رواية نارا حيدره الفصل الواحد والثلاثون بقلم نمارق رحيم
حسيت علئ ايدة جرني لحضنه بحركة سريعة وايدة صارت علئ الطباخ واحتركت صررخت بصوت عالي دخلو كلهم للمطبخ على صرختي.. وهو حاضنني حيل لصدرة ويتنفس بطيء..
حسن: لك حويدر ايددك! شنو صاار؟؟
سالار: شبيها اختي حـيدرة احچي؟؟
بعدني عنه، وگال الهم ماكو شيء لاتخافون
وطلع من المطبخ بسرعة ..
وگف يمي سالار وگال شبيچ ولچ احچي؟
طيبـة: أخوي ايده حمره شنو كب الطباخ عليه يايمه !!!
هزيت راسي " آي " سألوني شلووون؟؟
- ما ادري ما اعرف اشغل الطباخ و شغلتهم كلهم والغاز اتسرب تالي كب وصار حيدرة كبالي وهو الاحتركت ايدة
حسن :- صدگ تحچين غير تنتبهين لا سامح الله جان محترگ وجهج..
نبراس: عدت سلامات الحمدلله..
طيبة :- يا سلامات غير اخوي احترك
نبراس: ناردين روحي انتي لحيدرتچ اتأخر الوقت واني رح انظف إلي صار معليچ
طلعت وصعدت فوگ دگيت الباب خاف ضايج مني وما يقبل ادخل تالي لگيته مفتوح فتت للغرفة وقفلت الباب شفته متمدد نص جسمه على الچرباية وايده لافها
-ما أدري رح يصير هيچ بسبب غبائي أحتركت انت اسفة!..
كام وكف كبالي وحچه وايده على گلبه ثقي بالله لو ما داخل للمطبخ وراكض ودفعتج جان وجهج وايديج محتركات بالنااار يانارري!!
ما تحملت وبچيت واني احچي.
-حيدرا ما ادري والله شعرفني رح يصير هيچ!!
-لو محترگة انتي شيصير بيه انا؟ نسيت كلشي وركضت إلچ گلبي راح كفيلچ علي اليوم انعاد نفس الشعور من انخطفتي ومن وگعتي بين اديه بدمچ حسيت گلبي نار عليچ يا ناري وحده الله يعرف بأحساسي بلحظتها..
-خايف عليه! ..
صرخ :- اييي خاايف عليج اذا ما اخاف عليج اخاف علئ منو ؟ ،ما اريد اخسرج
ابتسمت ورحت تمشيت وگفت بقربه سحبني من ايدي وحضني لصدرة ظل يتنفس بشعري ويبوسني..
حيدرة:- اضمچ بين ضلوعي وما اشبع منچ..
أبتسمت تالي بست ايده المجروحة وگلتلت بهمس.. سودة عليه يا روحي..
-الحمدلله بيه ولا بيچ..
مددته على الفراش وهو يتنهد رحت جبت علبة الاسعافات من الميز وگعدت وخرت اللفاف وعقمت الجرح
-حيدرة لازم تروح للدكتور جلدي ايدك محتركة كلها وحمرة صايرة وطالع دم!!
-عادي شغلة بسيطة ما يهم..
-لكن اني يهمني..
-شلون يهمج؟
-إذا ايدك ما تطيب بعد منو يحضنني بيها؟..
-گلبي ويا لسانچ شلون يتصافون گليلي..
ضحكت ورجع لزم ايدي وگال بهمس وهو مركز نظره بعيوني..نـاري
- عيون نارك!
-هنيالي عليچ..
لزم خدي وابتسم ..
ردت أطلع سئلني :"وين رايحة؟..
-اشرب مي من البراد
-دير بالچ لا تحرگينه انزل وياچ ؟
-لاا هههه شسالفة
نزلت شربت مي واني اضحك طلعت نبراس..
-هاا شبيچ..
نبـراس: ما نعسانة
-ليش
-ضايجة
-علمود سالار صح
-آي
-انام وياچ ؟
- ياريت بلكت انعس علئ سوالفج
- ماشي رايحه دقايق واجي سويلي مكان
- خوش
صعدت للغرفة متمدد و متغطي اخذت مخده رفع راسه وگال ها وين
-ها رايحة انام يم نبراس ضايجة خطيه مشتاقتلي ورايحه اسولف وياها وانام يمها..
-چا وانه؟
-هههه انت شبيك..
-منو ينام يمي بويه؟
ابتسمت بخباثة وگلتله ..مممم حتنام يمك المخدة احضنها واعتبرها اني..
-هيج صارت يلا روحي بووويه روحيي..
-آي طالعة..
-احلمي بيه عود..
-هههه ان شاءالله..
اخذت البطانية منه وطلعت ركض واني ميته ضحك عليه ادري بي يريدني انام يمه رحت نمت يم نبراس وطيبة
الصبح گعدنه حيدرة ماخذ امه للدكتور علمود ركبتها ورجعوا الظهر ركبتها متحسنه وشالوا اللفاف..
چنت نعسانة و رجعت نمت والكل گاعد لان الساعه بـ ١٠ حسيت علئ صوت حيدرة يحچي وياي فزيت وگلتله هـاا ؟
-گومي نامي بغرفتچ..
-يا غرفة ؟
-ادري بيچ من تگعدين من نومچ حتى انا تنسيني دخلي لغرفتنه وكملي نومتج هناك شيلي فراشچ يلا ناري يلا عفية بالسباعية..
-ها
-الـ ها مالتچ فاهيه..
گمت واني متغطية بالبطانية وگعت وعيوني مغمضه واني اگول.. بالنبي نعساااانة اوووي..
-شلون يعني وياچ..
شالني ودخلني للغرفة خلاني علئ الچرباية باسني وطلع..
ساعة وگعدت علئ صوت الاذان الظهر تغديت وياهم و حيـدرة متغدي قبلنه هو مسويه الغدة بنفسة
العصر اجن عماتي يباركلي علئ الزواج والعملية وهم درو بالسالفة إنو احنه مو بنات اخوهن بقن لليل يحچون علئ هاي السالفة
...
نـور
الصبح طلعنه لأربيل، و البيت بقئ فارغ وصلنه دخلنه للشقة سالار راح يسبح و مصطفئ شمر روحه علئ الچربايه ونام ،نمت وياا من تعب الطريق والدوخة گعدنه جايب آكل ، تغدينة وهو طلع عزلت الشقه وخليت الملابس لعبت شوي بالموبايل ونمنه ..
ثاني يوم راح سالار لشغله يشتغل بشركة معروفة بأربيل مرن يومين كالعادة خابرت علئ ناردين طمنتها
وگالت إنو جايين عمامي و خوالي علئ هذيج السالفه و صايرة عركة بيناتهم و حاچيين علئ سالار لان گالهم و ثاني يوم راح سافر لأربيل اخذنه وياا والتجمع صاير ببيت حيدرة
لان خواتي ببيته ..
...
نارديـن
3 ايام و عمامي لو رايحين لو جايين حتئ حيدرة تقيد لان من يريد يطلع همه يجون گالوا لازم يقسمون بيتنه وكالو ننتظر سالار يرجع، وما قابلين علئ نبراس لان صارلها ايام تبات عدنه وحسن موجود
بس حيدـرة گـال الهم: البيت بيتي و هيه مو غريبة و احنا مثل اخوانها مو عيب تبات
بـ بيت زوج أختها
مر اسبوع نفس الشيء اليوم طيبة گالت لـ حيـدرة ..ضايجين طلعنة!
حيدرة:- افاا من هالعيون وين تردون؟
-للمتنزه نتغدث هناك الجو حلو..
وافق ورحنه بسرعة بدلنة طيبة مسويه دولمة جدر صغير وزلايط واخذت حلويات وكيك بالكريمة وعصاير ..
حسن راح ويانه و نبراس هم رحنه گعدنه بالمتنزه العـائلي جهال گاعدة تلعب وعوائل دا تتغدة و اجواء حلوة مفتقدتها ..
فرشنه السفرة وطلعنه الاكل وكعدنه نأكل
اباوع لحيدرة ياكل بس زلاطه ولازم موبايلة انطيته ماعون دولمة..
حيدرة:- ما اريد ما اكلها
-ليش شنو ما تحبها ؟
-اي..
- شتحب أنت لعد !!
ابتسم راد يكول شي و سكت
-ليش سكتت..
-ماكو شيء ناري غلسي..
لمينه السفرة وطلعنه الكيك وحب شمسي وببسي ..
اباوع علئ مراجيح الاطفال وضلت بنفسي العب وياهم..
-حيدرة عادي اگوم
-وين رايحة ؟
-شسمه باع المراجيح..
خزرني ضحكت آي خوش ما اگول "باع" بس شسمه اريد اصعد بالسرسوحة..
-طفلة انتي..
-اي داده..
ضحك وگال كلهم جهال جاي يلعبون وين رايحه
بنصهم بلا اخبال ناري..
شمرت عليه الشامية بضوجة ودرت وجهي..
-امشي يابه امشي بس لا تبچين بوجهي
ابتسمت وگمت بسرعة وگام وياي تمشينه و أيدي بـأيده لگينه مرجوحه فارغة معلگة على الشجرة
-خاف اطيح؟
- "حيـدرة ساندچ لا تخافين
اذا طحتي أطيح وياچ"
أبتسمت بحب گعدني بيها وصار يدفع بيه ..
رجليه احسهن دا يطيرن بالهوئ، يدفع قوي
واني اصيح :- آيييي حييـل آيـييي
اللللله ونسه وووونسـه
-طفلتي الخبلة..
-هنيالك علية..
-ياهنيالج على حيدرة عايف شغله وجاي يمرجحچ..
دفعني قوي صرخت احبك..
-اخخخ بوووويه شو عيديها..
-احبببك..
-اخخخ يابعدهم كلهم انتي..
وگف المرجوحة وضل صافن بعيوني واني مبتسمة..
حيدرة:- سبحان من صب العسل بعيونچ يـناري!
-اتحارش بيك هسه..
- هههههههههه يابة تعرفين بيه احب عيونچ..
-مممم شگد؟؟
-هواي بويه هواي
-زين شنو السبب
-لون عيونچ مميزة..
-مممم
-ناري اعترفلچ بشيء ؟
-اي احب الاعترافات إذا منك..
- أحب بغـداد و عـيونچ
-عسى محد يعترف إليه غيرك أنت يا عمري ياكل أحلامي البريئة..
-ابويه انتي..
رجعَ يهز بيه ضلينه نضحك وگف المرجوحة لان دگ موبايلة ..
خابر تالي صاح :- يمعود مو وقتك ابد، ابقوو بمكانكم جاي انا جاي هسه..
غلق موبايله سألته..
- هاا شكو صاير شيء ؟
- عندي شغلة ابقي اهنا ويا حسن و البنات لا ترحين بعيد من تخلصون ارجعو للبيت رايح انا
-ها ماشي تتأخر من ترجع ؟
-لاا الليل اجي فد ساعتين ثلاثه
-ماشي..
حجه وياا حسن وراح ،رجعت گعدت يمهم نبراس تكرز حب هيه وطيبة ويضحكن وحسن عينه بموبايله ياكل كيك
- اگول جايين لحتئ تاكلون خلي نتونس..
حسن :- شتريدين يعني اكوم اركصلج حتئ تتونسين
ضحكت :- لاا حساني شسمه باع اريد اركب بالسرسوحه..
حسن :- يابه سيد الصاكين ما يقبل
- محد يدري راح اركب عفيه بداعتي..
حسن :- انه معليه هاي انتن شاهدات هيه لحت تركب و تدري حيدرة ما يقبل
طيبة :- خلي تتونس اركبي و تعالي
- خاب فدوة لخدودج اروح
گمت و اني اضحك رحت للسرسوحه چبيرة حيل، وبيها درج بنات صغار يصعدن بيها
رفعت شعري خاف اكو تراب .. وصعدت تزحلگت و اني فرحانة عدتها مره و مرتين واربعة والجهال تصفك إليه ،رحت لغيرها اكبر منها
دا اصعد چان يجي واحد صار وراي باوعتله ودرت وجهي تالي خله ايده علئ چتفي
التفتت عليه :- نعم! شنو رايد عيني
- ما رايد شيء بس شوي بعدي اريد اصعد بنت اخوي
- هاا اوكي صعدها
بعدت عنه جان يخلي بيدي ورقه صغيرة و راح بسرعه
..فتحت الورقة بٲستغراب، مكتوب بيها رقم
عزه كاتب رقمة..
التفتت يمنه و يسرة ما هو ...رحت امشي ادور عليه اريد الم الناس عليه و اضربه راشدي تايهتله ويرقم
و نوب خفت ..صاح عليه حسن :- امشي يلا ناردين نروح اتأخرنه
- ايي ماشي اجيت
ما گلتلهم سكتت ورجعنه للبيت ... عمتي گاعدة وحيدرة ما موجود ..
بدلت ملابسي و رحت وياهن اغسل المواعين الاخذناهم ويانه..
طيبة :- روحي انه و نبراس نغسل لا تكسريهن
ضحكت :- بعد رح تلزگوها عليه كل يوم!
اجه حيدرة كال لي :- ناري تعبان حضريلي ملابسي بدون أمر عليچ طاب اسبح ..
- من عيوني إلي تحبهم..
ضحك وغمزلي وراح للحمام..
طلعتله ملابس خليتهم علئ القنفة
و رجعت گعدت وياهن بالصالة .. گعدت عمتي ويانه تاكل كعك وچـاي..
سمعت صياحة من فوگ ..
- نــاررررييييييييي
طيبة :- عزه شبي يصيح شمسويه ولچ شصاير!!
- يمه ابقن رايحة اله ادعن إلية لو بالهدف لو بالنجف
ضحكن عليه ويكولن إلي..
- قوي گلبج وروحي تحملي عصبيتة
بسبب مصايبچ
صعدت دخلت للغرفة .. اباوعله عيونه حمر يخوفن! دخيلك ياربي
- ها حيدرا شسمه اجيت شنو رايد شبيك تصيح
طلع ورقة خلاها كبالي وگال:- هذا رقم منو شيسوي بملابسچ ؟
بلعت ريگي واني اتذكر ..
خليت الورقه بنطروني ما شكيتها بالحديقة ..اكيد شافها بملابسي!
- جاي احچي وياچ جاوبيني ؟ بعدني وياج هادئ لا تعصبيني عليچ
- حيدراا احجي بس شسمه لا تصيح بالنبي اخاف منك
-تمام احچي
-هو شسمه ولد بالحديقة شمر عليه ورقه وراح
-يعني رقمچ
-مدري شعرفني اني بهاي السوالف
-چنتي گاعدة يم حسن شلون رقمچ ؟
- غير ركبت السرسوحه شسمااا لاا اقصد لاا ما ركبت
خزرني وزفر نفس وگال:- شفتي نتيجه عنادچ؟ ارتاحيتي هسة من ما اخذتي بكلامي وعاندتي؟
كتف ايديه لصدرة وكمل كلامه گلت الچ لا تركبين لاا ترحين بعيد ليش عاندتيني ست ناردين ؟
حچيت بتلعثم احاول أهدي ..
- الحياة تجارب يا عمري صير ريلاكس.
- شسوووي بيچ كوولي يا مصيبتي ؟؟
- بس اني ما سويت شيء ما غلطانه هو الاجه و تحارش وشمر رقمه هو مايستحي قابل كتله تعال اتعارف عليك هو حقير
لزم ايده بصبر.. يصير خير يانااري ياصحوة جمر.. طلع موبايله وخابر وهو يگول والسبيكر مفتوح..
-هلا حمزة رح ادزلك رقم اريد معلومات عليه بسرعة
جاوبة:- بس هاي شغلتك حيدرة ليش جهازك عطل يعني
-لاا بس مشغول واريدك انت اطلعه إلية
حمزة:- هاا تمام حاضر ربع ساعة ويوصلك كلشي تريدة عنه
رد اله الرقم الي بالورقة تالي غلق الاتصال وشمر موبايله علئ السرير ..
-عفية اني ما دخلني ما سويت شيء
-ناردين ما معصب عليچ انا
-لعد شنو
-انتي غلطتي من سكتي وما سولفتي الي علئ الصار وانا محذرچ ما تضمين عليه شيء حتئ لو صغير ويوصلني اول بأول!
ابتسمت كيفت علئ كلامة..عبالي رح اتگول إليه صوجچ وصوچ لبسچ ولان لابسة هيج..
هز ايده..
- ما عندي هذا التفكير دام لبسج مستور
و ما بي شيء و عريض اذن ما غلطانه
حتى لو ما محجبه ما غلطانه ..
لو لبسج ما عاجبني جان ما طلعتچ
- أحبك اني وهسه حبيتك اكثر ..
- اسمعي زين، مره الثانية شيصير تكولين إليه
لا تضمين عليه شيء!
-تمام والله اگولك كل شي زين سؤال شنو رح تسويله ؟
- عباله رقم وحده و عادي شي طبيعي عباله رح اسكت ما يدري لعب وياا منو وضحك وياا مرت منو ... اطيحلج حظه هلحيوان حتئ ما يعيدها وياا غيرج
بس اصبري ... انا حيدرة
-وشنو جزائه ؟
-يلقئ عقابه بالسجن ..
-وبعد ؟
-الچ الصافي يابه
-اي صافي يا لبن..
ابتسم وگعد ينتظر .. لحدما دگ موبايله ..گـال :"عفية عليك ..
وسده منه وراح اتصل علئ غير شخص..
-هاا عثمان اسمع الرقم الدزيته الك و العنوان ومعلومات رح تروح لبيت هذا الشخض وتعتقله فهمت؟
-يابه شنو خبل انت شمسوي هلولد بهل ليل
-بويه الي گلتلك عليه سوي وهذا هو
-تمام
-حبيبي الله وياك
باوعتله وصحت :- هلاا هلاا اعتقله و مفهوم وحاضر و تدلل و من اكله انت من المافيا ايكلي لا
-لان فعلاً لا
-لعد شنو!
-ما دخلچ
-مررتك شنيييي!
-مو هسه تعرفين
-لعد يمتى؟؟
-بالوقت المناسب
-لعد هسه وقت شنو ما مناسب ليش
-رايد انام تعبان
-اي عيني ناام
طفيت الضوه و تمددت يمه اتگلب يمنة يسرة ما نعسانة اباوع لموبايله الشاشة تلمض ودتجيله أشعارات رسالة ورا رسالة طگني الغضول أعرف ..
اخذته بس ما اعرف الرمز! اباوع للموبايل حديث وبي بصمة گلت يمكن مسوي الرمز هم على بصمه اصبعه! گعدت بالگاع بهدوء حتئ لاا يگعد سحبت اصبعه وخليته ما انفتح تالي اصبعه ايد لخ خليته عليه تالي صدك انفتح
گمت علئ كيف و طلعت وهو نايم! رحت للهول شغلت الآضوية تصفحت موبايلة رحت علئ رسائل اخر اشعارات وصلته من رقم ما مسجل أسم علية اكثر من 5 رسائل!! فتحتهن وقريت المكتوب وشهگت!!
.. الوو حيدرة شلونك
...رد فدوة وينك
....رغد محتاجتك تريدك
....صارلها يومين مريضه فلاونره
..تعال الها
..وينك حيدرة ما تقبل تنام الا بحضنك
قريت الرسائل بدهشه و تفاجئ! عزززه صخام الصخمك يا حيدرة هااي منووو رغد؟؟ دموعي صبن لا اراديًا المحادثه ممسوحة ماكو بس هذن الرسائل!! حتئ صاحبة الرقم ما عرفت منو هيه
گمت وصعدت امشي بسرعة و الف تفكير خطر علئ بالي دخلت و شغلت الكلوب وگفت يمة
وأني اگول گــوووم اگـعد حيـدررا ..فز وباوعلي..
-هاي شكوو شصايرر!!
-منو هااي جاوبني منوو هاااييي!!
-منيه هي!! ليش تبچين نااااري احچيي؟؟
انطيته الموبايل لـ أيدة هااك جاوبني منو هاي رغد؟؟؟؟
قره الرسائل و خزرني وگام: منو إلي گالچ تاخذين موبايلي شلون فتحتي وقريتي الرسائل؟ منو إلي سمح الچ؟
-جاوب أنت بالآول علئ سؤالي منو هاي إلي ماترضئ تنام الااااا بحضنك شنوو علاقتها بيك؟؟؟
-للمرة الألف مالچ علاقة ما مجبور اجاوبچ تعاندين وتفتحين موبايلي شنو هلـجرئة
إلي عندچ!
-اي اتجرء وافتحه گول منو هاي منو ررررغد؟ حبيبتك لو مرتك؟؟؟؟.. تخوني حيـدرة !!
جاووووبني رغد منو!! .. طبگ ايد بأيد وزفر نفس وتنهد بصوت مسموع تالي گال..
حيدرة :- رغد بنتي ........
فتحت حلگي بتفاجئ مستغربة من كلامه .. شنوو بنتك ! من يمته عندك بنيه؟
-قبل لا نتزوج..
ضربته على صدرة.. داتضحك عليه انت؟حيدرا من شوكت صارت عندك بنيه يعني أنت متزوج؟
- چاا منين اجت من زرف الحايط ؟
- لاا تنرفزني والله بعد ماعندي صبر
..گول داشاقه
- داشاقة
-شهالبرررود الي عندك!
-ما يحقلچ تحاسبيني لأن شيء صار بالماضي
ظليت متجمدة بمكاني مصدومة من كلامه سكتت مسحت دموعي لزمت راسي حسيت اختل توازني و دخت جريت نفس وگلت هسه انت عندك بنية ! .
-آي يابه..
-من شوكت متزوج!
- زوجتي الاولئ هي، و انتي الثانية
سكتت بعد جوابة گعدت علئ قنفة وايدي علئ راسي يمكن اثر الصدمة خلتني اصير ابرد منه..
- ما ردتچ تدرين افهمي ناردين افهمي حياتي لاا تدخليين بيها ما اريدچ توگعين بمشاكل ابقي بعيدة افضل..
- اتگولي متزوج و عندك بنية شنو منتظر مني ردة فعل لازم اسكت و ما اناقشك
وافرح و ارضا واگولك فدوة و مبروك موووو احچي ؟
- لاا تصيحين لچ انتي الأخذتي موبايلي بعنادچ وقريتي رسائل مو الچ ماتخصچ اتحملي نتيجة عنادچ
- لك ليييييش بس فهمني ليييش هيچ گلبك قسى على ناردين !
اندگ الباب ..
حسن: شكوو ليش صياحكم عالي شصاير احچوو لك حويدرر افتح الباااب..
جاوبه.. روح حساني سالفة مو يمك..
طيبة:- خوية أفتح الباب شنو صاير
-يااابه رووحو لغرفكم جاي اگوول ما يخصكم..
صار هدوء .. واگف يتنهد و اني ساكتة اجر النفس بلگوة لازمة راسي بوجع احسه رح ينفجر
-وتالي شنو ؟ هاي عرفتي ورضيتي فضولج..
- ليش ما گلتلي من زمان؟..
- ما ردتچ تدرين اصلاً، انتي أصريتي
تعرفين هسه
-بس بأعتباري زوجتك المفروض تگلي! ليش خليتني گدام امر الواقع! ليش احسك اناني
ضحك وگال بنبره قهر.. نوب طلعت اناني لان ادور سعادتج ما اريدج تتأذين بسببي؟ رحمة الله والديج
-بنتك وين ؟
-موجودة بشقتي
-شگد عمرها
أبتسم ودار ظهرة وجاوبني ..سنتين
-تحبها..
-بنتي شلون ما احبها..
-ما حاس بيه وبشعوري ولا رح تحس الكل ما حاس بيه اني جاي اموت بطيء اني هنا بهالدنيا وحيده ما عندي سند اب ولا حنية ام وعبالي انت سندي ؟
داتگطع اني كل يوم گلبي مكسور حيدرا وتجي تكملها علية وتگول عندي بنية ومتزووج لييش معقولة اني استاهل كل هالقهر والظلم؟
- لاا تتٲملين بيه،گلت إلچ و ارجع اگلچ مستعد اساعدچ واحميچ بس موو لأجل شيء
-حيدرا تحبها؟
-منو هيه
-زوجتك
-انتي ؟
- لاا زوجتك الاولى ام بنتك
- ماعندي زوجة بس انتي ..حالياً
- لعد شنو؟
- مطلكها
باوعتله بصدمة وتفاجئ.. مطلگها من يمته وليش ؟
- لنفس السبب الي رح اعوفج لاجله
- السبب قصدك شغلك صح ؟
- آي
- چنت تحبها ؟
- چذاب اذا اگلچ لا، بس الحُب الخطأ ينسي يوم عن يوم التهي بحياتي و مشاغلي و نسيتها
- هيه تحبك ؟
- لا
- ليش طلكتها هيه شلون قبلت تتطلك منك علئ رغم تجمعكم بنية!!
- طلگتها وخلص بنتي عندي و هي عايشة حياتها .. مثل ما رادت
- تشبهك ؟
- آي هواي
- منو يدري بيك متزوج ؟
- محد
- خالتي تدري عدها حفيدة ؟
- ابنها ما يريدها لذلك ما يهم اذا درت او لا
- تدري مختنگه حيل حتئ من الهوئ ؟
- كلت إلچ و حذرتچ لا تعاندين و تحاولين تعرفين عن حياتي لان رح تتأذين!!
- ليش ما جبت رغد لهذا بيتك
و تعيش وياك ؟
- مستحييل
- ليش مُستحيل ؟
- ما اريدها تكون بخطر و ما اريد طيبة لو شخص لخ يعرف
- ليش ؟
- بدوون ليش أفضـل
وكفت يمه و دموعي علئ خدي حجيت بصوت المبحوح.. شگد تشوفني طفلة ومخبلة وتصرفاتي بلا وعي وماحسب حساب لشخص بس اني حبيتك حب الزوجة والام والصديقة والاخت يمكن ما تصدگ بس والله حبيتك حُب چبيير وتغصنت روحي من تعلقت بيك وحاربت الكل حتى نفسي بس علمود ابقى وياك وتحملت كلشي بس الظاهرر انت ما تستااااهل!..
لزم ايدي دفعتها بقوة وصرخت.. لاا تتقرب مني لك وخررر.. الله ياخذني بساعة إلي قبلت بيها اصيرر نارك الله ياخذنييي!!..
-كاافي ناري رحمة لأبوچ..
طلعت من الغرفة ميته بچي وراسي دايفتر امشي وعاصره ايدي لا اوگع ..
اجه وراي دفعته من صدرة.. رووح حيدرا نام لاتددخل بيه..
- ارجعي للغرفة ناردين الوقت متأخر كافي اعناااد بطليي لخاطر الكائنات!!..
-داگوولك رووح نام..
-ناردين لاا توگعين روحي رجعي نامي الصبح الله كريم!!..
-وخررر ما اريدك ولا اريد اشوفك..
دخلت للغرفة خالتي، وسديت الباب
فزت خالتي علئ صوتي ..
-بسم الله منهو اهنا يمه ؟
شغلت الكلوب ..
-ها خاله هاي اني
-حبيبه شبيج يمه ليش تبجين منهو مزعلج
-ابنچ
ضحكت ..
-زعل حبايب يمه تعاي يمي تعاي
گعدت يمها راسي علئ رجليها و تمسح علئ شعري بحنية
شنو سوالج حويدر
-قهرني وحيل
-سودة عليه يا يمه لو انه وياه متصافين چان رحت له و حاسبته لان قهرچ و عبن انتي تدرين غالية علية و احبنچ بس يمه تدرين ما يحاچيني
-آي..
-طاگچ هو؟..
-لا ما يضرب وشحده يمد ايده اكسرها..
-فلك يمه..
-لعد سهلة ناردين.. بس خالة اني ثولة هواي قدمت تنازلات وخليته يتمادى بتصرفاته..
-چاا شني صاير؟..
-قهر گلبي بكلامة وجرحني..
-حسبالي ضاربچ يله حبوبه زعل الحبيب مثل الزبيب اتحملي يمكن صايرة عنده مصيبة وحاير شلون يحلها وطلع حرگه گلبه بيچ وتعصب..
سكتت رجعت ابچي وهيه تمسح علئ شعري كل ما اتذكر الرسائل و كلامة اغمض عيوني واني اشهگ ما مستوعبة الي صار وبنته منين طلعت!!..
گعدت تربعت ومسحت دموعي.. گلتلها خاله انتي ليش ما تحچين وياا؟..
-مو گلتلچ يمه مشكلة..
-وشنو هيه اگدر اعرف؟..
- يمه انه ما رضيت اروحن وياا لبغداد بقيت ويا چاسب بالبصرة ، ما عفت بيتي و هو اخذ طيبة و حسن و عاش ببغداد و أشتغل بيها و مر ثلث سنين
-ليش ما رحتي ويا ليش تعارك وياا ابو؟..
-گالج چاسب ابو سوالف المكسرة..
-آي صح گال إلي..
-آي..
-ليش مع كل هذا بقيتي وياا… .
- هيچي…
-هاااا..
سكتت لان ماجاوبت وسدت السالفة مبين ماتريد تحچي.. تالي سئلتها .. زين خالة تعرفين بالشغل الي يشتغلة؟..
-آي اعرفن..
-وشنو هو؟..
-يمة تعرفين ما يقبل ومالي خلگ لمشاكل عود هو يسولفلچ عوفيچ من هاي السالفة صدگي مابيها حظ غيريها ياريتي شلونچ هسه حبيبة؟..
-ها زينة..
ما سئلتها بعد رجعت نمت وهيه رجعت نامت يمي..
گعدت الصبح مسوية سياح وچاي وجبن عرب جايب حسن..
تريگت ما احچي ولا اباوع بوجه أحد، المح حيدرة يدخل للبيت بسرعة اروح لغرفة طيبة علما يطلع ما احچي وياا بسبب البارحة..
مرن ايام انام بغرفة طيبة ومن تسئلني ليش حاگره أخوي وعايفه غرفتكم اگلها هو يشتغل بالليل فا اجي انام يمچن انتي ونبراس حتى يتشغل براحتة..
ورغم شگد راد يراضيني ما قبلت يلمح ويحاول يحچي وياي ويفتح مواضيع ما اجاوبه والمكان الي يدخله اطلع..
..گاعدة بالمطبخ اثرم بالبصل وعيوني مدمعة بسبب البصل واشهك وطيبة تضحك عليه وتگلي عوفي اني اسوي اكصصه..
دخل وهو مكتف رداناته وگال وعينه عليه.. ها الله يساعدچن..
طيبة:- هلا بيك خوية..
حيدرة:- ناردين روحي للغرفة جيبي ساعتي السودة نسيت ما لبستها..
سكتت باوعتلي طيبة وفهمتني ما رايده اگوم وكالتله.. اروح انه ما تگدر هيه تعباته..
حيدرة:- شبيها تعبانه؟؟؟
طيبة:- نفسيتها شوي مو زينة..
باوعلي وگال ناردين.. احچي وياچ شبيچ اوديچ للدكتور؟..
ناردين:- لا شكراً.. مجرد تعب جسدي..
حيدرة:- گومي صعدي لغرفتنا ادلك جسمچ واريحچ..
باوعت لطيبة استحت وترخصت وطلعت من المطبخ..
كلتله.. شبيك موعيب هيچ تحچي گدامها..
حيدرة:- شحاچي.. اگلچ گومي نطلع..
-اطلع برا المطبخ لاتشوفني وچهك وكافي..
حيدرة:- اذا ما تجيبين الساعة بالغرفة اشيلچ واخذچ بسيارتي شتگولين هسه؟..
-استغفرلله ياربي يااخي رووح مني كاااافي..
حيدرة:- يلا جيبي الساعة تأخرت..
ما رديت بسرعة تقرب مني وشالني عطت بي گلتله اجيبها بس نزلني شبيك تخبلت..
نزلني وباسني بخدي مسحتها وگلتله اذا عدتها مرة الثانية اكسر ايدك..
حيدرة:- زعلان الحلو شلون اراضي..
چانت يمي سچين مال البصل شلتها وگلتله احطها بعيونك والنبي وما يأنبني ضميري عوفني عاد مصختها كلش فوگ شينك گوات عينك فوگ ما ضام عليه اسرار تجي وانت ابو الراهي وتتأمر وتطلب..
سحبني من خصري لصدرة بحركة سريعة وسحب السچين خلاها على الكاونتر.. گال وهو عينه على رگبتي..
حيدرة:- اسف..
-شيفيد الاعتذار؟..رح يرجع برودة گلبي بعدما حرگته؟.. لو رح يرجع الي انهدم بيناتنه..
-شششش ما نهدم شي..
-عووفني..
-ما اعوفچ..
كلتله بحده وعيني بعينه.. جاي اگلك عوفني!..
عضيت ايده حيل ودفعته مني انتچه على الكاونتر وگال شلون اراضيچ ترى ما يصير هيچ ناردين.. الشي الصار بالماضي ما يحقلج تحاسبيني..
-ما يحقلي؟؟.. ترضى يطلع عندي ولد واگلك هذا ابني بس چانت علاقة بالماضي ما يحقلك تحاسبني شنو يكون موقفك جاوبني بلا؟؟..
ظل ساكت عفت البيدي وطلعت من المطبخ گال انا رايح ورح اتأخر لا يظل بالكم كلتله ما يهمني اتأخر براحتك..
صعدت للغرفة ردت اخذ ملابسي ظليت اختار اللبس بالربع ساعة.. تالي طلعت فستان بيت سمائي نسيت الباب لان عبالي طلع ما قفلته..
نزعت ملابسي وبديت ابدل.. لبست الفستان ورحت للمرايا فتحت شعري ومشطته جاي اخلي عطر ولمحته بالمرايا واگف يم الباب وعيونه مركزة عليه وسارحة..
عطت بي وگلتله.. خرعتني من شوووكت انت هناااا !!
حيدرة:- من نزعتي هذاك الأحمر ولبستي الأسود..
-عززززه بعييييينك!!..
دخل وسد الباب وقفلة.. گلتله اطلع شلون ما اجيت..
-ليش مستحية مني.. خل اشوف هم حلالي وهم مانعتني شمسوي هي شوفه..
-هههههه ضحكتني والله هسه صرت اني الحارمتك ! اطلع حيدرة اطلع..
-ها اذا راضية خليني ابقى چا..
-انت شبيك تخبلت عليه؟..روح جاي اگلك وكافي مهزلة زودتها..
تقرب مني حيل وحاصرني بين المرايا وصدرة بعد شعري لورا اذني.. وهمس هو كلمن يلبس سمائي هيچ يلوگله..
-صايرلي رومانسي..
-الا تفشلين يعني..
-مو ما متعودة على لسانك الحلو.. نوب يتغزل المشكلة ما يلوگ الك.. وروح مني لا افرغ شيشة العطر بعيونك..
باس رگبتي ودفعتة شدني لصدرة وگال.. شيلوگ چَا ؟..
-كااافي لا تتقرب مني ما تفهممم هسسه صرت عزيزة؟؟؟ هسه ردت القرب من قررت اني الابتعاد ؟؟ عجييييب امررك يا اخي اني الي تخبلت..
-ما رايد الابتعاد انا..
-هي مو لعبة ولا على مزاجك..
-شلون اراضيچ گليلي؟..
-مو على اساس تطلع ليش رجعت؟..
-اريد احچي وياچ بويه..
-واني ما اريد احچي وياك!! افهم هالكلام..
-ناردين بطلي اعناد حتى ما تباوعين بوچهي ولا تحچين وياي ولابستني..
-كيفي..
-علمود بنتي..
-وتسأل هم؟ عجيب..
-چؤ كافي رحمة لـ الله أنسي إلي صار شعليج ببنتي مارح تغيرين شيء اذا عرفتي سابقا او هسه!! ..
انسي وارجعي مثل قبل صارلچ ايام حاگرتني وانا صابر اگول هسه تهدى وتبطل عنادها وماكو فايدة!!
-تريد انسئ واتقبل؟..
-اي
-بشرط
-چؤ وشنو هو؟..
-اريد تجيب رغد..
-والسبب؟..
-لا تسأل..
-مستحيل ما اگدر اجيبها لبيتي و يشوفونها
-كيفك لعد.. هذا العندي..
ردت اطلع لزم ايدي، وهمس :- ما متعود علئ صدچ اليه، وهجرانچ
-منو الي گالي أبتعدي؟؟..جاوووب
-ما قصدت هيچ..
- هذا الكلام يفيدك علئ العموم من تجيب رغد تعال احچي..
-ومنو يدير باله عليها؟..
-خالتي..
-عنيدة وازيد منچ ما تكدريلها..
-طالعة علئ ابوها الواضح..
أبتسم و حگ لحيته
-خبلة..
-ممنونه..
سكتنه .. تالي گـال.. تمام رح افكر..
-نازله جوا..
-لا تگولين لأختچ ولأ لطيبة زين؟..
-على اساس ما يدرون..
-لا ما يدرون..
-صدكتك..
باسني بخدي دفعته وطلع وهو يضحك.. گال لا تضوجين مني.. هزيت ايدي بأستهزاء اخ يا برودك..
مر أسبوع ما صار شيء محد يجيلنه وبيت عمامي وخوالي ما أجو بعد منتظرين سالار يجي حتئ يحچون ..
وبعدني علئ موقفي ما تنازلت و لا قبلت احجي وياا..
بيوم گاعدة بالطرمة اني وطيبة و نبراس وعمتي يمنه فارشين الحصيرة بوقت العصرية مخليات ماعون كرزات ويسولفن..
واني بعيدة عنهن وصافنة ما شاركتهن السالفة صفنت على باب حسيت رح يدخل وفعلاً انفتح..
گمنه كولنه ودخل حيدرة.. مبتسم ودخلت ورا طفلة بعيونها مليان خوف لازمه ابٲيده، وايدها لخ لازمه دبدوب ابيض..
دخلو اثنيهم و سد الباب وگف يمنه وهيه تباوعلنه بٲستغراب.
طيبة: فدوه منو هاي الكائن اللطيف الي وراك خويه؟..
حيدرة:- رغد..
طيبة:- منو هاي رغد بنت منو؟..
سكت ما جاوب بس مبتسم وهي لازمته من ايده وتباوعلنه بصدمة..
تالي نبراس باوعت الها وراحت الها..
نبراس:- اووي ياعمري شنو هلجمال منين جبتها حيدرة چنها لعابة والنبي..
ابتسمت من شفت برائتها بغض النظر على الصرخة الي بداخلي تقربت منها وگلتلها.. هلو يحلوة..
بعدت ولبدت ورا ولازمة بطرف قميصة تباوعلي بدهشة واستغراب..
خالتي:- منو هلفرخه منين جبتها..
طيبة: هسه غير يحچي منو هاي وريحنه ليش ساكت!!..
باوعلهم وگال بصوت مسموع واطلق بصدمته الهم:- هالطفلة بنتي..
خالتي: يااااااع من يمته عندك فرخه انته..
الكل انصدم وخلا ايده علئ حلگه عبالهم يتشاقة ونبراس ظلت تباوعلي وتهز بحواجبها بمعنى صدگ لو جذب؟..
حيدرة:- بنتي والله بنتي يمعودين..
شالها لحضنه وباسها بخدها وهي ضحكت بغرور..
كرصتني نبراس تباوعلي بصدمة أبتسمت بوجهه بقهر رفعتلي حاجبها وگالت بتفاجئ..
نبراس: هذا يحجي صدگ؟ ولچ انتي تدرين؟؟ شلون راضية؟؟
-سكتي بعدين اسولفلچ..
حيدرة:- طيبة سلمي على بنت اخوچ..
طيبة:- جاي تضحك عززه يمته صارت عندك بنية!! وصدگ منين؟؟؟..
حيدرة:- بعدين احچي بالأول سلمي وتالي اسولفلكم..
.. نزل حسن من الدرج و هو يغني بصوته الذابحنه بي لاغنيه محمد السالم
:- حالي حالي حالي حس بحالي يلغالي انا بعدك عدم حالي و حالي ..
شاف رغد وانصدم وهيه من شافته نزلت من حضن حيدرة وراحت تركض بتنورتها القصيرة ودبدوبها، راحت حضنته من رجليه وهو رفعها وشالها واجه..
غمز لحيدرة بتساؤل وگاله ها شنو صار حيدرة صارت صدگ؟..
ضحك وجاوبه.. خل يتعارفون على بنتي شكو بيها يخوي..
حسن:- بس ها وهاي وهاي..
حيدرة:- اي حساني افهمك ادخلو جوا..
.. الواضح يدري قبلي گايل اله شلت الحصيرة ودخلنه جوا كعدنه بالهول..
كعد تربع و بحضنه هيه، واني وطيبة ونبراس واگفات گباله وحسن وخالتي كاعدين يمه، والوجوه مگلبه والكل مصدوم..
حيدرة:- يابه اول شي الله بالخير..
خالتي:- احچي مو طگت حويصلتي..
حيدرة:- سلامتچ.. على شنو مصدومين السالفه وما بيها هاي بنتي واسمها رغد حيدرة..
طيية:- من يمته عندك بنيه ماجاي افتهم؟؟؟..
حيدرة:- عمرها رح يصير 3 واحسبي انتي..
طيبة:- عزه متزوج قبل ناردين يعني؟..
حيدرة:- اي صحيح..
طيبة:- شنوو صحيح! منو هاي مرتك؟؟..
حيدرة:- طليقتي قصدج..
طيبة:- صخاام متزوج ومطلگ من ورانا !
حيدرة- اي..
حسن:- لا تسوون من الحبه كبه ما صار شي قابل اول واحد عنده بنيه ومطلگ..
ضحكت وجاوبته.. عاش لسانك ما قصرت يا حسن..
استغفر وگال.. مو قصدي اعرف مجروحة ومصدومة بس رغد ما الها ذنب طفلة لا تكرهوها وانه ادري بيها من اول ما ولدت ومتعلق بيها هواي وفرحت من اخوي جابها.. خليها هنا واذا ما ترضين خليها بغرفتي..
-اي رحمة الله والديك..
حسن:- اسف ناردين تعرفين مو قصدي شي..
طيبة :- اسكت انت، شنو ما نكبر السالفه اخوي عنده بنيه وما ادري وصارله سنين نوب ضام عليه وانت تعررف وما تگلي ؟؟؟؟
حسن:- بعد طويب تدخلت لو يجي الحمزه ما تسكت..
طيبة:- چاا والله خوش تعال انت بعد يومين وادخل للبيت بيدك ولد و كول هذا ابني وعادي نستقبل وكل يوم جيبو ضيف جديد..
گامت زعلانة منهم وراحت لغرفتها.. لحگها حسن راح وراها..
شكرا لزيارتكم عالم روايات سكيرهوم
