رواية نارا حيدره الفصل الرابع والثلاثون بقلم نمارق رحيم
-عود ردت اسوي اكله
-لا حبي ما عايزين انفجارات بالمطبخ الدنيا مغرب استري علينا
-ياربي شلون سمعه خايسه
خليت الصينية بالهول اجه اتعشه بس هو الكل ما يشتهي بقى يسأل طيبة شلونج وشلونه سالار وياج ومرتاح وياا لو لا، كعدت گباله انتظره ينطق انتبه اباوعله ابتسم ورجع ياكل ..
حيدرة:- لا تقلقين فد نص ساعة وكلشي تعرفين..
-اي غير تحجي انت وتريحني..
-لا مو انا رح احجيلج
-لعد منو ؟
-امي
-شنوو؟ خالتي؟ ليش مو انت؟؟
-افضل
-يعني خالتي تعرف؟
-اي طبعاً..
سكتت ما اعرف شگول كل دقيقة يصدمني بشي اقوى من خلص كال صيحي لأمي على السريع
-ماشي
-ونبراس هم
-تمام..
رحت لغرفة خالتي كتلها حيدرة يريدج بموضوع راحت اله وصحت لنبراس اجت كعدنه كلنه گال يمة ماكو داعي السكوت احچيلها
خالتي:- يعني درت بنت عمك؟
-يعني خاله تعرفين بكلشي انتي !
حيدرة:- گلت الها امس حتى ما تتفاجئ كبالچن..
-اها..
حيدرة گال لنبراس الكلام الي گاله الي ظلت مخليه ايدها على حلگها وساكتة بصدمة..
خالتي :- والله بعدني مصفنه مثلچن شلون الدنيه صغيرونه وخلتك تتزوج بنتها و اختها كاعدة يمنه
نبراس:- فهموني ترى اني ما مستوعبة كلامكم شنو بنات عمك احنا !
حيدرة :- اي حقج يابه
باوع لخالتي وگال إلها:- اي حجيه احچيلهن على امهن خديجة الي تصير مرت عمي
خالتي :- ام ناردين (خديجة)، چانت متزوجة جبر هو يصير اخو چاسب، (ابو حيدرة)
و من اتزوجت خديجة جبر سنة وصارت حامل بتؤام انتي و اختج ، شهرين علئ ولادتچن جبر سوا حادث، و مات
من توفى جبر ، اهل خديجة گالوا لازم تتزوج جاسب بأعتباره يصير عم البنات ولحتى يتربن عنده مو عند غريب..
انه رفضت شلون يتزوج رجلي عليه ونوب منو هي؟ خديجة صاحبتي
و هيه من سمعت رح يجبروها تزوج جاسب ماقابله و هم جانت تكرهه ومن درت يريد يتزوجها غصب اخذت جهاله بليل و راحت لبغداد
هناك اتعرفت علئ جاسم هو يلي جان صديق جبر و بعد ما اعرف شنهو صار بس هو اتزوجها بالسر،
محد يدري ثلث سنين يدورون عليها اهلها يردون يغسلون عارهم لان اهل جبر واهل خديجة اقارب
تالي ماعرف شلون درئ اخوها بمكانها ورايح وكات خديجة ذبح، بحجه غسل العار الله ينتقم منه ماعنده رحمه بدم بارد ذبحها
اسمع كلامها وكزبر جسمي شنو من اخ هذا يذبح اخته ! رادوني شعور غريب مؤلم حسيت نغزات قوية بگلبي..
-يعني من ماتت بابا جاسم خلانه عنده واهل امي سدوا الموضوع؟ ليش ما دورو علينه اني واختي؟
خالتي :- انتي واختج ما لگوكم لان امنتكم امكم عند جاسم عائلة خديجة وعائلتنه محوها كلش وما ينذكر اسمها حتى بيناتنه
حبوبه خديجة جانت عزيزة على گلبي حيل وصاحبتي بعدني اتذكرها واتذكر ايامنه وسوالفنه حتى الوحمه على ايدچ وارثتها منها
- ها خاله لاتبچين ..
دمعت عيونها وصارت تبچي وتمسح بشيلتها ..بچيت وياها بگلب مقهور حقدت على العائلة كلها اخوها شنو من گلب عنده! يگتلون بنتهم بدم بارد انرعش جسمي خفت من هالدنيا..
صارت تبچي وتحچيلنه سبب موت امي وسكت حيدرة خالتي ظل يورث جكارته ظليت اطكطك اصابعي بتوتر..
خالتي:- من ماتت خديجة جان حيدرة بعده صغير
-شكد عمره يعني
-ما اتذكر يمه 18 يمكن..
ألتفت اله وسألته:- صدگ حيدرا شكد عمرك حالياً؟
-وسفه عمر زوجج ما تعرفي..
ضحك وهز ايده گلتله اي على اساس انت شلونك تحچيلي كلشي! شگد شو جاوبني..
- 38 يابه
-چذذذذب
-وعلي
-احلللف
-والقررران خرب يومج..
-لحظة داتشاقه اكيد؟ عزززه تدري قبل من تعرفت عليك عبالي عمرك 26 لو 27 طلعت غلطانه يعني جان عمرك بوقتها 36
-اي اي..
-ما مبين عليك خدعتني
سكتت اصفن وارجع احسب تالي سألته
-حيدرة يعني بعد شنو المضموم؟
-اشياء..
- لعد ليش ماتحچي، علئ الواهس ما اريد انصدم بعدين
-امشي گووومي گووومي..
گمت بسرعة.. كعدت يم نبراس..
قصتي كلش غريبة الاحداث والصدف والمواقف الي تصير وياي مرات اتفاجى وانصدم واگول لو صايرة وياا غيري ما اصدگ حضنت نبراس وصرت ابچي وياها گلبي مورم من القهر..
طلع حيدرة وصعد فوگ عفتها تحجي وي خالتي ويبچن وگمت شفت رغد گاعدة زعلانة لان ما طلعها حيدرة اليوم
شلتها وصعدت بيها وهي تبجي دخلت شفته يخابر عزه بعينه شگد يخابر..
خليت رغد بحضنه وهي تصرخ واني بلكوه كاتمة ضحكتي، واگلها ايييي صيحي بعد اقوووى وهي كيفت وطلت تصييحح واني اگلها عاشتتت بعددد اعلى…
غلق موبايله وعاط:- جاااااااي اخاابر والله العظييييييم
-ابو المخابرات المهمة
شال رغد وكام يخزر بيه سألته ها ابو عضلات سداسية وين رح تروح
-طالع لصديقي
-طلع وياك رغد خطية ضايجة..
-وين ماخذها بهل ليل متونس انا عندي شغل هسه بعدين اطلعها
-روح ابوو المهمات
غمزلي وطلع .. بس لا يطلع محقق كونان نسخة عراقية هو بس هذا الشاكه بي علوا يطلع حتى اخنكه خنك
گعدت اللعب وياها اثنينا ضايجات تالي اجت نبراس گعدنا نسولف ونبچي سوا بقهر على حياتنا وعلى امنا..
اتأخر يلا اجا رجعت نبراس للغرفة وهو تمدد جايب اللعاب لرغد وحلويات ومكعبات وهي تكمز وتصفك بأيديها فرحانه لان من امس ضايجة ومطنكره لان حيدرة ما فارغ ولا مطلعها
كال رح تبقى هنا لحدما اخلص شغلي ويصير خير
-الله كريم ،بكيفك
-ابوس گلبچ الي متحملني ومتحمل بنتي..
جريت نفس وما جاوبته خليت رغد على الچربايه وكمت اريد اطلع گال ها بويه وين رايحه
-انام يم طيبة..
-وانا؟؟ لااا ارجعي ناردين
-نوم العافيه..
گام ولزم ايدي.. گال شبيج ضايجة مني؟ گوليلي اذا مضوجج او قاهرج؟؟..
-لا بس مقهورة من حياتي مو بس انت..
-يعني انا هم سبب من الأسباب..
-اي..
-اسف على كلهن..
-ما يفيد الأسف.. يلا تصبح على خير
طلعت وتركتني رجعت تمددت وافرك راسي ألتفتت لرغد اتباوعلي بأستغراب خليتها على صدري وبستها بخدها..
'' رغــدتي يا سيــدة كــل النســاء ''
هزت راسها وضحكت :- بب بباابا
-ياعيون ابوج الله ينطيني عمر وما اخليج تعيشين معاناتي الي عشتها ولا معاناة ناري وي ابوج المجنون ما اريدچ تحتاجين لأحد اريدج تعتمدين على نفسچ فقط وتكملين دراسات واخليج ترتبطين بألي گلبچ نبض اله وما امنع حبكم وتسافرين للدول الي تحلمين بيها..
دمعتچ غالية ما تنزليها الأ بيوم موتي ودفني بذيج الساعة الچ حق تبچين عليه..
حضنتها وغطيتها نمنه سوا الصبح بدلت وطلعت للمركز اليوم اريد الزم ابوي ادور عليه اطلعه من جوا الارض.. ضليت ساعات اشتغل علئ الابتوب طلعلي شغل ثاني اجلت سالفه ابوي على باچر
دخل عثمان اجه يمي انطيته الملفات اخذهن ودخل حمزة وهو يگول لعثمان :- سيدي الفريق ألقو القبض عليهم وحاصروا البيت المشبوه
عثمان:- ممتاز أبطال وعلي.. حيدرة احنا رايحين تروح انت ويانه؟ يمكن نحتاجك وبعد شكو باقي هنا وحدك
-تمام رايح وياكم..
-يلا امشو بأستعجال..
ركبنه بسيارة خاصة وتتبعنه 4 سيارات لفريقنا متوجهين للبيت الي اقتحمناه ..
اتفاجئت ابوي موجود بي، موقف انخليت بي اخجل اگول علئ هلانسان ابوي
چان شارد وهسه لگيناه كلبشه عثمان واخذناهم حاچيت عثمان كتله خلي عليه انا احقق وياا اذا ممكن والبقية اخذوهم ..
اخذت ابوي بحجه التحقيق وياا على البيت الدعارة والي چانو ويا موجودين ..
دخلته بغرفة فارغة حواليها جام شفاف كعدته على الكرسي وگعدت گباله وبيناتنا طاولة كبيرة
ضحكت بوجهه بأستهزاء وگلتله.. تدري انا محظوظ حالياً ؟ صارلي هواي ادور عليك تالي حصلتك وشفت خلقتك ..
-انه الماميت على شوفتك وخلقتك الزفرة..
-عاجبك الوضع صح؟ كل يوم شرب لو شقق وبيوت مشبوهه لو كاتل شخص إلى اين رايد توصل بالضبط؟
عمرك فوگ ال 60 سنة وبعدك بحيلك ما تجوز من سوالفك خاف ربك باچر عگبه تموت شلون تقابل الي خلقك ؟!
- شعليك انت، كح* ** مالاتي مو مالاتك
-عفيه لسان المثلك شبعو ماي ورد و بخور
-شرايد مني رايد اموت؟؟
-احلئ خبر يابه استعجل هناك اصدقائك الماتو منتظرينك فرحهم بجيتك..
-يومك قبلي ان شاء الله
-اليوم دخلت لمركزي تحلم بعد تطلع منه باجر رح احولك للمحكمة العليا اذا مو اعدام مؤبد
-مو بكيفك تسجني ما مسوي شيء حتى يعدموني
-اي صحححح كلشش لااا يابه شنو انت فقير انا الگو* * صدگ جذب اتعلمني بيك قابل
-تره ابقى ابوك
-انعل اليوم الصرت بيها ابنك ما معترف بيك ابنك شنوو؟؟
-ليش جبتني هنا ؟؟
- نتونس شرايك نلعب حجنجلي بجنجلي
دگيت على الطاولة بقوة الصوت رج المكان الهادئ ، صحت وانا ارص على اسناني بنبرة حازمة..
-التحقيق على سوالفك المكسرة هذا مو شغلي ابد ولا شغلي محقق وي امثالك لكن جبتك هنا لحتى اتأكد من شكوكي وتعترف على الي كاتلهم
-ما كاتل احد انه
-وجاسم ؟؟
-يا جاسم ؟
-الي كتلته..
-ما كتلته..
-لا تنكر الحقيقة عبالك مرت سنه على موته هاهيه رح اسكت ورح تنسد القضية
وتطلع منها بخير ؟ طبعاً لا
سكت مدنگ ويأفف..
-احححححچي انبلع لسانك ؟؟
-اي دامك تدري انه الي كتلته بعد على شنوو شتريد مني اكلك بعد كتلته وخلص..
-يعني تعترف انت الكاتل حلوو كممل اريد اسمع منك..
-اي انه الكتلته لأنه يستاهل سافل وحقير وكلب نعله عليه..
-لا تنعل الرجال اشرف منك ..
-هسه شترريد مني؟؟؟؟
-جنت تدري عنده بنات خديجة مو؟
-لاااا
-لاا تچذب جاااي اگووول
-اااي ادري
-احچيلي ليش كتلته بأي ذنب كاذب؟ احچي كلشي بدون ما تكذب بحرف واحد احچي من البداية
-انه احب خديجة
-شنووووو !
-احب خديجة وردت اخطبها بس اخوي جبر خطبها قبلي
-كممل
-شكمل
-كمممممممل جاي اگووول
-مات بحادث بعد ما تزوج خديجة لمدة سنه وصار عنده اثنين بنات
-حادث عمي جبر الك علاقة بي ؟
-لا
-لاااااااا تچذب
-ما خايف كتلك ما لي ايد بحادث موته
-تمااااااام كمممل
-من مات ردت اتزوجها شفت فرصة مناسبة
-چنت متزوج امي! شلون حبيتها وردت تزوجها؟؟
-اي طول هلسنين احبها بس هي وافقت على اخوي تالي من مات قررت اتزوجها لان احبها حتى لو محد يدري وحتى لو متزوج..
-متزوج امي وعينك عليها !! كمل ؟؟
- كلتلها خديجة نتزوج والجهال يصيرون عندي وانتي ارمله وعيون الناس كلها عليج ماقبلت وهي بالاصل تكرهني ومن درت بيه احبها اخذت ملابسها وراحت شردت و اخذت بناتها التؤم العمرهن اشهر
-ويامن شردت
-لوحدها
-وين راااحت ؟؟
-لبغداد..
-اااي؟
-ما لكيت اخبار عنها فص ملح وذاب ضليت 3 سنوات اروح لبغداد وارجع
-ااااي ؟؟
-اهلها يدورون عليها وكالو اذا انشوفها نكتلها لان شردت لوحدها ومحد يدري وكتلها يصير غسل عار
-انت كتلتها ؟؟؟
- لا احبها اكثر من روحي حب من جنت صغير اكتل روحي وما اذيها
-اي كممممل يشايب ال60 سنه
-ما اعرف شلون اخوها لكاها وذبحها
-لييييييش
-لان عرف بيها متزوجها ومشتغله بمدرسة، اخوها خطفها وكتلها وهو عنده معارف ما انسجن وراح حقها بوقتها..
تنهدت بضيق والمسدس مستمر متوجهة عليه حتى يحجي الحقيقة سألته شنو صار بعدين؟؟
-كتلته
-منووووو ؟؟؟
- هو اخوها كتلتها نفس ما كتلها
ظليت صافن بوجهة انربط لساني وانا اسمع كلامه ! ..
-امك تدري ، انتقمت منه ما راح دمها هدر اخذت بثارها وشلت لغير منطقة ومحد يدري بيه
جان كل تفكيري انتقم من الي اتزوجها هو السبب لموتها ، هو صديق جبر هو الي اتزوجها لو مامتزوجها جان ما ماتت جان ما شردتت جان هسه عايشة واشوف عيونها الاحبهن..
ضربت ايد بأيد وزفرت نفس ورجعت سألته..
-شلون كتلت جاسم؟؟..
-قبل سنة اجا حسن وگال حيدرة رح يخطب رحت لبغداد ودورت وعرفت بنت خديجة الي رح تخطبها فرحت واندليت العنوان حتى انتقم وما اخليكم تفرحون ورحت للمكان شغله وبقيت بسيارتي انتضره يطلع ودعمته دريت بي رح يموت لان الاصابة قوية فما كتلته بسجين لان ما ردت انحبس واخذت غراضي ورحت لغير محافظة بقيت اشهر ورجعت وحبستوني وطلعت برشوه..
-عفيييييه عفييييه اهنيك رفعة رااس لااااازم انطيك جائزة افضضل اب عار بالعراق انت شنو لك شنو من بشررررر؟ جاسم شعلييه وتكتله؟ بأي ذنب؟ يتمت جهاله؟!
-عادي اذا تحبسني ما رح يديرلي بال ما مهتم
-متعود..
دريت انت الكتلته بس هونتها الك بالاول حتى شكيت بلؤي هو الكاتل ، بس ما يطلع اسمي حيدرة اذا ما عفنتك بالسجن بسيطة يا سيد جاسب ..
بعد شلوون رح تطلع مناا ؟؟ اذا ما اخليك تنسى شلون يكوت ضوء الشمس وتتحسر عليه مثلما خليتني بصغري اتحسر على رؤيته..
صح انت ما كملت كلامك .. نسيت تگول تالي طلعت قهرك بأمي وبينا وبالأخص اناا
شوفتني العذاب على اصوله من ضررب نسيييت شلون چنت تضربني بالصوندة على ظهري العاري والدنيا شته وتحميها وتصلخ جلدي وبدوون أسباااب؟
نسيت نفسك شلون چنت تحبسني بالغرفة الظلمة بالليالي المشؤومة لو تحرمني من الأكل والشرب ما عدى الإهانه والفشار والغلط؟؟ نسيت نفسك من خليتني أنجن من صغري بسببك !
ومن استشهدوا اعز اثنين على گلبي چانوا مكملين لجنوني المُتناقض ! انت الي صنعت الوحش الي ابداخلي انت سبب لكل شي مر بي حيدرة ..
دفعت الطاولة وطلعت من الغرفة مختنگ اتنهد واجر النفس گوه فتحت دگم قميصي وشربت ماي طلعت بره اشم هوا نقي وغسلت وجهي..
ما رح اسامحك على كل اذية تأذيتها بسببك ..
سمعت موبايلي يرن جريت نفس ورفعته بدون تركيز على المتصل جاوبت اهلاً..
- ولك حيدرة الحك رائــد استشهد ......
