رواية عشك أل فراس الفصل الثاني والثلاثون بقلم زينب نور
علي:بعد ساعات فهمت قصدها انصدمت وضحكت بـ نفس الوقت ضحكتي استفزتها اكثر
ام فهد :عليمن تضحك على سواد وجهك
علي:وجهي حنطاوي مو اسود
الجدة:شمالكم
علي:طلعت من كلبها وأنا ابن كلبها
الجدة:شنهي
علي: طلعت من كلبها لان مااخذت كلامها ورحت كعدت ويَّ اخوها الخيخة
الجدة: ياا شنهو الحجي هذا
شهد:شكو شبيكم
ام فهد:والله يمه اخوج صاير كلش لا يحترم ولا يقدر ولا جني امة احجي ويا أسلوبة نتر وعصبية وميتحملني
علي:وعلى هاي طلعت من كلبج
ام فهد:عدل أسلوبك علي مو بنتك أنا وتحجي وياي بـ هيج أسلوب افتهمت
علي:افتهمت تدلل ام الشيخ
الجدة:ااخخ منك
علي:ههههه طلعت من كلبها يابه واليطلع من الكلب مايرجع بعد
وردة:ماتسوا يمعود عوفها عصبية وحجت
علي: شلعب بينا غير العصبية
شهد:صدك يعني زعلت وأثرت بيك الكلمة
علي: لا
رسُل: عادي امك تمون
امير:شبيهاااا اميييي تحجووون على اميييي
علي:وصكعة حتى صكعة انجب واسكت لا تصيح
ترخصت منهم وطلعت القصد كان كرهتك بسبب أسلوبك
هيَّ مو سهلة
ابوي يحبني تكرهني امي والعكس ثنينهم ميصير
رحت للبستان كعدت وحدي أشمر حصو بالشط
مادري شنو صار بيه بذيج الساعة وشنو الشعور بالضبط
بس شعور متعب
راهب:شريك سنيني
جاوبتة بصوت هادئ
علي:عزيز روحي
راهب:كاعد وحدك رحت لبيتكم كالوا طلع اكو واحد يكعد هنا بهل الحر
علي: ضوجة وين اولي
اجه كعد يمي ضلينا ربع ساعة ساكتين
علي: نمر وين
راهب:ماشفتة اليوم
علي:شو راسك سمنان
راهب:صار فترة اشربة دكسن
علي:بالعافية عليك وعليَّ
راهب:شصار على عرسك
علي:ياعرس
راهب:عرسك شوكت تعرس
علي:مطولين حيل
راهب:بكيفك هي مطولين
علي:مو هسة بعد وكت
لـ 12:30 رجعت للبيت ماحجيت شي وانسد الموضوع لكن علاقتي بـ أمي صارت سطحية مو مثل قبل صرت حتى ما اكعد وياهم اعتزلت اغلب وقتي بالدوام ومن ارجع انام لحدما جدي ضل يحجي عليه
الجد:احنه شني ذنبنا وكل بيت يصير بيَّ مشاكل الام والاب والام والابن الاهل بينهم شي طبيعي لا تكعد ويانة لا تحجي ولا تاكل ويانة ،بالدوام وتجي تسلم وتنام مو حالة هاي بوية وكفاكم مشاكل ومن هاي السوالف ابو فؤاد طلعوا خارج قاموس حياتنا وخليكم كلب على كلب
ابوفهد:هيَّ على شنو ماتسوا ترا
الجد:كلش ماتسوا بس تكبير المواضيع صاير عدنا بـ فلس
علي: حاجي مرتك لا تحاجيني على شنو كارهتني لان ماكعدت ويَّ اخوها وهي تعرف كلش زين شنو بيني وبينة مااعرف شمسويلها ابو فؤاد وهيج طايره بيَّ
ام فهد:غير اخوي شعندي انا غيرهم
علي:خليج بـ اخوج لا تدخلين بيه
ام فهد:عدل أسلوبك مو جنود احنه عندك لو مجرمين وتتعامل ويانة بهذا الاسلوب
علي:كل شخص اتعامل ويا على حسب أسلوبة
الجد:كااافي شحجي أنا صارلي ساعة
بعدهي انسد الموضوع وحسيت اكو أنه بالموضوع أنا اعرف امي شكد حنونة بس أكو شيء خلاها هيج اسوي
ماكان عندي وقت دوامي عليه ضغط بشكل مو طبيعي واجت فترة داعش رجع شد حيلة لكن سيطرنا على الوضع
ابتعدت عن الكُل تقريبًا بذاك الوقت ماعندي وقت اتصل على اهلي شهر كامل أنا ماعندي اخبارهم تيلفوني خلص شحن ومن واجب لـ واجب الكُل تعب كان باين علينا الكعدة بالكاع صرنا مانكدر في سبيل تأمين المناطق وعيش العوائل بـ سلام
ركضتنا من الصبح لليل والشمس بـ راسنا بـ تموز واحنه بـ صحراء وملابسنا والدرع والخوذة والتعب
_شوكت النزول شوكت يخلص الانذار روحنا طلعت
علي:تخلص ان شاء الله تخلص
_سيدي تعال صورني
علي:ميانة خايسة
_وعلي تصويرك حلو تعال صورني
هذا الكلام بعد ما انتهى الواجب الرسمي وعلاقتي ويَّ جنودي خارج الواجب علاقة صداقة مو ضابط وجندي أبدًا
بعد شهر نزلت للبيت وصلت بـ 5:31 العصر مثل العادة كبار المنطقة كاعدين برا اللي همَّ جدي وابوي وعمامي وخالي وبعد اكو زلم من المنطقة
صكر كان يمشي ويوكع من شافني اجاني ضحكت وفتحت ايدي
علي:هلا وميت هلا ياحبيبي
شلتة وابوس بيَّ وهوَ متعلق بـ ركبتي ويضحك لزمت صكر بأيد حتى مايوكع وسلمت على الحاضرين حضني ابوي حيل وضل يبچي
علي:عليش البچي هذا أنا مابيه شي
ابو فهد:والله يابوية انهد حيلنا لا ليلنا ليل ولا نهارنا نهار ليش هيج بوية
علي:شسوي دوامي وتيلفوني طفى شحن بعد
ابو ادم:الحمدلله من رجعلتنا سالم ادخل لـ جوا العيال منتظرينك وكلبهم نار
ترخصت ودخلت وصكر بيدي ابوس بيَّ
علي:ولك مشتاقلكك فدوة لـ هل الوجه
دخلت للبيت فتحت باب الصالة وصحت
علي:ياهل الدار وينكم
الجدة:يمه ابو عيون الملح يمه هلا بطولك ولك يمه هلا بهل الصوت
علي:يابعد عيوني الاثنين
سلمت عليها وعلى البنات يمها وردة وريم وشهد
علي:چا امي وين رسُل وين الولد
الجدة:رسُل صارت عدها ولادة واخذوها للمستشفى وراحت وياها امك واسد وصهُيب مدري وين راح والشيخ عنده كعدة بالناصرية وراح واخذ ويا أمير وهسة جاين بالطريق
علي:يابه راح اصير عم للمرة الثانية
وردة: وخال
علي:عسل
وردة: ايي قبل فترة صار عدهم يأمن
علي:وانتِ عيني شوكت يشرف ابنج
ريم:ها شهرين بعد
علي:وجهج اصفر من هسة
ريم:من شفت رسُل انرعبت
علي:هههه الله يسهل
صعدت لـ غرفتي وبدلت ونزلت مو مال نوم مشتاقلهم سلمت على عسل كانت يمنا
علي : صرتي ام قبل فترة تبچين على جبس
عسل:هههه ركضت بينا الايام
المغرب اجوا الشيخ وامير وصهُيب
الشيخ:يابه وانا أكول ليش البيت منور ثاري انتَ جاي
علي:منور بوجودك ماي عيني
صهُيب:والله ماينطاق البيت بدونك صدك جذب
علي:يابعد حيلي
أمير:حزااام ضهررييي مشتاقلككك وحك هوَ علي
علي:نور عيني
سلمت عليهم ودخلوا لـ جوا بليل كالوا ولدت رسُل راحوا جدي وابوي وعمي ابو شاهين والشيخ مسويلها عملية فـ لازم تبات راحت خالتي ام اسيد واجت امي استقبلتها بالباب
علي:كواج الله
ام فهد:يمه يبعد طولي علاوي يمه فدوة اروحلك
علي:اسم الله عليج يبعد روح علاوي
امير:شني ترا اغار
ام فهد:ولك يمه مشتاقتلة فوك الشهر ما شايفتة وشهر ماعندي اخبار عنه يمه كلبي مثل النار والله الليل مانمته
علي:سودة بوجهه ابنج
دخلنا لـ جوا اسد ما اجه بات ويَّ مرتة ثاني يوم طلعوا من المستشفى الصبح بوقتها نايم لان التعب دكاني دك كعدت على صوت تيلفوني بـ 4:15 ابتسمت ضي عيني
علي: هلا بصوتج يبعد الروح
قمر:نايم مو لهسة نايم
علي:ايي نايم
قمر:كوم اكعد وروح لبيت عمك
علي:راح تجون
قمر:احاول اقنع ماما
علي:راح انتظركم واذا ما اجيتي راسليني نلتقي بالبستان مشتاقلج
قمر:خاف واحد يشوفنا
علي: وخلي يشوفنا بعد احسن
حجيت وياها شوية وبعدين راحت كمت سبحت وبدلت ونزلت اسد كاعد يشرب جاي
علي:مبروك ما اجاكم يتربى بـ عزك ودلالك
اسد:الله يبارك بـ عمرك يوم عرسك وافرح بيك
علي:بوجودك ابو منو صرت
اسد:ابو سند
علي:وسبع تنعام منك ومن سند
شهد: شفتهةة
علي:لا هسة رايح اشوفة
شهد:جنه نتفهه وابيض يخبل
علي:رحتي انتِ
شهد:لا امي ادكولي ابقي بالبيت محد يم عسل
اسد:شعدها عسل هسه تجي وردة كومي ويانة نروح وعود شوية وارجعي
شهد:والله لو هيج الخوة لو ما تراد
علي:بسرعة يلا
صعدت بسرعة بدلت ونزلت رحنا لبيت عمي اول ما دخلنا هلهلت شهد
شهد:افرشوا الأرض بالفراش الاحمر وانثروا الورد اجت عمة سند واخر العنقود
سبأ:هلا بيج هلا
شهد:فديتج يمه فدوة باع الوجهه راح احسدك
ام فهد:أنا مو كتلج ابقي بالبيت
شهد:علي واسد سحلوني سحل الا ترحين وأني اكلهم ما اروح وهمَّ يكولون الا ترحين واجيت
سلمت على رسُل بعدني واكف دخلت ام مهيب وقمر وياها ثنين بنات مرت مهيب ومرت مهيمن
ام مهيب:الحمدلله على سلامتك شغلت بالنا عليك
علي:الله يسلمج ولا يشغلج بالج على غالي
كعدت هيَّ يم رسُل خطفت نضرة لـ قمر اجت عيني بـ عينها ابتسمت ودرات وجها وانا طلعت بعد فترة رجعت رسُل للبيت وعسل رجعت لبيت عيالها ودامت ايامنا بهدوء
حياتي كانت بين الدوام والبيت وحياتي طبيعية ورا شهرين ولدت ريم وصار عدنا ولد جديد وطن
رجع خالي طلب ايد أسيل وأسيا ورجعوا الموافقة اول واحد خطب مالك ورا بيومين مهدي وزواجهم صار نفس اليوم
أمير:وضلع من ضلوعي اليوم معرس كللووششش
ياسر وايمن ماحضروا اخوان العروسات كانت فرحة من العمر تم عرسهم على خير ....
ماكو شيء والحياة حلوة وكلنا كلب على كلب فتحت موضوع زواجي والكُل أيد الموضوع
علي:ترحون تخطبولي البنية
الجدة:وياهيَّ التريدها
علي:قمر وقبل لا التحق اريد الخطوبة اتم
الجد:ان شاء الله بوية باجر بليل نروحلهم وان شاء الله خير
الشيخ:شوكت تلتحق
علي:بعد قرابة الـ ١٥ يوم
ام فهد:ان شاء الله خير
ترخصت وطلعت لكيت راهب ونمر كاعدين يم الشارع
نمر:اجه شاروخان
علي:وسم حتى سم شبيك
نمر:وين جنت حضرتك
علي:احجي ويَّ بنت عمك
نمر:راح اسوي نفسي ما اسمع تعال اكعد أنا شخص يأس من الحياة
علي:ها تعاركتوا
راهب:متعارك ويَّ ابوها
علي:ليش ولك
نمر:خيولي قهرني هاي المرة الـ 13 اروح اخطبها ويرفض شلت ايدي وغميتة وهوَّ شافني وعلكت بينا
علي:الله يطيح حظك چا شيقنعة بعد الكاظم
نمر: نذل ينكط سم ومرض ماتحملت وهذا سلطان ما يخليني ادخل عليهم بليلة ضلمة اخذها
راهب:حتى ابوك ما خلص منك
نمر:بس وعلي محد ياخذها غيري لو أنا لو الله ياخذها وعلي اخلي صدر ابوها كله فشك والُحسين مليت شناقصني من خرا بيك
راهب:اهداء يخوي تهون ان شاء الله
نمر:والله محد انهان غيري وطاح حظي
علي:حشاك بالاخير يمل وينطيها
نمر:هوَّ أنا عايش على هذا الامل وهيَّ تنوص عليه ابوي وابوي من خرا بـ ابوج
علي:غير ابوها طبعًا ماتقبل عليَّ وانجب واسكت
ابو ريام:السلام عليكم
راهب ،علي:وعليكم السلام ورحمة الله
سلم وعبر ونمر يخزر بيَّ ضلينا كاعدين لـ 1:30 بليل بعدين رجعنا للبيت
محد كان موجود كل واحد بـ غرفتة صعدت لـ غرفتي بدلت واجيت انام اندفر الباب
علي:خيررر
أمير:خير يصيبني وانا ابو الخير جاي اخذ ملابس
علي:اطلع برا وطفي الضوء اريد انام
هز ايدة ودخل فتح الكنتور يطلع ملابس اخذ قميص اسود
علي:كبل چم يوم اشتريتة وبعدني مالبسة رجعة لا اكوم اكسرك
امير:دروح شني عندك هواي أنا بعدني طالب وماعندي فلوس
علي:سودة عليه ماعنده فلوس هوَّوالخمط
اخذ القميص واخذ بنطرون راح طلع بسطالي
علي:المن مطلعة
امير:اريد أجربة
علي:رجع البسطال لا اكوم اكتلك بيَّ
امير:شني ماتلبسة شو يلمع
كمت اخذت القميص وشمرتلة واحد ثاني ودفرتة برا
علي:اذا اجيت بعد حظك اطيحة
امير:شني اوكف بعدني ما مخلص بعد حذاء وجواريب وعطر وساعة ونضارة ومحبس
علي:صابون شامبو وتسبح بالحمام وتعال نام يمي
امير:اي والله سويلي مجال يلا
علي:امشيي ولي وجهه الفكر
سديت الباب ودخلت وصوتة يكعد الميت ثاني يوم بليل راحوا الشيخ وجدي وابوي وعمامي وخالي
ام فهد:چا ليش مارحت وياهم
علي:بعدين اروح
لـ 11:30 دخل أمير يهلهل ورا جدي يضحك
الجد:ولك بسك فضحتنا
امير:الف الصلاة والسلام عليك ياحبيب الله محمد كللللووووششششش
ام فهد:بشروا
الجد:ابوها موافقة بقت البنية كال باجر اردلكم الجواب
امير:شني بالعباس موافقة البنية واخذوها مني وابوها كال كبعوا واخذوا بنتكم هي
قمر ما راسلت ابد وراسلتها ما تجاوب ثاني يوم بليل اتصلت امي علئ امها وتمت الموافقة
ام فهد:كللوووشششش الف مبروك يمه الف مبروك
اتفقنا على كلشي بهاي الايام قمر اختفت بيها دا الاختفاء
تركت كلشي وبديت احضر لليوم المنتظر
اجه يوم خطوبتنا صادف يوم الاثنين
صعدت لـ غرفتي حتى ابدل وراي بـ شوية صعدوا راهب ونمر
علي:غصبًا عليكم تحضرون
راهب:والله جنت مقرر ما احضر بس ماكدرت
نمر:نخاف منك مسودن وكلشي اسوي فـ لازم نجي
علي:ماتمشون الا بالعين الحمرة
ثبت نمر تيلفونة وخلا يصور
نمر:نوثق هاي اللحظات حتى بعرسي هم تلبسوني
راهب:شعجب ما لبست زي عربي
علي:نغير العربي
نمر:صدك انتَ شني قاطك اسود
علي:خايب نيلي نيلي
نمر:شني نيلي والحسين بيَّ سواد اكثر من النيل
علي:النيل لو الفرات
امير وعصابتة حركوا الدنيا نزلنا كدامي راهب وأنا ورانا نمر يهوس ويهلهل وكابلوا امير وياسر ومهند وايمن وامي وبيبتي وخالتي يطشن جكليت
امير: وفرحانه الدنيا بعرسك
طلعت برا كلها ضباط وشيوخ سلمت عليهم وماقصروا خابرت قمر
علي:خلصتي بعدج
قمر:اي خلصت بالبيت أني
علي:تمام نص ساعة ونجيكم
حطوا جادر لـ ناس هيَّ بنفس المنطقة بس الجادر خلوا بالاخير
توجهنا لبيتهم كعدنا شوية وبدا السيد يحجي بعدين كال نعقد
دخلنا لـ جوا وبدا يحجي لحدما وصل لـ طلب الموافقة
السيد:قمر رسول فارس هل تقبلين الزواج على سنة الله ورسولة من علي محمد فراس على المهر المعلوم بينكم فـ ان قبلتي قولي نعم وانتَ وكيلي
كررها تلاث مرات يلا حجت
قمر:نعم وانتَ وكيلي
السيد: على بركة الله صلوا على محمد وال محمد خلي الحبايب يهلهلن
مبروك عمي الف مبروك
علي:الله يبارك بيك
طلعنا سلمت على الموجودين افتريت الجادر وبرا انشليت بعدهي كالوا خل يدخل العريس حتى يلبسها الحلقة
دخلت صارت كدامي امي بست ايدها وراسها ودخلت وراها بيبتي صارت كبالي قمر ابتسمت وتقدمت عليها كعدت يمها لون البدلة كان لون هادئ
علي: مبروك ضي عيني
قمر:الله يبارك بيك
علي: الله يقدرني واكدر اسعدج
ام فهد:يلا يمه لبسها الذهب
علي:شني يمه هسة دخلت خل اشبع منها
ام فهد:هههه ولك يمه يلا نريد نرجع عشاء عدنا
علي:ديلا جيبوا الذهب
جابوا الذهب بديت البسها وصلت للكلادة
علي:هو الذهب بس لـ نحرج يلوك
كعدت شوية وبعدين طلعت منتظريني برا هم ماقصروا بالركص
تمت الخطوبة على خير كان احلى يوم بـ حياتي ورا الخطوبة بـ اربع ايام التحقت
بهذا التحاق رافقتنا اعلامية تستوجب عن حرب داعش التقت بأكثر من ضابط لحدما وصلت يمي بدأت تسئل عن داعش وأجاوب
-أساليب داعش اللي استخدمها بالحرب مثل شنو
علي:داعش استخدم هواي طرق حتى يكون هوَّ الطرف المسيطر اكثر ،استخدم السحر والشعوذة ، استخدم القوة والخوف على الأهالي حتى يكونون وياهم والبعض صار وياهم واستخدم حتى الحيوانات في عمليات التفجير
-اوف الحيونات شلون
علي: بوحده من العمليات اللي صارت انُ واحد من الاهالي كان عنده غنم خرفان ومن صار التهجير تركهم وطلع داعش استغل هذا الشيء واحد من الخرفان لبسوا حزام ناسف وطلعوا ويَّ مجموعة من الخرفان احنه شكينا بالوضع فـ بقينا بعيدين وقت محدد وانفجر
-هههه انتحاري يعني
علي: هواي واستخدم حتى الحمير يعني حاروا شلون يخلصون علينا
-كان قوي
علي:اكيد كان قوي جدًا اسلاحهم واضافة انُ داعش دعمتة هواي دول عربية وغير عربية فـ كان هذا الشيء بيّّ صعوبة علينا لكن الحمدلله خلصت
-الحمدلله بـرمضان شلون تسيطرون على الوضع
علي: ماجنه نكعد ومرت ايام علينا انُ لو نشرب الماي لو لا بوقت الفطور كان داعش يكبر علينا على شنو ماندري وقت المغرب وضلوا يكبرون
-هههه يستغلون وقت الفطور
علي:اكيد فرصة الهم لكن احنه مانكعد وحتى اذا كعدنا نتناوب قسم يكعدون يفطرون وقسم يقاتل ومرات لا
-ايام صعبة وماراح تنسي مرت على تاريخ العراق نكدر ندخل للبيوت
علي:اكيد تفضلي
دخلنا لـ واحد من البيوت نفس حطتهه متخرب خراب
-اثار داعش
علي:هاي المنطقة بالكامل صارت بيد داعش البعض من الاهالي انقتلوا والبعض صاروا وياهم
-ملابسهم واغراضهم
علي:كلشي موجود
افتريناها كلها رافقتنا من الصبح لليل كانت ويانة كادر كامل
دخلنا لواحد من البيوت بيَّ صور عوائل كلها دم
-شنو المعنى
علي:عائلة قتلهم داعش بقى فقط الاخ معنى الدم على الصور ياخذ ثارهم من داعش ولحد الان مانعرف اخذ ثارهم ام لا
-داعش انتهى من العراق بالكامل ام اله جذور
علي:صراحةً لا داعش اله جذور اله خلايا نائمة اله عوائل هنا بمناطق الموصل والانبار وغيرهم وحتى بعض مناطق اطراف بغداد وديالى داعش متواجد لكن خلايا نائمة داعش بـ 2017 طلع لكن بقت اله جذور
-اكو خطورة او انُ داعش يرجع للعراق مثل قوتهم
علي:لا احنه عدنا زلم تلاكي الموت وماتهابة لهذا السبب داعش حتى اذا رجع مو مثل قبل الناس عرفتة شنو واضافة انُ القانون صار اقوى بهواي وداعش موجود ما اكلج ماكو بس بنسبة 20٪ اللي همَّ خلايا وان شاء الله يخلصون لكن خطورة على العراق مثل خطورة 2014 لا
-احنه جدًا ممنونين لـ حضرتك رافقتنا هذا اليوم من الصباح الى الـ مساء شكرًا لحضرتك ربي يحفظكم جميعًا
علي:أهلًا وسهلًا
راحوا همَّ وانا رجعت اكمل واجباتي ونمر وراهب وياي وطول ما انا احجي ويَّ الإعلامية همَّ يتهامسون
علي:شعدكم مساع ولكم
راهب:انتَ مصاصة مفتوحة
نمر:بدون غلاف تحجي وتضحك وتبتسم ويَّ الاعلامية وين بنت عمنا عنك اطشر عرضها
علي:كواويد مو بيدكم
راهب:بس الحلقة تلمع بيدك
نمر:انتَ من خطبت لليوم صاير صاك
علي:انجب يلا للواجب مو انطيتكم وجهه كل واحد يروح يشوفة جنودة وامنوا المكان
نمر:نفس الرتبة ترا
علي:انجب وكوم
راهب:لو تدري بينة الوزارة هيج احترامنا چا خذتنا جلاليق للسجن
ورا أسبوعين نزلنا وطنكروا عليه نرجع عبرية
علي:منينن اجيبلكمم سيااارة من هذا المكان شيوصلنا للكراج
نمر:والحسين ما ارجع
علي:جهال انتم شبيكم
نمر:والحسن نروح عبرية
علي:كوم يلا كوم انعل اباهتكم لابو اليجي وياكم
نص ساعة احنه ننتظر تكسي للكراج وانوب انتظرنا السيارة تقبط وتعال دور سيارات البصرة مشمورة بأخر الدنيا
والتعب دكاني دك اريد بس اوصل الفراش حتى انام على ما وصلنا بالف ياعلي
سلمت على اهلي ونمت مباشرةً
وهيج مرت الايام بهدوء علاقتنا أنا وقمر كلش حلوة بيوم من الايام كاعد بالبستان أنا واسيد ونمر وراهب
سمعنا صراخ نسوان وصوت رمي اربع طلقات مو غيرهن
ركضنا لمصدر الصوت ......
........................................
أسيد: شمسي
شمس:ها عيني
أسيد:بعد عيني اريد غدة
شمس:صار بس اشر الملابس واجي اصبلك
رحت للغرفة مُتيم لكيتة كاعد شلتة ونزلت ابوس بيَّ
أسيد:شنو هالجمال ماخذ جمال الوالدة كلها
شمس:والوالد ماعايز
أسيد:لا يابه وين نوصل جمالج بس بيضاج يشع
شمس:هههه فديتك الازرك
ضحك مُتيم على ضحكت امه ضميتة لـ حضني كعدنا نتغده ورا يومين تمامًا اجتني قضية تابعة الئ احد الرؤس الكبار قضيتين وحدها استلمها علي واخذوا المقسوم منه والثانية اخذتها أنا وطبيعي حالها حال كل القضايا اللي استلمها مثل كُل مره
سابقًا أنا مستلم هواي قضايا بس أبدًا ما وصل تهديد او صارلي شيء لكن هاي غير تعبت بيها كُلش وارقام غريبة ضلت تجيني وتهديد مرتين وصلني
ماحجيت لـ شخص عن هذا الموضوع او بالاساس ما اهتميت أصلًا استمرت حياتي بهدوء
أسيد:نروح لـ زيارة
شمس:الله ياريت صار هواي مرايحة ومُتيم هم مازاير ابد
اسيد:كومي حضري غراضنا الفجر نطلع راح انطي خبر لـ هلي
شمس:شوفهم بلكي يروحون ويانة
اسيد:ماشي
طلعت رحت لـ بيت اهلي سلمت وكتلهم
اسيد:الفجر نروح لـ زيارة ماتروحون ويانة
ابو اسيد:والله بوية انا ما اكدر
اسر:روح انتَ ومرتك طلعه عائلية
اسيد:ابد قافلين يمه فرح هوس ياسر
ياسر:انا عندي دوام
فرح:وأني هم
هوس:أني ما اكدر
ام اسيد:أنا هم مثل ماكال اخوك يمه روحوا وحدكم ترحون وترجعون بالسلامة
اسيد:الله يسلمكم
ترخصت منهم ورجعت للبيت صلينا وطلعنا لـ كربلاء مباشرةً
اسيد:عيوني ادخلين وحدج شلون
شمس:اي عادي
اسيد:خاف تضيعين جيبي مُتيم اخذه وياي أنا ازورة وانتِ اوكفي خل اشوف مراة تدخل وياج
شمس:شنو صغيرة
اسيد:لا يروحي انتِ بس خاف كلشي يصير من اطلعين تلكيني هنا زوري وصلي واقري الزيارة على راحتج واذا كدرتي الزمي الشباك على راحتج ماشي
شمس بـ أبتسامة:ماشي يكلبي
اجت مراة كبيرة بالعمر وياها ثنين بنات
اسيد:حجية بلا زحمة عليج ممكن طلب
الحجية:بعد امك يمه كول
اسيد:فدوة لـ كلبج زوجتي وحدها وماتندل زين بس تاخذوها وياكم تزور وتطلع وأنا انتظركم هنا
الحجية:يايمه من عيوني تعالي يمه
تشكرت منها واخذت مُتيم ودخلت لـ جوا كان ازدحام حيل بس أنا طويل يعني ما اختنك خليت مُتيم على ركبتي حتى لا يختنك ودخلت وصلت لـ شباك زرنا وكعدت اصلي مُتيم يمي
من شافني خليت التربة راح جاب تربة ويصلي مثلي كان يكوم ويطيح توا يمشي قريت قران والزيارة وطلعت من صحن الامام الحُسين عليه السلام ماشفت شمس توجهت لـ ابأ الفضل العباس علية السلام كذلك زرت وطلعت انتظر شمس
تأخرت يلا اجت ويا المراة
أسيد:ممنون منكم خالة
الحجية :دير بالك عليها يمه مرتك ماتتعوض
اسيد:بعيوني وكلبي خالة
راحت هيَّ اجت شمس كعدت يمي تباوع لـ شمس ومُتيم نام بـ حضني
اسيد:ضاوية مثل وجهج
شمس:شكد احبك
اسيد:حبي الج ماكو مثلة بالدنيا وحك العباس
كعدنا شوية نباوع لزوار
اسيد:نروح لـ نجف لو تعبتوا نرجع للبصرة
شمس:لالا حباب نروح لنجف
اسيد:چا يلا خلي نتوكل حتى نروح لبغداد
شمس :والله
اسيد:والله وداعت عيونج نزور ونسلم على اهلج ونرجع
شمس:خاب فديتك وعلي لو هيج الزلم لو ماتراد
اسيد:هههه يلا امشينا
طلعنا مرينا على السوك مُتيم يريد لعابة اشتريتلة وحلويات وطلعنا لـ نجف كذلك زرنا ماطولنا توجهنا لـ بغداد رحنا للامام كاظم علية السلام وبعدين رحنا لبيت اهل شمس
سلمنا وكعدنا ساعتين تقريبًا وبعدهي ترخصنا وطلعنا للبصرة
اسيد:تعبتوا مو
شمس:تونسنا هم ربي لا يحرمنا منك
اسيد:بخدمتج انا شعندي غيرج
وصلنا البصرة بـ وقت متأخر مباشرةً بدلنا ونمنا كعدنا ثاني يوم الضهر
شمس:شنو الغدة
اسيد:لا تسوين شيء لبسي شالج وبدلي ملابسج جيبي الغراض اللي جبناهم لـ هلي وتعالي
شمس:يا خاف عيب نروح بهذا الوقت
اسيد:كومي كومي حطي العيب بـ جيب الجيب مشكوك طاح العيب يلا
ضحكت وصعدت بدلت ونزلت هيّ ومُتيم اخذت الغراض منها وطلعنا
اسيد:اكلج
شمس:ها
اسيد:شني ماكو اخو اخت لـ مُتيم
شمس:خل يكبر
اسيد:شني كافي اريد بعد زعطوطة
شمس:هههه الله كريم
اسيد ،شمس:السلام عليكم
الكل:وعليكم السلام
ابو اسيد:هلا بوية هلا مقبولة الزيارة
اخذ مُتيم من شمس وكعدنا يمهم
اسيد:شنو غداكم
فرح: دجاج
اسيد:يلا شمس كومي
ياسر:هااا تاكلون غدانا
اسيد:انجب لا اخليك انتَ تصبلنا
مرت الايام وحياتي كانت حلوة وعايشين بـ سعادة ورا فترة شمس طلعت حامل ومتعرف بـ نفسها كانت بـ الشهر الثالث
بيوم من الايام كاعد بالبستان وياي علي وراهب ونمر سمعنا صراخ وصوت رمي الرمي قريب ومن جهةة بيتي
ركضت للبيت شمس واكعة بالباب وسابحة بـ دمها ركضت عليها حيلي مهدود
اسيد:شمس شمسييييي
حجت بـ صعوبة حيل اخر كلمتين ودموعها على خدها
شمس:مُتيم أمانة عندك أسيد مُتيم امانة عندك دير بالك عليَّ
ومن بعدهي غمضت عيونها الحلوة فاضت روحها لـ ربها
ماصدكت شلتها وخليتها بالسيارة وتوجهت للمستشفى اخذوها مباشرةً للطوارئ اقل ساعة وطلعت الدكتورة كالت
الدكتورة :البقية بحياتكم المريضة متوفية قبل لا توصلون
نفيت الخبر صرخت بوجها لا لزمني ابوي دفعتة ودخلت لجوا كعدت يمها وأنا ابچي على حب حياتي الراحت مني راحت شمسي راحت
اسيد:شمس بوية شمسي حاجيني شمس ابنة بعده صغير بعده محتاججج شمسسس افتحييي عيونجج وحاجيني هذا أنا اسيدج كلتيييي ما اتركك كلتي راح نربي جهالنا سوا شمسسسس حاجيني احلفج بداعت مُتيم بداعت حبنا وعشكنا بداعت ايامنا بداعت دموعي شمس فدوة حاجينيييي ربييييييييي دخيلكككككك
بعدوني عنها واخذوها مااعرف منو لزمني بس ماجنت اشوف كدامي غيرها
شمس راحت مني بيوم وليلة قتلوها قتل !! شمسي راحت
راحت مني تركتني وحدي بهل الدنيا
اخذوها كملوا الاجراءات وأنا كاعد يمها احجي وياها بس ماتحجي
اسيد:شمس تعرفيني اضوج من الشخص اليتجاهلني احجي وياي جاوبيني زعلانة مني شبيج افتحي عيونج الحلوة شمسي ضحكتج ماتغيب عن وجهج عليج الله حاجيني فدوة
ابو اسيد:ولك بوية كافي شلعت كلبي
اسيد:راحت بوية راحت شمسي راحت مني راحت عافتني وحدي عافت ابنها بوية أنا السببب بوية بسبببيييي قتلوهااا ولججج ذنبججج بربكتييي والله ما اسامح نفسي والله
اخذنها وطلعنا للبيت أنا جسد بلا روح
اجوا اهلها وعيني ادور على مُتيم الامانة الامانة مُتيم وصيتها مُتيم
اسيد:مُتيم وين
ريم:فوك
اسيد:روحي جيبي
ريم:قبل شوية نام
اسيد:خلي نوم العوافي
توجهنا النجف وحيلي مهدود راسي على صدر ابوي ودموعي مانشفت
ابو اسيد:الله يصبرك يابوية الله يصبرك
اسيد:الله ياخذني وراها يابوية الله ياخذني وراها مو كد الفراك بوية مو كده والله
وصلنا النجف اخر محطة تجمعني بيها اخر مرة اشوفها اخر مرة راحت بعد مترجعلي انتهت حياتي وانطفى نورها من غمضت عيونها
انتهت حياتي بالكامل وبقت بركبتي أمانة اللي هوَ مُتيم
وصلنا للمكبرة حتى يدفنوها كعدت يمها حاضن جسدها بكل قوة
اسيد:ادفنوني وياها تخاف من الضلمة والله تخاف ماتريد الضلمة ولا تريد الوحدة خلوني وياها وخلوا ابني يمكم امانة خلوني اموت وياها
سحبني الشيخ حيل هوَّ وشاهين واخذوها مني
اسيد:لااا بس اودعها لاااا عليكم الحُسين لاااا
الشيخ:خلي يودعها
تركوني رحت يمها صرت ابوس بـ جسدها مثل المخبل صار حالي مثل الام وفقدت ابنها الوحيد اللي تعبت عليَّ ونذرت حياتها لـ عيونه
اخذوها ودفنوها دفنوا روحي وياها رجعت جسد بلا روح اول ما نزلت مُتيم شايلة خاله وواكف اخذتة منه حضنتة حيل وهوَّ تعلق بركبتي
ثنيت ابچي وأنا حاضنة
مُتيم:وين ماما
اسيد:اااخخ ياااربييي اختبارككك صعببب والله صعب
مُتيم:اريد ماما
اسيد:حبيبي بابا روح العب ويَّ صكر بعدين تجي ماما
اخذوا مني دخلت لـ بيت اهلي ماخلوني ادخل لـ بيتي بدلت ملابسي وطلعت استقبل الناس بحيل مهدود عيوني كوه اشوف بيهن وكوه واكف على حيلي
عيوني تروح للمكان اللي انقتلت بيَّ
بعد ماخلصت الفاتحة دخلت لـ بيتي اول مادخلت نزلت دموعي كل مره من ادخل هيَّ تستقبلني وصوتها مالي البيت
هالمره ماكو هدوء تام
دخلت للغرفة اجت كبالي صورتنا بيوم عرسنا بس الصور ضلت افتريت بالبيت حيلي مهدود كعدت على الدرج وأنا ابچي
اجاني صوت امي
ام اسيد:يايمه شد حيلك ابنك محتاجك
اسيد:ماضل حيل يمه والله ماضل شمس كسرتني وخذت كل حيلي راحت مني وتركتني
ام اسيد:امر الله يايمه امر الله
اسيد:أنا چتالها يمه أنا بسبببي انقتلت بسبببييي
ام اسيد:لا تحجي هيج يمه لا تحجي هيج البچي مايفيد والله يايمه كلبي نار وحيلي انهد بس مابيدنا شيء البچي لو يرجع الميت چا بچينا عليّّ طول عمرنا
اسيد: اوف يايمه اوف
مُتيم اسبوع يم اهلي وبعدهي جبتة يمي كل ساعة يسئل عن امه ويضل يبچي وبالف ياعلي يلا يسكت
اسيد:نروح يم صكر
مُتيم:لا اريد ماما
اسيد:كوم نروح نشتري
ضل يصرخ بـ صوت عالي لا ويبچي حيل شلته وطلعت برا وهوّّ يضرب بيه ويصرخ اريد ماما
اسر:شبيّّ
اسيد بـ تعب:يريد امه
اسر:لا حول ولا قوة الا بالله
اخذه مني اسر ضل يلعب ويا وصعده فوك السيارة يلا سكت كعدت بالباب خليت ايدي على راسي حيلي مهدود وين رحتي وعفتيني خليتي امانة ثكيلة حيل
اجه ياسر اخذ مُتيم وراحوا للمحل واجه اسر كعد يمي
اسر:شد حيلك خوية ادري مصيبتك مو قليلة بس شسوي مابيدنا شيء
اسيد: كارهة نفسي لـدرجة مو طبيعية
اسر:لا تحمل نفسك ذنب انتَ ما مسوي ادعيلها بالرحمة ودير بالك على ابنك هوَ هسة محتاجك اكثر من عدنا كلنا الام محد يعوض مكانها بس نحاول شد حيلك خوية شد حيلك
شوية واجو هوَّ وياسر يضحك مشتري شمر نفسة عليه اخذتة كعدته بـ حضني ضل ياكل وهيج مرت الايام كل كم يوم اخذ مُتيم ونروح للمكبرة
بيوم نايم واندك الباب طلعت صكر
اسيد:هلا بالشيخ الصغير
صكر:هلا بيك خالو مُتيم وين
اسيد:مُتيم؟ غير يمك
صكر:لا ما اجاني
اسيد:خاف يم ياسر
ضل صافن بـ وجهي ماحجه شي
اسيد:صكر
صكر:خالو رحت لـ ياسر قبلك كال مو يمي وأني عبالي يمك واجيت بس هوَّ لا يمي ولا يم ياسر
اسيد:شنووو چا وين راح
طلعت بسرعة بالشارع اباوع ماكو انتبهت باب البستان مفتوح
صكر:يمكن بالبستان
رحت للبستان بسرعة لكيتة كاعد يم شجرة ويبچي
صكر:مُتيم شبيك
اسيد:شبيك بابا ليش تَبچي منو وياك
مُتيم:اريد أمي هسة اريد أمي وين راحت ها وين
اسيد: شهل الحجي هذا مُتيم مو اتفقنا انُ ماما فوك بالسماء هيَّ تشوفنا وتسمعنا
مُتيم:أني ليش معندي ام ها ليش راحت
صكر:منو حاجي وياك اكيد باقر الزفت
اسيد:باقر منو
صكر:من المنطقة ابن رياض
اسيد:حاجي وياك شكالك
مُتيم:والله هوَّ دوم يكولي أني عندي ام وانتَ لا والله
صكر:والله الا اطيح حظها
راح صكر يركض ومُتيم مستمر يبچي
اسيد:صكرررر ولكككك صكرررر
ولا رد الشيخ وهد شيلزمة بعد شلت مُتيم وسكتة
اسيد:صير مثل صكر من واحد يحجي وياك سكتة لا تخلي يتقوى عليك ماشي بابا ومعليك بكلامهم ماما تشوفنا وتسمعنا بس هيَّ ماتجي هسة
مُتيم:تمام
شلته وطلعت رحت ورا صكر لكيتة يتعارك ويَّ ابو باقر
صكر:أدب ابنك خوش ولا تخلي يتجاوز على الناس
رياض:دروح عمي روح بعدك هالطولك وادور طلايب الله يستر من تكبر
صكر:ابنك اذا الزمة اموتة والله وما ادور طلايب مثلكم
اسيد:صكر خالو كافي وانتَ رياض ابنك خلي عندك ولا يوصل يم ولدنة لا تخلونه نتخارب علمود جهال
وهيج مرت الايام مُتيم صار من يشتاق لـ شمس يحجي ويَّ صورتها ومن يتحلم بيها او اييي حلم يصيحني ويجيب صورتها ويكعد يسولف واذا
اشتريتله شيء يروح لـ صورتها ويشوفها وقبل لا يطلع من البيت يبوس الصورة ويطلع
وهاي حياتي وهاي قصتي
لا تزوجت ولا حبيت صرت لـ مُتيم أب وأم وأخ وأخت وصديق وكُلشي
من راحت شمس انطفت حياتي وانتهى واهسي بـ كُلشي بس عايش واكابر علمود مُتيم
كعدت يم كبرها اعاتبها وحيلي مهدود
اسيد:شمس تدرين شنو صار بيه بفراكج تدرين كلبي شصارر بيَّ بفراكج كلبي مارف بس عليج ولا راح يرف على غيرج شوفيني شصاير بيه شصاير بحالي ادعيلي اجي وراج تعبت شمسي تعبت أنا مو كد الحمل ولا الفراك ولا كد الامانة الدنيا بعدج ما اريدها تدرين بيه شكد احبج أنا ما أريد شي من الدنيا بس شوفت عيونج بس اشوفج والله ما اريد شي لا فلوس ولا منصب ولا بيوت ولا شي اريدج انتِ اريد اشوفج انتِ هديتي حيلي شمسي هديتي حيلي تسمعيني شوفيني شصاير بيه شمسسس والله كلتي مااعوفككك ليش تركتيني بنص الدرب ليش
نمت على كبرها ابچي
وهاي حياتي بعدها
كل ليلة جمعة اروحلها ابچي يمها واعاتبها
كبر مُتيم وهيَّ مو يمه
كبر وهوَّ يتمنى بكلشي امة تكون موجودة
استمرت حياتي صح
بس جسد بلا روح
حياة بدون طعم بدون واهس
عايش لـ خاطر مُتيم
عايش لـ خاطر عيونة
عايش بقيت من أمداني
الماخذك چا ما خذاني
بيوم وليلة انقلبت حياتي من السعادة والفرح الى الالم والحزن والفراق دخل الموت بينا وخطف شمسي
_أنتهت قصة أسيد وشمس بالموت
بقى اسيد مكسور الى هذا يومنا
وبقى مُتيم يتيم الام وكُل فرحة يريد امه ويا
وبقى اسيد يلوم نفسة ويحمل نفسة الذنب !
الى هذه الساعة
رحلت شمس الى دار حقها
وتركت خلفها طفلًا يفتقدها
بين حينًا واخر
وحبيبًا ينعاها في كُل ليلة
وأم باكية عليها
واب مكسورًا
وكُل محب يذكرها
يامن عرفت قصتها ولوعة زوجها واحبابها
ادعوا لها بالرحمة والمغفرة
ولمن بقية خلفها في دار الدنيا ينعاها
بالصبر والسلوان
