رواية نقطة تحول الفصل الثالث بقلم جمانه السعيدي
دخلت أبيت عمتي اخت ابوي وخالي سلم عليه وراح
بقت عيني ورا وابجي
حسيت نفسي ساعته لاحول ولاقوه
عمه بشرى تعاي ادخلي حبيبتي
سحبتني من ايدي ودخلتني جوه بيتهم حلوه ونضيف ومرتب
طخم وبردات تخبل وكلشي يلمع
بس اني ابجي وعيني على الباب
توقعة خالي يرجع وياخذني ويااااا
بس عيوني تعبن وكلبي فحط من البجي وخالي مارجعلي ابد
راحت عمتي جابتلي مي اشرب
انطتني الكلاص وكالت انتي شنو اسمج
...عباس
...شنووو عباس وين اكو بنيه اسمها عباس لو انتي ولد واني ما ادري
...لا اني اسمي عبير بس بيت خالي يصيحولي عباس
.....وليش هيج شكلج جنج ولد شعرج قصير
وملابسه تراجي شكلج ولد صدك
....اني اريد اصير ولدمثل ولد خالي
...بس انتي بنيه والبنيه لو كلشي تسوي تبقى بنيه
...لا اني ولد
....ولله ما ادري شكلج وشلون محمد راح يستقبلج ما ادري
....عمه وين جهالج
...اني ماعندي جهال كلشي قسمة الله
دخلت عمتي جوه واني بقيت كاعده بمكاني وما كاو ابالي غير تفكير واحد
خالي هسه يرجع وياخذني وياااا
هذا المكان مو مكاني وما اعرف اعيش بي ابد
جمانه السعيدي
شويه وطلعت عمتي شايله صينيه زغيره
بيها ماعون بتيته وماعون بيض وخبز وزلاطه
جانت الساعه تقريبا بلعشره الصبح
اني ما قبلت اكل بلبدايه بس عمتي صممت اكل
شكل الاكل طيب
اكلت شويه استحيت منها رغم اني حيل جوعانه
بعدين شالت الصينيه وشغلت التلفزيون طلعت مسلسل
وكامت تباوع واني اباوع وياها
بعدين دك التليفون اي عدهم تليفون ارضي
واني كمزت من صوت رنت التليفون
هي شالته وكامت تخابر
طبعا عمتي مدرسه وزوجها موضف بلمصرف الضاهر وضيفته زينه وحسب ما فهمت عندا اكثر من شهاده
وماعدهم اطفال السبب من زوجها
بس هي تحبه وعايشه وياااا
كالت تعاي ادخلي ارتاحي جوه عدهم غرفه فارغه
وما بيها اثاث بس فراش يمكن خالينها للخطار
تمددت جانت الدنيا ضهر بس ماكدرت انام
سمعت زوجها اجا وهي حجتله عني وشلون خالي جابني
وما لكه اهلي وخلاني يمها
حسيته انسان طيب لان كان رده عليها
مسكينه هاي الطفله ضايعه بلنص الام ماتت والاب حاير بزوجته واطفاله
بلكت الله يحنن كلب محمد عليها وياخذها ويعاملها مثل اطفاله
سبحان الله ناس محسره حسره عليها الطفل وناس تخلف وتشمر الحمد لله على كل حال
الساعه بلثنتين كمل الغدا واجت عمتي كالت تعاي تغدي
اني استحيت من زوجها
بس هي صممت اروح اتغدا وياهم
طلعت ولكيتها محضره الغدا وزوجها يغسل بادي
كعدت وهو التفت عليه وكال هلو عمو شلونج
عبير الحمد لله
...انشاء الله مرتاحه عدنا
...هزيت راسي
وبدينا ناكل اني كلش جوعانه ومنضر الاكل يفتح النفس
اكلت لمن شبعت
هم يحجون بينهم مواضيع مافهمت منها اي شي
خلصنا وهي بدت ترتب بلمطبخ وزوجها دخل نام
على فكره زوجها اسمه محسن
شغلت التلفزيون وكالت تعاي اكعدي اتفرجي على التلفزيون بين مايجون اهلج
الساعه سته العصر سمعته طلعت بلباب تسولف
شويه ورجعت وكالت اجو اهلج
ما ادري ليش ما ارتاحيت الكلمة اهلج ابد
لان ما احسهم اهلي ابد
اخذتني من ايدي ورحنا عليهم
دخلنا ولكيتهم هوسه منزلين غراضهم بلباب
وداخلين جوه
اخذتني ودخلتني الاستقبال شويه واجا ابوي
شكد جنت خايفه منه
والصراحه اكثر حسيت كلبي ما مرتاح ابد من شفته
كعد كبالي وكعدو اثنيين ولد وبنيه قريبين علي
بعدين اجت زوجته
من شفت لمتهم ضجت عايشين جو اسري
ومهتم بجهاله والبنيه هي الزغيره خالها بحضنه ويبوس بيها
واني بعمره ما سئل عني ابد
ولا يعرف عدله ميته جوعانه شبعانه
لابسه مصلخه
أشر عليه وكال العمتي هاي منوووو
عمتي هاي بنتك عبير
...شنوووو اكيد تتشاقين
....لا ما اتشاقه ولله هاي بنتك امها ماتت وبعد مالها احد غيرك بلدنيا
زوجت بابا شنو شنو شنو بنتك وين جانت
من يكول هاي بنته شكلها مجديه
عمتي لا هاي جنسيتها وخالها جابها بايده
....وانتي شلون تاخذينها احنا مامستعدين نستقبلها
وين جانت وهسه جايبينها
عمتي امها ماتت ترا خطيه تعيش محرومه من الام والاب
محمد ولله ما ادري شكلج اني من البدايه كتلهم ما اريدها وما اريد اي طفل منها
عمتي ترا هاي لحمك ودمك وحالها حال جهالك حرام عليك هيج تعاملها
زوجت بابا لاتقارنينها بجهالي شنو هاي المجديه
هي وجهالي نفس الشي
عبير ساعته كرهت الدنيا كلها معقوله الكل ما يردوني واحد يشمرني على الثاني
ليش ياربي اني شسويت بزماني
بقيت كاعده واني احس الحراره صعدت الراسي
عمتي كامت وكالت ذوله اهللج ابقي عدهم وصيري حبابه
عمتي طلعت
والكل كام طلع برا وبقيت كاعده وحدي
حسيت المكان حار وحسيت نفسي اختنكت حيل
سمعت زوجت ابوي تصيح بصوت عالي وتكله ما اريدها بيتي ابد
اني شمعرفني شنو اخلاقها ايجوز حراميه ايجوز بيها مرض معدي تنقله للجهال
شلون انام واامن وهي موجوده بيتي
اني شمعرفني شلون متربيه
ايجوز اخلاقها مو تمام
محمد اصبريلي كم يوم خل احاول اتصل بخالها بلكت يقبل يرجعها
واذا ما قبل يرجعها انذبها بملجئ الايتام
متخيلين واحد كاعد والناس تشمر علي حجار بدون سبب
هذا كان شعوري بلضبط
احس كلامها عليه مثل الحجار الي نازل يكسر راسي
بقيت كاعده منا للمغرب
وحدي بلاستقبال ومحد دخل عليه
غير الولد الزغير الي هو اخوي ضربني على راسي وتفل عليه وطلع
اكيد هو طفل ويسمع امه تحجي عليه وابو يساندها
متوقعين وحش وكاعد ويريد يهجم عليه
حضرو العشى وتعشو واني محد ذكرني بلكمه عبالك بيه مرض خبيث
الله يسامحك خالي ليش هيج سويت بيه
بعدين تعبت تمددت بمكاني ونمت
كعدت بليل تقريبا بالثنتين ونص كلش جوعانه اريد ارجع انام ماكوووو
كمت اتسحبت على كيف وطلعت باوعت الكل نايم
دخلت للمطبخ
فتحت الثلاجه اخذت خياره وطماطه
وتفاحه وسديت الثلاجه ورجعت المكاني على كيف
اكلتها ونمت
نمت واني ما اعرف مصيري شنوووو
وباجر شنو منتضرني
كعدت على ايد تضربني راشدي قوي فتحت عيني اخوي الجبير مهند عمره عشر سنوات
طفرت وكتله ليش
مهند يطبج مرض مجديه شعدج جايه بيتنا
ارجعي منيين ما اجيتي
اخو الثاني ازغر منه شافه يضربني وتشجع عليه شال النعال
وضربني
ساعته دمي فار شني اني فصليت ابوكم
عبالهم اني بنيه فقيره ويضربوني
كلت كافي تحملت هواي ياروح ما بعدج روح
طفرت عليهم اثنيينهم وشبعتهم كتل خليت واحد على الثاني
وكسرتهم تكسر عياطهم كلب البيت كلب
اجت امهم وابوي ركض
ابوي شالني منهم شيل وزوجته ضلت تضرب بيه بكل قوته
ردت ابوي يعوفني واني ااعلمها
الحقيره نازله عليه غلط من اجيت الهسه
شنو ماكله حلال ابوها
شكرا لزيارتكم عالم روايات سكيرهوم
