اسكربيت غلطة عمري الفصل الثالث والاخير
ولسه هيمشي مسكه ايده لا اراديا وقالت بسرعه… انت كمان عيونك غاليه
بصلها بابتسامه جميله لما قالت كده وهيه اتكسفت لما ادركت اللي قالتو وحمحمت وقالت…قصدي.. يعني… واتنهدت وقالت …مش عارفه الاقي كذبه قصدي اللي قولتو بقى وخلاص
رياض ضحك جامد على كلامها وبقوا يضحكوا سوا بسعاده
بعد اليوم ده رياض بقى يعملها بمنتهى الادب والاحترام ما بقاش يضايقها ولا يدخل اوضتها بدون استئذان …وجم الخدم بقم يعملو شغل البيت
وهيه بقت تشرف عليهم وتاخد بالها للطفل ولرياض كمان ومهتمه بكل تفاصيله وبتساعده في شغله وكانت قريبه جدا منه وحاسين انهم يعرفوا بعض من زمن
بعد شهر كامل كانوا قاعدين مع بعض وبيضحكوا وحاطين الطفل في العربيه بتاعته وبيلعبوا معاه وتقى هيه ورياض كل واحد كان بيحاول يخليه يقول اسمه لحد ما قال اسم تقى
بمنتهى الجمال
تقى ضحكت وهي بتنط بسعاده وقالت… شوفت قال اسمي قبل اسمك
رياض بص لها بضيق وقال… بتغشي على فكره لو كنتي قولتيله قول بابا كان قالها بس اسمي تقيل عليه شويه
تقى ضحكت ولسه هترد دخلت بنت وقالت …رياض وحشتني يا بيبي و قربت منه وضمته
تقى كانت بتبص لهم بزهول وهو قال بارتباك… اهلا اهلا يا ميار
ميار لسه هترد تقى قالت بسرعه …ميار اااه…قولتلي هيه دي الاكس مش كده
رياض بلع ريقه وهز راسه بالموافقه
تقى قربت منها وبقت تلف حواليها وقالت…. وفين باقي هدومك يا اختي اوعي تقولي لي اتنشلت منك
ميار بصت لها باستغراب وقالت… انا لابسه كل هدومي هو في ايه مين دي يا رياض
تقى قاطعتها وقالت… انا المربيه الجديده يا حببتي فاهمه معنى مربيه يعني جايه من التربيه
ميار قالت… طيب روحي قوللهم يعملوا لي قهوه
تقى قالت بسرعه …وقهوه ليه يا حبيبتي نجيب لكم حاجه ساقعه تطري على القلب
ميار لسه هترد بس تقى قربت منها قوي وقالت… انتي بقى حبيبته القديمه صح
ميار قالت بحرج… اه انا
تقى قالت بسرعه …ومش هو راح رماكي زي علبه التونه الفاضيه وراح اتجوز
ميار بصت لها بذهول وقالت…علبه تونه
تقى قالت بسرعه… اه والفاضيه كمان
ميار قالت بزهول… البتاعه دي بتكلمني ازاي كده
رياض لسه هيتكلم تقى قاطعته وقالت… البتاعه دي هتديكي معلومه جديده الطفل اللي قاعد في العربيه ده ابنه ..يعني الجدع ده متجوز ومعاه طفل..اكيد ما عندكيش خبر ومن واجبي اوجهك
ميار قالت بضيق… عارفه طبعا
تقى قالت بسرعه … ومدام عارفه انو متجوز ومعاه طفل لازقه في حياته ليه الرجاله انعدمت
ميار قالت بغضب… اسمعي يا شيء انت
بس اتصدمت هي ورياض لما تقى قلعت الشبشب بتاعها وقالت …لا اسمعي انتي لو شوفت رجلك عتبت المكان ده هقطعهالك ياخرابة البيوت … واكيد الجسم الحلو ده ما جربش لبعتين من الشبشب ولا يحب يجرب
ميار قالت بزهول … oh my god انت هتسيبها تضربني بالشكل ده يا رياض
رياض كان ساكت بصدمه وتقى قالت بغضب…. انا قلت ايه ..ما تكلميهوش ابدا
البنت خافت وجريت وتقى قالت بصوت عالي …لو شوفتك حوالين المكان تاني هعلقك مش ما يحلى لكمش غير الراجل المتجوز حاجه اخر هم و
بس شهقت لما شدها بقوه بقت بين ايديه وبص لعيونها باعجاب شديد وقال….. ايه اللي عملتيه ده
تقى بلعت ريقها بارتباك وقالت…. عشان مراتك الغلبانه
رياض ابتسم وقال ….متاكده عشان مراتي مش عشان حاجه تانيه
تقى قالت بارتباك…حاجه تانيه زي ايه
رياض ابتسم وبص لعيونها وقال….حسيت انك غيرانه مثلا
تقى قالت بدهشه…انت بتقول اي كلام على فكره
ولسه هتبعد شدها عليه اكتر وقال…. انت ليه بتتهربي مني يا تقى… بتهربي مني ولا من نفسك ولا من مشاعرك
تقى اتملت عيونها بالدموع وقالت…. انا ما عنديش مشاعر ليك انا مش كده
سند جبينه على جبينها وقال…. بس انا عندي…. عندي حاجات ليكي في قلبي مش عارف اوصفها مشاعر حلوه اوي … وبحس بدقات قلبك بين ايدي بتقولي اني على حق … بتقول لي انك مش مجرد واحده دخلت على حياتي يا تقى كانت دايما تقول لي انك انتي حياتي
تقى اتسعت عينيها وهي بتبص له بزهول ولسه هتتكلم سمعو صوت يعرفوه كويس واحده بتزعق وبتقول …ولله عال ورجعاله تاني كمان
بعدو عن بعض بسرعه ورياض قال بدهشه …. جودي
دخلت ست في العشرينات وعلى وشها غضب شديد وقالت.. الحربايه اللي اسمها ميار شوفتها وهي طالعه من هنا..انت مش هتتربي ابدا بقى لي شهر غايبه عن البيت وانت برده بتواعدها
رياض اتنهد بضيق وقال…كويس انك عارفه ان بقالك شهر غايبه…واكيد ده مش كلام تقوليه بعد الغيبه دي كلها …فيه حاجات ارق من كده ممكن تتقال بس اكيد معندكيش علم بيها زي وحشتني مثلا …..او ابنك ده بلاش انا
جودي بصيت له بغضب وراحت شالت الولد وباسته وقالت..بغيظ كانت بتعمل ايه هنا بلاش انت ..قوليلي انتي يا تقى
رياض اتصدم وقال… تقى انت تعرفي تقى من فين
جودي قالت بغضب ….تقى صاحبتي وانا اللي جايباها هنا عشان تخلي بالها من الولد ده مش موضوعنا دلوقتي… الزفت اللي اسمها ميار دي كانت بتعمل ايه هنا
رياض اتصدم بشده وبص لتقى بزهول وقال… هي بعتاكي مش معقول
تقى بصت له بدموع وقالت… ما تزعلش مني جودي صاحبتي وكان لازم اقف جنبها..وكانت عيزاني اخلي بالي على ابنها في غيابها
رياض حس بالدموع بتلمع في عينه لاول مره كان مصدوم بشده من اللي بيحصل وجودي زعقت وقالت… يا تقى انا بكلمك ما تشلنيش البنت دي كانت بتعمل ايه هنا
تقى اتنهدت وقالت ….. كانت جايه تتمحك زي عادتها ومسحت لك بكرامتها الارض ..اسمعي يا جودي انتي عندك زوج وابن يجننو خافي عليهم وحافظي على جوازك وبطلي تعاقبي جوزك …الأفضل تعاقبي اي واحده تقربلو …حياتك هتفرق كثير ركزي معاه شويه واهتمي بيه و سيبك من الجنان بتاعك ده بقى انت اللي بايدك تدي واحده زي دي فرصه تقرب له او تقطعي لها اي طريق يوصلها لجوزك وزي ما قال لك رياض ده مش اسلوب تقابليه بيه بعد الوقت ده كله مهما كان
جودي اتنهدت بحرج وقربت من رياض وقالت… هو عارف اني بعمل كده لاني بغير عليه مش انت عارفني بغير عليك يا حبيبي
رياض كان مخنوق جدا ومش عارف مخنوق من ايه بالظبط مخنوق ان كل ده طلع كدب ولا مخنوق انها رجعت اصلا ولا مخنوق على الحياه اللي كان بيتمناها وحس انه بيفقدها لما عرف انها صاحبه جودي ما كانش عارف بالظبط يرد بايه اتنهد وقال..عارف يا جودي
جودي اترمت في حضنه وضمتك بقوه وقالت ….وحياه بابي ومامي انت وحشتني قوي وحشتني مو\ت مش هبعد عنك تاني ابدا بس انت كمان ما تجرحنيش بالطريقه دي تاني
تقى اتنهدت بضيق وقالت… ما تجرحهاش بالطريقه دي تاني بلاش ميار اختار اي واحده ثانيه..و بصت لها بغيظ وقالت لا يجرحك بالطريقه دي ولا باي طريقه غيرها جوزك ليكي لوحدك
قالت كده وقربت من الولد شالته وباسته وقالت…. طيب بما انك رجعتي لابنك وجوزك فانا همشي
رياض حس بقلبه بيطلع من بين ضلوعه لما قالت كده بص لها بدموع وقال… جودي ممكن تاخدي تيم تنيميه اصلو منامش النهارده واكيد وحشتيه ..وانا هحصلك على الاوضه
جودي ابتسمت وقالت طبعا …وشكرت تقى وحضنتها
واخذت ابنها وطلعت
رياض بصلها بدموع وقال ….ليه عملت كده… كنتي قولي لي على الاقل ما كنتش غرقت كده
تقى بصتلو بدموع وقالت…. غصب عني جوري مش بس صاحبتي …دي لها جمايل كبيره عليا لها فضل اني كملت تعليمي وياما وقفت جمبي…. كانت عايزه حد يخلي باله من ابنها وما قدرتش ارفض … على العموم مراتك رجعت لك حاول تبطل عك وتخلي بالك منها
رياض حط ايده وعلى قلبه وقال بوجع… طب وقلبي يا تقى قلبي اللي ما صدقت انو دق صدقت معاش
تقى نزلت دموعها بغزاره وقالت… متقلقش عليه هيلاقي قلبي جمبه هسيبه هنا يونسوا ..لاني همشي من غيره يا رياض
رياض ابتسم بدموع وقال…. خليكي ….انا هتكلم معاها و
تقى حطت ايدها على شفايفه بسرعه وقالت ….ارجوك ما تكملش انا لسه قايله لميار انها خرابة بيوت انا مش كده انا عمري ما اخرب بيت حد تاني..و اخذ راجل من على مراته خصوصا لو كانت مراته دي جودي صاحبتي الوحيده….انا بعترف اني غلطت بس اي مشاعر في قلبي ليك كانت غصب عني والله ما قصدتهاش ابدا
رياض مسك ايدها وضغط عليها بحنيه وقال ….مش هقدر اخسرك بعد ما لقيتك خلينا نعمل اي حاجه ..اي حاجه ارجوكي
سحبت ايدها من ايده وقالت بدموع ….هننسى هننسى صدقني شهر واحد نعتبره حلم حلم مهما ذاد جماله لكن هنصحى منه ….اشوف وشك بخير
ولسه هتمشي شدها عليه بقوه وضمها بكل قوته واخذ نفس عميق وقال بالم…هاشوفك تاني
تقى بعدت عنه وهزت راسها بالرفض وقالت…. ابدا
رياض قال بسرعه… ليه… ممكن اقابلك عادي يعني تشتغلي في الشركه او قابليني كصديق عادي
تقى ضحكت بخفه وسط دموعها وقالت… انا وانت مستحيل نكون اصدقاء مستحيل نكون اخوات مستحيل نكون حاجه الا حبيب وحبيبه ..ودي مش هتنفع وانت عارف تقى كويس عارف انها مش هتبقى عش..يقه مهما كان
رياض ابتسم بحزن وهز راسه بالموافقه
وهي ابتسمت وقالت بدموع… هتفضل معايا مهما عدى العمر يا رياض ..مع السلامه يا قلب اتمنيته وهو مش من حقي…مع السلامه يا غلطة عمري اللي عمري ما اندم عليها
قالت كده ومشيت ورياض بيبص لطيفها و دموعه بتنزل على خدوده لاول مره… جري ناحيه الشباك وهو بيبص لها وهي طالعه من الجنينه
تقى كانت منهاره حرفيا وقلبها بينزف مع كل خطوه التفتت ناحيه الشباك وشاورت له بايدها …وطلعت جري وهي مش قادره تبص له تاني.. ركبت اول تاكسي قابلها وسمحت لدموعها بنزول بغزاره وبقيت تحاول تخرج كل الوجع اللي جواها كل ما بتشوف نفسها بتبعد من البيت بتحس حرفيا انها سابت قلبها هناك
رياض فضل واقف في الشباك لحد ما اختفت عن انظاره وهو بيفكر في كل ثانيه معاها ودموعه بتنزل غصب عنه
فاق من شروده على صوت جوري بتنادي عليه وبتقول… رياض حبيبي تعالى في موضوع كبير عايزه احكيه لك عليه
اتنهد بحزن وحط ايده على قلبه وهو بيكرر نفس جمله تقى وقال ….مع السلامه يا قلب اتمنيته وهو مش من حقي …مع السلامه يا غلطة عمري اللي عمري ما اندم عليها🥺💔
تمت بحمد الله
انتهت احداث قصتنا نتمني ان تكون نالت اعجابكم وبانتظار ارائكم في التعليقات وشكرا لزيارتكم عالم روايات سكيرهوم
للمزيد من الروايات الحصرية زورو قناتنا علي التليجرام من هنا
