رواية أرض الخناجر الفصل السابع والأربعون بقلم ايلول
خذني يمَّك
گبُل لا يخلص صبُرنه
ويطفىٰ دم وجُوهنه وتِطلع صفر
خذني يمَّك
بعد ماظل كُل عذر لا تعتذر
خذني يمَّك
گبُل لا يم الصُفر ينحَط صُفر
══━━━━✥◈✥━━━━══
بريا:: ليمتتت؟
مــاسه:: فزيت اعاينله بصدمة وهوه فاتح عيونه على وسعهن بغضب شمر الاغراض من ايده ركضت وراه روحـــي رايحه سديت باب الحوش وهو مثل المسودن يتراجف ويصيح
بريا:: وخررررري.
-بريا فدووه اسمعني قديمة السآلفة قديمة بس اسمعني.
احجي بخوف وهوه مشتعل ويتراجف صيح بصوت عالي ودفعني من باب الحوش طلع يركض لطمت على وجهي ارجف
-عززا بعيني عزززا بعيني.
رغد:: تعاي بساع خابري مــيثم.
ركضت للتلفون اتصل عليه وصوتي. يرجف بس گالي الو صحت
-الحك مــيثم بريا سمع بمازن خاطب رنـــه وما ادري وين راح.
سد التلفون بوجهي وانه افتر واعض بأيدي من القهر شلون حجيت شبيه شجاني.
""
رنـــه :: كنست الحوش بالليل لان بالنهار حاره ينمرد گـــلبي من الشمس، حسين كاعد يمي على الدچة يعاين بتلفوني انطيه اله بس حتى يضل يمي لان نوبات أضل اتخيل واخافن اطلع للحوش وحدي اذا لا عبود ولا طــروادة موجودين، اضــحك على حسين اكله اكعد كنك بتلفوني على نت بيت جدي وانه اكنس، كضيت كنس وشغلت ماطور الماي جريت الصونده ارش الحوش وحلكي ناشف من التعب عاينلي حسين طفه التلفون گالي
حسين:: تعبتي؟ ارشنه انا وانتِ تكعدين؟
عاينتله اضــحك
-لا راح اكضي.
سكت رد يعاين للتلفون وانه اتحرك بالحوش حاطه اصابعي على نص الصونده وارشرش الگاع، شهگت فازه على دفعة الباب القوية ومن ما انفتح لان قافلينه اندك حيييل ركض حسين يفتحه وانه واكفه بمچاني بمجرد فتحه صار بوجهي بريا.
ذبيت الصونده من ايدي وبساع شلت الحجاب من رگبتي لفيته على راسي هستوني اريدن احجي واصيح عليه وهذا مثل المسودن طب لبيتنا جرني من ايديي حييل وكضني من زنودي بغضب يصيح
بريا:: عااايني ولج لو تموووتين لو تموتين ما تاخذين مازن سمعتينيييي
يصيح بغضب وبصوت عالي ويطحن بأيدي وانه ما فاهمه منه شي لمن جاب طاري مازن دفعته افلت بروحي من عده وما يهدني وحسين يجر بيه مني ويصيح ويغلط
-وخررر هدني يا خايسس هددني
عاف ايدي وشال ايده حطها على حلكه يهدد بغضب وصياح عيونه حمر
-لو تحطين رجل بالسما ورجل بالگاع ماتاخذين مازن.
حطيت ايديي بصدره ادفعه بحرگه اغلط متسودنه ومصدومة بيه
-والله الا اخذنه عناد بيك اخذنه ياهي مالتك انت شلك غرض بيه وخرررر عني .
جرني حييل رگعني بالحايط وصاح بوجهي ينفض شر وفاتح عيونه حييل
-رررررنه.
صرخت افك روحـــي من عده
-هددني وخر عني
يهز بيه من جتافي بغضب ويصيح بعصبية
بريا:: انا انااا اريدنج ما تاخذين غيري.
-عوووع وخررر كبر لكبرك وخرر عني اليوم انعل والددديك
صيحت اتراجف وبأثنين ايديي اهومش اريدن الوحنه واطكه وهوه كاضني حيل وحسين متسودن يطك بيه ويغلط ويصيح وهذا ما مهتم كض وجهي بين اديه وانه تسودنت
بريا:: انهي عليج والزلمه يگربلج اكتله بمچانه.
حسين:: هددد رنـــه هدها ابن الخايس هدددها خرب امك.
فاتحه عيني مصدومه بيه وحسين يطكه ساد ايده ويطك بيه ببطنه ويدفعه من عدي دار عليه دفعه بقوة طاح حسين على صبة الباب على ايده صررخ بوجع وبريا ما مهتم يكض بوجهي حيل يوديه مناه ومناه يريدني اعاينله يحجي بغضب وينتر بحرگه
- عاينــي عاايني انا اريدنج .
صرخت بكل صوتي ادفعه من عندي
-وخررررر وخر حيوان
توني اركض لحسين وجرني يصيح وبلحظتها اندفع باب الحوش وجره طــروادة ركضت لحسين اكومه من الگاع وهو يصرخ من اصابعه كاضهن وروحه مفرفحه بس جريت ايده وشفتهن صرخت ابجي من شفت اصبعه صاير اعوج
وطرواده موته لبريا كطعه تگطع وميثم ووهب يجرون بيه بس يردونه يعوفه وبريا كل هذا ويصيح
-والله ما تطيهااا اكتلها واكتله.
وطرواده متسودن يطكه راشدي حيل وهـــب كاض اديه يدفعه وميثم يجر بريا وبريا ما يرضى يطلع يصيح ما مهتم حتى لطرواده يدير وجهه علي ويصيح
-رنـــه لووو تموتين لو تموتين ماتاخذين غيري
طــروادة:: بعده يحجي بعدده يحجي والكفل اخته يا بريااا اموتنك
جراه وهـــب يريد يطببه للبيت دفعه حيل خازره ويصيح بغضب يتراجف
طــروادة:: وخرررر خرب اهلك هددني
فلت روحه من ايد وهـــب، مــيثم واكف بينه وبين بريا توه يحاجيه يريد يكضه وطرواده بساع جر بريا من وره مــيثم طكه بوكسي على وجهه چلبوا بيه أثنينهم يجرونه وعلى صوتهم التموا آلولد كلهم وانه مگابله حسين وابجي گـــلبي يددك حيل ارجف كلي وهو يصرخ ميت من الوجع.
والولد عركتهم بباب الحوش شلون موجه يجون ويرحون يجيبون طــروادة تدفع ويرد يدفعهم بحرگه بس يريد يكض بريا وهذاك يدفع بيهم يريد يجي الطرواده يصيح
بريا::تكتلني يله تگدر تطيها الغيري
واشوفن مــيثم طكه يريده بس يسكت ويكض بطرواده يتوسل ويتعذر
مــيثم:: والله انا انا طيح حظه حاجيني كهلان عاينلي.
وطرواده من بينهم شايل ايده يدفعهم ويصيح على بريا بحرگه وغضب
طــروادة:: خنيث خاااايس اذا ما كطعتك وخررر عاين بريا عاين، بس هدوووني ما اطكه بس احاجيه بس احاااجيه، عاااااين وروح ابوي على سوايتك هااي وطبت بيتي لو تموووت ما تلوح رنـــه.
بريا:: لا تحللللف لا تحلف والله ما تاخذ غيري.
ووي حچايته هد طــروادة متسودن كض بريا خانگه والولد بينهم يردون بس يفكونه من ايده طلعوا اعمامي يغلطون ويصيحون عليهم كومت حسين من الگاع وهمه طلعوا من الحوش وگدام بيتنا گبت عركتهم وصياحهم وغلط عمامي وجدي من صاح على طــروادة
شعلان:: بت عمه ينهي عليها وياخذها غصباً على خشمك
وطرواده ينشال وينرگع تعارك وي جدي وبريا صاح عليه
بريا:: مالك غرض انتَ ما انهي عليها ما انهي بس ماتاخذ غيري سمعتني كهلان والله ما تاخذ غيري.
رنـــه :: مسحت وجهي ارجف غسلت لحسين يصرخ من وجع أيده، وانه احس بروحي دوخة تاخذني ودوخه تجيبني وعيوني غوشن وگلبي يدك حيل كعدت على حيلي يم الحوض كوه اتنفس وهو بس لمحني تخربطت عاف وجع ايده وطلع يرجف دموعه على خده ويصيح بحرگه على طــروادة
وردلي يركض من بين دموعه يكض وجهي بأيد وحده ويحجي بخوف
حسين:: رنـــه رنـــه.
وطب طــروادة وراه يركض شافني وشاف ايد حسين تسودن والولد يصيحون عليه يردون ياخذون حسين للمستشفى وهو طببني للبيت وركض جاب جهاز السكر مالكه بيه شرايح مخلصات صيح بوجهي
-ليشششش ما تحجين من يكضن ليشش.
شال جهاز السكر رگعه بالحايط فلشه محترك گلبه زهره تبجي على صفحة وحسين ضل بالحوش اسمع صوت بچيه وصوت الولد من يحاجونه صاح صــيهد
صــيهد:: خااااب شني تجي لو لا.
طب طــروادة للغرفة جاب عبايتي لبسنياها ومسح وجهي ايده ترجف من العصبية ويريد يحاجيني بهدوء
-گومي اخذي للمستشفى.
كومني مجلبه بأيده التفتت الزهره فزت من نومها على صوت الصريخ والعركه
-زهره زهره تضل وحدها.
فتح باب الهول الولد بالحوش گال السليم.
طــروادة:: صيح للبنات يجن يم زهره.
وزهره طلعت ورانه تبجي گالها سليم
-تعاي زهره اخذج يم البنات.
التفت عليه طــروادة گاله
طــروادة:: لا جيبهن يمها.
هز راسه ســليم خوش، وطلعنه للسيارة صعدت ليوره وطرواده كض حسين يعاين الايده ويحجي بحرگه متحلف ببريا صاح عليه صــيهد
صــيهد:: خيوولي خيوولي كافي اصعد.
صعد طــروادة محترگ گلبه وصيهد يسوق حسين من ضلوا يحجون عليه لان يبجي حط ايده على حلكه كاتم صوته ودموعه تجري متت من القهر عليه تمنيت روحـــي قوية واگدر اكتل بريا.
طــروادة متحلف بيه وصيهد يشجعه ويگله
صــيهد:: صوجك من الاول اطيته عين
نتر طــروادة بوجهه
-ليييمت اطيته عين ما مطيح حظة؟ ما يوميه طاكه وهوه زلمه بطولي استحي امد ايدي عليه وهوه مثل الحيوان انهيه من السالفة ويردها، انعل ابوه لا أبو جده.
صــيهد:: شو تصيح عليَّ يشهد الحسين انزلك هنااا ادوس ببطنك.
طــروادة:: انززززل انززل حالك حالهم شني انتَ شريف.
تعاركوا بيناتهم طــروادة حيل محترك گلبه وهذا ما يسكت لمن وصلنه للمستشفى اول ما نزلنا ورانه نزلوا وهـــب وميثم، اجانه يتعذر وطرواده ما يرد عليه همه اخذوا حسين وطرواده اخذني يقيسون السكر وانه كوه فاتحه عيني كلساع أريد اطيح، عفت كلشي وحتى السكر نسيته واحلف بيني وبين نفسي بريا ما اتزوجه لو يموت الخايس انه يكضني ويصيح عليَّ عمت عينه.
اسمع طــروادة وميثم يحجون گدامي بيني وبينهم برده مــيثم يتعذر وطرواده يگله
-انتهت يلوح نجوم السما ومايلوح رنـــه
مــيثم :: بروح ابوك لا تحجي هيج والله انا اطيحلك حظة وفنه لو وصل بيتكم بعد بس لا تحجي خلنه على اتفاقنا طــروادة لا تكسر گلبه.
وطرواده يحجي بحرگه
-اسكت مــيثم مو وكتها اسكت والله لو ترد ابوي من گبره يا بريا ما اطيك رنـــه
ثواني وسمعت صوت بريا يگلهم
بريا:: شبيها رنـــه .
وعله صوتهم والوادم الواكفين وخروا البردات يعاينولهم كمت على حيلي خايفه اريدن اشوفن طــروادة وبريا يصيح
بريا:: بس اشوفنها شبيها بس اشوفنهاا.
وميثم يجر بيه بغضب اخذه طلعه من المستشفى هوه ووهب ، طرواده يروح ويرد بيني وبين حسين خابر عبود رزله يمي يحجي من بين اسنانه
-اربعة وعشرين ساعة دايح خرب روح سجاد امشي رد للبيت
قصص وروايات عراقية كرار صلاح وعبود مدري شحاجاه نتر
طــروادة:: تدري بأخو تدري بأخت طاير گلبك على سجاد امشي للبيت عبود امشي لا توصل للمستشفى أكسر رجلك
سد التلفون بعصبية، سكتت ماحجيت حرف راح اشتره جهاز سكر جديد وعلاجات لحسين صبوا اصبعه وردينه للبيت عيونه من البچي مورمه وهذا كله يكض ايدي يبوسها حسين حييل حييل يخاف من اتخربط ودوم يلوم روحه لان صار بيه السكر بسبب الهبطة والخوف من شال سلاح على زهره، شال عينه يسألني
حسين:: انتِ زينه؟
جريته الصدري اوخر شعره من كصته وابوسنه
-زينه مابيه شي.
سكت لمن وصلنه للقرية سجاد وعبود واكفين بره يم باب الحوش شهگت بصدمة من شفت فوگ حاجب عبود دم وسجاد قميصة مملخ صاح عليهم صــيهد
-متعاركين؟
وطرواده مشه السجاد يريد يرزله گاله
سجاد::لا والله لا ما متعاركين بيناتنا بس لگيت عبود يتعارك وي بريا مدري عليمن وهديت وياه وهذول ســليم ووهب الخياس طردونه.
اجه عبود يمنه ومشينا نريد نطب للبيت صاح عليه سجاد
-تعال عبود!
طــروادة:: وووين ما مليتوا؟
سجاد:: اللعبة راح تبدي
طــروادة:: يا لعبة راح تصير بالوحدة امشيي انخمد.
وسجاد يضحك ويتوسل بطرواده وعبود كاض حسين يم باب الحوش واكفين من طــروادة ضل ساكت سجاد جر عبود اخذه وراح البيتهم طبينه للهول كعدت على المخده وطرواده فتح جهاز السكر يقيسه الي من جديد وحسين تمدد بصفي وجهه اصفر وروحه رايحه من الوجع.
طــروادة::گوموا ناموا.
-خل أسوي سحور.
جرني من ايدي يمشيني للغرفة يحجي
-هسه عوفي السحور جبن وچاي ناكل بس امشي تمددي بفراشج، تعال حسين.
وكف حسين ودنك طــروادة باسه براسه نمشّي للغرفة وهوه يحجي ويانه طبينه للغرفة زهره نايمه الظاهر ريـــمه منومتها وراده لبيتهم، كعدت بفراشي اعاين لطرواده يغطي بزهره عدل دار علي حجيت بهدوء
-انه ما اتزوج بريا ترى لو تگطعوني ما اخذنه هذا أبن الروسيه
حط ايده على حلكه
-اشش سدي حلكج مالج غرض بهالسالفه انتِ أطلعي منها لا تحجين بيها ولا تفكرين حتى شيليها من بالج.
هزيت راسي خوش طفه الضوه وطلع، حسين عاف فراشه واجه تمدد بحضني شابگني مختنك
-شبيك؟
-انا اموتن عليج بالعباس لا تشوفيني اتعارك وياج ونوبات اغلط بس انتِ عزيزه عدي .
شبگته حيل ابوسن براسه وادري هاي صحبته ما تدوم الحد الصبح ونتعارك، غفيت ومافزيت الا على صوت دكة التلفون تلفتت طــروادة نايم يمنه بالغرفة وصوت المنبهه يدك كمت شغلت الضوه وهوه كعد سند روحه على ايده وجر التلفون ك كوه فاتح عينه طفه المنبهه
وانه مستغربه واعاينله ليش نايم يمنه وعايف غرفته رد شمر روحه بالفراش وحسين وزهره فزوا گوه فاتحين عيونهم، زهره ردت لفراشها وجرت الغطا عليها
-طــروادة اكعد يله.
استغفر وكعد كوه على روحه عاينلي عيونه حمر گتله
-ليش نايم يمنه
مسح وجهه يتحمحم.
- احم مو لگيت ريـــمه نايمه غاد واجيت هنا.
فتحت عيني بصدمة وهوه وكف على حيله حاجه حسين وراح الزهره جر الغطا منها دغدغها يريدها تكعد وهيه تتغنج حط وجهه برگبتها يضوجها بشاربه ولحيته حتى تگعد وانه اعاينله مضيگه عيني گالها
-گومي خل نتسحر.
زهره:: تسحريت انه وريمه.
-هاا جا شربي ماي ونامي.
جرت الغطا فوك راسها وهي تگله
-شربت.
وكف وطلع من الغرفة راح للحمام وانه مشيت الغرفته فتحت الباب على كيف ومديت راسي اعاين ريـــمه بفراشة نايمه لامه رجليها الصدرها الشال على راسها بس مفتوح وشعرها مبين، جاره الغطا لوجها وصاير على طرّف خشمها غرگانه بالنوم التفت على صوته يسويلي
طــروادة:: بششت
درت عليه أشرلي بأيده تعاي مشيت يمه دنك يمسح برگبته
-عوفيها خل تضل نايمه دام متسحره لا تكعدينها.
-اكعدها تنام يمنه؟ حتى انت تروح الغرفتك.
دار وجهه مشه للمطبخ وهو يگلي
-لا لا عليمن انا بس اتسحر اروحن للگيعان.
هزيت راسي خوش بس كلساع اخزره وهوه يغلس، سويت چاي وهوه طكالنه بيض وحط الجبن بالصينية تسحرنه بس انه وياه وحسين، كاعدين على الصينية ودك تلفونه، عاينت وياه كاتب سليم فتح التلفون حطه على رجله فاتح السماعة وياكل
-الو.
ســليم:: الو ها اكلك انتَ بالبيت؟
-اي كاعد اتسحر.
-هاا، خل اختي تجي أنا بالباب.
سكت شويه يعاينلي وگاله
-رنـــه تگول نايمه يم زهره خلها يم البنات انا راح اروحن للگيعان هسه.
ســليم :: لا خويه صيحلها.
-ســليم والله العظيم انا رايح للگيعان والبنيه نايمه عوفها.
-تنام ببيتنا رحمه الاهلك صيحلها.
وكف طــروادة كلاص الچاي بأيد وشال التلفون بأيد
-خلها يم رنـــه خاف ترد تتخربط وانتَ تانيني خل نروح للگيعان سوه.
ماسمعت سليم شني حاجاه، وهوه بساع شرب چاي وماي غسل راد يطلع
-جا ماصليت؟
-اصلي بالگيعان.
هزيت راسي خوش، وكمت شلت الصينية اعاينله واكف هوه وسليم بباب الحوش حجوا شويه ومشوا سوه للگيعان.
غسلت المواعين واعاين لحسين غسل وتوضى مثل ما علمه طــروادة بدون ما يبلل اصبعه وكعد متاني الصلاة غسلت ايدي ومشيت الغرفة طــروادة ردت اكعد ريـــمه تجي يمي بالغرفة، عاينتلها شلون نايمه صوت نفسها ثگيل وغاطه بالنوم، المكيف بارد ردت اقلله عليها ومن شفتها هيه هيج مرتاحه عفته ببرودته عدلت الغطا على رجليها وطلعت سديت الباب وراي على كيف.
مشيت اريدن اصلي انه وحسين كضينه نفس السجادة
هوه يجر وانه اجر تعاركنه ضل واحد يصيح على الثاني انه اكرهك غماني وهو يصيح
-كون واحد اجلح املح وسنونه مكسره ربع دينار ماعده ياخذج ويفكنه منج.
جريت دشداشتي انه هم ادعيله
-روح يا حسين كون من تكبر تاخذلك وحده متروس راسها گمل ومن راسها يحول لراسك يخليك تمشي وتحك بشعرك وتنفض گمل.
غماني وطب للغرفة صلّيت بالهول وكلساع افتر على ريـــمه كل ما اريدن اكعدها تصلي ما اگدر تكسر خاطري نايمه شلون اليتيمه.
عفتها وطبيت للغرفة نمت
""""
ريـــمه:: تمددت بفراشة بس حتى اتذكر شكد جنت مرتاحة من نمت هنا ذيج المره حطيت راسي على المخده وغمضت عيني احس انفض كل تعب بيه وكل وجع داك بگلبي يعوفني من انامن هنا،
كلشي دافي ويسكن خوفي وقلقي بطريقة غريبة بمجرد سحبت الغطا على جسمي غمضت عيني وجريت نفس غميج منه ضميت روحي بوسطه احسه يلملمني بحنيه ، غمضت عيوني اجر نفس وبعدها ما فتحت عيني غفيت براحة واطمئنان غفيت بلا خوف وقلق، غاطة بنومي وهاي للمره الثانية انام بهيج راحه بدون احلام وخوف بروده تدك بالعظم والغطا عليَّ دافي
من احرك رجليَّ ينسحب ويرجع وياي ناسيه وجودي والمچان الاني بيه كل اللي بفكري شعور الراحة التارس گـــلبي.
حركت ايديي لوره راسي وفتحت عيني رديت غمضت وفتحت من جديد كعدت على حيلي فازه جريت الحجاب البسه بساع واتلفت بالغرفة محد بيها غيري گمت على السريع طلعت منها الاضويه طافيه فتحت غرفة رنـــه شغلت الضوه اعاينلهم نايمين هيه وحسين وزهره اخذت عبايتي منها وطلعت بساع مرتبكه، فتحت باب الهول ومديت بس رأسي اتأكد من هاسكي طلعت شويه شويه للحوش واتلفتت لمچان هاسكي شفت بس سلسلته وهوه ماكو مشيت بساع لباب الحوش شارده
اول ما فتحته صار بوجهي طــروادة ووراه هاسكي فتحت عيني على وسعها ورديت ليوره خايفه من هاسكي وهوه بساع نبح علي كضه طــروادة
-اششش.
-كضه والله اكعد القرية كلها بصريخي بس يجي صووبي.
رديت ليوره كلش وكاضه عبايتي يأثنين ايديي وهو طب للحوش كاض هاسكي سد باب الحوش مشه يريد يربط هاسكي وانه بساع مشيت للباب گال
-اوكفي لا ترحين عدي حچي وياج.
حجاها مايعاينلي كاعد عل حيله يم هاسكي ربطه ويمسح على ظهره تمدد هاسكي بالگاع وگام طــروادة اجه يمي للحوض يريد يغسل أشرلي على صفحة الحديقة يم الشجر
-روحـــي غاد هسه اجيج بس اذبن تلفوني على الشحن.
-اريد اروحن للبيت ســليم گال لا تبطين.
مدنك يغسل وهز راسه اي
طــروادة:: ســليم راح للمرعى حچايتين وترحين لبيتكم.
هزيت راسي خوش ومشيت عبرت من يم هاسكي يعاينلي بحقد ويزير مشيت للحديقة كعدت على بلوكات جوه الشجر، زفرت نفس بحسره كلت اول ما يجي ابررله اكله جنت نايمه يم زهره وغميت كصتي من تذكرت راح يطب الغرفته وانه ما معدّله فراشة.
شلت راسي اعاينله من اجه يتمشى بأتجاهي طابك ردان القميص لنص أيده يمشي مدنك ويحرك شعره بين اصأبعه وگبل لا يوصل يمي رفع الشعر النازل على كصته ليفوك وبرجله حرك بلوكه خلاها گبالي وكعد عليها عاين لعيوني مضيك عينه وانه اعاينله ساكته تحمحمت وحجيت بساع
-انه چنت نايمه يم زهره.
ضل يعاينلي ساكت وعله شاربه من ابتسم هز راسه اي نزلت عيني منحرجة وهو گال بجدية
-ليش حرگتي گاعي؟
بلعت ريكي وشلت راسي اعاينله عيونه كلهن غضب، مسحت وجهي
-عاين وعلي لو انه الحاركته چا كتلك ترى انه حركتها وما اخافن منك بس والعباس وداعة عزيز گـــلبي سلطان والشده اليمر بيها انه ما وأصله گاعك.
هز راسه خوش خوش، دنك بحيره يمسح أيد بأيد اراقب حركاته بتركيز، فجر ولون السما رمادي كل ما تمر ثانية يخف وتتخلل خيوط ضوه الشمس، نسمات هوه يهبن يحركن شعره النازل على كصته وياخة قميصة اللي محاوطة رگبته وفاتح منها اول دگمه.
شال راسه عاينلي ودار عيونه لقفص طيور رنـــه وبدون ما يعاينلي حجه بتردد
-راضيه؟
نطقها وكأن الكلمة مو الي نطقها للصبح للهوه الكلشي نظراته اله
سكت بعدها وانه ساكته اعصر ايد بأيد هدوء يتخلله صوت اغصان الشجر اللي تتحرك بثكل كأنما هسه بدت تصحى من نومها، صوت الطيور بدأ بزقزقة وحده وشوي شوي يزيد، ارتفع صدره من جر نفس بغمج وبينت حفره وسط رگبته وي جرت نفسه الطويله وتفاحة أدم صعدت ونزلت حرك راسه يلتفتلي مال على صفحة يعاينلي وعيونه گوه فاتحهن رموش جفنه الفوگ شوي بعد ويتشابكن وي رمشه الجوه يرمش بثگل دنگت اعصر بأيدي گال
-خطبتج من اهلج انتِ راضيه؟
بساع هزيت راسي لاااا ورفعت عيني اله مسح وجهه وزفر نفس بحسره
- انه مالي غرض بالعركة البينك وبين ابوي روح اخذ بت سيد عباس مدري بت شيخ حيدر بس لا تحطوني بنصكم مالي غرض بيكم انتَ ترضاها اخواني يسوون برنه هيج ويحرجونك بديوان؟
دنك حاط ايده على كصته ويحجي بصوت هادئ
-انا ماجايب طاريج ابوج الباعج وبنص الديوان گالهم بتي اله خل يتعلم من يحجي حچاية يصير گدها.
شال راسه يعاينلي خزرته رفع شعره بأيده وعينه بعيني
-وانه شني ذنبي اطيحن بيها؟
-وين تطيحين شني موديج للمكصب؟ غير يمي.
دنكت بساع لميت العبايه علي بأثنين ايديي احس جسمي يرجف تحسر بحيره وحجه بهدوء رفعت عيني اله شابك ايديه ببعضهن حاطهن على ركب رجليَّه ويحجي عينه بالگاع
-انتِ ليش ما راضيه ببالج احد؟
-لاا بس ما ارضى بيك تريد تنتقم من ابوي بيه اعرفنك وتريد تعذبني على حرگة گاعك
عله شاربه شويه شويه ابتسم وبينن سنونه عاين لوجهي يضحك
-هاي شلون عرفتي
-چا ما اعارفنك انه؟
-محضر صوندات اكتلنج بيهن وناوي گبل العرس انصبلج مشنقة بالغرفة كل يوم اعلگج بيها شويه.
كش جسمي يحجي بضحك وانه اعاينله بخوف ولميت العبايه عليَّ زين دنك هز راسه لا وراحت ضحكته حجّه بجدية
- اسمعيني ريـــمه انا لا اللي بدروب اللعب ولا ثوبي اكسر رگبة بت حتى لو چنتِ انتِ! حرجت ابوج وحددت موعد العقد والعرس لان جذبني گدام الوادم وطلعني يمهم جذاب ومستغلهم وانتِ تعارفين انا زلمه ما اسكت عن حگي.
عاينــي انا لا رايد اعذبنج ولا انتقم منج ومن أبوج بزواجنا نحطيت بالسالفة ونجبرت احجي هيج وما اشوفن الشغلة تضرج انتِ مو ردتي تجين تعيشين يمنه؟ هذا حلها عليمن ما راضيه بعد؟
-ما اريدن اتزوج.
دار وجهه مني عاين لهاسكي محتار وانه احجي بقهر
-كل سالفة وكل عركه تطيح براسي حايط نصيص انه ياهو الاجه وذب حمله عليَّ انتَ واهلييي.
ارجف واحجي بحرگه رجفن شفايفي ودموعي جرن درت وجهي مسحت عيوني گـــلبي من القهر يوجعني تحسر يحجي
-لا تبچين والله انه مارايد انتقم منج، شو عاينيلي هسه عليمن تبچين ريـــمه مو احاجيج.
مسحت عيوني بردن عبايتي ودرت وجهي اله يعاينلي تحسر لام شفته الداخل حلكه گال
-عدي حل.
هزيت راسي شنو وامسح جوه عيوني حييل شال ايده مشه اصابعه بين خصل شعره وانه عيني وي أيده تتنقل من مشط شعره المتجعد الاسود بأصابعه ونزلها لرگبته مسحها بحيره وشال عينه الي ركز بعيوني.
طــروادة:: ما اجبرج، بس بالوكت نفسه ما اگدر احجي انا لازم ابوج اللي يخابرهم ويلغي السالفة كلها واذا ما رضى يلغيها اسكتي لوره العقد انا اعوفنج واعارف شلون آسد السالفة.
هزيت راسي لا ودنكت دموعي تجري وشفايفي ترجف
-وروح امي ما اجذب عليج اذا ابوج ما تنازل وخابر شيخ حيدر لوره العقد انا اتنازل واخابره اكله ما تراهمنه البنيه ما توالمني واطلگج.
وخل يگولون ما نفذ وصية أبوه ميخالف.
-ليش ما تخابره هسسسه؟
غمض عينه وشال راسه للسمه بينت رگبته گدام عيني بوضوح ياخة القميص تتمايل وي نسمات الهوه تروح وتجي عليها رد عاينلي بحيره عينه بعيني هز راسه بأسف ودنك
-ما اگدر اتنازل
-تتنازل حتى ما تظلمني انه مالي ذنب.
وگف بعصبية يحجي ويأشر بأديه
طــروادة:: ليش اظلمج ليششش؟ وين موديج واظلمج انا رايدج شلون اظلمج مو تردين ترتاحييين مو تردين تخلصين من اهلج وسوالفهم تعاااي يمي تعاي انا ما اظلمج، لا علمود ابوووج ولا معترف بحچايته بس اناااا رايدج.
فاتحه عيني على وسعها وهو سكت يعاينلي بعصبية ويتنفس بقوة وگفت بساع ومشيت اركض وعبايتي طايره وراي صاح
-روحـــي روحـــي دواج ميلاد انتِ هسه تزوجج لأبن صاحبتها السحاره.
فتحت باب الحوش ودرت عليه اجاني يمشي بغضب حجيت بلا ما افكر بحچايتي حچيت الاسمعه من ابوي وامي
-وانتَ روح لبت شيخ حيدر تزوجها حتى تحتمي بيهم، وتاخذ منهم فلوس.
فتح عينه على وسعها واجه يمشي سريع طلعت بساع اركض وركض وراي واسمعه صاح اااخ درت عليه وانه اركض واشوفنه كاض رجله طكت ببلوكه يم الباب ساند ايده على بنيد السيارة وحاني ظهره بوجع نازع الشحاطة ورافع تك رجل شال راسه عاينلي بغضب ونتر يهدد
-سهله ريـــمه بعيني اذا ما چويت گلبج على هاي حچايتج ولو تموتين ما اطلگج.
-تعورت؟
-مالج غرض امشيي وولي
حجاها بغضب يطردني ووكف عدل لبس الشحاطة اعاين اصبع رجله بيه دم دار وجهه يريد يطب لبيتهم صحت عليه
-هسه انه اخابر شيخ حيدر واكله ما اريدن طــروادة زوجه بتك هوه مصاحبها من مده.
دار وجهه علي وهز راسه خوش
-خابري والله خل يعارف تربية شاكر شلون خايسه.
خزرته وهوه ما مهتم طب لبيتهم وركع الباب حيل مشيت بساع اهلي نايمين طبيت للغرفة أعاين لسلطان نايم لام رجليَّه الصدره غطيته وطلعت صعدت فوك الغرفتنا نصدمت بهاجر كاعده دفتر الرسمم بحضنها والقلم بأيدها تبجي ومسحت دموعها من شافتني، ذبيت العبايه ومشيت يمها اعاين لوجها
-ليش ما نايمه هجوره؟
لمت شفايفها تبجي ومدت ايدها على گلبي بأصابعها تكتب غيث، سكتت بحيره وأشرتلها على دفتر الرسم عادي اشوفنه هزت راسها اي وفتحته تراوويني ركزت بالرسمه
شكل مره كاعده وعباره عن سواد مابيها ملامح وراسمه المچان الهيه بيه بتفاصيل گدام المره دائرة وشموع و طفل ممدد بلعت ريگ بخوف اركز بالرسمة ورفعت راسيّ اسألها
-هذا المخزن مالتنا؟
هزت راسها اي
-شفتيها وهيه تذبحه؟
رفعت أيدها تأشرلي لا
-هاجر اكتبيلي كلشي كلشي شفتيه بذاك اليوم هزت راسها خوش ودارت الورقة تكتبلي ودموعها تجري ولان مو قوية بالكتابة تطول شالتلي الدفتر تراويني كاتبة
"من رجعت للبيت بيوم العرس دورت على الاء وغيوثي مالكيتهم ، طلعت ادور وسمعت حركةً بالمخزن خفت وعاينت من فتحات الباب شفت الاء شاعله شموع وغيوثي نايم يمها مغطيته بس وجهه مبين، وبنص الشموع رسم وهيه تسوي حركات تخوف وما ادري شتقرأ، وراها سمعت صوت امي بره الحوش والاء هم سمعته مشيت بساع طبيت للمطبخ الاء طلعت من المخزن بساع تلاكت وي امي امي ذبت عبايتها من راسها ولفت بيها علاكه كالت اللاء شعدج هناه الاء كالتلها جنت انظف لمخزن وتعاركن امي تعايرها لان وصخة وخلت سلطان يتزوج عليها والاء تدعي على سلطان طبن للمطبخ ولگني أشرت الامي توني اجيت الاء تخزر بيه اشرتلها بأيدي وين غيوثي ما فهمتني امي كالتلها تنشدج على غيث وينه گالت الاء نايم فوگ بغرفتنا بس يكعد اجيبه يمج،امي راحت الغرفتها وصاحت علي اصعدي الغرفتج لو نزلتي اكسر رجلج، صعدت وشفت امي طبت الغرفتها بس الاء ما اجت ولا صعدت ضليت خايفه لان عرفتها تسوي سحر وخفت انزل، نص ساعة ونزلت مالكيتها بالمخزن افتريت ادور عليها شفتها وره الدوانية ضوه البلوجكتر عليها غيوثي مذبوح بأيدها حاطته بحضنها تبجي عليه والخنجر بأيدها الثانية طحت ريـــمه طحت ما گدرت اسوي شي وين يله فزيت على صوتها شلت راسي اشوفنها وما تشوفني واكفه يم الحوض تغسل اديها تبجي وتردد شمرته بالشط شمرت ابني. وبعد ما ادري شصار بيه لمن انتِ اجيتي
شهكت وي اخر كلمه كاتبته گوه اتنفس وهيه تعاينلي ودموعها تجري جرت الورقة من ايدي وكتبت
"لو انه ما صاعده فوك لو طابه للمخزن وماخذه غيث منها جا ما مات بس انه دوم اخاف اخاف
اقرأ المكتوب واشهك النفس بس اريده يوصل الريتي احس عيوني نار تطلع منهن طبكت الدفتر عافته على صفحة وكضتني من وجهي خايفه وفاتحه عيونها بصدمة وانه روحـــي رجفت ملخت رگبتي بس اريدن اتنفس طحت بالفراش متمدده فاتحه عيني حيل واجر نفس بقوووة وهاجر نزلت تركض، عيوني مفتوحه للسگف اشهك واحس شلون الجمر ينزل من عيوني جابت سجاد واجتني تركض كعدني متسودن يغسلون وجهي ويحاجوني وانه بس اريدن نفسي يستقرّ
سجاد:: اخذج للمستشفى؟
هزيت راسي لا تمددت بفراشي وهوه ضل مكابلني خايف عليَّ لمن شافني ارتاحيت عاين لهاجر باسها بخدها گالها
-راح اروحن انام ديربالج عليها.
هزت راسها اي طلع سجاد وهيه ضلت كاعده يمي تمسح على راسي وخرت الغطا من عدي وفتحتلها ايدي
-تعاي هاجر.
تمددت بحضني ضمت وجها بصدري واحس بدموعها تجري سكته . غمضت عيني وغفيت بين هوسة التفكير
شوية وفزيت بخرعة على صوت سلطان ومثل كل مره يطيح بين إديهم جنازه يشيلونه سجاد وسليم ويركضون بيه للمستشفى يغدي گـــلبي نار من القهر عليه.
جابوه الظهر بس كضيت الصلاة رحت اركض الغرفته ممدد على چرباية سليم وجهه اصفر وشفايفه بيض لام رجليَّه الصدره وامي وابوي يعاينوله غطاه ســليم واشرلهم اطلعوا خلوه نايم، طلعنه من الغرفة وانه روحـــي وگلبي يمه كلساع امشي افتح الباب اعاينله واطلع
""""
رنـــه :: نسيت العركه ونسيت بريا كل همّي النتيجة وكاعده على نار وطرواده يلف بالچفيه على وجهه يريد يروح للگيعان من شافني خايفة بطل وضلّ مكابلني كل شوي وگالي
-لا تخافين انا اكولن ناجحه.
وانه افتر يمه آكل بأظافري وفزيت على صوت عبود طب يركض ويصيح
-ناااجحه ناجحه.
ووگف بباب الهول يعاين بتلفونه ويعدلي بدرجاتي طــروادة وزهره يصفگولي وانه صعدت عدي الخنگه ابجي واضحك رغم ماچانن درجاتي مثل ما طــروادة يريد ضاج من شاف عدي بالستين درجتين بس مابينها باسني براسي وهوه يشجع
-عفييه عفيه بعزيزة ابوي.
بست ايده اضــحك ودموعي تجري وحسين يقلد عليَّ، وعبود واكف بباب الهول گال
-بهالمناسبه نريد فطور زين.
-الا اشويلكم دجاجة على التنور
وكلهم فد صوت صاحوا
-لاااا
طــروادة:: ما نريدها تضل للتسعه الوادم تتسحر واحنا بعدنا ما فاطرين
ضحكت ورحت للمطبخ وهمه يعاينولي بخوف شلون الأيتام
عبود:: بداعتنا عوفيها، سويها مرگه إحنا راضين
زهره:: سويها گلي على التمن.
حسين:: رنـــه رمضان حرام عليج تعذبينه.
-لا مالكم غرض هسه اشويها عــفراء علمتني.
طــروادة هز أيده يگلهم
-مابيها مجال الليله تموتنه من الجوع وتصلبنه للتسعه.
توه يريد يطلع ودك عليه منذر بس جاوبه وطلع يركض راح گـــلبي عبالي عفراء بيها شي ركضت للتلفون اخابر عليها وما ترد روحـــي راحت وولدنا كلهم راحوا وره طــروادة
انتهيت من الخوف عليها وهيه ما ترد نص ساعة وطلعت اركض على الهوسه والصياح اعاينلهم من فتحات الباب واشوفنهم ملتيمن وصايره مكاتل، بريا طاك مازن وصيهد وطرواده متسودنين طكوه حيل وهوه ولا مهتم من بين سليم وميثم يصيح
بريا:: يابه والله اكتله.
وميثم يدفعه بس يريده يروح للبيت والولد كاضين صــيهد وطرواده النوب صــيهد من شاف طــروادة محد گدرله ومحترك گلبه حييل كضاه وهو من نصهم يصيح بحرگة گلب
طــروادة:: ووخررر ووولك خايس زعطوووط تعااااندني.
وصيهد كاضه والولد كاضين بريا وميثم مشلوع گلبه يتعذر من طــروادة ويسكت ببريا يروح مناه ويجي مناه رادوا بس يسدون السالفة گبل لا جدي يجي بس ما رهمت اجه جدي وعمامي أثنينهم فرفرحوا طــروادة من القهر وهو يحلف كل يمين على بريا ما يلوح طرف ثوبي و جدي يغلط ويكله
شعلان:: ينهي عليهاا غصباً عليك يآخذهآ
طــروادة:: خل ينهيييي خل ينهي عليها كونه زلمه واذا ما حطيت صوواب بگلبه انا مو أبنّ شامل.
وبريا من وره وهـــب وسليم يصيح على جدي
بريا:: ماالك غرض انتَ ما انهي عليها.
وجدي تسودن هوّه وعمامي يردون يطكونه والطايح بيها مــيثم تلوع يدافع الاخوه من طــروادة ومن جدي وعمامي ومن رد بريا يصيح اخذها وما تاخذ غيري جره طــروادة بغضب طكه بوكسي على وجهه والولد جروه مچلبين بيه كلهم يدفعونه من مدافعهم طاح باب الحوش وضل گوه مچلب وهوه يصيح
طــروادة:: اذا ما زفيتهااا گدام عينك اذا ما زوجتها گدااااامك وانعل ابوك لا ابو امك يا چلب يا ابن الجلب.
مشيت للهول والولد طببوا طــروادة للحوش وهو يغلط على بريا
صــيهد:: خيولي كااافي.
-انعل والديه وهذا شعلان اشعل اهله واحد واحد خل ينهي عليها اذا ما وكلته تببين.
يحجي بحرگه يفور ويتراجف وسمع صوت بريا بره بعده يحجي ركض عليه متسودن وچلب بيه صــيهد دفعه للبيت يغلط
صــيهد:: كااافي شني تسودنت؟
وطرواده يفتر يريد بس يكض بريا
طــروادة:: بعده يحجي ووولك بعده يحجييي.
واعاين لبريا فلت من بين ادين مــيثم وسليم واجه لطرواده كضوه يم باب الحوش وهوه يصيح
بريا:: گلي ما اطيها الغيرك وانااا اسكت، ما تطيها المازن
وكف طــروادة وصيهد كاضه صاح عليه وشايل أيده
طــروادة:: أطيها وازفها اله بأيدي وگدام عينك وفنك لفكيت حلگك.
مــيثم :: كهلان كهلان كافي بروح ابوك كافي
طــروادة:: اخذه من عدي اخذه وانا وياك يا بريا والزمن طويل اختي لو ازوجها السگط من الشارع ما اطيكياها .
وبريا متسودن صيح وغلط على طــروادة طكاه مــيثم وجره يرحون لبيتهم والولد يحجون وي طــروادة ما اهتملهم أخذ هاسكي وطلع للگيعان عبود وسجاد سووا باب الحوش وراحوا.
ومن هالهوسه كلها ما هامني احد غير انُ طــروادة وكف وياي ما حاسبني ولا طلع الغلط بيه وبديت افهم مرات من اسكت واخليه هو ياخذ حقي هذا افضل واحسن من طولت لساني والغلط، سوّيت آلفطور وكلساع افكر ببريا وشلون يعارك علمودي واغلط عليه بگلبي. شويه وخابرتني مــاسه اسمع صوتها تبجي طار گـــلبي .
-يمه شكو مــاسه شبيج.
-رنـــه شبيج.
-شكوو؟
-والله بريا يحبج رنـــه والقران يموت عليج .
دك گـــلبي حيل ودرت وجهي اتلفت وهي تحجي وتبجي كوه افهم حجيها
-رنـــه يعشگج لا تهدينه لا تلوعين بريا فـــدوه اروحنلج.
-مــاسه شبيج لا تحاجيني هيج ويني انه وين الحب ترا بعدني جاهل.
-لا جبيرة مو تردين تتزوجين مازن.
-اي بس علمود اروحن وي عفراء.
-حبابه رنـــه بريا راح يموت من وراج هسه ينجلط وكلساع واحد طاكه علمودج طــروادة وصيهد وهسه مــيثم طكه حيل.
مــاسه :: احجي وامسح بدموعي وهيه ساكته سدّته بوجهي وانه اكل بأصابعي من الندم لو ما سامعني چا كل هذا ما صار، مسحت وجهي ورحت للغرفة اعاينله ساند ظهره على الچرباية گاعد بالگاع ويعاين من الشباچ .
عفته ومشيت للحوش ميثم حاط اديه فوك رآسه كعدت يمه شال عيونه يعاينلي بحيره
-ليش طكيته؟
دار وجهه مختنك وگوه يحجي
مــيثم:: موتني الف مره گتله بس اسكت ما تصير الغيرك بس اسكت لا تتسرع، عاينــي شسوه بتصرفاته بتسرعه الخايس.
-كلكم تطكونه وتغلطون عليه وهوه محترك گلبه لان رنـــه ما تريده لا تزيدها عليه تنتَ هم.
مسح وجهه ودار يحاجيني يحاول يفهمني
مــيثم:: جنت متفق وي طــروادة رنـــه من تكضي سادس نخطبها منه لبريا، والولد رضى وگال هاي هيه بشرط ما تحجي البريا مناه لوكتها واذا رنـــه رضت هاي هيه انا ارضى، وهسه بعد السواه بريا من عين باجر طــروادة يزوجها لمازن ويحلف كل يمين بعد ما يطيها البريا لو يموت.
من ايده من ايده الف مره گتله بريا خويه لا تتسرع تعال احجيلي سولفلي انا اتصرف ولك مرمرتني يوميه مبهذلني يوميه شال حالي ومفشلني بينهم، ولج منذر يخابرني يگلي لجل عينك أنا سكتت وحسبت بريا اخوي الصغير وغلط هاد على الولد وطاكه على يا اساس تروح السلفهم شلووون؟ هيه صايره مطاحن وناس تهد على ناس شلون تروحلهم.
يحجي بحرگه گلب وكف غسل و وجهه يفور من آلقهر طبيت للمطبخ صبيت الفطور وهوه راح لغرفة بريا صاح عليه بنتر گام غسل تفطروا ومشوا يصلون كعدنا على الفطور ساكتين بريا بس يگلب بالاكل ولا خله لگمه بحلكه اكل بس تمر ولبن شلت الصينية أنظف المطبخ وميثم خابره جدي يصيح ويغلط عليه علمود بريا ويهدد الا يوديه للمعامل الخارج المحافظة وميثم طايح بيها يتعذر ويگله عوفنه وانا اروحن بمچانه بس جدي مايرضى الا بريا يروح، سد التلفون وكعد محتار شرب چاي وطلع وبريا ضل بغرفته ساعة مرت جاي الملم بالبيت ولعبانه روحـــي مسطورة وكفت يم باب غرفته من سمعته يحجي على التلفون ويگول
-عودك من اروحن خل أهلي يدرون ما اريدن هسه يوكفون بوجهي
ضليت ساكته اسمعله وفز گلبي من گال
بريا:: خل استشهد يا ريت.
فتحت الباب بساع ايدي ترجف فز سد التلفون يعاينلي
-وين رايح؟
وكف وجهه احمر وفوك حاجبه ازرك ورگبته مزلغه من الممالخ، اعاينله و دموعي جرن
-وين رايح بريا؟
-مــاسه بروح الحسين اسكتي.
لطمت على رجليَّ ابجي واصيح
-تريد تروح للجيش؟ تريد ترووح للجيش؟
حط ايده على حلگه خازرني
-اششش صوتج لا يسمع مــيثم صوتج.
يريدني بس اسكت وانه متسودنه بريا من عشت وياهم گمت اشوفن بيه وهـــب ثنينهم نفس الحنيه صيحت بوجهه
-ما تروح والله ما تروح تستشهد ياهو الراح ورد الاهله سالم؟ مو امس جابوا ابن بيت ام علي شهيدد؟ تريد تروح للموت؟
مــيثم :: خير؟
درت على صوت مــيثم امسح بعيوني ارجف وبريا وراي يحجي همس
-مــاسه اسكتي.
-مــيثم بريا يريد يروح للچيش.
احجي ودموعي تجري حيل خايفه جراني مــيثم من ايدي يمسح دموعي
مــيثم:: ما يروح يحجي بوحده هذا عوفيه
وبريا هز راسه اي ساكت مشيت وي مــيثم الغرفتنه مسح دموعي
-ضلي هناه خل احاجي بريا واجي
هزيت راسي اي هوه طلع يحجي وي بريا واسمع صوتهم عالي وانه معدتي تگلب ركضت للحمام واجه وراي مــيثم بساع أشرتله بأيدي ضل بره وهوه ما اهتم طب للحمام خايف فتح الماي يغسل وجهي وبريا من بره
يحجي مرتبك
-شبيهاا؟ اشغل السيارة نأخذها للمستشفى؟
گمت وي مــيثم روحـــي رايحه بعدنه ما واصلين للغرفة ورديت للحمام اركض واثنينهم تسودنوا بريا ركض شغل السيارة وميثم خابر صــيهد گاله اريدن رغد تروح ويانه بين ما لبست طبوا رغد وصيهد واسمعه يصيح على مــيثم بخوف
-شبيهاا شمسويلها؟
مــيثم:: والله ما مسوي شي اظن صار عدها تسمم.
لبست عبايتي وطلعت بأيد رغد وهوه اجه اخذني من ايد رغد ويخزر بميثم، وانه كضيت الدرب اتقيئ لمن وصلنه للطوارئ همه يسألون ورغد ترد عليهم انه مابيه احجي مخلوبه روحـــي ودايخة مسطوره سويت تحليل حمل وتحليل فقر دم، ورغد تروح وتجي يمي گالت
-صــيهد كاض مــيثم تهديدات يگله لو طلع عدها فقر دم اخذها اموتينها من الجوع، وميثم ساكت خطيه.
سندات راسي على جتفها ساكته ايدي على بنطي وهيه حسره تاخذها وحسره تجيبها متغيره حيل مكسوره على سلطان وحالها حال، شويه وطلعن التحاليل الضحكة شكت حلكي من گالوا حامل.
ضلينه متانين المغذي يكضي وطلعنه، مــيثم وجهه يضحك فرحان بس صــيهد مخنزر وجهه ما يكصه السيف وكلساع يخزرني خلاني احط عيوني بالگاع وبعد حتى ما عاينتله لمن وصلنه بيتنا نزلنا بريا يگل الميثم
-اذا ولد تسمونه على اسمي.
وميثم مبتسم ساكت رغد وصيهد راحوا وانه متانيه الصبح على احر من الجمر بس اريدن اروح احجي الامي، طبيت للغرفة اضــحك واجت ببالي ندى حطيت ايدي على گـــلبي ادعيلها من تسوي عمليتها كون تحبل بساع وما ينشلع گلبها.
شويه وطب مــيثم مبتسم سد باب الغرفة واستند عليه يعاينلي وكفت اضــحك فتحلي ايده
-تعاي.
لمني على صدّره حييل يبوس رگبتي ويهمس
-يا روحـــي سمسمتي حوريتي.
وخرت من حضنه اعاين لوجهه مبتسمه وراحت ابتسامتي من فكرت بالأيام الجايه
-مــيثم خاف بعدين من يصير عدنه طفل ما تخليني اكمل دراسة وتگلي بطلي
ضحك وحط ايده على جتفي يجرني الحضنه عصر وجهي بين اديه يبوسه ويحجي
-ما تبطلين هوه انا الما ارضى تبطلين شحدج تفكرين تعوفين الدراسة.
حار بيه وواكف وياي بالمطبخ من سوينه السحور ماعافني وحدي وهم بريا ما اكل شي ومن مــيثم حاجاه گاله شبعان، سكت منه الثاني يوم الصبح رحت الاهلي ندى تلگتني تضحك باستني وهي تگليي
ندى:: من هسه اذا بنيه وعيونها ملونه اخطبها الرضا، واذا ولد خيه مانريده.
ضحكت
-اذا ولد اتاني يصير عدج بنيه ونحجزهم واحد للثاني.
مشيت للبيت صارت بوجهي سعاد غمتني تغلط
سعاد:: جبح هالجهره الخايسه.
-جا خاله انتِ مو صايمه راح صيامج حرام.
تفلت عليًّ عفته ومشيت الجده سلمت عليها وهيه تگلي الجدي
-دريت بيها حبله.
ضحك جدي يهز راسه
-عفيه عفييه كون نسل خليل ما يضيع اريدنهم سلّف وحدهم.
سكتت اتبسملهم شويه ومشيت الامي شبگتها أبوسها جوري وبدور يسولها تمارين بأجهزه جايبهن الها صــيهد، وكبل صلاة الغده صارت هوسه وصياح واحنه وحده مگابله الثانية محد فاهمه شي.
""
رنـــه :: واكفه بالحوش يم طــروادة نسوي بالماطور مال الماي ما يسحب، والشمس تحمس بينه درنه اثنينا على دگة بابنه القوية ركض حسين فتحه وطب مــيثم متسودن مالحكت اطبن. للبيت اجه بساع لطرواده يحجي وياه بصياح وساعة يتوسل
مــيثم:: بس گله اطيكياها اخوي اذا راح ما يررد.
وطرواده هز راسه لا مــيثم صيح بحرگة ودار وجهه علي يحاجيني ويرجف
-رنـــه والله اخوي يحبج ورايدج .
طــروادة:: رنـــه طبي جوووه.
مشيت بساع للبيت ايدي على گـــلبي خايفه وميثم يتوسل بطرواده طبوا ســليم ووهب مأيدين حجي مــيثم محترك گلبهم على بريا جرن دموعي خايفه من دريت بيه يريد يروح للجيش لان يوميه جايبين السلفنه شهيد واكو بس يگلولهم استشهد ما يستلمون جنازته.
اعاينلهم من شباچ المطبخ امسح دموعي ويردن ينزلن طــروادة يعاين لميثم ساكت وميثم يتوسل بيه يحاجي بريا ويرضى يزوجني اله وهوه بهدوء يهز راسه لا
مــيثم:: ولك انا جاي أتوسل بيك كهلان عليك بروح ابوك لا تضيع اخوي من ايدي لو راح ما يردلي.
طــروادة:: ما اطيها لو يجيبونه شهيد
وميثم يعاينله بصدمة اديه ترجف هز راسه خوش ومشه طلع من بيتنا مكسور وهـــب وسليم راحوا وراه وصيهد طب الطرواده كعد يم الماطور بحيره حاط اديه على راسه گاله
صــيهد::ليش ما ترضى بيه؟
شال راسه طــروادة گاله بحرگه
-بالحسين لو اختك ما تطيها اله بعد سوايته، ولك ببيتي وهوه يتعدى عليها يغلط ويكضها اديها زرك من عده لو صارت على ذمته وتحرك گلبه شيسوي يجنزها؟ انا اختي لسان وتحرك الگلب وهذا من هسه شايف روحه ويتمادى عليها.
صــيهد:: شحده يمد ايده عليها، بس علمود مــيثم خطيه يفتر بينه حاير وهو بس هالواحد خايف عليه ما يريده يروح.
وطرواده هز ايده يدخن ويگله
-يابه بريا ماعده عقل لو احترك گلبه من سالفه يهد الدنيا وما يهتمّ الاحد !
صــيهد اختي مريضه ابسط خوفه يهبط سكرها وعلى ساعة تموت اضحي بيها علمود بريا لا والله لو تموتون كلكم ما تهموني گدها.
-يله انچب ولا تضل تاكل تبن خايس طاحظك وحظ اختك.
وكف طــروادة ضايج طرد صــيهد وصيهد ينعل بيه ويغلط ويصيح عليه
-اذا ما فجرت بيتك.
طب طــروادة للبيت عاينلي مسحت دموعي نتر بصياح
-علييييمن تبجين؟
شهگت ابجي بصوت
-خاف يمووت!
فتح عينه خازرني ومشه الغرفته صله وراح للگيعان ضليت افتر مختنگه صليت وما گدرت ارجع انام افكر بيه بخوف للعصر طلعت للحوش سگيت الحديقة ومشيت يم قفص الطيور اعاينلهن مختنگه فتحت باب القفص وطارن وحده وراه الثانية اعاينلهن وفزيت على طابوگه نشمرت بصفي وملفوف عليها ورقة عاينت للسياج ودنكت للطابوكه شلتها من الگاع فتحت الورقة منها اقرأ المكتوب
"تعاي اشوفنج لأخر مره گبل لا اروحن"
زفرت نفس مختنگه ومدري شبيهن دموعي كلساع يردن يجرن مسحتهن واعاين للسياج اسمع طكطكة عدلت حجابي على راسي عقچت الورقة اطويها بأيدي واعصرها حيل بين اصابعي مشيت بخطوات ترجف وكفت بصف السياج ساكته واحس بيه بصفي مابيني وبينه غير بلوك السياج، همس بصوت مخن
-رنـــه
جرن دموعي ومسحتهن سكته رد گال
-رنـــه حاچيني.
حجيت وصوتي خانگته الغصه
-لا تروح، هذا اخوك بدونك يموت.
جر نفس بحسره
-وانا لو ضليت هنا واعاينلج تنزفين الغيري اموتن
صيحت ابجي
-هسه شني انه مصخممممه متزوجه.
-تتزوجين هذا كهلان نوّه على ذبحي بزفتج الغيري.
شهگت دموعي تجري
-بريا.
-عيون بريا.
-لا تروح.
بچيت مختنگه واسمع نفسه اللي يزفره بحسره سندت ظهره على حايط السياج وشلت راسي للسما الحمامات فوگنه يفترن داير ما دايرنه
بريا:: رنـــه اصعدي خل اشوفن وجهج.
-ما اريدن كلي ما اروحن وآنه اصعد.
ضحك وانه بردن دشداشتي أمسح دموعي
-روحـــي ليغاد رنـــه يم الحديقة اصعدي.
مشيت وادفع بالدرام وصلته للحديقة من يم شجرة العنب حطيت الدرام وصعدت عليه بس رفعت راسي صار بوجهي، عيونه حمر رافع راسه مبتسم وانه دموعي مغرگه خدي
بريا:: ليش هالبچي؟
-ليش تريد تروح؟
نزل راسه ساكت وانه اريدن يرد ويگلي هاي هيه بطلت ما اروحن گـــلبي غده نار وما مرتاحه الخنگه ذبحتني، شال راسه يعاينلي ساكت كلشي حوالينه يحجي ورق شجرة العنب من يتحرك وي الهوه الحار سعف النخل اللي يروح ويجي بتمايل، الطيور اللي نزلن وحده وره الثانية وچم وحده وكفن على السياج بيني وبينه وبس تحرك بريا يتقرب يمي اكثر طارن ونزلن بالگاع عاين لعيوني يحجي بحسره
بريا:: ادعيلي استشهد وما أردن للقرية.
هزيت راسي لااا هواي
-ما تروح بريا انه ما أرضى تروح.
-عاينيلي ليش تبجين هسه انتِ؟
مسحت دموعي دايره وجهي الغصه خانگتني
بريا:: مو احاچيج؟
درت عليه احجي بحرگه
-عليك !!! انه ويامن اتعارك بعد اذا انتَ تروح؟
-لا تتعاركين تعقلين.
-عاين انه دوم ما متوسله بأحد اخر مره راح اكلك لا تروح والله تستشهد شمالك انتَ اكو واحد يروح للموت؟
هز راسه اي
-لا تتعبين روحج غزالتي ديربالج على صحتج ولا تاكلين حلويات خوش؟
سكتت عاجزه من شفته مقرر ومنتهي هاي هيه ما منها رجعه أيست وكتله
-ليمت ترجع.
زفر نفس طوويل متحسر
-ما ادري الله كريم.
-ديربالك على روحك عليك العباس والله لو صار بيك شي ترى انه اموتن من البچي.
ضحك وعيونه يلمعن لم شفته الداخل حلكه گوه يحجي
-لا تبچين عليَّ لو صار شي بس اذكريني دوم
حجاها ودنك مد ايده بجيبه طلع منها سلسلة وبيها خرزه لونها فيروزي مموج بين التركوازي والازرگ من سبحته اللي بلون عيونه شالها رافعها لازمها من السلسله لافها على اصبعه والخرزه بيني وبينه تروح وتجي يعاينلها مبتسم همس
- البارحة بس انتِ بفكري سويتها الج.
اخذتها من ايده مختنگة
-من ترجع بالسلامه اردها الك.
دنك وضحك ضحكه طويله
-اوكف لا تروح هسه اجي
نزلت ورحت للبيت اركض صار بوجهي حسين حجه بضوجه
حسين:: ليش تحجين وياه؟
عبرته ساكته طبيت للغرفة بساع وادور بغراضي مستعجله وانه صغيره امي جانت مسويتلي حرز بيه ايات من القران مثل الجنطة بگد الاصبع وببطنها الورق وبيها خيط لگيتها اخذتها بأيدي وطلعت اركض صعدت اعاينله گاعد على بلوكه والحمامات داير ما دايره ويجن على ايده
-بريا.
التفتلي مبتسم وكف مديتله الگلاده اخذها من ايدي
-البسها برگبتك بيها اية الكرسي وبعد آيات من القرآن .
-منيلج؟
-مالتي امي مسويتها الي گبل.
هز راسه خوش لبسها وحطاها جوه القميص حطيت ايدي على السياج اعاينله گـــلبي مكسور وهوه مبتسم بس عيونه تحجي غير شي گال
-يله غزاله ديربالج على روحج.
شلت ايدي امسح خدودي من الدموع احاجي بصوت مخنوك
-مو ما ترجع.
عاينلي نظره اخيره ودار وجهه مشه البيتهم بدون ما يلتفت. نزلت كعدت يم الحديقة روحـــي رايحه وحيل
خايفه گـــلبي ما مرتاح، غسلت وجهي ورحت أكمل الفطور، وبالي يمه الساعة بالخمسة اخذوه وهـــب وسليم للكراج ودّوه ورجعوا، من رد طــروادة للبيت ضايج وحتى بالفطور اكل لگمه وكام، اجه عليه صــيهد اخذه وراح.
"""""
مــاسه :: متت من القهر على مــيثم وكلبي يم بريا خايفه عليه بس هوه كلساع يخابرنه يطمنه شوي تقبلنه السالفة وميثم ما يحجي وي طروراده زعلان منه، بيوم العيد اول ماكعدنا لكينه بريا دازلنه معايده اثنينا معايدني وكاتبلي
"روحـــي الرنه عايديها"
من حجيت الميثم هز راسه بحسره مايدري يضحك ينقهر على اخوه اللي كل فكره برنه، تريكنا ببيتنا بدلت ووكفت گدامه مادتله ايدي
-وين عيديتي؟
وهوه حاط ايده وره ظهره فراها الي بيها. وردات تلاثة حمر اخذتهن منه اضــحك واشم بيهن
-يخبلن، اي والعيديه وينها؟
مــيثم :: جا مو البارحة اخذتي؟
-هذاك مصرف واليوم عيد.
طلع محفظته شال منها خمسين اخذتهن وهو يضحك جرني عليه يبوسني لبست عبايتي ومشينه الاهلي سوه اعاينله وابتسم، هوه راح من الهول يسلم وانه طبيت من المطبخ لگيت جوري گدامي تسوي چاي ما منتبهالي وانه اعاين للبسها اشوفهن شمشتريات من وراي شفتها خوش دشداشه دارت وجها وفزت من شافتني شالت السماعات من أذنها تضحك باوستها أعايدها
-عيدج مبارك.
جــويريه:: ايامج سعيده خل احجي. انه لا تكضيهم كل عام وانتِ بخير من العايدين والسايدين
-الشارعين احسن.
طكتني تضحك، طبيت للمطبخ فتحت جدورة الغده اعاين بيهن وهيه تصيح
جــويريه:: خوماتتغدين هناه؟
-ااي على گلبج اليوم حتى بالعشا هناه.
-يبوووي لا مرحبا ولا هله.
تحجي وتضحك سلمت على رغد منظرها يمررد گـــلبي كلنه كاشخين إلا هيه جانت لابسه اسود على غيث وامي ذبته منها گبل العيد بيوم.
اجت بــدور وبس شافتني گالت
بــدور :: مــاسه اانتِ تزوجتي بعد لازم تطيني عيديه.
-خيبه هو اني اجيت اخذ عيديه گلت هسه وهـــب وصيهد يطون بــدور وانه اضلن.
ندى:: شحده وهـــب يطيجن غير. اكسر ايده .
ضحكنه اعايدهن ونتسابق على الكلمه جوري اكلها بحضنج ولد تطكني بــدور اكلها. ان شاءالله عروس تطكني طبيت يم امي سلمت عليها عايدتها شويه باديه تحرك ايدها.
كالتلي وعيينها للباب
-خيبه يمه ما تحاجين مرت اخوج!
-ياهي ندى شبيها؟
-لا هذيج ام الهجع.
ضحكت وهيه تحجي بحركه
ايمان:: موتتني النهار كله مكابلتني وكاعده من الصبح حد الليل لمن تنعس وتروح غاد تلف راسها وتنام وصيهد ضال مسفط يرد من الشغل يلكاها نايمه ينام ويكعد يلكاها شارده شني ولج تلعبين وياه غميضة خفّت الايده كون كاضها وخالسها جا ماشردت منه.
-جا يمه ياهي الگالتله بس تمد ايدك عليها تنسى انه امك.
احجي رافعتلها حاجبي وهيه مقهوره من جــويريه وتگلي
-علميها علميها مالها غير رجلها.
-شعلمها يمه گبل تلطمني على حلكي وتگلي انه اكبر منج اعلمج ماتعلميني.
-جا تكضنها الي وخللني اكتلها افوخ گـــلبي بيها مو حطتلي عله هالبت هاااي.
ضحكت وطبت جــويريه تحلف
جــويريه:: تحجين عليَّ والقران تحجين عليَّّ
ايمان:: كومي مــاسه جيبيها الي خليني اعضنها من گلبها.
وجويريه لوت وجها تحجي بقهر
جــويريه:: مزاعلتني خاله؟ ليش هيج؟ اركصلج ونتصاحب!
تحجي وبدور وراها بساع شبگتها وجرتها تريد تجيبها الامي حتى تكتلها وهنه وحده تدفع الثانية طاحن اثنينهن على رجلين امي وهيه صاحت
ايمان:: يييمه يييمه من دهر الدهرجن.
اختنكن من الضحك وامي مدت ايدها چلبت بجويريه من شعرها وهاي منتهيه بس تضحك امي جرت شعرها بأيد وحده وجوري تزحف وره شعرها لمن وصلت الحضن امي وكضتها عضتها من أيدها جــويريه صرخت وبدور سدت حلكها
صــيهد:: لللج بــدور .
طفرت بدور كعدت عدل وجويريه كاضتها الضحكه على رجلين امي مختنكه وشعرها مملش وثوبها مدلع صاح عليها
-اكعددي غطي روحج.
كعدت جوري بساع غطّت روحها ولامه شفايفها تكتم الضحكه، وامي تكله
-شو تصيح ولك؟
ابتسملها وعاينلي گمت عايدته ابوسنه واعاين لجويريه ورانه گتله
-ان شاءالله يوم التاخذ الثانية
وجويريه من وراه شالت اديها تسوي امين وهو بساع التفت عليها نزلت اديها وكعدت عاقله طلع محفظته وكفت بــدور انطاني وانطهاها انطه الامي والرغد والندى وابنها بس جــويريه عافها وكلساع يعاينلها وامي گدامها لان حستها ضاجت گالت
ايمان:: ضام لجويريه الحصه الچبيرة خايف تطيها گدامنه.
ضحك بطرف شفته ويعاين لجوري گالها
-عيديتها من تطلع النتائج واشوفن معدلها.
ايمان:: گطعوا گلبنه.
جــويريه:: ليش ذكرتوني ضل گـــلبي يوجعني.
ضحكنه وهوه شويه ضل يمنه وراح للعصر رحت يم رنـــه جانت عفراء يمهم وبس كامت من يمنه گتلها
-بريا يسلم عليج.
عاينتلي ساكته شويه وگالت
رنـــه:: خاب هذا جذاب تحلمت بيه رايح على امه ويگول بالجيش.
-يااا.
-اي وعلي لا تصدكونه.
-جا شني نصدك حلمج؟
-جا انه احلامي بالمچان!
طكيتها على ايدها اضــحك فتحت تلفوني راويتها صورته لابس بنطرون عسكري وتشيرت لونه زيتوني فاتح وبأيده سلاح.
اخذت التلفون مني تعاين لصورته وايدها الثانيه تاكل بأظافرها لمن اجت عــفراء جايبتلي كليجة وچاي اخذت التلفون من رنـــه ضليت يمهن شويه ورديت الاهلي
"""
ريـــمه ::قاهرني تعود اهلي على حال سلطان بالاخص من شافوه شويه احسن وينتبه بس ابد ما يطلع من البيت وانه ما اعوفنه نوبات انامن بالهول حتى بس اسمع صوته اركضله،
بيوم العيد كعدت اعشيه عاينلي بعيونه الذبلانه يسأل
سلطان:: اكلتي انتِ وهجوره؟
-اي والله تعشينه لا يضل بالك.
هز راسه خوش، جبتله ماي غسل واصبله چاي بصحن اقربه الحلكه لان ايده ترجف ما يگدر يكض بيها الصحن، ضليت اسولف وياه شويه ومن شفته زين حجيت خايفه
-سلطان حاجي طــروادة انه ما اريدنه.
تمدد بفراشه لام رجليَّه الصدره ويعاينلي همس
-ليش؟
-ما اريدنه يريد يعذبني هوه.
غمض عينه وحرك راسه بتعب "لاا"
سلطان:: يريد يخلصج من شر امي وابوي.
يحجي گوه على روحه تعبان حيل مابيه يلمله جمله ويحجيها
-ارضي بطرواده روحـــي يمهم احسن الج لو ضليتي هناه تموتين على أيد امي وانا ما دايملج ريـــمه انا منتهي ولو رحت ما يضل الج غير سليم وهذا اعصاب اذا يفقد يطكج، بس طــروادة ما يأذيج اسمعي مني روحـــي يمه خليني اموتن مأمن على وحده منجن.
حجاها وكح درت وجهي منه شفايفي ترجف والدموع ملتمه بعيني جر الغطه عليه وحجه بصوت مخنوك
-طفي الضوه وياج.
دنكت بسته براسه الغصه خانگتني
-من عمــري على عمرك يا بعد رويحتي.
طفيت الضوه وطلعت من يمه عزلت البيت امي يم اخواتها راحت تعايدهن لهدعش يله جابها ابوي ومن اول ما طبت غمتني تغلط اعاينلها ساكته حتى من اريد اردن عليها ما اگدر ولا انقهر ولا اي شي اتقبل وكأنما فعلاً اني مذنبه وهي حقها باللي تحجي جرتني من شعري تنتر
-انه مو احاچيججج.
-ها.
-ووجعاه النامت بضلوعج امشي رشي الحوش.
عافت شعري هزيت راسي اي
-هسه ارشه.
لميت شعري لفيت الحجاب وطلعت للحوش ارشه وطب ســليم تعبان حتى بيوم العيد جدي بهذله بين الگيعان والمرعى عاينلي بتعب كعد بالحوش على الدچة ويحجي وياي
ســليم:: شلونه سلطان.
-زين تعشه ونام
هز راسه خوش سديت الماي وكعدت يمه كتله
-ســليم ماضل شي لواحد ثمانية وانه ما اريدن اتزوج وانتم ساكتين.
مسح وجهه بحيره وجر تلفونه اعاين وياه دور بالارقام وداس اتصال على رقم شيخ حيدر جريت التلفون منه سدّيت الأتصال
-شتريد تسوي؟
-اخابرنه اكله ابوي وجدي جذابين لا اكو وصيه ولا صخام وبتنا ما راضيه وجدك رحمه الله اطي كهلان مره من عدكن فضت راحت، جيبي.
ضميت التلفون وره ظهري افكر هزيت راسي لا
-اذا تسوي هيج شيخلصك من جدي وابوي.
عاينلي بعصبيه
ســليم:: انعل ابووج لا ابوهم جيبيي اخافن منهم انااا؟
وكفت مبتعده عنه والتلفون وره ظهري خزرني بغضب
ودرنه اثنينا على صوت سجاد يحجي بهدوء
سجاد:: اذا خابرت شيخ حيدر وكتله ماكو وصية وجدي وابوي جذابين حتى طــروادة راح يطلع جذاب گدامه وهيج انتَ حالك حال ابوي هم تكسر بيه وتجذبه گدام الوادم.
ســليم:: ليش ماشاهم بجذبهم ليش مابنص الديوان فشلهم وگالهم جذب ماكو وصية.
سجاد:: وانتَ وسلطان جنتوا كاعدين ليش ما حجيتوا؟ ليش كله براسه انتم تلومونه مــيثم يلومه الولد لا يمكم ولا بگربكم انتم تفترون عليه.
وكف ســليم بعصبية جر التلفون من عدي اخذه وراح للبيت وسجاد يعاينلي بحسره گال
سجاد:: ارضي ريـــمه احسن الج والله عليمن مچلبه ببيتنا لا اهل مثل الاوادم لا شي كاتله روحج عليهم عليمن؟ انا لو بأيدي اعيشن غاد ببيتهم وما اوصل بيتنا.
حجه ودار وجهه يريد يطلع
-وين رايح؟
-انامن يم عبود، روحـــي نامي انتِ كافي شغل كضه حيلج.
سد باب الحوش وراه لميت الصونده قفلت باب الحوش وطبيت للبيت غسلت وطفيت ضوه المطبخ تمددت بالهول ماصعدت فوك ولا شفت هاجر جريت الغطا على عيوني افكر بكلامهم وبطرواده يقشعر بدني من يجي بفكري
توني اغفي وسمعت سلطان يكح كمت اركض للغرفه فتحت الباب وشغلت الضوه كاعد بالگاع شال راسه عيونه حمر
-ها سلطان!!
بساع صبيتله ماي بالكلاص وكعدت يمه بالگاع اشربه واحاجيه
-بيك شي اكعد ســليم؟
هز راسه لا مسحت حلكه شال عيونه الي همس بصوت مخنوك
سلطان:: اريد اروحن الغيث.
حركت راسي لا گـــلبي يدك حيل لميت وجهه بين ايديي
-لا تحجي هيج سلطان خويه لا تحجي هيج فـــدوه اروحنلك.
-يم الشط بس اكعد يم الشط.
-لا لا مو هسه الصبح نروح انه وياك.
سند راسه على رجليَّه ساكت وانه مكابلته وگاعده بخوف شويه وگال
-روحـــي شوفي هاجر راح انامن انا.
تمدد على چرباية سليم غطيته طفيت الگلوب وطلعت صعدت فوك خفت على هاجر لان كالي روحـــي شوفيها شغلت ضوه غرفتنه اعاينلها نايمه تدنيت يمها اوخر البطانيه منها لان حاره مشغلين المولد وماكو مكيفات، غطيتها بجرجف. تمددت يمها بس ما گدرت ارجع انام نص ساعة عدت وفتحت عيني حيل مستوعبه كالي روحـــي الهاجر حتى يروح، گـــلبي سبق خطواتي نزلت اركض وخايفه فتحت الغرفة مالكيته.
يبس الدم بعروكي وبدون ما اكعد احد جريت العبايه من المطبخ وطلعت اركض للشط ما اشوفن وكلساع اعثرلي بشي وارد اوكف وأركض مرعوبه، مشيت على كيف من سمعت صوته يسولف گـــلبي يدك حيل اخطي الخطوه وجسمي يرجف
جلبت بجذع نخله واعاينله گاعد على الجرف ظهره علي ساند راسه على جتف واحد من الولد، صوت نفسي عالي بس ضاع بين صوت السعف السماء صافية نجومها قليلة والهلال مثل القوس مايل گوه مبين والشط يجري بسكون بدون اي صوت وهمه اثنينهم سكتوا اشوفن بس ظهرهم
شويه وحجه سلطان بصوت متعوب
سلطان:: انكسر حيلي وگلبي
طــروادة::افديك بگلبي وروحي يا بعد عيوني لا تحجي هيج سلطان هذا انت السبع ما تنكسر.
سلطان:: انتَ ما تدري عيوني لو غمضت شيشوفن كهلان انا منتهي.
-اشش كافي بسك من هالحجي لا منتهي ولا شي اخذنك للزياره هاه شتكول؟
-لا خلّني أحاجيك دامني هاليوم صاحي خلّني احاجيك
اسمعهم وابجي خنگ، شال راسه من چتف طــروادة يعاينله
سلطان:: اخذ ريـــمه لا تأجل العقد.
-اخذها بس من انتَ تصير زين اعقد واعرس بوجودك توكفلي مثل ما انا واكفلك.
مسحت عيوني وتقربت اكثر يمهم وره النخله وكفت سلطان دنك وحط اديه على راسه يگله
سلطان:: مالك غرض بيه دامني هالايام صحتي ممشيتني اعقد ولا تأجلها.
-سهله هسه انتَ عوفني على صفحة لا تفكر بيه المهم انتَ ترد توكف على حيلك وما تكسر ظهري بطيحتك وأنا ساعتها أعقد واتزوج.
شال راسه يعاينله گاله
سلطان:: انا اثقن بيك ما تأذي ريـــمه لا تعاقبها على سوالف ابوي كهلان اختي امانه برگبتك لا توجع گلبها ولا يجي يوم تمدّ ايدك عليها احلفك بروح عمي شامل لو شما تسوي لا تطگها.
دموعي تجري مختنگه خايف ويوصي عليَّ
طــروادة :: وروح ابوي ما اطكها شنّي السآلفة لا تحجي هيج عود لو مديت ايدي عليها بيوم اخذها مني.
سلطان:: هو لو انا ضال لوكتها اكتلنك بس انا ما اضلن، هل جاي احلفك.
وطراده حط أيده على جتف سلطان شبگه يحاجيه صوته مخنوك
طــروادة :: چا شمالك ناوي بهالليل تمرد گـــلبي بكيفك هيه ما تضل؟ لا تعيد هالسالفة.
مسحت دموعي ومشيت بساع
-سلطان.
داروا عليَّّ أثنينهم وكفوا طــروادة ساند سلطان مشيت بصفه مديت ايدي السلطان چلب بيه حاجيته ابجي
-مو كتلي راح انامن ليش اجيت هناه تريد تموتني من الخوووف؟
يمشي وياي وطرواده بصفه گال
سلطان:: ريـــمه حضري روحج واحد ثمانية خطبتج.
مشيت وياه ساكته وطرواده وصلنه الباب الحوش وراح طب سلطان للغرفة تمدد مغمض عينه وانه مگابلته ودموعي تجري، ومن ثاني يوم امي شدت حرب وياي ما تحجي وياي حچايه اذا ما وياها طكه لو كرصه ايديي زوركن ولا فد يوم بجيت ولا شكيت ولا صيحت بوجها عكس گبل اتعارك وياها وما اخليها تطكني هسه صرت بلا روح وبلا مشاعر اتقبل منها كلشي واي شي تگوله اهز راسي اي موافقه.
""""
جــويريه :: وكلوني طن خوف گبل النتائج تأخرن حيل وكل ما يحددون موعد يكولون لا بعد بسبب الأوضاع ما كملن واني باقيه القلق ماكلني، كملت تمارين خالتي ايمان وطلعت لكيت جده تغسل أديها بالمطبخ توها تريد تحجي وسبقتها گتلها
-تردين شي جده اني راح اروح اشوف رجلي خاف اجه.
باوعتلي بطرف عينها
-رشي الحوش گبل لا تنحمدين.
-العصر رشته رغد.
-رشيه هسه حاره خل يبرد.
سكتت شغلت الماطور ووكفت ارش بعدني ما مكملته وسمعت صوت البومه شمرت الصونده من ايدي ودخلت للمشتمل اركض سديت الباب ايدي على گـــلبي شجابها شلت ايدي ادعي كون يروح يخنك جدّه طبعاً القرين حس بيه ضوجتني بكلامها يارب يروح ويخلي مخالبه بركبتها.
دموعي تجري مختنگه خايف ويوصي عليَّ
طــروادة :: وروح ابوي ما اطكها شنّي السآلفة لا تحجي هيج عود لو مديت ايدي عليها بيوم اخذها مني.
سلطان:: هو لو انا ضال لوكتها اكتلنك بس انا ما اضلن، هل جاي احلفك.
وطراده حط أيده على جتف سلطان شبگه يحاجيه صوته مخنوك
طــروادة :: چا شمالك ناوي بهالليل تمرد گـــلبي بكيفك هيه ما تضل؟ لا تعيد هالسالفة.
مسحت دموعي ومشيت بساع
-سلطان.
داروا عليَّّ أثنينهم وكفوا طــروادة ساند سلطان مشيت بصفه مديت ايدي السلطان چلب بيه حاجيته ابجي
-مو كتلي راح انامن ليش اجيت هناه تريد تموتني من الخوووف؟
يمشي وياي وطرواده بصفه گال
سلطان:: ريـــمه حضري روحج واحد ثمانية خطبتج.
مشيت وياه ساكته وطرواده وصلنه الباب الحوش وراح طب سلطان للغرفة تمدد مغمض عينه وانه مگابلته ودموعي تجري، ومن ثاني يوم امي شدت حرب وياي ما تحجي وياي حچايه اذا ما وياها طكه لو كرصه ايديي زوركن ولا فد يوم بجيت ولا شكيت ولا صيحت بوجها عكس گبل اتعارك وياها وما اخليها تطكني هسه صرت بلا روح وبلا مشاعر اتقبل منها كلشي واي شي تگوله اهز راسي اي موافقه.
""""
شكرا لزيارتكم عالم روايات سكيرهوم
