رواية نقطة تحول الفصل السادس عشر بقلم جمانه السعيدي
سديت التليفون وكعدت افكر
هذا الموضوع بعد ما ينضم اكثر لازم ينكشف
ومن ينكشف هذا الموضوع ساعته راح يتحدد مصيري اني وقيس لو نبقى سوا لو نفترق
اني هسه اتاكدت من مشاعري اتجاه اني احبه
هو الوحيد الي كدر يشغل بالي ويكعد بنص كلبي
ولان اعرفه واعرف اخلاقه راح اكون مأمنه على حياتي وياااا قررت نهاية هذا الأسبوع انهي هاي اللعبه
ثاني يوم اجا قيس للدوام وكل عاده واكف برا منتضرني
احب عيونه وهي ادور عليه
دخلنا وسلمنا علي واني رحت المكتبي
بس وصلت اجا وراي
قيس صباح الخير
عبير صباح الخيرات
قيس من الصبح لازم الباب مثل الطفل الي منتضر شي مهم حتى كعده ما كعدت
عبير ابتسمت كل هذا علمودي
قيس اروح فدوه المودج ومود الخلفوج
عبير شكرا اللك وللي خلفوك
قيس انتضرج بلعشره مو تتاخرين
عبير اوكي يله ارجع الشغلك لا يطردونه اثنيينه
قيس حاضر من عيوني
عبير بقه يوم واحد ويخلص هذا الأسبوع من دوام قيس
وهو يوميه يسئلني ما لكيتي عبير
ما يدري عبير واكفه كدامه بشحمها ولحمها
جمانه السعيدي
عبير انت بس باجر وتنزل الاهلك
قيس اي
عبير هلمره اني اروح وياك الاهلك
قيس لاتحجين حجي انتي مو كده
عبير لا ولله اروح وياك اريد اتعرف على اهلك
قيس افتهم انتي وافقتي على موضوع زواجنا
عبير بعد لازم اسئل اقرب الناس الك ايجوز ضام عليه شي
قيس انتي تحجين صدك لوتتشاقين
عبير طبعا احجي صدك
قيس ولله امي شكد راح تفرح
عبير بس امك
قيس لا الشعب العراقي كله راح يفرح الله عليج تحجين صدك
عبير اي ولله احجي صدك وبعد عندي خبر الك راح يفرحك كولش جمانه السعيدي
قيس شنو احجي
عبير لكيت عبير بت عمتك الي ادور عليها
قيس صدك لكيتيه
عبير اي اتفقت وياها بس باجر وتروح الاهلك للبيت
قيس يمكن اني احلم اكرصيني
عبير ولله ما تحلم اكيد الشغله بيه ورث شلون ما تروح
قيس هااا راح تجي لان سمعت بيها ورث
عبير اي
قيس تمام
عبير باجر اجي نفس موعد الدوام هنا والكاك محضر نفسك ونطلع كبل الاهلك
قيس الليله شلون انام ما ادري انتي وجه الخير كله
من رجعت حجيت كلشي العمتي وعمو محسن وكتلهم اني باجر اروح البيت خالي يجوز ابقى يومين او اكثر
العصر رحت للصالون حفيت وعدلت حواجبي وسويت تنضيف بشره
وعدلت أطراف شعري وكذلتي على فكره شعري واصل
نهاية الخلفيه
رحت اشتريت فستان شيفون يخبل اسود وبي نقطه ابيض
صدره موديل الهدله
واشتريت حذاء وجنطه ابيض يخبلن
جمانه السعيدي
ثاني يوم كعدت سبحت وجففت شعري لان هو سرح ما يحتاج تسريح ومكياج وصبغت اضافري
لبست فستاني والحذاء والجنطه ولبست ذهبي
عفت شعري مفتوح مارفعته وسحبت الكذله على عيوني
اريدهم يشوفون الشعر الي جان ينحلق عد الحلاق شلون صار طويل
طلعت ويه عمو بس وصلنا لكيت قيس واكف بلباب
وبيده جنطته نزلت وسلمت علي
اترخص من عمو محسن وصعدنا بلسياره
قيس الله عليج اكرصيني اني بحلم لو علم
عبير هاي شبيك
قيس وللج شطالعه اليوم ناويه تقضين عليه والنوب جايه وياي الاهلي
عبير شنو الغريب بلموضوع
لبست نضارتي من الشمس وهوشغل اغنيه هيثم يوسف
كتله لا اذا عندك موسيقى هادئه سمعني
طول الطريق ينكت ويسولف مثل الي ما مصدك اني ويااا
وكل اشويه يباوع عليه
عبير انتبه للطريق لا تموتنا
قيس الله نموت سوا شكد حلووو
عبير وليش انموت سوا انتبه للطريق حتى نعيش سوا
قيس بس كون عبير بت عمتي تصدق بكلامها وتجي اليوم
عبير اطمن راح تجي
قيس انت متاكده
عبير اي متاكده طبعا
٣ ساعات يله وصلنا البيت خالي
بس شفت البيت كلبي كام يدك على السريع طبعا هم عدهم علم بجيتنا لان قيس مخابر خالتي وكايل الها
راح نجي اني وعبير بت المدير
ما اعرف اوصف احساسي كل الذكريات ازاحمت بعقلي
الشارع الي جنت اللعب بي والبيت الي عشت بي وامي الله يرحمها
قيس وصلت للباب ادك بي والتفتت شفت عبير بعدها واكفه باب السياره
قيس يلله تعالي
عبير اتقدمت امشي بس كلبي بي ومآ تزيد دكاته
همزين منزله النضاره احس نفسي راح ابجي
بسلا ابجي وافضح الدنيا
انفتح الباب طفل ازغير تقريبا عمرا اربع سنوات فتح الباب هذا اكيد ابن ميثم
دنكت وبسته يخبل وهو بس يباوع عليه متفاجئ بيه
دخلنا واجتنا خالتي ام قيس
آريد اصرخ واكله اشتاقيتلج كوه لازمه نفسي
حتى سلمت عليها بصوت ناصي اخاف احجي بصوت وانفجر بوجها من البجي واحضنها
باستني واني بستها ودخلت واجتني زوجت ميثم سلمت عليه
دخلت جوه طلعت كلنس ومسحت الدموع ونزعت النضاره
ام قيس اهلا وسهلا زارتنا البركه كل الهله ومليون مرحب
هله بيج شكد ما مشيتي
عبير اهلا وسهلا بيج خاله
ام قيس شبيج يمه بجيتي
عبير لا يمكن وكع شي بعيني
طلعت كلنس ومسحت عيوني حتى المكياج راح يخرب
ما اكدر اسيطر على مشاعري
جمانه السعيدي
ام قيس الله تخبلين ما شاء الله التفتت على قيس وكالت وللك تخبل
قيس للضحك اي يمه تخبل وهي جايه تخطبني منكم من بغداد لمن وصلنا تقنع بيه حتى اوافق واني ما اقبل
عبير راسا ضحكت ما كدرت اسيطر
من ضحكت كلهم ضحكو على حجي قيس
الجهال وزوجت ميثم بس يباوعون عليه وخالتي ما عرفتني ابد
ام قيس ولله يايمه بس شفتج ارتاحيتلج جني اعرفج من زمان
عبير اني هم ارتاحيتلج
قيس يلله يمه وين غداج بسرعه
عبير بعد وكت خلي ابوك والولد يجون ونتعرف عليهم
ام قيس خل انجيب جاي وماي
طلعو كلهم وبقينا بس اني وقيس بلغرفه
قيس هاي عائلتي المتواضعه وهذا بيتنا البسيط
عبير عائلتك حلوه وبيتكم حلو
قيس الله يجبر خاطرج
عبير ممكن اغسل
قيس اي تفضلي
كمت امشي كدام قيس واني اشوف نفسي اللعب واتعارك
وهنا جنت نايمه وهنا امي جانت تكعد
رحت كبل للمغسله
قيس هااا اه عبالك جانت عايشه ويانه حتى البيت تندله
غسلت ورجعت كعدت وكامت ام قيس تسولف عليه
شويه واجا خالي وحمودي وحسوني
دخل خالي وكال السلام عليكم
عبير عليكم السلام باوعت كبران والشيب مالي راسه
ولحيته
وحمودي كبران وحسوني عندا شوارب
عبير عليكم السلام شلونك ابو قيس
خالي الحمد لله انتي شلونج الاهل شلونهم
جمانه السعيدي
عبير الحمد لله اشرت على حمودي وكتله انت اكيد حمودي
ضحك وكال بعد صرت جبير واسمي محمد
عبير وانت حسين هز راسه وضحك اي
قيس عجيب حتى اخواني تعرفهم عبالك شايفتهم كبل
شويه ودخل ميثم وسلم والجهال ركضو كعدو بحضنه
صاح خالي حضرو الغدا بسرعه
ام قيس يمه ناكل سوا لو نروح للغرفه الثانيه
عبير لا ناكل سوا انتم اهلي واتشرف بيكم
مدو السفره وبدو ينقلون بلاكل حايرين شطابخين
برياني وسمج شوي ودولمه ومركة بانيه وحلاوه وزلاطه وطرشي وخبز حار
الكل كعد وكمنا ناكل سويه اني اكل قليل اريد عيوني تشبع من هاي الجمعه الحلوه
جمانه السعيدي
خالي اكلج عمو يمته عبير توصل بت المرحومه
عبير فد اشويه وتوصل
خالي ام قيس خليلها غدا خاف توصل متاخره
ام قيس خل توصل واشوفها كلبي طك عليها
عبير هسه توصل
كملنا اكل وجابو الجاي والكل يسولف ويضحك
عبير ممكن احجي شي مهم يخص عبير
الكل سكت وانتبهو عليه
عبير عبير من طلعت منا واخذها خالها الابوها عافها يم عمتها ولمن اجا ابوها كال ما اريدها
وعافها بدون اكل ليله كامله والصبح جهاله كتلوها ولمن دافعت عن نفسها ابوها لزمها وزوجته موتتها كتل
بحيث جسمها صار ازرك
ام قيس الله واكبر على الضالمه موكتلك يارجال عوفها عدي اني متعلمه عليها
عبير خل اكمل كلامي هنا خالي دنك وضاج
اخذها ابوهاوشمرها على عمتها وقرر يخليها بملجئ الايتام
لان زوجته كالت لو اني لو هي بلبيت
بس رب العالمين لطيف ومايقبل بلضلم حنن كلب عمتها عليها واخذتها بعد ما ابوها كتب تنازل بعد ما يريدها ابد
جمانه السعيدي
الله فتح أبواب الخير والرحمه على عمتها وزوجها
زوج عمتها صار مدير عام ونتقلو يعيشون بغداد
والخير انفتح عليهم باوسع ابوابه
هنا قيس شبه افتهم القصه وكف على حيله وكال اي كملي
عبير بس عبير درست وتخرجت وتعينت وصارت انسانه ثانيه والصدفه الي لا على البال ولا على الخاطر
يطلع ابن خالها قيس ضابط بنفس المكان الي اداوم بي
ومآ يعرفها مثل ما انتم كلكم ما عرفتوها هسه
ويحبها ويطلب يزوجها وهو ما يعرف هاي عبير بت عمته ابد
ام قيس راسا بجت وطفرت عليه وحضنتني وكامت تبجي واني ابجي
قيس عاف المكان وطلع وخالي بقه مدنك والولد التمو عليه كلهم
ويبوسون براسي التفتت على خالي وكتله اني ما ضايجه من كل الي سويته انت قدمتلي حياة جديده
صرت انسانه ثانيه بفضلك
لوما دازني الابوي ماصار هذا حالي
واني مستعده اتنازل عن حقي بهذا البيت الك لان اني ممنونه منك
خالي اعذريني يابويه
عبير كمت وحضنته وبسته وهو باسني وحضني حيل
بس قيس اختفى من البيت كله
ام قيس كعدت تسئلني عن وضعي وعن عمتي وشلون عايشه اذن اذان المغرب وقيس ماكو عرفته زعلان عليه
يعتبرني جذبت علي وضحكت علي
بس غلطان هو الي ما عرفني
عبير خاله اريد شي ابدل ملابسي
ام قيس اجيبلج من ملابس زوجت ميثم
عبير لا اريد تراك من تراكات قيس
جابتلي تراك لبسته جبير عليه
اتعشينا واني عيني على الباب يمته يرجع قيس خايفه من ردت فعله
الساعه عشره بليل سمعته رجع ودخل الغرفه الثانيه
رحت دخلت للغرفه وسديت الباب
عبير ليش عفتني وطلعت نزلت من عينك طلعت بت عمتك موبت المدير العام وين حجيك لو بت السايق احبج
قيس لا بس انتي غشيتيني
عبير بيش غشيتك انت ما سئلتني كبل كلت انتي بت المدير العام
قيس وليش ماكلتي الحقيقه
عبير لان تفاجئت بيك ما متوقعه اشوفك بيوم من الايام
وماتعرفني
قيس سكتت
عبير لاتخاف راح اختفي من حياتك باجر الصبح اروح اتنازل الخالي عن حصتي بلبيت وارجع البغداد
و اوعدك بعد ماتشوف وجهي ابد
ردت اطلع من الغرفه لحكني وصار كدامي وسد الباب
عبير ابتعد اريد اطلع
قيس وليش لابسه تراكي منو سمحلج
عبير ابتعد ترا هسه انزعه
قيس يله انزعي اريد تراكي ما اطلعين اله تنزعين تراكي
عبير ابتعد ترا اطلعلك عبوسي القديم
قيس سحبت ايدها وعضيتها حيل
عبير اخ اخ ليش هيج
قيس لان طول الوقت واني احب عبوسي وعبالي عبير
عبير اذا تريد ترجع بكلامك ماعندي مانع
قيس اموتج هنا افتهمتي منا نطلع ونعقد كبل
عبير لازم تخطبني من عمو محسن ويوافق يله
قيس اهوووو هم بعد وراي خطبه
عبير شلون تريد تاخذني بلوشي
رحت ثاني يوم اتنازل عن حصتي وبقيت عدهم بعد يوم لعبنه طوبه ومصارعه وخالتي تضحك عليه تكول عبوسي ما اتغير ابد
راح وياي خالي وقيس وخطبوني من عمو محسن وحصلت الموافقه رتبنا الشقه اقصد شقة قيس وغيرنا الأثاث والصبغ
وتزوجنا والحمد لله سوينا عرس يخبل بغداد
وبيت خالي اجووو كلهم
وحفلة السبعه سويناها بيت خالي
بس قيس اموتني كلساع يعضني
من اكله ليش يكول اعض عبوسي موعبير
صار عدنا ولد وصمم قيس يسمي عباس
وطلع كلش وكيح
بيت خالي اشترو ارض زراعيه وبنو بيها بيت يخبل
شكد نتونس من نروح عليهم ارض خضره
كلشي زارعين بيها
نترس السياره فواكه وخضروات من نروح اللهم
ويوميه اروح اشوف عمتي لان ما استغني عنها
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
