رواية بيت المطلقات الفصل الرابع بقلم جمانه السعيدي
غفران كانت حياتي ماشيه صح مابيه رومانسيه واهتمام
بس اهون من حياتي بيت اهلي
مااريد ارجع الابوي وضيمه
من كد ماحازم هاملني تعودت وصار الموضوع عندي عادي
اصلا اني كنت فاهمه الحياة الزوجيه بلعالم كله مثل حياة امي وابوي
عباره عن مشاكل طول النهار هذا اكثر شي جان مخفوني من الزواج
وبعد حازم عني وانشغال بغيري وعدم قربه مني
كان بلنسبه اليه راحه نفسيه
اهم شي اعيش بدون مشاكل
وصلت الشهر الخامس ومااكدر اتحرك ابد
صممت خالتي تاخذني تشوف شنو سبب التعب
والمفاجئه طلعت حامل بتوم
ولهذا السبب بلكوه اتحرك مااكدر وعلى طول تعبانه
خالتي حيل فرحت وحماتي هم فرحتلي
بس حازم ماحسيته حيل فرح
يعني عادي عبالك عنده عشر جهال قبل
وسميره ضاجت حسيته
بس اني كنت كلش سعيده احساس الامومه حيل حلو
اما بلنسبه الابوي مشاكله ماتخلص ابد
وعلى كلشي يسوي مشكله
دنيا اني هنا خلصت ثالث متوسط وسميه وياي بلثالث
لان راسبه سنتين قبل
وابوي يوميه يتعارك ويه امي خل يبطلن شيسون بلمدرسه
جمانه السعيدي
وبيوم فاجئنا جايب عريس السميه
واحد من اقاربهم من الريف
اكبر منه ١٥ سنه مزوج ومنفصل عن زوجته
والكل يعرف اخلاقه شكاك حيل
زوجته انفصلة عنه بسبب الشك
بلاضافه بخيل كلش
لان احنا كانت سمعتنا سابقتنا بلمنطقه والكل يكول
ابو ايمان عنده هواي بنات واي واحد يخطب منه ينطي على طول
بقه خضير أقارب ابوي يتردد علينا الحد ماقنعه بهاي الخطبه
وابوي وافق
هلمره امي هجمت علي ماازوج سميه الهذا البخيل ابد
رجعت المشاكل زادت بينهم
وهلمره ابوي هدد سميه اذا ماتقبل يذبح امي
ويكول لكيت وياها واحد
سميه بس تبجي وماتعرف شسوي
امي تكله لاتخافين مايسويه ابد
جمانه السعيدي
كانت حالتنا اسوء حاله ياربي هذا هم ينحسب علينا اب
لو الله ياخذه ويخلصنا منه
هو يهدد وامي تعيط علي
هو يكول اذبحجن كلجن
وامي تكله طلكني بعد مااكدر اعيش وياك اكثر
حياتي وحياة بناتي جحيم بسببك
انت مو اب انت شيطان
بقينا اسبوع لا ناكل ولا انام وكلما يدخل علينا يصير عياطنا
ماله نهايه
الحد مادخل سحب سميه واخذها بلقوه
امي راحت اشتكت علي
من حضر كال بنتي موافقه وماعدها مشكله وزوجته
اني ابوها واعرف مصلحته اكثر
جابو سميه للشرطه ومن خوفه كالت اي اني موافقه
كان مهدده اذا كالت مامواففه على هذا الزواج
يذبح امي لان هي سبب هاي المشكله
وراحت من عدنا سميه
عروس بدون عرس تمشي وتمسح بدموعه
امي قررت ابد بعد ماتبقى بهذا البيت
جمعنا ملابسنا اني وياها وطلعنا من البيت قبل لايرجع ابوي
كان المفروض هذا القرار امي تاخذه من زمان
حتى تنقذ خواتي من حياتهن التعيسه
اكو بيت قديم معروض للايجار يعني نص عمر ينسكن بي منا لمن نشوف النا مكان
أجرنا سياره وطلعنا كبل
وصلنا والجوارين اتصلو بصاحب الملك وجابلنا المفتاح
الجوارين من سمعو قصتنا دزولنا فراش وعشى
ثاني يوم امي دزتني للمدرسه وراحت رفعت قضيه طلاك على ابوي
امي كلشي تحملت كل أنواع الضيم بس لا تحمل لقب مطلقه وخصوصا وهي بهذا العمر
وعدها بنات مزوجات وعدها حفيد وثنيبن جايين بلطريق
ماتريد احد يعير بناته امجن مطلكه
لهذا السبب كانت صابره ومتحمله بس هلمره الصبر خلص
جمانه السعيدي
ثاني يوم من سمعن ببه المعلمات كل وحده جابتله شغله
وحده فراش وحده مواعين وحده عين مال طباخ
الكل جان يعرف ضروفه الصعبه
ويحاول يساعدها كد مايكدر
دزو استدعاء الابوي ورفض يطلك
بس امي كالت اني متنازله عن كل حقوقي واريد اطلك
وضلت تشكي للقاضي شلون يضربه ويعنفه ويهينه
دزو علي إلقاء قبض
ابوي انسجن وامي اطلكت
واخيرا خلصت من هذا العله
اي ولله مو اب عله على كلوبنا
امي حاولت تتواصل ويااا سميه وتعرف اخبارها
بس ماكدرت ماتعرف بيا ولايه ازوجت
بس ابوي يعرف وين ازوجت
وابوي بلسجن ومستحيل يدلينا على بيته
اما بلنسبه السميه عروس بدون عرس
ناس بلريف وعدهم حلال وزرع والنسوان ويه الزلم تشتغل
وماكو راحه ابد
طول النهار ركض وتعب وشغل
وهو اكبر منه بهواي وعايش تجربة زواج سابقه
اما هي فقيره ولا عدها خبره ولا عدها قوه
كان يعامله اسوء معامله
على اساس هي زغيره ويريد يمشيه عدل
حتى ضرب يضربه
وابوي خله فلوس الجهاز بجيبه ومادفعله فلس واحد
اضطر ابوي يدفع فلوس المهر كفاله ويطلع
وكبل راح للمدرسه يريد يتعارك ويه امي لان تطلكت وسجنته
بس المديره هددته اذا مايبطل هاي سوالفه تشتكي علي
المديره اقترحت على امي تسجل محضر عدم تعرض
لان هذا مخبل ممكن كلشي يسوي
وفعلا امي راحت هي والمدير واشتكت علي والمديره شهدت
اجا للمدرسه وهدد امي
رجعو استدعوه ووقع ان مراح يتعرض اله ابد
بس امي كانت خايفه منه
والمديره كانت توصله يوميه للبيت
دنيا نجحت من الثالث وكان معهد التمريض مفتوح
اول ما انفتح وامي كالت سجلي بي احسن على الاقل تحصلين وضيفه
وفعلا قدمت على المعهد وبديت اداوم كنت مصممه انجح
واتعين واساعد امي
اما ايمان امي راحت تشوفه وشرحتله الضروف الي جاي نمر بيه ودلته مكان البيت الي سكنا بي
بس خطيه عايشه بس ميته
ماله وجود بلبيت
خدامه وبس
ايمان يمه اني بعد مااكدر اتحمل اكثر
مامرتاحه ابد وزوجي بي مايعاملني معامله موزينه
امي تخاف تشجعه وتطلك
كانت متوقعه راح ينصلح حاله بيوم من الايام
الحد مافديوم اجت ايمان والدم مغطيه زوجه كاتله
وكايلله بعد مااربدج بلبيت اربد ازوج
وخالته كايلتله روحي الاهلج
ماجره تكسي وجايبه بس ملابسه وجايه
جمانه السعيدي
امي بس شافته تخبلت كالت اكعدي واستكي
ماقبلت امي تشتكي علي حتى المشكله لاتكبر ويصير بيه عناد
بلكت يتندم ويرجعه
بس بعد يومين بلضبط اجت ورقة طلاك ايمان
الكل ضاج اله ايمان فرحت لان خلصت من هاي الحياة التعيسه الي جانت عايشته
اتفقنا ويه محامي رشحته النا معلمه ويه امي
يرفع النا قضيه نفقه وتعنيف واتعابه يحصله بس نربح القضيه
وفعلا المحامي بدا يمشي بلقضيه
وربحته ايمان اضطر زوجه يدفع تعويض بسبب التعنيف
ونفقه الابنه
الهنا صارن بلبيت مطلقات ثنيين امي وإيمان
طبعا ايمان من اجتنه وجه اصفر وشكله تعبان
بعد كم اسبوع رجع شكله مثل قبل
ردت روحه من خلصت من زوجه واهله
