رواية بنات الملا الفصل الثاني بقلم رغد الموالي
عبد الرحيم جان اصغر اخوانه اصغر اولاد حجي شعبان
المدلل والي كلها تحبه كان من الطلاب المتميزين
وكان حلمه يكمل دراسته
قصة شعره القصيره الموضه السائده بجيل الثمانين
والبنطرون الجارلس والقميص المكفوف الردن كانت موضه جميله في وقتها
كل شغفه دراسه... كتب.... مطالعه....
حجي شعبان جان مايقبل على ابنه واحلامه وانو يهتم بالادب والثقافه والدراسه جانت امنيته يشتغل بالمحل او اي حرفه
يتعلم ويجيب فلوس ويبدي يكون نفسه حاله حال الشباب بهذاك الوقت
لكن هو كان حلمه غيررر
لحد ما صار حرب ايران وهنا صار تجنيد الزامي
ويمكن حتتغير كل أحلام عبد الرحيم!
ولازم الكل تنظم لصفوف الجيش العراقي
بعد سنوات من بداية الحرب
عبد الرحيم حاله حال زملائه بده يجهز بدلته العسكريه حتى يلتحق
بااخر ايام ماقبل الالتحاق جانت غصه بقلبه شلون يفارق اهله واخوانه ويعوف دراسته
عبد المجيب... انت رجال عبد الرحيم وسبع واحنه كلنه رحنه جيش وخدمنه وهسه دورك ودور عبد الرحمن
عبد الرحيم... حاسس مراح ارجع بعد
عبد المجيب... لا لاتحجي هيج اسم الله انت بطل وسبع وكلنه تره فكرنه هيج لما التحقنا اول مره
عبد الرحيم... ديربالك على ابويه عبد المجيب واذا صار عليه شي لاتنسوني صحيح اني ماتزوجت وخلفت وحيصيرون عندي جهال يذكروكم بيه بس اريدكم انتم ماتنسوني
عبد المجيب... اش ولك شنو هالحجي هذا
لزمه من ركبته من الخلف وقرب وجها اله وتكلم وهو عينه بعين اخوه
انت بطل وسبع وراح تروح وترجع بسلامه
عبد الرحيم.... ان شاء الله
ليلتها مانام عبد الرحيم وجه الصبح لما تحضر حتى يلتحق قبل ايد وراس ابوه شعبان
وهنا شعبان كعد وقراله على راسه ايات من القران وشاله الدعاء
ابني هذا الدعاء شيله وياك لاتذبه ابد
عبد الرحيم.... شنو هذا الدعاء حجي
_ هذا دعاء التاج حرز ياابني من كل شر واذيه
اسأل رب العالمين ان يحفظك وترجعلي سالم
عبد الرحيم _ ادعيلي بويه
شعبان.... وهو يمسح على راسه بحب واني مراح انساك بالدعاء وليدي لاانت ولااخوك ولا كل واحد يشيل سلاحه ويدافع عن هالبلد
فتحت باب غرفة عبد المجيب وطلت منها بسعاد
بسعاد... صباح الخير همزين لكيتك كلت بس لا رايح
عبد الرحيم... اي هم يله
بسعاد... لا شلون تطلع لازم تتريك بالاول هذا شلون حچي
عبد الرحيم.... لا مو اخاف اتأخر
بسعاد... لا تتأخر شنو كاعده من وكت هسه ثواني احط القوري على النار بين مايخدر الجاي يكون الريوك صاير شلون راس جبن سويت البارحه الا يخبل
عبد الرحيم... والله راح اشتاق لااكلج الطيب بسعاد
بسعاد... وانت لاتشيل هم اني حضرتلك كم اكله تاخذها وياك
عبد الرحيم... شيبقيها هيج مده تتلف
خلت صينية الريوك كدامهم وكعدو يتريكون
بسعاد... والله شلون كبه بس اني شنو وديتها بيت ام محمد جمدتها عدهم وجبتها البارحه بالليل وخليتها بالفريز وهسه حخليها بالفلين بنص الثلج ماعليهاشي وياها هم كم نوع مرك
شعبان.... يابسعاد تحجين صدك هذا جيش
جيش مو رحله رايح ميخلوه
بسعاد.... لعد شلون سوده عليه يموت من الجوع
شعبان.... لا هم هناك يركبولهم وينطوهم
بسعاد... والله اكل الجيش ما ينوكل عمو متشوف عبد الرحمن من يجي شلون يفقد على اكلنه ويكول اكل الجيش مينوكل
شعبان... هاهيه تكضي بنتي شيسوون يله عبد الرحيم روح وليدي تأخرت
عبد الرحيم... ماشي يابه اودعانكم
شعبان... سالم بالله وليدي كل خطوه بالف سلامه تروح وترجعلي سالم غانم
شال طاسة الماي وراح يوصل عبد الرحيم يمشي عبد الرحيم وهو وراه جان عبد الرحيم شايل جنطه لابسها تك جتف بالظهر وبدلته العسكريه ويمشي وحجي شعبان يقره المعوذات ويمشي وراه
عبد الرحيم... يابه روح هاهيه
شعبان... لا عبود اوصلك خل اطلعك من الفرع اذب وراك طاسة الماي علمود ترجعلي
عبد الرحيم... راجعلك ياب راجعلك وين اروح قابل
شعبان..... نزع نضارته ومسح دموعه توقف عبد الرحيم وقبله من راسه
وتحاضنو وسلم عليه لااخر مره وبعدها مشى كم خطوه رفع ايده يلوح ب مع السلامه وبعدها استدار وراح
حجي شعبان ذب الماي وراه
تطشرت ذرات المي مثل سنين شبان بالحرب!!
ورجع يمشي
جانت بسعاد واكفه ولابسه عباتها وتنتظر
بسعاد.... حجي ليش تعبت نفسك بالمشي ورحت
شعبان.... بسعاد ترسيلي هاي الطاسه ماي خل اذبها بالباب
راحت وترست الطاسه ماي وجابتها
رجع رش الماي بالباب عبد الرحيم وفات جوه من دون كلام
اوقات تصير بحياتنا امور قادره على تغير حياتنا كلياً
سواء للايجابي او السلبي
احيانا مشاعرنا تكون صادقه الخوف القلق التوتر
مو عبث نهائيا مو عبث رغم احنا نحاول احيانا نكذب هذه المشاعر وكأنه احد يكول النا اشششششششش...... !!
بسعاد.... شفت عمي كاعد وايده تسند راسه
تقدمت اله وسألته
شبيك عمو
شعبان.... اول مره هيج ينقبض گلبي يا بسعاد
حاولت ماابين كدام عبد الرحيم بس جان گلبي معصور واحس احد لازم لساني مايخليني اكله لاتروح
بسعاد.... صلي على النبي وكول ياالله ان شاء الله
يجي سالم ومابي شي لاتقلق عمو
شعبان... نفس الشعور قبل لاتموت امهم زهيه ب ايام نفس الاحساس وكتها اختنك واروح اكعد وحدي ابجي يله ارتاح
جنت اشوف زهيه مثل ورده وصارت تذبل بين ايدي م م مااعرف شسويلها
اني الي جنت اداوي هواي ناس عجزت اعرف علة مرتي
بسعاد.... الى رحمة آلله راحت بعد
شعبان... ب أخر فتره ولمن بدت تتعب هواي
لو مشت لو تحركت لو كامت لو كعدت شكلها ذبل
اني ماجنت اتحمل اشوفها هيج
وصتني هواي بعبد الرحيم جان صغير ابن سنه
لما هي تمرضت هو جان شهور ولما ماتت هو جان سنه او اكثر بشويه ومتعلق ب امه هواي
اول فتره يفتقدها ميعرف يحجي بس اعرفه لمن يبجي ويفتر بالبيت من غرفه لغرفه وكأنه مضيع شي
صرت انيمه كل يوم بحضني لحد ماكبر هو وعبد الرحمن ثنينهم صغار
عبد اللطيف هم جان صغير بس يفتهم لمن اكله وليدي امك ماتت وان شاء الله بالجنه هسه يفتهم يعرف مو مثل ذوله الاثنين ميفتهمون ويبجون
بسعاد... وانت ياعمو تحملت كل هالشي زين ليش ماتزوجت
شعبان... من بعد زهيه كلت ماتصيرلي مره غيرها
بسعاد.... هيج جنت تحبها عمو
شعبان.... اصيله ووفيه هي وتستاهل اوفيلها
وكفت وياي بأصعب ضروفي بوكت العوز من جان ماعندي هي وكفت وياي
مرت علينه ايام صعبه حيل صعبه
تزوجنه واحنه صغار اني جان عمري 20 سنه وهي 13 سنه
كبل جان العريس ميشوف عروسته الا بيوم الزفه
بس اني جنت شايفها لزهيه
بسعاد... وين شفتها
شعبان.... شفتها جنت صغير عمري 18 سنه يمكن
وجنت اودي اعشاب ابويه الله يرحمه دزني اودي لبيت حجي عمران الله يرحمهم
المهم رحت وديته وجانت هي جايه لبيت حجي عمران صغيره وحليوه وتخبل باوعتها وضحكتلها
وهي هم ضحكتلي ومشيت حتى اروح مشيت كم خطوه ابتعدت شويه ورديت التفتت عليها لكيتها هم تباوعلي
هنا شكلج طرررت طرررت من الفرح
رفعت راسي للسماء وكلت ياربي هالبنيه هاي اريدها تجعلها من نصيبي كون
المهم وكفت ختلت وكلت الا اعرف اهلها وين
بقيت كاعد بالدربونه انتظرها وره وين يله طلعت طولت واني تأخرت على المحل بس كلت هذا مكاني اليوم ما اتزحزح منا
طلعت ومشت من يمي وكصيبتها تهف وراها جانت صغيره حتى مامتحجبه
وشعرها يخبل مثل لون البرحي
وضليت امشي وراها لحد مافاتت بيتهم وندليت بيتهم
وبيومها رجعت لاابوي طاير من الفرح
اول ماشافني نزل عليه سب وغلط واني على قلبي مثل العسل هو محروك دمه وعصبي واني اباوعله وبالي طاااااايررر عصفور صار ويحوم يم بابهم
ابو شعبان... ولك اليوم البارحه من دزيتك مدكلي وين وليت مدكلييييييي
كل شويه اكول هسه يجي هسه يمر هسه يرجع
وانتظر وماكوووووو
ولك اشو انت مترد وي منو دااحجي
شعبان... شبيك يابه هاي الاعشاب وديتها وهاي اني واجيت بعد ليش ضايج
ابو شعبان.... اسمع ولك اذا مرة ثانيه ادزك وماادري وين تولي اطيح حظك وحظ الخلفتك افتهمتتتت
وبيومها اشتغل مرتااااح وابويه يباوعلي بتك عين وعصبي نار من يمي
حتى وكت رجعنه للبيت المغرب هم ضايج وعصبي ومرات يطلع عصبيته ب امي
أمي الله يرحمها جانت فقيره من اهل الله لو يكلب البيت ابويه على راسها ماترده بكلمه تسكت وتهدي عليه تروح تسويله شربت برتقال بارد تريح اعصابه بي تكعد تمرخله وتهدي عليه تغدي اعصابه مثل الثلج
خو مامثل هاي المكموعه نعيمه لسانها شطوله
المهم جانت اول ليله اليه اسهر من فرحتي وافكر بيها واكول بعد سنتين تكبر واكدر اتزوجها
وبقيت قلق خاف عدها ولد عمام وياخذوها
خاف محجوزه واني بنيت عليها امال
والقلق والتوتر اكلني
قتلت نفسي حتى اعرف اسمها يوميه صرت اروح يم بيتهم ابقه كاعد
جان ابويه ينطينه وكت نروح نرتاح بي وانه هذا الوكت اروح يم بابهم
مرات اغلس العصريه من اشوف ابويه ملتهي وي الشياب والعامل موجود اعوف عليه المحل واطلع
مرتين وتلاثه شفتها وردت احجي وياها بس جانت امها وياها ماكدرت احاجيها ابد
بس عرفت اسمها زهيه لمن صديقتها صاحت عليها وهي التفتت الها
هنا عبالك هلال عيد وهل عليه
المهم مرت هالسنتين واني يوميه اروح بدربونتهم اوكف
يسعاد.... وماجنت تحاجيها ابد؟
شعبان... لاااا ابد ماحاجي وياها بس اشوفها وهاهيه
صار عمرها 13 واني 20 ابويه كلي شعبان انت لازم تتزوج واني كبل كتله ياب اريد بنت حجي محمود
وراحت امي خطبتها الي ولمن ردو موافقين طرررت الحمد لله طلعت ماعدها ولد عم
المهم تزوجتها على مندر ابو نفرين ومخده ولحاف وحصيره
بسعاد.... بسسس؟!!!
شعبان.... بس
كالتلي نجوع سويه ونشبع سويه هاهيه وياك
تزوجت زهيه وعلى فرشتها صارت حامل وره 9 اشهر جابت عبد المجيب رادت تموت بيومها
زهيه... وهي تتعرق وتتكلم بصعوبه اثر الطلق
مسكت ايد شعبان بقوه وتكلمت
شعبان الحكلي حموووووووت مدااتحمل
شسوي احجي شسوي
زهيه... ماادري روح كعد عمي وعمتي خل يجون حموت خل يسوولي جاررره
شعبان... ماشي...... ماشي
رحت كعدت اهلي خبصت البيت بهذيج الفجريه
امي لبست عباتها وراحت للجده هم جتي ولدتها وجابتلي عبد المجيب بس زهيه خربت بيومها
كلت راحت المره من ايدي
جانت صغيره وخفت عليها كلش
بس الجده طمنتني عليها وكالتلي
... يمه لتخاف هاي لان بعدها صغيره وحبلت هسه ترتاح وهي تصحى بس انتم داروها
والله بقيت كاعد يم راسها ايدي على خدي وانتظر زهيه تكعد ماكعد الا وي الظهر
كالتلي شعبان عطشانه حموت عطش
رحت اركض جبتلها ماي ونطيتها امي جابتلها عبد المجيب كالتلها زهيه ابنج حيموت جوع رضعي
هي باوعتلي شفتها خايفه
كتلها يمه نطي ماي وشكر بخاشوكه منا لما تاكل لكمه ينزل الحليب وبعدين تكدر ترضع ابنها
جنت ذابح دجاجه من الدجاجات العدنه وخليت امي تنضفها وطبختها بيومها تشريب يخبل
جبتلها طاسه تشريب وخبز تنور طين وسندت زهيه وبيدي اكلتها
لما اكلتها وشبعت كالت شعبان ارتاحيت جنت حيل جوعانه وعطشانه
شعبان.... وهاي جبتلج تمر واكلي زهيه هواي اكلي خل ابنج يشرب حليب ويربه ويكبر
زهيه... مااعرف ارضعه شلون
شعبان.... امي تعلمج مره مرتين تتعلمين زهيه
زهيه... شسميته
شعبان.... عبد المجيب
زهيه.... الله حيل حلو هذا الاسم
شعبان.... ارتاحي زهيتي ارتاحي
جنت اداريها واخاف عليها مثل متكون بنتي مو مرتي
صار عمر عبد المجيب 5 سنين يله خلفنه عبد الودود
شويه كبرت زهيه وصارت كد الحمل والمسؤوليه وشكد الناس اكلو راسنه بهذاك الوكت بس مااهتميت جنت اخاف على زهيه
خصوصا هي لمن جتي هواي تغير حوشنه يعني ترتب هواي بالحوش
اشوفها تشتغل وتساعد امي يوميه تروح للنهر تجيب ماي وتجي هي وبنات المحله من صبح وترجع تركب وي امي وتشتغل هاي شغل الحوش كله عليها امي كامت متشتغل
الكاع جانت طين مو مثل هسه صبه ناعمه
تكنسها من صبح وترشها ماي خفيف تنيم التراب
وراها تفرشه حصيره وتحط الدوشك مخاديد انت تعرف تخيط وبوكتها بالابره والخيط حتى مكينه ماكو مثل هسه
وبالابره والخيط تسوي وجه مخده
تسوي جرجف للكرويته
تكعد تحوك
اتذكر جانت عدنه طبله خشب هيج مجلغه شكلها تعبان
حاكت الها مثل الجرجف مربع وخلته بشكل حلو وجابت تُنكه ( قاروره فخار) وخلت بيها ورد جوري والله تباوع للطبله ماتعرفها هاي الي جانت شحالها
يوميه تبد بالورد ومهتمه بالمزهريه هاي
جانت عدنه صينيه حلوه حيل جدي جابلنياها صوغه من مكه
اول ماشافتها جلفتها نوب ومسحتها وضمتها للخطار
امي جانت متعرف ياصينيه جتي ييدها حطت بيها جاي وقدمتها واحنه جنه ولد مرات نتفشل كدام ربعنه بس هي لا صرنه نتفاخر لمن يجون لان ترتب هواي
يعني تسوي كليجه جانت وتخبزها بتنور الطين
تسوي حلاوة طحين تخبل
جان قبل ماكو لمن يجي الخطار وزهيه تحط بصينيه كليجتها التخبل والجاي نطير
نطير من الفرح كثر ماتبيض وجهنا كدامهم
وين جانو قبل يسوون كليجه بس الزناكين هي تسويها جانت
مرت السنين والي تزوج تزوج والي خلف خلف وبوكتها اخذت زهيه وطلعنه بيت وحدنه
وشنو من بيت عبالج بيت مثل البيوت
قطعة ارض جانت نصبنه بيها خيمه وكعدنه اول فتره
شعبان... زهيه اني بهذلتج والمفروض انتي مكانج بالقصور
زهيه.... وجودك بحياتي تسوى عندي قصور الدنيا
والخيمه اليوم احنه بيها باجر سكف ونسكف ونكعد
لاتهتم
شعبان.... شلون مااتهم زهيه
زهيه.... اني وياك ونبني غرفه وجهالنه يمنه شعدنه
شعبان... وشلون حتكدرين
علمني ونبني بيتنه سويه
وبديت ابني وهي تساعدني وبنينه غرفه من طين سكفها من سعف وخشب ونايلون
جانت الفرحه مواسعتها بس اني غصه بكلبي شلون اعيشها بهيج غرفه رغم جانو هواي ناس بيوتهم من الطين بس اهلها جان حالهم زين مو هيج
وردت اعيشها بنفس عيشة اهلها بس مكدرت
بنيت الغرفه الثانيه وسويناها مطبخ جانت اول ايام على النار تطبخ وراها جبتلها جوله وحطيتلها تانكي وبي حنفيه تغسل مواعين وميز ترتب عليه المواعين
بقت حوش الترك ياكبره
كمت اطلع اروح للمحل وكلما ارجع الكاهامغيرهشي ومرتبه شي بالبيت
اول مره رحت لكيتها مسويه ساقيه من يم التانكي مكان ماتغسل مواعين للحديقه
ومخليه حصو يم التانكي حتى ماتصير طين من تغسلها للمواعين
سله جايبه ومخليتها يم التانكي وهم فارشه جواها حصو من تغسل المواعين تخليها بيها بين ماتنشف
جايبه جرجف مخليته على الميز ومسفطه عليه المواعين ورتبته للمطبخ بلي موجود عدها تباوعيه صحيح الشي بي بسيط بس هي بنضافتها وترتيبها يعجبج تفرشين بي وتنامين
جان ماعدنه بالغرفه غير المدات نفرشها نام عليها بالليل وبالنهار خاف يجينه احد نكعده عليها
جانت مفروشه حصيره ومرتبه كلش كلش مرتبه
لما جنت افوت للبيت شبيه تعب يروح تتلكاني بوجهها اليضحك ورصعاتها التضحك وياها
وتكلي هله
اني دكلي هله لو يهل عليه هلال عيد
تصب الغده ونكعد ونتغده وماتشكي من شي كلشي ماتحجي ماتطلب ماتعبتني ابد
وكت انام الظهريه وحاره يغلبني التعب واغفى ولمن احس على نسمة هوى بارده الكاها كاعده يمي وتهفي بالمهفه وتبتسم وتكلي هلا
تسوي اكل هلي الله قاسمه
مرت عليه ايام مااكدر اتسوك ماعندي
وخلص المسواك عدنه رجعت وي الظهر دايخ بزماني وكل ظني مركبه شي للغده من الباقي
رجعت لكيت جدر يفور على النار بره بالحوش
كتلها زهيه ليش هنا تركبين ليش مو جوه
كالت حتى لاعبالهم الجيران ماعدنه اكل
قبل شويه جانت يمنه جارتنا ولما طلعت كالت ماشفتج مخليه جدر على النار ماعدكم طبخ شنو اني كمت حطيت الجدر هنا وكلت من دخان يعرفون دنطبخ
شطت بيومها من القهر رحت طلعت دخت وين اروح شسوي
ياباب ادكها وشكللهم
مامني غير كعدت بهذيج الظهريه على حجاره ولازم راسي بيدي الاثنين والله بوكتها الدمعه وكفت بعيني
ودمعة الرجال صعبه
رفعت راسي للسماء كلت
يارب لاتفشلني كدامها مالي عين اباوع بوجهها صرت استحي منها
ياربي حلها من يمك شسوي ماادري
وهناك وعبالك واحد كلي كوم شعبان وامشي من هالدربونه ومشيت لكيت عجوز كاعده بالباب ولازمه كلياتها متوجعه
كتلها حجيه شبيج
كالت يمه وجع بكليتي وروحي لايبه حتى نومة الظهر نحرمت منها مدااكدر انام
والله تسائلت بيني وبين نفسي ظهريه وحاره والناس كلها تنام الدرابين فارغه تصوصي هاي شكعدها هنا ليش بالباب
كتلها خاله ابشري هسه اجيبلج علاج واجي
رحت للمحل وجبتلها علاج ورجعت
شعبان... هذه حلبه فوريها مثل الجاي حجيه وشربي منها
انتي عندج رمل خشن لو حصى وهيج مخليج متوجعه هسه من تشربي ترتاحين
توجهت حتى اروح كالت وليدي هذا حقك طلعت فلوس داتنطيني
بس ماقبلت اخذها شفتها مره جبيره شاخذمنها
بس حلفتني بالحسين اخذ
واخذت نطتني فوك فلوسي
بوجهي رحت للسوك تسوكت هالاكدر عليه بفلوسها ورجعت فرحان
لكيتها نايمه هي والجهال واعرفهم مماكلين شي
كعدت اني اسويلهم الغدا
وكعدتهم شهكو الجهال من شافو الاكل بس زهيه عينها تسأل منين جبت هالمسواك منين الفلوس بدون ماتسأل جاوبتها الله رزقني
وكعدت تاكل
جانت نفسها عزيزه كلش حتى لنفسها ماتطلب شي جنت
اني اروح اجيبلها اكصلها قطعه واكلها خيطيها دشداشه حاب اشوفها عليج
اهلها هم ساعدوها ماقصرو وياها الحياة وكفت بينه فتره بس ندفعت ومشت ذبيت حيلي على الشغل وياها تعلمت اكتب حجابات جنت اعرف اقره واكتب
وجان اكو شيخ جبير معروف بالولايه ويدز عليه اكتبله طلاسم ايات من القران
جنت اكتبها بقلم الزعفران
لما بيوم من الايام كلي شعبان انت خوش ولد وتستاهل كل خير
حعلمك هالشغله وهم كلش تضبط وي شغلتك انت عطار
علمني وصرت اعرف بالحجابات بالخيره وصرت اشتغل هم
بعد ما مات الشيخ الناس كامت تجي لعندي
وصرت منا ومنا اشتغل العيشه تحسنت جمعت فلوس
فلشنه الغرف وبنيتها من جديد طابوك وصبه ناعمه وتانكي ماي فوك وماي اسست يعني ارحم واارتب بهواي من ماجان حتى غرفه للجهال بنيت
صرت احس بالثقه كدامها كون سكنتها بيت يليق بيها
كل هذا الحجي واني عندي ولدي هذول عدا عبد الرحيم
البنات ماجانو يعيشولها تحبل بس يوكع حملها
وشكد جانت تتمنى تجيها بنيه بس مااجت
الحياة مشت بينه وعشنه على حب الله
بعدها حملت بعبد الرحيم وجابته لعبد الرحيم جان صغير وضعيف بس سلبلها كل عقلها وكأنه اول طفل الها
دللته دلال بس على اثرها تمرضت صارت تدوخ هواي
وتتعب من اقل شغل وديتها على حكيم وصفولنه دكتور بغداد رحنه بس ماكو فايده
زهيه صارت تذبل مثل الورده الي تودع ربيعها
لحد ما صارت ماتكدر تمشي رجليها ماتحملها
وكعت زهيه وصارت طريحه بالفراش لحد ما رب العالمين اخذ امانته
ماتت وهي صغيره شابه بعدها وعافتلي هالولد هذول وعاهدت نفسي ماتصيرلي مره غير زهيه
وكتله ياربي نحرمت منها بالدنيا اريدها بالاخره زوجه الي
وبقيت عايش على ذكراها ومامر يوم ونسيتها
ولا راح انساها
بسعاد.... حبك لزهيه شي عظيم عمو ونادر تلكه واحد هيج يحب ويوافي
شعبان.... الحب شي عظيم يابنتي لهسبب اريدج تحبين عبد المجيب وتداري مثلماجانت زهيه تحبني وتداريني عبد المجيب خوش ولد ويستاهل مره تحبه اني من كل گلبي راضي عليه
بسعاد.... الله يخليك النه ولايحرمنه منك عمو
المشاعر لما تكون حقيقيه ماتكدر تمحيها لا السنين ولا البعد ولا حتى الموت
المشاعر لما تنولد يمكن تنولد بدون مقدمات بدون استأذان لهسبب يكون بصعوبه او محال تنمحي
احيانا المشاعر تكون ألم ويمكن نبذل كل جهدنا حتى نمحيها وي ماتبرد هذه المشاعر بتكون اخذت كل طاقتنه وروحنا الحلوه ويمكن صحتنا!!
لهسبب لازم نعرف لمنو نعطي هذه المشاعر حتى ماتكون ألم بيوم من الأيام
......
بسعاد.... مرت الايام وعبد الرحمن نزل من دوامه جنت انتظره واعرفه اليوم يجي سويت التبسي الي هو يحبه ولما اجه الحجي وكل الجهال جانو ينتظروه
وبهوسه وحده بصوتهم
هلا بعمي هلا
هلا بعمي هلا
الضحكه تارسه وجهه هلو ياب شلونكم
شعبان.... طولت عليه ياوليدي هالمره طمني شلونك انت
عبد الرحمن.... زين اني زين يابه كلي انت شلونك
صحتك؟
شعبان... زين اني زين طمني اخوك عبد الرحيم متعرف عنه شي ماشفته
عبد الرحمن.... ههه لا يابه هو بمكان واني بمكان منتشاوف
شعبان.... تمنيت انت ويا فد مكان علمود واحد على الثاني يطمني
عبد الرحمن.... لاتخاف يابه عبد الرحيم ذيب
دكوم بدل وارتاح وليدي ام جواهر شلون سوتلك تبسي
عبد الرحمن... باوعلها بمنونيه... اشكرج ياذهب متقصرين والله متتصورين شصاير بمعدتي من اكل الجيش هناك خبصتهم خبص مرت اخويه ماكو وحده مثلها تعرف تركب
-بسعاد... لاتبالغ عبد الرحمن
عبد الرحمن... لا هاي حقيقه
بسعاد... يله حصبلك الغداء بين ما تغير هدومك
فرشت السفره على طول الطرمه وصبيت الغداء لكل العاىله وكلها التمت على السفره وترأسها حجي شعبان باوع كلنه ملتمين رفع ايده للدعاء وكال
الله يديمها لهل اللمه الحلوه هاي ولايحرمنه من شوفة هالوجوه
يله يابه تغدو
الايام صارت تمر بسرعه قلق حجي شعبان على عبد الرحيم مابطل ابد
كل يوم يكعد بالباب ولما يشوف عسكري يسأله شفت وليدي؟
لحد مااجه ابن جيرانه وسلم عليه
الله يساعدك حجييي
... هله هله وليدي شلونك
... الحمد لله زين وهاي جيتي من الجيش ردت اطمنك على عبد الرحيم
شعبان... بفرحه... انت جنت وياه
.... اي وياه جنت سويه رحنه ولزمنه واجب سويه وبلغني اوصلك سلامي ويكول اني بخير لاتقلق
شعبان.... روح الله يبشرك بالخير وليدي
... تآمرني بشي حجي؟
... مايأمر عليك ضالم
ماشفت الا اجه ابن عبد الودود
عمه عمه
بسعاد... كول مصطفى شنو
... جدو شعبان يكول جيبي الفلوس مخليها جوه المخده مالته
بسعاد... اي صار ابقه انتظرني انت
فتت للغرفه وجبت الفلوس ودزيتها بيد مصطفى
شويه وجا حجي شعبان وبيده جيس جكليت
شعبان... تعالووو تعالوووو اخذو جكليت حلال المشاكل
بسعاد... بمناسبة شنو هاي حجي
شعبان.... وصلتني اخبار حلوه عن وليدي بخير هو ويسلم عليكم كلكم
بسعاد.... ايييييي هاي الاخبار الي تسر الخاطر
شعبان... روحي جواهر وزعي جكليت ابو الحسن للجيران وان سألوج كليلهم سمعنه اخبار حلوه عن عمي
جواهر... اي جدو
جواهر والجهال كلها راحت سويه توزع الجكليت
والحجي فات لغرفته يصلي شكر لله
جانت غرفته مكان للعزله وللتعبد نظيفه داىما ومرتبه بيها القران وكتب الادعيه وسجادة الصلاة
بهذه الاثناء اجه عبد اللطيف اول مافات للبيت صاح بسعاد
بسعاد... كول عبد شنو
عبد اللطيف... بسعاد فدوه اروحلج شهاب عازمه باجر على الغداء واريد منج غده مرتب كون تبيضين وجهي
بسعاد... اي بعيني بس ليش ماكلت لجميله
عبد اللطيف... حكلها اني بس انتي اريد عليج اعتمد جميله مااكدر اعتمد عليها بهيج امور اريد ابيض وجهي كدام شهاب
بسعاد.... لازم مهم كلش عندك
عبد اللطيف.... صديقي اني ويا من الروح وحده وشغله ثانيه اهله ناس معدله واهل خير من اروحلهم مايخلون شي مايحطونه كدامي ناس الله رازقها واحنه مو اقل منهم اريد ابيض وجهي
بسعاد... اي فهمت عليك كللها انت لجميله وخل هي تجي دكلي علساس اني ماعندي خبر علمود ماتضوج
عبد اللطيف.... فدوه اروح لعقلج الذهب اني والله اني مافكرت بيها وكلت يمكن تنزعج
بسعاد.... ولاني مره واعرف النسوان شلون تفكر كتلك
ثاني يوم اجه شهاب على الغداء اني وجميله وكفنه وره شباك المطبخ نشووف شهاب ابن العائله المعروفه بالمنطقه والي ناس كلها تهابها وتحترمها
فات شهاب للبيت ويا عبد اللطيف
جميله... بسم الله ماشاء الله هذا شهاب شكد حجو عنهم وكالو ضخام وطوال بس متوقعت هيج
بسعاد.... ولا اني حتى مايشبه ابوه شهاب يشبه خاله لميعه الله يرحمها مثلها اشكراني وشعر بني
جميله.... اخوته هم يشبهوه
بسعاد... لا مو كلهم اني شايفتهم بالصغر ماشفتهم من كبرو
فتح الباب عبد اللطيف وكال ها محضرين الاكل؟
بسعاد.... اي محضرين الاكل هسه ثواني ويكون جاهز
وبسرعتنه صبينه صينية الغداء ورتبناها وداخذها عبد اللطيف
بمرور الايام توضح صداقة شهاب بعبد اللطيف جانو اخوان مو اصدقاء ليل نهار سويه كعداتهم طلعاتهم اسرارهم
لحد مابيوم بالليل اجه عبد اللطيف كال سوو درب صديقي بايت عدنه
شعبان... ليش شعنده شهاب يمنه
عبد اللطيف.... صايره مشكله بالبيت وعايف اهله وطالع حجي خلي يرتاح هنا الليله واني هم احجي وياه كم كلمه
شعبان.... لاتورطنه وي شيخ ذياب اذا وراه مصيبه كول احجييييي
عبد اللطيف.... ماكو شي حجي بس كتلك صايره مشكله باوع لجميله... جميله سويلنه جاي
وراح للاستقبال بقه الحجي يصفك ايد ب ايد ويحجي
هسه يورطنه وي شيخ نعمان احنه ماناقصين طلايب
شيخ نعمان صحيح الناس توده بس الله يستركم من شره
بسعاد... كول يالله حجي جوز الولد مخنوك وجا يغير جو يمنه
حجي شعبان... يغير جو!!! ليش شعدنه ويغير جو هنا هااااا؟ كوم نسوان بيتي وجهال بس شحجي الضيف ميصير ينصد بوجهاا خل افوت لبيتي(لغرفتي) انام
بهذه الاثناء اجت جميله.... وحجت بهمس وتأشرلي بمعنى تعالي وتتلفت يمنه ويسره كأنو تريد دكول شي
بسعاد... هاشكو احجي
جميله.... رحت اوديلهم الجاي قبل لاادك الباب سمعتهم يحجون
باين شهاب رايد وحده واهله ماقابلين
بسعاد.... شلون تأكدتي
جميله.... سمعته لشهاب يكله لعبد اللطيف... احبها اني ولو مو ابوي يوكف بطريقي اخذها اخذها
البنيه كبرت كبال عيني اول ماتصير يكلي مو من مقامنه
بسعاد... هاااا لهذا السبب هو عايف بيت اهله
جميله... اي مبين
بسعاد.... لاتبينين كدام عبد اللطيف انتي عرفتي شي ابد تره يكلب الدنيا على راسج
جميله... لا شلون احجي
ليله مرت مابين الي حزين والي فرحان
كعدت ب 7 ونصف ك العاده يوميه اكعد هيج وقت وادري حجي شعبان كاعد من صلاة الفجر
رحت بسرعه خليت الجاي على النار لكيت الحجي بالطرمه
بسعاد... صباح الخير عمو
شعبان.... صباح النور هلا بنيتي
بسعاد.... من صبح ك العاده كاعد عمو مو
شعبان.... اي والله
بسعاد.... هسه يصير الجاي واجيب الريوك
اكلك عمو عبد اللطيف وصديقه اسويلهم ريوك
شعبان... لا توه الولد نام
بسعاد... ب استغراب... ليش شلون عرفت
شعبان.... جنت دااصلي بالطرمه هنا تعرفيني احب اصلي صلاة الفجر جوه السمه لكيته كاعد يمي مخلي ايده على خده ويباوعلي كتله خير وليدي شبيك
كال عمي اني تايه وماادري شسوي
كول شبيك
شهاب... اني كلبي هاوي بنت ابو سميه ابو المخضر وردتها على سنة الله ورسوله كتله ياب اريدها اريد انزوجها يكلي هاي مو من ثوبنه وماتناسبنه
شعبان... ابو سميه خوش رجال وبناته خيرت البنات بالولايه
شهاب.... وردتها ولان فقره وعلى كد حالهم يكلي ابويه تريد تفشلني وي الناس انت اني اروح واطلب ايد بنت البگال
شعبان.... وشبي البگال معقوله هذا ابوك شهاب؟
شهاب.... ابوي للناس ضاهره شي وبالباطن شي ثاني عمي يدور ناس حسب ونسب وفلوس وجاه اخوتي كلهم مثله وانه ردتها للبنيه ومدايقبل
شعبان.... ان جان مايقبل هاهيه وليدي انت خو ماتتزوج وحده اهلك ميردوها تعذبها وتتعذب وياها
شهاب.... والله اموت لو ماخذيتها روحي بيها زهره الي ومتصير لغيري
شعبان... ياب استهدي برحمانك وكول يالله ابوك مايقبل
شهاب.... حجي اروحلك فدوه احجي وياه هو يستحي منك اني اعرفه ويحترمك احجي وياه انت وشيخ ابراهيم المؤذن هم يستحي منه الله عليك عمي ابوس ايدك عمي رايدها والله روحي بيها والله
خايف لاينطوها لغيري خايف تروح مني زهره اموت روحي والله
بسعاد.... رجال يبجي عمو معقوله صار يبجي؟!!!!
شعبان.... اي وكع على ايدي يبجي ويتوسل
كتله شهاب وليدي روح نام وارتاح واني باجر احجي وي ابوك
بسعاد.... وانت حتحجي وياه عمو؟
شعبان.... احجي وياه خطيه هالولد
طلعت ريحة الجاي بسعاد ريوكج صار غده
ضحكت ورحت بسرعتي للمطبخ
عمي شعبان بنفس اليوم حجه وي شيخ ذياب
شيخ ذياب.... انه كتله تاخذلك بنت عمك والبنيه مسيومه لشهاب وكل الديره تعرف هو منو ويجي يدوس على كلمتيييييييي
حجي شعبان... كول يالله شيخ هو گلبه هاويها للبنيه ورايدها
شيخ ذياب.... والله ولو تبقى فد هي مااخطبها يحلمممم كله يحلممم وانت بعدين عتبي وياك حجي شعبان تخلي بيتك رجال غريب وانت عندك نسوان اشوفها ماتليق
بيومها اجه عمي شعبان وجهها مليان غضب عقد حاجبه بغضب على عبد اللطيف وكال
شهاب مايبقه بيتي عندي نسوان هناااااا
عبد اللطيف... يابه وين يبات بالشارع؟
حجي شعبان.... مو شغلتي هاااااي الناس شدكوووووووول عليه شدكووووووول
حينما تنغلق جميع الابواب في وجهك تذكر ان هنالك باب لاتغلق
شكرا لزيارتكم عالم روايات سكيرهوم
