رواية الرجل لاينسى حبه الأول الفصل الرابع بقلم سهير رائد
...
بعد ما راحت شيماء اتقربنه اني ومرت جهاد وابوي الدمعة بعيونه .
كال يلا خلصن عشاجن حتى نرجع ورانه طريق .
ماتعشى واحنه هم على السريع اكلنه . بس تعبانين كلش يعني ستونه جاين من العمرة واجينه للزيارة هم طريق مسافه بس ابوي وامي يكولون اللي يعمر لازم يزور الحسين وراها ؟
رجعنا للبيت ب11 عزلنه غراضنا على السريع واني نمت نومة ماحس الا امي تكلي خايبه اكعدي غسلي الطرمه نظفي الصالة الطباخ راح يجي.
كمت لكيتها بالسته غسلت الطرمة عزلت الحديقة نظفت الهول والصالة وعطرتهن وبخرتهن .
اجه الطباخ وياه غسان .
مرت غسان بعدها ماجايه الا تطلع الاربعين .
مرت جهاد وياي تنظف بالبيت
اجه عمي غزاي ساعة9 جايب جيس تمن وشكر ودهن
هاي العادات عدنا اليروح عمرة او حج او يعرس الواجب بجياسة تمن وتنكة دهن وشكر.. وكلمن حسب مقدرته على الواجب .
ابوي عازم هواي ناس لان جابوا ميوزة ومن غير الهول والصالة والحديقة
وذبح عجل وطباخ عبالك عرس
.
وهو من اليل
يخابر ويعزم وبالنهار
ساعه 11اجت الناس وهوسة كومه زلم والجيران والقريب والغريب .
اني ماعندي شي اشتغلة كلة برا على الطباخ
نمت ساعه 12هما يصبون كعدتني بنت اخوي بعد ساعه كومي تغدي
كوة اجر بروحي اتغدى
مرت جهاد اسمها رؤى
كالت اكلج الليلة كله افكر بنت عمج شيماء هل الجمال وعافها جهاد ليش .
ضحكت يحب السمر
يا صدك والله اقارن نفسي وياها شلون انطاه گلبه يعوفها وهو جهاد يخبل وهيا تخبل شتطلع جهالهم .
كتلج يحب السمر واتزوجج .
رؤى يااا بس تدرين حلوة حلوة بيج ملامح منها بياضج طولج ضعفج هيج شي
وج اني لو اشبه شيماء والله فلا اتحاجى
واحجي بفلوس واصير مغرورة
رؤى . هو رب العالمين هم يعرف بالنفوس .
ضحكنا اجت امي اش اصواتجن منا عالم .
رؤى اكلج خالة شيماء بنت حماج ليش جهاد طلكها..
امي . اغم غير تخبل وحبابة
رؤى . هااااااا لعد ليش خطبتيني اله هااااا خالة هااا
امي . اي موصارلج ساعه تردين هيج جواب من بشوره كلت اني اجاوبج هيا مثل اخته والزلمه يكره ينفرض عليه شي وكلنه فرضنا عليه يتزوجها وهو مايشوفها الا اخته حتى لو ملكة جمال والكلب ومايهوى وهو بس شافج كال هاي البنية عجبتني ودخلت كلبي . ارتاحيتي هسه بس فضيها
رؤى . لا مارتاح الا اسئل جهاد واعرف الحقيقه البنية حلوة.
امي . اهوووو كافي رؤى البنية تزوجت وخلفت وعاشت حياتها وجهاد هم وواحد مايهوى الثاني انتي ليش تفتحين دفاتر عتيكة وبعدين هذا النصيب هسة انتي شنو تستفادين من هذا الكلام يجوز يحجي حجايه بالشقى يحرجج بيها وتنقهرين ماطول هو يشوفج ست النسوان شلج بغيرج وبالماضي .
سكتت رؤى صدك والله شنو يعني حتى لو جانت شيماء حلوة وتخبل بس الكلب وشيريد وجهاد يحب رؤى يموت عليها وهيا هم ومرتاح وسعيد وياها .
شوية وبدت العالم تخف وهمزين الطباخ وياه ولد يغسلون امواعين بس جابو الاكل الزايد كمنا نوزعه على الناس ياخذه جهاد ويوزعه على مناطق بيها ناس فقراء هو جان خير من الله الاكل .
كلها راحت بقينا بس احنه هم نظفنا الصالة والهول ومكان والحديقة والطرمة .
واكو ناس تجي شوية شوية
وتعب بتعب بس تعب حلو .
بعد يومين كاعدين
امي كالت رؤى من يوم شافت شيماء كلساع تكول ليش طلكها
ابوي انتن النسوان اتجيبن النگد لروحجن
ابوي . يابوية مردت گلبي مرد من اني كاعد وماحس الا وحدة حضنتني وتبوس بيه وتبجي عمي حبيبي عمي حبيبي عرفتها شيماء تبوس بدية وراسي ودنكت على رجليه تبوسها كدام العالم وتكلي عمي اني اللي اذيتك ابريلي الذمه عمي اني سبب شيلتك والذنب بركبتي . متت عليها من القهر شلون تبوس بية وتبجي
امي اي والله صدك شلون تبجي تكسر الخاطر وتبوس باابوج وتطلب رضاه والله واحد يحجيها لله وراح ضيجة گبر وملائكة خوش بنية بس الوراها اعوذ بالله .
.........
اجت مرت غسان ورا اسبوع . وراها بدينه بالدوام
اول يوم دوام اول سؤال من المعلمات شنو مانخطبتي تزوجتي .
انقهرت . كتلهن انخطبت ومصارت القسمه ومافكر حاليا بالزواج .
احس واهسي انكسر .
جنت متحضرة روحي كلش للدوام مشترية ملابس ذهب حجابات جنط يعني دوام ونستي وكشختي الوحيدة .
وياي فطومة بنت غسان بالدوام .
متعلقة بيه حيل يعني بيت واحد شلون ما تتعلق بيه
وكل فرصة اروح اشوفها انطيها شي تاكلة وبنت الاخ عزيزة وعلى الگلب .
وحدة من المعلمات تكول خطيه بقت بلا زواج وتربي جهال اخوها!
يعني اني مداخلة بالعمري بعدني بداية شبابي هستوني راح ادخل26تعينت اول اشهر من تخرجي ولامرة راسبه بالمدرسة يعني مو جبيرة .يعني اكو ناس شما واصله بالدراسه تبقى همجية التفكير ومع الاسف هذا الشي يحبطني جدآ
...
اجه عمي غزاي يعزمنه بعرس ابنه اصغر مني ب4سنوات وعمي كلما يشوفني يكلي لو الله يهديج وتاخذين وليدي كلبي ماينطيني ازوجه لغيرج
صدك اضحك وامي تكلة يا على بختك غير اصغر منها .
عزمنا على عرسة وحلف امي بروح اخواني الماتوا لازم تجي وحلف ابوي وحلف غسان واجاني للمطبخ حلفني يمشي ويحلف بينه
ابوي كلة كو انت تعرف ابوي منعني اروح لهناك
وحالف علية
وخاف يشوفني يكوم يحجي كدام العالم وفشله .
عمي كلة انت جاي لبيتي قابل لبيت ابوي وابوي مو مثل قبل ماله علاقه ..
اني حجيت اني ماريد اروح و ادخل لهناك ابدآ ماكدر .
نبقى اني ومرت غسان بالبيت .
بيوم الحنه اجه غسان كال باجر اخذ مرتي والجهال يتعرفون على بيت عمي وهناك اهلنه !!
كلت اروح لبيت جهاد منا لمن ترجعون .
امي كالت مرت جهاد راحت لااهلها تبات وعكبة ترجع !
ابقى وحدي
امي كالت اني بيني وبينج ماريد اروح .
هاي هيا اني وياج نبقى .
بليل امي كالت اني وبشائر مانروح
ابوي : لا عيب شنو ماترحين ام جهاد الرجال عزمج ويبوس براسج ويحلفج الا تحضرين عرسهم عيب ترا .
امي :والله ماكدر اروح وبشوره وين تبقى وحدها
ابوي سكت كال بوية روحي شوفي بنات عمج وعماتج وصاحباتج كبل .
كتله لا ماروح .
غسان . لا ترحين شنو ليش ماترحين اريدج باجر اكشخ وحدة واحلى وحده وابوي يكعدج بالصدر وامي لورا وترحين ويانه نشوف صديقاتج والمنطقه وبنات عمنه صارلنه سنين مبتعدين عنهم وهما يحبونه ويسألون علينة ليش هل الكطع ؟
ابوي كال عمك يريدنه قبل الغدا .
هاي هيا اصعد نحضر نفسنه لباجر هم يلا . بشوره كومي حضري نفسج ؟
اشوف امي وابوي ساكتين .
كمت اعزل البيت تعزيلة قبل النوم .نزل غسان كال اذا مترحين امي وابوي كالوا مانروح وعيب وخطيه هما !
يتمنون يرحون بس علمودج مترددين ومنحرجين.
شعليه بيهم بس امي متريد تروح هيا كالتلي .
غسان:لا امي تريد تروح بس تراعي مشاعرج .
سكتت كتله الله كريم .
سبحت ونمت . كعدنا بالسبعه ملابسي جاهزة ماعندي شي مو بمكانه يومية من ارجع من الدوام اغسل ملابسي واكويهن وارجعهن وكلشي مرتب عندي .
طلعت دشداشة وملابس للطريق وملابس للعرس ومكياج ولبست ذهب بسيط .
اني من تعينت كل سنه امي تشتريلي شي خطيه تلم راتبي هيا وابوي ويشترولي
عطوري وبعد حبشكلاتي .
جنت اكثر شي شايلة همه بالروح دخول الشارع
والطفولة الليتعبت بيها بيت جدي
وكلمة ليش ماتزوجتي لان احنه ناس عرب وعشاير والعرس اهم شي عدهم التعدي العشريين ماتزوج هااي عنست وسبحان الله المكان العايشين بيه هم هيج تفكيرهم .
وصلنه بعد 3ساعات يمه الطريق يشلع الگلب ومن وصلت لمنطقتنا القديمه ايباااه شكد متغيرة كلشي بيها من وصلت لفرعنا دنكت ماحبيت اشوف بيت اهلي ولابيت جدي اللي هو بيت عمي ابو خضر
اكره شي بحياتي اقرف شي .
امي . همزين خلصنه من البيت جان نحس !!
ابوي هذا البيت ااااااخ ياهذا البيت وسكت بحسرة
وصلنه لبيت عمي وهوستهم شكد حلوةدخلنه ورحبوا بينه والهلاهل الظاهر مشتغله عائلتنه معروفه بكثر خلفة البنات.
والبنات دك وركص كالن صارلنه 3ايام نركص ..
كعدنا بوحدة من الغرف جابو ريوك معلاك محموس يرد الروح تريكنا .
وراها بساعه الغدا هم يرد الروح .
وبدات تجهيزات العرس طبخ وتبديل وهلاهل ولاانكطعت حتى ابن غسان الصغير كام يبجي من الهلاهل .
وطبت وحدتها هلهولتها تخبل .
ودخلت للغرفة تسلم وتبوس ابتهال .
ابتهال اطيب وحدة بيت عمي جانت مداريتني بشكل ومن ازعل أتراضيني ومن يقسن عليه تحاميني .
دخلت تحضن وتبوس وتبوس بيه منا ومنا وخطيه دمعته بعينه تكلي تذكريني ابتسمت اي ابتهال .
وصاحت جهالها تعالوا ولكم هاي بيبيتكم مرت عمي ومرت خال ابوكم من الطرفين اهلنه
وهاي بشوره بنت عمي الصغيرة الحلوة
كبرانه وصايرة تجننين عبالك شيماء من جانت صغيرة
امي . يااا ولج شيماء وين اكو بجمالها .
ضحكت كالت شلون ام المفروض تكولين بنتي احلى
امي . لا عمه وراي حساب وعقاب ليش اجذب هههه
كعدت يمي والهوسة لزمت ايدي كالت شلونج بشائر زينه .
الحمد لله زينه انتي شلونج
ابتهال . بخير بشوفتج والله وداعت جهالي من شفت عمي وغسان برا كلش فرحت وكلي غسان امي وبشائر ومرتي جوا دمعت عيوني هيج نرجع نلتم مثل قبل اهل وحبايب .
سكتت ماعرف شجاوبها .
كالت بيتي اني هنا بعد شارعين وعايشة حياتي ومرتاحه ودائما اتذكرج وادعيلج وين ماوين ؟.
اشكرج
ابتهال:شنو احجيلي عنج وين ماوين ماكو شي منا منا احجيلي عنج
والله تعينت ومرتاحة بحياتي
ابتهاال . الله يسعدج ويهنيج بجاة النبي
هسة تجي عطور للعرس اكيد تفرح من تشوفكم .
زينب شخبارها.
ابتهال . يعني مثل ما جانت قبل خطيه مشاكل وتعبانه ومريضه الوحيدة اللي معايشة حياته بينه .
ايي خطية ربي يسعدها . قبل فترة شفنا شيماء بالزيارة .
ايي كالت شفت عمي ومرت عمي بس مكالت شافتج .
هيا التهت تبوس باابوي وماانتبهت لوجودنا اني ومرت جهاد
ابتهال . صدك جهيد وينه البذات كون اشوفه مرته ماجايه ؟
لا مجايه وحلو اسم جهيد اصيحلة بيه
ابتهال من جنه صغار وملمومين اصحيله جهيد يتخبل وحتى بالمدرسة من اضوجه اصيحلة جهيد..
اي حلو هو من يضوجني يصيحلة بشيور
خوش كليله جهيد ابو عربانه هسة يتخبل جان واحد ماتذكرينه جنت صغيرونة عندة عربانه اسمه جهيد من اضوجه اكله جهيد ابو عربانه وضحكت .
ضحكت . بعدج طاقه ايجابية ياابتهال .
لعد شعبالج اني مثل مااني وافضل واحسن كلشي تغير ترا احنه جيل ربينه نفسه وعلمناها بعيدا عن اهلنه وكطعهم وسوالفهم
ايي والله صح ..
ابتهال :رجعت باستني والله فرحت من شفتج بشورة .
اني هم
جنت مستحية منها
شوية وكالوا راح تروح الزفه منو يروح بيت العروسة بعيد ولازم نجيب العروس من وقت عاداتنا وتقاليدتنا عيب تدخل والزلم برا المعازيم.
بقيت اني وابتهاال كالت ماروح وعماتي اثنين وشوية اجت عطور .
وهم سلام وكلام وسؤال وسوالف عطور متغيرة زوجها توفى هيا موظفه وعدها الولد والبنية الولد اعدادية ستوة والبنية متوسطة كاعده وي بيت عمي .
بس صدك سوالفهن حلوة وتختلف عن الحياة والاهل وصله الرحم عكس الكبار سبحان الله اتبادلنه ارقام التلفونات .
ونسولف عن الدوام على رشا عن حياتنه سوالف بنات عم .
بس ابد مجابلي طاري لاي شي يضوجني بالعكس فرحانات بحياتي ويدعلي بحياة سعيدة .
جنت خايفة بس لاتجي امهن اموت منها حية صفراء مثل متوصفها امي .
اجت عمتي كالت جدج بالصاله يكول اريد اشوف بشورة؟!
بقيت صافنه كتلها هااا من يجي ابوي
يا عمه غير جدج قابل ياكلج .
خابرت ابوي كتله جدي يريد يشوفني . ابوي . روحي سلمي وبنتي اي حجايه تغاضيها رجال جبير لخاطر ابوج سلملي .
صار بويـة تدلل .
عمتي يا عمه على بختج دكومي .
كمت ماحب ادخل ابد عليه كتلها منو يمه
كالت بس هو بالديوانية يا بعد عمتج هذا جدج والفات مات ؟
اي صح الفات مات
دخلت كلت السلام عليكم وبقيت واكفه بالباب اباوع عليه كبران كلش بس بعده بشماغه وعكالة واناقته .
عمتي هاي بشائر بوية .
جدي . هلا جدو ماشاءالله اللهم صل على محمد وال محمد تعاي جدو ابوسج
كوة تقربت منه مديت ايدي دنكت بسته بس روحي طالعه منه مدري ليش .لحظة اتذكرت من طرد ابوي لو من كال بشائر تزوج خضر وفرض عليهم الزواج وخربت الاخوة بينهم
وحرم ابوي من منطقة وظلمة لابوي كلهن مرن من عيني بلمحة بصر
عمتي . جا بويةمحد يبقى صغير وبنات اخوي عين الله عليهن الله يرحم رسل لوباقية جا زينة البنات هسة
جدي الله يرحمها هنا بنات ابني زينة البنات الله ييخليج ياجدي !
بكلبي يريد يموت معقولة ؟هيج كلامه صاير يمدح بينه !!
طلع فلوس من جيبة خمسة وعشرين كال هااي اشتري بيهن ثوب من جدج ؟
لاشكرا جدي عندي خير من الله .
جدي . وعلي عنودية ابوها
عمتي اخذت الفلوس كالت تستحي بوية اني انطيهن لاامها وينطيك طولة العمر بوية .
صارت هوسه وهلال وافتح الباب كالو اجت الزفه اني كمت .
رحت جوا
اجت الزفه ورمي وهلاهل وركصصصص
هيا هاي اعراسنا والزفات
رمي
هلاهل
جهال ماتعرفين المن جوا رجليج تبجي والتركص واللي تلگط جكليت
جكليت يفشخج من كل الاتجاهات
اللي يدبجن بالنص واللي يهوسن ماتعرفين منو ومنو من الهوسه
وحدة تهوس وحده تركص وحدة ترد
لحد ما يملن لو يتعب ويأخذن استراحة ويكعدن يسلمن شي على شي اللي ممتشوفات او جايات جدد لو اللي
مضيعه جهالها ودور عليهن
وهيج اعراسنا تخلص وكلش احب هاي الاجواء
بقينا نضحك ومتونسات وي بنات العم
صدك تونست لحد ما دخلت وحدة وكال (مسا لخير يلحبايب )
يمه گلبي وجعني وكمت ارجف عركت كعدت بصف امي ردت امي السلام وهيا تقدمت علينة بعد ما سلمت على اللي قبلنه
وامي هم كامت وجرتني اكوم ابـوسها
لان هيا اجت علينه .
بس بستها احس ريحتها تذكرني بشي سطرتني اختنكت كلش كلش كعدت بصف امي واني الدنيا فرتني خوفا وكرها وحقد .
وريحة اتذكرتها قبل سنوات خلتني اذوگ المر منها 😭
من تحجي صوته يأذي گلبي قبل أذني .
ام خضر . بس شنو ابتهال من جهة وعطور من جهه كعدن يمها .
كالت شلونجن شعجب شفناجن ؟
امي:بعد الوجوة تتلاگ يام خضر بالافراح دوم ان شاءالله ملگانه ونتشاوف .
احس بلاعيمي انجرحت من طلعت كلمة زينة
ام خضر:شني ما عرستي ؟!
ابتهال شتسوي بالعرس عايشة حياتها يوم عمرة يوم طلعه ويوم زيارة وعميي مدللها .
ام خضر جا البنية من تكبر شني ظلتها !!
امي لزمت ايدي تريد تحسسني بالقوة واتجاهلها ،
ابتهال يمه الوكت اختلف عن وكتج وضحكت وين العشاء بيت عمي متعشونه نريد نصلي ونتعشى ونكمل الدك والركص وضحكت وحاولت تغيير الموضوع بكل سهولة
يمه متوضيه .
ام خضر اي متوضيه جا شكلولج عليه !
احس اني الغرفة صارت خنگه
كمت طلعت من الغرفة كعدت بالهول احس حتى صخنت
خابرت غسان كتله شوكت نروح خلينه نروح ؟
غسان شبيج بشائر
اختنكت غسان فدوة حسووو بيه .
غسان عيب نروح ونزلوا العشاء وبيت عمي نعوفهم .
سديت التلفون . خابرت ابوي كتله بوية خلينه نروح اختنكت.
جاوبني بسرعه . ام خضر اجت ؟
ايي بوية واختنگت خلينه نروح لبيتنا ؟
كال تعالي بالطرمة ماكو غربة بس اني وابن عمج الصغير .
طلعت من المطبخ لبرا للطرمة خطيه حاس بية ابوي جان مخلي مصلايته ومتوجة يصلي والهوسة برا كلها بالشارع
كال تعالي بوية هنا يمي علما اكمل صلاتي واطلع للعالم .
گام يصلي واني يمه احس صدك ارتاحيت حس بيه ابوي .
ندك الباب فتحوه و دخلوا عشاء النسوان ابوي كال ابقي بسدي معليج بيهم ..وليداتج عمتج مو غربة .كمل صلاته وگام
كال اطلع شوية وارجع كعدي بالديوانية محد اكو وشوية واجيج واروح
بس هسه عيب من العالم اطلع بالعشاء يگولون مطرود ؟
طلع واني دخلت هيا هوسة البيت يمه نسوان وجهال بس حلوة لمتنه .
اجت امي كالت تعالي تعشي ومعليج بااحد .
كتلها لا منتظرة ابوي كالت شفتي
اي شفته
خوش راحت هيا وبيدها ابن غسان
بس شنو كلساع وحدة جايبلتي صينية ليش ما تتعشين
اكلهن هسة اتعشى .
نص ساعه واجه ابوي صاحني جايبلي عشاء خطية وكال تعالي اكلي حتى نروح ادري بيج تجوعين
كتله لابويه خلينه نروح تعبت ماريد الاكل هلمرة اتحمل الجوع بس كون نرجع لبيتنا .
ابوي:صبرلي ساعة مو اكثر ونروح
فرغت الصاله كعدنا بيها اني وياه وابن عمتي صغير .
كوة كمت اكل وياهم جانت الصينية ترد الروح تمن شعرية كشمش فستق ولحم هبر .ولبن وخضرة وخبز .
شوية اجه عمي شايل بيدة صينية جبيرة كال من تخلصون حلو ..
ابوي يلح اكلي بوية يلف لفات وينطيني
كتله بوية اني احب اللحم على التمن .
كال ماطول كلتي هيج مابيج شي وضحك .
انفتح الباب دخل جدي خفت منه .
ابوي: تفضل بوية .
جدي . الف عافيه ماكل بليل هسة يجيبولي خبز ولبن وبس .
اباوع على ابوي يحجي وي جدي وعادي ولاجن ظالمه وطاردة
ابوي:بوية هاي خوش وذره اشتهيتها الك لفه تحب هيج لحمة ناشفة
كل اللي أذوني من صغري اخاف منهم كلش واكرة تواجدهم اتضايقت بوجودة رغم محد موجود بس هوا وبابا وابن عمتي صغير جاهل يعني .
وابوي عجيب عبالك مصاير شي هو وابوه !!
شوية وهم اندك الباب كام ابن عمتي فتح باب الصاله
دخل واحد لمحته خضر ضجت سلم
گال السلام عليكم بس مدنگ
ودخل بيده صينية وجان لابس قاط كعد گبال جدي ع الطبله يوكل بجدي .
ابوي باوعلي همس بوية اذا خلصتي كومي حضرن نفسجن نرجع
كمت طلعت من الصاله .
دك عليه ابوي كال نص ساعه ونطلع .
بقيت بالهول ..
احلى شي بااعراس اهلنه الهوسة والصياح والجهال التبجي والتتتعارك والنسوان وحدة تغور الثانية ..
بس اتعس شي من يوجد بنفس المكان شخص مؤذي الك 💔
جدي ام خضر وخضر
كلهم اشخاص احس بأذيتهم يمكن خضر مو مثلهم بس شوفته ذكريات سيئة ماريدها بحياتي ابد ابد
واني شكد ما اكول هما أذوني ماابريء اهلي وياهم اللي هما شاركوا بااذيتي بس صححوا خطأهم من زمان ويحاولون يرضوني بأي طريقة.
امي تعشيتي وي ابوج .
ايي تعشيت انتي ليش عفتيني وحدي .
ماعفتج عيب اكوم وعماتج وبنات عمج وبعدين اني ماقصرتي كمتي وطلعتي .
زعلانه ما احاجيج
امي . ولج ماما يعني اكوم وراج واعوف مرت اخوج تحوس بجهالها وحدها .
شوية وزفوا العريس شكد اكره هاي اللحظة .
حتى بزواج اخوني جنت اضوج من لحظة يزفون العريس !
وي الهوسة والزفة تبقى الحبايب تركص. لحد ما يدخل عليهن واحد من عمامي او ولدهن ويزمخ بيهن يلا يسكتن ههه
شوية وصاحنه ابوي للسيارة سلمنه وطلعنه واني اول وحدة ركضت صعدت
واشوف خضر واكف يم ابوي وغسان يقنعهم يباتون
ويسولف وياهم وسلم على امي ومرت غسان !
طلعنه منهم سيارتنا بطلاع الروح
وسيارة غسان ومرته وجهاله خو غسان كوة طلعناه يريد يبقى وياهم متونس..
امي وابوي :كلهم ذكروهم
وامي منو شافت وشسولفن وافلان اتزوج وافلان هيج يشتغل وفلانه وعلانة خلصوا الطريق واحسهم فد متونسين
حتى من رجعوا من بيت الله مو هيج جانت ونستهم بشوفة اقاربهم
وصلنه للبيت متأخرين ..
كلش سبحت وتمددت اجت رسالة بموبايلي اخلي على الميز يم راسي ماعندي اي ارقام غريبة
ابوي
امي
نسوان اخوتي
اخواني ا
اختي
المديرة والمعاونه ومعلمتين وياي.
رقم غريب .
فتحت المسج
كلام ذكريات مافهمت شي ؟
جزء من النص مفقود؟ رسالة مو واضحة
ومكطعه موبايلي مو زينه بالمسجات
سحبت موبايل ابوي ودكيت الرقم .
خضر؟
احس شي زعجننني
طفيت الموبايل وكمت اقراء المعوذات
واتخيل شكل امه تريد تخنگني بريحتها اللي ماانساها مدري ريحتيش خنكت روحي ونمت .
شكرا لزيارتكم عالم روايات سكيرهوم
