رواية نارا حيدره الفصل الثالث والعشرون بقلم نمارق رحيم
ولَقَد بَنَيْتُ لَكِ بَيْنَ أضْلُعي مَنْزِلًا عَسَى المَقَام بِالمُقِيم يَلِيقُ
...
من يوم الراح سالار لأربيل واني اتصل على
حيدرة واحچيله كلشي يصير وياي بالبيت وبالكلية وگال من أرجع من السفر والشغل يجي يزورني..
كل ليلة قبل ما انام اراسله واذا ما مشغول هو يخابرني .. نحچي أقل من ساعة ويسده بس افرح وأرتاح من اسمع صوته قبل ما أنام ..
وبغياب سالار ماخفت لأنو حيدرة وياي .. من رحت للكلية لاحظت إنُ العميد صارله شهر
ما جاي للجامعة ..
فسألت وحدة من غير قسم گالت إلي ابنهُ مخطوف من فترة وصارله هواي يدورون عليه وبعدين عرفو من الشرطة إن كاتلينه ببيت دعارة مغتصب بنات وچان مكبسل ..
إنصدمت لأن تعرف بالأحداث الصارت يعني ما استبعد اذا اسأل غير بنيه راح تجاوبني لان القسم كله يدري الظاهر ومن هذا الشيء خفت خاف ينجاب طاريي ..
رئستاً خابرت علئ حيدرة وسولفت اله بالصار چان يكلي عادي ولا تخافين ابنهُ يستحق يموت ..
استغربت من ردة فعله وبرودة!! ..
ثاني يوم من داومت العميد مسوي عزا بالكلية ومخلي صور وموزع التوزيعات ونص الطلاب بالقسم لابسين أسود عليه ..
أنصدمت حتئ ماكدرت ابقئ بالكلية خفت
لا العميد يشوفني ورجعت للبيت..
...
حيدرة
رجعت لبغداد وما خبرت أحد ما ردت شخص يعرفني انا أهنا وگعدت هذه الفترة بشقة..
اجاني اتصال من شخص مكلفة من قبل سنتين يجبيلي كل الأخبار تخص أمي وكلشي يصير يوصلي أول بأول..
-الو اهلاً حامد..
-اهلاً حيدرة شلونك..
-الحمدلله شنو مناسبة الأتصال؟..
-يا حيدرة اتصلت حتئ اكلگ امك بين الحياة والموت..
گمت على حيلي.. شنو ؟؟؟ شچاي تگوووول!! ..
-والله العظيم الحگ أمك سوت حادث اليوم أندعمت بالسيارة حادث كلش قوي..
-ياالله سترك روح جاي انا هسة للبصرة..
غلقته وانا ما مفتهم شيء هلحادث صار فجأة طلعت واتوجهت للبصرة بسرعة..
من الفجر للساعة الـ8 الصبح وصلت وعرفت المستشفئ الموجودة بيها ورحت چانت بغرفة العمليات..
رحت أستفسر علئ الحادث شلون صار؟ ويمته ؟
العرفته طالعه من البيت وداعتمتها سيارة سايبا عايفتها بدمها وشاردة.. تخبلت يعني هلحادث مقصود..
بس ساعتين من العملية طلع الدكتور گال محتاجين دم ..
-دكتور انا أتبرع..
الدكتور: دمك نظيف ؟ كول حتى نسحب منك مستعجلين
- مااعرف بس ادخن وعندي ضغط والتهاب
-لا حبيبي طبعا مايصير دمك مو نظيف روح جيب متبرع وتعال بسرعة..
اتذكرت حسن .. نفس دم أمي
اتصلت عليه:- حسن وينك ؟
حسن: هلا حيدرة انه بمنطقة ** ليش؟
-كلش زين قريب تگدر ساعة وتجي للبصرة بسرعة!!
-اي قريب علئ المحافظة كلش بس خير ليش ؟
وأنت وينك؟..
-تعال للبصرة وحدك أخذ سيارتي إلي بالباب
وتعال وبدون ليش أستعجل من تجي أفهمك!!
نهيت الأتصال قريب الساعة ونص وصل أنطيته عنوان المستشفئ اجه دخل..
سولفتله علئ الحادث أتبرع بسرعة
وگعدنه ننتظر ..لليل طلعوها من العملية نجحت وبخير
رحت للدكتور شرحلي علئ الاماكن التضررت بسبب الحادث..
الصدمني حادث امي يشبه حادث ابو ناردين !!...
ونفس الضربه بالرأس بس هو مات بسبب ما تحمل وخسر دم هواي أما امي لحگنه عليها
ضلت شاغله بالي هذا الحادث مقصود ميه بالميه وما عرفت منو القاصد يدعم أبو ناردين
وأمي وليش!!
ومن أتذكرت حادث ابو ناردين اتذكرت حتئ نفس الوقت إلي أندعم بي!!
واني صافن اتذكرت لؤي!! بسرعة وبدون تفكير رفعت موبايلي و أتصلت علئ عثمان
-عثمان لؤي متأكد هو بالسجن حاليًا؟؟..
عثمان: اي الحراس موجودين ليش صاير شي؟..
-انت يمتى شفته أخر مره ؟..
عثمان: ما أعرف بس بحدود الشهر لان التهيت بغيره..
-روح بسرعة للسجن افتح زنزانه 79 اتأكد وشوفه موجودة لو لا؟..
-تمام هسه رايح اشوفه وانطيك خبر..
ربع ساعة ورجع أتصل علية چنت گاعد
وأفكر ومنتظر علئ نار..
رديت عليه ..هاا بشررر؟
عثمان:- لك حيدرة لؤي رحت ومالگيته موجود والمكان فاررغ..
-دررريت قسم بالله ولك مكلفك اتدير بالك منه تالي يشرد لك عثمااااان شسوي هسة بهاي البلوه!!! شووفلي حل رحمة لوالديك انه بالمستشفى ما اگدر اطلع
-يصير خير رايح هسه احل الوضع بس ليش انت هنا منو المريض؟
-والدتي متخربطة لايظل بالك
-سلامتها ابقى يمها لعد واني رايح ادور..
غلقته واني محترگ دمي عرفت كلشي جاي يصير بسببه..
ما أستبعد هو من جماعة أبوي لو من جماعة مخلص الك* *
أنا لو هذاك اليوم من كتلت راشد ياريت كاتل أخو وياا چان ما صار كل هذا!!
اجت أبالي ناردين لا يالله بس لا يسويلها شي لازم أرجع لبغداد وبسررعة..
لؤي شخص مو عادي مثل مامفكر .. عنده خطه وجاي ينفذها ويرسمها بهدوء ويطبق الي يريدة
...
ناردين
أجت العصر طيبة وصلها حسن وراح وحتئ هيه ماتدري ليش اجت كايلها حسن صارت عنده شغله ضروريه
عافها ورايح گعدن بالغرفة واني رحت اتصلت بحيدرة حتئ اكله
اتصلت ومارد يمكن مشغول دايشتغل
حسيت صاير شيء ما ارتاحيت
مر اسبوع وطيبة عدنه وماكو اي خبر علئ حسن وعلئ حيدرة
تالي راسلني وكال...اليوم اجي انتظريني
رديت عليه مارد ومغلق ..
شنو صايرة من مصيبة جديدة ؟ أبد مامطمئنة
اندگ الباب بليل دخلو حسن وحيدرة امي ماطلعت
رحت بردت مي وصحت لطيبة ودخلنه للديوانية
اباوع لحيدرة وكلبي فز مشاقتله حيييل شهر ماشايفته بدي اعوف البيدي واروح احضنه بس خاف يصيح بيه!!
گعدنه و صبيتلهم عصير ..
حسن ضايج وينفخ وما يحجي
وحيدرة لازم كلاص المي وصافن
طيبة :- شبيكم أجيتو تصفنون أحچوو
حسن :- نچبي انتي
ناردين :- ياهاي شبيكم ؟
حيدرة :- انتي الثانية هم!!
- لا والله ؟
- ناردين!!
سكتت ضجت منه ردت اگوم
حيدرة :- باچر راح يجي سالار ،باچر عرسنه ..
صفنت بوجهه مصدومة ..
صحت:- چـذب !!؟
- وحمس
حسن :- حقها تنصدم يا أخي العزيز اذا انه مصدوم هيه چا شلون ؟
طيبة :- شنو العرس صدك تحچي
- حيدرا شنو باچر ؟ ما الحگ
حيدرة :- وليش ماتلحگين ؟
- يا عزه والله مالحگ نوب باچر
وصالون والبدله ومعازيم شلون ؟
گال ببرود :- حجزت الصبح كلشي!!
- صدگ يعني مخطط!!
حيدرة :- أسمعي بدون نقاش باجر ترحين لصالون الحجزته والبدلة موجودة هناك ترحين تلبسين البدلة ويزفونج إلي وخلص!!
حسن :- مستعجل أخوي علئ الزفة
حيدرة :- انچب أنت، أنا أريد ناردين تبقئ ببيتي حتئ تصير بأمان!!
- ليش شنو صاير ؟
- بدون ليش رحمة لأبوج چؤ ناردين سمعتي الكلته لو طب منا وطلع منا ؟
- مدري بس شو مصدومة
دخلو مصطفئ ونبراس گعدو
وهم اتفاجئوا من درو باچر العرس
واني صافنه علئ زماني بهذه السرعة نخطبت وبعدها راح نتزوج باچر العرس!؟
بين الفرحانة وبين الضايجة
ما أعرف بس يمكن صارت بسرعة
وحاجز كلشي واني اخر وحدة من تدري طلعت گعدت بالمطبخ يم الديوانية يفصلهم باب ..
دخل حيدرة وگف يمي :- شبيج ضايجة ؟
- حيدرا شنو ليش ضجت بعدني
مامجهزة شيء ليش هيچ استعجلت ؟
- ناردين سالفة طويلة ما اگدر احچيها هسة المهم باجر العرس وماكو تأجيل مستحيل
- بس حيدرا انت حاجز كلشي وتدري بيه من قبل أتمنى اني الأختار بدله عرسي
- أنتي راح تتزوجين منو ؟
- أنت
- چا هاهيه معليچ بهذه السوالف حتى الحنة عادي مو مشكلة ما نسويها
حجزتي انتي لو انا مايفرق والبدله راح تعجبج أكيد، ناردين كافي دخيل الله لا تضوجين!!
- هاهيه ماشي
- بعدچ ما راضية
- لا راضية
- واضح من ملامح وجهچ چؤ راح اتصل علئ سالار وانتي روحي گعدي ومعليچ صح العرس فجأة بس راح يصير مثل ما تتمني وترتيبات وكلشي حلو
أبتسمت بحُب وتقربت يمه ..
- زين تدري بيه مشتاقتلك؟
- انا هم وعلي!
سحبني من ايدي حضني حييل
راسي علئ صدرة ..
مصطفئ :- ادري راعو حال السنگل كل شوي وتحاضنتو واني احضن الحايط
صاح عليه حسن وهو بالديوانية :-يابه هذولي كفار مايستحون تعال نلعب بليستشن
ضحكنه وبعدت عنه بخجل وهو أتصل علئ سالار و گال اله تعال من الصبح
اتأخر الوقت وحسن اخذ طيبة ورجعو
للبيت بس حيدرة بقئ
حيدرة :- ما اگدر أعوفج خاصتًا هذه الليلة
ما مرتاح أبدًا
- أي عادي بعد أحسن أفرح نبقئ نسولف للفجر شگد حلو
ضحك وگال :- خبلـه
باوعتله صفح ..
- هاي النظرات المن ؟
-مابعرف كيف النظرة تعمل هيك تاخذني ليك وبموت عليك
- انچبي بوية
- حسيت بقربك بالامان ليتني بزمان غير الي كاااان
- بيش الساعه ؟
- بـ11 وربع
- روحي نامي
- و أنت ؟
- ابقئ اهنا والفجر أروح
- وين تنام ؟
- بالديوانية يعني وين ؟
- ليش ماتنام بغرفتي اطرد اخواتي عادي
- من كل عقلچ ها ناويه علئ شيء ؟
ضحكت ..
- لا بريئة اني
- واضح
- رايحة اجيبلك فراش
- كيفچ
صعدت فوگ جبتله مخده وبطانيتي نزلتهم ..
وفرشتله بالكاع وهو يخابر ما إعرف شجاي يحچي انكليزي مدري تركي ..
غلست والتهيت اعدل بالبطانية الحمرة
مكتوب عليهاا "أحبك"
أبتسمت حتئ البطانية تحبه هنيالها رح يحظنها وينام واني احضن مخدتي ..
-ها يابه شجاي تحچين..
-ولاشيء مو يمك..
-ها چا يلا ماترحين تنامين..
-آي تصبح علئ خير..
-وانتي من أهل الخير ناري..
رجعت للغرفة ما اجاني نوم مع العلم الكل نايم والبيت هدوء نزلت جوه فتحت باب الديوانية .. شفته متمدد گاعد بعده
- هلو
حيدرة:- هلا..
-ما نعست وانت موجود..
ضحك وغمزلي ..روحي نامي باچر عندچ
گعدة من الصبح وتعب لليل هواي..
-اي رح اروح..
- ادري بيچ ما راح تگعدين راحه لعني الشيطان
وروحي نامي..
-ليش انت هيج موصوچك صوچي اني كلت اخطية خلي ادفي لان باردة
-وتالي ويا چفصاتچ؟ روحي نامي ههههههههه..
عبست وجهي وردت اطلع گلتله..
- تصبح علئ وجهي
- ان شاءالله
- تصبح علئ نارديين
- احلى صباح چَا
-تصبح علئ عرررسنه
- روحي لغرفتچ
طلعت ضايجة وصعدت لغرفة نمت حتى مافكرت بشيء گعدت بـ7 ..سالار جاي دخلت للمطبخ ضايجة شفته وصبحت عليه
سالار :- ۿا ولج عروستنه شلونچ
-زينة
-اها وشلونها المعنويات توب ؟
-كلش
-ها شبيچ؟ مجبورة گاعدة وبهاي كفشتچ..
سكتت رحت أشرب مي ..
- اتريگي حتئ اوديچن تصبغن وجهچن
-يعني گال الك؟
-آي لعد اني المن اجيت؟ غير للعرس..
-وين راح يصير العرس ؟
-حيدرة حاجز بالقاعة
-زين والأقارب ؟
-نفسهم الاجو بالخطبة حيجون للعرس
-زين وامي ؟
-اذا اجت او ما اجت فـ كلش عادي
حضورها وعدمه واحد
-زين واني ؟
-اكلچ روحي اتريگي احسن..
گعدن نبراس ونور حتئ هنه مثلي مامحضرات نفسهن..
سالار :- مشتري بدلتين الچن من اربيل
فرحن گالن وينها؟ ..
-هسه أجيبهن بسيارتي بقن ..
نبراس :- همزين جايب بدلات ومتذكرنه چان بچيت والله ليش هيج استعلجتو ؟
نور :- والله شنو من عرس هذا علئ اقل كايلنه قبل يومين حتئ نكدر نجهز ارواحتنه
سالار :- الرجال يريد يتزوج الليلة والقاضي راضي..
رديت :- لا والله ما راضية
-دخيلك يالحسين رايح اجيب البدلات واجي وانتن بسرعة خلصن ريوگ اوديچن واروح للحلاق ..
-خوش..
تريگنه علئ السريع وصلنه سالار للصالون وراح .. چانت نرجس موجودة اجت قبلنة
سالار الظاهر كايلها ..
حيدرة متفق ويا ام الصالون علئ كلشي والصالون خاص بس النه ماكو عرايس
بس اني ..
جهزتني من الصفر ..
سوتلي شمع لكل جسمي كامل وسبحت بالحمام بخاري بلشت بشرتي سوتلي مكياج ..
والبدله لبستها كلش حلوة وبسيطة حبيت ذوقة نازكة ..
سوتلي شعري تسريحة بسيطة رفعت شعري وكذلات على خدودي تشتغل بيه واكو اربع مساعدات يشتغلن بخواتي.. وطيبة جابها حسن ورانا وراح هم مكيجنها..
مامصدگة اجه هذا اليوم الراح يزفوني لحيدرة!! ما مصدگة لابسه بدلة بيضة التمنيت البسها من اول ماحبيته و أحلم بيها من سنة
المكياج غيرني بقيت صافنة بالمرايا علئ روحي علئ رغم المكياج خفيف ..وردي كلش حلوو
والعدسات ردت البس بس من لبست تاج ازرگ صارن عيوني بلونه وما لبست عدسات ..
الساعه صارت بـ2 الظهر ..خلصت وهنه مخلصات قبلي ..
خابر سالار حتئ نصعد بلسيارة .. اندگ هورن گلت أكيد هذا سالار اجه ..
عدلتلي نور البدلة ولان حيدرة ما يرضى اطلع بيها لبستني عبايه وغطتني واني خايفة لاتخرب التسريحة..
طلعنه واتفاجئت حيدرا الجاي مو سالار .. باوعتله مبتسمه ..
شعره رافعة ولابس رسمي ازرگ والجاكيت نازعه ومخلي بعكس ايده ..
من شفته ضحكت كلت منسق وياا التاج مالي هم أزرگ..
لزمني من ايدي وصعدني بالسيارة ورا وگعدت يمي نور ..
حيدرة:- ليش اتأخرتوا طولتوا هواي..
نور :- غير عروس فالوقت هواي الها..
حيدرة:- ها..
باوعلي من الجام سكت وبلع ريگه همس وهو دايسوق :- اليوم يومك حويدر
ضحكت سمعته لأن گاعدة ورا كرسيه .. لازمه باقه الورد طبيعي وردي وأبيض .. ومغطية روحي ومنزله راسي لذلك ماشافني بلبدله ولا شاف المكياج بس لمح الحمرة يمكن..
بيدي قران دعيت ربي مايصير شيء اليوم ويكمل العرس علئ خير بدون مشكلة ..
ما اريد امي تسويلي مصيبة بهذا اليوم الي كلش فرحانة بي واحلئ يوم بحياتي!! وصلنه وگف السيارة أمام القاعة العرس..
ساعدني واني انزل دخلنه وكالتلي نور حاجز قاعتين وحدة للزلم وحده للنسوان .. فوكفني بالباب وراح لقاعة الثانية ..
اجن خواتي دخلني وخرن العباية عدلن بدلتي وگعدت علئ كوشه كبيرة ومزينة ورد ابيض
بس عماتي وخالاتي وبناتهم جايات أباوع يمنه ويسره امي ما موجودة سألت نرجس كالتلي
ما اجت بقت بالبيت!!
انقهرت مااعرف تمنيتها وياي بهذا اليوم مثل اي عروسه ،تالي من اتذكرت السوته بيه مااهتميت عادي يابه وذا لاتجي ،هيج احسسن ...
الكل فرحان ويسولف واجن باركلي ويسئلني ليش سويتو العرس فجأة..
دخلن اثنين بنات جايبات كيك وقواطي شغلو اغاني اعراس وكامن يركصن..
اجت عمتي كالتلي :- بعد عمتج صح اخوي ميت صارله سنه متوفي بس لاتقيدين روحچ وتضلين كاعدة ،كومي اركصي وغني وشتسوين سوي اليوم عرسج وهلعرس مره بحياتج هليوم كومي تونسي واذا ضايجة من امج معليج بيها اني امج
صدك رفعتلي معنوياتي بكلامها .. لأن ضجت بسبب أمي .. تالي گمت أركص وياهن بفرح ..
شغلو اغنية "جنو ،نطو "ركصنه لحد ماگالو بس، كلش تونسنه!! صعدت علئ الستيج وانطيتهن ظهري وهنه وراي شمرت الباقه الورد..
لكفتها طيبة ..
فحطت من الضحك رجعت گعدت علئ كرسي اكلت شوي كيكه من الصبح ما ماكله شيء اكل ومبتسمة ..
الحمدلله والشكر لربي ،كأنو ربـي ديكول كافي تدعـين وتتمنين الـ تمنيتي حيصير قريب ، كلش تعبت بأيامي هواي راح ارتاح عن قـريب هيج كلشي داير مدايري يكلي ماعرف يعني معقوله ارتاح واخلص ؟ بسس اكيد معقوله ربي ابد ما عافني بـ يوم ربي دائماً احن من امي عليه بفرحي وبحزني ربي بكلشي ساندني ماذكر دعيت وخذلني بكـلشي جان مدبرلي تدبيرات ابجي من الفرح عليها، لهيج جنت دانتضر هذا اليوم اليجمعنه بي ،واجه هليوم وهياتني كاعده بالبدله البيضة واليوم عرسنه ..
تالي كالو راح يدخل العريس ..
لبسن حجاباتهن وطيبة لبست شالها وراحت وكفت بالباب القاعة تدخل وياهم ..وخواتي وكفن يمي..
دخل وهنه هلهلن وأشتغلت الأغاني ..
دخل بكل هيبه خطوات واثقة وعيونه عليه مركزة بدهشة لحظات حسيت امتلكت الدنيا الفرحة مستحيل تنوصف بكلام شعور كلش حلوو!!..
سالار وحسن وياا دخلو ورا..
ندستني نبراس ،وهيه اتگولي :- دباعي لهل حسن طالع صاك جداً خرب يومه
ضحكت هسه لو يسمعها متغزله بي چان ذب ميانه وياها وما صدگ...
حسن عكس حيدرة دمه خفيف وسوالفه حلوة وتونس ..
گعد يمي طبع قبلة رقيقة علئ راسي وبخدي وهمس بأذني ..
-مممم ناري..
رديت.. عيونها
-طالعة اميرة..
ابتسمت ماعرفت شنو ارد .. شسمه انت هم طالع حلو..
ضحكت وضحك علئ ضحكتي ولزم ايدي
وسالار وحسن واكفين يمنه يباوعون
يتهامسون ويضحكون ..
سالار :- حساني تعال أحضني مشتاقلك
حسن :- صدك جذب تعال لحضني ازودك حنان ادري بيك جفاف عاطفي ادري خيي
سالار :- دتعال نبچي طين يمته نتزوج ؟
حسن :- بالأخرة يگولون محجوزات إلنه احنه الصابريون حوريات
حيدرة :- منو الصابرون انتو؟
حسن:- ها تشك..
حيدرة:- كلش والله..
اجت طيبة وهي تگول:- يلا حيدرة لبسها
ذهب وبدل الحلقات..
طلع علبه حمرة من سترته وفتحها طلع قلادة وتراچي ساعدته طيبة ولبسها إلية.. بدل حلقتي من اليمنه لليسره من خلص اندگ موبايله ..
خابر تالي صاح بعصبية:- صدگ تحچي لك شلوووون فههمني!!..
انصدمت من صياحه ظليت اباوعله بمعنى شكو ولازمة ايده اريد يحچي..
حسن:- شكوو شبيك!..
غلق موبايله بحده وگال ماكو شي..
سالار:- صاير شي اكيد!!..
-سالار حضر السيارة الزفة أريد اطلع هسة وأخذ ناردين..
سالار :- بس بعد وكت انت مو گلت بليل مو اتفقنه ؟
-اي صح بس صارت مشكلة بعدين اسولفلك ضروري سالار بسررعة حضر السيارة..
-هسة رايح..
طلعو سالار وحسن من القاعة .. التفت عليه بخوف ..
لزم أيدي قوي وهمس ..لا تقلقين علئ شي أنا يمچ..
-من مخابرتك ما اطمئنت خايفه حيدرا
شنو رح يصير ؟..
-إن شاءالله إلي ابالي ما يصير..
اتصلت علئ رائد ..
-الو لك رائد وينك ؟؟؟..
-بالمركز وهسه طالع ليش؟
-دز حماية بسرعة رائد ضروري..
-خيرك بس لا علئ الموضوع الگلتلي عليه البارحة ؟..
-أي هو دز حماية للقاعة وللبيت..
-حيدرة اني نصحتك وكتلك لاتورط روحك وتزوج لان راح تتعب بشغلك ولازم تاخذ حذرك كلش زين
-معليك انا أعرف بالجاي أسوي..
-براحتك اي هسه راح ادز بس تتأخر فد ساعة يلا توصل..
-لا بربك حاوا تستعجل هسه طالع انا..
-زين يلا هسه رايح..
غلقته منه ولزمت يد ناردين ..طلعنه بره القاعة ركبتها بسيارتي المضلله أحتاجها بهيچ يوم أكثر من الأيام العادية
حسن وطيبة وأخواتها بسيارة سالار والباقي صعدو بسياراتهم .. انطلقنه لـ بيتي أسوق وعيني علئ الموبايل يمتى يتصل ؟..
اباوعلها مدنگه راسها وتقرا قرأن رجعت أسوق سريع ..اريد أوصل بأسرع وقت ..
ناردين:- حيدرا ممكن علئ كيفك تسوق انهبطت..
-انا يمج اطمئني الزمي ايدي..
لزمت ايدي وخلت راسها على كتفي سقت السيارة اسرع وسياراتهم راحو من غير أتجاة ..
عبرت سيارة طلعت من فرع وشارع فارغ عاكست سيارتي وسدت الطريق..
دگيت هورن وما أبتعدت عصبت ضليت ادگ هورنات ممتالية مسحت كصتي منو هذا الگو* ؟؟..
نزلت من سيارتي مشيت خطوتين وچان ينزل لؤي من سيارته..
فتحت عيوني بدهشه سواها صدگ واجه يايابه اباوع لايده لازم بيها مسدس ابتسمت..
ضحكت بوجهه .. يعني أجيت برجليك لعندي الظاهر مستعجل هواي على جهنم؟..
طلعت مسدسي من بنطروني وجهته عليه..
لؤي:- لك عبالك اخليك تتهنئ بهلعرس والله الا اگلب عرسكم فاتحة عليك وعلى كح* *مالتك..
-اي ساقط ماعليك عتب أقسم بالله يا لؤي إذا مانزلت مسدسك وتسلم نفسك والكائنات أفرغ مسدسي براسك وراس الخلفوك لاتلعب ويا اسيادك انا حيدرة تدري بيه أنا منو وشنو أگدر أسوي وشنو مسوي قبل مو؟
لؤي:- اجيت حتئ اخذ بثاره واريد اكتلك دمه مايروح هدر..
-ديلا اقتل هذا انا گبالك واگف يمك والنكس يستاهل الموت لأنُ مثلك بالضبط حيوان حشى الحيوان من امثالكم القذرة
ناردين
من نزل لؤي من سيارته أنصدمت أبدًا ما متوقعته يجي شلون اجه وشنوو يرريد بهذا اليوم جاي؟؟ اكيد يريد يخرب فررحتي؟؟ دقايق وگلبي راد يوگف باللحظتها جسمي كله صار يرجف واني أشوف كل واحد لازم مسدسي بوجهه الثاني، صرت اشهگ بخوف ولازمه گلبي صار تنفسي بطيء ما اعرف شتصرف گلت اتصل على سالار احسن حل حتى يجي الشارع فارغ مابي احد وبس احنا، ردت اتصل بس ناسيه ما جايبه موبايلي ظال عند نبراس دورت بالصندوگ موبايل حيدرة لگيته بس ما أعرف افتحه ورمزه صعب! فدواتك ربي عديها على خير لحظات مرعبة شفت لؤي لازم المسدس ويريد يضغط عليه، صرخت وما تحملت ابقى بمكاني ساكتة تخيلت يصاوب حيدرة ويموت يمكن أتخبل إذا يصير نزلت من السيارة بسرعة ركضت اتجاهه صرت بظهر حيدرة من شافني تعصب وفرگ وجهة اشر على السيارة
حيدرة: ولچ يابه ناري شطلعلچ أدخلي للسيارة بسرعة ولا تنزلين .
بقيت ابچي ما رحت ما گدرت خوف ورعبة سحبني من أيدي وراد يدخلني للسيارة، ولؤي ركض بسرعة دفع حيدرة وگع على الأرض، بحركة سريعة جرني لايده والمسدس وجهه بظهري، بلحظتها تنطبق عليه المقولة لو تذبحوني ما تلگون قطرة دم بجسمي، تشاهدت على نفسي بين ايديه حيدرة جن جنونه وصرخ كل مايتقدم خطوة، لؤي يگله .
لؤي: ابتعد احسن إلك ترى أضربها طلقة واسويها يا حيدرة رح اخذها وياي تجي الليلة ليلتي اني وياها مو وياك .
ظل يفشر عليه تالي حيدرة من شاف لؤي أيده ترجف ويحچي بخوف ومرتبك رفع مسدسه، ولؤي لازمني قوي ويمشي بالعكس ويسحبني ويا يريد يدخلني للسيارة، عاط حيدرة وهو يسحب اقسام من مسدسه.. لك *** عووف ناردين عوفها تروح مشكلتك وياي ما إلها ذنب هييّ .
لك لـؤؤؤؤؤي..
ما رد .. سحب أقسام وجهه على لؤي.. دفعني لؤي بنفس اللحظة ..
وطلقة من حيدرة صارت بيه رمتني بظهري أقتحمت احشائي آلم فضيع تجسدني..
شهگت ولزمت ظهري أيدي صارت كلها دم.. التنفس صار بطيء صرخت اني اباوع بعيونه المصدومة مباشرةً وگعت من طولي بالگا
عندما أصابتني الرصّاصة لم أمُت ، و لكنني متّ عندما رأيتُ مُطلقها ..💔
⭐⭐⭐⭐⭐⭐⭐
حيدرة
واگف بمكاني مصدوم من الي صار طاحت گبال عيني شمرت المسدس وركضت إلها بسرعةٍ وكل شيء بيه يرجف حتى گلبي ! .
خليت راسها بحضني وايديه الإثنين على ظهرها إلي كله دم وأضرب على خدها، نطقت بصعوبة بنبرة إنكسار: ناري يابة!.
اصيح وأسمع ضحكات لؤي مستمرة ترن بأذني كأنو سكران، جريت نفس وهو موجه مسدسه عليّ قبل ما يضغط، اخذت مسدسي وگمت وعيوني نار من العصبية بدون تفكير ضربته طلقة بصدرة صوت الصدئ عالي بقى واگف صامد يقاوم الآلم والرصاصة لحظات قليلة وطاح بالگاع رجعت لناردين شلتها وهي مغمي عليها ببدلتها إلي صارت حمرة خليتها بسيارتي واتصلت على رائد بلغته وشمرت الجهاز، أسوق وايدي الثانية على گلبها
-يالله الأ ناردين ما اريد أخسرها .
ضربت هورنات ضربات متتالية بعصبية، أنا الي سمحت بهذا الشيء يصير، أنا الضربتها انا الي كتلتها بيدي بسببي بطلقتي ومن مسدسي الله ياخذك يا حيدررة لك شسووويت شسووويت .
سقت اقسى درجة وصلت للمستشفى نقلتها على السدية دخلوها لغرفة العمليات الطوارئ .
حيدرة: دكتور سوي كل شي بأستطاعتك عسى تاخذ روحي وتنطيها إلها بس تعيش قاابل انه
الدكتور: إن شاءالله العملية تنجح تدري شگد مسوي عمليات الك خطيرة ونجحت اطمئن..
حيدرة: بس هاي ناري ما تتحمل العملية القوية جسمها ضعيييف!! تبقئ بنيه وانا رجال وأتحمل وجسمي يتحمل حتى بدون تخدير..
الدكتور: وقع على الاوراق ورح نباشر بالعملية لايظل بالك تطلع بخير..
شمرت الموبايل والسويچ گعدت وايدي على راسي إذا ماتت ما اغفر الخطأ لنفسي.. دخلو مجموعة حماية وشرطة وضباط.. وگفت وانه افتح دگم قميصي..
رائد: هاا حيدرة الله يساعدك! .
-هله .
رائد: شمسوي أنت مخبل؟ گالوا كتلت زوجتك بيدگ .
-اسكت رائد كلمة ثانية وعلي اخذ المسدس وأكتل نفسي أسكت أفضل لا اطلع حرگه گلبي بيك .
رائد: اهدئ انت تدري لؤي مات ؟؟ واهله اجوا اخذوا جثته، هو مجرم وقاتل أرواح ما تنعد وسالب وناهب بسبب المخدرات، وشگد ضاحك على ولد بعمر الورد راحت شبابها بسببه . اليوم انسدت قضيته انقتل دفاعاً عن النفس وخلصنا منه .
حيدرة: ههه لو تدري گلبي شلون محروگ..
رائد: سلامته عضيدي ادري بيك قوي..
حيدرة: أنا قوي من يوم يومي لكن اليوم يختلف گلبي نار يچوي على ناري..
رائد: تتشافئ بس لخاطر الله لا تضعف هي محتاجتك هسه..
حيدرة: لك اااخ انا والضعف ما نتلاگه بس اليوم كل شيء نگلب وتغير والقوة تناثرت!! ناردين لو تموت انا أموت بعدها تدري هي شنو بالنسبة إليه؟!..
رائد: لا تتفاول على البنيه گول يا الله إن شاءالله تعدي علئ خير وبالسلامة الدكاترة موجودين ما يتركوها..
حيدرة: والنعم بالله..
رائد: جثة لؤي رح نسلمها الهم..
حيدرة: احررگ جثته ما يستاهل يندفن الأرض هواي بحقه! الموت جان ارحم اله متندم لان كتلته المفروض اعذبه واخلي يتمنى الموت..
رائد: مو گلنه أهدئ وگول يا الله حيدرة..
حيدرة: لك رااائد راااحت مني طاحت گدام عيوني خليتها بحضني وهي كلها دم لك شسووويت انه شسووويت..
رائد: قدر الله هذا ان شاءالله تطلع وكلشي مابيها وتعدي سلامات ياخوي..
حيدرة: يا سلامااات برررربك.. لك الطلقة بظهرها والمكان خطير اذا گدرو يطلعون الرصاصة هاي بمعجزة طبعا فأكيد راح تنضر! وچؤؤؤ يا اااالله صبررك..
رائد: كافي اسكت لاتكمل ماتشوف حالتك شلونها..
الگادر مختص واقوئ دكاترة موجودة عدنه أكيد ينقذونها بس السؤال وهو أنت شلوون ضربتها شلوون ما دافتهم ؟!
حيدرة: لؤي الكـلببببب دفعها بوجهي وصارت الطلقة بيها..
رائد: عسى بجهنم الحمرة زين واهلها وأخوانها درو لا ؟
-حيدرة: لا هو انا خلي اتذكر أسمي تالي اتذكرهم ما فاهم حتئ روحي ما اتصلت..
رائد: راح اتصل اني والحماية راح تبقئ واحنه نروح ..
-تمام..
نص ساعة ودخلو سالار ومصطفئ وحسن وعمامها سالار اجه يركض إتجاهي والخوف باين بعيونه الحُمر
سالار: لك اختي وينهاا شصاير بيهاا ؟ لك حيدرررة بروح ابوووي احچي !!..
-بالعمليات..
-شلوون لك عقل ما ضل براسي أختي شلون تصاووبت ؟
-أنا ضربتها !!
-شلووووون ؟؟!!
-بالغلط ولحسين بالغلططط..
ضربني راشـدي ..باوعتله بهدوء ..داتشاقة أنت مووو؟ امنتك عليها وصيتك تحافظ عليها هيچ النتيجة!! تكتلها بيوم عرسها ويييين صاااررت فهمني رحمة للعزاززز..
حيدرة: يلعن العرس جاي اگلك بالغلـط بالغلط يا عااالم صاررت بوجهي نبي أنااا وما اغلط والكائنات بدوووون قصد
-المفرض الطلقة بيك مو بيها!..
-هاك هذا المسدس اخذه اضربني گدامك!..
-اسمع قسسم بيمن احلف إذا اختي يصير بيها شيء من طلقتك ما اخليك يوم عايش..
-بدون ماتعب نفسك انا اكتل نفسي بهذيچ الساعة..
گعد علئ الكرسي سكت وگفت بالباب العمليات
منتچي رجليه علئ الحايط ولازم راسي
ساعتين ننتظر ..تالي طلع الدكتور وگفنه گلنه گباله سألته انا وسالار..
-بشر دكتور شلونها ؟ نجحت العملية ؟؟ هية بخير ؟
الدكتور :- صلو علئ محمد علئ كيفكم اهدو الحمدلله كدرنه انا والدكتورات المتفوقات نطلع الرصاصه النارية من ظهرها ونجحت العملية
بس سمعته سجدت على الأرض وحمدت الله وشكرته ناري عاشت..
سـالار: الحمدلله الف الحمدلله والشكر الك يالله.. دكتور فهمني يعني اگدر ادخل الها هسه؟ شلونها هيه ؟؟
الدكتور: لا طبعاً رح ننقلها للغرفة ترتاح..
لان العملية جداً قوية وصعبة بس الحمدلله نجحت.. لازم تبقئ اقل شيء ٤ ساعات
نايمة ترتاح وتگعد ..
حتئ نسويلها مسحة ضوئية وتحاليل واشعه وكثير اشياء ..ارتاحوو انتو.. گعدنه ننتظر ساعات گعدت وسوا الها اشعة ..
طلع من الغرفة.. شنو تبين عندك من التحاليل؟؟
باوعلنا وسكت ونزل راسه..
حيدرة: ليش ما تجاوب؟ ناردين ما بيهاا شيء موو؟؟
سالار:احچي دكتور اختي بيها شيء؟
الدكتور: انت اخوها مو؟
سالار: آي اخوها الجبير وهذا زوجها..
الدكتور: ادري السيد حيدرة زوجها .. تگدرون بعد شوي تجون لمكتبي حتئ احچي وياكم على انفراد احسن من خبصه المستشفى..
حيدرة: لا هسه تحچي شبيها؟؟..
الدكتور: تمام لعد تعالوا لمكتبي..
رحنه ودخلنه جاب اوراق وتحاليل وارانا اشعة سواها إلها ..
الدكتور:- شوفو بالموضح بالاشعه ،الحبل الشوكي متضرر حيل بسبب الطلقة صايرة بالوسط
حيدرة: ما فهمت شنو يعني؟..
:- للأسف رح تنشل كلياً .
تخبلت وحجيت بأنكسار وبنبرة مصدومة ..شنو قصدك بتنشل ؟ ..
الدكتور: سويت كل الاگدر عليه لكن للأسف..
سالار: يعني اختي بعد ما تگدر تمشي !!
الدكتور: للأسف اي مثل ما گلتلكم العمود الفقري متضرر لذلك انشلت ماتگدر تحرك جسمها وطبعاً تگدرون تسوون الها عملية وترجع..
حيدرة: وشنووو منتظر سوووي الها هسه
الدكتور: ما تگدر هسه توها طلعت من عملية وجسمها ضعيف ما تتحمل عملية ثانية
سالار: لا تخبلنة فدوا اروحلك ساعة تگدرون
وساعة ما تگدرون شهالقصة؟!
الدكتور: ما انصحكم تسوون عملية هنا لان تعرف هيچ عمليات قوية نسبة كبيرة ماتنجح ما عدنا كل الاجهزة لذلك طلعوها وسفروها خارج العراق احسن واضمن برأيي.. بس اكو شي ثاني لازم انطيكم علم بي
سالار: شنو هو؟
الدكتور: اذا تسوي العملية احتمال 50% رح تتضرر!!
حيدرة: شنو قصدك بتتضرر؟..
:- الطلقه بالعمود الفقري واسفل الحيض ،اذا تسوي العملية رح يتضرر الرحم وماراح تصير ام بحياتها .
حيدرة: لاااا ياااالله گوول غيرها دكتورر !!!!
گـعدت ايدي علئ وجهي وأجر النفس گووه باوعلي سالار اجه وگف يمي..
سالار: كلشي صار بسببك..
انطاني بطل مـاي.. شربت وفتحت قميصي..
سالار: هسه شـنو الحل دكتور فهمنه ؟؟
الدكتور: الحل سفروها لبيروت او ٲي دولة علاج فيزيائي..
-وشكد يطول هل علاج ؟
-اكيد ما رح ترجع تمشي بهاي السهولة يعني بحدود لـ3 أشهر أو اكثر حسب بعد.. ما اگدر احدد..
سالار: ويمتئ نگدر نطلعها للخارج؟؟
-فترة شهرين يلا تسافر ،لازم ترتاح..
-بس هواي صح!
- لصحتها واحسن..
حيدرة
طلعت رحت للغرفة شفتها متمدده نايمة
نومتها عصرت گلبي..
وبدأ ضميري يأنبني شوي شوي..
ما دخلت وطلعت من المستشفئ .. گعدت بالحديقـة أدخن واجه وراي سالار ..
سالار: حيدرة..
-ها بويه..
سالار: شلون رح انگول الها انتي انشليتي ؟ ادري بيها رح تتخبل ما تتحمل الصدمة! ..
-احنا وياها لاتخاف..
-ترا اني مافهمت الي صار؟.. شنو المفروض الطلقه بـ لؤي ليش شجابه هل عار والنذل؟؟
-سولفتله..
-تحجي صدگ! ومات ؟
-اي!
-بروح العزاز!
-اي والكائنات..
-يستاهل وعلي عقاب اكثر من الموت.. بس انت منيلك حماية؟..
-من الله
-لا بلا شقـة منيلك.. شلون قتلته ومحد حاسبك؟
-بعدين اجل كلشي سالار رايح عندي شغل اسوي وارجع اذا كعدت ناردين خابرني مو تنسئ..
-توكل الله وياك..
رجعت لبيتي ما حسبالي الكل موجود حسبالي فارغ..
نبراس :- حيدرة وكفتوو گلوبنه حرام عليكم
ناردين وينهاا وشبيهاا ؟؟ شنو صااار
طيبة :- ليش قميصك بي تگع حمره
شنو هذا دم ؟ جارح نفسك ؟؟
- شششش رحمـة لدينگم! بعدين مو هسه صاعد لغرفتي
عفتهم ورحت فوگ فتحت الباب ..
اعاين الچرباية مزينة بالورد واضاءة ومعطرة .. ومحظرينها الليلة النه گعدت اخذت گلاص ماي وصافن ..اتذكرت كلامها من گالت إلية
( وياك ابقى بأمان )
ليش ناردين ثقيتي بيه الصوچ منچ ما أدري مني..
گلتلچ ادخلي للسيارة انتي جبرتيني هيچ أسـووي!!..
كل الصار بسببي ورطتها بحياتي ومتاهتها..
لـؤي چـان البداية..
گلت الها رح تـتأذين وتضحين هواي
ليش قبلتي بيه مع كل هذا!!
واليوم من صارت زوجتي بٲسمي خسرت رجليها وانشلت كلياً ..متٲكد رح تكرهني !
بس بعديش ؟! عگب من صارت بٲسمي وزوجتي ؟ شگد كلت الها ما افيدچ انسيني!
انسي حيدرة ..
" رح تبچين هــواي بكل ليلة وينكسر گلبچ وتــتٲذين!" وهذا كلامي الي گلته قبل فترة صار اليوم..
رح تعانين معاناة صعبة وادري بيچ ماتتحملين وتنجنين..
بعد ما صرتي الي هيهات اعوفچ گتلچ مليون مرة لا تتعلقين وتحبيني
ما حسيت بـ الكلاص مكسور والكزاز داخل بٲيدي وحافرها والدم متلف الأرض ..
اتنهدت وأبتسمت يمكن هلدم جاي ٲعوضه
بالدم الخسرتي اليوم.. ولو جزء بسيط
رن موبايلي عاينت المتصل.. ( سـالار )
رديت..ها سـالار ؟
سالار: حيدرة تعال گعدت ناردين وتريدك..
-الحمدلله .. جاي هسه فد نص ساعة..
غلقته رحت سبحت بدلت ملابسي وطلعت وما رديت علئ اسئلتهن بس طمنتهن بخير هيه..
وصلت للمستشفئ دخلت للغرفة متمددة وسالار وحسن واكفين يمها وهيه مدنگه تبچي..
-ها ناري الحمدلله علئ سلامتچ يابويه..
ناردين: الله يسلمك حيدرا وين جنت..
كعدت يمها لزمت ايديها وبست راسها..
-هنا جنت يمج يمج لاتخافين مااعوفج رح ابقى حاضن ايدچ ما اهدها..
ناردين: حيدرا ليش هيچ صار؟؟..
بچت جريتها بسرعة لحضني وطلعو من الغرفة..
-شششش لا تبچين ناري..
-حيدرا ليش عود ضربتني ..؟
-بالغلطط وحق الله كون ايدي مكسورة ولا ضاغط على المسدس عليچ..
-حيدرا علئ اساس اليوم عرسنة حتئ مافرحت بهل يوم الأحلئ بحياتي.. بسبب لؤي!
-العرس يتعوض وكلشي يتعوض بس انتي ما تتعوضين گومي بالسلامة وأنسوي عرس جديد
-ان شاءالله اريد اطلع رجعني للبيت.. حيدراا..
-ها يبعد عيونه..
-رجلية حيدرا ما احس بيهن وما اكدر احركهن وايدي ثگيله..
كلامها مثل السجاجين بگلبي ابتسمت بهدوء بست خدها اطمنها..
-لا تقلقين وتخافين هاي بسبب العملية ارتاحي
ونامي يناري هسه يرجعون مابيهن شيء..
-زين لا تعوفني..
-يمچ انه العمر كله ما اعوفچ..
رايح للدكتور شوي واجي..
طلعت ورحت للدكتور سئلته..
-يمته اگدر اطلعها ؟
- بعد يومين بس علئ مسؤوليتك!
- أكيـد واسمعني زيـن لا تگولها انشليتي أنا اكلها بس مو هسـة لازم امهد الها الموضوع حتئ ما تنصدم
-تمام عيوني براحتك..
رن موبايلي المتصل (حسن اخوي)
بعدت عنه ورديت :- الو ها حسن..
- حيدرة شلون صارت ناردين ؟
-الحمـد لله احسن
- اكلك الدكتور المسؤول عن امي اتصل عليه وگال طلعوها..
- اي احنه مو جبناها لبغداد والمستشفئ قريبة روح انت جيبها
- وين اجيبلها ؟
- يعني وين ؟؟ لـبيتي لا تصير حمار
- لحظه يعني وافقت وقبلت نجيبها تعيش ويانا ؟
- لأجل صحتها مو زينه وبالبصرة ماعدها احد لا زوج ولا اب ولا عائلة خل تجي بس ماتعيش ويانه عيشه دائميه يعني مؤقته سمعت ؟
- والله زين خوش انت معدل معدل ذهب
- اكل تبن مو بحالك انا
- زين رايح اجيبه
- اي ، الله وياك
وكفت گبال الحماية ..
-احمد تعال ..اخذ هلورقة روح للصيدلية جيب الأدوية المكتوبة منتظرك هنا..
-حاضر سيدي
رجعت گعدت علئ كرسي ما اعرف اعوفها لو لا اتصل عليه (رائـد) يا طلابه الاتصالات إلي ماتخلص
-الو هاا خير ؟
-دتعال وين طامس محتاجينك ضروري
-شنو صاير تره ما ناقصني البيه مكفيني
-دتعال وجيب الجهاز والملفات مو تنسى
-اي موجودات بسيارتي
-تعال حيدرة ولك استعجل انريد الجهاز الشغل اليوم
-يابة جاي جاي لا تلح
غلقته ،سالار بقى يمها .. طلعت من المستشفى وصلت للساحة فتحت الباب السيـارة طلعت الملفات والجهاز
نزعت مناظري.. خير شكو ؟
رائد: وينك يابة وينك
-غير بالمستشفئ قابل چنت العب ؟
-البارحة كلشي خططناه اله فشل بسببك وبسبب عرسك
-انت ليش ما تاكل تبن ؟ ،شدخلك بعرسي انت المعرس لو انا ؟ ونوب شلون عرس خايس حاسدني عليه
-كلنا گنالك اني والشباب لا تخطي هيج خطوة وتزوج وتالي نبتلي احنه
-دنچب حبيبي هاك هاي الملفات وهذا الجهاز
-اي وأنت وين رايح ؟
-لجهنم لأسفل درگ تجي وياي ؟
شكرا لزيارتكم عالم روايات سكيرهوم
