رواية نارا حيدره الفصل الخامس والعشرون بقلم نمارق رحيم
- عَاندتُ الدُنيا بكَ
وتحمَلتْ أقسىٰ ما فعلتهُ وقُلتَهُ لي
أهملتَ تلكَ أفعالكَ التي تُدمر قلبي ،ْ
بَكيتُ حُزنًا وتعبًا علىٰ فراقك عَني ..!
وعندما أصابتني الرصّاصة لم أمُت ، و لكنني متّ عندما رأيتك انتُ مُطلقها
وتحملت كل شيءْ
لكُنِكَ!
تَركتنيْ فيِ نُصفِ طَريِقيْ إليِكَ
سؤالي لك ! أمثل قلبي يُهمل ؟ ..💔
⭐⭐⭐⭐⭐⭐⭐
واگف والعرگ علئ جبيني ايدي تضرب بالسچين وانا اتذكر كلماتها.. تنهدت بضيق احاول اقاوم واتظاهر بالصبر ساكت تماماً والهدوء مالي المكان الفارغ..
دخل رائد شافني وصاح.. حيدرة شنوو هاي شبيك انت تخبلت ايدك يابة كلها دفر حفرتها تحفررر اترك السچين ولك ماتجووز من هالعادة؟؟..
-روح مناا لا ادچ السچين بيك..
-ها ليش معصب شصاير ولك احچيلي!؟..
-گول شنو الي ماصار بيه بعد..
-افا ايدك كلها دم عفية شهل قوة متحمل الوجع ما تگول اخ ولك ايدك تنزف ابن اللذين..
-قوة لان متحمل وجع ايدي؟ ليش ما متعرض لوجع اكبر برأيك؟..
-الحگلي ياعلي اي متعرض لوجع گلبك..
-دسكت اسكت..
-اگول عوفك من هلحچي واترك السچين الحادة وتعال عقم الجرح گوم يلااا..
-عوفني مرتاح هيچ رائد اذا ماتطلع ادچك قسم بالله..
-دامك حلفت لعد اطلع افضلي بعدين ارجعلك بس مو تنسى عدنه روحه لديالى ما خلص الشغل تره
-تمام اذا خلصت اطلع عوفني لوحدي..
-يلا طالع يابه طالع..
طلع وسد الباب.. گعدت بالگاع صافن على ايدي الي عبالك متخدرة ما أحس بشيء كل الجاي افكر بي "ناري"وبس! ..
معقولة صدك ما تريدني وكرهتني!! بس صح انا استااااهل..حقهااا تكرهني..
وعلى كل حال لازم اسفرها بأقرب وقت ما اريد تعاني أكثر لازم اجيبيها يمي شهرين واوديها خارج العراق تتعالج..
...
نور
بعدما عرفنة بناردين نشلت چانت صدمتنه چبيرة بحق اختنه محد كان متوقع هذا الشي يصير رحنا الها اني ونبراس وامي ما راحت ومن سمعت بالخبر ماسوت شي ولا انطت ردة فعل..
ما نطقت حتى بكلمة خطية لو دعاء صغير.. متفاجئين بيها هالگد گلب الام صاير قاسي لهذه الدرجة؟..
چنت بالمستشفى گاعدة يمها الدكتورة توكلها وهي ما تقبل تاكل ودايره وچها وما تحچي شي خابرت علئ حيدرة وحتى هو ماكو ما يرد..
كلت انزل يمكن سالار موجود جوه وبعده ما رايح..
دامشي چان اصادف بوچهي واحد وتعثرت يم الكراسي
-هااا اسسف اعتذر ما چنت منتبه والله..
كمت ونكتت ملابسي جاوبته.. ما صار شي لا تعتذر اني الچنت متوترة بسبب حالة اختي..
-ليش المريضة الي بالغرفة هذه اختچ؟..
-اي اختي ناردين بهذه الغرفة..
-هيه زوجة سيد حيدرة!؟
-اي بس هو مو سيد ليش تگوله سيد؟..
-اي صدگ هو موسيد ليش اگله سيد..
-شنو داتحچي!
حيدرة :- السلام عليكم ، ها رائد شكو جاي
-وعليكم السلام هلا بالحبيب هيچ گلت اشوفك شنو محتاج واطمن عليك..
نـور: هلو حيدرة وين چنت شگد اتصلت عليك صار الي ساعة شعجب ماشفت المكالمات..
حيدرة:- اعذريني والله چان عندي شغل ما لزمت الموبايل رغم بالي يمكم ليش شصاير خوماكو شي عسى ما شر ؟؟
نور:- لا بس ناردين ماتقبل تاكل ولا تقبل تاخذ ابر حتى اتصرفت ويا الدكتورة بعصبية وما تجاوبني من احچي وياها..
حيدرة:- لا تخافين رايح احچي وياها وانا اوكلها..
نور:- تمام لعد..
دخل حيدرة للغرفة بقيت واگفه بمكاني وهذا يباوعلي بتركيز ما شال عينه مني..
نور:- خيرر؟ مضيع شي بوجهي ؟
رائد:- لا العفو ما قصدي شي اخذي راحتچ بس ممكن شوي تبتعدين اريد افتح الباب الغرفة الي وراچ..
هزيت براسي "اي" بعدت فتح الباب ودخل.. رجعت لناردين گاعدة وحيدرة واگف يحاچيها وهيهه ما ترد.. ظليت واكفة اباوعلهم بس ما دخلت..
حيدرة:- ناري مو جاي احچي وياچ ليش ما تردين عليه ما تحبين تحچين وياي؟؟..
زين لا تحچين راضي بويه بس اكلي لخاطري زين لخاطر الي تحبيهم علمود صحتچ وتگومين بالسلامة بسرعة..
ناردين:- وين تريد توصل؟..
حيدرة:- اشوفج تاكلين..
-مسدودة نفسي وروح مني ما اريد اشوفك..
كعد علئ قنفه وگالها :- هاي گاعد اشوف بلا شلون اروح منج..
جاوبته :- اي هاي من اولها تدري بيه ما اگوم گمت هيج تسوي وتحرك بگلبي موو؟!..
سكت وتقرب منها جرها لحضنه انتبهلي واكفة اشر الية بيده بمعنى اطلعي حتى نتفاهم..
هزيت راسي "اي" وطلعت صادفني نفس الشخص.. گبالي صار
گالي:- اگلچ بلا ٲمر عليچ عادي تجيبيلي كوب ماي ،من اهناك..
باوعتله من فوگ ليجوا وجاوبته.. اشوف ايدك سليمة ورجلك الحمدلله تمشي عليها بعد ليش تتأمر روح انت تعب روحك واشرب
-له له له شسالفه خويه شطالب منچ بس انتي قريبه من الماي فگلت تجيبيلي نوب طلعتيني اتأمر رحمة الله والديج ماقصرتي لوما عمليتي چان ماطلبت بس عمليتي حكمت عليه هالموقف وما اگدر امشي هواي.. اتعب خويه اتعب..
اسمعه وساكته اكلني بكلامه سفطهن كلهن الا شوي ويدگ اليتيمة.. گلت اكسر الشر واروح اجيبله..
مشيت رحت بأتجاه المي ترستله كوب ورجعت انطيته اله.. اتفضل
-شكرا زاد فضلچ نور..
صفنت بوجهه متفاجئة گال اسمي!! وهو شرگ بالمي صار وچهه احمر..
-بلا زحمة ما ادري اسمي معروف لو مكتوب على جبيني فشلون عرفت اسمي هو نور؟..
- هاا من يا ابن يا صدگ ما عبالي يطلع صدگ يعني صدگ؟؟ اسمچ نور صدگ؟؟
-لا تتهرب من الجواب؟..
-مو شسمه انتي كلش تشعين ضوه فكلتلچ نور.. ربي يحفظچ حبيب.. اختي اختي اقصد.. اسف..
سطر جواب مدري منين وما اقتنعت خزرته ما ارتاحيت اله..
-زين عادي تجيبلي كوب ماي ثاني من البراد هذا حار يعني وهيج.. بدون تعب..
مشيت بعصبية تنرفزت منه حيل انطيته كوب مي مرة الثانية على اعصابي..
-شكراً ماتقصرين عاشت ايدج كلش طيب
-ليش هو بي طعم؟؟..
-لا بس ترستي من ايدچ وصار طيب..
-شنو هذا الكلام الماصخ وبعدين انت منين تعرفني منو انت احچي؟؟؟..
-ما اعرفچ وداعتچ..
هزيت ايدي ودرت وچهي اريد اروح صاحلي..
-اوكفي لحظة لا تروحين..
-خير شنو تريد بعد اجيبلك المي كله؟؟..
-لا ههههه لا بس احم ردت اسئلچ فالح وين ماشفته..
-يا فالح هذا ما اعرفه..
- اقصد ٲسد
-يا اسد؟..
- كشكول شسالفه
-عجيب هاي شبيك شدتحچي!..
صفن بوجهي وهمس مدري شحچه تالي كال :- اقصد حيدرة حيدرة
-حيدرة؟ شبي شتريد منه؟..
-وينه صيحيلياه..
-لا والله؟ عاد مصختها كلش روح انت وصيحله تره ما اشتغل عندك..
- اعصابج عيني سندوسه الماتتحمل
-انت شنو شبيك ياربي مخبل شنو گره عين امك عليك..
-روحي عمي شگلنا هسه وعصبتي..
-رايحه ماميته ابقى واگفة يمك..
-اي زين يلا روحي..
همست.. خااب دطير..
ضحك :- ماعندي جناحات الله وكيلچ چان طرت ،
خزرته ومشيت .. الحمدلله والشمر ربي
نزلت من المصعد طلعت وسالار راد يصعد وگفت يمه..
سالار:- ها نور شدسوين.. شلونها ناردين؟
-الحمدلله وحيدرة يمها.. گلت انزل اشتري فد شي جعت كلش ما ماكله..
-الف الحمدلله.. يابويه جوعانه وباقيه بلا اكل وما گايلتلي روحي نزلي جوا مصطفى موجود هناك تلگينه واخذي فلوس منه واشتري لفتين وياچ باكيت جكاير الابيض..
-بعدروحي ههههه تمام تدلل طالعه للمحل..
-اي روحي بالچ على نفسچ انتبهي زين من السيارات..
-تمام..
...
ناردين
-يا اااخيي ما اررريد اشوووفك ليييش ما داتفههم عجيييب!.. كارهة شوووفتك عوووفني وحددي..
چتف ايده لصدرة وگال.. سدي عيونچ إذا متضايقة من وجودي.. لان مستحيل اعوفچ..
-شنو اسمي هذا عناد لو شنووو..
-مو عناد بس ما اتركچ بهالحالة وحدچ..
-هه وهل حالة منو وصلني بيها غيرك؟..
لزم ايدي ونزل راسه وگال بنبرة تعبانه.. بس تدرين مو قصدي يا ناردين..
-وخررر ايدك لا تلزم ايدي..
هز راسه وابتعد عني بمسافة.. درت وجهي منه مقهورة وما بيه حيل أتجادل واحچي بعد.. من شافني هادئة هو هم هدء وسكت..
-راح اسجل الاوراق الخروج ترجعين وياي لبيتي..
-ما ارجع وياك..
-مو بكيفچ.. ترجعين وياي تبقين جوا عيوني وبنص گلبي اخليچ..
باوعتله بأنكسار وجاوبته.. خليني بعيده عن گلبك..
-ليش؟..
ابتسمت بأستهزاء وجاوبته.. افضل
-شنو افهم من كلامچ هسه..
-افهم انو اني ما اريدك وخسرتني.. واستوعب هالكلام..
-ادري هالكلام مو من گلبچ الترف..
-غلطاااان..
-كافي الدكتور گالي مو زين عليچ الحچي الهواي اهدئي وابقي ساكتة وخليني اكمل اكلج..
-شكراً الك شبعت..
اندگ الباب ودخل سالار.. الله بالخير
حيدرة:- الخير يصيبك هلا بيك..
باوعتله وجاوبتة سالار اريد اطلع..
سالار:- هلا حبيبتي شلون صرتي اي هسه يسجلج خروج حيدرة..
-بنص الخير شتگول؟؟..ما اريد اروح ويا طلعني انت..
سالار:- شبيچ منو الغاثچ؟ شنو ماتردين ناردين صرتي مرته غير ترحين ويا طبيعي هالشي..
-سلامتكم وما اريد شنوو هوو غصب؟..
حيدرة :- سالار حبيبي عوفها ما اريد اضغط عليها تريد تروح لبيتكم خلي تروح ما اجبرها تبقى يمي..
-اي طبعاً بكيفي لا تتدخل بيه..
- تمام هذا هو يجرالچ ما اتدخل.. سالارر رح اسجل خروجها وديها بسيارتك..
سالار:- آي روح..
ابتسم وغمزله طلع وسالار طلع ورا..
دنگت راسي وبچيت بصمت.. ضليت صافنه على السگف واحس روحي تريد تطلع..
دخلت نور.. ها حبيبتي شبيچ وشبي حيدرة شفته طلع ونزل بسرعة هو وسالار..
-اني كتله روح
-يا ليش ؟
-لان ما طايقة وجوده.. وهه هو ما صدگ بس گلتله روح راح ما حاول يبقى ما گال نفسيتها تعبانه اتحملها بس محددد يفهم بيكم كلكم تردوني بحالتي الزينة ومن انضر لو تعبانه روحي من هالدنيا محد بيكم يتحملني وتبتعدون من اول فرصة.. ولچ روحي جاي تطلع جاي احس روحي وحيدة محد الي بهالدنيا لا اب ولا ام.. غصه ببلعومي خانگتني..
-ياااا عزه بعيني ولچ شلوون هيچ تحسين والله احنا نموت عليچ ومتخبلين على حالتچ سالار حاير شلون يشافيچ بسرعة وترجعين مثل قبل وحيدرة اشوفه ما ينام ودائماً يتصل عليه ويحچي وي الدكاترة وجاي يشتغل على سفرتچ خارج العراق لا تگولين انتي وحيدة كلنا يمچ اطلبي عيوني انطيها الچ ياعمري انتي..
-صرت ما اصدگ بكلامكم كله حچي ما جاي اشوف فعل..
-يحيلي والله ماكو هيج شي بالعكسس وداعة عيونچ الحلووة.. حيدرة انتي مو تحبي ليش احسچ متغيرة عليه؟..
-الضربني طلقة بيوم عرسي وخلاني انشل هذا الإنسان ما يستاهل الحب..
-مو قصدة والله وبعدني ما مستوعبه الصار اصلاً كلنه مصدومين والله وان شاءالله يسفرونچ وتسوين العملية وترجعين تگومين بالسلامة يارب ونكحل عيونه برجوع عافيتچ وشوفتنه ناردين الحلوة تمشي بحيلها..
تنهدت بضيق.. ان شاءالله
اجه سالار واثنين دكتورات حتئ يخلني بالكرسي المتحرك..
حسيت بأشمئزاز جبير من نفسي ما اگدر احرك لا أيد ولا رجل وعيونهم علية تمنيت ميتة ولا صرت بهيچ موقف صعب لا يحسد عليه..
توجعت وماقبلت اگوم وحيدرة واگف بعيد يباوع علية نظراته مليانه بالندم وتعب..
من شافني اتوجع دخل للغرفة تقرب مني وراد يشيلني
-شداتسوي عوفني ما اريد مساعدتك..
-ناري بس خليني اشيلچ واخليچ على الكرسي ما اسوي شي والله..
بلعت الغصة وسكتت حسيته عرف بيه خجلانه واحس سچاچين بگلبي من اشوف نظرات الناس ما اريدهم يشوفوني بهالحالة.. همس بأذني..
-غمضي عيونچ ما اريد تنقهر روحچ اكثر بشوفه نظرات الناس تباوعلچ وتحسين بالشفقة لو غير حسبان وانه كلش خايف على روحچ وگلبچ..
هزيت راسي بدون ما اباوعله شالني لوحده خلاني على الكرسي جاب غطى خلا على رجليه اشر لسالار..
-اخذها..
سالار:- تمام بعيني..
نزلنه من المصعد وهو يمشي ورانا.. سالار فتح باب السيارة وحيدرة اجه شالني وصعدني سكتت ما حچيت..
حيدرة:- اذا صار شيء گول ومو تنسى تخابرني..
سالار:- تمام ان شاءالله
حيدرة:- يلا توكل بالسلامة..
ركبنه اباوع اله بالمرايا بعده يباوعلي درت وچهي..
بچيت وانتبه علية سالار مسح دموعي بيده..
وگال وهو يسوق:- لخاطري اذا عندي خاطر يمچ صيري قوية ان شاءالله أزمة وتعدي أني يمچ لحد ما تشافين وترجع عافيتچ..
هزيت راسي "أي" وسكتت..
وهمست لنفسي.. ما يستاهل ابچي عليه..
وصلنه البيت ونزلني دخلنه چانو عماتي والبنات موجودات ماسلمت علئ وحده منزله راسي..
كلت لسالار:- فدوه صعدني للغرفة..
اجه شالني للغرفة مددني علئ السرير ونزل دخلو كلهم يباوعون الية بنظره الشفقة وخطية انشلت وما اتهنت بعرسها.. روحي انمردت بكلامهم
صرخت بصوت عالي.. شكوو شتريدون اجيتوو تتحمدولي على السلامة لو تتشموتون بيه لان انشليت احچووو؟؟؟..
بچن علئ كلامي وما گالن شيء باوعت لنبراس وگلت الها :- طلعن وطفو الضوه اريد انام..
دخلت امي وهي اتگولي ،:- هاا زواج سعيد بالرفاه والبنين يووو قصدي الحمدلله علئ سلامتچ اتگرمتي موو اي اخطييه اوي سوده عليه ماتهنت
-نعمة الله عليچ ما قصرتي اصلاً ما انصدمت شتوقع منچ روحي اطلعي ما اريدچ ولا اريد قربچ..
بعمري ما رح انسى موقف البارحة ما كلفتي نفسچ توكفين وياي بهيچ يوم صعب اتصاااال واحد ما اتصلتي ولا تحمدتي اليه على سلااامتي مو ام انتي حراام تتسمين ام..
- الله ياخذچ مثل مااخذ لؤي، انكتل بسببچ حيوانة عبالج اسكت ،لا والله بس شوفي شسوي الا اطلع حركة گلبي بيچ
-مشكورة والله ونعم الام الي عندي.. تدعي على بنتها بالموت بدال ما تدعي الها بالشفاء..
اجت هجمت عليه وكعدت علئ رجليه وتجر بشعري
خلتني اعيط رجليه انتهن مااحس بيهن
البنات يجرن بيها ونبراس تبچي تگلي يمه فدوه عوفيها مريضة يمه القران عليچ عوفيها
ولا تأثرت ولا گالت هاي بنتي شلون اسوي بيها هيچ بالعكس ضغطت علئ رجلية حيل حسيت روحي رح تطلع من الألم
اصرخ بصوت عالي البنات نزلن جوا ويصيحن خوية سالار الحگ ناردين رح تموت..
دخل مفزوع ما انسئ نظراته وخوفه بالحظتها ركض ودفعها بقوة ماخله غلطه ماغلطه اول مرة يحچي كلام بذيء گدامنا عرفته فقد أعصابة ومن حرگان گلبه وقهرته..
اطلعها من الغرفة واسمع صياحة العالي تالي دخل بس هو وسد الباب..
حضني وگال سودة علية والله مصدوم من تصرف امي ما أدري شبيها لا تنقهرين بروح ابوي
سكتت ما جاوبته بس اشهگ وخر الغطى ومد ايده يفرچلي رجليه جاب دهن ودهنه واني ميته وجع..
صرت شوي زينة فتح علاگه الأدوية انطاني حبايه بلعتها وكلاص مي شربني بيده
باس راسي وگال.. اعرفچ أنتي قوية لا تضعفين گلبي وأمي لا تهتمين إلها لأن عقلها مو براسها حاليا فاقدتة..
هزيت راسي گلتله عادي تعودت..
باسني وطلع دخلن نبراس ونور گعدن يمي..
نبراس:- ها ناردين عمري نفرچ رجليچ يوجعنچ گوليلنه وبعيونه..
-لا ما اريد شي..
نور:- ناردين خواتچ احنه لا تخجلين منه..
-لا تلحون عليه فدوه..
نبراس:- عفية لا تزعلين منه قابل شبيدنه شفتيني شلون ادفعها واحاول ابعدها همزين سالار موجود..
نور نزعلن دموعها علئ خدها وگالت:- بيه ولا بيچ ناردين تدرين بيه شگد احبچ ياريت الوجع بيه..
سكتت ما جاوبتهن نزلن دموعي بحرارة على خدي..
رادن ينسني الموضوع گالت نبراس:- حبيبتي شربتي علاجچ؟..
-اي شربته..
نـور:- صحيح ناردين ليش هيچ حچيتي ويا حيدرة بالمستشفى تره خطية هو گال ما متعمد..
-لا تجيبين طاري حيدرا..
-والله خطية حسيته انقهر هواي من كلامچ..
-هسه صار هو خطيه بس اني مو خطيه جاوبيني؟ حالي مايكسر الگلب؟ وبسبب منو؟ بسببه لذلك اسكتن لو اطلعن من الغرفة تمام..
اذا ما جربتن الشعور لاتحچن..
طلعن واني ظليت ابچي لحدما نمت من القهر..
مر اسبوع تعيس ربي يعلم شصار بيه بهذه الايام ونفسيتي شلون متدمرة كلياً وصارت مشاكل بسبب موت لؤي..
بيوم اجه حيدرة حچه وياا خالي وسكتته ما خلا يفتح حلگه بكلمة بعد وسالار حسيته يعرف شنو المضموم وصاف وي حيدرة بكلشي..
وامي سكتت همات حچه وياها وصارت تكعد بوحدها وبغرفتها وماتحچي ويانا وما صارت تتعارك وياي لو تمد ايدها عليه
ما اهتميت هددهم لو لا مالي دخل.. يجي عليه بين فترة وفترة ما اطلع اله ولا ارضى يشوفني .. فيطمئن عليه من سالار
مر شهر ونص.. صادف نهاية شهر الـ2 چانت بداية للامتحانات نهاية كورس الاول..
نبراس اداوم وتروح للكلية من اشوفها انقهر واتحسر على الروحه للجامعة حالي حال البنات..
حاچيت سالار گال اطيبين يلا اداومين.. واني ما اريد تروح عليه هذه السنة وخاصتاً هذه الامتحانات سهلة..
چنت گاعدة والموبايل يمي علئ الميز جريته وطاح بالكاع.. بچيت مااكدر اسوي شيء دخلت نور شالت الموبايل
درت وجهي مسحت دموعي بسرعة، كلت الها دگي علئ حيدرة..
استغربت:- ليش شعجب ؟
-عندي موضوع وياه.. دگي وفتحي سبيكر ما اكدر اخلي على اذني واطلعي اذا ما تصير بيها تعب..
هزت براسها "اي" بعيوني ودگت .. رن ..رن تالي جاوب بسرعة..
گال:- الو يابعدهن
خلته بحضني وطلعت وسدت الباب وراها..
جاوبته.. هلو حيدرا..
-هلا وكل الهلا شلونچ بويه؟..
-بنص الخير..
-خير ان شاءالله.. انه تعبان وحتى شغل ما جاي اروح..
-الله يساعدك..
-ويساعدچ محتاجة شي گوليلي خادم.. هسه اجيلچ اذا ضروري..
ردت اگله آي محتاجتك محتاجة حضنك كلامك بلكت تخفف عني الآلم الجاي اعيشه.. بس ما گدرت هالكلام كلش جبير ما حچيت وشهگت بصوت مخنوگ..
-لچ لااا تبچين بروح أبوچ..رح اجي هسه وعلي..
-لا ما يحتاج لا تجي..
-ليش تبچين منو القاهرچ احچيلي امچ مسمعتچ كلام؟..
مسحت دموعي وضحكت بألم.. كُل يوم ابچي انت تدري شنو دا يصير بية؟ هه حقك ملتهي بحياتك وناسي نارك تحارب مرضها لوحدها..
جر حسرة وگال:- ردتچ ترتاحين اذا اكون موجود يمچ رح تكرهيني.. شگد حاولت احچي وياچ وترفضين اجيلچ وما اطلعين شسوي بهالحالة.. عفتچ ترتاحين
-ليش هسة اني ما كارهتك برأيك؟..
-ناري بوية صيري زينة وعاتبي العمر كله اسمعچ وانا الممنون بس هسه بروح ابوچ لا تبچين اكرهيني بس لا تنقهرين دموعچ غالية عليه..
-تتذكر يوم الي توفى ابويه؟..
-لچ اخخ مو يوم چان سنة بالنسبة إليه شوفتچ مكسوره وعيونچ حمر هدت حيلي..
-مثل الآلم إلي حسيته بيومها تكرر بـَس الفرق جاي اعيشه بكل يوم..
والفرق چنت انت يمي وسالار وخواتي خففتوا الصدمة الي تعرضت الها بيومها .. بس هسة اني وحدي رغم كلكم موجودين بس ما جاي اشوفكم..
-لا بوية شنو هذا الحچي لچ سالار گال مستعد اهديلها روحي في حالة ترجع صحتها وانه افديچ بكلشي بس گولي اي واگلچ تم.. وخواتچ يحبنچ تؤامچ هذني.. حسن يسولف اليه گال سالار بكل ليلة يصلي ويدعي الچ قبل اي دعاء..
-ربي يحفظة يمكن بس هو مهتم بأمري..
-آمين.. چا انه وين رحت بويه؟
-هه انت؟.. على كولن اتصلت حتى اگلك اريد اداوم..
-لا شنو اداومين..شلون وبهذه حالتچ؟..
-ادري ما اگدر امشي بس اريد اداوم مليت من حالتي هاي ما تسمى حالة گاعدة بالغرفة بين اربع حيطان بس اكل و انام واشرب ادوية
-يعني اكيد مصره تريدين اداومين؟..
-آي اكيد..
-بعيني چا..
-وشسمه.. حيدرا
قاطعني وهو ضحك وگال مُتنهد:- يابة شگد مشتاق أسمع الشسمه منچ عسئ ما تتنكارين وياي العمر كله بس اتشافي وشوفي شنو رح اسوي..
-كلامي مو مثل قبل چنت احچي بروح حلوة هسة لا كل شي تغير كل شي شاحب ما اله طعم..
-الله كريم ناري ترجعين مثل قبل واحسن..
-والنعم بالله ما جاوبتني شلون ارجع..
-الچ الصافي يابه.. خليها عليه
-معتمده عليك..
-شحدچ تعتمدين على غيري..
-آي..
-مشتاقلچ تدرين ؟
-اشتاق براحتك..
-ممم.. باچر اجي اشوفچ اطلعيلي والله مشتاقلچ صارلي شهر ما شايف عيونچ الي كل يوم لون..
-اوك ماشي يله اخذ راحتك..
-ديري بالچ علئ نفسچ..
-تمام..
-يحفظچ الباري..
-باي..
ثاني يوم اجه صار الي شهر ما شايفته گعد يمي بالغرفة..
حيدرة:- شلونچ
- الحمدلله علئ الله
طبطب علئ ظهري وگال:- إن شاءالله ترجعين مثل قبل وأحسن
- آي..
- بخصوص دوامچ تدريسچ وامتحاناتچ رح يكون أكتروني علئ الابتوب
- شلون يعني ؟ ما فهمت
- ادرسين هنا والحل ادزي للأساتذة عبر موقع
- هاي شلون يقبلون شلون وافقو ؟
- لا تفكرين المهم رح ادرسين عوفچ شلون وافقو
- تمام وشلون امتحن
- يتأكدون اول شيء من هويتچ وتمتحنين عادي وهم يدرون بوضعچ وحالتچ اخذت تقاريرچ وشافوها
- تمام ويمته ابدي ادرس ؟
- من باچر أفضل والمحاضرات دزيتهم لسالار رح يدزهم الچ بليل
- ماشي، حيدرا
- ها عيونه
- عود شسمه شكراً
- العفو يابة هذا ابسط شي اقدمة الچ
سكِتت تقرب مني وحضني طبع قبلة علئ راسي بهدوء وتنهد وطلع..
بديت ادرس هكذا..
مر أسبوعين ..
فاجئني من اجه بليل لبيتنه وصعد لغرفتي دخل
وگال لسالار بعد يومين أسفرها
جاوبتة:- وين تسفرني ؟
- بعدين اگلچ
- بس اني ما اريد اروح وياك ؟
- چا منو إلي يسفرچ!!
- ما اروح وياك سالار شبيك انت ليش ساكت ؟مو گلت توديني لبيروت ؟
سالار:- ناردين ما اگدر أروح وياچ ياهو الهن نبراس ونور شلون اعوفهن لوحدهن ؟ واسافر وشغلي هم بعد كم يوم وأروح
- يعني شنو ؟
سالار:- ترحين وياا حيدرة أفضل شي
- ما اروح لعد
سالار:- ناردين حبيبتي حيدرة زوجچ هو المسؤول عنچ گال أني أسفرها وأني تدرين بيه ما اگدر اعوف خواتچ واطلع محد الهن والله صعبة ؟
أخذي الكلام وروحي ويا تتعالجين ومن تجين لكل حادثًا حديث اذا ما عجبچ تبقين ويا ارجعي بيتنا مفتوح بس اهم شي هسه سفرتچ
بچيت وجاوبته..
- خواتي والشغل أهم مني اهم من تعالجني وتوديني تسفرني ؟ ماشي ما اريد منك شيء
سالار:- صدگ تحچين ؟
- مو تريد اروح وياا حيدرة ماشي بعد رايد شيء ؟
سالار:- نارديـن
- الله ياخذها حتئ ترتاحون منها
جاوبني حيدرة:- أسم الله!!
دفر الكرسي سالار بعصبية وطلع..
بقئ حيدرة واگف ومچتف ايديه علئ صدرة ويباوعلي..
- شتريد ؟
- انتي
- واني ما اريدك
- اريدچ حتئ اسفرچ واعالجچ مو شيء ثاني
- تمام ما اتقصر
- حضري ملابسچ وغراضچ ،ومستلزماتچ حتئ محاضراتچ اخذيهن اهناك تبقين ادرسين ،بعد يومين علئ السفر حجزت تذاكر
-تمام
- رايح محتاجة شيء ؟
- لا سلامتك
- الله يسلمچ
يومين نبراس ونور يحضرن بملابسي ضمن كلشي بالجنطة
صار موعد السفر الصبح بحدود الساعـة 6
چنت گاعدة بالاستقبال علئ الكرسي..
نبراس بدلتني وحضرتني لان خابر حيدرة گال بالطريق انا دقايق واجي
ما مستعدة اسافر وبداخلي خوف لان رح نسافر لوحدنه ومحد يروح ويانه
وماكله هم التبديل والأكل والنوم واحتياجاتي كلها رح يسويها هو ؟!!
گلت لنبراس عود تروح وياي گالت عندي أمتحانات والكلية ماتگدر تعوفها
وحاچيت طيبة هم نفس عذر نبراس
ونور رادت تروح بس أمي گالت أكسر رجليچ إذا رحتي ويا ناردين
ومحد قبل يروح وياي هزيت ايدي بخنگه عادي يابة وذا شنو الجديد ؟
بقيت گاعدة وحدي انتظرة..
اندگ الجرس فتحه سالار..
ودخلو حيدرة وحسن..
صبح علية رديت بهدوء شالني لسيارته واخذ الجنط خلاهن بالصندوگ..
سلمت عليهن ودعني..
وسالار راح وياي گال فرد مره عنده شغل بأربيل يومين ويرجع لبغداد..
وحسن اجه حتى من نوصل للمطار يرجعون بسيارة حيدرة..
ركب بالسيارة وحرك حيدرة انطلق لأربيل
وصلنه ودخلنه للمطار بقينه ساعتين ننتظر بالمطار گاعدين علئ الكراسي..
جاب حيدرة عصير ولفات لان دره بيه ما متريگه اخذتهم منه لان جوعانة وبنفس الوقت ما اقاوم الكباب ..
اكلت وگال يلا للطيارة..
خلا الجنط بالعربانة يودوها يفحصونها وبعدين يخلوها بالطيارة..
ودعت سالار باس راسي وگال لحيدرة :- ناردين أمانه يمك تِره هي عزيزة وروحي من الدنيا و وصية أبوي الله يرحمة دير بالك عليها واي شي يصير خابرني لا تنسئ
حضنة حيدرة وگال:- بعيوني الأثنين اخليها لِا تقلق..
وراح هو وحسن ..
اجه حيدرة ودفعني بالكرسي وصعدنه بالطيارة اول مرة اشوفها بالحقيقة..
گعدني يم الشباك وهو گعد يمي وخله الجنط فوگ ورجع گعد
عبرت وحدة موظفه تفتر علئ كل الراكبين انطاها بطاقتين ما اعرف شنو وراحت
بقينه 10 دقايق تالي گالو صلو علئ محمد رح نقلع اقرو الفاتحة..
تالي تحركت الطيارة خفت حيل..
انتبه إلي حيدرة خله ايده ورا ظهري وباوعلي بنظرة مطمئنة ..
همست..
- أريد انام علئ صدرك نعست
أستغرب من طلبي..
- تره نعسانة ما اگدر أنام هيچ شبيك مستغرب إذا ما اتريد عادي گول
- لا يابة أنا إلي اريد
بعد الفاصلة الي بالنص شالها وعدل رجلية اكو كوشات مخصصه لحالتي مدد رجلية عليهن وخلا راسي علئ صدرة وغطاني ويمسح علئ شعري تالي نمت..
گعدت بعد ما نمت ساعــات هواية
وبعدنه بالجو سئلته..
- بعد شگد ونوصل ؟
- ما بقئ شيء عبرنه هواي وبس ساعتين نوصل
صفنت بوجهة..
- اگلك صدگ احنه وين رح نروح ؟ ماگلتلي لبيروت لبنان مو ؟
رفع حواجبة بأبتسامة بمعنئ "لا"
- لعد وين ؟
- بريطانيا ،لندن
تفاجئت:- چذب گول والله!!
- اي بوية
- عزه صدگ لدولة اجنبيه يا شگد حلو يعني شسمه حيدرة
- هاا شسمة
- هاي االدوله النشوفها بالمسلسلات والافلام ؟
ضحك وهز راسه:- اي
رجع راسي لصدرة ..
- نامي نامي من نوصل اگعدچ
- لا يا نوم اريد ابقئ گاعدة
- علئ راحتچ
سكتت أباوع علئ الناس اغلبهم نايمين..
- ناري جوعانة ؟
- لا بس شسمه عطشانة
- انتظري لحظة
صاح للموظفة جابت عربانه متحركة بيها عصاير ومشروبات غازيه وابطالات مي
گلت اله :- اريد عصير برتقال
- صار
انطاني وهو اخذ ببسي اشرب واباوع علئ الطيارة حلوة وكبيرة مبين حاجزها خاص وغالية التذكرة ومو مثل الطيارات البقية حتئ خدماتهم حلوة
رجعت غفيت گعدني وگال ..
-يلا گعدي 5 دقايق وتهبط
فزيت والمسافرين يعدلون أنفسهم
هبطت الطيارة وهبطت روحي وياها ردت اصيح
- يمچ انا
- خايفة يعني ما يصير أخاف ؟
- اي ما يصير تخافين بوجودي
سكتت ..
نزلنه من المطار كبير سئلته وهو يمشيني بالكرسي ويسح بالجنط التايرات وجنطة علئ ظهره:- هسه احنة بالندن مو بالعراق ؟
- اي يابـة ههههههههه
سكتت وابتسمت فرحانة صدگ تغيرت نفسيتي خابر ما اعرف منو وطلعنه من المطار
الشوارع والناس والعمارات والمحلات كلشي مختلف والأجواء حلوة
صفت سيارة خلا الجنط وركبني گعدنه سوية ورا
مبين السايق يعرف حيدرة لان حتئ يندل الفندق ويگله سيدي ما اعرف ليش
وصلنه ونزلني فتح الباب الفندق كبير
حيدرة:- هاي شقة كاملة
- اني عبالي فندق
ضحك ..
الشقة عبارة عن غرفة نوم وحمام ومطبخ صغير ومٲثث بكلشي حتئ غراض المطبخ موجودة
دخلني للغرفة گعدني علئ الچرباية نفرين ملكية وحلوة
- رايح اخابر دقايق وارجع ابقي لاتخافين
هزيت براسي (اي)
بقيت اتفص الغرفة بيها كنتور وميز مرايا وثلاجة كبيرة
رجع ودخلت عاملة خلت الاكل علئ طبلة وراحت
گومني علئ الكرسي وگعد طالب مشاوي وباستا وصاج
- شنو هسه الوقت ؟
- رح يصير ليل معليچ هسه هاچ اكلي من ايدي
سوالي لفات صغار اكل واشرب عصير
- كافي شبعت
- شنو شبعتي ما اكلتي شيء اكلي بعد
- لا شبعت واصلاً اكلهم مو نفس اكلنه ما اعرف بس موطيب
- بعدين اوصي الچ أكل عربي شعبي إذا رايدة هسة اوديچ للحمام تغسلين ؟
- آي
- بعيني
راح بالأول غسل وتالي اجه شالني غسلني ورجعني علئ الچرباية..
- نعسانة ؟
- لا
- شنو تريدين بخاطرچ شيء ؟
- لا ما اريد
- چا شنو ؟
- ما ادري
فتح الثلاجة طلع علبة كاكاو خلاها بحضني
- اكلي رايح اعدل بالجنط واطلع الملابس
هزيت راسي (اي) أكل وهو يطلع بالملابس ويعلگهن بالكنتور من خلص خلا غراضي علئ الميز
- تعرف تصفط حلو حلو
- اي چاا شحسبالچ
- نادر ما شاءالله
- ههههههه اسكتي وخليني اكمل
بقئ بالساعة يلا كمل راح اخذ خاولي وطب للحمام
طلع ولبس بس بجامة وتمدد يمي
- تعبان وعلي ظهري محتاج أحد يدلگه
باوعتله صفح وحچيت..
- اي صيح لمواظفاتك يدلگنه مسحتي مني علئ اساس
- تقبلين ؟
- أنت تقبل ؟
ضحك :- لا انا رجال متدين ما ارضئ غير زوجتي
عقچت وجهي ودرت..
- شبيچ حچيت شيء يضوجچ ؟
- لا، بس اريد ابدل ما مرتاحة
- آي
- شنو آي ؟
گام فتح كنتور طلعلي دشداشة
گتله :- اي ومنو يبدل الي ؟
باوعلي بمكر :- تردين مساعدتي ؟
- لا طبعاً
- چاا الحايط يبدلچ ؟
- ما تضحك تره
- ما ضاحك انا ولا كتلچ اضحكي
انطاني الدشداشه حاولت انزع القميص بيد وحده دگمه دگمه وفتحته بعد ما نگطع نفسي
شمرت القميص مني حاولت البس الدشداشة ما گدرت وحسيته رح يجي بسرعة غطيت نفسي بغطى
طلع من المطبخ ينشف ايديه..
- ها زين دبرتيها ولبستي ؟
- اگدر تره
- اي زين
خلا الملابسي وملابسه بالسله وخابر اندگ الباب فتحه اجت نفس الموظفة العاملة اخذت الملابس وراحت شكلها راح تغسلهن
حيدرة :- شبيچ مخنزره ؟
- ليش تباوعلها ؟
- منيه ؟
سكتت ..
- عبالي راجعلچ عقلچ
مارديت تمدد يمي راد يرفع الغطى سحبته منه
- شبيچ
هزيت راسي برفض..
- ما بدلتي صح ؟
- شعرفك
- هاي دشداشتچ يمچ
سكتت گال شو وخري ايدچ ارفع الغطى..
- ما استحي ما لابسة شي
أبتسم:- اغمض عيوني ؟
- ما اثق بيك
- وحق الله ما اسوي شيء بس ابدلچ
هزيت راسي "أي"
لزم الدشداشة بيده..
- غمض عيونك ؟
سد عيونه وگال :- صار غمضتهن
تقرب مني وخرت الغطى لبسني من الراس حاولت ادخل ايدي بالردان ما گدرت ايدي تأذيني ..
- حيدرا ما اگدر
- روح حيدرة رح افتح عيوني بسرعة البسچ وما اباوع منا لو منا
- شقصدك
- ههههههه يابة ما اقصد شي
- يله تره بردت
- ادفيج ؟
- هلو هلو
- ههههههههه خخ يابة صرت ابوگ كلام منچ
- أي ادري بيك شوف الدنيا دواره
- هههههههه بووية
فتح عيونه لبسني بسرعة وراح اخذ ملابسي خلاهم بالسلة ورجع..
- ها ارتاحيتي ؟
- آي..
- يله انام ورانا شغل باچر
- تصبح علئ خير..
- اجمعين..
طفه الضوه تمدد يمي گلتله خلي المخدات بيناتنه
باوعلي وگال :- لو اريدچ المخدات الفاصلة ما تمنعني نامي مو يمچ أنا
نام واني نمت نومه عميقة..
مر اسبوع نفس الشيء گاعدة بالشقة وشنو اريدة هو يسويه واغلب يومي علئ السرير
تالي اليوم الصبح گعدني وهو يگول..
- يلا ناري راح اوديچ للدكتور اليوم الجلسة الأولئ
لا أعلمُ إلى متىٰ يبقه هـذا الشعُورُ
و إلىٰ أينَ تأخُذني هذهِ الأشواقُ
نبضاتُ حُبكَ بداخليْ
كلماتُكَ البسيطةَ تحتلُني
عيناكَ و ماذا عَنُها !
جعلتنيْ أقعُ في غرامِ حُبها
⭐⭐⭐⭐⭐⭐⭐
نور :- بعد ماسافرت ناردين ،رجع سالار للبيت ثاني يوم ،ابــد مايتاحچه وكل شوي ويصيح هو وامي واحد ماطايق لخ ،ومبين الموضوع كبير لدرجة من يصيح نشرد اني ونبراس صاير يخوف مادري شبي وليش هيچ اتغير !؟ ..
الواضح امي حاچيه اله موضوع ،او سر قديم .. بحيث من يتعارك وياها علئ ابسط شيء ،تهدده وتگله احچي الهن وهو يسكتها ويطلع بره البيت معصب ،
صار حتئ نبراس ما يسئل عنها مثل قبل وما يسلم ولا يكعد يمنه ،
يخلي المسواك البيت ويروح لغرفته ويقفل الباب عليه ،لليل يلا يطلع وهكذا
عجزت اعرف اشنو الموضوع حتئ مصطفئ كتله حاچي انت اقرب اله بلكت يسولفلك بس هو قافل وما حچه النه شيء ..
مر اسبوعين ونفس الشيء ،اخابر علئ حيدرة حسيته هو هم ضام شيء لان كتله علئ خبال سالار وكتله -حاچي وافهم منه شبي؟ ،
بس جاوبني نفس كل جواب وببرود وكٲنه يدري :- عوفو وابتعدو عنه هو يرجع لطبيعته من وحده من يرتاح .
تالي ينطي الموبايل لناردين نحچي وياها ومفتوح سبيكر ،كالت رح تروح للدكتور باچر.
حسيتها ما ماخذه راحتها بالحچي، وتريد تسولف اشياء خاصه بيناتنه ،بس لان حيدرة موجود يمها واكف ،فتجاوب علئ كد الجواب
ققلته منها وبالي مشغول افكر بيها ،الله يعينها
لومت نفسي لان مارحت وياها لــ لندن چان طززت الدراسة ورحت هنه كم شهر وترجع ،هسه منو الي يساعدها ويبدلها ؟
اعرفها تخجل من حيدرة ..
وارجع كل ليله ،افكر لسالار وليش هيچ تغير تعامله وصار جاف وسطحي
،شنــو السبب ؟؟!
...
ناردين :- بعد ماگالي انروح للدكتور ،گومني علئ الكرسي گعدني ،واتصل علئ العامله تجي ..
الي طول هلاسبوع تجي يمي ،وشنو احتاجه اتسوي ،بٲتصال واحد من حيدرة
تطبخ ،،،او مرات الاكل جاهز يجيبه
تغسل الملابس ،،، وتنظف الشقة
گالي هو جابها لحتئ تساعدني يعني عامله او مُساعده ولها راتبها الخاص ،هيه اجنبيه مو عربيه بس تحچي عربي فصحئ ،وتفهم عليه من احچي
هيه تبدلي لان اخجل من حيدرة ،وهيه التسبحني وكلشي تساعدني بي ،حتئ بؤقت الاكل توكلني ،مرتاحتلها كلش فعلاً انسانه طيبة وتساعدني بحنيه
..اتصل عليها،اجت طلعتلي بنطرون وبلوزة ؛ الجو بارد ثلج
ولبستني رباط علئ رگبتي وكلاو علئ شعري لا اتمرض لان من وصلنه ليهسه ماطالعه من الشقه وهاي اول طلعه الي فيمكن يتغير عليه الجو واتحسس ،
اجه حيدرة وهو مبدل ولابس مناظره الطبية الشفافه ،
راحت العاملة الي اسمها ( دانيلي) ،اخذ محفظته وموبايله
- يلا نروح .
- اشو خايفه !،
تقدم يمي وسحب الكرسي وفتح باب الشقة وهو يگولي :- انا يمچ هذا الشيء كافي لحتئ يزيح الخوف من گلبچ وخلص ،انتهئ الموضوع اطمئني .
طلعني من الشقق للسيارة ،ومن السيارة للعمارة كبيرة ..تخص الدكاترة بمختلف المجالات الطب .
نزلنه ،صعدنه المصعد طابق _9
الناس احسها تخــوف ! ،بحيث ضليت منزله راسي وبدون كلمة ،وماخذه وضعيه السايلنت
اصوات ضحك وكلام ،فعلاً حسسني اني يمكان غريب ،تالي اعرف حيدرة وراي اطمئن
تكلم بالانكليزي .. وياا ،السكرتيرة
دقايق ودخلنه ،فتح الباب غرفه الدكتور ..
سلم علئ حيدرة ،والواضح علاقتهم قوية لو اصدقاء قُداما
يحچي وياي بالانكليزي واني مثل الصنم ،مااعرف احچي لو اترجم كلامة، لان انكلوشتي ضعيفه
فحيدرة يترجملي عربي واني ارد علئ الدكتور بالعراقي ،وحيدرة يترجمله انكليزي
وصارت لخه
بين قوسين صار حيدرة (حجي گوگل) والوسيط المترجم ،
تالي الدكتور انطاه ورقة بيها عنوان ،وطلعنه
واني صافنه بالطريق گتله :- لعد انت مو گلتلي رح تصير جلسه وعلاج ويرجع ظهري وامشي اليوم؟
جاوبني وهو يسوق :- اي اي
- لا والله جديات شنو وين رح نروح؟
- للمستشفى
- ليش!
- عمليتچ اليوم بويه
كزبر جسمي :- ليش لعد چذبت عليه تدري بيه بعدني خايفة ليش هيچ مااريد رجعني للبيت فدوه حيدراا
- لا تبچين احنا المن اجينا من بغداد للندن غير علمود العملية ؟
- والعلاج ؟؟
- العلاج الفيزيائي بعد العملية ان شاءالله
- حيدرة بس ،خايفة اجلها فدوة
- لا ماكو تأجيل ليش خايفة انتي قوية
- يا قوية تبزني بريشه ينغمي عليه
ضحك ، :- ليش تضحك اخاف دا اگولك خايففة شنيه
باوعلي وهو يضحك عليه ، :- انصهر شني
- يااا حيدرا
- عيونه
- رح احس بالعملية وجع ؟
- اكو شيء اسمه مخدر
سكتت ودرت على الجامة احس گلبي مقبوض
دخلنه للمستشفئ والخوف ملئ گلبي ،خايفة اذا يصير بيه شيء داخل العملية ...
استعدوني ولبسوني لبس العملية گعدوني على السديه قبلما ادخل ابتسملي وگال واني لازمه ايده.. ناري انتي قوية ارجعيلي سالمة.. هزيت راسي (اي) ودخلوني..
...
حيدرة :- دخلت للعملية وبالي يمها اتصل رائد طلعت من المكان وجاوبته..
- هلا رائد
- هلا حبيبي بشر طلعت من العملية لا ؟
- لا والله توها دخلت
- اي ان شاءالله بالسلامة تطلع يارب
- امين اگلك حبيبي الي ابالك تشيلها من راسك ادري بيك بشنو جاي تخطط ترى
ضحك :- علئ دلعونه وعلئ دلعونه احبها وداعت حيدورنه
- انچب شبيك
- يخوي احبها ولحسين وعلي احبها واريدها ،صارلي اشهر مراقبها واعشگها ،يمن فدوة يروحون الخلگ لعيونها
- انت تلعب لو شنو بيوم من عرفتو بيه خطبت عارضت اول واحد انت وحتئ بالعرس طلعتني واحد مامهتم لشغله وهسه اتگلي احب واحب انت عاقل ؟؟
- هيه خلت عقل براسي ،استسلمت لو تريد تنتحر انتحر مااتدخل بيك يخوي لو تزوج اربعة ،حيدرة احبها
- اي حب هذا ؟ اصحه رائد ،نسيت شنو چان اتفاقنا ؟؟
- لا ما نسيت الاتفاق بس قسم احبها ورايد اخطبها من ترجع انت من لندن حتئ تحچي وي..
قاطعته من اجه الدكتور ،وگلتله روووح بعدين اتناقش وياك ..
حچيت وياا گالي الحمدلله بعدها العملية تمام التمام وانطاني اوراق حتئ اوقع عليها ..
وقعت وانتظرت ساعـات طلعت من غرفة العمليات متمدده ونايمة نقلوها لغير غرفة لحتى ترتاح ..
والعملية نجحت والحمدلله ،ظهرها تحسن وبقئ العلاج الفيزيائي لرجليها شهرين ويخلص كلشي
رجعتها للشقة خليت العاملة يمها وطلعت، جبت مكونات الشوربة ،وسويتلها شوربة خضروات متنوعة
گعدت يمها .. واگلت للعاملة تروح
عدلت گعدتها وكلتها واضح دايخه شربت ادويتها ونامت غطيتها ورجعت علئ الابتوب اشتغل للفجر ..
...
نور :- خلصت عطلة نصف السنة وبدينه نداوم صارلي ايام طلعت من المدرسة بعد ماصارت حله والسايق اتأخر ما اجه
شكرا لزيارتكم عالم روايات سكيرهوم
