رواية الرجل لاينسى حبه الأول الفصل الثاني بقلم سهير رائد
ارجع ليومي العادي
مانمت للصبح غفيت واني اعيد شريط الذكريات التعيس والمقرف
كعدتني امي ساعة 9الصبح
بشوره يمه كعدي .
طبعا اني اسمي بشائر
بس نادرا يصيحولي بشائر
بشوره
طبعا اني اسمي بشائر
بس نادرا يصيحولي بشائر
بشوره
(بشيره )هذا اكره اسم اسمعه واموت منه
بشيور هذا جهاد اذا ينصب عليه يضوجني
الطلاب يصيحولي ست بشرى
البعض يصيحلي بشاشه ؟! ماعرف شنو الرابط بس المهم بيه حرف بشبش هههه
راسي يوجعني نفسي تلعب دايخة مسطوره من ذكريات طايح حظها .
اي يمه كاعده .
امي . اليوم مرت اخوج جنها تجيب خطيه تلوب الليل كله وهسة جااي تلم بغراضها تروح لااهلها تريد .
يا خطيه امبينه البارحه مالها خلك خل اغسل وجهي واصعد الهم اساعدها .
غسلت وصعدت . لكيتها تسبح .
كعدت فطومه وحسن من النوم بدلت الهم لميت غرفهم .
طلعت من الحمام خطية كوه تجر النفس . هاا ام فاطمه اليوم راح يشرف البيك .
ايي بشوره جنها تقربت ساعتي
والله ولانمت ولاكدرت ارتاح يمكن طلوك .
بشنو اساعدج . جنطج غراضج .
لا كلشي جاهز وانتي بعد غيرتي للجهال خل اوديهم يم البنات واخلي امي تاخذني للدكتورة العصر بس منتظرة غسان يرجع راح بشغلة .
الله يسهل عليج راح انزل جنطج واريك الجهال .
نزلت الجنط واخذت الكتاكيت للمطبخ ريكتهم .
هيا نزلت وكعدت بالمطبخ يمنه وامي جانت تحضر المطبك
كمت اساعدها اجه غسان فرحان وقلقان عليها
هااا اليوم ناويتها تولدين
امي:يا يمة ولك جا شلون تأجلها
غسان: اي هيا الليله كلة تون اكلها نامي والله يسهل
امي:حقك انت لو ربي يشوفك بس خمس دقايق من آلالم الطلوك شلون تروح وترجع
يمكن ذبيت روحك بالشط
غسان :شالالجنط يلا ولكم خل اوديكم لبيت جدكم قبل لامي تحبلني واتجيبني
ضحكنا عليه كلنة
وصعدناهم بالسيارة وراحوا.
خطيه اباوع عليها شلون تعبانه الله يسهل عليها.
هيا متعودة تروح لااهله ومن تطلك امي تروح وياها هيا وامها .
هيا ومرت جهاد اقارب امي والحمد لله والشكر كلش حبابات ومؤدبات ونحبهن ويحبنه وابد مافد من تزوجن لليوم صارت سالفه او حجايه او اي شي يخشن الگلوب . مرات امي تحجي عليهن يعنيي العمة لازم تنتقد الجنة باي شكل من الاشكال
شكد اضوج كلبي يوجعني حتى لو انتقاد بسيط الها مااقبل اكلها لا تحجين حرام عليج تسكت .
واول ماتزوجوا ابوي عزل جهاد بيت وحدة وغسان كال مانشيل وياكم نعيش
واله الفوك كامل ومكمل سواه ابوي حتى مطبخ عازل بس هما يتغدون ويانه وعشاهم وريوكهم بالكيف ويانه فوك براحتهم .
جان ماعندي شي منظفه بليل بس اعزل المطبخ واساعد امي دخلت مرت جهاد وجهالها .
جهزنا الغدا كمل واجه ابوي بالوحدة وتغدينه وشوية اجه جهاد . ناكل ونسولف ونضحك .
جهاد ولكم ياعالم اني ما موتتني غير بشيور وين يروح الاكل
بشائر . اله اماكن خاصه يروح الها
جهاد . ولج تاكلين كومه وضعيفة كلش .
امي . اي والله هسة لو شوية لحيمه تربرب مثل البنات
والله جسمي عاجبني ويخبل لاتخلون عينكم عليه .
صدك اني شكد اكل يعني حتى بالعشاء اكل تمن وخبز
وحلويات وابد مااسمن ابد هذا عودي . وكلها تتحسد بيه هههه .
يعني اني اذا ما اشبع يمكن اكوم ابجي بهذا عمري ..خلصنه الغداء بنفس الجدال اكل بشائر وين يروح حتى ابوي يكلي اخاف عليج لايطكج سكر ضغط من عيونهم .
وكامت مرت جهاد تغسل المواعين وتنظف وياي بعد السمك اكيد غسله محترمه للبيت وابخرة وافتح الشبابيك .
سويت جاي وصبيت ووزعت ودخلت اسبح ومن طلعت الكل نايم . ابوي وجهاد يسولفون
ابوي . عمك غزاي خابرني وسولفت وياااه كتله اجينة للولايه حتى نطلع جوازت لبشورة وامها
جان يكلي غير خضر هو بالجوازات جا ماشفتوا؟
جهاد . ايي صدك هم سامع اني رتبتة رائد بالجوازت وكلشي بيدة ؟
ابوي والله ولاندري ولاشفته ومامرينه عليه ابد وتفاجئت من كلام عمك
جهاد . يجوز مو دوامه هما اهل الجوازت دوامهم 3في3
ابوي . يجوز . بس اني ماريد اشوفه ونمر عليه خاف بشوره تضوج لو من تشوفه ترجع تتمرض مثل قبل .
جهاد . حجي ماضي وانتهى وصار فوك 11سنه مدري12 وبشائر هسة كبرت وصارت معلمة وحياتها سعيدة وهيا سباعية تجاوزت كلشي لاتذكروها بشي راح وانتهى . وبلكي يساعدكم يسهل جواز امي مو بيه مشكلة.
ولك هنا المشكلة خاف امك تشوفه وتعرس علينه وتبقى ادردم .ويجوز تهفه نعال كدام العالم وشيفضج ياطلابه
جهاد .والله تسويها امي وتستاهل ادردم عليك ههههه .
ايا جلب ردتك عون طلعت فرعون .
..
رحت للغرفة الثانية مشطت وكلامهم بالي خطيه عبالهم ماادري مايدرون اني الماضي احس يطحن بكلبي من شفت خضر لليوم قرفانه حتى من روحي ومن الماضي ومن كلشي .
حتى اختنكت الغرفة افترت بيه لميت نفسي وتمددت خايفة مدري من شنو
....................
عودة للماضي
كام خضر يسولف وياي يومية
كمت اسولف وياه لان اضوج اكعد جوه من يجي اكيف حتى نسولف
ووعدني بهواي وعود ارجع للمدرسة كتله هدومي عند الخياطة .
كال اخلي ابتهال تجيبهن لو امي وترجعين داومين واني هم عندي سادس وصعب واريدج ماتضوجيني ؟
شمسوية اني واضوجك ؟
يعني مالج علاقه باامي وحجيها وجدتي شنو الي يحجنه اريدج تتعلمين ماتسمعين ولا تهتمين لحجيهن اذا صاحن او عصبن عليج عجايز خرفانة الله وكيلج
وانتي ابتهال يمج شتردين تطلبين منها هيا بدالي اذا طلعت وي ابوي لو للمدرسة كلشي تسويلج
وهم هنا شيكللج وشيردن سوي بس هااااااا ديربالج تسولفين على سوالفنه بالفراش ؟
فزيت لا لا والله العظيم والعباس كلشي مااحجي عيب والله عيب بس اني اريد اشوف امي .
خضر . يكولون ورا سبعة ايام العرس يلا ترحين من تجي اختي شيماء ..
خوش همزين عليك الله اروح يعني الهم
خضر .اي والله ترحين شبيج بس تخلص السبعة ايام ترحين
عرس وناس طابه طالعه وكلها ملتهية ونسوان وهلاهل ودعوات بالولد الصالح لخضر .
يوم السابع شيماء اجت من الصبح واني خضر كلي بدلي اخذج لااهلج لبست تنورة وقميص وربطة واني اريد اطلع اجت ام خضر كالت تلبسين عباية بعد عرستي لبستني العباية جانت جبيرة عليه واني جنت ستوني ضابطة الربطة جنت اخليها على شعري واطيح . طلعنه من الباب لحد باب بيت اهلي هو يحذرني مااحجي عن إي شي .
اخر شي وكفني
بشورة بعد ما اذكرج كلشي لاتحجين شنو اليصير بالغرفة
لا والعباس ماحجي اخاف من ابوي
خضر :اي عفيه عمي يموتج ويذبحج
دخلت على اهلي امي وابوي حيل متغيرين حيل ابوي وجها اسود وامي هم عبالك جنازة داخله عليهم البجي اللي يبجونه خلوني ابجي وياهم .
جانوا محضرين غدا
محد سألني على الغرفة ولا شلون انتي عايشة وي خضر
اخاف من ابوي خاف يكول عيب
بس ابوي مو ذاك ابوي الحلو صاير مو اسمر صاير اسود وحلكه مورم من الجكاير لان الجكارة ما نزلت من ايدة وايدة ترجف
تغدينه اني وخضر ورجعنه بسرعة . وشيماء هم رجعت .
بس شيماء متغيرة كلش ..
بعد ماخلص العرس والسبعة والهوسة هنا كلشي اختلاف من الجدة والعمه .
من انزل الصبح جان الحجي وياي أختلف يزمخن بيه روحي سبحي ام جيفه امج الخايسة مامعلمتج تسبحين الصبح ؟
اكلهن نظيفه اترزل ادخل الحمام .
يكومني ويكعدني بكلام موحلو وبس يشوفن جدي وعمي وخضر يسكتن .
انتظرت خضر كتله مانزل الا انت تنزل عمتي وجدتي يصيحن عليه .
كال اني انزل وياج هو يكعد من الصبح يقراء بعدها المدارس الها اسبوع يلا تبدي بس هو يقراء ويقراء هيج يومة .
خلصنه ريوك وگوة اغسل امواعين ماعرف اي شي وايدي توجعني من الجلف مامتعلمه خطيه ابتهال توكف يمي وتغسلهن وتسولف وتضحك ويايه يمكن ابتهال هيا اللي تختلف بهذا البيت .
البيت يخنك اكره شي بيه هو المغرب والليل والكلوبات الصفر البيت يضوج وكأبه كلش .
الاعرفة جدي وعمي عدهم كومة فلوس بس البيت كلش قديم يلعب النفس لان نسوانهم مايقبلن كلشي يسون خاف ننحسد !.
جانت ايامي وي خضر عادية كلش نام بنفس الفراش واني تعودت عليه وهو حتى ما يحضني ولايبوسني مثل اول ايام لا وشي مرتاحه منه يعني سوالف وحجي عادي .
فد مرة هو بليل يسوي البردة شوية يدنيها ويفتح الشباك .بليل كلش
شوية ونزع تراكه وكلي نزعي وغطاني وكام يبوس بيه وعضني حيل من صدري صرخت وكمت ابجي شوية وخر وكال البسي . اني بقيت ابجي للصبح .
ثاني يوم هم كررها بس انتبهت ظلمة والضوة من السطح عاكس شفت خيال اسود من الشباك ؟!
وصرخت هذا شنو طنطل لو حرامي
سددد حلكي وعشت برعب وخوف وماكدرت انام
واالله شفت شي
وهو يكول لا تتخيلين
ويرجع بليل يفتح الشباك ويسوي البردة
هو يباوع عليه وهم كرر الشغلة بس ننزع ملابسنا ويبقى يعض بجسمي حتى اصرخ وابجي واضرب بية وجنت ابجي منه لان يعضني حيل حتى اصرخ .وهو يهز بروحة ويحرك الجرباية ويسوي حركات بحسمة ونفسي تلعب .
انتبهت وخفت من الشباك .
ثالث يوم اجه عمي وجان ضايج وتعارك وي عمتي ام خضر وصعد صبغ شباك غرفتنا !!
بلون ابيض سمعته يكلها انتي لو تستحين ما تباوعين ع ابنج ومرته .
تكله منو گلك هاي العاهرة بشيره!
زمخ بيها انجبي ابنج اجه كلي ومستحي وخجلان من فعلتج الوصخة
ادخلت الجدة كالتلة اني كتلها نريد نشوف بشيره تخلي يدنه الها هل الصلفه هاااي .
عمي . دخيلك ربي انتن ماتخافن من الله ولجن هاااي بشائر جاهلة منيلها الصلافه والعهر ولجن هاي بنت اخوي شلون هيج تحجن عليها.
الجدة لاتخاف عليها هاااي بت امها الهيج فعلها والهيج تركها ؟
عمي صار عصبي ويحجي ويهدد وكلهن لاحد تندك وي بشائر ها واكللجن ترا البنية اني وعدت اخوي تدرس وتكمل حالها حال البنات وتكمل ثالث وتبطل لو منا لمن تحبل تبطل هيج اتفقنا وي اخوي .
ومن ساعة ماعمي حجة هيج وياهن
واني شفت النجوم بعز الظهر
يندك الباب الغرفة بالخمسة الصبح من عمتي كومي ساعديني بالخبز ؟
خضر يمه يعني انتي تخبزين بالخمسة ونص شعندج وبشائر ماتعرف تخبز .
جرتني من ايدي والنعاس بعيوني
تتعلم جا احنه مو تعلمنه بهيج عمر
وابوك وجدك شياكلون خبز بارد .
خضر امرنا لله روحي بشائر وياها تتعلمين خبز حارررر .
ام خضر مالك شغل انت زلمه لاتدخل يمه بسوالف النسوان (ولاتغشمر) عيارة النسوان عيلك بقرايتك ..
نزلت سحل وهيا تكلي ليش نايمه بثوبج
جا بيش انام
ام خضر جا رجال نايم يم عروسته بثوبها شني مايتندالج ماتخليلنه مو امج معلمتج !
لا جا هو يكول مو يومية احسن .
لا هااي سوالف امج عود مال حضريات كحاب حتى بالنومة يتحكمن بالزلم !.
هيا تشنك وتحجي وتدردم بكلام مخجل ويضوج
لزمت الها القبغ واني ارجف جعت .
الا تخبزين خبز وحدة عوجة وكامت تحجي
خبز الثانية الا تدخلين ايدج بالتنور خليها وحركت روحي انجويت شبعت بجي .
اجت ابتهال تفرك بعيونها يمه دخيلك ربي شنو شصاير المجمدة متروسة خبز والبارحة خابزين .
ام خضر . ابوج وجدج يحبون الخبزة الحارة .
ابتهال . وليش ماكعدتيني ليش جايبه بشائر شتعرف صدك جذب .
ام خضر صمي حلكج شني غير اعلمها جا نايمه للظهاري وبعد يومين اداوم تتعلم تكعد تخبز يلا تداوم !
ابتهال جيبي بشائر اني اخبز وروحي صعدي بدلي ثوبج احترك .
بقيت واكفه خايفة من عمتي واجت الجدة كالت اي التتعلم تنجوي مرة واثنين ماعليها شي .
خضر اجه وراهن اي بس مو تتعلم بالخمسة الصبح شنو ثكنه عسكري يلا صعدي .جررني من ايدي
صعدت ركض ماصدكت صاحني دخلت للغرفة ابجي وابجي ايدي محتركه حركه متت من البجي هو جاب شاش ولفاها. ويكلي بعد اليكلج تعاي خبزي لاتخبزين .
اخاف يكتلني.
خضر . لاتخافين اني احجي وي ابوي وجدي
ماخليهن يقربنج من التنور
كام يبوس بيدي لاتبجي ولج والله قهرتيني
اريد امي .
خضر بس ايدج تصير زينة اوديج الهم
لان هسه ايدج مجوية وعيب منهم شيگول عمي علينة
صدكته وأمنت بكلامة لان هو يوكفلي من امه وجدته يحجن عليه
يوكف وميخاف منهن
بنفس اليوم الظهر اجت شيماء .
وتبجي وتشكي تكول جهاد مايحبها
.
والحجي جان اشكال بس هيا كالت عمتي وعمي والبنات كلش زينات وياي بس جهاد راح لبغداد وكلي حتى ماشوف وجهج !
البيت نگلب والدعاوي على اهلي من الجدة والعمه ما ينتهي
بس شيماء وابتهال زينات وياي
بدا الدوام واني كعدني خضر بدلت لبست ملابسي بعد ما جابتهن ابتهال من الخياطة ونزلت اروح للدوام شنو عبالك راح اروح انهزم الوجوه الصفرة من الجدة والعمه مايكصها السيف طلعت لان خضر وجدي وعمي موجودين .
رحت لاول يوم دوام وجنت كلش مستحية لان متزوجه .
استلمت كتب ورجعت فرحانه بيهن .
مريت ع اهلي لان احنه نفس الشارع
دخلت اشوف امي كمت ابجي ماريد ارجع لهناك غسان كلي لازم ترجعين ومايصير تطلعين بدون علم زوجج وبيت عمي .
من دخلت لبيت جدي كالت ليش تأخرتي كتلها عمه شفت امي وغسان جابني .
كامت تحجي عليه وترزل اجه عمي واجه جدي وخضر
وكلها بقت تحجي عليه بس خضر والبنات وحتى شيماء كالت جا شبيها اذا تروح لبيت عمي.
حسيت نفسي سويت جريمه كمت اخاف اخطو خطوة وحده ..
جنت جوعانه وصبوا الاكل طبعا اكلهم اذا تسوي عمتي لو الجدة ماينجرع مو طيب بس اذا تسوي ابتهاال يخبل اكل .
بيومها ابتهال اللي طابخة كعدت اكل جوعانه متريكه بالسته وهسة ب12
حسيت الاكل صار سم من كلساع تكلي شني مشايفة مخروعه
شيماء . يمه الاكل طيب وماينشبع منه .
شيماء شبيجن وي البنية لا تحمن عليها بعدها صغيرة
ام خضر مديت ايدها الاثنين وطبكت اصابعهت بس الاصابع الوسط طلعته من اثنين ايدها
وكالت هوهو صغيرة
حوت رجلها بافعالها وخلته يوكف بوجه امه من عهرهن جااااا مثلج عافج وراح عبنج خوثة
احنه نظامهم عمي وجدي وخضر بالهول ياكلون واحنه بالمطبخ .
ماكملت كمت جوعانه صعدت احضر دروسي انطتنه ام العلوم درس وهم انام شوية نعست
صعدتلي كالت تعاي المواعين عليج شني خدم وحشم عندج ؟
نزلت اغسلهن وياي شيماء تسولفلي عن اهلي وشلون يحبوني وامي وابوي يبجون عليه لان الصغيرة ومافركيني . خلتني ابجي .
كمت من ارجع من الدوام المواعين عليه واكنس المطبخ وامسحه .
راحت شيماء لبيت اهلي واسبوع ورجعت هم متعاركه ورايح للكلية واجت تبجي ومقهورة وعلى هذا المنوال .
فد يوم كالت العمة اخذج للدكتورة تشوفج ليش ماحبلتي حتى تبطلين من المدرسة .!
بليل ماقريت خضر ليش ماتقرين كتله باجر ما داوم
خضر :ليش ماداومين من بدايتها هاي المدرسة الحلوة
لا مو عمتي كالت باجر اخذج للمستشفى اشوفج ليش ماحبلتي وماروح للمدرسة
هو تخبل كال منو كلج ترحين وماتكليلي خلى ونزل جوا صعد ت عمتي ملختني تملخ شلون تخلين ابني يوكف بوجهي ويصيح عليه ومن الغلط دفعها خضر وابتهال وعمي صعد يصيح طلعوني منها كوة ابجي واشهك الليل مانمته
خضر ساعة يحضني ومره يسكتني
وهو خطية بس يقراء ويخلي ايده اصابعة بشعرة من ابجي
كتله اريد اروح لابوي كلي ابوج بعد ماكو اني هنا الرجال اللي اؤمر وانهي!!
رووووحي نااااااااامي اريد اقراء
بلكي افلح بدارستي !
كام يركع الكتاب براسه اني من دون العالم صرت ابن لهاي العالم
ومن دون الشباب البعمري ربطوني بزواج اني مو كدة
ولافالح بشي اني
اني خنست ونمت .
ورا ايام اجت شيماء جايبه ملابسها وجايه متعاركه عركه موطبيعية وكاتلها جهاد لان تغار عليه بالكلية وكايمه تصيح علية ومتجاوزة يمكن وهو كاتلها وطاردها .
وطلابه مابعدها طلابه عمي وابوي وجدي وصارت بالسلاح.
قرر جدي يطلك شيماء ويكسر ايد جهاد المدها على شيماء المدلله مالته .
بين ليله ويوم جهاد طلك شيماء وراح بعد مارجع والنفوس صارت سودة كلش خصوصا اتجاهي .
بس جانت ابتهال زينه وياي حتى شيماء تكول مو كصه بكصه طلكوا بشائر ورجعولي كرامتي .
جان خضر متمسك بيه كلش
ويكول اني احب بشائر اني مو لعبة بيدكم تزوجوني علمود شيماء وطلكون مني مرتي علمود شيماء اني اريد بشائر
ويحجي ويتعارك وي اهله من يكلولة طلكها .
شهر شهرين تلاثه لحد مافد يوم اجتلي ام خضر كالتلي الا تشربين هذا الحليب جانت ملامحها تخوف .
ماكدر عمة بطني توجعني كلش
جانت شخصيتها تخوف ولزمت ايدي احس شي خدرني
خفت لاخضراليمنعني ويوكف بوجهم
لا ابتهال التوكفلي شربته واني عبالك زهر مررررررر ماينجرع شربته ومن الخوف نمت كعدت اشكي من راسي امشي واحس واحد يجرني من شعري كمت ماكدر امشي وحدي اخاااااف يوم عن يوم صارت بيه خوفه وماركز بكلشي بالمدرسة البنات لازمتني بالبيت اذا مو ابتهال شيماء تجيلي لو خضر لان خضر يوصيهن عليه .وهنا يحبن اخوهن كلش هواي ويراعنه . انسى كلشي يصير وياي انساه عبالك دود يأكل بعقلي
كمت امشي واوكع .
والجد صلاوات خاف حبله .
خضر تخبل ممنوع تاخذوها للدكتورة .
كمت اسمع كلامهن العمة والجدة
ويكولن لا هاي بيها جني بعد ماتفيدنا؟ ويضحكن وضحكتهن الصفرة اخاف منها كلش حتى كمت اتحلم بيهن
جنت بغير عالم ابد ماركز بشي حصرة بكلبي وهم اكو شي اريد اطلعه من صدري نايم عليه شنو ماعرفه صارت كومة مشاكل لحد ما فد يوم اجه ابوي بالسلاح اخذني وخضر مجلب بيه ما انطيها ماعوفها مرتي واحبها
وعمي كتل خضر كتله بالعكال كمت ابجي عليه اصيح لاتضربونه خطية
لان هوا هواي يحاميلي
جرني حيل كلي بشائر اني احبج ولاتحجين كلشي عنه !!!
لا خضر ما احجي ابد عيب والله عيب !
أخذني ابوي بقـوة السلاح منهن ومن طلعت من البيت واني اسمع خضر
يصيح ع ابوه وجدة ما اعوفها ولا اطلكها وعمي يضرب بيه
وهو يكول ما عوف بشائر
اني بغير عالم عبالك واحد وكطع الحبل البيني وبينه واخر صوت اله سمعت سديت اذاني بكل قوة
وماحس الا اني على وجهي بيت اهلي طايحة وبقوة
وراها كضيتها بالمستشفيات
آهلي محتارين بية ما يعرفون علتي شنو
وايام وجابولي رجال كالو الشيخ
وطلكوني شرعا لان اني معاقدة محكمة قاصر .
وراها هوسة وعركة ثاني وجانت تدخل العمام وازواج العمات بين الاب والاخوة لا يتكاتلون
وحكمت الجدة والجد لازم نطلع من الولايه كلها بليلة ظلمه وابوي شال بليله ظلمة رحنه لبغداد واحنه كلشي ماعدنا
بس البيت انباع بسعر رخيص كلش .
وعشنا اول ايام ببيت خرابة وعشنا ع راتبه التقاعدي لان عسكري
وابوي يركض ينقل بينه من محافظتنا لبغداد بس جنت اني ماكدر بس نايمه ومصخنه .
اجتنه اقارب امي تزورنه شافتني كالت الها هاي بنتج مشربة ولحت على امي وابوي ياخذوني لسادة معروفين ببغداد وكوة اقتنع ابوي .
وهناك وصلنه السرة وشافوني قراو عليها وعزلوني بغرفه بس امي وابوي واثنين شياب كبار شكلهم كلش حلو .
كلولي شربتي شي ابيض حليب لبن .
ومن شربتي نمتي ؟
اييي اييي كمت اصيح ايييي ارجف وعركانه وجوعانه
شربتني عمتي اااييييي وخضر ماموجود
وجانت عيونها صفر وتخوف هيا والجدة
صوتهن براسي يضحكن وكمت اصرخ واملخ بشرع طلعوهن من واسي طلعووووووووووووووووهن .
جان كلام الشياب ما مفهوم بس كمت اشوف دخان واتقيء واطلع صوت مثل البزازين بيه محد يسمعه بس اني !!!!!
كمت اصيح البزونه البزونه
...
كام يقرون عليه ويشربوني شي احس طلع من مثل صوت البزونه بصوت عالي ورجليه واديه حركتهن قوية وراها كمت اتقيء واشوف مثل البزازين تنزل مني او
حيوانات كمت اصرررخ صاح الرجال سدو عيونها بربطتها
ولزمو اديها وراها كمت اصارع روحي والموت . ماعرف بعد شي بس ابوي شالني على جتفه مثل الميته وذبو علية بطانيه
وهاي هيا بالبيت اني
صحيت
يوم عن يوم صحتي تحسنت واكل واشرب بس من اشوف الحليب اختنگ كلش .
كملت مدرسة بطلاع الروح وطلعت اكمال ونجحت بالدور الثاني .
اخواني يدرسون ويشتغلون ..
اجه خبر لاابوي عمي ابو خضر مات ابوي كام يبجي وراح للفاتحة اخوة وماقبل امي تروح وياه
رجع نفس اليوم كلش ضايج ومقهور.
احنه جان عدنا تواصل وي عماتي وعمي غزاي خطيه من يجي لبغداد يمر بسكوت علينه خلال هاي السنه .
عرفنه ابوي من رايح لفاتحة عمي
جدي طاردة وكايله انت مو ابني وماانطيك كلشي من فلوسي تحرم عليك ومن اموت لاتوكف على جنازتي لان طلكتوا شيماء وتبعت مريتك؟
ابوي كايله هااي هيا وكدام عمامي واقاربنه اني انفذ وصيتك وطالع من الفاتحة .
بداية السنه الدراسية . واختي رسل مثل الوردة شكل واخلاق ودين
ليش ما ضاربتها سيارة وماتت بلحظتها كلنه نهارينه عليها اختي حلوة طموحة هادئة متدينه
من سوينه فاتحة جدي مااجه بس عمي وعماتي واقاربنه كلها اجت للفاتحة .
عشنا ايامنا حزينين وكأبه لان اختي جبيرة ومثل الورد هيج تروح من عدنا وهيا جانت لازم البيت وامي وابوي يموتون عليها لان معدلة امي وابوي خطيه كاموا يخافون علينه خوف موطبيعي
امي تكول لا هااي لعنة ونفس الصفرة وجنتها عليه تريد تموت وليداتي واحد ورا الثاني .
وابوي خطيه باله وروحه كلها يمنه .
اني كملت ثالث متوسط ابوي وداني دار معلمات
ورشا تزوجت واحد غريب من اهل بغداد يدرس وياها وكلش خوش ناس
جهاد خلص هندسة واتعين وقرر يتزوج شاف اقارب امي عجبته خطبها واحنه جنا مؤجرين بيتنا صغير لكة بيت اجار يمنه واازوج بية بقينا اني وغسان وامي وابوي
خلص غسان كليه هم ابوي زوجه هم اقاربنه مو غريبة .
اني تخرجت من المعهد واني بالمرحلة الثالثه من الاعداد المعلمات بنات تكعد وتسولف عن الزواج وكلامهن جان واضح
عرفت شنو الرجال وشنو ذيج الليلة عندة
وفهمت شنو معنى الزواج وانصدمت صدمة عمري اني بعدني ابنية!!
وعرفت ليش خضر جان متمسك بيه وعرفت معنى الرجولة والليله الجبيرة ليلة العرس بالنسبة للرجال .
بقيت ابحث عن شنو زواج وشنو رجال مرات اسأل رشا لو مرت اخوي بس بصيغة غير مباشرة
او البنات بالمعهد يسولفن وجنت اتصنت يمكن افتهمت كلشي
حلفت وقسمت على نفسي ما اتذكر ذيج الايام
ولا اعيد ماضي خضر انتهى كلشي
