكتي ماشفتي روحچ ردتي
تموتين قبل شوي
حيـدرة :- معليك بيها أنت، روحو لطريقكم
انا اوديها لنجف اوديها
سـالار :- هاا آي آي خوش
طبطب عليه وراحو كلهم ..
ركب وباوعلي..
- بسم الله توكلنا علئ الله
سكتت مشى مسافه اباوع لطريق
هذا مو طريق يودي لسريع نجف
تالي اتفاجئت من دخلنه للكاظمية
صحت :
- أنتتتتت رح ترجعنيي للبييت ؟؟؟
ماجاوبني ..
- وربيي معليييه وربييي ودينييي
للنجففف حيدرررااا تضحكك عليهه ؟؟
داحچي ويااك جاووب!
ما رد ..
لحد مادخلنه بشارعنه ..
وروحي طافره وابچي:
- ليييش چذببت علييه ودينيي
اريد باابااا حيدرررا
صف السياره يم الباب
وچان شادين الچادر الفاتحه
نزل واني معانده اجه مصطفئ
وفتح الباب:
- نزززلي نارردين
- ماانززل حقيررر چذذبت عليه
اررريد بااابااا
سحبني حيدرا سحل بيه سحل ..
واني ابچي راح مصطفئ صاح لنبراس
اجت الي دفعتها ورجعت للسيارة
اجه سحبني من ايدي ..
حيدرة :- لاتبچين دخييل الله
دموعـچ غاليـة علـيه إلي سويته علمودچ ادري گلبچ ما يتحمل و انا كُلش خايف عليچ
وعلئ گلبچ
رديت عليه بصياح ما أدري بنفسي:
- اتحممل بس ودينييي!!!
- كافي ناردين دخلي جوه بعدين اوديچ
- يمته بعدين!
- اليوم اول يوم اله هناك
اتمر فتره وياخذج سالار
انه اگله وعد بس ادخلي
سكتت وسحبني مصطفئ دخلت للبيت
ما احچي ويا احد نزعت الجبه ورحت
شمرت روحي علئ الفراش ..
ياهيه التجي امثل عليها نايمة..
ما اريد احچي ويا احد ..
واني دامثل النوم فعلا نمت ،، ماگعدت
الا علئ صوت الملا ثاني يوم ..
شويه بديت احجي احس احسن من امس ..حجيت لنور ولنبراس شنوو صار بالمغيسل
مر اسبوع يوم اصعب من يوم
كل ليله ابچي اني والبنات ..
صارت الخميسيه اجت الملايه ، وعماتي والنسوان يطبخن ، والزلم يطبخون بيت جوارينه لان طارمتهم جبيره
سون كاستر وعليه كيك ، هاي اكلت
بابا يموت عليها كتلهن يسونها ..
طبخوو الزلم العشه والنسوان
كعدن ياكلن الكرايب والجوارين ..
واني اغسل وياهن المواعين
وماحطيت شي بحلكي ..
خلصت غسل ورحت للغرفة
بعد ما توضيت و بديت اقرا قرأن ..
بعدني بٲول ورقه واتذكرت بابا كل سنه اختم القران مره بس برمضان ..
بس هسه رح ابدي اقرا واختمه واهدي لروحه .. شكبرها هلكلمة وشجرحها!
قريت سوره البقرة خلصتها ورحت نمت..
وكل يوم اقرا سوره لو سورتين وارجع انام
لو اكعد لوحدي لو اساعدهن بالغسل
ما احط لگمه بحلكي بس اشرب مي
حيلي نهد وحيل فقدت الشهيه مااشتهي شي مااحس بعد اكوو طعم بالاكل وبابا ماموجود وياي ياكل مثل قبل..
طيبة بقت عدنه اسبوع كامل ،علمود نور شوي تصبرها وراحت وره الخميسيه
وحسن بقى ويا سالار ما تركه لحضة
بقى عدنه من اول يوم فاتحة ..
ينام بغرفتة ..
و من يصير الصبح يطلعون
من البيت لليل يلا يجون ..
صرت ما اشوفه باليوم قليل
..كل وقتي للغرفه
مر شهر وهذا الشهر مارحت للمدرسة نبراس ونور داومن اني انفصلت ماداومت
بس اليوم اجه سالار بليل ..
بعد ماحچه وياي ..
كال باجر ارجعي للدوامج
- لاا مااروح
- ليش ناردين حرامات تروح عليج هلسنه
- عادي يابه وذا ، سالار مالي نفس افتح كتاب واقرا كلمة فشلون تريد مني اروح اداوم واطلع وكٲنو طبيعي
- باعي اذا ما ترحين للمدرسة
ماترحين باجر للاربعينه ابوي
- لااا شبيك سالارر فدووة
موو هيچ تسووي بيه !!
- هذا مستقبلج ولج لمصلحتچ واتذكري ابوي يفرح من تتخرجين مو تبطلين
سكتت ...
- ترحين خوش وهسه حضري ملابسچ
- ماااشي خووش افتهمت
باس راسي وطلع ..
داومت ثاني يوم ماطايقه احد والكل يكلي ليش لابسه صدريه سوده ؛ ماعندي الجرئه اكول لكل وحده تسئلني ..لابسه اسود علئ بابا مات
رجعت للبيت ورحت سبحت وطلعت تنوره وقميص اطوييل اسود ونور ونبرس مثلي
بقينه ننتظر لحد ماكالو يلاا ..اجت السيارة اجبيره كوستر الورا نسوان والكراسي الكدام سالار وحسن وامجد ..
غفيت بالطريق فزيت علئ صوت نور كعدت عيني صارت علئ قبور فز كلبي وتذكرت احنه هسه بالمقبره ..
قبل ماندخل صار اصريخ
ونسوان وامي والكل يبجي ..
راحن نزلت وياهن واني عكس يوم الرحت بالمغيسل هسه ضابطه نفسي ..
چنت حييل هادئة وسالار كل شوي
يفحص حرارتي خاف مصخنه
لان موطبيعي هدوئي ..
يست قبر بابا وكعدت شوي
ماعبالي حيدرا هم جاي !
شفته يدخن جكارة يم سيارته ..
ردت اقرا قران لبابا بس معندي
ماجبت نسيت ..
عفتهم ورحت يمه ..
شافني اجي اله شمر الجكارة
وعدل وكفته ..
- هلوو حيدرا شلونك
حيدرة :- هلاا يابه زين محتاجه شي
- اي اريد قرٲن اذا عندك
اريد اقرا لبابا ونسيت ماجبت
حيدرة:
- هاا والله انه هم ما عندي بسيارتي!
لحضه انتظري ..
ضليت واكفة ..
راح فتح الباب انطاني موبايله وفتحه..
- اكو تطبيق منزله بي سور
و آدعيه اقري بي
- ماشي شكرًا
- العفو يابـه روحي اقري
رجعت يم قبره قريت سوره الواقعة والكرسي وقبل مانرجع انطيته اله وتشكرته ..
رجعت للسيارة و رحنه للآمام علي
عليه السلام زرنه و رجعنه لبغداد ..
شكرا لزيارتكم عالم روايات سكيرهوم
