رواية نارا حيدره الفصل الثالث والثلاثون بقلم نمارق رحيم
هو انه بيدي ؟!
شلحگت؟
الناس ما تدري شعشت
مالحگت أفهم ترى "مو كلشي ردته يريدك"
الغلطة مني
تعلمت ماعيش وحدي وهالضعت
لو مرة وحدة بهالعمر
متعلم اقوى وعالصبر
چا مابچيت من اسمع حچاية بعد ما افيدك
عمريش هذا ال بس ضعف ؟
عمريش هذا الينحسب
من حضن أمي لإيدك !
⭐⭐⭐⭐⭐⭐⭐⭐⭐
ابتسم وگال.. اثبتيلي حبچ من رح تتمسكين بزواجنا، رغم اخطائي لكن وجودج يمي يعنيلي هواي! .
-الله كريم يصير خير بوقتها، اسألك سؤال؟ .
هز براسه بمعنى (اي) .
-ليش دائماً تسكت ما تكمل اذا تبدي بالموضوع ما تكمله وتخلي الطرف المقابل هو يدور اجوبة..
-ههههه دريت بيچ هيچ رح تسألين.. انه هذا طبعي من صغري ما احب الوضوح يمكن صفة غريبة بيه بس هذا انه..
صرخت رغد وهي تدخل للغرفة گال الها.. ها يروح ابوچ شبيچ منو البچاچ اكسر راسه گولي؟..
- خشن خشن
-شبي حسن شمسوي؟ مزعل الحلوة مالتي اكتله بابا؟..
سكتت مبرطمة شفايفها وعيونها مغورگه بدموعها گمت شلتها اخذها مني وباسها ظل يهز بيها ويرفعها ويضحك يحاول يلطف الجو الها..
حسن: يابة لا اعرفك و لا تعرفني حويدر وانه مو اخوك بنتك اذا دخلت لغرفتي اموتك ولحسين..
حيدرة:- هااا يابه شسالفة شبيك وياها؟؟..
- لك العطر أمس أشتريتها بـ85 الف ماركة دخلت رغيده سوت هجوم بغرفتي وكسرتها
حيدرة: نمونه هي 85 وبعدين هي طفلة وتريد تلعب
حسن:- خليها تلعب بغرفتك وتكسر غراضك على راحتها..
حيدرة:- روح يابة روح نعم الله عليك..
رجع لغرفته واني تمددت..
دمعت عيونها وصرخت رحت اسكت بيها اجه هو وشالها لحضنة ضل يدغدغ بيها ويبوسها من خدودها الترفه وهي سكرت ضحك..
صار الليل تعشينه سويه ورجعت للغرفة شفتها نايمة دخل حيدرة بيده علاگة..
-هاي جبتلها كم قطعه ملابس بدليلها باچر اجيب ملابسها البقية..
-انت ابوها وبدل الها راسي يأذيني رح انام..
-من هالعيون وسلامة راسچ هذا كله مني؟..
-انت شتگول؟..
-افا لحظة ابدل الها واجي..
-وين تجي..
-لحضنچ..
-حيدرا دايخة والله مابيه اتعارك والله اخلي الشيشة العطر هاي الي اگبالك بعيونك..
-نوب عيوني تنعمي وشلون تشوفيهن..
-ماريد اشوفهن منو گلك ميته عليهن..
-منو چانت تتغزل بيهن..
-يمتتته؟..
-منو گال مو عيون صاروخ..
-لاتچذب شوكت هاي..
-منو گال غمازاته سحلني..
-اوووي سحلني من جمالهن هنه..
-اروح فدوا للضايج مني..
-دسكت حچي يفيدك وطفي الضوه..
-تأمرين يابه..
بدل الها ونيمها طفه الاضوية ورجع تمدد يمي..
سألته :-انت چنت عايش وياها..
-لا..
-لعد منو الي كان يهتم بيها طول هاي 3 سنوات
-مربيه..
-اها حلو ومربيات هم..
-بگد عمتي الله يرحمها خاف عبالج اخلي عيني عليها..
-هااا لان بگد عمتك لو بگدي عادي؟..
-لا عيوني مليانه بيچ شسالفه..
-واضح وهاي بنتك تگلك هلو..
-بنتي قبل ما ارتبط بيچ..
-حچي يفيدك حيدرة افندي.. انت ليش ما كلت لأهلك متزوج ؟
-ما اريد يعرفون وبالأصل ما چنت احچي لا ويا ابوي ولا امي.. بس حسن گلت اله لان ما اضم علية شيء..
-ويمته تحچيلي الحقيقة؟؟..
-عن قريب اصبري..
-شغلك رح تكشفة؟..
-اي ان شاءالله..
-حيدرا الئ متى حياتي وياك هالشكل!..
-بيد الله
-بس اني انسانه عندي گلب ومشاعر مو حجر ترا مليت والقران ملييييت..
-ما جبرتچ ناري گلتلچ تتحملين گلتي آي..
-آي فعلاً هو كله بسببي.. تصبح على خير..
- ناردين وعلي تعبان
ما جاوبته تغطيت ونمت بعيد عنه سمعت تنهداته..
گام طلع فرشه من الكنتور فرشه بالگاع شال رغد على كيف نيمها عليه وباسها بخدها ورجع يمي..
حيدرة: ناردين ضوجتچ؟ جاوبيني ادري بيچ گاعدة ناري لا تنامين وهيج مقهورة مني..
-ما صار شيء متعوده لاتخاف ما اموت رح اگعد وتشوف عيوني..
جر ايدي من البطانية وگال.. ناري ما أحب اشوفچ ضايجة بسببي صدگيني جاي احترگ لاعبالج متونس..
رديت بهدوء ..عوفني انام
-وتالي شنو بس فهميني؟..
-عوفني حيدرا عوف ايدي..
گعد يمي جرني لحضنة مسح علئ شعري بيده وهمس شششش ناري احچيلي طلعي الي بگلبچ..
-حيدرا انت داتقهر بيه كل يوم سچاچين بگلبي وما عندي حل غصبا عني اسكت..ماعندي احد بهالدنيا غريبة..
-ولچ والله انه استاهل ما الومچ بس لا تحگريني ما اگدر والله ما اگدر..
-احس روحي وحيدة..
-اذا تحسين بغربة اصيرلچ وطن..
-وطن يبيعني ما اريده..
-كل شي جاي اسوي حتئ ما اخسرچ..
-شنو تقصد بكلامك..
-بويه نامي يا بعدهن نامي يناري..
سكتت وهو تنهد عيوني بعيونه بقى صافن بوجهي واني نعست من الم راسي ومعدتي غفيت..
خلاني على صدرة ونام دفعته وابتعدت من حضنة گلبي يأذيني أنطيته ظهري تغطيت ونمت..
.....
حيدرة..
ثاني يوم طلعت الصبح من البيت بالطريق خابرني رائد..
-ها الله يساعدك
رائد:- هله حيدرة يساعدك الله اگلك ما اگدر اجي للمركز..
-لك منتظرك لا ادگ الناقصة بيه..
- لاا يابه بس امي مريضه وحگ الله فد مره حالتها صعبه كلش متخربطه البارحه و هسه اني راجع لولايتي كربلاء رح اوديها للدكتور
-هاا الله يشافيها إن شاءالله سلامات بس منو بقئ بالمركز..
-الفريق كله موجود، لاتقلق وحمزة وعثمان موجودين هم..
-زين چَا ويمته ترجع؟
-فد يومين تستقر حالتها وارجع لبغداد..
-وياك حمايه انت؟
- لاا رحت لوحدي بسيارتي
- لك خاف يصير عليك شي، لو شخص مراقبك
- لاا يابة شسالفة منطقتي محد يندلها اطمئن
- زين من ترجع خابرني
- آي الله وياك
نزلت من سيارتي دخلت للمركز واتجهت للمكتب فتحت الباب وفتت شمرت السويچ طلعت الحاسبه وشغلتها..
مرت ساعتين جاي اشتغل انفتح الباب..
فهد: سيدي هذه الگهوة إلي طلبتها
-شكرا لك حبيبي بس خليها هنا..
خلاها علئ الميز و قبل ما يطلع
التفت علية
فهد: صدگ نسيت اخبرك سيدي يگول حمزة الولد الي حبسة عثمان بالسجن بسبب التحرش.. بعده بالسجن واهلة يريدون يطلعونه شنو تگول أنت شتقرر؟..
أبتسمت وعيني بالشاشة جاوبتة.. مو ابالي هالحيوان..
فهد: يعني شنو..
-عثمان يتصرف مو شغلي هذا هو يعرف كلش زين شنو يسوي..
فهد: تمام حاضر..
-روح علئ شغلك حبيبي عدنا شغل طويل اليوم لا تتأخر..
فهد: تمام رايح..
رجعت علئ الحاسبة ..
رادوتني ناري بتفكيري بتسمت لا اراديا التفكير بيها خلاني اتشرد وما أركز بالشغل عدت التقرير اكثر من مره شششش حيدرة ركززز..
خطر علئ بالي الملف إلي يخصها ويخص عائلتها تذكرته.. يا يابة شلون نسيت وغلست على الموضوع كلش راح من بالي! ..
گمت من الكرسي توجهت للميز فتحته دورت علئ الملف طلعتة جبت كوب الگهوة اشرب واقرا راجعت الملف كله..
تالي وگعت عيني علئ "أسم العشيرة" فتحت عيوني بوسعهن بدهشة
نفس عشيرتي واللقب أنصدمت بذهول والكوب طاح من ايدي وأنكسر
كل إلي قريتة بهذا الملف يصدمني اكثر ويثبت على شكي إن صح ويٲكده!!..
سديت الملف وأستنتجت إن شكي بمحله ابدا ماچنت أتوقع إن "ناردين" تخصني من زمان!!!
قضية قبل 19 سنة بعد كل هذه السنين الطويلة عرفت حقيقتها!!..
اخذت الصورة التجمع ناردين وأختها وأمها وطلعت بإستعجال ركبت سيارتي ورجعت للبيت بسرعة دخلت لغرفة أمي وقفلتها لحتى محد يدخل .
گعدتها حچيت وياها بهدوء تالي سئلتها:
-حجية تذكرين الألبوم الصور مال عائلتنا ؟
-أي شماله ؟
-بعده موجود عندچ ؟
-أي موجود ببيتنا بالبصرة .
-كُل الصور موجودة بي مو ؟
-أي كلهم صور قديمة ومن سنين
-متأكدة؟
-أي
-يصير خير .
صعدت للغرفة رغد بعدها نايمة بدلت ملابسي واخذت محفضتي والصورة..
ناردين:- وين رايح..
-للبصرة، رايح لشغل كلش مُتعب ورح يطول فترة لحتى يخلص بالي كلش مشغول وكلش تعبان انه .
-ها سلامتك من التعب .
-ديري بالچ علئ رغدتي ولا تگولين لأحد رايح للبصرة أنا إذا اندگ الباب لا طلعين أنتي حسن موجود هو يتصرف
-ماشي .
-إن شاءالله ما اتأخر ديري بالچ على نفسچ .
حضنتها وأبتسمت.. أسف على امس يمكن جرحتچ حيل ونمتي مقهورة مني بس الله شاهد الي دا يصير مو بيدي !! .
ضحكت بحرگه گلب وجاوبتني باللامبالاة..
ناردين: عادي مو شي جديد على نارك دائما تجرحني بكل ليلة وتدري شنو اگول؟ اگول يجي يوم وكل هلجرح يختفي ورح ارتاح راحة ابدية يمكن اضحي هواي واسكت واصبر واتحمل بالنهاية انسعد والله كريم..
ابتسمت وبست ايدها.. ناري انا كلش هنيالي بيچ والله احمد ربي صرتي الي.. محظوظ بيج هواي..
ناردين: ترجع بالسلامة حيدرة .
-هلمرة حيدرة مو حيدرا؟ .
-أي .
-أخ ياناري يا بعدهن، أنتي أحتويتيني بوقت غربتي، عگب عينچ وين ما أروح غريب، أنا مستقوي بيچ وكلش مهم وجودچ يمي ..
حضنتها قوي ضميتها لصدري..
ناردين: ترجع بالسلامة .
خلا ايده على گلبي وگال: سلامتي من أسمع نبضات گلبچ .
ودعتها وطلعت..
...
طلعت من البيت رحت للبصرة لمنطقتنة
فتحت الباب عندي نسخه من المفتاح
دخلت للبيت كله تراب و خنگه
دخلت للغرفة فتحت الكنتور إلي بي الالبوم دورت عليه حاشگته وياا الدشاديش طلعته وگعدت بالطارمة متٲكد إذا كل الصور بي ٲذن صورتها موجودة
چان أشوفها طلعت الصورة و قارنتها بالصورة إلي عندي
نفس الشكل علئ رغم ما أتذكر شكلها بس فعلاً هذِه خديجة !!
طاح الألبوم من أيدي وگفت مصدوم معقولة هيچ الدنيا صغيرة وخلتني أتزوج بنتها بعد موتها ؟
طلعت موبايلي خابرت علئ سالار بسرعة وگلت الهُ ..
- عائلة ناردين أنا أتكفل أبحث عليها أنت لاتسوي شي خلي الموضوع علية
رجعت لبغداد بالليل دايخ و راسي يفتر
تمددت بالغرفة صحت لناردين
اجت و سدت الباب ..
-بويه عفية جيبيلي فاليوم بريستول أي شيء ينشرب راسي رح ينفجر وعلي..
ناردين: راسك يوجعك صداع؟؟..
-اي يناري حيييل..
گعدت يمي خليت راسي بحضنها تلمست جبيني وصارت ادلكه بيديها الناعمات بهدوء..
-عشتي..
-هذا كله من الشغل ابد ما داشوفك ترتاح انت چنت من الصبح ليهسة بالبصرة.. شغلك دمرك
-آي يابعدهم..
-هسة شويه وترتاح
دخلت رغد للغرفة گمت شلتها وبستها.. التفتت عليها وگلت إلها..
حيدرة:- ناري فدوا اروحلج اخذي رغدتي نوميها او سويلها شي تاكلة رايد انام فد ساعة..
-آي ماشي
نمت من الصداع ... مر أسبوع ساكت منتظر الوقت المناسب حتى اگلها لان بعد ما اريد اضم عليها شيء خلص سكتت بما فيه الكفاية . تحملت هواي وچذبت عليها وخليتها تصدگ بهواي كلام لحتى ما تفكر وتتدخل بشغلي وأدري رح تصير مشاكل بسبب هاي السالفة . رجعوا من أربيل سالار ومصطفى واخته گلت اله تعال لبيتي أرتاحو وفعلاً اجو نامو للعصرية وگعدوا . فاتحته بالموضوع بخصوص بنتي، ظل صافن خلصت كلامي وگام يفشر ويعارك بدأ حسن يهدي بي جن جنونة تدخلت ناردين گالتله اهدئ أني قابلة . باوعتلها وأنعصر گلبي على الرغم الموقف شگد قوي بس تقويت من شفتها وياي مو ضدي . عرفت إختياري لأول مرة بحياتي چان صحيح من أختاريتها تكون ناري ! . بيومها وعدت نفسي ما رح أخدشها حتى لو حالتي مو بيدي أحاول ما أذيها وأكمل علاجي .
بقوا يومين ورجعو لبيته وصارت الگعدة عمامة وخواله وامه على البيت سعاد تريد ترجع تعيش بالبيت و سالار ما قابل وقافل ما تجي تعيش وياهم! وأقترحوا يقسمون البيت ولو هو بيت صغير مايسوه حتى يقسمو وماچنت أريد أتدخل بس من حاچاني حتئ اتدخل تدخلت
حاچيت عمه الچبير يسد الموضوع أفضل والبيت ماينقسم و يظل الهم وبطريقتي الخاصة سكتتهم و الكُل سد حلگه وسكت و بلع السالفة
خاصتاً بعدما عرفو إن جاسم الله يرحمه مسجل البيت بأسم سالار كونه أبنه الچبير لذلك الكل سكت
...
نـارديـن
من اجو عدنه فاتحتني نور بالموضوع زواج سالار فرحت خطية من حقه بعد كل هذه التعب التعبة يكون عائلة ويستقر، گلتلها منو إلي ابالچ يتزوجها ؟ .
كالتلي :- شنو رائيچ بــ طيبة ؟
-نور الظاهر مخططه لكل شيء !؟ .
نور: لااا بس أخذ رأيج ههههه
- ولچ أنتي زوجتيني لحيدرة نوب رح تزوجين سالار لطيبة بقئ بس مصطفئ دوريله وحدة زوجيله رغد
نور: هههههههه فوگاها
- دسكتي يمعودة
نور: هسة شنو گلتي ؟
-ما نلكى احسن منها تناسب أخوي على أقل مو غريبة
نور: تمام لعد
...
من راحو خابرت سالار مكالمة جماعية أني ونور علئ رغم زعلانة منه لان ضم عليه وما گال إلي حـيدرة عنده بنية
قنعناه بيها، مع العلم هو تفاجئ و گال :- ما مخليها ابالي ابــد،
وقبل و وافق، وثاني يوم اجه هو و عمامي اثنين وفاتحو حيدرة وگاله اريدها الية
وطلب ايدها ..
حيدرة انطا الموافقه وگال ما الگئ احسن منك لأختي بس لازم اخذ رائيها اذا تقبل لو ترفض هي حياتها وهذا زواج و مسؤوليه
و بالليل كعدنه اني وياا و نبراس نمدح بسالار وين تلكين مثله و رجال و يعيشج ويريدج ومن هذا الحجي ..
وهيه مدنگه خجلانه واستحت من حيدرة
گالها لاتستحين وكولي أنا أخوچ الچبير
مسؤول عنچ إذا ما قبلتي افسخ كل شيء
نطقت وكالت موافقه بس دراستي ؟ ..كالها تكملين و تتخرجين بس هسه تعقدون شيخ وتنخطبون، ما نستعجل بالزواج
خابر سالار وانطا الموافقه و اتفقو
ثاني اسبوع، راحت للصالون..
طلعت تجنن هي طيبة بيضة وعندها نمش مزيد جمالها ولبست فستان وردي طلعت لعابة
اني ونبرس ونور بقينه بالبيت بدلنه وتمكيجنة
وبدلت لرغد جابلها حيدرا تنورة و قميص حلوات
لبست فستان قصير اسود طلبته من موقع كوري
حلو وبسيط وبي حزام بتصميم غريب فتحت شعري وسرحته لان كيرلي وشوي مكياج غيرني ..
صارت الخطبة و عقد عليها أنطت الموافقة وحسن هلهل بالأستقبال ضلينا نضحك
حيل فرحان كل شوي يحضن سالار بشقة ويكول إله بعد صرت نسيبي شطلب منك توافق ماتعترض واذا متقبل اشگگ شگ
وسالار يگول اله تمون وتدلل ..
خربنه ضحك عليهم كلش لطف الجو وكل شوي و يهوس ويگول..
- اريد اركص ركص و اهوس ..واكسر الكاشيه انه اخو البنيه مو اخ الولد
وگلب ام الهوسات ..
صار يسطر گولات من يمه ..
و حيـدرة يضحك لـ اول مرة
اشوفه هيج فرحان ما محمض ..
سالار فرحان بطيبة
گعد وياها بالغرفة يسولفون ..
چان تدخل خالتي طردته بضحكه..
تگول اله لاحگ علئ الختلات ..
وهو طلع دخلنه عليها شفناها صايرة فلم و حمرتها ممسوحه صرنه صنف عليها و نغمزها،
الحفله بسيطة و ابد ما عزمنه ناس..
بس سالار جاب عمامي و عماتي حظرو الخطوبة وراحو..
الساعه بـ12 يلا رجعو سالار ونور ومصطفئ للبيت ..
و طيبة راحت تسبح كفينه الهوسه وغسلنه الديوان ..
صعدت للغرفة رغد نايمة بغرفة خالتي.. فتحت شعري وظليت واكفة اكل كيكة وافتر بالغرفة..
فتح الباب ودخل حيدرة منو هذا المطفي الكلوبات؟ ناردين موجودة بالغرفة..
شغل الاضوية و باوعلي من فوگ ليجوه غمزلي وراح نزع ساعتة برياحه فتح دگم قميصة وگعد يمي مبتسم
-اجواء رومانسية يا بويه اليوم يومك ياحويدر..
تقرب مني وقيدني بأيديه وحضني وضحك بخفه دفعته وظليت اكمل كيكتي لابسته..
-هاا شو ما تقلديني..
-شرايد..
-اتضوق الكيكة..
-اكو كيك بالثلاجة روح اكل..
-لا قصدي الكيكة الي گبالي مو الي بيدچ..
-سخيف..
-اريد احچي وياچ بموضوع..
-احچي..
-بس مو هيچ..
-شنو مو هيچ..
حاوط خصري بأيده ودفن راسه برگبتي.. دفعته ورحت طلعت غسلت ورجعت.. انشف
حيدرة:- وعلي ما يصير هيچ..
-هو شنو صار..
حيدرة: روحي غيري ملابسچ حتئ اخذ راحتي بالحچي..
-فستاني ما بي شيء
-كل هذا الأغراء وتگليلي ما بي شي..
رفعت راسي قربني اكثر وباسني عضيته من ركبته خليتها بنفسجية.. ظل متجمد بمكانه..
حيدرة:- شسويتي ها !
غمزت الهُ: الـ ها مالتك فاهية ؟
-يلعن ابليسج كلامي لا تبوگي..
-العين بالعين والباقي اضلم..
-جديات اجيت حتى اگلچ أنتي مو تردين تعرفين الحقيقة ولحيتي الأ تعرفين ..
جاوبتة بأصرار.. ايي صح..
-چاا يابة گعدي علئ السرير نتفاهم..
-لا والله..
-ههههههه انتي ليش يروح بالچ لبعيد
- ما راح.. اطمئن
- ما اقصد شيء بس گعدي لان الوكفة تتعب..
- ها !!
- ههههههههههههههه أستغفرلله ياربي
- حيدرة صايرة سرسري ؟
- لا أنتي ادبسز والله حرفتيني نوب صرتي بريئة دشوفي رگبتي شسويتي بيها هسه
- لا تصير براسي فقير ابو النسوان
-هههههههه رحمة الله والديج يابة گعدي خلي اغرد
-ماشي احچي..
گعدت واجا گعد بصفي رفعلي حاجبة وأبتسم باوعتله بمعنئ يله احچي..
-صار وقت المناسب ؟
-اي بالضبط
-احچي
-الموضوع يخص عائلتچ..
جاوبتة بفرحة.. شنووو عرفت عنهم شيء ؟
- آي بوية
- احچي بسرعة أحس گلبي رجف..
- اهدي ناري
- ماشي بـس أحچي!
- تعرفين أمچ شلون ماتت ؟
- لا سالار ما گال إلي شلون ماتت لان سعاد ما تعرف فهو هم ما يدري منتظرة علئ نار أعرف الي صار بأمي وأبوية و شلون ماتو و عشت حياتي ويا عائلة مو عائلتي!!
- أعرف أكبر غلط إن اگلچ بهذا الوقت لكن أنا أريد انهي الموضوع والسالفة إلي صارت قبل 19 سنة
أدري من رح احچيلچ رح تصير مشاكل بس من حقچ تعرفين وأنا وعدتچ رح اگلچ عن قريب
- ما يهمني المشاكل إلي رح تصيبني لأن فعلاً بعد ما اتحمل وأريد أعرف مهما چان صعب
تنهد وگال:- ناردين عمامي كتلو خديجة
جاوبتة بأستغراب : شنو عمامك كتلو خديجة ؟!!
- لان خديجة مرت عمي .
- مادافتهم حيدرة وضح إلية فدوه ؟
تنهد وجر نفس و اطلق صدمته بصوت مسموع :- خديجة امچ و انتي بنت عمي....
يگول :- شوّصلني يم گلبج ؟، شسويت آنا بروُحِي 💔!!
⭐⭐⭐⭐⭐⭐⭐⭐⭐⭐
صفكت ايد بأيد وگلتله بضحكة دا تشاقة اكيد موو؟
هز بحواجبه وجاوبني..وعلي هذه الحقيقة بنت عمي انتي..
-لااااا تخبلت انت شلون بنت عمك حيدرة لا تخبلني شنو عمامك كتلو خديجة!؟؟؟ يعني خديجة امي؟
-اي امج الحقيقية..
-شنووو ااامي الحقيقية!! حيدراا ما فهمت كل شي ما مفتهمة أنت دا تحچي بجدية وعبالك تدري من زمان..
-انصدمت مثلچ بس أساسًا چنت شاك..
ضليت صافنه بوجهة ما مستوعبة كلامه گلتله ليش ما حچيييت !
-شنو مثلاً اگلچ تعاي ناردين انا شاك انتي بنت عمي؟
-ابوي يصير عمك واخو أبوك؟
-عفية بالضبط
-شلون؟ عقلي ما دايستوعب شيء ولا دا أربط وأنت دا تحچي ببرود!!!
- شتريدين مثلاً اتعنالچ واجيبلچ كاسيه ملا ونعي واكلچ يا يابة سودة عليه طلعتي بنت عمي وأحنه أقارب وله وله وله
-ترى ما يضحك الموووضوع ! سولفلي بعدني مصدومة تره وما مصدگة بكلامك نهائياً..
-الصبح…
-لا بالله ليش ما تكمل هسه؟؟؟
-عندي دوام وشغل الصبح احجيلچ زين..
بعدني ما مجاوبة گام من السرير توجة للميز ..
حيدرة: الفستان هذه المره لزمت نفسي عنج المره الثانية اشگه واشوفچ كما خلقچ ربي..
-ضاغطتك بفستاني..
-رايح اشتغل وأنتي گعدي فكري براحتچ وحللي الحقيقة بعقلچ النص شبر..
-رب الخباثة أنت بالنبي
أبتسم وطلع بره الغرفة يگعد بالصالة يشتغل علئ الحاسبة بقيت صافنه صدگ يحچي لو چذب؟ كلامة كُلش قوي بس يحچي ببرود وعادي يعني الأنسان الحبيتة وتزوجنة يطلع أبن عمي ونفس العائلة والصله؟
بالي مشغول أكثر بأمي لأول مره عرفت أسمها خديجة ياترئ شلون شكلها يصير؟ شلون ماتت؟ كتلوها بأي ذنب ارتكبته؟
تذكرت كلامة من گال كل شي مرتبط بالخ يعني أمي وحياتي و حياة حيدرة مرتبطة بموتها يمكن ثار أو أنتقام؟
هواي اسئلة ابالي مالگيت إلها جواب چانت الغرفة باردة حيل تغطيت وماحسيت علئ نفسي من غفيت گعدت ثاني يوم سألت حسن على حيدرة كالي طالع انتظرت يرجع ماكو! طول يلا اجه المغرب گال جان عندي شغل مهم لذلك اتأخرت..
كتله :- كلامك مال البارحة اشو غلست، شنو اني بنت عمك ومع السلامة هاهيه ؟
-لا اكيد ما غلست بس كلتلج جنت اشتغل وما نسيت الموضوع ولا رح اسده طبعاً
-تمام ليش ما تحچي هسه
-يابه وداعتچ تعبان وعلي من الصبح لهسه بدون أكل ولا غمضتلي عين دقيقة وحدة
-الله يساعدك ويساعد كلبي على شغلك الي ذابحني
-بعد روحي رح اسبح حضريلي الحمام
-دنيا مغرب ما يصلح تسبح مو زين..
- غير يخف عليه السيد الشيخ المعمم عود من يطلعلي جني اصيحلج تساعديني،
دخل للحمام بدون كلام رحت انطيته ملابسه دخلت للمطبخ اسويله عشه
طيبة:- اكو كباب جاهز بس اشوي
شكرا لزيارتكم عالم روايات سكيرهوم
