رواية نارا حيدره الفصل السابع والثلاثون بقلم نمارق رحيم
نُرشِد التائِهين ولا نعرِفُ كيف نُغادر المَتاهة .
🌟🌟🌟🌟🌟🌟🌟🌟
شهگت بتفاجئ ظليت صافنة بوچهه وهو مُبتسم گلتله أنت مو دكتور شنو ضابط !
-لا چانت مُهمة مؤقتة
رفعت حاجبي بأستفهام وهو ضحك:- يلا شنو شعورچ من عرفتي بعدما كتلتي نفسچ لحتى تعرفين شغلي ها بوية؟
-هسه اني زوجة ضابط عسكري؟
-اي نعم فَخر، ويبقى راسچ مرفوع
-ليش ضميت عليه شغلك؟ ليش ما گلتلي؟ ليش دائماً تصدمني!
-چان الوضع حرج ما ردتچ تدرين هسه انتي صرتي بحمايتي وبعد دخلتي بحياتي مستحيل اعوفچ، اريد اعترفلچ بشيء..
-احچي!
-ما اعرف لكن ناري انا دائماً اتسرع بالكلام وما اعرف اعبر عن مشاعري.. اتخيلي على سبيل المثال اكلچ ابعدي عني وانا رايد العكس تماماً ! رايد قربچ إلي بس ما اعرف اعبر عن الي ابداخلي أعاني من تناقض چبير..
دمعت عيوني وبچيت بلحظتها واني اگله:- كافي اسكت الله عليك هسه افكر بشغلك لو بكلامك هذا ! راسي رح ينفجر..
ضحك بحب وگال:- لا تفكرين بشيء ولا ينشغل بالچ ابقى انا حيدرة زوجچ وبس، لا تهتمين لشغلي..
اكلچ شيء حتئ كلامي لا تهتمين الهُ أنا مُشكلتي ما أعرف أعبر عن إلي بداخلي واظل أخربط خاصتًا وياچ أنا صح مثل الجبل وما تهزني ريح بس يمچ اوضاعي كلها تتخربط وحق الخلق سبع سموات أنسئ نفسي و اضعف گبالچ أنسئ أنا حيـدرة و أنسئ شخصيتي وكبريائي خصم الحچي أنسى روحي كلها بحضنچ
عگب عينچ تهت بعالم مايفتهمني..
ضحكت وگلتله:- هسه هذا اعتبره اعتراف؟ بدي اصفكك راشدي مثل ما سطرت گلبي بكلامك..
تقرب مني باسني وابتعد وهمس بأذني.. أعتبري الي تردي..
-ليش ما تگولها؟
-شنو أگول ؟
-گول شنو انا بالنسبة الك!
-انتي ناري صحوة جمر مرخوصلچ تچويني..
حضنته وحاوطني من خصري لصدره وغمزلي گال:- ممممم اكلچ شيء اميرتي؟
-اييي گول..
-نسيتي الخطف والشغل والتهيتي بيمن؟
-بگلبي وانت
-يا يابه يا بويه يا باباتي..
-هذن الـ3 كلمات رح اترجمهن بگلبي
-وشنو نتيجة الترجمة يناري..
- ترجمتهن يعني، حياتي يا عمري يا گلبي
ضحك و هز حواجبة "أي" رجع حضني وهو يضحك ضحكت وياا :- چنت متعصبه تالي سحبت كل عصبيتي بضحكتك وكلامك..
-انتي السبب بكل ضحكة..
سكت وگلت اله صدگ انت شلون دكتور وضابط بنفس الوقت؟؟
-انا بالاول درست كلية عسكرية وتخرجت منها بعد التدريبات اخذوني بالاستخبارات لان چنت طالع من 10 الاوائل المتفوقين وبالاصل انا حاب هذا المجال، چانت عندي مهمة دكتور للعيون إضطريت اكتسب معلومات لان المهمة تحتاج، رغم ما فحصت ولا مريض فقط انتي وعيونچ ما چنتي تعانين منهن .
-والعيادة ؟؟ يعني هيه مو ملك الك؟
-اي مو مالتي رجعتها لصاحبها
-شلون فصحتني لعد ؟؟
غمزلي وگال بس انتي بوية..سألته مستغربة:- اي شلون فهمني..
-چنت اعرفچ ومخليچ ابالي من قبل ما تجين، سالار بذيج الفترة يعرفني ضابط ومنبه لا يگول لأحد لأن شغلي خطر، بس بنفس الوقت عباله العيادة الي واگدر افحص ..
-واني اگوول ليش اتفاجئت من شفت عيوني وسألتني هاي عدسات لو عيوني الحقيقية..
-دوختيني بنظرات عيونچ چنت اصفن بيهن وادوخ مثل البحر غرقت بيهن..
چانت عيونچ عافية وگمرة وحزن جيلين..
جريت نفس تالي گلتله..واني اگول ليش ما تروح ولا تجيب طاري عيادتك حالياً..
-اي بوية
-بعد ياضابط حيدرة شنو ضام عليه اعترف؟
-ماكو شيء مو ملزوم تعرفين الباقي
-حيدرة انت طلعت تعرفني من قبل؟؟
-شلون يعني؟
-يعني لقائنا چان صدفة لو انت تعمدت؟
-قصدچ من ساعدتچ من الطين ؟
-اي
-شوفي الصراحة شايفج لانو انتي اخت سالار واعرف كلشي عنچ لكن ما مخطط للقاء بمعنى اوضح انا من ساعدتج من الطين ادري بيچ انتي ناردين واعرف كل المعلومات عنج بس چنت مار من مدرستچ صدفة..
ابتسمت:- مثلاً شنو تعرف من معلومات؟؟
ضحك، وگال وهو يغمزلي:- اعرفچ مخبلة
وعنودية وكتلة من النار بخبالچ وفهواتچ..
-وبعد؟؟
-جريئة
-وبعد؟
-عيونچ تكتل
-وبعد
-وگعتي حيدرة..
ضحكت وسكت راح طلع جبن وخبز گعد يتريگ، سألته.. شنو موجود بالثلاجة ؟؟
-اجبان و فواكه ولحم..
باوعت اكو ثلاجة ثانية أستغربت لعد هاي الثلاجة الثانية المن ؟؟
-مشروبات غازيه و دايت وطاقة
-ها زين، صدك نسيت اسئلك ليش اكو هواي غرف فوگ؟
غمزلي :- اي اجيب حبيباتي بيهن
-اشلع عيونك اذا مسويها..
-لا بويه اشاقة وياچ تعرفيني ما عندي هاي السوالف الحبيبات شني غير متزوج ناري تسواهن كلهن وداعة خشمچ يا ام خشم
-ااايبااه..
-اعجبج صح؟؟
-6 غرف المن؟؟
-هالبيت يجون اله اصدقائي الضباط ينامون ويرتاحون لانو منعزل ماكو بيوت بالمنطقة تقريبًا شبه خالية
- اها ماشي زين اگولك اهلك يدرون بيك انت ضابط ؟؟
- اي كلها..
اتفاجئت لعد أني غير مرتك ليش ما گلت إلي؟؟ .
إبتسم: شوفي خل اصارحچ، زوجتي السابقة "أم رغد" چنت متزوجها زواج متعة
-متعة!! أنت مو گلت حبيتها
-لا ما أحبها بالحقيقة تزوجتها وأتفقت وياها سنة واطلگها وهي رضت لأنو تدري بيه وبشغلي ما جبرتها بس هي * * قبل ما اطلگها بـ4 اشهر تقربت إلها وحبلت برغد ومن ردت اطلگها گالتلي حامل، انا ما أريد طفل يربطني بيها شغلي ما يسمح الي ومنبهة ما تحبل، فصبرت عليها ولدت بنيتي رغد ظلت تسوي مشاكل من اتفه الأشياء تالي هي أختارت الإنفصال أنطيتها كامل حقوقها عافتلي رغد وراحت سافرت بدم بارد بعدما خططها فشلت انو تكون زوجتي للأبد
-صدگ تحچي! شلون انطاها گلبها تعوف بنتها !
-عبالها من تربطني بطفل رح ابقيها ما اطلگها ومن ولدتها سافرت وبالمناسبة هي متزوجة قبلي ومنفصلة ومن سافرت راحت وي عشيقها يعني ضاربة الدنيا جلاق ما مهتمة للطفلة، فا يا ناردين انا ما گلت الج على شغلي لأنو چانت عندي هواي اسباب اولاً تردد وخوف اي اعترف چنت خايف اذا اگلچ ما تقبلين بيه! ومتردد اذا اصارحچ بالماضي مالتي تعوفيني! وإبتعادي عنچ مؤقت ما تقربت الچ لأنو ما أريد أطفال حالياً بحكم شغلي، انا ادري إذا تقربت رح اتعلق واذا اتعلق رح تصير كارثة فأبتعدت رغم اريد قربچ بس أشوف شلون تصفى .
بعد كلامه هزيت براسي وگلتله بغصه تمام تركته وطلعت..گال رح اشتغل انتي شوفيلچ شيء تلتهين بي گعد بالهول بقيت گاعدة بالغرفة بس اسمعه كل دقيقة يخابر شخص، بعد ساعـات، بقيت افتر بالبيت وأكشتف كل زاوية، صارت الساعه بـ1 الظهر جعت گلت أسوي شيء اكلهُ رحت فتحت الثلاجة شفت حافظة شفافة بيها دجاجة أخذتها ودخلت للهول سألته
-هاي الدجاجة متبله مو؟
- اي امس الصبح جنت اهنا و اجت ريام تبلتها علئ اساس نتغدئ تالي صارت سالفه خطفج
-شنووو! منووووو ررررريااااام؟
-صديقة بالشغل
-عندك صديقات!!
- اگلج شيء بس لا تتفاجئين..
-گوووول رياااام منووو؟
- ريام نفسها رقية .
-الي جانت تشتغل بعيادتك؟؟
-ااي هيه رقية نفسها ريام..
-شنو نوع صداقتك بيها !
-مجرد شغل لا اكثر وداعتچ حتى ما طاخها هي متعاونة ويانه نحتاجها خاصتًا عدها معلومات وهواي أمور تساعدنة بالأستخبارات
-وأني اگولك منو رقاوي اتگولي سكرتيرة !
-ضجتي لو غرتي منها..
-سلاااامتك سيد حيدرررا..
تمشى اجه يمي گال شو باوعيلي ظليت منزله راسي اطكطك بأصابيعي وضايجة منه..
حيدرة:- ولچ بس نظرة منچ انسى اسمي لا تنقهرين ما تسوى تقهرين روحچ عليها انتي بس عيونچ تسواها وتسوا عشيرتها محد ياخذني منچ لا تخافين حيدرة مسجل بأسمچ
-اوعدني ما تكسرني حيدرة !
حيدرة:- اكسرچ بطريقة وحدة من اكون بوقتها مجنون وعقلي مو براسي ..
باس ايدي بأطمئنان رجعت للمطبخ جهزت الدجاجة صحتله يدخل للفرن بعدما استوت كعدنه ناكل على الطاولة..
وراها صعدنه للغرفة تمدد على الچرباية
-شلونه الاكل طيب مو..
-دام بي لمساتچ اكيد طيب..
-اگلك صدگ انتو الضباط تاكلون بيض ني مرة سمعت من طيبة ويمكن جفصت بس ما جان ابالي انت ضابط
-هههههههه اي يابه وهذا بسيط لو اگلچ شنو ماكل بحياتي تتقيئين هسه..
-شنوو؟؟؟
- بيض لحوم اسماكَ نيه حمام طيور بلا طبخ
اعضام ..
قاطعته لااا بالنبي توني تغديت اسحب كلامي لاا تحجي انت الظاهر كلبك قاسي بكلشي
- يعمي اليدخل كليه عسكريه غصباً عليه يقسئ گلبه ما يحس بشيء ..
-اگولك حيـدرة
-عيونه
- قررت اصير ضابطه ،
ضحك ضحكته مسموعه، :- اولاً تنگال ضابط للولد و للبنيه، ما ينضاف التاء التٲنيث،
ثانياً انتي جاي ادرسين رياضيات فا التهي بخوارزمي و عوفي العسكريه علئ صفحة
سكتت .. خيب امالي المجروحة
....
نبـراس
اجا حسن بليل واحنه قلقانين على ناردين
كال لگوها وكلشي مابيها وبخير وموجودة يم حيدرة حالياً
ارتاحينه واطمئنا بعدما گلوبنه فحطت وعيونا نشفن من البچي گال بدلن بسرعة نطلع..
سئلته طيبة وين ماخذنه حساني؟؟..جاوبها لا تسألين هسه وبدلن بسرعة ..
وصدگ بدلنه و ركبنه اجت رغد وأم حيدرة ويانه وطول الطريق لو يخابر لو يصفن بيه بالمرايا واني ادور وجهي عنه..
چان ينزلنه المكان مليان نخل واشجار علئ رغم دنيا ليل وضلمة، بس باين المكان وشكله بستان لو مزرعه .. بعيدة حيل عن البيت
نزلنه تلگتنا مريه، و رجال كبار بالعمر ...واحنه نسلم مثل الثولات اني و طيبة، سئلنه حسن ليش جابنه اهنا، گال نبقئ هاي الليله اهنا و لحد ما يستقر الوضع بعد سكت ما حچه شيء..
المره تلگتنه صارت تحچي وياا ام حيدرة ويسولفن، ورغد تركض منا ومنا مكيفه على الزرع
ورا ساعه طلعو يشوون سمچ علئ النار بالبستان للعشه جان الجو حلو بارد، كعدنه ندفه اني وطيبة كبال النار وحسن واكف يحجي وياهم،
كعدنه ناكل بالكاع فرشو سفرة، علئ الزرع، واكو كلوب مشتغل من الرئيس ..ريحة الاكل تجبرك تاكل حتى لو ما جوعان
سالار اتصل يسئل علينه و شنو صار، انطته الموبايل طيبة، لحسن حچه وياا دقيقتين وبعد ماحچو شيء وهو سكت
صارت الساعه ب12 ماگدرت انام .. لان طبيعتي اذا اختلف عليه المكان ما تغمضلي عين الا علئ مخدة وفراشي
استغربت علئ طيبة شلون نامت بعد ما تعشت يمكن من الخوف والهبطه الصارت بينه الصبح
اخذت جاكيتها لبسته و طلعت، رغم الكل نايم وضلمة حيل بس ابد ما اخاف من الضلمة وهاي الميزه مشتركه بينه اني و ناردين
كعدت بمكان التعشينه بي، حواليه زرع و نخل، ابتسمت و فركت ايدي من البرد، فزيت علئ صوت حسن وراي
-شجاي تسوين؟
ألتفت اله :- تره كمزتني وخرعتني شبيك !
حسن :- شعجب خفتي، و انه متخيلج سوبرمان ما تخافين تالي طلعتي سوبر نمله
-متت ضحك !
راح جاب طبله خلاها كبالي وگعد تربع عليها وهو مبتسم..
-لاا توگع الطبله صغيرة
-مو مشكلة غصبا عليها تتحملني
سكتت ..
-اي شلونچ برنسيسه ..
نترت :- زززينه
-عساج دوم بوجودي
درت وجهي عنه ظليت اطكطك اصابيعي..
-چاا مجاملة گولي شلونك..
-ما اجامل ناس خبيثه..
-اكلج على شنو هيج كارهتني اجر منج كلمة گوه يگول بايك فلوس ابوج
-يجوز
-بالله اكلج خلي نسوي شيء جديد نفتح صفحة جديدة مثل ما يكولون
-ما اريد
-بداعتي
-منو انت وتحلفني بداعتك
-يابه بداعة اختج ديلا ما مليتي من خباثتي
-وشتريد مثلاً..
-انصير اصدقاء؟
سكتت ..
-السكوت من علامة الرضا
-خوش..
ابتسم :- اصدقاء ؟
-اي
-متراضين متفقين؟؟
-اي
.. بقينه نسولف سالفه تجر سالفه او بالاحرئ هو يسولف اني داگته علئ صامت استمع اله يحجيلي عن نفسه و مواقف تضحك هو واصدقائه وجماعته، وسكرت ضحك ..
لحدما سمعنه صوت الاذان الفجر ما حسينه بالوقت ابد صلينه ورجعت نمت الصبح بقينه ما رجعنه كال نبقى كم يوم يهدئ الوضع ونرجع للبيت
...
نور :- الشهرين الفاتن ملتهية بدراستي وضيم السادس، ومصطفى راسب سنة المفروض مرحلة اولى بس رسب بالسادس وعاد السنة وهسه اني وياا ندرس سوا واحد يدرس لخ، ببالي اطلع معدل عالي اني ويا ، رائد رجع مثل قبل يتصل لو يراسل حتى لو احضره يرجع يتصل ما يتوب
اگله ،،، شكد تصرف ارقام
يگلي ،،، لاتحضريني واني ما اسوي رقم جديد
حايرة بالي داسوي داحجي وياا شخص غريب حرام لو عادي؟ على الرغم بس هو يحچي واذا ارد عليه .. ارد برسالة
بنفس الوقت ..افرررح من اشوفه يتصل
حرت لاا اني الاكرهه ولا اني احبه اذا يختفي افكر بي واذا يتصل ما اجاوب احتاريت گلبي لاا للسما ولا للگاع
اما سالار ...تغير جذرياً تغيرت تصرفاته، وصار يطلع من الصبح ويرجع اخر الليل لاا ياكل يمنه لاا يحچي لا يسولف
باقي ويانا على صامت والف حسبه اباله دائماً اشوفه يصفن ويفكر ..
اغلب وقته لازم موبايله وغرفته ما يقبل احد يدخل الها لاا اني ولا مصطفى
صرت اشك بي، عنده شيء لو موضوع چبير حتى الشركة شكيت بي ما دا يداوم بيها !!
...
نارديـن
گاعدة بقربه وعيوني بعيونه وهو مبتسم وايده على خدي همست..
-تدري اغرب حب وشعور حسيتة وياك !
-شلون يناري؟..
-چنت اكتب عنك واحب تفاصيلك..
-اي؟..
-چنت من ارسمك على ورقة اضل اتأمل وجهك
-امممم اي؟..
-چنت أحس بيك هواي.. چنت احس بحضنك چنت أحسك ملاكي چانت روحي دوم تحچي بيك !
-وانا چنت افكر بيچ هواي دائمًا افكر تالي الگه نفسي يمچ واجيلچ
-ليش؟
- لأن ذبلانة الدِروب الما تِوديني إعلة تاليتج
-تدري بيه احبك..
-اي ادري ياروح حيدرة انتي !
-وانت شنو مشاعرك الي ليش ما تعترف؟
سكت وباسني وظل يتلمس خدودي..
-مو مشكلة لا تحبني اني احبك ، لا تحبني اني أحب روحي بمكانك !
مر 3 ايام يطلع للمركز ورا ساعات يجي تعبان وباله ما يخلى من التفكير ويفكر برغد شلونها يمهم ..
چنت گاعدة بالغرفة دخل عصبي وعيونه حمر مخوزره گال بسرعة امشي نطلع سألته رح نرجع يعني؟ هز راسه (اي)
نزلت واخذ غراضة طلعنه من البيت خفت حيل الضاهر اكو مصيبة شكله ما يطمئن ابد
وصلنه دخلنه للبيت نص ساعة واجه حسن دخلو كلهم بقن يمي ويسألني شصار وشبيج وشلون انخطفتي بس حسن يمكن يعرف كلشي حيـدرة گايل الهُ
ورغد اجت تركض شلتها وبوستها، حيدرة أشر الحسن وراحو طلعو يحچون بالصالة تالي علت اصواتهم وسمعت حديثهم
اسمع حسن يگول اله بالأول خابر سالار
يقبل تسوي هيج بناردين؟؟
حيـدرة:- بس شهر اسوي البالي و اطلگها ما متزوجها حبًا بيها ولا زوجة إليه مجرد صفقة
- وليش تكسر بمرتك تدري بيها تحبك !!
-احاچيها واشوفها إذا ما قبلت وتركتني رح اتدمر حساني والله العظيم الي جاي اسوي مو برضى گلبي..
-انت ليش گلت إلها على شغلك ما عايزين مشكلة ثانية!
-الله كريم يصير خير
أبتعدت من الباب صافنه ومصدومة هذولي شدا يحچون شنو بس شهر شنو يطلكها منو هي؟؟؟
يقصدوني؟؟!
صعدت فوگ للغرفة وصافنة بوجهة رغد ما أدري شنو دايفكر حيدرة وشنو دايخطط وسالار وحسن شعليهم !!
أكيد اكو إنه بالموضوع دخل گعد يمي نزل رغد من حضنه وكالها روحي بابا يم عمتج طيبة
أشر ألها علئ الباب وراحت طلعت باوعلي وگال ..
-ناردين بويه عندي موضوع وياچ..
-فدوا لا تحچي شيء..
-أسمعي بالأول
-ما اريد أسمع حيدرة ما أرريد..
خله أيده علئ چتفي ..
-اكلچ شيء ولازم تقررين بسرعة وتختارين..
سكتت ..
حيدرة :- ناري اجاني بلاغ من الرئيس انو لازم اتزوج على الورق فقط
سكتت مصدومة بوجهة ..
- نارديـن أفهمي ما حاب تعدد الزوجات بس
شخصيتي الأخيرة غصبًا لازم أتزوج زواج حقيقي لان صار شك عليه لازم أنفذ إلي رادو وما يشكون ويعرفون شخصيتي الحقيقية وهويتي إن أنا حيـدرة
-ليش ما فكرت بيه؟؟ دخيلك حيدرة اني إنسانه عندي گلب ومشاعر تدري بيه إلي تتقرب منك اموتها بيدي ؟؟
همس بتعب..ادري بوية ادري وما فرحان بهالقرار وداعة عيونج بس شنو بيدي اسوي؟؟
-شلوون اتحمل تتزوج عليه؟؟؟ ما صار إلي هواي من تزوجتني ليش تقهرني وتكسر گلبي؟؟ مو گلت ما اكسرررج؟؟
-ناري وحق الله ما متزوجها حبًا بيها لذلك على شنو تنقهرين مجرد صفقة وشغل ومضطر وحق علي ! وعد مني بعد من اطلگها رح يرجع كلشي مثل قبل وأخلص من التمثيل مو ضروري اخذ شخصيات بعد
بوية فهميني وفهمي الوضع إلي نحطيت بي مجبور علمود شغلي ما قاصد اجرحج واقهرج تدرين بيه دموعچ كلش غاليات عليه
تنهدت ..
- منو الي رح تتزوجها ؟؟
- رقيـة
گمت ضحكت وصفگت أيد بأيد بأستهزاء..
-تگول إلي صديقة وصديقة وبس شغل تالي طلعت مخطط تزوجها !!
وگف گبالي:- كبري عقلچ ليش هيچ جاي تفكرين؟؟ جاي اگلچ زواج صفقة لا أكثر
تعرفين كلش زين ما يوم متعمد اقهرچ حتئ زواجي گلت ألج عليه حتئ ما تتفاجئين وگلت ألج شهر واطلگها ما أخلف وعدي أنـا
زفرت نفس وايدي على گلبي ظليت ساكتة وعيوني ما وكفن من الدموع..
جر نفس وگال وهو يتنهد.. نارديـن بويه..
- الله ياخذها لناردين ما أعرف شنو الذنب إلي أرتكبتهُ حتئ داتعقاب علية بهذه الطريقة ما أدري شنو إلي سويته زنيت بگت قتلت؟حياتيش هاي حياتيش كل ما اگول حياتي صارت حلوة والدنيا ضحكت إلية لازم يجي يوم يخيروني بين نارين وغصبًا علية أدوس علئ گلبي لأجل حبي وأختار إلي يكسرني
- ولچ اترس حلگه رصاص إلي يكسرچ ولچ ثقي بالله عيوني ما تشوف غيرچ وحتئ لو أتزوج ما تملي عيني بنية غيرچ تسوين كل البنات بالنسبة إلية ولچ شجاي تحچين أنتي!!!!
- بروح أبوية أسكت كلمة زايدة تلگاني متمددة بالگاع مسيطرة علئ نفسي گوه واگول مايسوه
باسني براسي ..
- تهون ما بقئ الأ القليل بس هذه الأيام وتالي أرتاح وترتاحين أنتي صبرتي هواي ماتتحملين هلشهر بس ؟
-هي ياهيه مصبرتني غير كلمة التهون
فتح الكنتور طلع سلاحه خلاهُ بملابسة واجه وگف يمي بقيت ساكتة بس اشهك
صعبة وكلامة جرحني أكثر من افعاله هزيت أيدي وابتسمت واني ابچي والغصة ببلعومي وبدي اصرخ ..
-تعرف جوابي شنو..
-يعني تقبلين تعيشين وياي!
- ما عندي خيار ثاني، موافقة تزوج الثانية ....
صوت الهلاهل والضحك طك طبل اذني ما اريد اسمع واتأذئ اكثر سديت اذني بقوا وبقهر والألم ياكل احشاء گلبي
بقيت اضرب راسي على تاج الجربايه بقوة رغم ادري هذا الزواج تمثيل بس يبقى الشعور حقير حتى لو صفقة شغل حتى لو على ورق
طلعت من الغرفة طيبة ونبراس گاعدات على الدرج وايدهن على خدهن وحالهن مثل حالي مقهورات ، وما راضيات
نزلت بدشداشتي واطكطك اصابيعي يارب حتى لو صفقة حتئ لو چذب بس صعبة حييل صعبة على گلبي المشتعل نار
افتر واني ساكتة ما بيدي اسوي شيء واخرب شغلة وخططة لان وعدته ما اتدخل ولا اسويله مشاكل
يمكن اذي وأتاذه لذلك اتخذت الصمت وداخلي شعلة من نار ما ترضى تنطفي..
تنهدت ومسحت دموعي هذا زواج چذبه وكله تمثيل هو وعدني ما يلمسها وما يتعبرها زوجة بس على الورق وما رح يخلف بوعده
دخلت للمطبخ باوعت من شباگ المطبخ حسن واگف بالطارمة يم اشخاص غريبين شكلهم
طلعت من المطبخ خالتي صح بالأول مارضت على الزواج بس من عرفت لأجل الشغل وفترة مؤقتة ويطلگها ما اهتمت وراحت نامت تگول تعودنه بين فترة وفترة رئيس شغلهم يطلب منه يسوي شيء
رجعت للشباك حسن سلم عليهم وطلعو كلهم وهو طلع وراهم وسد باب الكراج واخيرًا طلعوا
دخل وشافني ظل واكف بمكانه ركزت بعيونه تنهدت والدمعة بطرف عيني ما ردت ابچي گدامه مسحت وجهي بيدي وانطيته ظهري ركضت بسرعة صعدت الدرج ..
وهو يصيح بأسمي ما رديت وصعدت للغرفة تمددت على السرير حاضنه مخدتي چان يفتح الباب ويدخل واضح على عيونه إنو مقهور
صرخت بوجهة شكو اجيت ؟؟؟ سد الباب واجا گعد يمي.. اطلع من الغرفة حيدرا
-ما اجيت حتئ اطلع
-رووح لمرتك..
-انتي مرتي
شهگت وگلت.. إذا إلي خاطر عندك أطلع!
تقرب يمي و گال :- ناردين ليش تبچين فهميني؟ انا البارحة گلت الچ اذا ماتگدرين تبقين أهنا اخلي حسن يوديج لغير مكان صح لو لا ؟
كافي بويه الصار صار عفت الكل واجيت اراضيچ ما انطاني گلبي تنامين مقهورة!
-قصدك عفت رقاوي واجيت هه خاف تضوج روح الها !
-الوكحة شوكت تبطلين خبالچ مو شيبتي شعر راسي بلا أشوف ضحكتچ الحلوة أضحكي ؟
-ضحكتي محلوة روحلها هي تضحكلك..
-يابه غير تشنقيني إذا سويتها
-زين تعرف شبيدي اسوي..
سكت ودمعت عيوني مره ثانية انتبه عليه رح ابچي گعد يمي وجرني لصدرة بچيت بصوت مسموع بحضنه وراسي بركبته..
-تعبت حيدرا هواي تعببببت..
-افاا ناري تعبانه يابه وداعة العزاز ما تسوه كل هاي الدموع والقهر..
بقيت ابچي بحضنه مسح علئ شعري ويتنهد ابتعدت عنه مسحت دموعي ..
-ناري انتي مو تكولين تحبيني؟
هزيت راسي "اي"
- چاا يا بعد روح حبيبج لاا تبجين والكائنات ما معترف بيها زوجة أصلاً شلون أبدلها بيچ أنتي زوجاتي الأربعة
-اوعدني ما تتقرب الها ؟؟
-وعد بس لا تبچين دموعچ شبيهن؟
-غـاليات
-چا خلص يلا نامي
-وانت وين تنام؟
-بحضنچ..
هزيت راسي بالرضى بس بعدني ما مرتاحة نزع ملابسه وراح طفه الكلوب صار يدگ عليه حتى انام مثل الطفلة ويسولف إليه على ايامه من چان بالعسكرية حتئ انسى الزواج ويحچيلي على شخصياته بالشغل..
-شگد عندك اسماء.. عددهن؟
-اسد وكشكول وفالح..
-والحقيقي
-حيدرة اكيد..
-مممم.. سولفلي على دورك بشخصية فالح شنو تسوي وشنو شخصيتك..
-ماكو شيء بس اجمع معلومات اشتغل وي شخص مهم عوفي هذا الموضوع دوخه راس وعلي..
-تمام.. شنو الدافع الي خلاك تعقد على رقية..
-صارت مشكلة وگلت إلهم أنا متزوج ف رايحين يسألون ويستفسرون صح متزوج او لا؟ وطبعاً ما يعرفون منطقتي هاي لانو منطيهم عنوان غير منطقة .. وبهذا الأمر المعقد صار خطر عليچ لأنو إذا عرفور اي معلومة عنچ مستقبلاً رح تتأذين وتوگعين بخطر ف اضطريت اتزوج ريام لان معروفة يعرفوها حتى لو عرفوا هي زوجتي ما رح تنظر
-اها
-اي عندچ بعد اسئلة..
-صدگ ما گلتلي منو الي خطفني..
-بشخصية اسد صارت مشكلة ولأن ما وافقت على صفقة بالشركة هددوني بيچ وبـ50 مليون وانا چنت متحظر بهذا اليوم بالأساس مراقبهم ومراقب مكانهم من زمان والحمدلله عدت على خير واعتقلوهم..
-هسه همه بالسجن..
-اي..
-انت شنو شغلك بالضبط!
صاح :- ابيع روبه بالتقاطع ،صدك جذذب ارررررريد انام
-اووووي دنام شبيك..
-بيه انتي..
والله أنا فقير علئ نياتي بس من تزوجت هاي العرمه صارت الكلمة ما تخلي نيتي تصفة وبالي يروح لبعيد كل شيء تحچينه افكر بي مو زين
-انهجم بيتك يلفقير
باسني بخدي وهو يگول ..
-انا فقير وحباب
-تدري مرات شفكر من تقهرني..
-شنو تفكرين..
- اغتصبك
طكها ضحكة عالية اريد يسكت ماكو
-وتالي وي جفصاتج بعد روحي
-الي تصير مرتك تتخبل
-افااا والله؟ الصراحة حقچ بس إن شاءالله كم شهر ويتغير كل شيء نامي يلا بويه ..
-ورقاوي؟
-خاب انطمري يمج هيه
-مو تخليني انام وتروحلها
ضربني بخفه :- العب عليچ قابل؟ نامي هاي السوالف ما احبها اذا مو الج..
سكتت استسلمت ونمت الصبح چان يوم جمعه گعدت وهو ماموجود گمت بسرعة نزلت جوا
طيبة:- يالله إن كان هذا سحر فا ابطلهُ
-شبيج دگولي صباح الخير
-همزين اخوي ماشافچ شعرچ وكفشتج كارثه
-اكلچ انجبي عاد ديلا هو منو يگعد من النوم
وشعره سرح مو مكفشش
-شعندچ كاعدة من وكت واليوم ماكو دوام
-علمودها هي وينها رقاويي عيني
-هاا رقية گاعدة بالطارمة هي واخواني جاي يتريگون
-ماشـي..
غسلت وجهي صعدت للغرفة لبست تراكسود ازرگ حتئ تصير عيوني زرگ وخليت حمره رشيت عطر وأبتسمت علئ شنو قاهره روحي وهي ما تسوه ..
نزلت رحت للطارمة شفتهم مخلين طاولة كبيرة بيها ريوگ وهاي گاعدة تضحك وياهم ومدري شنو يحچون وگفت يمهم گلتلهم.. صباح الخير
حيـدرة:- صباح العافية عافيتي صح النوم..
رقية:- صباح الحب حُـبي
همست "حبتچ الحيه ام سبع كرون واخذتچ
إن شاءالله
خزرتها ما رديت ..
حسـن:- تونه گلنه صباح الخير
-معليك انت ابو جوعه..
حسن :- عاجل ناردين سوف تنفجر بقنبلة من النار بسبب حيدرها الملعون
سكتت وهما ضحكوا..
رقـية:- تعالي حبي تريكي قبل شوي صبيت الچاي حار
سكتت ما جاوبتها سحبت كرسي بصفه وهي گاعدة گبالي بكل عين صلفة تباوع لحيدرة وتبتسم ..
كاهي وكيمر وعسل وزيتون وصمون كهربائي وچاي
اكل وعيوني عليها باوعت لحيدرة وگلت اله .. خليلي كيمر بصمونتي
- صار كيمر ياكل كيمر
ابتسمت وهو وكلني لكمه سحب ايدي وباسها وجرني لحضنة وباسني بخدي گدامهم..
حسن :- اشتعل جدك السابع مو يمي ولكم راعو مشاعري المعوقه
حيدرة : اطمئن مشاعرك مائيه ما تنجرح انت
ضحكنة وبداخلي فرحانة إنو حيدرة مهتم بيه ومو يمها مطنشها وهي تتصرف طبيعي ما عبالك اجت البارحة ماخذه راحتها وتفتر بالبيت وتسولف وي خالتي تريد تكسبها حتى طيبة الفطيرة حبتها تگول فقيرة وصارن يسولفن
واني محترگة وصلت لمرحلة اغار على اختي نبراس لان تضحك وياها رغم نبراس ما مطيتها وجه ابد بس تجامل كضيت اليوم كله اخزر وايدي حاضنه ايد رغد..
ما مرتاحتلها احسها حقيرة ومو راحه، و رح تسوي مشكلة
...
نور :- بالليل خابرني رائد، بقيت صافنه تالي رديت :- الوو
-صلوات على محمد من رديتي..
-شنو تريد رائد ليش اتصلت ؟؟
- رايدج، نور باجر رح احاجي سالار عليج واكله رايد اخطبج
-عزاااا شنو تخطبني !؟؟؟
- باعي صارلي شهور مسموط جد جدي و بعد ما اتحمل رح اخطبج وعود بنت ابوج وارفضي حتئ اشوي علئ اذاناتج بصل
-هوو شنو گووووه ؟؟
-اي رح اجيج ولج يمته عاد تحسين مو شيبتي شعر راسي وانتي بعدج كاضيتها لو عاجبني لو ماعاجبني
-تره شوف هذا زواج مو غصب
- بابا انتي اليه اتفهمين شنو يعني الييه ؟
-اهوو والله خوش عيني مخلي عليه سيف علئ ركبتي وتعالي حبيني غصبا عليج
-هو غير كلبي زمال ابن مطي وحب وحده بكد بنته
-ليييش تغلط
- وين الغلط هو زمال ومطي وكلب ابن سطعش كلب
-هسه المطلوب شنو؟؟
- طلقه براسج وراس الخلفني جااااي احجييي كردي ؟؟ اكلها اخطبج اتكلي شتريد بت اللذين
- اكولك ناقص بعد بس تضربني راشدي
ضحك :- يابه هو غير احصلج وتصيرين مرتي اكبر محظوظ وعلي.. احبج
سكتت ماعرفت ارد ..
-بويه كبرت رح اشيب واشيخ رايدج اليه شلوون بيج انتي بنت الاودام..
-هسه انت تريد تخطبني مُصرر؟؟
-ايييي وبروح جدي المات
-لعد تعال
-ها صددگ؟
-مع السلامة
سديته منه متفاجئة من نفسي ومنه .. اكيد يسويها وينفذ بقيت الليل كله اكلب يمنى يسرى وافكر شنو موقفي لو صدگ خطبني اوافق لو ارفض؟
اني ما اعرف عنه ايدي شيء فقط ان هو اسمه رائد وصديق حيدرة حتى شغله ما اعرف شنو يشتغل ولا اهله وهو من كربلاء ليش عايش ببغداد؟؟
نمت ثاني يوم العصر سواها صدك فعلاً اجا ! رن الجرس وسالار جان موجود وهو فتحه ف استقبله جاي لوحدة محد جاي ويا !
گعدوا بالصالة واني رحت للمطبخ ابرد مي وعصاير واني متفاجئة واتسأل نفسي شلون اجا لاربيل بهاي السرعة؟ شلون اندل الشقة؟؟
اجا سالار اخذ مني الصينية وراح غسلت المواعين وكعدت بالمطبخ وايدي على خدي بدي اروح واكعد يمهم واسمتع شدايحجون !
معقولة هسه كاله اريد اطلب ايد اختك ؟ معقولة سالار يوافق؟ وهو يعرف رائد من زمان لو لا؟
هواي اسئله ابالي مرت ساعتين وطلع صاحلي سالاح كعدت يمه..
-انتي ضامة عليه شيء ؟؟
تلعثمت، :- هاا لاا ماضامه
-متأكدة نور؟! احجي ما لازم عليج مسدس!
-لا ماكو شيء سالار بس ليش
- رائد طلب ايدج على سنه الله و رسولة
-هاا يا رائد؟
-الي اجا .. رايدج اله
- هاا اي
-شنو اي احجي گوليلي رأيج هاي خطبة مو شي عادي احجي شبيج ساكتة
-اي لعد شسوي
-رووحي لغرفتج رايح اجيب مصطفى من مدرسته اقفلي الباب بعدين نتفاهم..
-ماشي
طلع وكعدت الطم عزه بعيني سواها صدك وخطبني زين شنو كايله !؟
دكيت عليه مغلق ياا هذا صدك يحجي ..قفلت موبايلي وضميته خفت من سالار شنو يسوي بيه من ورا هذا المخبل
نص ساعة واجا مصطفئ من المدرسة الساعة ب5 لان مدرستة اهلية ف يتاخر عكس دوامي صبيتله غدة ورحت نمت
...
ناردين
بليل كاعدة ارتب بالغرفة اندك الباب ودخلت رقيه وهي تكولي بأبتسامة خبيثة هلوو..
-اهلين خير رايده شي؟..
ضحكت واجت تمددت على الجرباية..
رقية :- ما اريد شيء بس هاي غرفه حيدرة موو
-اي غرفتنا..
كامت وفتحت الكنتور .. رحت وسديته ودفعتها.. تره زوتيها هاي غرفتنه وبيها خصوصياتنه منو الي سمحلج ادخلين وتفتحين كنتورنا ؟؟
- عادي شكو بيها حبي
داحجي دخل حيدرة شافني معصبة وهي تضحك تقرب مني وگال.. شجاي يصير ؟؟؟
سكتت وملامحها تغيرت من شافته دخل..
وگفت يمه .. وسولفت اله
گال الها .. صحيح انا گلت الچ اصعدي لغرفتي تجيبين الملفات بس مو بهاي الطريقة الي تقتحمين غرفة نومنا بدون استأذن من مرتي طلبت منج الملف مو انتي تاخذي هي تنطي الج بأيدها..
صفنت بوجهي وابتسمت بوجها .. لان تفشلت اخذ الملف اتصفح بي وهي ساكتة ما حچت شيء ..
حيدرة :- انزلي رقية بعدين نتناقش على موضوع الملف ومرة الثانية لا تعيدي التصرف الي سويتي
رقية:- تمام ماشي واعتذر مو قصدي..
طلعت وسدت الباب گلتله هسه هيه ريام لو رقية؟..
-اثنينهن..
-خبيثة وحقيرة ما ارتاح الها شفت شسوت هسه؟
-ما صار شيء لا تكبرين الموضوع، عبالها تاخذ راحتها بالبيت وتدخل لغرفتنا بدون اذن منچ اطمئني ما رح تعيد الموقف هذا بعد ..
-ماشـي..
-رايح اكمل شغلي ..
اخذ اوراق وطلع گعدت علئ چرباية وهمست .. ياربي هسه اني شسويت بروووحي ! جاي اتدمرر ! ابتليت على عمري وحبيت إنسان طبعه وشخصيته غريبة وحياته غامضة !
مر وقت وطلعت كتبي رحت لغرفه حسن كلتله يدرسني بلگوه قبل جان يشتغل
اجا وكعدنه بالهول وكضيناها ضحك بضحك لو يرسملي وجه حيدرة علئ الكتاب وهو مخوزر لو يكتبلي شعر عليه
يخليني اضحك غصبا عليه ..
واجت نبراس صايرة حبابه وياا حسن وما يتعاركون كعدت يمنه وهو زين بالانكليزي ف هم شرحلها شوي..
...
نور
جنت نايمة المغرب وفزيت علئ صوت سالار وهو يكولي اكعدي..
كعدت و اباوعله وجهه ما يطمن گال جيبي موبايلج ..
انرعبت ناوي عليه كمت طلعته من الميز انطيته اله
- فتحي الباسورد
فتحته كعد يكلب ويفتح البرامج كلهن حسيته شاك بيه.. الحمدلله حاذفة كلشي يخص رائد
تالي اندگ موبايله كام وعاف موبايلي مفتوح اخذته وهو طلع..
...
ناردين
دخل حيدرة بيده موبايل سده وراح كعد على القنفه وفتح اللابتوب فاتح كاميرة وي سالار
كمت يمه سلمت عليه كتله :- هلوو شلونك حبيبي مشتاقتلك والله..
سالار:- الحمدلله حبيبتي شخبارچ..
حيدرة:- ناري سويت گهوة بس بقت بالمطبخ جيبيها بلا امر عليچ..
ناردين:- تمام نازله..
طلعت وسديت الباب..
حيدرة:- اي سالار احجي شنو الموضوع المهم؟
سالار:- انت تدري رائد جان يريد اختي نور ؟!
حيدرة:- اي من زمان اول ما خطبت ناردين هو شافها وراد يخطبها بس صارت شغله جديدة وسكت عن الموضوع ومافتح احد بي انتظر الوقت المناسب بس قبل ما اسافر لندن كالي
سالار:- وليش ما گلتلي؟ شنو كوا* * اني هنا؟
ضحكت :- يول عجل غير الغجال يحبها
- هاا اليوم تحجي مصلاوي
-يخوي لهجتي متكسرة بالمصلاوي جاي احاول اضبطها لان عندي شغل يتطلب هيج لهجة
-ااها موفق إن شاءالله
-التوفيق الك هم
-نور ما انطيها لــ رائد .
-ليش بويه ؟
-شغل رائد مثلك وكلش خطير شلون انطيها واوفق على الخطبة
-چاا هاي ناردين عندي وين الخطر؟؟
-شنو وين الخطر قبل اسبوع مخطوفة همزين الله لطف وما كتلوها وبعدين نور تختلف عن ناردين ، ناردين شخصيتها قوية نوعاً ما تتحمل وصبورة لأنو تحبك بالنسبة لنور ما تتحمل حياة رائد..
-بس ترا سالفة الخطف من ايدها هيه ثوله نبهتها هواااي لا تطلللع !
- نور اثول منها
-اكلك جاي تمسلت مو طيبة اختي انطيتها الك وقبلت
- اني اختلف مو نفس شغلكم حيدرة
-لا اختلف ولا هم يحزنون سالار هو يحبها ويريدها ليش توكف بقسمتها ؟؟
-لك حيدرة يا قسمة رائد صح صديقي وما يعيبه شيء بس فرق العمر جبير هو بالثلاثين وهي سادس بعدها ما مكملة !
-حتى طيبة سادس
-بس عمرها مقارب على عمري ومتفاهمين..
سكتت ...
-ما اريد انطيها ويصيرون مثلكم علاقتكم انتم ما متفاهمين وشخصياتكم ومبادئكم مختلفة ما ناجحة علاقتكم
-لاا ناجحة
-بلي ما ناجحة
-نااااااجحة جااي اكلك
ضحك:- زين تمام
-رائد يتزوج نور
-لااااا
-سالااااار
-يابه على شنو حارك اعصابك
-لك لاا تصير غبي خلي انامن نور عند رائد مثل ما امنت اختي عندك كلشي يصير على اقل رائد بظهرها ! وبعدين انا انطيت كلمة لرائد كلتله نور الك !
زفر نفس وتنهد وگال.. الله كريم يصير خير
دخلت ناردين ..وبيدها گهوة..
سالار:- صدك وين طيبة مشتاقلها روحي ناردين صيحلها
ناردين:- ماشي بعيوني..
..دقايق واجت
حيدرة:- تعالي بويه يكول خطيبج مشتاقلج
كعدت وكالت :- هلوو سالاري
سالار:- هلاا يا بعد روحي شلونج حبيبتي..
طيبة :- زينه وانت
سالار:- إذا انتي بخير اني بخير..
حيدرة.. طلعت وتركتهم
ناردين:- هااا خاين صاير ما تسأل عليه
سالار:- شلون ما اسأل كل يوم اخابر حيدرة عليج انتي ونبراس الله شاهد..
سكتت ..
سالار:- هاا طيوبتي حبيبي لج اخخخ مشتاقلج حييل ومشتاق لكلشي بيج بكد رحمة الله
-هلاوووو اخوي عبالي يستحي
ضحك وگال عوفينا اريد احچي وياها..
-والله خوش يطردني من غرفتي يلاا كسرتو خاطري هههههه
غمزلي وگلتله.. احجوا براحتكم وخلصو الشحن لابتوبه..
طلعت ..كعدت يم خالتي كاعدة يمها رقية
لابسه ينطرون حصر وقميص صلوخ ..هزيت ايدي هسه لو اني هيج البس غير يموتني سيد حيدرة
بس هاي عادي ومطلعه زنودها .. طلع من المطبخ شافني وحضني وهو ياكل تفاحة حمرة وگال حرام اكل تفاح وخدودج موجودة ابتسمت وباسني بخدي..
وهنه يضحكن ..ورقية تباوعلي صفح بنظرات ما عاجبها
شالني واني اضحك صعدني للغرفة وسد الباب برجله ونيمني على الجربايه ..
حيدرة :- ناري المشاكسة..
تمدد يمي وحضنني من خصري :- اريد انام اتأخر الوقت..
-اي نام تصبح على خير
-على عيونچ يعني..
-ممممم
باس عيوني وگال ناري.. انا اسف
-على شنو؟..
-على باچر..
-ليش شنو رح يصير؟؟..
-انتي صبرتي هواي قوي گلبچ للأيام القادمة..
-خوفتني حيدرا !
-لا تخافين نامي الصباح رباح..
...
حيدرة
ثاني يوم كعدت رقية كلتلها امشي نطلع لبيتي الثاني ما نبقى هنا اخذت جنطتها وكملت
ناردين .. وين رح ترحون؟؟
حيدرة:- متفق بس يوم واحد نبقى هنا وتالي نروح
-اي وين ترحون
-لبيت اصدقائي المشترك.. هناك رح نسكن
-لاا بلاا ليش؟
-افضل جبت اثاث للغرفة حتى يتأكدون وهسه رح نروح لان الشغل كله هناك
-اجي وياكم اني!
-لا تبقين اهنا انتي ، انا اريد احميج وانتي تردين ترحين وياي ! كبرري عقلج رحمة لابوج رغددد رغددد
اجتي شلتها واشرت على رقيه تجي وشلت الجنطة..
طلعنه وصعدنه بسيارتي خليت رغد بحضنها
ناردين :- طلعت اركض صرخت من قهري ..حيدرررا
اجه يمي صرت اضرب على صدرة :- مووو بكيييييفك ارريد ارووح ماا اعوفك وياهااااا سمعتت ما ااااااعوفك !!
دخلني جوا صاح - حسسسن
اجا وكال شكو اشرله عليه اجا يمي لزمني من ايدي وهو طلع وسد الباب..
صرخت من كل كلبي ..حيدررررررررة !
حسسن وخرر ارريد ارووح موو بكيفه هووو
ليشش هيج يرررررريد يعوفني ويروح وياهاا شيسوووووي ؟؟
صعدت لغرفتي متت بجي ..وقفلت الباب ونبراس وطيبة يدكن بالباب
حبست نفسي ابجي من قهري حيل ..احس روحي شاغت واني اشهك
-اكرررهك ! .
...
حيدرة:- صافن بالطريق اسوق وبالي يمها تنهدت وقبضت ايدي.. خلت ايدها رقيه على كتفي بأطمئنان
رقيه :- لاا تفكر بيها فكر بشغلك و انسئ قلبك
بعدت ايدها عني وزفرت نفس..
...
نور
الصبح اجا سالار لغرفتي فتح الموضوع الخطوبة مرة الثانية وصار يسولفلي عليه گال شنو رأيج بي
-ما ادري انت ادرى بمصلحتي
-إذا تحسين رائد مناسب الج كولي ما عندي مانع واشكال كولي موافقة لو لا حتئ اذا لا اكله ماعندك قسمة يمي
-هاا لااا مووواافقة..
ضحك وگال
- ادري انتي ما مسويه شيء وادري بي هو يحبج واحس بي
لان اناهم احب،
الحب مو حرام اذا تردينه كولي ..اخوج اني ومثل ابوج لاا تستحين مني
-اي موافقة .
كرصني من خدودي
-كبرتي وصرتي مره نوري رح تنخطب
ضحك ..وراح انطا جواب لرائد بعد يومين اجا رائد للشقه هو وابو قروا الفاتحة وحددوا موعد الخطوبة
...
ناردين
مر يومين وهو ما جاي للبيت واني ما احجي وي احد نفسيتي متدمرة خابرتني نور وسولفتنه انو صديق حيدرة اجا خطبها وهي موفقة فرحناها اني ونبراس وتفاجئنه انو بعد باجر الخطوبة..
اتصلت علئ سالار كال ما اعزم اي شخص منه بس هو يجيب عمامه ورح يجي علينه باجر ياخذنه لاربيل ..
فا كعدنه نجهز ..بنفس اليوم راحت نبراس وياا حسن للمول جابو 3 فساتين واحد اليه والها ولطيبة الصبح اجا سالار وجان حيدرة موجود
صعدن يمه بسيارة سالار ، وگالولي اصعدي بسيارة حيدرة رغم ما ردت اشوفه بس الموقف يحكم مشيت دافتح بالباب اجت رقيه فتحت الباب وصعدت كعدت بالصدر يمه ...
بقيت صافنة واكفة بمكاني ما عندي طاقة للمشاكل صعدت ورا وخالتي يمي ورغد بحضنها درت وجهي للجامه طول الطريق
شكرا لزيارتكم عالم روايات سكيرهوم
