رواية جراح قلبي الفصل الثامن والعشرون 28 بقلم جوهرة

نرجس / 

ثاني يوم الصبح كعدت مسطورة ومالي خلك كوة كملت شغلي وريكت صعب كولشي ما اكلت لعبان النفس رجعلي رحت للمغسلة تقيأت سائل لونه غامق ومر علكم مضمضت حلكي وفرشت اسناني دخلت الغرفة صعب جان يكلب بموبايله صحته بصوت تعبان /صعب

رفع راسه وانتبه علية اني تقربت كعدت بصفه عالجرباية

نرجس /اريد اروح طبيب

ماخلاني اكمل سالني باهتمام واضح / شبيج نرجس مريضة انتي من البارحه شكلج اصفر ماعجبني وضعج

نرجس / اي جاي اتقيأ توني نفس الشي كولشي مااكلت وتقيأت وأحس حيلي بايد

صعب باهتمام وقلق / اي خل امي تروح وياج خل اخابر اياد لو ايهم يجي يوديكم 

اتصل باياد وحجى وياه وسده

صعب / تحضري راح يجي فد شوية 

رحت طلعت جبة لبستها فوك دشداشتي وأخذت شالي البسه التفتت عليه اريد اكله اشك روحي حامل بس استحيت الصدوك اني اكو خوف بداخلي وارتباك مجاي استقر إذا فعلا حامل أتقبل هالشي لو لا مجرد تفكيري اكو روح بداخلي يربكني احساس جديد اول مرة أحسه زين معقولة حامل ومرة وحدة تقربلي وشلون موقف جان حزت بنفسي تكون هيج نتيجة حملي عن طريق ضرب وإهانة واعتداء

صعب / ليش صافنه

انتبهت من سالني رجعت عدلت حجابي وطلعت من الغرفة احجي وية عمتي تروح وياية

خطية مكالت شي رأسا جرت عباتها ولبستها 

وهي تسال بية شاكلت وتقيأت وشنو احس هسة 

البنات كعدن يمنا وبقن يحجن ويعددن بالاطباء روحي لفلان طبيب وفلان مختبر دك هورن سيارة يمكن اياد هذا كمت رحت للغرفة اجيب جنطتي وفلوس 

من طلعت الفلوس صعب كال / افتحي هاي الجهة من الكنتور واخذي فلوس بعد

نرجس /لا هاي يكفن شكرا

صعب / اجى اياد

هزيت راسي وطلعت 

بالطريق عمتي حجت وياه يأخذنا لبعقوبة اسوي تحاليل يلة نروح طبيب ما قبلت نمر عالمختبرات اللي بالناحية

رجعنا الظهر وبالبيت عمتي أول مانزلت طكتنا بهلهولة 

خلتهم كلهم يلتمون علينا اني كولش استحيت مجنت متوقعه رغم الطريق كله فرحانه وتنصح بية واياد يضحك على سوالفها 

صاحت بيهم

ام حذيفه بفرحة / باركو لصعب ونرجس راح يصير عدهم وليد

عمي فرح وهو يحمدالله الي رزق صعب وباسني خطية 

باركولي والبنات يبوسني فرحانات شكرتهم ورحت لغرفتي لكيت صعب فاك عينه والفرحه بعيونه اكيد سمع من الهوسة البرا والهلاهل 

اشرلي بيده اتقرب ذبيت جنطتي عالميز تواليت وتقربت عليه سحبني من أيدي وحجى بلهفة واضحه / عليج الله صدك السمعته لو متوهم

ايدي بين أيديه حاظنها ويداعب باصابيعي عضيت شفتي / شنو سمعت

+

صعب بسعادة / انتي حامل

نرجس مبتسمه بهدوءةمن شافت فرحته وفرحة أهله / اي صدوك

جرني وقفلني بحظنه وهو يتنهد باس خدي وهو يهمس بأذني / مبروك علينا

ابتعدت عنه من اندكت الباب ودخلت عمتي تبارك لصعب / مبارك يمه الف مبارك حبالة مريتك

ابتسم لامه فرحته واضحة / بعد روحي يمه الله يبارك بيج وبعمرج

التفتت علية / داري روحج مثلما كالت الدكتورة حتى لا يرجعلج فقر دم

صعب بقلق / عندج فقر دم

نرجس / اي بس قبل فترة من جنت قصدي من زمان شكل عندي 

ماحبيت اكول بعد وفاة معتصم لأن جانت حالتي حيل تعبانة 

عمتي طلعت واني ذبيت الجبة وعلكتها وضميت جنطتي بس طلعت العلاج خليته عالميز مقويات لا اكثر وصفتهم الدكتورة

صعب / تعاي هنا خل احجي وياج

كعدت بسده مد أيده ومسح شعري وبقى جف أيده على خدي / نرجس فرحانة

عيني بعينه كورت شفايفي / مدري كولشي ما احس

عكد حاجبه / شنو قصدج متردينه لو شنو 

عيونه بدن يقسن معجبه طريقة ردي

صعب / احجي ليش ساكته

نرجس / صعب مجنت اتوقع احبل شتريد مني خليني اتعود انت تريدني اكول اي راح اطير من الفرح

قرب راسي عليه / وليش متفرحين كل متزوجه تفرح تصير حامل انتي شنو تفرقين 

حاولت ابتعد جان مسيطر أيده ورى رقبتي ومقربني عليه ..

نرجس / افرق افرق حملي هذا غصب عني جان وميحتاج أوضح أكثر

خزرني وانفاسه تضرب خدي / شكد حقودة دخيل الله

نرجس / مو حقودة اني مو بسهولة أنسى هذا طبعي

أصابعه تسللت لبطني مسحه وبقى أيده عليها وحجى بقوة / داري ابني زين ترى هذا أمانة

صفنت عليه وقصده واضح عباله راح اسوي شي يأذيه معقولة هيج يفكر 

عضيت شفتي وغمضت عيني احس روحي مو اني مشاعر غريبة تنتابني

اندكت الباب اني ابتعدت عنه دخلت ملاك .. عمة تعاي اتغدي بيبي كالت لاتتأخرين 

وكفت وابتسمتلها .. اي حبيبتي أجيت 

بس بالاول خل اجيبلك غداك

صعب / لا تعيين روحج قبل شوية ام ملاك جابتلي مشاوي روحي تغدي

طلعت وأخذت الشال ذبيته على راسي جانو ملتمين بالهول كعدت بصف عمتي وبديت اتغدى بدون نفس هذا واني ممتريكه اليوم 

ورى الغدا اجت خالة ايمان وعمتي حجتلها خطية شكد فرحت وراحت للغرفة يم صعب 

تباركله 

مرت الايام والوضع بيني وبين صعب مثلما هو يحاول يكون قريب الي بس اني اعامله ابرود بالنسبة لحملي بديت اتعود  على انو اكو جنين كاعد يكبر برحمي ولازم اهتم بنفسي واهتم بي

بالشغل عمتي متقبل اشتغل الا قليل تكولي 

داري روحج وكولشي منريد حسيتهم يحبوني أكثر من صرت حامل مجنت متوقعه هالشي الحمدلله يارب لأن والله تعبت بحياتي وحتى نفسيتي تعبانة 

اتصلت على خالة ام عقيل وخبرتها خطية شكد فرحت وبقت توصي بية شلون اداري نفسي هه مدري شبيهم عبالك زعطوطة ياهو التشوفني تبقى تنطي نصايح

+

اجت جنات علية .. عمو صعب يصيحج

ذبيت الماعون عالسنك جنت اغسله ورحت للغرفة 

نرجس / صحتني

صعب / اي تعاي جيبي الكرسي خل اطلع بالحديقة الجو اليوم حلو يبين

نرجس / وانت وين شفته اصلا بي طكه برودة

صعب / شني السالفة يابة نهاية آذار هذا اصلا صيف مو ربيع

قربت الكرسي وساعدته ماذب ثكله علية كلتله 

نرجس / استند على جتفي واكعد

صعب / لااا خاف أأذيج

كعد وسحبت الكرسي دفعته طلعته بالكراج فعلا الجو حلو ،، اندكت الباب

صعب / ادخلي جوا لا اطلعين وصيحي واحد من الجهال

صحت عليهم وبقيت واكفه يم شباك المطبخ 

راح ايمن ابن حذيفة فتحه واني سحبت البردة حتى اشوف منو دخلت صفا وياها مرة جبيرة بالعمر

من شفتها انجنيت من صدوك هاي شكو جاية مو على أساس حرم عليها دخلت البيت وهددها شلون عين صلفة !!!! بقيت أراقب صعب شيسوي سلمن عليه وهو ردلهم السلام ورحب بيهن وصفا كامت تحجي وياه وهو ابتسملها

ايا جذاب طلع يقشمر علية ويبيعهن براسي اشرلهم يدخلون من باب الكليدور وطلعت عمتي تهلي وترحب وتعالن اتفضلن وشلون تبقن بالكراج واكفات انتبهت على علا راحت ورى عمتي سلمت وبقت واكفه على جهة اني ماعجبني هالشي ترحيبهم بيها طعنة خنجر وبنص گلبي

كعدت عالقنفة وشبكت أيدية بحظني وخليت رجل على رجل عاكدة حاجبي اريد انفجر الصدك غير اريد اتعارك المفروض ميستقبلونها على شنو أكبر راسها هاي لأن اتزوجت عشتووو

يمكن راحن شوي ودخلو للمطبخ وعمتي تدفع بكرسي صعب ومن شافتني كالبة خلقتي كعدت تبرر .. هاي عمة صفا ،، ام عامر تكول مريت من بابكم كلت اسلم على ام حذيفة

نرجس بضيق / مو على أساس بيتكم محرم عليها 

حجيتها بضيق واضح على وجهي

عمتي باوعت لصعب ورجعت باوعتلي / المرة عيب دايسة بساطنا ام عامر خوش مرة تردين ما نستقبلها !!!!

وكفت وبعصبية رديت / اي على شنو صفا تدخل البيت الله لايوفقها ام المصايب

عيني راحت بعين علا شفتها ضاجت ما اهتميت 

اجيت اطلع من المطبخ زمخ صعب بعصبية / نرررجس ماريد قلة ادب

عضيت شفتي الفوك بقوة ورفعت تك حاجب / منو قليلة ادب اني هه اي فعلا اني الاعرف ك .ح .ا .ب واتواصل وياهن

صرخ بية بكل قوة خلت الكل يخنس / اااانجبي

+

عفتهم ورحت لغرفتي واني گلبي يريد يطلع من صدري كثر ما منفعلة شلون تدخل البيت وهي سبب اذيتي

كعدت عالجرباية وانتجيت بظهري عالمخده شوي ودخل صعب وحده وركع الباب وراه 

خزرته وهو خزرني تقرب علية يدفع بالكرسي جان عصبي / انتي شلون هيج تحجين وية امي شلون تتلفضين الفاظ ابد مو حلوة 

نترت ..

/ انت واحد جذااااب تضحك علية تكول حرمت عليها دخلة البيت واشوفها تحجي وياك وتتمضحك انت عليمن تقشمر اني مو غبية 

تلني من ذراعي وضغطها بقوة نزل جسمي عليه / جاي تتجاوزين واني مطول خلك وياج مطول خلك إلى درجة عايفج براحتج وهذا مو طبعي احترمي نفسج لا اعلمج شنو الاحترام

نرجس / ايدي عوفها جاي تأذيني

سحبني أكثر وأيده ضغطت فكي / اخر مرة اسمعج هيج تحجين

تركني واني كرفصت بالفراش افرك بيدي /

تريد تسد حلكي تريدني ابقى ياغافلين الكم الله حتى يبقى الباب مفتوح لبنت عمك الشريفة

عيونه كل الغضب تجمع بيهم مد أيده وسحبني من شعري جنت مسوية ظفيرة لواها على أيده وقرب راسي ردت اوكع بحظنه / ناوية تنكتلين جلدج يحكج

فكيت عيني ورديت عليه / مد ايدك وشوف شأسوي

صعب فتح عيونه بغضب / هه لا بلة شتسوين يعني شو انتي هايجة مدري شبيج الحبالة مأثرة على دماغج

حل شعري وابتعدت عنه كعدت بنص الجرباية حتى لا يلوحني 

دنكت راسي على رجلية مقهورة مقهورة من الصار 

بقيت ماطلعت من غرفتي وصعب يفتر بكرسيه بالبيت ويرجع يدخل الغرفة اني ما اهتميت خله يلوب ولا لساني يطخ لسانه

بالليل حسيت معدتي كرصتني من الجوع صعب جان يم أهله صارله كم يوم يكظيها برا الفراش لأن مل سمعت صوتهم بالهول فتت للمطبخ فتحت الفرن مبقين عشا اكيد الي طلعته وخليته عالميز كعدت اتعشى بهدوء واني افكر بالصار اليوم ، دخلت علا للمطبخ بيدها صينية جاي غسلت الاكواب ومن كملت اجت كبالي

علا / نرجس مجان بيها داعي العصبية والهوسة كل الموضوع عمتها حبت تسلم علينا واجت وياها

نرجس / علا اني أتحسس من هالموضوع وكل الحق وياية

علا / اني مكلت لا صح حقج بس المفروض اكبر عقلي شوية تدرين صعب حيل انقهر وبقى ضايج لأن هو هم ما يقبل صفا تدخل البيت بس احتراما للمرة الجبيرة سكت 

عكدت حاجبي ماحبيت ارد هي عافتني وطلعت 

غسلت مواعيني ورحت توضيت وصليت بغرفتي فتحت التلفزيون ومددت عالجرباية اتابع مسلسل 

انفتحت الباب ودخل صعب بالكرسي سد الباب وقرب كرسيه يم الجرباية ما طلب اساعده سويت روحي منتبهه عالمسلسل بس بالي يمه خفت ميكدر يصعد الجرباية والله كدر وبسهولة حر الغطا تغطى ونتر / طفي الضوة والتلفزيون اريد انام

كمت طفيت الضوة بقيت البلازما تشتغل تلني من أيدي سحبني بحظنه / ليش تعادنين

عيني بعينه نفسه ثكل قربني أكثر وهو يطبع بوسه على شفتي اني جنت مقهورة منه ماريده يتقربلي ولا يطخني أيده تلعب بشعري وتنزل لرقبتي بكل حنية حسيت بخدر وحبيت سجنه لشفايفي اول مرة احس وياه هالاحساس واول مرة ابادله هالشي رفع راسه وحظن وجهي متفاجىء بية وهمس ..

/ نررجس

غمضت عيني والخدر مسيطر على جسمي رجع باسني بخدي وحظني لصدره وأيده تمسد ظهري بقيت راسي بصدره استحيت ارفعه واني اسال روحي وينج نرجس هاي على أساس اني مقهورة منه مدري بس بلحظتها حبيت شعور وإحساس يكون شخص يهتم بية جنت محتاجه حنية صعب بعد الصار اليوم ماريد احس روحي وحيدة 

صعب بقى ساكت ما فتح اي موضوع ولا ذكرني بالصار 

ابتعدت شوية 

/ وين ابقي

نرجس بذهول من الصار بينهم / أطفئ البلازما وارجع

صعب بحنية / عوفي اذا تحبين

نرجس / ها لااا اريد انام 

طفيته ورجعت بفراشي هو رأسا مد أيده وسحبني لحظنه اعترضت خفت يتعور

نرجس / رجلك اخاف اعورها

صعب / لا ماعليها شي نامي يلة

سندت راسي على صدره وأحس روحي مرتاحة اسمعه تنهد ودنك باس راسي وأيده تلعب بشعري بعد ما حسيت بروحي

ـــــــــــــ

مرت تلث اشهر على حادث صعب واني كملت شهري الثالث بالحمل الحمدلله كدر يمشي على رجليه قبل اسبوع فتحوله التجبيرة يم الدكتور ومن خلال الاشعه الكسر لاحم 

من دخل يمشي بالكراج حيل فرحت عمتي كامت تهلهل وجانت شايلة جيس جوكليت طشته عليه حظنها وباس راسها والتفت علية والإبتسامة بوجهه غمزلي تك عين اني استحيت ودنكت 

الحمدلله مرت هاي الفترة على خير رغم جانت بدايتها تعب وارهاق اني حيل تعبت بمداراته والكل جانو يحمدولي هالشي بهاي الأشهر بديت اتعود على صعب يمكن لان حيل قريبه عليه يمكن لان حنين علية فطول الوكت اتفكده وهو هم أحسه يضوج من يشوفني التهي عنه صرنا قريبين لبعضنا ومرات نبقى فايت وكت واحنا بالفراش نسولف بس جان ميعوفني يبقى حاظني ويسولف

قررنا اثنينا نرجع لبيتنا رغم اعتراض عمتي كالت تعودت عليكم هم ترجعون تعوفوني عمي كام يحجي عليها كاللها خلهم على راحتهم ومو بعيدين علينا

جان باقي الفراش على حطته لأن جان شتا من اول ما انتقلنا فرحت اني والبنات حتى نعزل الفراش ونغسل البيت بقينا يومين انظف ومرتب لأن جان متروك أشهر عمتي كالت لاتغسلن الفراش بالمكنسة نظفنه مابي شي بعده جديد 

طلع البيت ينكط ورد بس شنو تعبنا واني ظهري كام يشظ علية من التعب

ورجعنا لبيتنا وإحساس حلو يرافقني هذا بيتي مملكتي اتصرف براحتي

العصر رحت عليه جان كاعد يخابر عمه سامي 

هذا عايش بالأردن انتظرته يكمل احجي وياه 

سده .. ها محتاجه شي

نرجس / صعب اريد اروح للصالون اني ولينا

صعب / منو ياخذكم ترى اني مشغول راح اطلع هسة

نرجس / ابو يوسف يوصلنا

صعب / اها تمام ماوصيج اريد تهتمين بروحج زين بحيث من اشوفج اكول منو هاي البنت

نرجس بضحكة / لا بلة شنو قصدك هسة اني محلوة

كرص خدي وابتسم ة/ فدوة غير جنج العافية

وبالصالون دللت روحي وسويت تغيير حلو رجعنا المغرب فايت وكت ذبني ايهم وراح هو ولينا 

سيارة صعب بالباب يعني موجود دخلت ماكو هو صحت / صعب مارد علية انتبهت صوت مي طلع بالحمام يسبح

نزعت عباتي وبقيت بدشداشتي باوعت لروحي بالمراية حيل عجبني شكلي طلعت للمطبخ احظر العشا 

كملت وعفته بالفرن ورحت اتوضى اصلي صعب جان بالهول صاح علية / ها بسرعة رجعتي

نرجس / صار ساعتين بالصالون اني كلت تأخرت يلة تعال تعشى

صعب / شنو عشاج

تقرب حظني وباس خدي اني حبيت قربه رفعت راسي وأيدي على لحيته امسد بيها .. كباب طاوة ومعكرونه وزلاطات 

والله لو اجيبي هنا الهول بارد احسن من المطبخ

نرجس / يلة اخلي بالصينية واجيبه 

عينه على وجهي وشعري / مخصله شعرج مو

نرجس / اي كم خصله بقيته عالسواد لونه بس عجبني اخصله

اي مبين حلو بالعافية

نرجس / الله يعافيك

كعدنا نتعشى ونتفرج مسلسل حبيت ادللة شوي كمت اوكله بيدي

صعب / شنو هاي خفي علية ما اتحمل كل هذا الدلال

همستله / تستاهل اكثر

كملت ورحت صبيت جاي لكيته خدران وديتله بالكوب

صعب / اكعدي لاتبقين رايحه رادة اريدج يمي

نرجس / يله وهاي كعدة هههه

بقينا لساعه عشرة بعدها راح صلى واني رحت للغرفة اريد اسويله مفاجئة شجعت نفسي على هالشي لأن صعب فعلا يستحق كل خير 

رجال بمعنى الكلمة 

اخذت ملابس وفتت للحمام اسبح وطلعت جهزت نفسي طلعت غير شكل فعلا التغيير حلو حسيت نفسيتي غير شكل 

دخل صعب للغرفة وفك عينه علية لأن اول مرة أسويها اتحضرله وبارادتي 

صعب نهائي ممتقربلي بعد الصار بيناتنا لأن وضعه جان ميسمحله 

حظني وباس خدي .. تدرين طالعه حورية اووف شلعتي گلبي

خليت أيدي على صدره .. اسم الله الله لا يجيب شلعان الگلب

صعب بخدر / نرجس

نرجس / هممم

صعب / احبج 

عضيت شفتي وابتسمت وبدلع / ادري

عصرني بحظنه / شمدريج ولج

صحت / هههه الطفل يمعود 

بعدني وأيده على بطني / حبيب أبوه هذا ماعليه شي

نرجس / تصرفاتك وياية كلها حب حتى نظراتك ترى اني مو غشيمة بس اغشم روحي

صعب / ايي ومخليتني اضرب أخماس باسداس اكول هاي شلون افهمها اني اريدها وأحبها

حظنته بلهفة / الله يحفظك الي يروحي انت 

رفع راسه فوك ورجع دنك علية .. خفي علية اشوي شوية اصدميني ههههه

+

صعب / حيال والله على أساس انت متعرف اني متعلقه بيك

صعب / لا ما اعرف هسة سمعت هالاعتراف الخطير من ست نرجس

نرجس / ما معلية كمت تتمسخر علية مراح احجي بعد

صعب / يابة لاتحجين اريد تصرفاتج تثبت هالحب وهسة هنا 

اشرلي عالفراش اني ابتسمت بخجل ....

ـــــــــــــــــــ

لينا / يلة ايهم عفية والله راح نتأخر

ايهم / اجيت شبيج اليوم صعب يرزلني صدك تأخرنا

طلعنا اني وأيهم والجهال ودعنا اهلنا وطلعنا للسيارة مالت صعب برا هاي اشتراها حديثة قبل فترة 

اتفقنا نطلع للشمال على أساس كروبات بس صعب ماقبل كال سيارتي تكفي واني جنت اريد اشوف خالو عمر راجع هو وعائلته فترة ويرجعون

الطريق ايهم يسوق ماقبل يخلي صعب كاله رجلك تتعب 

تونسنا ضحك وسوالف والجهال فرحانين خاصة يوسف وعصومي بس يضحك فدوة حبيبي عمره سبع اشهر جان بحظن نرجس خطية كولش تحبه بعدين اخذته منها لأن يضايقها وهي حامل بطنها كبرانه

خالو عمر اتصل وكال لاتحجزون فندق تعالو يم بيت عمتي بس صعب ماقبل كال مناخذ راحتنا واحنا رايحين اربيل فحجزنا فندق ومناك تواصلت وية خالو وعائلته 

بقينا اسبوع كولش تونسنا بي بيت صعب مرات يطلعون وحدهم واحنا وحد ومرات سوية 

وهناك بالمصيف شفنا مروة وهالمرة طلعت متزوجه واجت سلمت علينا وعرفتنا على زوجها اني سلمت من بعيد مااحبها كولش هسة انتي اجابج لأربيل عابت اي والله

بالفندق بغرفتنا .. 

لينا / شفتها وجه الصخله هي وشعراتها البيض على أساس ستايل

ايهم / منو صخلة

لينا / يووو ايهم ترى اقصد مروة

جان ملتهي وية عصومي يلاعب بي عالجرباية ويوسف بصفهم يلعب بالموبايل

ايهم / هااا لا والله ما انتبهت يمعودة ليش تلحين بنية متزوجه شعليج بيها

لينا / ما احبها

ايهم / هههه ها عصومي والله ماما غيرتها فوول

لينا / اي حبيبي واغار عليك عندك مانع

ايهم / لا يابة والله ما عندي اي اعتراض

ـــــــــــــــــ

نرجس /

مرت شهور حملي تمام واني انتظر دخلت شهري زارتني خالة ام عقيل والبنات حتى عقيل وفدوة اروحلها مجهزة جهاز طفل وجايبته وياها شكد فرحتني حسيت عندي أهل يتفدكوني رغم جنت مجهزة كم مرة نطلع اني وصعب للسوك ونشتري بس هاي حسيتها غير شكل من خالة ام عقيل 

ظلو عدنا توسلت بيها يبقون يباتون عدنا ومن اجى صعب رحب بيهم ونفس كلامي كاله لخالة فبقو عدنا ثاني يوم اجرلهم صعب سيارة ودتهم لبيتهم

وبيوم عصرية هاجمتني آلام الولادة جانت عمتي عدنا هي وخالة ايمان يومية يجون صار أكثر من أسبوع ياخذوني اتمشى لأن طبيبتي كالت احتمال عملية اذا بقى الطفل هاي وضعيته 

وعمتي سوالفها مال جداتنا يومية تاخذني اتمشى مرات خالة ايمان وياية 

جان نهاية شهر العاشر والجو حلو خاصة العصاري 

بقيت ابجي من الالم ماتحملت اعيط واعظ على أيدي خابرو صعب جان أبيت أهله اجى خطية عالسريع واخذوني للمستشفى

وبقيت بالمستشفى اعاني الام الطلوكة حسيت روحي راح اموت واني انتظر يطلع الطفل خمس ساعات يلة كدرت أولد ابني وحبيبي حمودي

صعب / 

كاعدين وننتظر واني ادعي رب العالمين يكومها بالسلامة خايف حيل عليها روحي تعلكت بنرجس إلى درجة من اسمعها تعيط اتمنى أشيل الالم عنها ساعات وهي تعاني اخر شي أخذوها لصالة الولادة

ومن طلعت الممرضة تبشرنا بالولد طلعت فلوس وانطيتها ,, امي وعمتي يباركلي واني من الفرحه بغير عالم 

طلعنها الممرضات يدفعن بيها بكرسي والطفل عمتي ايمان شايلته بحظنها رحت دنكت بسته براسه واذنت بإذنه وراها كملت الإجراءات وطلعنا للبيت

ادحك على نرجس الوجه نومية صار وتتنفس بضعف 

صعب بخوف عليها / يمه شبيها نرجس

امي حاطتها بحظنها مستندة عليها وعمتي كاعدة بصفي بصدر السيارة والطفل بحظنها

ام حذيفه / يمة البنت توها طالعه من ولادة شتريدها تصير حمدالله على سلامتها وكرة عينك بوليدك

صعب / الحمدلله يمة الحمدلله الله يبارك بعمرج ويطوله

نرجس / 

جنت حيل متأذية بالولادة وبالسيارة كوة كاعدة رفعت راسي عيني اجت بعينه صعب كلها خوف من شافني سالني / موجوعه غمضت عيني وفتحتها بالم

الطفل كام يصرخ فدوة حبيبي سبحان الله من صرخ فز گلبي لصرخته حسيته محتاجني هذا ابني عائلتي اني ماعندي أحد بس صعب وابني الله يحفظهم الي

نرجس / خالة خطية يريد يرضع

ايمان / اي يمة خل نوصل البيت وترتاحين ورضعيه براحتج

جانت الساعة وحدة اني بفراشي وابني نايم بكاروكه خالة ايمان وعمتي تعبن ونامن كل وحده بجهة عندي بالغرفة 

وصعب ودتله عمتي فراش بالهول نام

من وصلنا جانت ساعه 10 ونص وكبل فتت للحمام خالة سبحتني كالت حتى يدر صدرج حليب حتى ابني سبحنه ولبسنه ولفنه بحظينته وانطتني ياه حتى ارضعه كدرت ارضعه وحبيبي جان جوعان رضع الصمغه كلها 

ثاني يوم كلهم ابيتنا انجمعوا يباركولي عمو مشتري كبش وذبحو وزعو للجيران فرحة ل محمد اختار صعب يسمي محمد 

البنات هنة جهزن وطبخن الغدا و كولشي كملن للعصر يلة راحوا

مرت الايام واني الحمدلله تحسنت وصرت اكدر وحدي اراعي واهتم بابني حسيت ضافلي لشخصيتي هواية اشياء الأمومة شعور حلو علاقتي بصعب اقوى وبيناتنا تقارب وتفاهم احبه اي احبه واحترمه وتعلمت أخذ نصيحته ورأيه بكولشي وابد ما اطلع عن شوره لأن تعلمت من الدرس الصارلي والحمدلله على كل حال ، صفا ما التقيت بيها هالفترة كلها واحتمال بالمستقبل اشوفها مادام ساكنين نفس المنطقه بس سمعت من لينا تكول علاقتها بزوجها متوترة ويعاملها بقسوة ومبهذل أحوالها واهلها ميقبلون تجي زعلانه ، خليها تستاهل حسبي الله عليها ، اني اعتبرت من الصار لأن الحياة دروس وعبر والشاطر اللي ياخذ منها الزين ويترك الشين

انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم